Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Marzo kata 2016

¿Tlan natamunuyata?

¿Tlan natamunuyata?

«¿Ti nchatum wixin mpala [tlawaputun] akgtum mpatsaps, na ni pulanaj kaj wi naputlakgay wa ntu nalimakgatsankganan, wa lapi kgalhiy wa ntu namaklakaskin nalimakgatsputuy?» (LUC. 14:28).

TAKILHTLIN: 6, 34

Uma artículo chu nema aku mima xla kamanan tiku lakpuwamakgolh natamunukgo.

1, 2. 1) ¿Tuku kinkamakgapaxuwayan xlakskujnin Dios la uku? 2) ¿Tuku tlan natlawakgo natlatni chu lakgkgolotsin xlakata naʼakgatekgskgo kamanan la nawan xlatamatkan akxni natamunukgo?

CHRISTOPHER kajku 12 kata xkgalhi, chu aya xtamunuputun. Chatum kgolotsin wanilh: «Klakgapasan lata akxni skgataku xwanita. Chu klipaxuwa pi tamunuputuna, pero kkgalhskimputunan: ¿tuku xlakata chuna tlawaputuna?». Kgolotsin liwana xkatsi tuku xlakata xtlawanima uma takgalhskinin. Xlakskujnin Dios klipaxuwayaw akxni lhuwa tamunukgo kamanan akgatunu kata (Ecl. 12:1). Pero xnatlatnikan tiku kstalaninanin Cristo chu lakgkgolotsin xalak congregación liwana xlikatsitkan pi kamanan tiku tamunuputunkgo wi tuku xlakata chuna tlawaputunkgo chu akgatekgskgo tuku wamputun.

2 Biblia masiya pi akxni makamaxkiyaw kilatamatkan Jehová chu tamunuyaw, matsukiyaw atanu latamat xlakata nalatamayaw la kskujni Dios. Uma wamputun namakglhtinanaw lhuwa tasikulunalin xla Jehová, pero nachuna  lu nakinkatalatlawayan Satanás (Prov. 10:22; 1 Ped. 5:8). Wa xlakata, natlatni tiku xtatayananin Jehová xlimaxtutkan kilhtamaku xlakata namakgtayakgo xkamankan naʼakgatekgskgo tuku kilhchanima kstalanina Cristo wankan. ¿Chu komo chatum kgawasa xnatlatni ni xtatayananin Jehová? Lakgkgolotsin xalak congregación xatapaxuwan namakgtayakgo naʼakgatekgsa tuku kilhchanima tamakamastakan chu tamunukan (kalikgalhtawakga Lucas 14:27-30). Akxni wi tiku tlawaputun akgtum lanka chiki, liwana nalakkaxwili. Xtachuna, komo chatum kgawasa tamunuputun, nachuna liwana nalakkaxwili. Chuna nikxni katimakgxtakgli Jehová «asta kxlikgatsputni» (Mat. 24:13). ¿Tuku nakamakgtaya kamanan naskujnikgo Jehová putum kilhtamaku? Kaʼakxilhwi.

3. 1) ¿Tuku wankgolh Jesús chu Pedro xlakata tamunut? (Mat. 28:19, 20; 1 Ped. 3:21). 2) ¿Tuku takgalhskinin naʼakxilhaw kʼuma artículo? 3) ¿Tuku xlakata xlakaskinka nakinkatlawanikanan uma takgalhskinin?

3 ¿Kgawasaku wix chu tamunuputuna? ¡Lu tlan! Tamunukan chu xtatayana Jehová wankan akgtum lanka talakgalhaman. Jesús masiyalh pi putum kstalaninanin Cristo xlitamunutkan. Apóstol Pedro wa pi uma lu xlakaskinkan xlakata nalakgtaxtuyaw klanka takatsanajwat (Mat. 28:19, 20; 1 Ped. 3:21). Kʼuma artículo naʼakxilhaw akgtutu takgalhskinin nema namakgtayayan nakatsiya komo tlantiya natamunuya: «¿Klimasiya pi liwana klakapastaknan? ¿Tuku xlakata ktamunuputun? ¿Kʼakgatekgsa tuku kilhchanima tamakamastanikan Jehová?». Lu xlakaskinka pi natlawanikana uma takgalhskinin. ¿Tuku xlakata? Xlakata akxni natamunuya, nalimasiyaya pi malaknuninita naskujnaniya Jehová putum kilhtamaku. Umakgolh takgalhskinin namakgtayayan namakgantaxtiya tuku malaknunita.

«¿KLIMASIYA PI LIWANA KLAKAPASTAKNAN?»

4, 5. 1) ¿Tuku xlakata ni talakaskin nakgalhiya lhuwa kata xlakata natamunuyaw? 2) ¿Tuku wamputun liwana lakapastaknankan?

4 Biblia ni wan tuku kata kilikgalhitkan o nalinawa kata xlakata tlan natamunuyaw. Proverbios 20:11 wan: «Xlikana asta chatum aktsu kgawasa litalakgapasa tuku tlawa, komo xaskulunku chu xaʼakgstitum likatsi». Asta chatum aktsu kgawasa tlan laksaka tuku tlan chu tuku ni tlan, chu akgatekgsa tuku wamputun tamakamastanikan Jehová. Wa xlakata, komo chatum kgawasa limasiya pi liwana lakapastaknan chu tamakamastaninita Jehová, lu xlakaskinka chu xlilat natamunu (Prov. 20:7).

 5 ¿Tuku wamputun liwana lakapastaknankan? Ni wamputun pi lankata miliwanat chu lhuwata kata milikgalhit. Chuna la wan Biblia, wamputun nakatsiniya tuku tlan chu tuku nitlan (Heb. 5:14) (kaʼakxilhti recuadro « ¿Tuku wamputun?»). Wamputun nakatsiya tuku tlan chu kminaku nataxtuyacha tuku tlawaputuna. Tiku liwana lakapastaknan ni tlawa tuku litsakgsakan chu ni lakaskin pi wi tiku nawani tuku tlan natlawa. Komo wix natamunuya, talakaskin pi miʼakstu nalaksaka natlawaya tuku tlan maski nitu akxilhmakgon minatlatni o atanu latamanin (katamalakxtupi tuku wan Filipenses 2:12).

6, 7. 1) ¿Tuku tuwa titaxtulh Daniel kBabilonia? 2) ¿La limasiyalh Daniel pi liwana xlakapastaknan?

6 ¿Tlan chatum kgawasa nalimasiya pi liwana lakapastaknan? Kalilakapastakti xliʼakxilhtit chatum kskujni Dios xwanikan Daniel. Max kgawasaku xwanit akxni linka kBabilonia chu nitu xkataʼan xnatlatni. Anta tuwa tuku titaxtulh. Akgtum liʼakxilhtit, xkatalama tiku ni xkgalhakgaxmatkgo Dios. Nachuna, tsukukgolh likatsinikgo la tiku xlakaskinka. Asta laksakka xlakata naskujnani mapakgsina (Dan. 1:3-5, 13). Max Daniel tlakg tlan xlatamalh kBabilonia nixawa kʼIsrael.

7 Pero Daniel limasiyalh pi liwana xlakapastaknan akxni tuwa tuku xtitaxtuma. ¿La tlawalh? Ni mastalh talakaskin pi latamanin xalak Babilonia xlakgpalikgolh o nialh xkgalhakgaxmatli Jehová. Biblia wan pi Daniel «liwana lakkaxwililh xnaku pi ni xʼama lixkajwanan». Wamputun, pi liwana xlakkaxwilinit pi  ni namakgtanu tuku xla ni xaxlikana takanajla (Dan. 1:8). Chuna limasiyalh pi liwana xlakapastaknan.

Ni la nalimasiyaya pi xʼamigo Dios anta kPukgalhtawakga xla xTatayananin Jehová chu la xʼamigo kakilhtamaku anta kʼescuela. (Kaʼakxilhti párrafo 8).

8. ¿Tuku tlan nakatsiniya kxliʼakxilhtit Daniel?

8 ¿Tuku tlan nakatsiniya kxliʼakxilhtit Daniel? Komo wix chatum kgawasa tiku liwana lakapastaknan, xlilat nakgalhakgaxpata Jehová maski lu katuwa tuku titaxtuya. Ni nalitaxtuyaw la camaleón, uma aktsu animal lakgpalitilha xlakata xtachuna natasiya la niku wi. Nila nalimasiyaya pi xʼamigo Dios anta kPukgalhtawakga xla xTatayananin Jehová chu la xʼamigo kakilhtamaku anta kʼescuela. Wa xlakata, ni namakgatsankgananiya Dios maski lu tuwa tuku nalitsakgsakana (kalikgalhtawakga Efesios 4:14, 15).

Komo wix chatum kgawasa tiku liwana lakapastaknan, xlilat nakgalhakgaxpata Jehová maski lu katuwa tuku titaxtuya

9, 10. 1) ¿Tuku xlakata mililakapastakat tuku tlawa akxni xmatlawiputunkana tuku nitlan nina makgas? 2) ¿Tuku tamunut?

9 Xlikana, lakgkgawasanku akinin o linawa kata, putum makglakgalhinanaw (Ecl. 7:20). Pero komo tamunuputuna, kakgalhskinka komo xlikana lakkaxwilinita pi putum kilhtamaku natlawaya tuku Jehová lakaskin. ¿Makgasa kgalhakgaxpatpat Jehová? Kalakapastakti tuku tlawa akxni titaxtu akgtum taputsan nina makgas. ¿Laksakti natlawaya tuku tlan? O max titaxtupat chuna la titaxtulh Daniel. Max wi tiku wanin pi liwana kalimaklakaskinti tuku katsiniya xlakata tlan latamat nakgalhiya kʼuma kakilhtamaku. Akxni kgalhiya akgtum taputsan la uma, ¿liwana katsiya tuku lakaskin Jehová pi natlawaya? (Efes. 5:17).

10 Lu xlakaskinka pi natlawaya uma takgalhskinin, xlakata namakgtayayan lu xlakaskinka naʼakxilha tamunut. Chuna nakalimasiyaniya amakgapitsin pi waninita Jehová pi napaxkiya chu naskujnaniya xliputum minaku chu putum kilhtamaku (Mar. 12:30). Putum tiku tamunukgo liwana xlikatsitkan pi namakgantaxtikgo tuku wanikgolh Jehová (kalikgalhtawakga Eclesiastés 5:4, 5).

«¿TUKU XLAKATA KTAMUNUPUTUN?»

11, 12. 1) Komo lakapastakpat pi natamunuya, ¿tuku liwana milikatsit? 2) ¿Tuku namakgtayayan naʼakxilha tamunut chuna la akxilha Jehová?

11 Biblia wan pi putum kskujnin Dios «xatapaxuwan» skujnikgo, asta tiku lakgkgawasanku (Sal. 110:3). Komo lakapastakpat pi natamunuya, liwana milikatsit pi wix chuna laksaknita. Uma lu xlakaskinka komo mifamilia xtatayananin Jehová.

12 Lata staktilhapat, max akxilhnita la amakgapitsi latamanin tamunutilhamakgolh. Max tamunukgonit makgapitsi miʼamigos o minatalan. Pero kuenta katlawa. Ni kalakapastakti pi na militamunut kaj xlakata kgalhiyata kata  o xlakata amakgapitsi tamunukgonita. ¿Tuku namakgtayayan naʼakxilha tamunut chuna la akxilha Jehová? Kalimaxtu kilhtamaku nalilakapastaka tuku xlakata lu xlakaskinka tamunut. Kʼuma artículo chu nema aku mima natekgsa tuku xlakata lu xlakaskinka.

13. ¿La nakatsiya pi xlikana tamunuputuna?

13 ¿La nakatsiya komo xlikana tamunuputuna? Wa la tlawaya mi oración. Kakgalhskinkanti: «¿Makglhuwa ktlawani oración Jehová o kaj tsinu? ¿Klitachuwinan tuku xlakaskinka o tuku ni lu xlakaskinka?». Uma namakgtayayan nakatsiya komo tlan xʼamigo Dios litaxtuya (Sal. 25:4). Lakgachunin, Jehová kinkalikgalhtiyan Biblia kioracionkan. Atanu la nalikatsiya tuku xlakata tamunuputuna wa la likgalhtawakgapat Biblia (Jos. 1:8). Kakgalhskinkanti: «¿Klismaninit naklikgalhtawakga Biblia akgatunu semana? ¿Klakgati akxni kakninanikan Dios kfamilia?». Umakgolh takgalhskinin namakgtayakgoyan nakatsiya tuku xlakata tamunuputuna, uma wamputun, pi laksaknita xʼamigo Jehová nalitaxtuya chu nalakskujnaniya xliputum minaku.

«¿KʼAKGATEKGSA TUKU KILHCHANIMA TAMAKAMASTANIKAN JEHOVÁ?»

14. ¿Tuku tlawa pi ni lakxtum nakitaxtu tamakamastakan chu tamunukan?

14 Makgapitsi kamanan wankgo pi aya tamakamastanikgonit Jehová, pero ni makgkatsikgo pi tlantiya natamunukgo. Pero ni xlilat. Umakgolh lakgkgawasan ni liwana akgatekgskgo tuku kilhchanima tamakamastakan chu tamunukan. Tamakamastakan wa natlawaniya akgtum oración Jehová niku namalaknuniya pi nalakskujnaniya putum kilhtamaku. Chu alistalh natamunuya xlakata putum nakatsikgo pi aya makamastaninitata Jehová putum milatamat. Wa xlakata akxni nina tamunuya xlakaskinka liwana naʼakgatekgsa tuku kilhchanima tamakamastanikan Dios.

15. ¿Tuku wamputun tamakamastakan?

15 Akxni tamakamastanikan Jehová, xtachuna la wanipat pi ama kilhtamaku milatamat xla tapakgsini. Akxni natamakamastaniya waniya pi tlakg xlakaskinka akxilha naskujnaniya (kalikgalhtawakga Mateo 16:24). Wa xlakata lu xlakaskinka tamakamastakan (Mat. 5:33). ¿La nalimasiyaya pi milatamat tapakgsini Dios? (Rom. 14:8).

16, 17. 1) Kalichuwinanti akgtum liʼakxilhtit niku limasiya pi milatamat nialh tapakgsiniyan. 2) Akxni chatum lataman makamaxki xlatamat Dios, ¿tuku wanima?

16 ¿La nalimasiyaya pi milatamat tapakgsiniyan? Kalakapastakti uma liʼakxilhtit. Kalakpuwanti pi mintlat namaskiwiyan akgtum pukuxtu chu nawaniyan pi mila. Pero alistalh waniyan pi xla natamakgxtakgni escrituras xla uma pukuxtu chu kaj wa tlan anta naskuja. ¿Tlan nawana pi mintlat maskiwin uma pukuxtu? ¿O chuntiya tapakgsini?

17 Akxni chatum lataman makamaxki xlatamat Dios, wanima: «Kilatamat tapakgsiniyan». Chu Jehová lakgchan pi namakgantaxtiniya tuku malaknuninita. Pero kalakpuwanti pi uma lataman tsuku tsekg tataxtu chatum  tiku ni xtatayana Jehová. O kalilakpuwanti pi makglhtinan taskujut nema ni maxki talakaskin naʼan lichuwinan Dios o naʼan ktamakxtumit. Uma lataman ni makgantaxtima tuku malaknunilh Dios. Xtachuna xlitaxtulh la tlat tiku tamakgxtakgni escrituras xla ama pukuxtu. Wa xlakata, komo nawaniya Jehová pi milatamat tapakgsini, putum kilhtamaku natlawaya tuku xla lakaskin, maski namin kilhtamaku ni katitlawa tuku wix lakaskina. Kilikgalhitkan kintapuwankan la Jesús, xla wa: «Kʼakgapun ktaktanitanchi, ni wa mpala wa nkintalakaskin naktlaway, wampi wa xtalakaskin wa nti nkimalakgachalh» (Juan 6:38).

Lu xlakaskinka tamunut chu akgtum talakgalhaman

18, 19. 1) ¿Tuku wan Rose chu Christopher xlakata tamunut? 2) ¿Tuku lakpuwana xlakata tamunut?

18 Xlikana pi tamunukan wa tuku tlakg xlakaskinka nalaksaka. Natamakamastaniya Jehová chu natamunuya akgtum lanka talakgalhaman. Komo paxkiya Jehová chu akgatekgsa tuku wamputun tamakamastakan, nipara katitalaktuwajti xlakata natamunuya. Chu ni katilakpuwanti pi ni tlan tuku tlawa. Chatum tsumat wanikan Rose wan: «Lu kpaxki Jehová, chu nitu atanu tuku tlakg kimakgapaxuwa xlakata kskujnani. Akxni klaksakli naktamunu, liwana xakkatsi pi wa tuku tlakg tlan tuku xaktlawalh».

19 Xapulana párrafo lichuwinaw chatum kgawasa tiku wanikan Christopher. Xla tamunulh akxni xkgalhi 12 kata. ¿La makgkatsi xlakata chuna tlawalh? Xla wan pi lu paxuwa. Akxni 17 kata xkgalhi precursor regular litaxtulh chu akxni makgatsilh 18 kata siervo ministerial wa. La uku skujma kBetel. Xla wan: «Tuku tlakg tlan ktlawalh wa naktamunu. Kskujni Jehová chu xkachikin, nitu atanu tuku naklipaxuwa». ¿Chu wix? ¿Lakapastakpat pi natamunuya? Komo chuna, ¿la tlan nalakkaxwiliya? Naʼakxilhaw kʼartículo nema aku mima.