Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Junio kata 2016

Chixku tiku lin litsokgni, wa Jesús. Wa wan tiku nalakgtaxtukgo.

Tuku katsiputunkgo tiku likgalhtawakgakgo

Tuku katsiputunkgo tiku likgalhtawakgakgo

Ezequiel maʼakxilhnika niku xwi chatum chixku tiku xkgalhi xlitsokgni tsokgna chu kgalhchaxan lakchixkuwin tiku xlinkgo limakgnin. ¿Tiku kilhchanimakgolh?

Kilhchanima ángeles xalak akgapun tiku makgtayanankgolh xlakata xmalakgsputuka Jerusalén chu na namakgtayanankgo akxni namasputukan xkakilhtamaku Satanás kʼArmagedón. Uma xasasti taʼakgatekgsni. ¿Tuku xlakata klakgpaliw tuku xakwanitaw makgasa?

Akxni nina xtakgatsi kata 607 akxni nina xmin Jesús, Jehová tlawalh pi Ezequiel xʼakxilhli tuku xʼama la kJerusalén akxni nina xmalakgsputukan. Ezequiel akxilhli pi latamanin xalak Jerusalén lu nitlan tuku xtlawakgo. Alistalh akxilhli kgalhchaxan lakchixkuwin tiku «xchipatilhakgo tuku limakgninankan». Na akxilhli chatum chixku tiku xwilinit lhakgat xla lino tiku xchipanit «litsokgni nema maklakaskin tsokgna» (Ezeq. 8:6-12; 9:2, 3). Jehová wanilh ama chixku: «Katitaxtu kkachikin, kxlakgstipan Jerusalén, chu kamutsokgkgo lakchixkuwin tiku jalhpanimakgo chu tasamakgo xlakata putum tuku lixkajnit tlawamaka kkachikin». Chu kgalhchaxan lakchixkuwin tiku xlinkgo limakgnin kawanilh pi xmakgnikgolh putum tiku ni xkalhkakanit (Ezeq. 9:4-7). ¿Tuku katsiniyaw xlakata uma tuku maʼakxilhnika? ¿Chu tiku ama chixku tiku xlin xlitsokgni nema maklakaskin tsokgna?

Ezequiel wa uma tachuwin kata 612 akxni nina xmin Jesús. Chu xapulana kgantaxtulh akgkitsis kata alistalh, akxni Jehová mastalh talakaskin pi soldados xalak Babilonia xmasputukgolh Jerusalén. Jehová chuna maklakaskilh Babilonia xlakata kstakyawalh xkachikin xlakata ni xkgalhakgaxmatkgo (Jer. 25:9, 15-18). Pero ¿tuku lanikgolh judíos tiku nitlan xlimakgkatsikgo tuku xlama kJerusalén? Jehová tlawalh pi xlakgtaxtukgolh.

 Akxni Ezequiel maʼakxilhnika uma, xla niti mulhkalh chu na ni makgtayanalh namasputukan Jerusalén. Wata wa ángeles tiku makgtayanankgolh namasputukan Jerusalén. Wa xlakata uma tuku kgantaxtulh kinkamaxkiyan talakaskin naʼakxilhaw tuku la kʼakgapun. Jehová kawanilh xʼángeles pi xmakgtayanankgolh xkamasputuka tiku xmakgxtakgkgonit chu xkalakgmaxtukgolh tiku ni xmakgxtakgkgonit. *

Uma tuku xtalichuwinanit nakgantaxtu xlimakgtiy. ¿La nakgantaxtu chu tuku kilhtamaku? Makgasa, kilikgalhtawakgakan xlichuwinan pi chixku tiku xlin xlitsokgni tsokgna xkilhchanima tiku kalaksakkanit naʼankgo kʼakgapun chu lamakgolhku kkatiyatni. Na xlichuwinan pi latamanin kamulhkakan xlakata nalakgtaxtukgo akxni kgaxmatkgo chu makgamakglhtinankgo xTachuwin Dios. Pero la uku klakpuwanaw pi xlakaskinka naklakgpaliyaw tuku xwanitaw. ¿Tuku xlakata? Xlakata nina makgas likgalhtawakgaw Mateo 25:31-33 chu akxilhwi pi wa Jesús tiku katalakkaxla latamanin chu nakatalakkaxla kkilhtamaku nema aku mima, akxni natawila lanka takatsanajwat. Ama kilhtamaku nalaksaka tiku nalitaxtukgo la borregos chu cabras. Borregos nalakgtaxtukgo, pero cabras nakamasputukan.

Wa xlakata, ¿tuku kinkamasiyaniyan tuku maʼakxilhnika Ezequiel? Kalichuwinaw pulakkitsis:

  1. Akxni Jerusalén nina xmasputukan, Jehová limaklakaskilh Ezequiel, Isaías chu Jeremías, litaxtukgolh la skgalananin xlakata xkamakatsinikgolh latamanin tuku xʼama la kkachikin. La uku, Jehová kalimaklakaskin makgapitsi tiku xatalaksakni xlakata nakamasiyanikgo kskujnin chu nakamakatsinikgo latamanin xlakata nina tsuku lanka takatsanajwat. Kʼuma taskujut makgtayanamakgolh «amakgapitsi kskujnin» Cristo, uma wamputun putum kskujnin Dios (Mat. 24:45-47TNM).

  2. Ezequiel ni kamutsokgli latamanin tiku xʼamakgolh lakgtaxtukgo. La uku, kskujnin Dios na ni mutsokgkgo latamanin. Xlakan kajwatiya lichuwinankgo Dios chu kamakatsinikgo latamanin tuku nala ni makgas. Chu wa ángeles tiku kamakgtayamakgolh xlakata tlan namakatsininankgo kputum katiyatni (Apocalipsis [Revelación] 14:6).

  3. Kxkilhtamaku Ezequiel, tiku lakgtaxtukgolh ni xaxlikana xkamulhkakanit. La uku, tiku nalakgtaxtukgo klanka takatsanajwat na ni katikamulhkaka. ¿Tuku xlitlawatkan la uku latamanin tiku lakgtaxtuputunkgo? Akxni kgaxmatkgo tamakatsinin, xlikatsinitkan nastalanikgo xliʼakxilhtit Cristo, natamakamastanikgo Dios chu namakgtayakgo xnatalan Cristo, na nalichuwinankgo xTamapakgsin Dios (Mat. 25:35-40). Akxni natawila lanka takatsanajwat, xtachuna la nakamulhkakan, uma wamputun pi nakalakgmaxtukan.

  4. Chixku tiku lin litsokgni, wa Jesús. Akxni nala lanka takatsanajwat, xla nakalaksaka tiku namakgtapakgsikgo klhuwa tachixkuwitat akxni nakatalakkaxla chu nawan tiku nalitaxtu la borrego. Ama kilhtamaku nakamaxkikan talakaskin nalatamakgo kKatiyatni putum kilhtamaku (Mat. 25:34, 46). *

  5. La uku, kgalhchaxan lakchixkuwin tiku linkgo limakgnin kilhchanima soldados xalak akgapun tiku kapulalin Jesús. Xlakan nialh makgas namasputukgo kachikinin chu namasputukgo putum tuku nixatlan anan (Ezeq. 10:2, 6, 7; Apoc. 19:11-21).

Umakgolh pulakkitsis tuku lichuwinanaw nakinkamakgtayayan nakanajlayaw pi Jehová ni katikamasputulh kskujnin, kajwatiya tiku lixkajni likatsikgo (2 Ped. 2:9; 3:9). Nachuna, kinkamalakapastakayan pi xlakaskinka nalichuwinanaw Dios la uku. Putum latamanin xlikgaxmatatkan tamakatsinin xlakata nina chin xlisputni (Mat. 24:14).

^ párr. 6 Makgapitsi tiku lakgtaxtukgolh wa recabitas, etíope Ébed-mélec chu Baruc, xtsokgna Jeremías (Jer. 35:1-19; 39:15-18; 45:1-5). Pero ni wamputun pi xlikana kamulhkaka. Wata xkilhchanima pi xʼamakgolh lakgtaxtukgo.

^ párr. 12 Xatalaksakni ni talakaskin nakamulhkakan xlakata nalakgtaxtukgo. Kamulhkakan akxni nina nikgo o akxni nina tsuku lanka takatsanajwat (Apoc. 7:1, 3).