Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Junio kata 2016

Ni kamakgxtakgwi Jehová kaj xlakata tuku tlawakgo amakgapitsin

Ni kamakgxtakgwi Jehová kaj xlakata tuku tlawakgo amakgapitsin

«Kalapaxuwanalipinitit, chu na nalamatsankgananiyatit nchatunu amakgapitsin» (COL. 3:13).

TAKILHTLIN: 53, 28

1, 2. ¿Tuku lichuwinalh Jehová xlakata la xʼama staka xkachikin?

LA UKU wilakgolh makgapitsi latamanin tiku paxkikgo Dios chu skujnaniputunkgo. Kalilakgapaskan xtatayananin Jehová. Xlikana pi makglakgalhinanin, pero Jehová kapulalin chu kalisikulunatlawa xʼespíritu santo. Kaʼakxilhwi la tlawanit.

2 Kkata 1914, ni lhuwa tiku xkakninanikgo Jehová. Pero xlakata sikulunatlawanit la talichuwinama xtachuwin, lhuwa millones latamanin lakgapaskgonit xaxlikana nema takilhtinit kBiblia chu xtatayananin Jehová litaxtukgonit. Dios lichuwinalh makgasa xlakata la xʼama staka xkachikin: «Tiku ni lhuwa, akgtum mil nawan, chu tiku xaʼaktsina akgtum tliwakga kachikin nawan. Akit, Jehová, nakmalakapali kxkilhtamaku» (Is. 60:22). Liwana katsiyaw pi kgantaxtuma la uku tuku lichuwinalh. Xkachikin Jehová litaxtu la akgtum lanka kachikin nema kgalhi  liwaka akgtsayan millón latamanin. Uma wamputun pi tlakg lhuwa akinin ni xawa tiku wilakgolh klhuwa países kkatiyatni.

3. ¿La limasiyanit tapaxkit xkachikin Dios?

3 Kʼuma xaʼawatiya kilhtamaku, Jehová kamakgtayama kskujnin xlakata tlakg nalapaxkikgo. «Dios, tapaxkit» chu lakaskin pi kskujnin nachuna nalikatsikgo la likatsi (1 Juan 4:8). Jesús kalimapakgsilh kstalaninanin xlakata xlapaxkikgolh. Chu na kawanilh: «Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit» (Juan 13:34, 35). Kkinkilhtamakujkan xkachikin Jehová limasiyakgonit tapaxkit, asta akxni anan guerras. Akgtum liʼakxilhtit, akxni tawi xliʼAkgtiy Guerra xLikalanka Katiyatni nikgolh 55 millones latamanin. Pero xtatayananin Jehová niti makgnikgolh akxni lalh ama guerra (kalikgalhtawakga Miqueas 4:1, 3). Uma kamakgtayakgonit ni nalinkgo kuenta (Hech. 20:26).

4. ¿Tuku xlakata lu xlakaskinka akxilhaw la staknit xkachikin Dios?

4 La uku, xkachikin chuntiya stakma maski kgalhi xtalatlawana tiku lu lhuwa litliwakga kgalhi. Uma talatlawana wa Satanás, «xmalana katuxawat» (2 Cor. 4:4). Satanás mapakgsi política xla uma kakilhtamaku chu putum tuku limakatsininankan, chu limaklakaskin xlakata namachokgo la talichuwinama Dios. Pero nila machokgo uma taskujut. Katsi pi «kaj tsinu kilhtamaku nkgalhiy», chu wa xlakata chuntiya litsakgsama nialh naskujnaniyaw Jehová (Apocalipsis [Revelación] 12:12).

¿NAMAKGXTAKGAW DIOS KOMO AMAKGAPITSIN NALAKGALHINANKGO?

5. ¿Tuku xlakata namin kilhtamaku nitlan nakinkamamakgkatsiniyan amakgapitsi? (Kaʼakxilhti xapulana dibujo).

5 Kskujnin Dios katsiyaw pi lu xlakaskinka napaxkiyaw Jehová chu amakgapitsi. Jesús wa: «“Milipaxkit Jehová miDios xliputum minaku chu xliputum milatamat chu xliputum mintalakapastakni”. Wa uma tlakg xalanka chu xapulana limapakgsin. Xliʼakgtiy, nema xtachuna, wa uma: “Milipaxkit mintalataman chuna la miʼakstu paxkikana”» (Mat. 22:35-39TNM). Pero Biblia kinkawaniyan pi putum makglakgalhinanin lakachinaw xlakata xtalakgalhin Adán (kalikgalhtawakga Romanos 5:12, 19). Wa xlakata, max chatum tala kcongregación natlawa o nawan tuku nitlan nakinkamamakgkatsiniyan. ¿Tuku natlawayaw? ¿Chuntiya lu napaxkiyaw Jehová? ¿Ni namakgxtakgaw Jehová chu xkachikin? (Kaʼakxilhti recuadro «¿Tuku kilhchanima?»). Biblia lichuwinan makgapitsi kskujnin Dios tiku tlawakgolh o wankgolh tuku nitlan limakgkatsikgolh amakgapitsin. Kaʼakxilhwi tuku kinkamasiyaniyan tuku titaxtukgolh.

¿Tuku xtlawaw komo xlatamaw kʼIsrael kxkilhtamaku Elí chu xlakgkgawasan? (Kaʼakxilhti párrafo 6).

6. ¿Tuku lu nitlan tlawalh Elí?

6 Kalilakpuwaw tuku titaxtulh Elí. Xapuxku sacerdote xlitaxtu kʼIsrael, chu chatiy xlakgkgawasan ni xkgalhakgaxmatkgo xlimapakgsin Jehová. Biblia wan pi xlakgkgawasan Elí lixkajnit xlikatsikgo chu ni xmaxkikgo kakni Jehová (1 Sam. 2:12). Elí xkatsi pi xlakgkgawasan xtlawamakgolh tuku lu nitlan. Pero nitlan tuku tlawalh chu ni kastakyawalh la xlilat xwanit. Titaxtulh kilhtamaku, Jehová malakgaxokgelh  Elí chu chatiy xlakgkgawasan. Chu na ni mastalh talakaskin pi tiku xminacha kxfamilia Elí sacerdote xlitaxtulh (1 Sam. 3:10-14). Kalilakapastakwi pi lamaw kxkilhtamaku Elí chu akxilhaw pi mastama talakaskin pi xkamanan natlawakgo tuku lu nitlan. ¿Tuku xtlawaw? ¿Xmastaw talakaskin pi xtaxlajwanilh kintakanajlakan chu xmakgxtakgwi Jehová?

7. 1) ¿Tuku lanka talakgalhin tlawalh David? 2) ¿Tuku tlawalh Dios xlakata uma?

7 La uku na kalichuwinaw David. Lu tlan tayat xkgalhi, wa xlakata Jehová lu xpaxki (1 Sam. 13:13, 14; Hech. 13:22). Pero asta David tlawalh laklanka talakgalhin. Makgtum tatlawalh talakgxtumit xpuskat chatum ksoldado, tiku xwanikan Urías chu xlama kʼguerra. Uma puskat xʼama kgalhi kskgata. Xlakata David ni xlakaskin xtakatsilh tuku xtlawanit, tasanilh Urías xlakata xwanilh pi xʼalh kxchik. David xlakaskin pi xtatalakgxtumilh xpuskat. Chuna latamanin xʼamakgo lakpuwankgo pi skgata xla Urías xwanit. Pero xla ni alh kxchik. Wa xlakata David lakkaxwililh nani kʼatanu guerra. David chu xfamilia lu patinankgolh xlakata laklanka talakgalhin nema tlawalh (2 Sam. 12:9-12). Pero Jehová lakgalhamalh David chu tapatilh. Xkatsi pi David xtlawaputun tuku xaʼakgstitum (1 Rey. 9:4). Komo xtilatamaw amacha kilhtamaku, ¿la xmakgkatsiw xlakata tuku tlawalh David? ¿Nialh kskujnaniw Jehová?

8. 1) ¿Tuku ni makgantaxtilh Pedro? 2) ¿Tuku xlakata Jehová chuntiya lakgayawalh taskujut maski lakgalhinalh?

8 Atanu liʼakxilhtit xalak Biblia wa apóstol Pedro. Jesús laksakli xlakata chatum xʼapóstol xlitaxtulh. Maski  chuna, Pedro makglhuwa wa chu tlawalh tuku nitlan. Akgtum liʼakxilhtit, makgtum malaknulh pi nikxni xʼama makgxtakga Jesús maski amakgapitsin xmakgxtakgkgolh (Mar. 14:27-31, 50). Pero akxni xchipakanita Jesús, putum apóstoles makgxtakgkgolh, asta Pedro. Chu makgtutu wa pi ni xlakgapasa Jesús (Mar. 14:53, 54, 66-72). Pero nitlan limakgkatsilh tuku xtlawanit. Wa xlakata Jehová tapatilh chu chuntiya lakgayawalh taskujut. Komo kstalaninanin Cristo xlitaxtuw amacha kilhtamaku chu xkgaxmatwi tuku tlawalh Pedro, ¿chuntiya xlipawaw Jehová?

Tlan lipawanaw pi Jehová putum kilhtamaku natlawa tuku tlan chu xaʼakgstitum

9. ¿Tuku xlakata kanajlaya pi Jehová putum kilhtamaku natlawa tuku xaʼakgstitum?

9 ¿Tuku kinkamasiyanikgoyan umakgolh liʼakxilhtit? Pi makgapitsi kskujnin Jehová tlawakgonit tuku nitlan chu lu nitlan kamamakgkatsinikgonit amakgapitsin. Komo chuna nakinkaʼakgspulayan la uku, ¿tuku natlawayaw? ¿Nialh naʼanaw ktamakxtumit chu namakgxtakgaw Jehová chu xkachikin? ¿O nalakapastakaw pi Jehová xalakgalhamana chu max maxkima kilhtamaku xlakata nalakgpali xtayat? Pero ¿komo ni namakgxtakga lanka talakgalhin nema tlawanit? ¿Nalipawanaw pi Jehová katsi tuku lama chu nalakkaxtlawa akxni xlilat? Xla tlan namaxtu lataman kcongregación komo natalakaskin. Pero putum kilhtamaku nalipawanaw pi Jehová natlawa tuku xaʼakgstitum chu tuku tlan.

NI KAMAKGXTAKGWI DIOS

10. ¿Tuku akgatekgsli Jesús xlakata tuku nitlan tlawakgolh Judas Iscariote chu Pedro?

10 Biblia lichuwinan lhuwa kskujnin Dios tiku nikxni makgxtakgkgolh chu xkachikin maski makgapitsi tlawakgolh laklanka talakgalhin. Tiku tlakg tlan liʼakxilhtit wililh wa Jesús. Akxni xʼama laksaka xʼapóstoles, akgtum katsisni skinilh tamakgtay xtlat. Pero, stawalh chatum xʼapóstol, Judas Iscariote. Nachuna, apóstol Pedro wa pi ni xlakgapasa Jesús (Luc. 6:12-16; 22:2-6, 31, 32). Jesús liwana xʼakgatekgsa pi Jehová chu amakgapitsi kstalaninanin ni xkuentajkan xwanit tuku Pedro chu Judas Iscariote tlawakgolh. Wa xlakata Jesús ni tamakgatlinilh xTlat, chuntiya skujnanilh chu nikxni makgxtakgli. Wa xlakata Jehová maxkilh tamaskiwin akxni maxkipa xlatamat chu alistalh Mapakgsina litaxtulh kxTamapakgsin xTlat kʼakgapun (Mat. 28:7, 18-20).

11. ¿Tuku lichuwinalh Biblia xlakata kskujnin Dios tiku xlatamakgolh la uku?

11 Xliʼakxilhtit Jesús kinkamasiyaniyan ni namakgxtakgaw Jehová chu xkachikin. Kalichuwinaw tuku xlakata ni namakgxtakgaw Jehová. Tlan akxilhaw pi Jehová kinkapulaliman kʼuma xaʼawatiya kilhtamaku. Kinkamakgtayayan nalichuwinanaw xaxlikana xlitilanka kkatiyatni. Kaj akinin chuna tlawamaw. Nachuna, akxtum wilaw chu paxuwayaw xlakata putum tuku Dios kinkamasiyaniyan. Biblia lichuwinan pi xkachikin Dios  xpaxuwakgolh xlakata «tlan makgkatsikgo kxnakujkan» (Is. 65:14).

Nitlan chu ni xlilat komo xmakgxtakgwi Jehová chu xkachikin kaj xlakata chatum tala tlawalh tuku nitlan

12. ¿La naʼakxilhaw xtalakgalhinkan amakgapitsin?

12 Paxuwayaw xlakata wa Jehová kinkapulaliman chu kinkamakgtayayan natlawayaw lhuwa tuku tlan. Latamanin tiku tatayakgo Satanás ni paxuwakgo chu ni kgalhikgo takgalhkgalhin. Wa xlakata akxni makgapitsi natalan tlawakgo talakgalhin kcongregación, kalakpuwaw la nakaʼakxilhaw chu tuku natlawayaw. Ni kakalimawakaw xlakata namakgxtakgaw Jehová chu xkachikin. Komo namakgxtakgaw ni katilimasiyaw liskgalala chu tuku xaʼakgstitum. Wata ni kamakgxtakgwi Jehová chu katlawaw xtalakaskin. Kaʼakxilhwi la natlawayaw.

¿TUKU NATLAWAYAW?

13, 14. 1) ¿Tuku xlakata ni tunkun kilisitsitkan xlakata tuku wankgo o tlawakgo amakgapitsin? 2) ¿Tuku xtamalaknun Jehová kililakapastakatkan?

13 ¿Tuku kilitlawatkan komo chatum tala wan o tlawa tuku nitlan kinkamamakgkatsiniyan? Biblia wan pi ni tunkun nasitsiyaw (Ecl. 7:9). Putum akinin makglakgalhinanin chu tlawayaw tuku nitlan. Wa xlakata ni tunkun kilisitsitkan chu kililakapastakatkan pi namin kilhtamaku kinatalankan nawankgo o natlawakgo tuku nitlan. Nachuna, ni tlan komo chuntiya nalilakpuwanaw tuku nitlan tlawakgolh amakgapitsin, xlakata uma max natlawa nialh xatapaxuwan naskujnaniyaw Jehová. Chu tuku tlakg nitlan, kintakanajlakan nataxlajwani chu asta max namakgxtakgaw xkachikin Jehová. Nila naskujnaniyaw Jehová chu nila nalatamayaw kxasasti katiyatni.

14 Wa xlakata, ¿tuku nakinkamakgtayayan chuntiya xatapaxuwan naskujnaniyaw Dios akxni amakgapitsin nitlan nakinkamamakgkatsiniyan? Putum kilhtamaku kalakapastakwi uma xtamalaknun Jehová: «¡Kaʼakxilhtit!, naktlawa xasasti akgapun chu xasasti katiyatni; chu tuku titaxtunita nialh katitalakapastakli, na nialh katitawilalh kkinakujkan» (Is. 65:17; 2 Ped. 3:13). Jehová nakinkamaxkiyan umakgolh tasikulunalin komo ni makgxtakgaw.

15. ¿Tuku wa Jesús pi kilitlawatkan akxni amakgapitsin natlawakgo tuku nitlan?

15 Xlikana pi nina lamaw kxasasti katiyatni. Wa xlakata, komo wi tiku nitlan kinkamamakgkatsiniyan, kalilakpuwaw tuku Jehová lakaskin natlawayaw. Akgtum liʼakxilhtit, Jesús wa: «[Komo] xmatsankgananikgotit wa nti nkamakgasitsin, chu na nakamatsankgananiyan minTlatkan nti wi nkakgapun. Wampi wa lapi ni xmatsankgananikgotit wa nti nkamakgasitsin, na ni katikamatsankgananin mintalakgalhinkan minTlatkan nti wi nkakgapun». Chu akxni apóstol Pedro kgalhskilh Jesús komo natapatinanaw «asta mpala makgtujun[...]», Jesús kgalhtilh: «Asta  tutumpuxamakaw makgtujun». Jesús kinkamasiyanin pi putum kilhtamaku xatapaxuwan nakatapatiyaw amakgapitsin (Mat. 6:14, 15; 18:21, 22).

16. ¿Tuku lu tlan liʼakxilhtit wililh José?

16 Xliʼakxilhtit José kinkamasiyaniyan tuku kilitlawatkan akxni amakgapitsin kinkatlawanikgoyan tuku nitlan. José chu xtala Benjamín kaj xlakan xlitaxtukgo xkamanan Jacob chu Raquel. Jacob xkgalhi atanu kgalhkaw xlakgkgawasan, pero tlakg xpaxki José nixawa amakgapitsi. Uma tlawalh pi amakgapitsi xnatalan xlakgsitsikgolh. Lu ni xʼakxilhputunkgo wa xlakata stakgolh xlakata skujni xlitaxtulh. Xmalanakan José linkgolh kʼEgipto. Akxni lhuwa kata xtitaxtunit, mapakgsina xalak Egipto tlawalh pi José xlichatiy tlakg tliwakga chixku xlitaxtulh kpaís. Mapakgsina lu kaks xmalakawani putum tuku tlan nema José xtlawanit. Titaxtulh lhuwa kata, xnatalan José ankgolh tamawakgo taway kʼEgipto xlakata kxpaiskan nitu xʼanan tuku xwakgolh. Akxni akxilhkgolh José, ni lakgapaskgolh, pero xla kalakgapasli. Maski xlakan lu nitlan xlikatsinikgonit, ni kamalakgaxokgelh. Wata kaliʼakxilhli, xlakata xkatsilh komo xlikana xtalakgpalikgonit. Akxni José akxilhli pi xtalakgpalikgonit, kawanilh pi xtalakan xlitaxtu. Alistalh tlan kamamakgkatsinilh chu kawanilh: «Ni kapekuantit, chuntiya nakkamaxkiyan liwat chu na nakkamaxki minkamanankan» (Gén. 50:21).

17. ¿Tuku natlawaya akxni amakgapitsin natlawakgo tuku nitlan?

17 Kalakapastakwi pi xlakata putum tlawayaw tuku nitlan, akinin na nitlan kamamakgkatsiniyaw amakgapitsin. Wa xlakata, komo katsiyaw pi nitlan mamakgkatsiniw chatum tala, katlawaw tuku Biblia kinkawaniyan. Kaskiniw kakinkatapatin chu kaputsaw tlan nalatalalimparayaw (kalikgalhtawakga Mateo 5:23, 24). ¿Ni xlikana pi lakgatiyaw akxni amakgapitsin kinkatapatikgoyan? Wa xlakata na xlilat nakatapatiyaw. Colosenses 3:13 kinkamaxkiyan uma tastakyaw: «Kalapaxuwanalipinitit, chu na nalamatsankgananiyatit nchatunu amakgapitsin lapi wi nti lamakgasitsiyatit; xtachuna lantla nkamatsankgananin nCristo, na chuna wixin nkatlawatit». Komo xlikana kapaxkiyaw kinatalankan, ni chuntiya nasitsiyaw xlakata tuku makgasa kinkatlawanikan (1 Cor. 13:5). Chu komo akinin nakatapatiyaw, Jehová na nakinkatapatiyan. Wa xlakata, kakalakgalhamaw amakgapitsin, chuna la Jehová kinkalakgalhamanan (kalikgalhtawakga Salmo 103:12-14).