Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Julio kata 2017

Jehová kasikulunatlawalh tuku lakkaxwilinita

Jehová kasikulunatlawalh tuku lakkaxwilinita

«Kamakgapaxuwa Dios y naʼakxilha la xla namaxkiyan wakg tu lakaskin minaku» (SAL. 37:4, Salmos Ixtatlincan ti Talipawan Dios, SXP).

TAKILHTLIN: 11, 140

1. 1) ¿Tuku xlilaksakatkan lakkamanan xlakata kilhtamaku nema aku mima? 2) ¿Tuku xlakata ni xlipekuanatkan? (Kaʼakxilhti xapulana dibujo).

KGAWASA, max nachuna lakpuwana pi tlan kitaxtu lakkaxwilikan akxni nina takaxa niku pimpat. Latamat xtachuna la niku napina, chu nalakkaxwiliya anta niku pimputuna wa akxni kgawasaku wix. Xlikana, lakkaxwilikan tuku natlawayaw max tuwa. Chatum tsumat tiku wanikan Heather wan: «Kimakgapekwan akxni kklakpuwan tuku naktlawa kkilatamat». Komo nachuna makgkatsiya kalakapastakti tuku wan Jehová: «Ni anu anu kalakapi, xlakata akit miDios. Xlikana akit nakmatliwakglhan. Lu xlikana akit nakmakgtayayan» (Is. 41:10).

2. ¿Tuku xlakata likatsiya pi Jehová lakaskin kakgalhi tapaxuwan kilhtamaku nema aku mima?

2 Jehová makgpuwantiniyan liwana nalakkaxwiliya kilhtamaku nema aku mima (Ecl. 12:1; Mat. 6:20). Xla lakaskin pi napaxuwaya. Chu uma tlan litasiya xlakata tuku akxilha, kgaxpata chu kgalhwanana tuku malakatsukinit. Kalilakpuwanti pi xla kinkakuentajtlawayan chu kinkamasiyaniyan la tlakg tlan nalatamayaw. Kaʼakxilhti tuku kawani tiku lakgmakgankgo xtastakyaw: «Wata laksaktit tuku ni kimakgapaxuwa». Chu wampara: «Kilakskujnin nawayankgo, pero wixin natsinksatit. ¡Kaʼakxilhtit! Kilakskujnin nakgotnankgo, pero wixin nakgalhputiyatit. ¡Kaʼakxilhtit!  Kilakskujnin napaxuwakgo, pero wixin natamamaxaniyatit» (Is. 65:12-14). Akxni wi tuku tlan laksakaw, malankiyaw Jehová (Prov. 27:11).

TUKU NAMAKGTAYAYAN XLAKATA NAPAXUWAYA

3. ¿Tuku waniyan Jehová pi natlawaya?

3 ¿Tuku waniyan Jehová pi natlawaya? Kalilakpuwanti uma. Xla kamalakatsukilh animales xlakata napaxuwakgo akxni wayankgo, kgotnankgo chu nalhuwankgo. Pero akinin kinkatlawan xlakata atanu tuku tlan nalipaxuwayaw, la nalakgapasaw chu nalakskujnaniyaw xlakata ni namakgxtakgaw (Sal. 128:1; Mat. 5:3). Biblia wan pi xla wa «Dios xla tapaxkit» chu «Dios tiku xapaxuwana», chu katlawalh latamanin «chuna la Dios» (2 Cor. 13:11; 1 Tim. 1:11; Gén. 1:27). Komo natlawaya la tlawa Dios napaxuwaya. Wan xTachuwin: «Tlakg anan tapaxuwan akxni mastakan nixawa akxni makglhtinankan» (Hech. 20:35). ¿Chuna titaxtunita? Wa uma tuku xlikana titaxtukan klatamat. Wa xlakata, Jehová lakaskin pi tuku nalakkaxwiliya nalimasiyaya tapaxkit nema xla kgalhiniya chu latamanin (kalikgalhtawakga Mateo 22:36-39).

4, 5. ¿Tuku xlakata lu xpaxuwa Jesús?

4 Jesucristo lu tlan liʼakxilhtit mimpalakata. Akxni aktsujku xwanit, xkgamanan chu xpaxuwa. Chuna la wan xTachuwin Dios, anan «kilhtamaku akxni litsiyankan» chu «kilhtamaku akxni natachayawakan» (Ecl. 3:4). Pero Jesús na likgalhtawakgalh xTachuwin Dios chu uma makgtayalh tlan natalalin xTlat. Akxni xkgalhi akgkutiy kata, makgalhtawakgenanin xalak templo «lhpipakg xlilakawankgoy xtastakat, chu lantla xkgalhtinan» xlakata takanajla (Luc. 2:42, 46, 47).

5 Akxni kstaknita, Jesús xpaxuwa xlakata xtlawa tuku Dios xlakaskin. Akgtum liʼakxilhtit, xTlat xlakaskin pi xkalinilh «limaxkganin xatlan tamakatsinin» chu «lakgatsinin nalakawanankgoy» (Luc. 4:18). Salmo 40:8[SXP] wan la xmakgkatsi Jesús: «Oh Dios, akit snun klakgati ktlawa tu wix lakgatiya». Xla xlakgati xkamasiyani latamanin xlakata xTlat xalak akgapun (kalikgalhtawakga Lucas 10:21). Akgtum kilhtamaku masiyanilh chatum puskat la nakakninani Dios. Alistalh kawanilh kstalaninanin: «Nkiliwat, wa naktlaway xtalakaskin nti nkimalakgachalh, chu na nakmasputuy xtaskujut» (Juan 4:31-34). Xlakata limasiyanilh tapaxkit Dios chu amakgapitsin uma makgapaxuwalh. Wix na namakgapaxuwayan uma.

6. Komo nawaniya chatum tala tiku makgasata skujnanima Dios tuku lakkaxwilinita ¿tuku tlan nakitaxtu?

6 Lhuwa kstalaninanin Cristo precursores wankgolh akxni lakgkgawasanku xwankgonit, chu uma kamakgapaxuwalh. ¿Tuku xlakata ni kalitachuwinana tuku lakpuwanita natlawaya kmilatamat? Proverbios 15:22 wan pi tuku lakkaxwilikan tlan kitaxtu akxni kalitachuwinankan amakgapitsin. Umakgolh natalan tiku makgasata skujnanimakgolh Dios tlan nawanikgoyan tuku nakatsiniya komo naskujnaniya Dios putum kilhtamaku chu tuku namakgtayayan kmilatamat. Jesús lhuwa tuku katsinilh xlakata xTlat akxni xwi k’akgapun. Pero chuntiya katsinilh akxni xlichuwinama Dios kKatiyatni. Akgtum li’akxilhtit, akxilhli pi lu xmakgapaxuwa akxni xalakwan tamakatsin xkalakgchan kxnakujkan latamanin chu nikxni makgxtakgli Dios maski tuwa tuku titaxtulh (kalikgalhtawakga Isaías 50:4; Heb. 5:8; 12:2). ¿Tuku xlakata naskujnaniya Dios putum kilhtamaku namakgapaxuwayan? Ka’akxilhwi.

KAMASIYANIKAN AMAKGAPITSIN MAKGAPAXUWANAN

7. ¿Tuku xlakata lhuwa lakgkgawasan lakgatikgo kamasiyanikgo amakgapitsin?

7 Jesús wa pi kstalaninanin xli’anatkan chu nakamasiyanikgo amakgapitsin tuku xaxlikana (Mat. 28:19, 20). Komo lakpuwanita namaklakaskina milatamat xlakata natlawaya uma taskujut, lu napaxuwaya chu namalankiya Dios. Xlikana, xtachuna la makgapitsi titaxtukan klatamat, natalakaskin kilhtamaku xlakata liwana natlawaya. Ka’akxilhti tuku wa chatum tala kgawasa tiku wanikan Timothy, tiku precursor litaxtulh akxni kgawasaku xwanit: «Lu klakgati kskujnani Jehová putum kilhtamaku xlakata chuna klimasiyani tapaxkit. Lata pulana,  ni kkgalhilh tiku xakmakgalhtawakgelh. Pero alistalh kalh alakatanu, anta niku nina x’achan akgtum papa’ ktsukulh klimakgalhtawakgenan Biblia. Chatum tiku xakmakgalhtawakge tsukulh an kPukgalhtawakga. Alistalh akgtiy papa’ kkilalh k’Escuela niku kamasiyanikan xalak Biblia Lakchixkuwin tiku Ni tamakgaxtokgkgonit, * chu kimalakgachaka alakatanu. Anta kgalhtati tiku ktsukulh kkamakgalhtawakge. Klakgati kamasiyani latamanin tuku xaxlikana xlakata chuna tlan kakxilha la espíritu santo kalakgpalini xlatamatkan» (1 Tes. 2:19).

8. ¿Tuku tlawakgonit lhuwa lakgkgawasan xlakata tlakg nakalixakgatlikgo Dios latamanin?

8 Makgapitsi lakgkgawasan katsinikgonit atanu tachuwin. Akgtum li’akxilhtit chatum tala xalak Norteamérica tiku wanikan Jacob tsokgli: «Akxni xakkgalhi akgtujun kata, lhuwa kincompañeros xalak escuela xalak Vietnam xwankgonit. Xakkalitachuwinamputun xlakata Jehová, wa xlakata ni makgas kilhtamaku ktsukulh katsini xtachuwinkan. Kkatsinilh akxni ktamalakxtumilh Makatsinina xa’inglés chu ktachuwin Vietnamita. Nachuna ki’amigos kkatlawalh natalan xalak kcongregación Vietnamita nema xwi lakatsu kkinchik. Akxni xakkgalhi akgkutsayan kata precursor klitaxtulh. Alistalh, kkilalh kʼEscuela niku kamasiyanikan xalak Biblia Lakchixkuwin tiku Ni tamakgaxtokgkgonit. Uma escuela kimakgtayalh xlakata nakkatsi tuku putum ktlawa kgrupo vietnamita anta niku kmakgtayanama, anta akit precursor chu kaj akit kgolotsin klitaxtu. Lhuwa vietnamitas kaks lilakawankgo xlakata kkatsininit xtachuwinkan. Kiwanikgo pi kakalh kxchikkan, chu makglhuwa kmatsuki takgalhtawakga xalak Biblia. Makgapitsi tamunukgonita» (katamalakxtupi Hechos 2:7, 8).

9. ¿Tuku masiyaniyan akxni kamakgalhtawakgeya amakgapitsin?

9 Akxni kamakgalhtawakgekan amakgapitsin, lhuwa tuku nakatsiniya. Akgtum liʼakxilhtit, nakatsiniya la tlakg tlan naskuja, liwana nachuwinana, nalipawankana chu tlan nakatachuwinana latamanin (Prov. 21:5; 2 Tim. 2:24, nota). Pero uma taskujut namakgapaxuwayan xlakata makgtayayan tlakg nalakgapasa tuku wan Biblia, xlakata tuku kanajlaya. Nachuna, liwana nakatsiniya nataskuja Jehová (1 Cor. 3:9).

10. ¿Tuku xlakata tlan napaxuwaya akxni namakgalhtawakgenana maski niti kgaxmatputun tamakatsinin niku wila?

10 ¿Chu komo wila anta niku ni lu kgaxmatputunkan xalakwan tamakatsinin? Maski chuna, kamasiyanikan amakgapitsin tlan namakgapaxuwayan. ¿Tuku xlakata? Xlakata putum tiku makgtapakgsiyaw k’akgtum congregación makgtayananaw xlakata nakatekgsaw latamanin tiku xlikana kgaxmatputunkgo. Maski chatum tala natekgsa tiku katsiputun tuku xaxlikana, kimputumkan makgtlawayaw uma taskujut chu paxuwayaw. Akgtum li’akxilhtit, chatum tala tiku wanikan Brandon akgnajatsa kata liskujli la precursor k’akgtum kachikin anta niku ni lhuwa latamanin xkgaxmatputunkgo tamakatsinin xla tamapakgsin. Wan: «Lu klakgati klichuwinan xalakwan tamakatsinin xlakata wa uma tuku kinkaskiniyan Jehová. Kmatsukilh precursorado akxni kmasputulh takgalhtawakga xalak escuela. Lu klakgati kkamakgpuwantini lakgkgawasan xalak congregación chu kakxilha la staka xtakanajlakan. Akxni xakkilanita kʼEscuela niku kamasiyanikan xalak Biblia Lakchixkuwin tiku Ni tamakgaxtokgkgonit, kimalakgachaka la precursor alakatanu. Xlikana pi niti kmakgtayanit asta natamunu, pero amakgapitsi natalan wi tiku makgtayakgonit. Klipaxuwa pi kmakgtayananit putum kilhtamaku xlakata nakmakgalhtawakgenan» (Ecl. 11:6).

NIKU TLAN NAMAKGTAYANANA

11. ¿La lhuwa lakgkgawasan makgtayanamakgolh ktaskujut nema malanki Dios?

11 Tipalhuwa anan la tlakg nalakskujnaniya Jehová. Akgtum liʼakxilhtit, lhuwa lakgkgawasan xatapaxuwan makgtayanankgo niku tlawakan Pukgalhtawakga xla xtatayananin Jehová. Talakaskin  lhuwa xalaksasti Pukgalhtawakga. Makgtlawakan uma lu xlakaskinka taskujut nema malanki Dios chu tlan namakgapaxuwayan. Xtachuna kaniwa niku naskujnaniya Jehová, katatawilakan natalan makgapaxuwanan. Makgtlawakan niku nalakskujnaniya Dios lhuwa tuku nakatsiniya, la nakuentajtlawakana kmintaskujut, tlakg tlan natlawaya mintaskujut chu nakamakgtayaya tiku pulalimakgolh taskujut.

Tiku skujnanikgo Dios putum kilhtamaku lhuwa tasikulunalin kgalhikgo. (Kaʼakxilhti párrafos 11 asta 13).

12. ¿Tuku tlan nalimakgtayanana komo precursor nalitaxtuya?

12 Chatum tala wanikan Kevin wan: «Akxni aktsujku xakwanit, xaklakaskin pi xmilh kilhtamaku tlan xakskujnanilh Jehová putum kilhtamaku. Akxni akgkunajatsa kata xakkgalhi tlan precursor klitaxtulh. Xlakata xakkgalhilh tuku xakmaklakaskilh, ni lhuwa kilhtamaku xaktaskuja chatum tala tiku xtlawa chiki. Katsinilh kmawaka xʼakgstin chiki, ventanas chu malakcha. Alistalh, akgtiy kata kmakgtayanalh xlakata nalakxtlawakan Pukgalhtawakga chu xchikkan natalan akxni xtitaxtunita huracán. Akxni kgaxmatli pi kSudáfrica xtalakaskin tamakgtay xlakata xtatlawalh Pukgalhtawakga kmalakgatsamalh akgtum solicitud, chu kintasanika. Anta kʼÁfrica, makgapitsi semanas kmakgtayanan niku tlawakan Pukgalhtawakga chu alistalh kampara alakatanu. Tiku kmakgtlawayaw Pukgalhtawakga xla xtatayananin Jehová akgtum familia klitaxtuyaw. Akxtum ktawilayaw, akxtum klikgalhtawakgayaw Biblia chu akxtum kskujaw. Naklakgati akxni akxtum kataʼan natalan xalak uma kachikin xlakata naklichuwinanaw Dios akgatunu semanas. Tuku klakkaxwililh akxni aktsujku xakwanit lu kimakgapaxuwanit chu uma nikxni xaklilakpuwanit».

13. ¿Tuku xlakata lakgkgawasan xatapaxuwan skujkgo kBetel?

13 Lhuwa natalan tiku precursores xlitaxtuputunkgo makgantaxtikgolh chu uku wilakgolh kBetel. Skujkan kBetel lu makgapaxuwanan, xlakata putum tuku tlawakan anta, wa xla Jehová. Nachuna, familia Betel makgtayanan pi kimputumkan tlan  namakglhtinanaw taway xla kintakanajlakan. Chatum betelita tiku wanikan Dustin wan: «Akxni akgnajatsa kata xakkgalhi, klakkaxwililh pi xakama klakskujnani Jehová putum kilhtamaku. Kmatsukilh precursorado akxni kmasputulh takgalhtawakga xalak escuela. Akgtum kata aitat alistalh, kintasanika kBetel. Anta kkatsinilh kmaskuju prensas rotativas chu kkatsinilh kaxtlawa computadoras. Wa tuku klakgati xlakata Betel, wa pi pulana akinin kgaxmataw tamakatsin xlakata la talichuwinama Dios xlikalanka katiyatni. Lu klakgati ktawila unu xlakata kintaskujutkan kkalimakgtayayaw latamanin tlan natalalinkgo Jehová».

¿TUKU NALAKKAXWILIYA XLAKATA KILHTAMAKU NEMA AKU MIMA?

14. ¿La tlan nalakkaxwiliya kmilatamat xlakata naskujnaniya Jehová putum kilhtamaku?

14 ¿La tlan nalakkaxwiliya xlakata nalakskujnaniya Dios putum kilhtamaku? Tuku tlakg xlakaskinka, wa pi nakgalhiya tayat nema lakgati Dios. Uma namakgtayayan xlakata tlakg tlan naskujnaniya Jehová. Wa xlakata, ankgalhin kalikgalhtawakga xTachuwin Dios, liwana kalilakpuwanti tuku wan chu kaliskujti xlakata nalimasiyaya mintakanajla akxni namastaya mintakgalhtin ktamaxtumit. Xlakata kgalhtawakgapatku, tlan wi tuku nakatsiniya chu tlakg kakatsini la nalichuwinana Dios. Kakatsini nakalimasiyaniya latamanin pi lu kamakgtayaputuna akxni kakgaxpatniya xtakgalhtin xlakata tuku kakgalhskina. Nachuna tlan xatapaxuwan namakgtayanana xlakata namakgkaxakaya chu tlan natasiya Pukgalhtawakga. Jehová lakgati kamaklakaskin tiku taktujukgo chu tiku xatapaxuwan makgtayanankgo (kalikgalhtawakga Salmo 110:3; Hech. 6:1-3). Apóstol Pablo makgpuwantinilh Timoteo xlakata misionero xlitaxtulh xlakata natalan «[tlan] xlichuwinankgo xpalakata yuma nkgawasa» (Hech. 16:1-5).

15. ¿Tuku tlan natlawaya xlakata nakgalhiya tuku namaklakaskina?

15 Xlakata chuna talakkaxtawilanit, kskujnin Dios tiku putum kilhtamaku skujnanimakgolh xlikgalhitkan akgtum taskujut nema nakamaxki tuku maklakaskinkgo (Hech. 18:2, 3). Mimpalakata, max natalakaskin nakatsiniya akgtum taskujut nema natlawa pi ni putum kilhtamaku naskuja niku wila. Kakgalhskinti mi superintendente de circuito chu amakgapitsi precursores xalak mi circuito xlakata nawanikgoyan tuku tlan naliskuja. Chu chuna la wan Biblia, «kamakamaxki Jehová tuku pimpat tlawaya, chu tuku nalakkaxwiliya liwana natalakkaxwili» (Prov. 16:3; 20:18).

16. ¿Tuku tlan nalimakgtayayan naskujnaniya Jehová putum kilhtamaku akxni kgawasaku wix?

16 Liwana kakatsi pi Jehová lakaskin napaxuwaya kilhtamaku nema aku mima (kalikgalhtawakga 1 Timoteo 6:18, 19). Akxni skujnanikan Dios putum kilhtamaku, tlakg lhuwa kilhtamaku akxtum nakatatawilaya tiku na putum kilhtamaku skujnanimakgolh Dios. Uma namakgtayayan xlakata xakchan talakapastakni nakgalhiya. Lhuwa tiku precursores litaxtukgolh akxni kgawasaku xwankgonit akxilhkgonit pi kamakgtayanit kxtamakgaxtokgatkan. Tiku precursores xwankgonit akxni nina xtamakgaxtokgkgo tlan chuntiyaku akxtum nataliskuja uma tiku natatamakgaxtokga (Rom. 16:3, 4).

17, 18. ¿Tuku tlan natlawaya xlakata Jehová namaxkiyan tuku lakaskin minaku?

17 Tuku lakkaxwiliyaw kkilatamatkan litasiya tuku wi kkinakujkan. Salmo 20:4[SXP] wan xlakata Jehová: «Kamaxkin wakg lata tu makgskin minakuj, y katlawanin lata tu puwanita natlawaya». Wa xlakata liwana kalakpuwanti la limaklakaskimputuna milatamat, xlakata tuku tlawama Dios la uku chu tuku tlan wix natlawaya xlakata nalakskujnaniya. Chu alistalh, kalakkaxwili tuku Jehová lakgati.

18 Skujnanikan Jehová namakgapaxuwayan, xlakata nalimaklakaskina milatamat nalimalankiya Jehová. Chuna «kamakgapaxuwa Dios y kapaxki, y na’akxila la xla namaxkiyan wakg tu lakaskin minakuj» (Sal. 37:4, SXP).

^ párr. 7 Uma escuela litalakgpalilh Escuela xla Tiku lichuwinankgo xTamapakgsin Dios.