Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Junio kata 2016

Kapaxtikatsiniw Jehová tiku kinkamakgtayayan natalakgpaliyaw

Kapaxtikatsiniw Jehová tiku kinkamakgtayayan natalakgpaliyaw

«Oh Jehová, wix kinTlatkan. Akinin tiyat, chu wix kinkalitaxtuniya tiku liskuja tiyat; kimputumkan kilalitlawanitaw mimakan» (IS. 64:8).

TAKILHTLIN: 11, 26

1. ¿Tuku xlakata Jehová tlakg xatlan tiku liskuja tiyat?

NOVIEMBRE kata 2010 wi tiku wa pi naxokgo atsinu ni 70 millones xla dólares xlakata xtamawalh akgtum vasija xalak china nema kstamaka kʼInglaterra. Lu tuwa kanajlakan pi xtlawana tlamank kaj tiyat limaklakaskin xlakata natlawa tuku lu stlan chu lhuwa xtapalh kgalhi. Jehová xtachuna la tiku liskuja tiyat chu niti tatalakxtumi. Biblia lichuwinan pi Jehová kaj pokgxni maklakaskilh xlakata natlawa chixku tiku ni xkgalhi talakgalhin, xwanikan Adán (Gén. 2:7). Ama chixku xkgawasa Dios xwanit, chu na tlan xkgalhilh lakwan tayat chuna la Jehová (Luc. 3:38).

2, 3. ¿La tlan nachuna natlawayaw la israelitas tiku nitlan xlimakgkatsikgo xtalakgalhinkan?

2 Akxni Adán lakatsalalh xlimapakgsin xMalakatsukina, nialh xkgawasa litaxtulh. Pero lhuwa xkamanan tatayakgolh Jehová la xMapakgsinakan (Heb. 12:1). Xatapaxuwan kgalhakgaxmatkgolh xMalakatsukinakan. Chuna lakgmakgankgolh Satanás chu limasiyakgolh pi xlakaskinkgo pi Jehová xTlatkan xlitaxtulh chu wa tiku xkamakgtayalh natalakgpalikgo (Juan 8:44).  Xlakata ni makgxtakgkgolh Dios, kinkamalakapastakayan tuku israelitas wankgolh makgasa: «Oh Jehová, wix kinTlatkan. Akinin tiyat, chu wix kinkalitaxtuniya tiku liskuja tiyat; kimputumkan kilalitlawanitaw mimakan» (Is. 64:8) (kaʼakxilhti recuadro «¿Tuku kilhchanima?»).

3 La uku, xaxlikana kskujnin Dios liskujaw xlakata nachuna nakgalhiyaw kintapuwankan chu nataktujuyaw akxni nakgalhakgaxmataw kimalakatsukinakan. Lanka talakgalhaman akxilhaw xlakata wanaw pi Jehová kinTlatkan. Lakaskinaw pi wa kakinkamakgtayan. Wa xlakata kakinkakgalhskinkan: «¿Klitaxtu la tiyat nema Dios ni tuwa namaklakaskin xlakata natlawa akgtum stlan tlamank? ¿Kkaliʼakxilha kinatalan la tiyat nema Jehová aku liskujma?». Xlakata nakgalhiyaw xatlan tayat, kʼuma artículo pulaktutu tuku nalichuwinanaw. Xapulana, la laksaka Jehová tiku namakgtaya natalakgpali. Xlipulaktiy, tuku xlakata kalakgpali. Chu xlipulaktutu, la kamakgtaya natalakgpalikgo.

¿LA LAKSAKA JEHOVÁ TIKU KAMAKGTAYA NATALAKGPALIKGO?

4. ¿La kalaksaka Jehová tiku kamalakatsuwi kxlakatin? Kalichuwinanti akgtum liʼakxilhtit.

4 Jehová ni kaʼakxilha latamanin la akinin kaʼakxilhaw. Xla akxilha xnaku chatunu latamanin chu akxilha la likatsi (kalikgalhtawakga 1 Samuel 16:7b). Akgtum liʼakxilhtit wa akxni tlawalh xapulana congregación. Kalimilh latamanin tiku nitu xkaliʼakxilhkan xlakata xlakgapaskgolh chu na xlakgapaskgolh xKgawasa (Juan 6:44). Chatum tiku limilh wa Saulo tiku xlitaxtu xpulalina takanajla. Lankajwa chixku xwanit chu xasitsin tiku xkaputsastalani kstalaninanin Cristo chu xwan taʼakgsanin xpalakatakan (1 Tim. 1:13). Pero Jehová akxilhli xnaku chu ni lakpuwa pi Saulo xlitaxtu la tiyat nema nitu xlilaka (Prov. 17:3). Wata lakpuwa pi xlitaxtu la tiyat nema tlan xlimaklakaskilh xlakata xlitaxtulh la xatalaksakni tiku xkalitachuwinalh Dios «xakgmakgat chixkuwin, chu laktlanka reyes, chu xkilhtsukut Israel» (Hech. 9:15). Jehová na kalaksakli makgapitsi latamanin chu kamakgtayalh natlawakgo tuku tlan chu litaxtukgolh la tlamank nema «tlan tuku nalimaklakaskinkan» (Rom. 9:21). Makgapitsi xkgalhanankgo, xkgachikgo chu xtlawakgo talakgxtumit xalimaxana (1 Cor. 6:9-11). Pero akxni katsinikgolh xlakata Dios, matliwakglhtilhakgolh xtakanajlakan chu mastakgolh talakaskin xkamakgtayatilhakgolh.

Ni kakalakputsananiw kinatalankan chu tiku kalitachuwinanaw Dios

5, 6. 1) Komo lipawanaw pi Jehová nakinkamakgtayayan natalakgpaliyaw, ¿la nakaʼakxilhaw latamanin tiku kalitachuwinanaw Dios? 2) Komo lipawanaw pi Jehová nakinkamakgtayayan natalakgpaliyaw, ¿la nakaʼakxilhaw natalan xalak congregación?

5 Lipawanaw pi Jehová tlan kalaksaka latamanin chu kalimin tiku mastakgo talakaskin nakamakgtayakan. Ni kakalakputsananiw kinatalankan chu tiku kalitachuwinanaw Dios. Na ni kalakpuwaw pi chatum lataman nikxni xtatayana Jehová nawan. Kalichuwinaw xliʼakxilhtit chatum chixku tiku wanikan Michael. Xla wan: «Akxni xtatayananin Jehová xkilakgapaxiʼalhnankgo,  xakkamalakchuwani chu xaktlawa la komo ni xakkaʼakxilha. Lu nitlan xakkalikatsini. Titaxtulh kilhtamaku, kkalakgapasli alakatanu kachikin akgtum familia tiku lu klakgatilh la xkgalhikgo xtayatkan. Kkatsilh pi xtatayananin Jehová xwankgonit. Nila xakkanajla. Xtayatkan tlawalh pi naklakpuwan tuku xlakata nitlan xakkalikatsini. Kkatsilh pi nitlan xakkalikatsini kaj xlakata tuku xakkgaxmatnit chu ni xakkalakgapasa». Michael tlakg xkatsiputun xlakata xtatayananin Jehová, wa xlakata tsukulh kgalhtawakga. Titaxtulh kilhtamaku tamunulh chu liskujli la precursor.

6 Komo nalipawanaw pi nakinkamakgtayayan Jehová natalakgpaliyaw, tlakg tlan nakaʼakxilhaw kinatalankan. Nakaliʼakxilhaw la tiyat nema Jehová aku liskujma. Jehová chuna kaliʼakxilha. Xla kaʼakxilha xnakujkan chu katsi pi ni putum kilhtamaku katikgalhikgolh xtalakgalhinkan. Nachuna, katsi pi tlan latamanin nalitaxtukgo (Sal. 130:3). ¿La nalikatsiyaw la Jehová? Nakaʼakxilhaw kinatalankan la kaʼakxilha Jehová. Asta tlan namakgtayayaw Dios chu nakamakgtayayaw kinatalankan xlakata natalakgpalitilhakgo (1 Tes. 5:14, 15). Lakgkgolotsin xliwilitkan tlan liʼakxilhtit (Efes. 4:8, 11-13).

¿TUKU XLAKATA JEHOVÁ KINKAMAKGTAYAYAN?

7. ¿Tuku xlakata napaxtikatsiniyaw akxni nakinkaʼakgastakyawayan Jehová?

7 Lhuwa latamanin wankgo pi xlakaskinka akxilhkgo xtastakyaw xtlatkan akxni kgalhikgoya xkamanankan. Akxni tlakg linawa kata, tlakg xlakaskinka akxilhaw xtastakyaw kinatlatnikan xlakata akgatekgsaw pi xkinkapaxkikgoyan (kalikgalhtawakga Hebreos 12:5, 6, 11). Jehová kinkapaxkiyan xlakata akinin xkamanan. Wa xlakata kinkaʼakgastakyawayan chu kinkamakgtayayan tsinu tsinu. Lakaskin pi tlan nakitaxtu tuku nalaksakaw, xatapaxuwan natawilayaw chu napaxkiyaw la kinTlatkan (Prov. 23:15). Xla ni lakaskin napatinanaw chu ni lakaskin naniyaw kaj xlakata ni namakgxtakgaw kintalakgalhinkan (Efes. 2:2, 3).

Jehová kinkapaxkiyan xlakata akinin xkamanan. Wa xlakata kinkaʼakgastakyawayan chu kinkamakgtayayan tsinu tsinu

8, 9. 1) ¿La kinkamasiyaniyan Jehová la uku? 2) ¿La chuntiya nakinkamasiyaniyan Jehová kkilhtamaku nema aku namin?

8 Akxni nina xlakgapasaw, max xkgalhiyaw tayat nema ni xlakgati Jehová. Pero kinkamakgtayan natalakgpaliyaw, chu la uku tlakg tlan likatsiyaw (Is. 11:6-8; Col. 3:9, 10). La uku, xlakata nakinkastakyawayan chu nakinkamasiyaniyan, Jehová limaklakaskima paraíso xaʼespiritual. Kʼuma paraíso lu tlan makgkatsiyaw maski lamaw kkakilhtamaku niku nitlan likatsikgokan. Nachuna, natalan tiku stakkgolh kʼakgtum familia niku ni xlimasiyakan tapaxkit, la uku lipaxuwakgo xaxlikana tapaxkit nema limasiyanikgo xnatalankan tiku kstalaninanin Cristo kʼuma paraíso xaʼespiritual (Juan 13:35). Kimputumkan katsininitaw nakalimasiyaniyaw tapaxkit  amakgapitsin. Pero tuku tlakg xlakaskinka wa pi lakgapasaw kinTlatkan xalak akgapun chu lipaxuwayaw xtapaxkit (Sant. 4:8).

9 Kxasasti kakilhtamaku nalipaxuwayaw putum tasikulunalin nema nalimin paraíso xaʼespiritual. Na nalipaxuwayaw nalatamayaw kparaíso niku namapakgsinan xTamapakgsin Dios. Ama kilhtamaku Jehová chuntiya nakinkamakgtayayan natalakgpaliyaw chu nakinkastakyawayan chuna la akinin nipara tsinu lakpuwanaw (Is. 11:9). Dios na natlawa pi kintalakapastaknikan chu kimaknikan nialh nakgalhi talakgalhin. Tlakg ni tuwa katikatsiniw xpalakata chu liwana nakgalhakgaxmataw. Wa xlakata chuntiya kamastaw talakaskin pi Jehová kakinkamakgtayan natalakgapaliyaw. Kalimasiyaniw pi paxtikatsiniyaw la kinkalimasiyaniyan xtapaxkit (Prov. 3:11, 12).

¿LA KINKAMAKGTAYAN JEHOVÁ NATALAKGPALIYAW?

10. ¿La limasiyalh Jesús pi ni lakapala ksitsi chu tlan xkamakgtaya amakgapitsin natalakgapalikgo?

10 Chuna la tiku liskuja tiyat liwana lakgapasa tuku liskujma, Jehová na liwana kinkalakgapasan. Katsi kintalakgalhinkan, tuku nila tlawayaw chu tuku nialh tlawayaw. Akxni kinkamakgtayayan natalakgpaliyaw, putum katsi tuku tlan chu tuku nila tlawayaw (kalikgalhtawakga Salmo 103:10-14). Xlakata liwana nakatsiyaw la kinkaʼakxilhan Jehová, kalilakpuwaw tuku xtlawa Jesús akxni xʼapóstoles xtlawakgo tuku nitlan. Xmin kilhtamaku xlalimakglhuwikgo tiku tlakg xlakaskinka xlitaxtu. ¿Tuku xkalakpuwaniw apóstoles komo anta xtawilaw? Max xlakpuwaw pi nila xkamakgtayaka. Pero Jesús ni chuna kaʼakxilhli. Xla xkatsi pi tlan xkamakgtayalh natalakgpalikgo. ¿La xkamakgtayalh? Xkamaxkilh tastakyaw chu ni ksitsilh akxni xkastakyawalh chu xkawilinilh tlan liʼakxilhtit (Mar. 9:33-37; 10:37, 41-45; Luc. 22:24-27). Akxni Jesús xlakastakwananita, apóstoles makglhtinankgolh espíritu santo chu nialh lilakgaputsakgolh tiku tlakg xlakaskinka xlitaxtulh. Wata xlakaskinka akxilhkgolh taskujut nema kalakgayawalh Jesús (Hech. 5:42).

11. 1) ¿La limasiyalh David pi xlitaxtu la tiyat nema ni tuwa liskujkan? 2) ¿La tlan nachuna natlawayaw?

11 La uku, Jehová limaklakaskin Biblia, xʼespíritu santo chu congregación xlakata nakinkamakgtayayan natalakgpaliyaw. Komo lakaskinaw pi Biblia nakinkamakgtayayan, talakaskin nalikgalhtawakgayaw, nalilakpuwanaw chu naskiniyaw Dios kakinkamakgtayan nakgalhakgaxmataw. David wanilh Jehová: «Katsisni akxni ktama [...], [klilakpuwanan]» (Sal. 63:6, Salmos Ixtatlincan ti Talipawan Dios, SXP). Chu na tsokgli: «Oh Dios, [...] paxkatlikatsiniyan, porque laktlan tastakyaw kimaxkiya, y asta katsisni akxni [...] ktamaj, wix lhuwa laktlan talakapastakni kimaxkiya» (Sal. 16:7SXP). Chuna la akxilhaw, David xlitaxtu la tiyat nema ni tuwa liskujkan. Xlilakpuwan xtastakyaw Jehová chu xmasta talakaskin pi xmakgtayalh kxtalakapastakni chu tuku xmakgkatsi. Asta xkgaxmata tastakyaw maski tuwa xmakgkatsi namakglhtinan (2 Sam. 12:1-13). ¿La tlan nachuna natlawayaw, nataktujuyaw chu nakgalhakgaxmatnanaw? Kakinkakgalhskinkan: «Akxni klikgalhtawakga Biblia, ¿klilakpuwan chu kmasta talakaskin pi xtastakyaw Jehová nalakgpali kintapuwan chu tuku kmakgkatsi? ¿Wi tuku tlanku naktlawa?» (Sal. 1:2, 3).

12, 13. ¿La limaklakaskin Jehová espíritu santo chu congregación xlakata nakinkamakgtayayan natalakgpaliyaw?

 12 Espíritu santo pulaklhuwa la tlan nakinkamakgtayayan natalakgpaliyaw. Akgtum liʼakxilhtit, tlan nakinkamakgtayayan nakgalhiyaw tayat la kgalhi Jesús chu nakgalhiyaw tayat nema masta espíritu (Gál. 5:22, 23). Pulaktum tayat wa tapaxkit. Xlakata akinin paxkiyaw Dios, kgalhakgaxmatputunaw chu mastayaw talakaskin kakinkamakgtayan natalakgpaliyaw, katsiyaw pi putum tuku kinkalimapakgsiyan tlan nakinkakitaxtuniyan. Nachuna, espíritu santo tlan nakinkamaxkiyan litliwakga xlakata ni nakgalhiyaw nitlan tayat xalak kakilhtamaku (Efes. 2:2). Kalilakpuwaw apóstol Pablo. Akxni kgawasaku xwanit, xtlawa tuku xtlawakgo laklankajwan xpulalinanin xtakanajlakan judíos. Pero espíritu santo makgtayalh natalakgpali. Wa xlakata, alistalh tsokgli: «Kkgalhi litliwakga xlakata tlan naktalatlawa tuku namin xlakata xla kimaxki litliwakga» (Filip. 4:13TNM). Akinin na kilitaktujutkan akxni naskiniyaw Jehová pi kakinkamaxkin xʼespíritu santo, chu xla nakgalhti kioracionkan (Sal. 10:17).

Jehová kalimaklakaskin lakgkgolotsin xlakata nakinkamakgtayayan natalakgpaliyaw, wa xlakata kilikgaxmatatkan xtastakyawkan (Kaʼakxilhti párrafos 12 chu 13).

13 Jehová na limaklakaskin congregación chu lakgkgolotsin xlakata nakinkamakgtayayan. Akgtum liʼakxilhtit, akxni lakgkgolotsin akxilhkgo pi tlawamaw tuku nitlan, lakputsakgo la nakinkamakgtayakgoyan. Pero ni kaj xtalakapastaknikan tuku kinkawanikgoyan (Gál. 6:1). Wata taktujukgo, ni lankajwanankgo chu skinikgo Jehová pi kamaxkikgolh taʼakgatekgsni chu liskgalala. Alistalh lakputsanankgo kBiblia chu kkilikgalhtawakgakan xlakata liwana nakinkastakyawakgoyan. Wa xlakata akxni nakinkalimasiyanikgoyan xtapaxkitkan lakgkgolotsin chu nakinkastakyawakgoyan xlakata la lhakgananaw o atanu, kalakapastakwi pi  wa Dios tiku kinkalimasiyaniman xtapaxkit. Komo natlawayaw xtastakyaw, nalitaxtuyaw la tiyat nema nituwa naliskuja Jehová. Chu nalitamakgtayayaw.

14. Maski Jehová kgalhi limapakgsin xlakata natlawani tiyat tuku nalakaskin, ¿tuku ni tlawa?

14 Komo akgatekgsaw la kinkamakgtayayan Jehová natalakgpaliyaw, tlakg tlan nakatalalinaw kinatalankan. Nachuna, tlakg tlan tapuwan nakakgalhiniyaw latamanin tiku kalitachuwinanaw Dios chu nachuna tiku kalimakgalhtawakgemaw Biblia. Makgasa, akxni xtlawana tlamank nina xlimaklakaskin tiyat, tsinu tsinu xmakglhtini chiwix nema xkgalhi. Jehová kamakgtaya latamanin tiku mastakgo talakaskin nakalakgpalikan chuna la tiyat. Pero putum kilhtamaku kamaxki talakaskin nalaksakkgo tuku natlawaputunkgo. Ni kamafuerzajlini. Wata tsinu tsinu kamasiyani tuku xtalakaskin chu kamaxki talakaskin pi wa nalaksakkgo komo natalakgpalikgo.

15, 16. ¿La limasiyakgo tiku likgalhtawakgamakgo Biblia pi lakaskinkgo xtamakgtay Jehová? Kalichuwinanti akgtum liʼakxilhtit.

15 Kalichuwinaw Tessie, chatum tala puskat tiku lama kʼAustralia. Akxni tsukulh likgalhtawakga Biblia, ni tuwa akgatekgstilhalh tuku xkatsinitilhama. Pero ni xlakgpali xlatamat chu ni xʼan ktamakxtumit. Tala tiku xmakgalhtawakge tlawanilh oración Jehová chu lakkaxwililh nialh namasiyani xlakata Biblia. Pero alistalh wi tuku lalh. Akxni xkgalhtawakgamakgolh, Tessie wanilh tala tuku xlakata ni xtalakgpalima. Wanilh pi xlakgaputiyunama xmakgkatsi xlakata xlakgati kgamanan kaj xlakata xtlajalh tumin. Pero wanilh pi xlakpuwanit pi nialh makgtum xʼama kgamanan.

16 Ni lhuwa kilhtamaku titaxtulh, Tessie tsukulh an ktamakxtumit chu tsukulh limasiya xtayat Cristo, maski makgapitsi tiku xʼamigos xwankgonit xlikgalhkgamanankgo. Titaxtulh kilhtamaku tamunulh chu precursora regular litaxtulh maski xkgalhi laktsu xkamanan. Xlikana, akxni tsuku lakgpali xlatamat tiku likgalhtawakga Biblia, Jehová lakgtalakatsuwi chu makgtaya natalakgpali xlakata nalitaxtu la akgtum tlamank nema lhuwa xtapalh.

17. 1) ¿Tuku xlakata lakgatiya pi Jehová namakgtayayan natalakgpaliya? 2) ¿Tuku naʼakxilhaw kʼartículo nema aku mima?

17 La uku wilakgolhku tiku liskujkgo tiyat xlakata natlawakgo lakswan tlamank. Nachuna, Jehová tsinu tsinu kinkalimakgtayatilhayan xtastakyaw, chu alistalh akxilha komo talakgpaliyaw (kalikgalhtawakga Salmo 32:8). ¿Akxilhaw pi Jehová kinkapaxkiyan kinchatunukan? ¿Akxilhaw la tsinu tsinu kinkalakgpalitilhayan? ¿Tuku nakinkamakgtayayan xlakata chuntiya nalitaxtuyaw la tiyat nema Jehová tlan naliskuja? ¿Tuku ni kilitlawatkan komo ni litaxtuputunaw la tiyat nema tuwa liskujkan? ¿La tlan nataskujkgo Jehová natlatni xlakata nakamasiyanikgo xkamanankan? Nalichuwinanaw kʼatanu artículo.