Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 ARTÍCULO NEMA NATALIKGALHTAWAKGA 12

Kalilakgaputsaw tuku makgkatsikgo amakgapitsin

Kalilakgaputsaw tuku makgkatsikgo amakgapitsin

«Putum wixin watiya talakapastakni kakgalhitit, watiya kamakgkatsitit, kalapaxkitit la linatalan» (1 PED. 3:8).

TAKILHTLIN sjj 90 Kalamakgpuwantiniw chatunu amakgapitsin

TUKU NATALICHUWINAN *

1. Chuna la wan 1 Pedro 3:8, ¿tuku xlakata tlan limakgkatsiyaw akxtum katatawilayaw tiku lilakgaputsakgo la wilanaw chu tuku makgkatsiyaw?

KIMPUTUMKAN tlan makgkatsiyaw akxni wi tiku lilakgaputsay tuku makgkatsiyaw chu la wilanaw. Umakgolh latamanin makgkatsikgo tuku makgkatsiyaw chu akgatekgskgo tuku lakpuwanaw. Akxilhkgo tuku maklakaskinaw chu kinkamakgtayakgoyan, lakgachunin chuna tlawakgo maski ni nakaskiniyaw. Lanka xtapalh kaʼakxilhaw tiku makgkatsikgo tuku makgkatsiyaw chu tlawakgo tuku wan unu «kalapaxkitit la linatalan», * chuna la wan 1 Pedro 3:8 (kalikgalhtawakga).

2. ¿Tuku xlakata max tuwa namakgkatsiyaw nakalilakgaputsayaw amakgapitsin?

2 Putum akinin kstalaninanin Cristo limasiyaputunaw pi kalilakgaputsayaw amakgapitsin. Xlikana, max tuwa makgkatsiyaw chuna natlawayaw. ¿Tuku xlakata? Xlakata makglakgalhinanin akinin chu talakaskin naliskujaw pi ni kajwatiya akinin nakinkalilakgaputsakanan (Rom. 3:23). Makgapitsi akinin max tuwa makgkatsiyaw chuna natlawayaw xlakata la kinkamakgastakkanitan chu tuku titaxtunitaw. Chu max na nakinkapasayan xtayatkan latamanin, xlakata kʼuma xaʼawatiya kilhtamaku lhuwa latamanin ni lilakgaputsakgo tuku makgkatsikgo amakgapitsin, chu kaj xʼakstukan kapaxkikan (2 Tim. 3:1, 2). ¿Tuku nakinkamakgtayayan namakgatlajayaw tuku kinkamalakgachokgoyan xlakata ni nakalilakgaputsayaw amakgapitsin?

3. 1) ¿Tuku nakinkamakgtayayan tlakg nalimasiyayaw pi makgkatsiyaw tuku makgkatsikgo amakgapitsin? 2) ¿Tuku naʼakxilhaw kʼuma artículo?

3 Wa tuku tlan nakinkamakgtayayan nalimasiyayaw pi makgkatsiyaw  tuku makgkatsikgo amakgapitsin wa nastalaniyaw xliʼakxilhtit Jehová chu Jesús. Jehová tapaxkit chu kinkawiliniyan xatlan liʼakxilhtit (1 Juan 4:8). Jesús liwana limasiyalh xtayat xTlat (Juan 14:9). Akxni xlama kKatiyatni, limasiyalh la tlan nalimasiya talakgalhaman chatum lataman . Kʼuma artículo, pulana nalichuwinanaw la limasiyakgonit Jehová chu Jesús pi kalilakgaputsakgo tuku makgkatsikgo amakgapitsin chu alistalh naʼakxilhaw la tlan nastalaniyaw xliʼakxilhtit.

XLIʼAKXILHTIT JEHOVÁ

4. ¿La limasiya Isaías 63:7-9 pi Jehová kalilakgaputsa tuku makgkatsikgo kskujnin?

4 Biblia wan pi Jehová lilakgaputsa tuku makgkatsikgo tiku skujnikgo. Akgtum liʼakxilhtit, kaʼakxilhwi tuku makgkatsilh akxni israelitas nitlan tuku xtitaxtumakgolh. Biblia wan: «Akxni xlakan xpatinamakgo xla xpatinama» (kalikgalhtawakga Isaías 63:7-9). Titaxtulh kilhtamaku, Jehová limaklakaskilh Zacarías xlakata xwa pi akxni xkachikin nitlan xkalikatsinimaka, xkilhchanima pi wa nitlan xlikatsinimaka. Kawanilh xlakskujnin: «Tiku kaxamayan xamama kilakgastapu» (Zac. 2:8). ¡Kaks malakawaninan la kalilakgaputsa Jehová xkachikin!

Jehová kalakgalhamalh israelitas chu kalakgmaxtulh kʼEgipto (Kaʼakxilhti párrafo 5).

5. Kawili akgtum liʼakxilhtit xlakata tuku tlawalh Jehová akxni xpatinamakgo xlakskujnin.

5 Akxni xlakskujnin Dios patinankgo, ni kaj xman kalakgalhaman, wata wi tuku tlawa xlakata nakamakgtaya. Kaʼakxilhwi pulaktum. Akxni israelitas skujni xlitaxtukgo kʼEgipto, Jehová nitlan limakgkatsilh, uma tlawalh pi xkalakgmaxtulh. Wanilh Moisés: «Xlikana kakxilhnit xtapatin kinkachikin [...] chu kkgaxmatnit xtatasakan [...] xlakata liwana klakgapasa xtakatsanajwatkan nema patimakgo. Chu liwana klakpuwanit nakkalakgmaxtu kxmakankan egipcios» (Éx. 3:7, 8). Xlakata xkalakgalhaman kalakgmaxtulh. Titaxtulh kilhtamaku akxni xlamakgolh kTiyat nema xKawanikanit pi Nakamaxkikan, xtalamakgasitsinkan tsukukgolh katalachipakgo. ¿Tuku makgkatsilh Dios? Biblia wan: «lu nitlan xlimakgkatsi tuku xtitaxtumakgolh» xlakata xkuentajkan tiku nitlan xkalikatsinikgo. Amakgtum limasiyapa pi xmakgkatsi tuku xmakgkatsikgo amakgapitsin, chu uma tlawalh pi nakamakgtaya chu  kamalakgachanilh jueces xlakata nakalakgmaxtu (Juec. 2:16, 18).

6. Kalichuwinanti akgtum liʼakxilhtit niku Jehová lilakgaputsa tuku makgkatsi chatum kskujni maski nitlan lakapastaknan.

6 Jehová lilakgaputsa tuku makgkatsikgo xlakskujnin maski nitlan la lakapastaknankgo. Kaʼakxilhwi tuku akgspulalh palakachuwina Jonás. Dios malakgachalh kNínive xlakata nakamakatsini pi xʼamaka malakgsputukan uma kachikin. Xlakata makgxtakgkgolh tuku nitlan xtlawamakgolh Jehová katapatilh. Uma lakgsitsilh Jonás, asta lu sitsilh xlakata tuku xlichuwinanit nichuna xkgantaxtunit. Pero Jehová limasiyanilh takgalhkgalhin xpalakachuwina chu makgtayalh nalakgpali la xlakpuwan (Jon. 3:10–4:11). Titaxtulh kilhtamaku, Jonás akgatekgsli tuku xlanit chu Dios tlawalh pi xtsokgwililh tuku xtitaxtunit xlakata nalitamakgtayayaw (Rom. 15:4). *

7. ¿La kinkamakgtayayan tuku tlawanit Jehová xpalakata xlakskujnin?

7 Tuku Jehová tlawalh xpalakata xlakskujnin liwana limasiya pi makgkatsi tuku makgkatsikgo xlakskujnin. Kuentajtlawa kintakatsanajwatkan chu kintapatinkan. Liwana lakgapasa «xnakujkan xkamanan latamanin» (2 Crón. 6:30). Akgatekgsa kintalakapastaknikan tuku makgkatsiyaw, chu tuku nila tlawayaw. Chu kinkamalaknuniyan pi ni katimastalh talakaskin tlakg nakinkamatlawiputunkanan tuku nila natayaniyaw (1 Cor. 10:13). ¿Nixlikana pi uma lu tlan limakgkatsiyaw?

XLIʼAKXILHTIT JESÚS

8-10. ¿Tuku makgtayalh Jesús xlakata nakalilakgaputsa amakgapitsin?

8 Akxni Jesús xlama kKatiyatni, limasiyalh pi lu xkalilakgaputsa amakgapitsin. Pulaktutu tuku makgtayalh xlakata chuna natlawa. Pulana, chuna la akxilhwi, liwana limasiyalh xtayat xTlat. Xlakata Jehová xkapaxki latamanin. Maski tlan xlimakgkatsi la xmakgtayanit akxni malakatsukilh xTlat tuku anan, nachuna lu xkapaxki latamanin (Prov. 8:31). Tapaxkit tlawalh pi nakalilakgaputsa tuku xmakgkatsikgo latamanin.

9 Xlipulaktiy, xtachuna la Jehová, Jesús tlan xkatsi tuku xwi kxnakujkan latamanin, uma kilhchanima pi xlakgapasa tuku xmakgkatsikgo chu tuku xtlawaputunkgo latamanin (Mat. 9:4; Juan 13:10, 11). Wa xlakata, akxni xʼakxilha pi xlipuwamakgo o xlakgaputsamakgo, uma xtlawa pi nachuna namakgkatsi tuku xmakgkatsikgo chu xkamakgtaya (Is. 61:1, 2; Luc. 4:17-21).

10 Xlipulaktutu, Jesús na lipatinalh makgapitsi tuku xlipatinamakgolh latamanin. Akgtum liʼakxilhtit, max makgastakka kʼakgtum familia niku limaxkgen xwankgonit. Xlakata taskujli xtutlat José, katsinilh makgapitsi taskujut nema xtalakaskin litliwakga (Mat. 13:55; Mar. 6:3). Chu max na makgkatsilh tuku tamakgkatsi akxni niy chatum tiku lu paxkiya, xlakata José max nilh akxni Jesús nina xmatsuki xtaskujut. Nachuna, katsilh tuku kitaxtu kgalhikan familia tiku ni watiya takanajla kgalhikgo (Juan 7:5). Uma tuku titaxtulh makgtayalh naʼakgatekgsa xtaʼakglhuwitkan chu tuku xmakgkatsikgo latamanin.

Xlakata xtalakgalhaman Jesús, alakatanu lin chatum akgatapa niku ni lu anan lhuwa latamanin xlakata namapaksa (Kaʼakxilhti párrafo 11).

11. ¿Niku lu litasiyalh pi Jesús naxmakgkatsi la xmakgkatsikgo amakgapitsin? (Kaʼakxilhti xmakni revista).

11 Jesús limasiyalh pi xmakgkatsi tuku xmakgkatsikgo amakgapitsin akxni tlawalh milagros. Uma ni kaj xafuerza tlawalh, wata chuna tlawalh xlakata xkalakgalhaman tiku xpatinamakgolh (Mat. 20:29-34; Mar. 1:40-42). Akgtum liʼakxilhtit, kalilakpuwaw  la xmakgkatsi akxni alakatanu lilh niku ni lu xʼanan latamanin chatum chixku tiku akgatapa xwanit xlakata namapaksa o akxni malakastakwanilh xkgawasa chatum puskat tiku xninita xchixku (Mar. 7:32-35; Luc. 7:12-15). Jesús makgkatsilh tuku xmakgkatsikgo, uma tlawalh pi nakamakgtaya.

12. Chuna la wan Juan 11:32-35, ¿la limasiyalh Jesús pi xmakgkatsi tuku xmakgkatsimakgolh Marta chu María?

12 Akxni nilh Lázaro, Jesús limasiyalh pi na xmakgkatsima tuku xmakgkatsimakgolh Marta chu María. Akxni akxilhli la xlilipuwamakgolh, «tsukulh tasay» (kalikgalhtawakga Juan 11:32-35). Ni tasalh kaj xlakata nialh akxtum natatawila xʼamigo. Xlakata xkatsi pi xʼama malakastakwani. Wata tasalh xlakata akxilhli la xpatinamakgolh xʼamigas.

13. ¿Tuku xlakata lu kinkamakgpuwantiniyan nakatsiyaw pi Jesús makgkatsi tuku makgkatsikgo amakgapitsin?

13 Akinin makglakgalhinanin, ni xtachuna la Jesús. Pero lu kinkamakgtayayan nakatsiniyaw la limasiyalh pi xmakgkatsi tuku xmakgkatsikgo amakgapitsin. Wa xlakata lu paxkiyaw xlakata chuna kalikatsinilh (1 Ped. 1:8). Lu kinkamakgpuwantiniyan katsiyaw pi la uku Mapakgsina kxTamapakgsin Dios chu nialh makgas namasputu tapatin. Xlakata chatum lataman litaxtulh, wa tiku lakgchan nalakkaxtlawa tuku nitlan tlawanit Satanás. Lu lipaxuwayaw pi kgalhiyaw chatum Mapakgsina tiku «naʼakgatekgsa kintaxlajwanitkan» (Heb. 2:17, 18; 4:15, 16).

KASTALANIW XLIʼAKXILHTIT JEHOVÁ CHU JESÚS

14. Chuna la wan Efesios 5:1, 2, ¿tuku lakpuwanitaw natlawayaw?

14 Akxni akxilhaw xliʼakxilhtit Jehová chu Jesús, tlakg limasiyaputunaw pi namakgkatsiyaw tuku makgkatsikgo amakgapitsin (kalikgalhtawakga Efesios 5:1, 2). Xlikana pi akinin ni katsiyaw tuku wi kxnakujkan latamanin, pero tlan naʼakgatekgsaw tuku makgkatsikgo chu tuku maklakaskinkgo (2 Cor. 11:29). Nichuna likatsiyaw la latamanin tiku xʼakstukan kapaxkikan, wata liskujaw natlawayaw la wan Pablo: «Ni kajwatiya kuenta katlawatit tuku wixin lakaskinatit, nachuna tuku lakaskinkgo amakgapitsin» (Filip. 2:4).

(Kaʼakxilhti párrafos 15 asta 19). *

15. ¿Tiku tlakg nalimasiyakgo pi makgkatsikgo tuku makgkatsikgo amakgapitsin?

15 Tiku tlakg nalimasiyakgo pi makgkatsikgo tuku makgkatsikgo amakgapitsin wa lakgkgolotsin xalak congregación. Katsikgo pi namastakgo kuenta xlakata la kalikatsinikgo natalan tiku kakuentajtlawakgo (Heb. 13:17). Xlakata tlan nakamakgtayakgo natalan, talakaskin nakaʼakgatekgsnikgo. ¿La nalimasiyakgo?

16. ¿Tuku tlawakgo lakgkgolotsin tiku akgatekgsninankgo, chu tuku xlakata lu xlakaskinka?

16 Lakgkgolotsin tiku kaʼakgatekgsnikgo natalan limaxtukgo kilhtamaku xlakata nakamakgtayakgo. Katlawanikgo takgalhskinin chu liwana kakgaxmatnikgo chu kalimasiyanikgo takgalhkgalhin. Uma lu xlakaskinka chuna natlawa akxni chatum tala xalak congregación lu natachuwinamputun (Prov. 20:5). Akxni lakgkgolotsin lu kalilakgaputsakgo natalan chu kamaxki xkilhtamaku lu tlan latalalin xlakata la lipawan chu lapaxki (Hech. 20:37).

17. ¿Tuku tlakg lanka xtapalh akxilhkgo natalan xpalakata lakgkgolotsin? Kawili akgtum liʼakxilhtit.

17 Lhuwa natalan wankgo pi wa tuku tlakg lanka xtapalh akxilhkgo xpalakata lakgkgolotsin wa pi xlakan kalilakgaputsakgo amakgapitsin. ¿Tuku xlakata? Adelaide wan: «Tlakg ni tuwa nakatachuwinana xlakata katsiya pi naʼakgatekgsnikgoyan». Lichuwinampara: «Katsiya pi makgkatsikgo tuku makgkatsiya xlakata la likatsikgo akxni katachuwinana». Chu chatum tala lakapastaka: «Akxni xaklitachuwinama kintaʼakglhuwit chatum kgolotsin,  tsukulh tasa. Ankgalhin klakapastaka uma tuku lalh» (Rom. 12:15).

18. ¿La nalimasiyayaw pi makgkatsiyaw tuku makgkatsikgo amakgapitsin?

18 Xlikana, kimputumkan tlan nalimasiyayaw pi makgkatsiyaw tuku makgkatsikgo amakgapitsin, ni kajwatiya lakgkgolotsin. ¿La natlawayaw? Kaliskujwi naʼakgatekgsaw xtaʼakglhuwitkan nema titaxtumakgolh kifamiliajkan chu kinatalankan. Kakalilakgaputsaw lakkamanan, tiku tatatlakgo, tiku linkgoya kata chu tiku makgatsankgakgonit klinin tiku tlakg xpaxkikgo. Kakakgalhskiw la wilakgolh chu kuenta katlawaw tuku nakinkawanikgoyan. Kaʼakxilhkgolh pi xlikana akgatekgsaw tuku titaxtumakgolh. Chu kakamakgtayaw chuna la matlaniyaw. Akxni chuna tlawayaw, limasiyayaw xaxlikana tapaxkit (1 Juan 3:18).

19. ¿Tuku xlakata ni kaj akglakgwa tuku nakawaniyaw amakgapitsin akxni nakamakgtayayaw?

19 Akxni kamakgtayaputunaw amakgapitsin, talakaskin ni kaj akglakgwa tuku nakawaniyaw, xlakata ni lakxtum lakpuwankgo latamanin akxni kgalhikgo taʼakglhuwit. Makgapitsi ni tuwa makgkatsikgo chuwinankgo, chu amakgapitsi maxanankgo. Wa xlakata, maski kamakgtayaputunaw, ni nakatlawaniyaw takgalhskinin nema nitlan nalimakgkatsikgo (1 Tes. 4:11). Max akxni nakinkalitachuwinankgoyan tuku makgkatsikgo, max akinin nichuna lakpuwanaw tuku wankgo. Pero talakaskin naʼakgatekgsaw pi chuna xla makgkatsi. Wa xlakata talakaskin nakakgaxmatniyaw chu lakatsuku nakaxakgatliyaw (Mat. 7:1; Sant. 1:19).

20. ¿Tuku naʼakxilhaw kʼatanu artículo?

20 Ni kaj xman kcongregación nalimasiyayaw pi makgkatsiyaw tuku makgkatsikgo amakgapitsin, nachuna natlawayaw akxni lichuwinanaw Dios. ¿La nalimasiyayaw uma xatlan tayat akxni lichuwinaw Dios chu akxni kamakgalhtawakgeyaw amakgapitsin? Naʼakxilhaw kʼatanu artículo.

TAKILHTLIN sjj 130 Kakatsiniw natapatinanaw

^ párr. 5 Jehová chu Jesús lilakgaputsakgo tuku makgkatsikgo latamanin. Uma artículo nalichuwinan tuku tlan nakatsiniyaw xliʼakxilhtitkan, tuku xlakata xlakaskinka nachuna nalimasiyayaw pi kalilakgaputsayaw chu la natlawayaw.

^ párr. 1 TUKU LU XLAKASKINKA: Makgkatsikan tuku makgkatsikgo amakgapitsin o «nalapaxkiyaw la linatalan» kilhchanima naʼakgatekgsniyaw tuku titaxtumakgolh amakgapitsin (Rom 12:15).

^ párr. 6 Jehová nachuna kalimasiyanilh talakgalhaman amakgapitsi xlakskujnin tiku ni makgxtakgkgolh akxni pekuankgolh o taxlajwanikgolh. Tiku chuna titaxtukgolh wa Ana, Elías chu Ébed-mélec (1 Sam. 1:10-20; 1 Rey. 19:1-18; Jer. 38:7-13; 39:15-18).

^ párr. 65 TUKU TASIYA KDIBUJO: Tamakxtumit pulaklhuwa la kinkamakgtayayan xlakata nakalimasiyaniyaw pi kalilakgaputsayaw amakgapitsin. Kʼuma Pukgalhtawakga, akxilhaw 1) chatum kgolotsin tachuwinama chatum kgawasa chu xtse, 2) chatum tlat chu xtsumat akxtum tatlawamakgolh chatum tala tiku lina kata asta niku wi putlaw, 3) chatiy lakgkgolotsin kuenta tlawanikgo akxni chatum tala puskat kaskini tamakgtay.