Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Junio kata 2016

«Jehová kiDioskan kaj chatum Jehová»

«Jehová kiDioskan kaj chatum Jehová»

«Kakgaxpatti, oh Israel: Jehová kiDioskan kaj chatum Jehová» (DEUT. 6:4).

TAKILHTLIN: 138, 2

1, 2. 1) ¿Tuku xlakata lu lakgapaskan tuku wan Deuteronomio 6:4? 2) ¿Tuku xlakata Moisés wa umakgolh tachuwin?

JUDÍOS kgalhikgo akgtum oración nema lu xlakaskinka akxilhkgo nema maxtukanit kDeuteronomio 6:4. Uma oración wanikan shemá, xlakata wa xapulana tachuwin hebreo nema litsuku uma versículo. Akglhuwata ciento kata maklakaskinkgo uma judíos tsisa chu kakgotanun xlakata nalimasiyakgo pi kaj chatum Dios tiku kakninanikgo.

2 Umakgolh tachuwin kawanilh Moisés akxni xʼamaja niy, kkata 1473 akxni nina xmin Jesús. Xwilakgolh kxtiyat Moab, akxni xʼamakgolha patakutkgo kgalhtuchokgo Jordán chu xʼamakgolh makgamakglhtinankgo Tiyat nema xKawanikanit pi Nakamaxkikan (Deut. 6:1). Moisés xkapulalinit 40 kata. Tachuwin nema kawanilh xkalimatliwakglhtuputun xlakata ni xpekuankgolh, xlipawankgolh Jehová chu nikxni xmakgxtakgkgolh. ¿Tuku xlakata? Xlakata xkatsi pi xʼamakgolh kgalhikgo lhuwa taʼakglhuwit. Wa xlakata akxni xkalitachuwinanita Pulakkaw Limapakgsin  chu amakgapitsi xlimapakgsin Jehová, Moisés kamalakapastakalh lu xlakaskinka limapakgsin nema likgalhtawakgayaw kDeuteronomio 6:4, 5 (kalikgalhtawakga).

3. ¿Tuku takgalhskinin nakgalhtiyaw kʼuma artículo?

3 Israelitas xkatsikgo pi kaj chatum xDioskan xwanit, «Jehová». Chu tiku ni xmakgxtakgnankgo kaj chatum Dios xkakninanikgo, chuna la xnatlatnikan. ¿Tuku xlakata Moisés kamalakapastakalh pi Jehová «kaj chatum Jehová»? ¿La tatalakxtumi uma xaxlikana chu paxkikan Dios xliputum kinakujkan, kilatamatkan chu kilitliwakgakan? ¿Chu tuku xlakata xlakaskinka la uku kimpalakatakan tuku wan Deuteronomio 6:4, 5?

KIDIOSKAN «KAJ CHATUM JEHOVÁ»

4, 5. 1) ¿Tuku kilhchanima tachuwin «kaj chatum Jehová»? 2) ¿Tuku xlakata Jehová ni xtachuna la dioses tiku xalak kachikinin?

4 Ni anan tiku xtachuna Jehová. Tachuwin «kaj chatum Jehová» pulaklhuwa tuku wamputun. Pulaktum tuku wamputun, pi Jehová kaj xakstu, pi niti tatalakxtumi. ¿Tuku xlakata maklakaskilh Moisés uma tachuwin? Ni xlimaklakaskima uma tachuwin xlakata nalimasiya pi ni xlilat nakakninanikan chatum trinidad. Jehová tlawalh katiyatni chu akgapun. Xla Mapakgsina xlitilanka kakilhtamaku chu kaj xakstu xaxlikana Dios. Ni anan dios tiku xtachuna (2 Sam. 7:22). Moisés maklakaskilh tachuwin «kaj chatum Jehová» xlakata nakamalakapastaka israelitas pi kaj Jehová namaxkikgo kakni. Ni xlitlawatkan xwanit la kachikinin tiku lakatsu xkatawilakgolh, tiku xkakninanikgo lhuwa ni xaxlikana dioses. Amakgolh latamanin xlakpuwankgo pi xdioseskan wa xmapakgsikgo sen, un o atanu.

5 Akgtum liʼakxilhtit, egipcios xkakninanikgo Ra, dios xla Chichini; Nut, diosa xla akgapun; Geb, Dios xla Katiyatni, chu Hapi, Dios xla kgalhtuchokgo Nilo. Na xkakninanikgo lhuwa animales. Pero Jehová limasiyalh pulakkaw tuku nitlan pi tlakg xkgalhi litliwakga ni xawa amakgolh ni xaxlikana dioses. Cananeos, tlakg xlakaskinka xʼakxilhkgo Baal. Xlakpuwankgo pi uma ni xaxlikana dios xmasta latamat. Na xlakpuwankgo pi xwanit xdios akgapun, sen chu unisen. Lakalhuwa, xlipawankgo pi Baal xʼama kakuentajtlawa (Núm. 25:3). Pero israelitas xlilakapastakatkan pi xDioskan xlitaxtu «xaxlikana Dios», kajwatiya xaxlikana Dios (Deut. 4:35, 39).

Jehová nikxni talakgpali chu ni tuwa katsikan tuku lakpuwan o tuku natlawa. Nikxni makgxtakgnan, ni talakgpali, ni makgatsankgenan chu putum kilhtamaku wan xaxlikana

6, 7. 1) ¿Tuku atanu kilhchanima tachuwin «kaj chatum Jehová»? 2) ¿La limasiyalh Dios pi «kaj chatum Jehová» litaxtu?

6 Jehová ni talakgpali chu ni makgxtakgnan. Akxni wa «kaj chatum Jehová», tachuwin «chatum» na kilhchanima pi Jehová putum kilhtamaku tlan lipawankan chu makgantaxti tuku wan. Xla nikxni talakgpali chu ni tuwa katsikan tuku lakpuwan o tuku natlawa. Ni makgxtakgnan, ni talakgpali chu putum kilhtamaku wan tuku xaxlikana. ¿La limasiyalh? Akgtum liʼakxilhtit, malaknunilh  Abrahán pi xkamanan xʼamakgo latamakgo kTiyat nema xKawanikanit pi Nakamaxkikan. Jehová nikxni lakgpalilh uma tuku xlakapastaknit natlawa chu tlawalh lhuwa milagros xlakata xmakgantaxtilh tuku xwanit 430 kata alistalh (Gén. 12:1, 2, 7; Éx. 12:40, 41).

7 Lhuwa ciento kata alistalh, Jehová wa pi israelitas xtatayananin xlitaxtukgo chu kawanilh: «Akit ni ktalakgpalinit. Pulana ni xʼanan atanu Dios chu alistalh chuntiyaku ni tawilanit atanu». Jehová na liwana lichuwinalh pi tuku lakapastaknit natlawa ni talakgpali akxni wa: «Akit ni ktalakgpalinit» (Is. 43:10, 13; 44:6; 48:12). Xlikana pi israelitas xkgalhikgo talakgalhaman naskujnanikgo Dios tiku nikxni talakgpali chu nikxni makgxtakgnan. Akinin na kgalhiyaw uma talakgalhaman (Mal. 3:6; Sant. 1:17).

8, 9. 1) ¿Tuku lakaskin Jehová natlawakgo kskujnin? 2) ¿Tuku wa Jesús nema limasiya pi xlakaskinka litaxtu xtachuwin Moisés?

8 Tuku Moisés kawanilh israelitas na kamalakapastakalh pi Jehová putum kilhtamaku xʼama kapaxki chu xʼama kakuentajtlawa. Chu xlakgxokgo, Jehová xlakaskin pi xlakan kaj wa xkakninanikgolh chu xpaxkikgolh xliputum xnakujkan, xlatamatkan chu xlitliwakgakan (kaʼakxilhti recuadro «¿Tuku kilhchanima?»). Nachuna, xlimasiyanitkan xwanit xkamanan xlakata Jehová akxni xmatlanikgolh. Komo chuna xtlawakgolh na kajwatiya xkakninanikgolh Jehová (Deut. 6:6-9).

9 Xlakata Jehová nikxni lakgpali tuku lakpuwanit natlawa, la uku lakaskin pi nachuna natlawayaw la israelitas xala makgasa. Wa xlakata, komo lakaskinaw pi tlan naʼakxilha kintakakninkan, akinin na kajwatiya xla kilikakninanitkan chu kilipaxkitkan xliputum kinakujkan, kintalakapastaknikan chu kilitliwakgakan. Jesús wa pi wa uma tlakg xlakaskinka limapakgsin chu chuna limasiyalh pi lu xlakaskinka litaxtu xtachuwin Moisés (kalikgalhtawakga Marcos 12:28-31). La uku kaʼakxilhwi la tlan nalimasiyayaw pi kanajlayaw pi «Jehová kiDioskan kaj chatum Jehová».

KAJWATIYA JEHOVÁ KAKAKNINANIW

10, 11. 1) ¿Tuku wamputun kajwatiya nakakninaniyaw Jehová? 2) ¿La limasiyakgolh makgapitsi kamanan hebreos pi kajwatiya Jehová xkakninanikgo?

10 Kajwatiya kakninaniyaw Jehová Dios. Kakninaniyaw xliputum kinakujkan, kintalakapastaknikan chu kilitliwakgakan. Nikxni kilikakninanitkan atanu dios chu akxni nakakninaniyaw Jehová ni katamalakxtumiw talakapastakni o talismanin nema ni xaxlikana. Xla ni kajwatiya litaxtu la Dios tiku ni tatalakxtumi amakgapitsi chu tlakg tliwakga nixawa amakgapitsin, wata xakstu xaxlikana Dios. Wa xlakata kajwatiya Jehová nakakninaniyaw (kalikgalhtawakga Apocalipsis [Revelación] 4:11).

11 Libro xla Daniel lichuwinan kgalhtati kamanan hebreos xkawanikan Daniel, Hananías, Misael chu Azarías. ¿La limasiyakgolh pi kajwatiya xkakninanikgo Jehová? Ni wakgolh liwat nema kskujnin Dios ni xliwatkan xwanit. Nachuna, kgalhtutu xʼamigos Daniel ni lakgtakilhputakgolh imagen xla oro nema xtlawanit mapakgsina xalak Babilonia. Liwana xlakpuwankgonit pi kajwatiya Jehová  xʼamakgolh kakninanikgo. Wa xlakata nikxni makgxtakgkgolh Jehová (Dan. 1:1–3:30).

Jehová wa tiku pulana kiliwilitkan kkilatamatkan

12. Komo kajwatiya kakninaniputunaw Jehová, ¿tuku kuentajkilitlawatkan?

12 Kajwatiya Jehová pulana nawiliyaw kkilatamatkan. Komo kajwatiya maxkiputunaw kakni, kuentajkilitlawatkan pi ni atanu tuku nakinkamakglhtiyan kilhtamaku. ¿Tuku kuentajkilitlawatkan? Anta kPulakkaw Limapakgsin, Jehová wa pi kskujnin ni xlikakninanitkan xwanit atanu dioses. Kajwatiya Jehová xlikakninanitkan xwanit (Deut. 5:6-10). La uku anan pulaklhuwa tuku natlawa pi ni wa Jehová pulana nawiliyaw kkilatamatkan, chu makgapitsi ni lu talakgapasa. Pero Jehová ni talakgpalinit chu chuntiya lakaskin pi ni atanu tuku tlakg namaxkiyaw kakni. Chuntiya litaxtu «kaj chatum Jehová». Wa xlakata kalichuwinaw la kajwatiya Jehová nakakninaniyaw.

13. ¿Tuku max nalakxtlawa la talalinaw Jehová?

13 Makgapitsi tuku nalakxtlawa la talalinaw Jehová talichuwinan kColosenses 3:5 (kalikgalhtawakga). Uma versículo wan pi akxni lhuwa tuku kgalhiputunkan xtachuna la takaknin. ¿Tuku xlakata? Xlakata akxni lhuwa tuku kgalhiputunaw la tumin o wi tuku lhuwa xtapalh, uma nalitaxtu la chatum tliwakga dios tiku nakinkamapakgsiyan. Putum talakgalhin nema talichuwinan kColosenses 3:5 tatalakxtumi lhuwa tuku nakgalhiputunkan. Komo lhuwa tuku nakgalhiputunaw, max tlakg napaxkiyaw uma ni xawa Dios. Komo chuna xkinkaʼakgspulan nalimasiyayaw pi tlakg paxkiyaw tuku xalak kakilhtamaku. Nialh xliʼakxilhwi pi «kaj chatum Jehová». Ni lakaskinaw pi chuna nakinkaʼakgspulayan.

14. ¿Tuku wa apóstol Juan pi kuentajkilitlawatkan?

14 Apóstol Juan na lichuwinalh atanu nema tatalakxtumi. Lichuwinalh «tuku tlawaputun kimaknikan chu tuku akxilhputun kilakgastapukan, lhuwa masiyakan tuku kgalhikan klatamat». Chu wa pi komo wi tiku paxki umakgolh tuku anan kkakilhtamaku, ni paxki xaTlat (1 Juan 2:15, 16). Wa xlakata putum kilhtamaku kaʼakxilhwi la limaw kilatamatkan. Max nakatsiyaw pi lakgatiyaw, tuku lilakgastanankgo, la lhakganankgo chu chuna la takaxtayakgo latamanin. O max amputunaw kʼuniversidad xlakata lhuwa tuku kgalhiputunaw kʼuma kakilhtamaku (Jer. 45:4, 5). Pero xasasti kakilhtamaku lakatsuwa wi. Wa xlakata kililakapastakatkan xtachuwin Moisés. Komo xlikana akgatekgsaw chu kanajlayaw pi «Jehová kiDioskan kaj chatum Jehová», kajwatiya nakakninaniyaw chu naskujnaniyaw chuna la lakaskin (Heb. 12:28, 29).

KUENTA KATLAWAW MAKXTUM NATAWILAYAW KCONGREGACIÓN

15. ¿Tuku xlakata Pablo kamalakapastakalh kstalaninanin Cristo pi Jehová kaj chatum Dios?

15 Tachuwin «kaj chatum Jehová» na kinkamalakapastakayan pi Jehová lakaskin pi makxtum natawilayaw chu kajwatiya naskujnaniputunaw. Akxni xlamakgolh xapulana kstalaninanin Cristo, lhuwa xlitaxtukgo judíos, griegos, romanos o xalak atanu países.  Xtalakgpali xkilhtsukutkan, xtalismaninkan chu la xlakpuwankgo. Wa xlakata tuwa xmakgkatsikgo makgapitsi nalimasiyakgo tuku xkatsinikgonit o xmakgxtakgkgolh nitlan talismanin. Wa xlakata apóstol Pablo kamalakapastakalh kstalaninanin Cristo pi kaj chatum Dios kgalhiyaw, wa Jehová (kalikgalhtawakga 1 Corintios 8:5, 6).

Jehová lakaskin pi makxtum natawilayaw chu kajwatiya naskujnaniputunaw

16, 17. 1) ¿Tuku kgantaxtuma la uku nema xtalichuwinanit makgasa, chu la kitaxtunit? 2) ¿Tuku max natlawa pi nialh makxtum natawilayaw?

16 ¿Chu kstalaninanin Cristo la uku? Palakachuwina Isaías wa pi «kxa’awatiya kilhtamaku» latamanin tiku tanu tanu xkachikinkan xʼamakgolh kakninanikgo Jehová. Umakgolh latamanin xwankgolh: «Xla nakinkamasiyaniyan xtiji, chu liwana natlawanaw klaktsu xtiji» (Is. 2:2, 3). Lu lipaxuwayaw la kgantaxtuma tuku talichuwinanit pi xʼama la. Xlakata uma, kinatalankan tanu xkachikinkan, tanu tachuwin kgalhikgo chu tanu tanu xtalismaninkan. Pero kimputumkan akxtum kakninaniyaw Jehová. Xlakata ni lakxtum kintalismaninkan, tlawa pi namin kilhtamaku nakgalhiyaw taʼakglhuwit.

¿Liskujaw xlakata congregación tlan nalatalalin? (Kaʼakxilhti párrafos 16 asta 19).

17 Akgtum liʼakxilhtit, ¿la kaʼakxilhaw natalan tiku atanu xkachikinkan? Max tanu tachuwin kgalhikgo, tanu la lhakganankgo,  tanu xtalismaninkan o tanu tuku wakgo. ¿Ni katalalinaw amakgolh natalan chu kajwatiya katalalinaw tiku na watiya kgalhikgo kintalismaninkan? ¿Chu la kaʼakxilhaw lakgkgolotsin xalak kinkachikinkan tiku tlakg lakgkgawasanku nixawa akinin o tanu xcolorkan o xtalismaninkan? Komo ni kuentajnatlawayaw, xlakata ni lakxtum kintalismaninkan natlawa pi nitlan nalatalalinaw chu nialh makxtum katitawilaw.

18, 19. 1) ¿Tuku tastakyaw tekgsaw kʼEfesios 4:1-3? 2) ¿Tuku natlawayaw xlakata natawila takaksni kcongregación?

18 ¿La natlawayaw xlakata ni nakgalhiyaw taʼakglhuwit? Natlawayaw xtastakyaw nema apóstol Pablo kamaxkilh kstalaninanin Cristo xalak Éfeso, akgtum kachikin nema lhuwa tumin xkgalhi chu tanu tanu xtalismaninkan tiku anta xlamakgolh (kalikgalhtawakga Efesios 4:1-3). Pablo lichuwinalh tayat la tataktujut, tlan likatsikan, ni lakapala sitsikan chu tapaxkit. Umakgolh tayat xtachuna la kgantum talayaw nema liyawakanit akgtum chiki. Pero xlakata chuntiya tlan natasiya chiki talakaskin lhuwa taskujut. Wa xlakata Pablo kawanilh kstalaninanin Cristo pi xliskujkgolh makxtum xtawilakgolh kcongregación.

19 Kimputumkan kiliskujatkan xlakata congregación makxtum natawila. ¿Tuku tlan natlawayaw? Pulana nakgalhiyaw chu nalimasiyayaw tayat nema Pablo lichuwinalh, tataktujut, tlan likatsikan, ni lakapala sitsikan chu tapaxkit. Chu xlipulaktiy, naliskujaw xlakata nalimasiyayaw tapaxkit. Kkintamakxtumitkan, akxni latakgalhikgo taʼakglhuwit natalan litaxtu la akxni taskga talayaw. Umakgolh taʼakglhuwit tlawa pi natapapitsiyaw. Wa xlakata kiliskujatkan xlakata nalakkaxtlawayaw. Komo chuna natlawayaw nakatakgalhiyaw takaksni amakgapitsin.

20. ¿La limasiyayaw pi akgatekgsaw pi «Jehová kiDioskan kaj chatum Jehová»?

20 «Jehová kiDioskan kaj chatum Jehová». Uma tuku xlikana lu kinkamatliwakglhan. Israelitas kamatliwakglhli xlakata natayanikgo taʼakglhuwit nema kgalhikgolh akxni tanukgolh kTiyat nema xKawanikanit pi Nakamaxkikan. Akinin na tlan nakinkamaxkiyan litliwakga xlakata natayaniyaw akxni namin lanka tapatin chu naliskujaw xlakata nakatakgalhiyaw takaksni amakgapitsin kParaíso nema aku namin. ¿Akgatekgsaw pi «Jehová kiDioskan kaj chatum Jehová»? Komo chuna, chuntiya kamaxkiw kakni. Chuntiya kapaxkiw chu kaskujnaniw xliputum kinakujkan, kintapuwankan chu kilitliwakgakan. Chuntiya kaliskujwi xlakata nakatakgalhiyaw takaksni chu akxtum nakatatawilayaw kinatalankan. Komo chuntiya natlawayaw uma, Jesús tlan nakinkaʼakxilhan chu nakinkawaniyan uma tachuwin: «Katantit wixin xtalaksaknin nkintlat; kakgalhitit ntapakgsin wa ntu ntakaxtlawanit wixin mimpalakatakan, asta akxni ni naj xʼanan nkatuxawat» (Mat. 25:34).