Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Marzo kata 2016

¿Lakaskinkgo kinatalankan pi nakamakgtayayaw xlakata tuku titaxtutilhakgo chali chali chu nakamakgtayayaw chu nakalimatliwakglhaw Biblia?

«¿Tlan misionero nakwan kkincongregación?»

«¿Tlan misionero nakwan kkincongregación?»

AKXNI nina xtaspita kʼakgapun Jesús kawanilh kstalaninanin: «Na nalichuwinanatit [...] nkimpalakata, chu xlikatlanka [...] asta awatiya kxtankgna tiyat» (Hech. 1:8). ¿La xlichuwinankgolh Dios kKatiyatni?

Chatum makgalhtawakgena xalak universidad nema lu lakgapaskan wa pi kstalaninanin Cristo tiku latamakgolh akxni xmapakgsinamakgolh romanos, ni xtachuna xwankgonit la amakgapitsi takanajla, na ni xtatalakxtumikgo judíos. ¿Tuku xlakata tanu xwankgonit? Xlakata kstalaninanin Cristo kaniwa niku xlichuwinankgo Dios. Na wa tuku tlawalh Jesús. Chu xaxlikana kstalaninanin chuna tlawakgolh xakxilhtit. Xlakan kaniwa lichuwinankgolh «xatlan tamakatsinin xla xTapakgsin Dios». Xkaputsakgo latamanin tiku xkatsiniputunkgo xaxlikana (Luc. 4:43). Wa xlakata Biblia wan pi ama kilhtamaku xlamakgolh apóstoles, uma wamputun pi latamanin tiku kamalakgachakan xlakata wi tuku xtlawakgo (Mar. 3:14). Jesús kalimapakgsilh kstalaninanin: «Kapitit, na kamasiyunikgotit xlipaks akgmakgat chixkuwin» (Mat. 28:18-20).

Xlikana pi 12 xʼapóstoles Jesús nialhtu lamakgolh kKatiyatni, pero lhuwa kskujnin Jehová nachuna tlawakgo. ¿La tlawakgo? Ankgo makgtayanankgo ni tlakg talakaskin niku natalichuwinan Dios. Xlakan wankgo: «¡Unu kwi! Akit kakimalakgacha» (Is. 6:8). Makgapitsi kʼatanu países ankgonit. Wa uma tuku tlawakgonit lhuwa miles natalan tiku kilakgonit kʼEscuela de Galaad. Makgapitsi lakatanu ankgonit maski antiya kxpaískan. Chu amakgapitsin katsinikgonit atanu tachuwin xlakata namakgtayanankgo kʼakgtum congregación o kʼakgtum grupo. Xlikana, makgapitsi  tuwa makgkatsikgonit. Pero umakgolh natalan lhuwa tuku tlawakgolh xlakata paxkikgo Jehová chu latamanin. Liwana lakkaxwilikgolh tuku xtlawaputunkgo chu limaklakaskinkgolh xkilhtamakujkan, xtuminkan chu xlitliwakgakan xlakata naʼankgo lichuwinankgo Dios niku tlakg talakaskin (Luc. 14:28-30). Xputumkan lu tlan taskujut tlawakgo.

Xlikana, nila kimputumkan tlan nakatsiniyaw atanu tachuwin o naʼanaw niku talakaskin tamakgtay xlakata natalichuwinan Dios. Pero kimputumkan tlan nalitaxtuyaw la misioneros kkincongregacionkan. ¿La natlawayaw? Kaʼakxilhwi.

LA MISIONEROS KALITAXTUW KKINCONGREGACIONKAN

¿La tlan nakamakgtayayaw kinatalankan?

Lhuwa tiku xapulana kstalaninanin Cristo ni misioneros xlitaxtukgo, wata kaj kxkachikinkan xlichuwinankgo Dios. Pero xputumkan xatapaxuwan xlichuwinankgo Dios. Xtlawakgo uma xtastakyaw Timoteo: «Wa nkatlawa ntaskujut namakgawaniya xatlan tamakatsinin» (2 Tim. 4:5). Akinin nachuna kilitlawatkan uma tastakyaw. Kilikgalhakgaxmatatkan limapakgsin xlakata nalichuwinanaw tamakatsinin xla Tamapakgsin chu nakamakgalhtawakgeyaw amakgapitsin. Lhuwa tuku tlan natlawayaw xlakata la misioneros nalitaxtuyaw kkincongregacionkan.

Akxni chatum tala an la misionero kʼatanu país, xlikatsit la natlawa xlakata nalismani niku nachan. Max akinin nila anaw alakatanu. Pero ¿tlan nalakputsananaw la natlawayaw xlakata nakatsiniyaw la nalichuwinanaw Dios? Akgtum liʼakxilhtit, kata 1940 xlimakgtumku kamakgpuwantinika natalan pi xlichuwinankgolh Dios ktiji akgtum kilhtamaku akgatunu semana. ¿Chu akinin? ¿Kalitachuwinanaw Dios latamanin tiku katekgsaw ktiji? ¿Litsakgsanitawa atanu la nalichuwinanaw Dios, la akxni maklakaskinkan exhibidores?

Nakamakgpuwantiniyaw xlakata nalichuwinankgo Dios.

Komo xatapaxuwan naʼanaw lichuwinanaw Dios tlakg tlan nakinkakitaxtuniyan. Natalan tiku katsinikgo atanu tachuwin o alakatanu ankgo lu makgtayanankgo kcongregación niku chankgo. Akgtum liʼakxilhtit, wa pulalinkgo la lichuwinankgo Dios. Chu lhuwa misioneros pulalinkgo congregación asta akxni natalan xalak congregación tlan xakstukan napulalinkgo. Komo wix chatum chixku tiku tamununit,  ¿liskujputuna kmincongregación la siervo ministerial o la kgolotsin? (1 Tim. 3:1).

KAKAMAKGTAYA CHU KAKAMATLIWAKGLHTI NATALAN

Nakamaxkiyaw makgapitsi tamakgtay.

Pero wi atanu tuku tlan natlawayaw xlakata namakgtayananaw kcongregación. Maski lakchixkuwin o lakpuskatin, kamanan o linaw kata, kimputumkan tlan nakamatliwakglhaw kinatalankan (Col. 4:11).

Xlakata nakamakgtayayaw kinatalankan, liwana kililakgapasatkan. Biblia wan pi akxni anaw ktamakxtumit, kililakapastakatkan tuku maklakaskinkgo (Heb. 10:24). Uma ni wamputun pi namakgtanuyaw niku ni kilimakgtanutkan. Wamputun pi naʼakgatekgsaw tuku makgkatsikgo chu tuku maklakakaskinkgo. Max maklakaskinkgo nakamakgtayayaw xlakata tuku titaxtutilhakgo chali chali o nakamakgtayayaw chu nakalimatliwakglhaw Biblia. Xlikana pi namin kilhtamaku kajwatiya lakgkgolotsin o siervos ministeriales natlawakgo (Gál. 6:1). Pero kimputumkan tlan nakamakgtayayaw natalan tiku linkgoya kata o familias tiku kgalhikgo taʼakglhuwit.

Nakamakgtayakgoyaw tiku kgalhikgo taʼakglhuwit kxlatamatkan.

Kalilakpuwaw chatum tala wanikan Salvatore. Xla xkgalhi lhuwa taʼakglhuwit xlakata tumin, wa xlakata talakaskilh nasta negocio nema xkgalhi, xchik chu atanu. Lu xlilakgaputsa xfamilia. Anta kcongregación, atanu familia katsilh xlakata tuku xtitaxtuma. Wa xlakata maxkikgolh tsinu tumin, chu makgtayakgolh Salvatore chu xpuskat nakgalhikgo taskujut. Makglhuwa kakgotanun kgaxmatnikgolh chu matliwakglhkgolh. Xputumkan lu tlan amigos litaxtukgolh. La uku xatapaxuwan lakapastakkgo ama kilhtamaku nema akxtum tuwa titaxtukgolh.

Xaxlikana kstalaninanin Cristo ankgalhin skgalalh kwilaw xlakata nakkalitachuwinanaw latamanin xtachuwin Dios. Chuna kilitlawatkan la tlawalh Jesús chu putum latamanin kakalitachuwinaw xalakwan xtamalaknun Dios. Maski tlan naʼanaw niku tlakg talakaskin tamakgtay o ni, putum tlan naliskujaw xlakata nakamakgtayayaw kinatalankan xalak kcongregación (Gál. 6:10). Komo chuna natlawayaw, tlakg napaxuwayaw chu chuntiya natlawayaw putum xatlan taskujut (Col. 1:10; Hech. 20:35).