Ankan kxpulakni

Ankan kliputsan

Xtatayananin Jehová

Laksakkan tachuwin totonaco

La tlakg tlan nalitamakgtayaya chu nalipaxuwaya akxni nalikgalhtawakgaya Biblia

La tlakg tlan nalitamakgtayaya chu nalipaxuwaya akxni nalikgalhtawakgaya Biblia

JOSUÉ wi tuku tuwa x’ama tlawa: napulalin kachikin Israel anta kTiyat nema xkawanikanit nakamaxkikan. Xlakata tlan nakitaxtuni wi tuku tuwa x’ama titaxtu. Pero Jehová wani pi tlan nakitaxtuni chu makgpuwantini pi ni napekuan chu tliwakga nawan. Wani pi kakgaxmatli xLimapakgsin chu ankgalhin xlikgalhtawakgalh xlakata tlan namakgantaxti tuku anta xlichuwinan. Chu liwana wani pi komo chuna natlawa, tlan nakitaxtuni chu nakgalhi liskgalala xlakata natlawa tuku xatlan (Jos. 1:7, 8).

K’uma «xaʼawatiya kilhtamaku lu tuwa nawan», nachuna akinin tuwa tuku natitaxtuyaw (2 Tim. 3:1). Pero tlan nakinkakitaxtuniyan komo natlawayaw tuku Jehová wanilh Josué. Komo ankgalhin nalikgalhtawakgayaw Biblia, nakinkamakgtayayan namakgantaxtiyaw tastakyaw nema lichuwinan akxni natitaxtuyaw tuku tuwa.

Xlikana, lhuwa akinin ni katsiyaw la nakgalhtawakgayaw chu amakgapitsin ni lakgatiyaw. Pero xlakata lu xlakaskinka nalikgalhtawakgayaw Biblia, tlan nalakputsananiyaw niku wi « Kalitsakgsa uma akxni nalikgalhtawakgaya Biblia». Anta natekgsa lakwan tastakyaw xlakata tlan nalitamakgtayaya chu nalipaxuwaya akxni nalikgalhtawakgaya Biblia.

Chatum salmista kilhtlilh: «Kakiyawa nak tlan tiji, y kakimpakgachipalipi xlakata ni nakpataxtuj, porque [anta] klakgati ktlawan» (Sal. 119:35SXP). Nachuna wix lu nalipaxuwaya nalikgalhtawakgaya xTachuwin Dios. Natekgsa tuku lhuwa xtapalh chuna la tlakg nakatsinitilhaya tuku lichuwinan.

Maski wix ni katipulalipi akgtum kachikin chuna la tlawalh Josué, wix natitaxtuya lhuwa ta’akglhuwit. Wa xlakata, chuna la Josué, kalikgalhtawakga tuku tatsokgtawilanit, kalilatapa chu tlan nakitaxtuniyan. Komo chuna natlawaya, tlan nakitaxtuniyan chu nakgalhiya liskgalala akxni wi tuku natlawaya.