Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Tuku xlakata lu xlakaskinka tlan nalamakgamakglhtinanaw

Tuku xlakata lu xlakaskinka tlan nalamakgamakglhtinanaw

«Lakatitum [kalamakgamakglhtinantit] nchatunu amakgapitsin, ni kiklh tilakatsaniyatit» (1 PED. 4:9).

TAKILHTLIN: sn 50, sn 20

1. ¿Tuku xtitaxtumakgolh kstalaninanin Cristo kxapulana siglo?

AKXNI kkata 62 chu 64, apóstol Pedro katsokgnanilh «tiku kaj tsinu xmakgwilakgolh kPonto, Galacia, Capadocia, Asia chu Bitinia» (1 Ped. 1:1). Amakgolh natalan tanu tanu niku xminkgonitancha. Xlakaskinkgo takgpuwantin chu xkawanika tuku natlawakgo xlakata xtitaxtumakgolh taputsastalanit nema Pedro lichuwinalh. Nachuna xlamakgolh kkilhtamaku niku lu katuwa xwanit. Pedro lichuwinalh: «Xlikgatsputni xlipaks nkatuwaj, lakatsuwa wi». Chuna, nialh xkgatsi akgkaw kata akxni judíos xʼamaka kataratlawakan. ¿Tuku xkamakgtayalh kstalaninanin Cristo kʼuma xakatuwa kilhtamaku? (1 Ped. 4:4, 7, 12).

2, 3. ¿Tuku xlakata Pedro kawanilh kstalaninanin Cristo pi tlan xlamakgamakglhtinankgolh? (Kaʼakxilhti xapulana dibujo).

2 Atanu tastakyaw nema kawanilh Pedro kstalaninanin Cristo wa uma: «Lakatitum [kalamakgamakglhtinantit] nchatunu amakgapitsin» (1 Ped. 4:9). Ktachuwin xagriego nalamakgamakglhtinanaw wamputun «tlan nakalikatsiniyaw tiku ni kalakgapasaw». Pero kaʼakxilhwi, Pedro kawanilh xlakata xlimasiyakgolh pi tlan xkamakgamakglhtinankgolh «nchatunu amakgapitsin» wamputun tiku xkgalakgapaskgoya chu tiku akxtum xkatalakgo. ¿La xkamakgtayalh uma tastakyaw?

 3 Xkamakgtayalh tlakg makxtum xtawilakgolh. Kalilakpuwaw kimpalakatakan. Akxni chatum tala kinkawanin pi xʼaw kxchik, ¿nixlikana pi ankgalhin nalakapastakaw ama kilhtamaku? Chu akxni akinin waniw chatum tala pi naʼan kkinchikkan, ¿nixlikana pi tlakg tatliwakglha la talalinaw? Komo tlan nakamakgamakglhtinanaw amakgapitsin tlakg liwana nakalakgapasaw kinatalankan. Kxkilhtamaku Pedro, chuna la xtaliwakatilha tuku nitlan, tlakg xtalakaskin pi makxtum xtawilakgolh kstalaninanin Cristo. Nachuna titaxtuyaw la uku «kxaʼawatiya kilhtamaku» (2 Tim. 3:1).

4. ¿Tuku takgalhskinin nakakgalhtiyaw kʼuma artículo?

4 ¿Tuku kilhtamaku tlan nalalimasiyaniyaw pi tlan lamakgamakglhtinanaw «nchatunu amakgapitsin»? ¿La namakgatlajayaw nitlan tapuwan nema tlawa pi ni nakamakgamakglhtinanaw amakgapitsin? Chu ¿tuku nakinkamakgtayayan tlan nalikatsiyaw akxni wi tiku nakinkawaniyan pi kaʼaw kxchik?

AKXNI TLAN NAKAMAKGAMAKGLHTINANAW AMAKGAPITSIN

5. ¿La tlan liwana nalamakgamakglhtinanaw ktamakxtumit?

5 Akxni wilaw ktamakxtumit. Jehová chu xkachikin kinkawanikgoyan pi kaʼaw ktamakxtumit. Chu akinin lakaskinaw pi putum tiku naʼankgo ktamakxtumit tlan namakgkatsikgo (Rom. 15:7). Uma lu xlakaskinka, liwaka akxni wi tiku xlipulana min ktamakxtumit. Jehová nachuna waninit pi namin, wa xlakata talakaskin tlan namamakgkatsiniyaw, maski tanu xtalhakgan o la tasiya (Sant. 2:1-4). Komo akxilhaw pi ni chatum tala xakgatlima, ¿tlan nawaniyaw pi natawila kkimpaxtunkan? Max nakinkapaxtikatsiniyan xlakata namasiyaniyaw tuku akxilhmaka ktamakxtumit chu namakgtayayaw naputsa textos xalak Biblia. Komo chuna natlawayaw kgalhakgaxmatmaw uma tastakyaw: «Tlan nakamakgamakglhtinanaw chatunu amakgapitsin» (Rom. 12:13).

6. ¿Tiku tlakg xlakaskinka nakawaniyaw pi nakataʼanaw kkinchikkan?

6 Akxni wi tiku waniyaw pi natawayanaw. Makgasata, lu xlismanikan pi wi tiku xtawayalh achatum kxchik xlakata xlimasiyanilh pi xtakgalhiputun takaksni chu xlakaskin pi xʼamigo xlitaxtulh (Gén. 18:1-8; Juec. 13:15; Luc. 24:28-30). Kimpalakatakan, ¿tiku tlakg xlakaskinka nakawaniyaw pi nakataʼanaw kkinchikkan? Natalan xalak congregación. Tiku ankgalhin akxtum katalayaw. Kgalhiputunaw amigos tiku ni makgxtakgnankgo chu xputumkan tlan nakatalalinaw, xlakata akxni katuwa natawilayaw, nalamakgtayayaw. Lu tlan tuku lakkaxwilikgolh Lakgkgolotsin tiku Pulalinkgo xTatayananin Jehová kkata 2011 xlakata familia Betel kʼEstados Unidos, akxni kgalhikgo takgalhtawakga xla Makatsinina, pulana xtlawakan 6:45 kakgotanun chu la uku tlawakan 6:15 kakgotanun. ¿Tuku xlakata? Chuna la mastaka tamakatsinin, xlakata betelitas tlakg xkgalhikgolh kilhtamaku xlakata nalatachuwinankgo akxni sputa tamakxtumit. Atanu sucursales nachuna tlawakgolh. Xlakata uma, familia Betel tlakg makxtum wilakgolh.

7, 8. ¿La tlan nakamakgamakglhtinanaw natalan tiku minkgo mastakgo taʼakgchuwin kkincogregacionkan?

7 Akxni natalan xalak atanu congregaciones minkgo mastakgo taʼakgchuwin kkincongregacionkan, superintendente xla circuito, chu lakgachunin minkgo natalan xalak Betel, uma kilhtamaku kgalhiyaw talakaskin xlakata tlan nakamakgamakglhtinanaw (kalikgalhtawakga 3 Juan 5-8). Pulaktum tuku tlan natlawayaw, wa nakawaniyaw pi katawayamputunaw. ¿Tlan chuna natlawayaw akxni naminkgo?

8 Chatum tala puskat xalak Estados Unidos lakapastaka: «Akglhuwata kata akit chu kinchixku kkawaniyaw pi kaminkgolh kkinchikkan natalan tiku minkgo mastakgo taʼakgchuwin chu xlakpuskatinkan. Ankgalhin lu klipaxuwayaw chu tuku tlakg xlakaskinka, kmatliwakglhaw kintakanajlakan. Chu ankgalhin tlan kmakgkatsiyaw xlakata chuna ktlawayaw».

9, 10. 1) ¿Tiku max lhuwa kilhtamaku lakaskinkgo natamakgxtakgkgo kkinchikkan? 2) ¿Tlan nakamakgamakglhtinankgo amakgapitsin maski ni lanka kgalhikgo xchikkan? Kawili akgtum liʼakxilhtit.

9 Akxni wi tiku lhuwa kilhtamaku tamakgxtakgkgo  kkinchikkan. Makgasa kilhtamaku, lhuwa latamanin xkamaxkikgo talakaskin natawilakgo kxchikkan tiku xkalipawankgo (Job 31:32; Filem. 22). La uku talakaskin nachuna natlawayaw. Akgtum liʼakxilhtit, superintendentes xla circuito lakaskinkgo niku natawilakgo akxni lakgapaxialhnankgo congregaciones. Nachuna lakaskinkgo niku natawilakgo tiku ankgo kʼescuelas niku masiyakan xlakata Dios chu tiku xatapaxuwan makgtlawakgo pukgalhtawakga. Nachuna, akxni wi tuku masputunan, makgapitsi familias lakaskinkgo niku natawilakgo asta akxni nakaxtlawakan xchikkan. Ni nalakpuwanaw pi kajwatiya tlan namastakgo talakaskin natawilakan kxchikkan tiku laklanka chu lakstlan xchikkan. Xlikana, max makglhuwata chuna tlawakgonit. ¿Tlan namastayaw talakaskin pi natalan natawilakgo kinchikkan maski ni lu lanka?

10 Chatum tala xalak Corea del Sur xatapaxuwan lakapastaka akxni xmasta talakaskin pi xtamakgxtakgkgolh kxchik tiku kilakgolh kʼescuelas niku masiyakan xlakata Dios. Xla wan: «Pulana, ni lu xakmastaputun xlakata aku xaktamakgaxtokgnitaw chu xakwilaw kʼakgtum chiki nema ni lu lanka xwanit. Pero lu klipaxuwaw xlakata natalan anta tamakgxtakgkgolh kchiki. Kakxilhwi pi lu paxuwakan akxni akxtum liskujkan xlakata tlakg naskujnanikan Jehová».

11. ¿Tuku xlakata talakaskin pi tlan nakamakgamakglhtinanaw natalan tiku minkgo makgtayanankgo kkincongregacionkan?

11 Akxni minkgo makgtayanankgo natalan kkincongregacionkan. Max naminkgo latamakgo kkinkachikinkan, xlakata namakgtayanankgo nalichuwinankan Dios o xlakata nakawanikan pi naskujkgo la precursores kkincongregacionkan. Xapulana, putum tuwa makgkatsikgo nalismanikgo kxasasti kachikin, kxasasti congregación asta max nakatsinikgo xasasti tachuwin o talismanin. Komo naʼanaw katawayanaw o naʼanaw katapaxialhnanaw natlawa pi nakalakgapaskgo amakgapitsin chu chuna nalismanikgo.

12. ¿Tuku liʼakxilhtit masiya pi xlakata tlan nakamakgamakglhtinanaw amakgapitsin ni talakaskin lhuwa tuku natlawayaw?

12 Xlakata tlan nakamakgamakglhtinanaw amakgapitsin ni talakaskin lhuwa tuku natlawayaw (kalikgalhtawakga Lucas 10:41, 42). Chatum tala lichuwinan pi xla chu xpuskat lu xlakapastakkgo xchikkan akxni tsukukgolh liskujkgo la misioneros xlakata kajku kamanan xwankgonit. Lichuwinankgo: «Akgtum kakgotanun, kimpuskat lu xlipuwama chu akit nila xakmakgtaya xlakata tlan xmakgkatsilh. Akxni xtakgatsima 7:30 kakgotanun, tlakgka malakcha. Chatum tsumat tiku xlimakgalhtawakgemaka Biblia xkinkaliminiyan akgtutu laxux xlakata tlan xkinkamakgamakglhtinamputunan. Kwaniw pi xtanulh chu ktawaw chuchut. Alistalh ktlawaw té chu chocolate. Akinin nina xakkatsiniyaw tachuwin suajili, chu xla ni xchuwinan kintachuwinkan. Pero lata ama kilhtamaku, ktsukuw katalalinaw natalan xalak ama país chu lu xakpaxuwayaw».

LA NAMAKGATLAJAYAW NITLAN TAPUWAN

13. ¿Tuku xlakata tlan kitaxtu komo tlan nakamakgamakglhtinanaw amakgapitsin?

13 ¿Tuwa makgkatsiyaw tlan nakamakgamakglhtinanaw amakgapitsin? Komo chuna, max makgatsankganitaw kilhtamaku niku xkatapaxuwaw kinatalankan chu wa xlakata ni kgalhiyaw amigos tiku max tlan putum kilhtamaku nakatalalinaw. Komo limasiyayaw pi tlan kamakgamakglhtinanaw amakgapitsin nakinkamakgtayayan ni akstu nakinkamakgkatsikanan. Wa xlakata, ¿tuku max natlawa pi natalan ni nakamakgamakglhtinankgo amakgapitsin? Kaʼakxilhwi tuku xlakata.

14. Komo kinkatsankganiyan kilhtamaku xlakata nakawaniyaw natalan pi kaʼankgolh kkinchikkan, ¿tuku tlan natlawayaw?

14 Kilhtamaku chu litliwakga nema kgalhiyaw. Akinin xlakskujnin Jehová ni lu kgalhiyaw kilhtamaku, xlakata lhuwa taskujut lakgayaw. Wa xlakata, makgapitsi max lakpuwankgo pi katsankgani kilhtamaku chu litliwakga xlakata tlan nakamakgamakglhtinankgo amakgapitsin. Komo chuna  lakpuwanaw, max talakaskin nalakkaxwiliyaw kinkilhtamakujkan. ¿Tlan xlakkaxwiliw kinkilhtamakujkan xlakata akxtum nakatatawilayaw natalan? Biblia lichuwinan pi ankgalhin tlan nakamakgamakglhtinanaw amakgapitsin (Heb. 13:2). Lu tlan nawan komo nalimaxtuyaw kilhtamaku xlakata nakatatawilayaw kinatalankan. Xlikana, max natalakaskin pi ni lu nalimaxtuyaw kilhtamaku xlakata tuku ni lu xlakaskinka.

15. ¿Tuku xlakata max nalakpuwanaw pi nila katikamakgamakglhtinaw amakgapitsin?

15 Xlakata la lakpuwanaw kimpalakatakan. ¿Minit kilhtamaku akxni tlan xkamakgamakglhtinamputunaw natalan pero lakpuwaw pi ni katimatlaniw? Max maxananaw chu pekuanaw xlakata ni katsiyaw tuku nakalitachuwinanaw chu max lakpuwanaw pi nalakgachanikgo o natlakgwankgo. O max ni lhuwa tumin kgalhiyaw chu nalakpuwanaw pi nila nakamaxkiyaw tuku amakgapitsin xalak congregación xmaxkikgolh. Pero kalakapastakwi pi ni talakaskin pi kinchikkan lu stlan nawan. Tuku xlakaskinka wa pi skulunku xlitawilat chu tlan namakgkatsikgo tiku kinkalakgapaxialhnamakgon.

16, 17. ¿Tuku nakinkamakgtayayan ni lu nalilakgaputsayaw akxni wi tiku kinkalakgapaxialhnankgoyan?

16 Komo lilakgaputsayaw xlakata kamakgamakglhtinamputunaw amakgapitsin ni kaj akinin chuna makgkatsiyaw. Chatum kgolotsin xalak Gran Bretaña wan: «Akxni klakkaxwiliyaw xlakata nakkamakgamakglhtinanaw amakgapitsin tsinu kpekuanaw o kmaxananaw xlakata tuku max nalakpuwankgo. Xtachuna la makgkatsiyaw akxni tsukuyaw skujnaniyaw Jehová max pekuanaw, pero alistalh tlan kitaxtu chu kinkaliminiyan tapaxuwan. Lu tlan kitaxtunit akxni akxtum kkatatawilayaw natalan, kkgalhchuwinanaw chu kwayaw kape». Kalakapastakwi pi lu xlakaskinka tlan liwana nakamakgamakglhtinanaw (Filip. 2:4). Lhuwa latamanin lakgatikgo lichuwinankgo xlakata xlatamatkan. Chu akxni liwana nakakgaxmatniyaw wa akxni makxtum nakatatawilayaw. Atanu kgolotsin lichuwinalh: «Akxni makxtum kkatatawila natalan kkinchik kimakgtaya tlakg liwana nakkaʼakgatekgsni, nakkatsi xlakata xlatamatkan chu tuku tlakg xlakaskinka wa nakkatsi la lakgapaskgolh Jehová». Komo tlan nakamakgamakglhtinanaw tiku kinkalakgapaxialhnankgoyan, liwana kakatsiw pi nalipaxuwayaw ama kilhtamaku.

17 Chatum precursora tiku xkamaxki talakaskin natawilakgo kxchik tiku xʼankgo kʼescuelas niku masiyakan xlakata Dios, lichuwinalh: «Xapulana tsinu xaklilakgaputsa xlakata kinchik ni lu stlan xwanit chu lhuwa tuku xakkgalhi nema kaj xkimaskiwikanit. Pero xpuskat chatum makgalhtawakgana tlan kimamakgkatsinilh. Kiwanilh pi akxni liskujkgo la superintendentes xla circuito, tlakg tlan makgkatsikgo tawilakgo kchiki niku familia tliwakga wi xtakanajlakan maski ni lhuwa tuku kgalhikgo, xlakata chuna la xlakan skujnanimakgo Jehová chu xataktujun linkgo xlatamatkan. Uma kimalakapastakalh tuku xkinkawaniyan kintse akxni aktsujku xakwanitaw: “Tlakg tlan nawaya kakaʼ chu naʼanan tapaxkit”» (Prov. 15:17). Ni xlakaskinka lu nalilakgaputsayaw, xlakata tuku tlakg xlakaskinka wa nakalimasiyaniyaw tapaxkit tiku kinkalakgapaxialhnankgoyan.

18, 19. ¿La kinkamakgtayayan tlakg tlan nakatalalinaw amakgapitsin komo liwana nakamakgamakglhtinanaw?

18 Chuna la kaʼakxilhaw amakgapitsin. ¿Wi kcongregación tiku ni lu tlan talalinaw? Max ni waniputunaw pi kaʼalh kkinchikkan chatum tala tiku ni lakgatiyaw la likatsi o wi tuku nitlan kinkatlawanin chu nila tapatiyaw. Pero komo nitu natlawayaw, chuntiya nitlan katitalaliw.

19 Biblia lichuwinan pi komo tlan nakamakgamakglhtinanaw natalan tlakg tlan nakatalalinaw chu nachuna tiku ni lu katalalinaw (kalikgalhtawakga Proverbios 25:21, 22). Komo nakawaniyaw pi kaʼankgolh kkinchikkan natlawa pi tlakg tlan nakatalalinaw. Nachuna, max naʼakxilhaw lakwan xtayat nema Jehová akxilhnilh akxni maxkilh talakaskin pi nalakgapasa tuku xaxlikana (Juan 6:44). Komo xaxlikana tapaxkit nema kgalhiyaw, natlawa pi nawaniyaw chatum tala pi kaʼalh kkinchikkan, uma natlawa pi tlakg tlan natalalinaw. ¿La  nalikatsiyaw pi wa xaxlikana tapaxkit chuna kinkamatlawiman? Pulaktum wa nastalaniyaw tastakyaw nema min kFilipenses 2:3, niku wan pi ni natlankajwananaw chu tlakg xlakaskinka nakaliʼakxilhaw amakgapitsin nixawa akinin. Xlikana, putum natalan tlakg xlakaskinka litaxtukgo max xlakata xtakanajlakan, tlakg tayanikgo, ni pekuankgo o kgalhikgo atanu tlan tayat. Komo naʼakxilhaw pi tlakg xlakaskinka litaxtu chatum tala, tlakg napaxkiyaw chu tlakg tlan liwana namakgamakglhtinanaw.

TLAN KALIKATSIW AKXNI WI TIKU NAKINKAWANIYAN PI KAʼAW KXCHIK

Natalan lu liskujkgo xlakata tlan nakamakgamakglhtinankgo amakgapitsin (Kaʼakxilhti párrafo 20).

20. Komo nawanaw pi naʼanaw kxchik chatum tala, ¿tuku natlawayaw chu tuku xlakata?

20 Salmista David kgalhskilh Jehová tuku tayat xlikgalhitkan tiku kamakgamakglhtinan kxkachikin (Sal. 15:1). Pulaktum wa akxni namakgantaxtiyaw xtachuwin maski ni tlawaputunaw (Sal. 15:4). Wa xlakata, komo nakinkawanikanan pi naʼanaw kxchik chatum tala chu nakgalhtinanaw pi tlan, ni nawanaw alistalh pi ni naʼanaw kaj xlakata natlawayaw tuku ni lu xlakaskinka. Komo chuna natlawayaw, tala tiku kinkawanin kaj nitu katilitaxtulh talakkaxlan nema tlawalh (Mat. 5:37). Wi tiku wankgo pi naʼankgo, pero alistalh wankgo pi ni katiʼankgolh kaj xlakata naʼankgo alakatanu niku tlakg tlan akxilhkgo. ¿Nixlikana pi uma ni limasiya tapaxkit chu ni mastayaw kakni? Tuku natlawayaw wa namakgamakglhtinanaw tuku natalan xatapaxuwan kinkamaxkiputunkgoyan (Luc. 10:7). Chu, komo xlikana nila naʼanaw tlan tunkun namakatsiniyaw tala tiku kinkawanin pi naʼanaw kxchik. Chuna namastayaw kakni chu nalimasiyayaw tapaxkit.

21. ¿Tukuya talismanin maxkikgo kakni tiku kawanikan pi naʼankgo kxchik chatum tala?

21 Nachuna xlakaskinka namaxkiyaw kakni talismanin nema anan kʼakgatunu chiki. Kmakgapitsi familias, ni anan taʼakglhuwit komo wi tiku kaj akglakgwa nachan kʼakgtum chiki chu ni namakatsininan, pero alakatanu talakaskin pulana namakatsininanaw. Kmakgapitsi familia, lismanikgonit tlakg xatlan liwat kamaxkikgo tiku kaj minkgonit, pero makgapitsi familias na watiya liwat wakgo nema kamaxkikan tiku kaj minkgonit. Kmakgapitsi kachikinin, tiku ankgo kʼakgtum chiki wi tuku linkgo tuku max natalakaskin akxni nawayankgo, pero makgapitsi nichuna tlawakgo. Makgapitsi lismanikgonit pi ni tunkun lakaskinkgo akxni kawanikan pi naʼankgo kxchik chatum tala pero alakatanu uma nitlan akxilhkan. Wa xlakata, maski tanu tanu talismanin nema anan, akinin kaliskujwi xlakata natlawayaw tuku tlan nema namakgapaxuwa tiku kinkawanin pi kaʼaw kxchik.

22. ¿Tuku xlakata lu xlakaskinka natlawayaw uma tastakyaw: «[Kalamakgamakglhtinantit] nchatunu amakgapitsin»?

22 La uku tlakg xlikana tuku lichuwinalh Pedro: «Xlikgatsputni xlipaks nkatuwaj, lakatsuwa wi» (1 Ped. 4:7). Talakatsuwima tlakg xalanka takatsanajwat. Chuna la taliwakatilhama tuku nitlan, tlakg xlakaskinka lu nalapaxkiyaw kinchatunukan. Xlakaskinka natlawayaw uma xtastakyaw Pedro: «[Kalamakgamakglhtinantit] nchatunu amakgapitsin» (1 Ped. 4:9). Xlikana, ankgalhin xlakaskinka chu lu nalipaxuwayaw kkilatamatkan komo tlan nalamakgamakglhtinanaw.