Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Julio kata 2016

Paxtikatsiniyaw xtalakgalhaman Dios nema ni kinkamininiyan

Paxtikatsiniyaw xtalakgalhaman Dios nema ni kinkamininiyan

«Makgamakglhtinaniw nkilipakskan, kaj lipaxkatsinit» (JUAN 1:16).

TAKILHTLIN: 1, 13

1, 2. 1) Kalichuwinanti parábola xlakata chixku tiku xkgalhi akgtum viña. 2) ¿La limasiya uma parábola xlakata maskiwinankan chu lakgalhamanankan maski ni lakgchanan?

CHATUM chixku xkgalhi akgtum viña. Akgtum kilhtamaku lu tsisa alh putsa kplaza tiku kskujnanikgolh. Kawanilh la xlilhuwa tumin xʼama kaxokgoni, chu wankgolh pi tlan. Alistalh, uma chixku akxilhli pi tlakg xtalakaskin tiku kskujnanikgolh, wa xlakata tantaku, makglhuwa taspitpa xlakata nakasakwa tiku kskujnanikgolh. Xputumkan kawanilh pi xʼama kamaxki tumin nema xkalakgchan. Kakgotanun, kamamakxtumilh putum kskujnanin xlakata nakaxokgoni. Makgapitsi tantaku kskujkgonit, chu amakgapitsi kaj akgtum hora. Pero chixku watiya kaxokgonilh. Wa xlakata, lakchixkuwin tiku tantaku kskujkgonit sitsikgolh. Xmalana viña kamalakapastakalh pi xwankgonit pi tlan la xʼama kaxokgoni. Na kawanilh pi xlakgchan nakaxokgoni kskujnanin tuku xlakaskin. Alistalh kakgalhskilh komo xkalakgkatsananikgo  xtaskujnin xlakata xla tlan xlikatsi (Mat. 20:1-15).

2 Uma tuku Jesús lichuwinalh kinkamasiyaniyan tuku lu xlakaskinka xlakata «xlipaxkatsinit Dios» (kalikgalhtawakga 2 Corintios 6:1) [1] (kaʼakxilhti nota niku kgalhsputa artículo). Makgapitsi max nalakpuwankgo pi lakchixkuwin tiku tantaku skujkgolh tlakg lhuwa tumin xkalakgchan ni xawa amakgapitsin. Pero xmalana viña kalimasiyanilh talakgalhaman nema ni xkalakgchan kskujnin tiku ni lhuwa horas skujkgolh. Chatum tiku lu katsini wa pi tachuwin nema maklakaskinkan kBiblia la «talakgalhaman nema ni kinkamininiyan» kilhchanima «tuku makglhtinana maski ni xokgonita chu ni mininiyan» chu «tuku maxkikan chatum chixku, pero xla ni tlajanit chu nitu tlawanit xlakata namakglhtinan».

XTAMASKIWIN JEHOVÁ

3, 4. 1) ¿Tuku xlakata Jehová kalimasiyaninit putum latamanin tapaxkit nema ni kinkalakgchanan? 2) ¿La tlawanit?

3 Biblia wan pi xtalakgalhaman Dios nema ni kinkamininiyan litaxtu akgtum tamaskiwin (Efes. 3:7). Xlakata nila putum kgalhakgaxmatniyaw Jehová, ni kinkalakgchanan nakinkalimasiyaniyan xtalakgalhaman. Wata kinkalakgchanan naniyaw. Mapakgsina Salomón wa: «Ni anan kkatiyatni chixku tiku xaʼakgstitum chu kajwatiya natlawa tuku tlan chu ni nalakgalhinan» (Ecl. 7:20). Alistalh apóstol Pablo wa pi «paks lakgalhinankgolh, na lu[...] makgat lamanikgo [xlilanka] Dios» chu «xtaxokgo ntalakgalhin, wa linin» (Rom. 3:23; 6:23a).

4 Jehová lu kapaxki latamanin. Wa xlakata makamilh xKgawasa xlakata nakinkapalakaniyan. Wa tuku tlakg kinkalimasiyanin tapaxkit nema ni kinkalakgchanan (Juan 3:16). Pablo wa pi Jesús «limaxkikanit nkakni, chu litlanka, xpalakata lantla ntamastalh nilh [...], lakimpi chuna nalipalakanikgoy xlipaks ntachixkuwitat xpalakata kgalhinikgolh ntalakgalhaman [o lipaxkatsinit] Dios» (Heb. 2:9). Wa xlakata tamaskiwin nema Dios kinkamaxkiyan «wa latamat wantu xaliʼankgalhin, xpalakata nCristo Jesús nkimPuchinakan» (Rom. 6:23b).

5, 6. 1) ¿Tuku kitaxtu akxni kinkapulalinan talakgalhin? 2) ¿Tuku kitaxtu akxni kinkapulalinan xtalakgalhaman Dios nema ni kinkamininiyan?

5 ¿Tuku xlakata lakgalhinanaw chu niyaw? Biblia wan pi xkuenta Adán xlakata anan linin. Xlakata putum akinin xkamanan Adán, putum lakgalhinanaw chu niyaw (Rom. 5:12, 14, 17). Maski chuna, tlan nalaksakaw pi talakgalhin ni napulalin kilatamatkan. ¿La chuna natlawayaw? Nakanajlaniyaw xtamakamastan Cristo. Chuna mastayaw talakaskin pi xtalakgalhaman Dios nema ni kinkamininiyan napulalin kilatamatkan. Biblia wan: «Akxni lakgstakli ntalakgalhin, wa xlipaxkatsinit Dios, tlakg xaliwaka lakgstakli, lakimpi lantla malanalh ntalakgalhin, limilh linin, pus na chuna xlipaxkatsinit Dios malanan xpalakata Jesucristo nkimPuchinakan lantla limalulokgninan nalikgalhikan latamat wa ntu xaliʼankgalhin» (Rom. 5:20, 21).

6 Maski chuntiya lakgalhinanin akinin, ni kilimastatkan talakaskin pi talakgalhin nakinkapulalinan. Wa xlakata, akxni tlawayaw tuku nitlan, skiniyaw Jehová kakinkatapatin. Pablo wa: «Wa ntalakgalhin, ni katikamalananin; sampi nialh wa lilamaw xlitliwakga limapakgsin, wampi wa lilamaw nkaj litlan xlipaxkatsinit Dios» (Rom. 6:14). Komo namastayaw talakaskin pi kapulalilh kilatamatkan  xtalakgalhaman Dios nema ni kinkamininiyan, ¿tuku namakglhtinanaw? Pablo wa: «Xlipaxkatsinit Dios [...]. Kinkamasiyuniyan mpi lantla namakgaxtakgaw wa ntu ni maxkiy nkakni Dios, chu wa ntu xtatlawaputu ntu xala katuxawat, wa ntu ntlan talakapastakna nkalilatamaw yunu nkatuxawat, chu wa ntu akgstitum, chu wa ntu nalimaxkiyaw nkakni Dios» (Tito 2:11, 12).

PULAKLHUWA LA JEHOVÁ KINKALIMASIYANIYAN TALAKGALHAMAN NEMA NI KINKAMININIYAN

7, 8. ¿Tuku kilhchanima pi Jehová limasiya xtalakgalhaman nema ni kinkamininiyan xlakata tuku tlan tlawayaw? (Kaʼakxilhti xapulana dibujo).

7 Apóstol Pedro wa: «Ntalakgalhaman ntu ntlan ntlawayatit kalimakgamakgtayakgotit amakgapitsin, xtachuna [...] nkgalhininit xlipaxkatsinit Dios» (1 Ped. 4:10). ¿Tuku kilhchanima pi Jehová limasiya xtalakgalhaman nema ni kinkamininiyan xlakata tuku tlan tlawayaw? Kilhchanima pi maski tanu tanu taʼakglhuwit nakgalhiyaw kkilatamatkan, nakinkamaxkiyan tuku maklakaskinaw xlakata natayaniyaw. Putum kilhtamaku kinkamaxkiyan tuku maklakaskinaw xlakata natayaniyaw katuwa taʼakglhuwit.

Maski tanu tanu taʼakglhuwit nakgalhiyaw kkilatamatkan, Jehová nakinkamaxkiyan tuku maklakaskinaw xlakata natayaniyaw

8 Chuna la akxilhaw, Jehová pulaklhuwa la kinkalimasiyaniyan xtalakgalhaman nema ni kinkamininiyan. Apóstol Juan tsokgli: «Paks ntu ananiy xlitlan, makgamakglhtinaniw nkilipakskan, kaj lipaxkatsinit ankgalhin» (Juan 1:16). Xlakata pulaklhuwa la Jehová limasiya uma talakgalhaman, lhuwa tasikulunalin makgamakglhtinanaw. Kalichuwinaw makgapitsi tasikulunalin.

9. 1) ¿La litamakgtayayaw xtalakgalhaman Dios nema ni kinkamininiyan? 2) ¿La limasiyayaw pi paxtikatsiniyaw Dios?

9 Jehová kinkatapatiyan kintalakgalhinkan. Xlakata xtalakgalhaman nema ni kinkamininiyan, Jehová kinkatapatiyan kintalakgalhinkan. Pero kajwatiya komo nitlan limakgkatsiyaw kintalakgalhinkan chu liskujaw xlakata nialh natlawayaw tuku nitlan (kalikgalhtawakga 1 Juan 1:8, 9). Pablo kalitachuwinalh xatalaksakni tiku xlamakgo kxkilhtamaku la kinkatapatiyan Jehová kintalakgalhinkan. Xla wa: «[Dios] nkinkalakgmaxtunitan lantla kxlitliwakga tapakglhtutit, na anta nchu nkinkawilinitan kxlimapakgsin xatapaxkin xKam. Wa cha nti nkinkalimalakgtaxtinitan xkgalhni lantla nkgalhiyaw xmatsankgananika kintalakgalhinkan» (Col. 1:13, 14). Komo paxtikatsiniyaw tuku Dios tlawanit kimpalakatakan, namalankiyaw. Chu komo kinkatapatiyan kintalakgalhinkan, tlan namakglhtinanaw lhuwa tasikulunalin.

10. Xlakata xtalakgalhaman Dios nema ni kinkamininiyan, ¿tuku tlan nakgalhiyaw?

10 Tlan xʼamigos Dios litaxtuyaw. Xlakata makglakgalhinanin akinin, xtalamakgasitsin Dios litaxtuyaw lata lakachinaw. Maski chuna, apóstol Pablo wa: «Akxni xtalatlawana Dios xwanitawku nkinkalimalakatsuwin xpalakata xlinin xKam» (Rom. 5:10). Xlakata Jesús tamakamastalh, tlan natalalimparayaw  Dios. Uma kilhchanima pi tlan xʼamigos nalitaxtuyaw. Pero ¿la makgtanu xtalakgalhaman Dios nema ni kinkamininiyan? Pablo lichuwinalh uma akxni kawanilh xatalaksakni: «Lantla [xaʼakgstitum litaxtunitaw] xpalakata ntakanajla, pus kgalhiniyaw ntatanksni Dios xpalakata nkimPuchinakan Jesucristo. Chu na wa xpalakata nCristo mpi kanajlayaw, tlan likgalhiyaw ntiji nakinkalakgchanan kxlipaxkatsinit Dios; na wa ntliwakglh liwilaw» (Rom. 5:1, 2). Lu paxtikatsiniyaw Jehová xlakata tlan xʼamigos litaxtuyaw.

Makgapitsi tuku Jehová kinkalimasiyaniyan talakgalhaman nema ni kinkamininiyan: Masta talakaskin nakgaxmataw xalakwan xalaksasti. (Kaʼakxilhti párrafo 11).

11. ¿La tlawakgo tiku kalaksakkanit xlakata amakgapitsi borregos natlawakgo tuku xaʼakgstitum?

11 Tlan xaʼakgstitum litaxtuyaw kxlakatin Dios. Palakachuwina Daniel tsokgli pi kxaʼawatiya kilhtamaku xatalaksakni xʼama kaliminkgo «lhuwa kxaʼakgstitum» (kalikgalhtawakga Daniel 12:3). ¿La tlawakgo uma tiku xatalaksakni? Xlakan lichuwinankgo xalakwan xalaksasti chu kamasiyanikgo xlimapakgsin Jehová lhuwa millones xla «amakgapitsin [borregos]» (Juan 10:16). Chuna kamakgtayakgo xlakata Dios xaʼakgstitum nakaʼakxilha. Chu uma tlan chuna la xlakata xtalakgalhaman Jehová nema ni kinkalakgchanan. Wa xlakata Pablo wa: «Kaj litlan [xaʼakgstitum litaxtukgo] xpalakata xlipaxkatsinit Dios, mpi lakgalhamankgo kaj wa xpalakata lantla lakgmaxtukgolh nCristo Jesús» (Rom. 3:23, 24).

Tlan tlawaniyaw oración. (Kaʼakxilhti párrafo 12).

12. ¿La limasiya oración xtalakgalhaman Dios nema ni kinkamininiyan?

12 Tlan talakatsuwiniyaw Dios xlakata oración. Xlakata xtalakgalhaman Dios nema ni kinkamininiyan tlan tlawaniyaw oración. Pablo wan pi xpumapakgsin Jehová wa pumapakgsin xla «xlipaxkatsinit» chu kinkawaniyan pi «ni anan tamakpuwan» akxni nachuwinanaw (Heb. 4:16a). Kxtukuwani Jesús tlan putum kilhtamaku tlawaniyaw oración Jehová. Uma akgtum lanka talakgalhaman. Pablo kinkawaniyan: «Ni anan talakapuwan lakatsaj  nalitalakatsuwiyaw Dios, xpalakata ntakanajla ntu nkgalhiniyaw» (Efes. 3:12).

Kinkamakgtayayan akxni maklakaskinaw. (Kaʼakxilhti párrafo 13).

13. ¿La kinkamakgtayayan talakgalhaman nema ni kinkamininiyan akxni maklakaskinaw?

13 Tlan nakinkamakgtayakanan akxni namaklakaskinaw. Pablo kinkamaʼakgpuwantinin natlawayaw oración akxni namaklakaskinaw, «ni anan talakapuwan lakatsaj nalitalakatsuwiyaw Dios, xpalakata ntakanajla ntu nkgalhiniyaw» (Heb. 4:16b). Akxni nakgalhiyaw akgtum taʼakglhuwit, tlan naskiniyaw Jehová kakinkamakgtayan. Xla tlan ni xkinkakgalhtin pero kinkakgalhtiyan. Makglhuwa kalimaklakaskin natalan xalak congregación xlakata nakinkamakgtayayan. Xlakata kgalhti kiʼoracioneskan, tlan wanaw: «Ni anan ntamakpuwan: “Wa nkimPuchinakan nkimakgtayana; ni kaktimakpuwa wa ntu nakintlawani nchixku”» (Heb. 13:6).

14. ¿Tuku na makglhtinanaw kaj xlakata xtalakgalhaman Jehová nema ni kinkamininiyan?

14 Tlan kinkamamakgkatsiniyan. Atanu lanka tasikulunalin nema makglhtinanaw xlakata xtalakgalhaman Jehová nema ni kinkamininiyan wa akxni tlan kinkamamakgkatsiniyan akxni wi tuku lilipuwanaw. Akxni kstalaninanin Cristo xalak Tesalónica xkaputsastalanimaka, Pablo katsokgnanilh: «NkimPuchinakan Jesucristo, chu Dios kinTlatkan, wa cha nti nkintikapaxkin, chu na kintikamaxkin xlipan takgtsiyajni, chu xatlan takgalhkgalhitin nkaj lipaxkatsinit, kamakgtsiyajkgolh minakukan, chu na kakamatliwakglhan» (2 Tes. 2:16, 17). ¿Ni xlikana pi tlan limakgkatsiyaw akxni katsiniyaw pi Jehová kinkapaxkiyan chu kinkalilakgaputsayan xlakata xtalakgalhaman nema ni kinkamininiyan?

15. ¿Tuku atanu makglhtinanaw kaj xlakata xtalakgalhaman Dios nema ni kinkamininiyan?

15 Tlan nalatamayaw putum kilhtamaku. Xlakata lakgalhinanin akinin, komo Jehová ni xkinkamakgtayan ni xkgalhiw takgalhkgalhin (kalikgalhtawakga Salmo 49:7, 8). Pero Jehová kinkamaxkinitan akgtum lu stlan takgalhkgalhin. ¿Tukuya takgalhkgalhin? Jesús wa: «Wa yuma xtalakaskin wa nti nkimalakgachanit; mpi xlipaks wa nti naukxilha xaKam, chu na nakanajlaniy, nakgalhiy latamat wa ntu xaliʼankgalhin» (Juan 6:40). Xlakata xtalakgalhaman Jehová nema ni kinkamininiyan tlan kgalhkgalhiyaw pi xliputum kilhtamaku nalatamayaw. Pablo wa: «Tasiyunit xlipaxkatsinit Dios wa ntu liminikgoy akgaputaxtut xlipaks nchixkuwin» (Tito 2:11).

NI KALIMAKLAKASKIW XTALAKGALHAMAN DIOS NEMA NI KINKAMININIYAN XLAKATA NALAKGALHINANAW

16. ¿La nitlan limaklakaskinkgolh xtalakgalhaman Dios nema ni kinkamininiyan makgapitsi kstalaninanin Cristo kxapulana siglo?

16 Chuna la akxilhnitawa, xlakata xtalakgalhaman Jehová nema ni kinkamininiyan makglhtinanaw lhuwa tasikulunalin. Pero ni malakatsaliyaw la limaklakaskinaw. Ni nalakpuwanaw pi uma talakgalhaman kinkamaxkiyan talakaskin nalakgalhinanaw. Akxni xlamakgolh xapulana kstalaninanin Cristo makgapitsi xlimaklakaskimputunkgo talakgalhaman nema ni kinkamininiyan xlakata «lakgapuxtu tlawaputunkgoy xlipaxkatsinit [Dios], mpi chuna ntlan nalitlawakgoy ntu limaxana talakgalhin» (Judas 4). Max umakgolh kstalaninanin Cristo tiku nitlan xlikatsikgo xlakpuwankgo pi tlan xlakgalhinankgolh chu xlakpuwankgo pi Dios tlan putum kilhtamaku xkatapatilh. Chu asta xtlawaputunkgo pi amakgapitsin na xlakgalhinankgolh chuna la xlakan. Tiku chuna tlawa la uku lu nitlan chu ni maxki kakni «kspiritu Dios ntu likgalhiyaw lipaxkatsinit» (Heb. 10:29).

17. ¿Tuku tastakyaw lakatanks wa Pedro?

 17 La uku, Satanás kaʼakgskgawinit makgapitsi kstalaninanin Cristo chu tlawanit pi kakanajlakgolh pi tlan nalakgalhinankgo chu Jehová tlan lakapala nakatapati. Xlikana pi Jehová katapati tiku lakgalhinankgo chu nitlan limakgkatsikgo xtalakgalhinkan. Pero na lakaskin kaliskujwi xlakata nialh natlawayaw tuku nitlan. Xla tlawalh pi apóstol Pedro xmastalh uma tastakyaw: «Kuitaj kakalitlawakantit, ni akxtum titaliʼakgtsankgakgoyatit xliʼakgtsankgan nkalawaj chixkuwin mpala naliʼakgchakgxatit, ntu tliwakglh wilanitit kmintakanajlakan. Wampi wa nkalistaktit xlipaxkatsinit, chu xlilakgapaskan nkimPuchinakan nkimakgaputaxtinakan Jesucristo» (2 Ped. 3:17, 18).

LIWANA KALIMAKLAKASKIW TALAKGALHAMAN NEMA NI KINKAMININIYAN

18. ¿Tuku kilitlawatkan xlakata Jehová kinkalimasiyaninitan talakgalhaman nema ni kinkamininiyan?

18 Komo paxtikatsiniyaw xtalakgalhaman Jehová nema ni kinkalakgchanan, kinkalakgchanan nalimaklakaskinaw tuku xla kinkamaxkiyan xlakata namalankiyaw chu nakamakgtayayaw amakgapitsin. ¿La tlan natlawayaw? Pablo wa pi «nchatunu nkin nkgalhiyaw ntalakgalhaman ntu ntamaxkinitaw». Wa pi komo Dios kinkamaxkinitan «wa nti xlimakgamakgtayanat liwi, kamakgamakgtayanalh». Chu na wa: «Wa nti makgalhtawakganan, kamakgalhtawakganalh. Chu wa nti xlistakyawanat liwi, pus kastakyawanalh». Alistalh wa: «Wa nti makgtayakgoy limaxkganin, xlipaks xtapaxuwan nkalitlawalh» (Rom. 12:6-8). ¿Tuku kilhchanima uma? Pi xlakata Jehová kinkalimasiyanin tapaxkit nema ni kinkamininiyan, kiliskujatkan xlakata nalichuwinanaw Dios, nakamasiyaniyaw amakgapitsin xlakata Dios, nakamaʼakgpuwantiniyaw natalan chu nakatapatiyaw tiku nitlan tuku kinkawanikgoyan.

19. ¿Tuku naʼakxilhaw kʼartículo nema stala?

19 Xlakata lhuwa tasikulunalin kinkamaxkinitan kaj xlakata xtalakgalhaman nema ni kinkamininiyan, talakaskin naliskujaw xlakata nakalitachuwinanaw «tachixkuwitat lantla Dios lakgalhamankgoy, chu makgtayaputunkgoy» (Hech. 20:24). Kʼartículo nema stala nalichuwinanaw xlakata uma tuku lakgayaw.

^ [1] (párrafo 2): Akxni ktextos xla uma artículo chu nema aku mima, tatsokgnit tachuwin «lipaxkatsinit», kilhchanima xtalakgalhaman Dios nema ni kinkamininiyan.