Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 BIOGRAFÍA

Jehová putum matlani

Jehová putum matlani

«LININ nialh katiʼanalh chu tiku nikgonita nalatamaparakgo». Kimpuskat Mairambubu, kgaxmatli umakgolh tachuwin anta kʼautobús. Pero tlakg xkatsiputun xlakata uma. Wa xlakata akxni autobús tachokgolh chu taktakgoka lakapala lakgalh puskat tiku wa uma tachuwin. Xwanikan Apun Mambetsadykova chu xtatayana Jehová xwanit. Ama kilhtamaku lu tuwa xwanit natachuwinana xtatayana Jehová, pero tuku kinkamasiyanin Apun lakgpalilh kilatamatkan.

TASKUJUT XA CHALI CHALI

Klakachilh kkata 1937 kʼakgtum koljós o granja lakatsu kTokmak (Kirguistán). Kifamilia xalak etnia kirguís, chu kchuwinanaw tachuwin kirguís. Kinatlatni chali chali kskujkgo kkoljós. Skujnanin xkamawikan, pero kaj makgtum akgtum kata xkamaskgawikan. Kintse tuwa xmakgkatsi nakinkamaxkiyan tuku xakmaklakaskinaw akit chu kintala xaʼaktsujku. Kajwatiya akgkitsis kata kkilalh kʼescuela, xlakata ktsukulh skuja anta kkoljós.

Teskey Ala-Too mountain range

Niku xakwilaw xwilakgolh lhuwa lakglimaxkgenin, chu xlakata xkinkaʼakchanin tumin xtalakaskin pi lhuwa xakskujwi. Wa xlakata akxni kgawasaku xakwanit ni xaklilakpuwan latamat chu tuku aku namin. Nikxni klilakpuwa pi tuku xaxlikana xlakata Jehová chu tuku xlakpuwan xpalakata latamanin xʼama lakgpali kilatamat. Kkalitachuwinamputunan la tsukuka lichuwinankan tuku xaxlikana anta kKirguistán chu la talakgatumilh xlikalanka kachikin. Tsukulh anta knorte niku akit kstakli.

TAXTUKGOYACHA NIKU XKACHILINKANIT CHU LIMINKGO TUKU XAXLIKANA ANTA KKINPAÍSKAN

Xaxlikana xlakata Jehová tsukulh lhuwan kKirguistán kkata 1950. Xlakata tlan chuna xlalh talakaskilh pi xtalatlawakgolh akgtum nitlan talakapastakni. Ama kilhtamaku, Kirguistán xmakgtapakgsi kʼUnión Soviética, chu xtatayananin Jehová ni makgtanukgolh kpolítica kputum países xla Unión (Juan 18:36). Wa xlakata, kalilakgapaska xtalamakgasitsinkan Estado comunista chu kaputsastalanika. Pero ni anan talakapastakni nema natlawa pi xTachuwin Dios ni nakalakgchan  kxnakujkan latamanin. Pulaktum tuku kkatsininit wa pi Jehová «ni pala pulaktum wi wantu napuwanatit pala ni lay tlaway» (Mar. 10:27).

Emil Yantzen

Taputsastalanit nema titaxtukgolh xtatayananin Jehová tlawalh pi xtalakgatumilh tuku xaxlikana kKirguistán. ¿La tatlawalh? Siberia xtapakgsi kʼUnión Soviética, chu anta xkachilinkan xtalamakgasitsinkan uma Estado. Akxni xkamaxtukan lhuwa xminkgo kKirguistán. Makgapitsi wa tiku kinkaliminikgon tuku xaxlikana chuna la Emil Yantzen, tiku xlakachinit kKirguistán kkata 1919 chu xmalakgachakanit niku palha skujkan chu anta kalakgapasli xTatayananin Jehová Emil namakgamakglhtinalh tuku xaxlikana, taspitli kpaís kkata 1956, tamakgxtakglhi lakatsu kSokuluk, lakatsu niku akit xaklama. Kkata 1958 tawi xapulana congregación kKirguistán.

Victor Vinter

Max akgtum kata alistalh, Victor Vinter chatum tala tiku lu tuwa tuku titaxtulh alh latama kSokuluk. Xlakata ni makgtanulh kpolitica, makgtiy manuka kpulachin akgtutu kata, alistalh manuparaka akgkaw kata kpulachin chu akgkitsis kata xchilinkanit. Maski tuwa tuku titaxtulh, nila tuku xmalakgachokgolh la xtalakgatumima tuku xaxlikana.

CHILH KKINCHIK TUKU XAXLIKANA

Eduard Varter

Kkata 1963 xʼanan liwaka 160 xTatayananin Jehová kKirguistán. Lhuwa tiku xalak Alemania, Ucrania chu Rusia xwankgonit. Chatum xwanikan Eduard Warter, tiku xchilinkanit chu xtamununit kʼAlemania kkata 1924. Kkata 1940 nazis malakgachakgolh kʼakgtum campo de concentración, chu makgapitsi kata alistalh comunistas xla Unión Soviética chilinkgolh. Uma tala alh latama kkachikin xla Kant, kkata 1961 lakatsu kkinkachikin.

Elizabeth Fot; Aksamai Sultanalieva

Anta kKant na xlama chatum tala puskat tiku xwanikan Elizabeth Fot chu tsapana xwanit. Chu xlakata lu xkatsini xtaskujut, xmakgtamawanankgo makuchinanin, makgalhtawakgenanin chu amakgapitsin tiku tlan taskujut xkgalhikgo. Chatum tiku lu xmakgtamawanan wa Aksamai Sultanalieva, xpuskat chatum xlakskujni mapakgsina. Akgtum kilhtamaku akxni Aksamai alh akxilha Elizabeth tlawanilh lhuwa takgalhskinin xlakata latamat chu la wilakgolh tiku nikgonita. Elizabeth limaklakaskilh Biblia xlakata nakgalhti xtakgalhskinin. Titaxtulh kilhtamaku, Aksamai na tsukulh lichuwinan tuku xalak Biblia.

Nikolai Chimpoesh

Nikolai Chimpoesh, xalak Moldavia, limapakuwika superintendente de circuito ama kilhtamaku. Chu liskujli liwaka 30 kata. Nikolai ni kaj watiya xlakgapaxialhnan congregaciones na xlakkaxwili xacopia likgalhtawakga chu xmaʼakgpitsika. Xlakata mapakgsinanin xkatsikgo tuku xtlawama, Eduard Warter wanilh: «Akxni nakgalhskinkana, kajwatiya kakawani pi kBrooklyn kinkamalakgachanikanan likgalhtawakga. Nalakaʼakxilha policía xla KGB akxni natachuwinana. Nitu nalipekuana» (Mat. 10:19).

Kaj ni makgas, Nikolai wanika pi xʼalh kʼoficinas xla KGB anta kKant. Xla lakapastaka: «Policía kinkgalhskilh niku xaktiyayaw likgalhtawakga. Kwanilh pi anta xkinkamalakgachanikanan kBrooklyn. Ni katsilh tuku nakiwani. Kiwanilh pi xakalha chu nikxni kintasanipa». Amakgolh xtatayananin Jehová chuntiya maʼakgpitsikgolh tamakatsinin xla Tamapakgsin lakatsu niku xaklama, anta knorte xla Kirguistán. Chu kkata 1980, tuku xaxlikana kalitachuwinanka kifamilia. Kimpuskat Mairambubu, wa tiku pulana kgaxmatli.

 KIMPUSKAT TUNKUN MAKGAMAKGLHTINAN TUKU XAXLIKANA

Mairambubu xalak Naryn, akgtum kachikin xalak Kirguistán. Papaʼ xla agosto kata 1974 klalakgapaswi kxchik kintala. Chu akxni klalakgapaswi tunkun klalakgatiw chu watiya ama kilhtamaku ktamakgaxtokgwi.

Apun Mambetsadykova

Akgtum kilhtamaku xla enero kata 1981, Mairambubu kitaspitli chu xmin kʼautobús, kgaxmatli tachuwin tuku lichuwinaw kxapulana párrafo. Xlakata kimpuskat tlakg xkatsiputun, kgalhskilh puskat tuku xwanikan chu niku xwi. Xla wanilh pi xwanikan Apun, pero wata ni maxkilh xdirección wata wa Mairambubu kgalhskinka xdirección, xlakata ama kata xtatayananin Jehová ni xkamaxkikan talakaskin nalichuwinankgo Biblia wa xlakata xtalakaskin kuenta xtlawakgolh. Lu xpaxuwa kimpuskat akxni chilh kchiki.

Mairambubu kiwanilh: «Wi tuku lu tlan kkgaxmatli. Chatum puskat kiwanilh pi nialh makgas latamanin nialh katinikgolh. Asta animales xalak luku nialhtu kintikatlawanikgon». Putum uma akit ni xakkanajla, chu kwanilh: «Kakgalhkgalhiw asta akxni namin chu tlakg nakinkalitachuwinanan».

Titaxtulh akgtutu papaʼ Apun kinkalakgapaxialhnan. Alistalh kinkalakgapaxialhnankgon makgapitsi xapulana xtatayananin Jehová xalak etnia kirguís. Umakgolh natalan kinkamasiyanikgon xaxlikana xlakata Jehová chu tuku lakpuwanit natlawa xpalakata latamanin. Kinkalikgalhtawakganikgon libro nema wanikan De paraíso perdido a paraíso recobrado. * Xlakata uma libro kaj maktum xʼanan ktachuwin Tokmak, talakaskilh pi xaktlawaw xacopia amakan.

Tuku xapulana kinkamasiyanikan wa tuku lichuwinan Génesis 3:15, nema nakgantaxtu xpalakata Mapakgsina nema Dios wilinit: Jesucristo. Uma tuku lu xaxlikana nema putum xlikgaxmatatkan. ¡Wa uma tuku xlakata akinin ktsukuw lichuwinanaw Dios! (Mat. 24:14). Ni makgas kilhtamaku, tsukulh lakgpali kilatamatkan tuku xakkatsinimaw xalak Biblia.

TAMAKXTUMIT CHU TAMUNUT KAJ XATSEKG

Akxni chatum xtatayana Jehová xalak Tokmak kinkawanin pi xakaw kʼakgtum tamakgaxtokgat, kimpuskat chu akit tunkun kkatsiw pi xtatayananin Jehová lu tanu xwankgonit. Kʼuma paskua ni analh taʼakglhuwit chu nitu xʼanan kuchu. Nitu xtatalakxtumi tamakgaxtokgat nema xakkilanitawa niku latamanin xwakgo lhuwa kuchu, xtlawakgo tuku nitlan chu nitlan xchuwinankgo.

 Nachuna kkilaw ktamakxtumit kcongregación xla Tokmak. Xtlawakan anta kbosque komo tlan xwi kilhtamaku. Natalan xkatsikgo pi policía xkinkaʼakxilhmakgon, wa xlakata wi tiku xwanikan pi xkuentajtlawanalh. Akxni lu xlonkgnan xaktamakxtumiyaw kʼakgtum chiki, chu policía makglhuwa kilachi xlakata nakatsi tuku xaktlawayaw. Kilhtamaku akxni ktamunuw, nema tatlawalh kʼakgtum kgalhtuchokgo wanikan Chu, akxni julio kkata 1982, xtalakaskin pi lu kuenta naktlawayaw (Mat. 10:16). Kʼakgatunu grupo kchaw niku xʼama tatlawa tamunut chu kkilhtliniw akgtum takilhtlin Jehová chu kkgaxmatwi taʼakgchuwin xla tamunut.

KLIMAXTUW KILHTAMAKU XLAKATA TLAKG NAKSKUJNANIYAW JEHOVÁ

Kata 1987, chatum tala kiwanilh pi xaklakgapaxialhnalh chatum lataman tiku xlimasiyanit pi xlakgati tuku xaxlikana chu xlama kBalykchy. Xlakata tlan xakchaw xtalakaskin pi akgtati hora xaktlawaw ktren. Akxni makglhuwata xaklichuwinanitaw xlakata Dios kBalykchy, kakxilhwi pi lhuwa latamanin xkatsiputunkgo tuku xaxlikana. Uma kinkamaxkin talakaskin xlakata tlakg nakskujnaniyaw Jehová.

Mairambubu chu akit lu xakanaw kBalykchy. Ankgalhin anta xakanaw xlisputni semana, xakanaw lichuwinanaw Dios chu xaktlawayaw tamakxtumit. Ankgalhin tlakg xakmaklakaskinaw likgalhtawakga wa xlakata xaklinaw kʼakgtum kuxtalh niku xmujukan papas. Xlakata nixkinkaʼakchaniyan akgtiy kuxtalh. Asta akxni xakanaw ktren chu akxni xaktaspitaw tlan xakkalitachuwinanaw latamanin tuku xla Dios.

Kata 1995 tawi akgtum congregación kBalykchy, akgtsayan kata alistalh la pulana kkilaw kʼuma kachikin. Putum uma tuku ktlawaw talakaskilh lhuwa tumin. ¿La ktlawaw xlakata ni lu xakkgalhiyaw tumin? Chatum tala xkinkalimakgtayayan tumin. Xlakata Jehová xkatsi pi tlakg xakskujnaniputunaw xla kinkasikulunatlawan (Mal. 3:10). Xlikana pi Jehová putum matlani.

KLILAKGAPUTSAYAW FAMILIA CHU LA KLICHUWINANAW DIOS

Kgolotsin klitaxtulh kkata 1992. Akit pulana kgolotsin klitaxtulh kʼama país xla etnia kirguís. Anta kkincongregacionkan kTokmak kkgalhiw talakaskin xlakata tlakg nakskujnaniyaw Jehová. Akgtum liʼakxilhtit, tlan kkalitakgalhtawakgaw Biblia lhuwa kamanan xla etnia kirguís chu kmakgapitsi pukgalhtawakga xla ama kachikin. Chatum tiku kmakgalhtawakgew la uku na makgtapakgsi kʼcomité xla sucursal chu achatiy precursores especiales litaxtukgo. Nachuna kliskujaw xlakata na nakkamasiyaniyaw tiku ankgo ktamakxtumit. Xkilhtsukut kkata 1990 kaj watiya xakkgalhiyaw likgalhtawakga ktachuwin ruso, nachuna tamakxtumit xtlawakan kʼuma tachuwin. Pero nachuna tlakg xtalhuwitilha natalan tiku xchuwinankgo tachuwin kirguís, wa xlakata akit ktsukulh kamatitaxtini kxtachuwinkan. Uma kamakgtayalh tlakg naʼakgatekgskgo tuku xaxlikana.

Ktaya kimpuskat chu kgalhtsayan kinkamanan kkata 1989

Mairambubu chu akit lu xakliskujaw xlakata nakkakuentajtlawayaw kinkamanankan. Xakkalinaw ktamakxtumit chu akxni xakanaw lichuwinanaw Dios. Akxni kintsumatkan Gulsayra xkgalhi akgkutiy kata, lu xlakgati xlichuwinan Biblia kkatijinin.  Putum kinkamanankan xlakgatikgo xkatsinikgo makgapitsi textos xalak Biblia. Kinkamanankan chu alistalh kinatanatnikan, putum kilhtamaku lu xtlawakgo taskujut xalak congregación. Lata kgalhnajatsa kinkamanankan chu kgalhkawitu kinatanatnikan nema lamakgolhku, kgalhkuchaxan tiku skujnanimakgo Jehová o kataʼankgo xnatlatni ktamakxtumit.

LHUWA TALAKGPALIT

Natalan tiku tsukukgolh lichuwinankgo Dios niku xaklamaw kkata 1950 kaks xlilakawankgolh komo xʼakxilhkgolh putum talakgpalit nema lanit. Akgtum liʼakxilhtit, lata kkata 1990 tlakg kinkamaxkikan talakaskin naklichuwinanaw Dios chu tlan naktamakxtumiyaw.

Klichuwinamaw Dios akit chu kimpuskat

Kkata 1991, kimpuskat chu akit kaw kKazajistán, kachikin Alma-Atá (la uku Almaty), xlakata tlan xakaw kxapulana lanka tamakxtumit. Chu kkata 1993 kkgalhiw xapulana lanka tamakxtumit kKirguistán kʼEstadio Spartak kkachikin Biskek. Liwaka akgtum semana natalan likaxakakgolh kʼestadio niku xʼama tatlawa tamakxtumit. Tiku xkuentajtlawa kaks lilakawa chu ni kinkamatajin la kmaklakaskiw.

Wi tuku lu xlakaskinka lalh kkata 1994 akxni imprimirlika xapulana likgalhtawakga ktachuwin kirguís. La uku ksucursal xla Biskek matitaxtikgo likgalhtawakga ktachuwin kirguís. Lata kkata 1998, lakkaxlalh pi xtatayananin Jehová tlan natamakxtumikgo chu nalichuwinankgo Jehová kKirguistán. Liwaka 5,000 tiku lichuwinankgo Dios nachuna anan 83 congregaciones chu 25 grupos ktachuwin chino, inglés, kirguís, ruso chu lenguaje de señas ruso, turco, uigur chu uzbeko. Kinatalankan xalak tanu tanu kachikinin, pero makxtum skujnanimakgolh Jehová. Xlikana pi wa Jehová tiku tlawalh uma talakgpalit.

Jehová lakgpalilh kilatamat. Kstakli kʼakgtum familia niku limaxkgenin xwankgonit chu kaj watiya akgkitsis kata kkilalh kʼescuela. Maski chuna, Jehová kimaxkinit talakaskin kgolotsin naklitaxtu kcongregación chu nakkamasiyani tuku xaxlikana xalak Biblia latamanin tiku tlakg kgalhtawakgakgonit nixawa akit. Xlikana pi Jehová makgantaxti tuku ni lakpuwanaw. Putum tuku ktitaxtunit kkilatamat kimakgpuwantini xlakata tlakg nakskujnani Jehová, Dios tiku «ni pala pulaktum wi wantu napuwanatit pala ni lay tlaway» (Mat. 19:26).

^ párr. 21 Tlawakgonit xtatayananin Jehová. Nialh tlawakan la uku.