Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Febrero kata 2017

Xlikana nakgantaxtu xtalakaskin Jehová

Xlikana nakgantaxtu xtalakaskin Jehová

«Klichuwinanit; na nakmakgantaxti. Klakkaxwilinit, nachuna naktlawa» (IS. 46:11).

TAKILHTLIN: 147, 149

1, 2. 1) ¿Tuku kinkawaninitan Jehová? 2) ¿Tuku tamalaknun tekgsaw k’Isaías 46:10, 11 chu 55:11?

BIBLIA litsuku ni tuwa tachuwin pero lhuwa tuku kilhchanima. Wan: «Kxapulana, Dios tlawalh akgapun chu katiyatni» (Gén. 1:1). Akinin kaj tsinu lakgapasaw la xlilhuwa tuku tlawanit Dios k’akgapun. Ni lhuwa tuku katsiyaw xlakata, akgapun, taxkgakget chu litliwakga nema wanikan gravedad (Ecl. 3:11). Pero Jehová kinkawaniyan tuku xtalakaskin xlakata Katiyatni chu latamanin. Katlawalh latamanin chuna la xla likatsi chu xlakaskin pi xlipaxuwakgolh latamat kKatiyatni (Gén. 1:26). Xkaman xlitaxtukgolh latamanin chu xla xTlatkan xlitaxtulh.

2 Capítulo 3 xla Génesis kinkawaniyan pi analh akgtum ta’akglhuwit nema tlawalh pi ni xkgantaxtulh xtalakaskin Dios (Gén. 3:1-7). Pero Jehová tlan lakkaxtlawa ta’akglhuwit. Niti la laktlawa tuku Jehová tlawaputun (Is. 46:10, 11; 55:11). Liwana katsiyaw pi xtalakaskin Jehová nema xkgalhi xapulana nakgantaxtu kkilhtamaku nema lakkaxwilinit.

3. 1) ¿Tuku tamasiy lu xlakaskinka nema kinkamakgtayayan na’akgatekgsaw tuku masiya Biblia? 2) ¿Tuku xlakata nalichuwinanaw uma tamasiy la uku? 3) ¿Tuku takgalhskinin na’akxilhaw?

 3 Xlikana, katsiyaw tuku xtalakaskin Dios xlakata Katiyatni chu latamanin. Nakatsiyaw la makgtayanan Jesús xlakata nakgantaxtu xtalakaskin Dios. Uma tamasiy xalak Biblia lu xlakaskinka. Max wa uma tuku pulana katsiniw akxni tsukuw likgalhtawakgayaw xTachuwin Dios. ¿Ni xlikana pi kamakgtayaputunaw amakgapitsin xlakata na nalakgapaskgo? Uma kata kgalhiyaw talakaskin nakawaniyaw latamanin kakinkatatamakxtumikgon akxni lakapastakkan akxni tinilh Cristo (Luc. 22:19, 20). Komo nakinkatatamaxtumikgoyan uma lu xlakaskinka tamakxtumit, tlakg nakatsi xlakata tuku lakkaxwilinit Dios. Wa xlakata la uku kililakapastakatkan takgalhskinin nema natlawa pi na’amputunkgo ktamakxtumit. K’uma artículo na’akxilhaw akgtutu takgalhskinin: ¿Tuku xlakapastaknit Jehová xlakata latamanin chu Katiyatni? ¿Tuku nitlan kitaxtulh? Chu ¿tuku xlakata xlakaskinka xtamakamastan Jesús xlakata nakgantaxtu xtalakaskin Dios?

¿TUKU XTALAKASKIN DIOS XWANIT?

4. ¿Tuku xlakata wan Biblia pi putum tamalakatsukin «kinkamasiniyan ixlilanka Dios»?

4 Jehová lu tlan malakatsukina. Putum tuku tlawanit lu tlan (Gén. 1:31; Jer. 10:12). ¿Tuku katsiniyaw la xlistlan tuku tlawanit chu la liwana lakkaxwilinit xtamalakatsukin? Putum tuku tlawanit Jehová lu tlan kimpalakatakan, la tlakg xa’aktsina asta nema tlakg lanka. ¿Ni xlikana pi lu kaks kinkamalakawaniyan akxni lilakpuwanaw la skuja kicélulaskan, akxilhkan tiku aku lakachin o akxilhkan la tsankga chichini? Akxilhaw tuku lu lakstlan tlawanit Jehová xlakata chuna kinkatlawanitan (kalikgalhtawakga Salmo 19:1 chu 104:24).

5. ¿Tuku tlawanit Jehová xlakata tuku malakatsukinit liwana chu akxtum natatsuwikgo?

5 Liwana lakkaxwililh Jehová chu wilinilh asta niku x’ama kichan tuku xtamalakatsukin. Tlawalh limapakgsin xlakata tuku anan chu limapakgsin xlakata tayat chu chuna liwana natatsuwikgo xlitilanka kakilhtamaku chu akxtum natatsuwikgo (Sal. 19:7-9) (kaʼakxilhti recuadro «¿Tuku kilhchanima?»). Putum tuku anan k’akgapun Jehová kamaxkilh niku natawilakgo chu tuku natlawakgo. Akgtum li’akxilhti, limapakgsin nema anan xlakata tuku tlawa pi ni natapanuni Tiyat x’atmósfera chu nachuna lakatum wilinit pupunu chu ta’akgayawana. Komo ni x’analh gravedad, ni x’analh latamat kKatiyatni. Putum tuku anan k’akgapun liwana skujmakgolh xlakata Jehová kawilininit asta niku nakichankgo. Uma limasiya pi wi tuku xlakata Jehová tlawalh Katiyatni chu latamanin. Akxni anaw kalitachuwinaw Dios latamanin, tlan nakamakgtayayaw nalakgapaskgo Malakatsukina tiku tlawalh putum tuku anan kkakilhtamaku (Rev. 4:11).

6, 7. ¿Tuku tamaskiwin kamaxkilh Jehová Adán chu Eva?

6 Xtalakaskin Jehová wa pi latamanin xlatamakgolh putum kilhtamaku kKatiyatni (Gén. 1:28; Sal. 37:29). Xlakata xla xalakgalhamanina, lhuwa tamaskiwin kamaxkilh Adán chu Eva (kalikgalhtawakga Santiago 1:17). Akgtum li’akxilhtit, tlan xakstukan tuku xlaksakkgolh chu xlakata nalakapastakkgo, napaxkinankgo chu nakgalhikgo amigos (kaʼakxilhti recuadro «¿Tuku kilhchanima?»). Jehová tachuwinalh Adán chu wanilh la xtlawalh  tuku tlan. Nachuna, masiyanilh la xtamakgtakgalhkgolh chu xkuentajtlawakgolh katiyatni chu animales (Gén. 2:15-17, 19, 20). Jehová kamaxkilh Adán chu Eva tuku tlan naxamakgo, na’akxilhkgo, nalakgatikgo, nakgaxmatkgo chu nakgankgawanankgo putum tuku xtlawakanit xpalakatakan. Chuna tlan xlipaxuwakgolh latamat niku lu kastlan xwilakgolh. Jehová lu tlan taskujut kamaxkilh nema xtlawakgolh. Adán chu Eva ankgalhin wi tuku xkatsinikgolh chu xkatsikgolh tuku xalaksasti.

7 ¿Tuku atanu na xmakgtapakgsi kxtalakaskin Dios? Jehová kamaxkilh Adán chu Eva xlakata tlan xkgalhikgolh xkamankan nema ni xkgalhikgolh talakgalhin. Chu xkaman na xkgalhikgolh xkamankan. Chuna Katiyatni tlan xlitatsamalh latamanin. Dios xlakaskin pi natlatni xpaxkikgolh xkamankan chuna la xla xkapaxkinit xapulana xkamanan Adán chu Eva. Dios kamaskiwilh latamanin Katiyatni chu tuku lakstlan chu tuku lhuwa xtapalh nema x’anan. Anta uma niku xliputum kilhtamaku xtawilakgolh (Sal. 115:16).

¿TUKU NITLAN KITAXTULH?

8. ¿Tuku xlakata Jehová maxkilh limapakgsin Adán chu Eva nema wi k’Génesis 2:16, 17?

8 Ni kgantaxtulh tuku xlakpuwanit Jehová. ¿Tuku lalh? Ka’akxilhwi. Jehová kamaxkilh Adán chu Eva ni xatuwa limapakgsin niku xkatsikgolh pi kaj tsinu tlan xlaksakkgolh tuku xakstukan xtlawaputunkgolh. Xla wa: «Tlan nawaya xtawakat putum kiwi nema yakgo kjardín asta nakgalhkgasa. Pero xtawakat kiwi nema lilakgapaskan tuku xatlan chu nixatlan, ni nawaya, xlakata kilhtamaku akxni nawaya, xlikana pi naniya» (Gén. 2:16, 17). Uma limapakgsin ni tuwa akgatekgskan. Pero na ni tuwa kgalhakgaxmatkan, xlakata anta kjardín lhuwa xwi tuku lu lakgkgama nema tlan xwakan.

9, 10. 1) ¿Tuku limawakalh Satanás Jehová? 2) ¿Tuku laksakkgolh natlawakgo Adán chu Eva? (Kaʼakxilhti xapulana dibujo).

9 Satanás limaklakaskilh tantum luwa xlakata na’akgskgawi Eva chu chuna tlawalh xlakata ni xkgalhakgaxmatli Jehová (kalikgalhtawakga Génesis 3:1-5; Rev. 12:9). Tlawalh pi xtasiyalh pi nitlan likatsi Dios xlakata ni xkamaxki talakaskin xkamanan «xwakgolh xtawakat putum kiwi nema yakgo kjardín». Xtachuna la xwa: «¿Tuku xlakata wixin nila tlawayatit tuku lakaskinatit?». Chu alistalh Eva wanika uma takgsanin: «Ni katinitit». Alistalh tlawalh pi xkanajlalh pi ni xlakaskinka nakgalhakgaxmatkan Dios. Wanilh: «Xlakata Dios katsi pi kilhtamaku akxni nawayatit xtawakat, natalakki milakgastapukan». Satanás limawakalh Jehová pi nixlakaskin pi Adán chu Eva xwakgolh tawakat komo chuna xtlawakgolh tlakg tlan xkatsikgolh. Chu alistalh, Satanás malaknulh uma tuku nixlikana xtachuna «la Dios nawanatit, nalakgapasatit tuku tlan chu tuku nixatlan».

10 Adán chu Eva xlilaksakat xwanit komo xkgalhakgaxmatli Dios o xkgalhakgaxmatli luwa. Lu nitlan pero ni kgalhakgaxmatkgolh Dios. Lakgmakgankgolh Jehová chu ni’alh xTlat tlawaputunkgolh. Chuna tatayakgolh Satanás. Ama kilhtamaku, xakstukan tamakgxtakgkgolh chu makgatsankgakgolh xtamakgtay Jehová (Gén. 3:6-13).

11. ¿Tuku xlakata Jehová ni tapatilh xtalakgalhinkan Adán chu Eva?

11 Akxni Adán chu Eva ni kgalhakgaxmatkgolh xlimapakgsin Dios, makglakgalhinanin litaxtukgolh. Xtalatlawananin Dios litaxtukgolh, xlakata xla xkajni tuku nitlan. Biblia  wan pi xlakgastapu Dios «xalak skulunku xlakata na’akxilha tuku nitlan» (Hab. 1:13). Komo Jehová xtitapatilh xtalakgalhin Adán chu Eva, uma xtlawalh pi katuwa xtawilalh putum xtamalakatsukin Dios. Ángeles chu latamanin xlakpuwankgolh komo tlan xlipawanka tuku xla xwan. Pero Jehová makgantaxti xlimapakgsin, chu maxki kakni (Sal. 119:142). Maski Adán chu Eva tlan xlaksakkgolh tuku natlawakgo, xtitaxtukgolh tuku nitlan xlakata lakatakikgolh Jehová. Titaxtulh kilhtamaku, nikgolh chu pokgxni wamparakgolh nema wa xkalitlawakanit (Gén. 3:19).

12. ¿Tuku akgspulakgolh xkamanan Adán?

12 Akxni Adán chu Eva wakgolh tawakat, Jehová ni’alh mastalh talakaskin pi xmakgtapakgsikgolh kxfamilia. Wa xlakata katamakxtulh kjardín xla Edén chu ni’alh kamaxkilh talakaskin xtaspitkgolh (Gén. 3:23, 24). Jehová tlawalh pi xtitaxtukgolh tuku nitlan xlakata tuku xlaksakkgonit natlawakgo (kalikgalhtawakga Deuteronomio 32:4, 5). Tuku kitaxtulh wa pi ni’alh liwana makglhkatikgolh xtayat Jehová. Adán lakxtlawalh kilhtamaku nema lu tlan x’ama kgalhi xla chu xkamanan. Kaj wa tlan kamatitaxtinilh talakgalhin chu tlawakan tuku nitlan chu linin (Rom. 5:12). Xkamanan Adán ni’alh la latamakgolh putum kilhtamaku. Adán chu Eva ni’alh la kgalhikgolh kamanan nema ni xkgalhikgolh talakgalhin, wa xlakata xkamanan na kgalhikgolh talakgalhin. Satanás tlawalh pi Adán chu Eva xlakatakikgolh Dios, nachuna kinkamatlawiputunan la uku (Juan 8:44).

XTALAKGMAXTUN JESÚS TLAWA PI TLAN X’AMIGO DIOS NAWANAW

13. ¿Tuku chuntiyaku lakaskin Jehová xlakata latamanin?

13 Maski Adán chu Eva makgxtakgkgolh Jehová, xla chuntiyaku kapaxki latamanin. Chu lakaskin pi x’amigos kalitaxtukgolh chu nikxni xnikgolh (2 Ped. 3:9). Wa xlakata wi tuku tlawalh xlakata latamanin tlan x’amigos xlitaxtuparakgolh. ¿La xtlawalh xlakata ni xlakatsalalh limapakgsin? Ka’akxilhwi.

Akxni Adán chu Eva makgxtakgkgolh Jehová, xla wi tuku lakapala tlawalh xlakata latamanin tlan x’amigo xlitaxtuparakgolh

14. 1) Chuna la wan Juan 3:16, ¿tuku tlawalh Dios xlakata nakinkalakgmaxtuyan ktalakgalhin chu klinin? 2) ¿Tuku takgalhskinin tlan nakalitachuwinanaw latamanin?

14 (Kalikgalhtawakga Juan 3:16). Max latamanin tiku nakawaniyaw pi ka’ankgolh akxni nalakapastakkan akxni tinilh Cristo liwana katsikgo uma versículo. Pero ¿katsikgo tuku xlakata xtamakamastan Jesús tlan kinkamaxkiyan latamat nema ni kgalhi xlisputni? Tlan nakamakgtayayaw xlakata nakatsikgo xtakgalhtin uma takgalhskinin. ¿Tuku kilhtamaku? Akxni nakawaniyaw pi ka’ankgolh akxni natalakapastaka akxni tinilh Cristo, chu alistalh akxni nakalakgapaxialhnanaw. Komo xlakan liwana na’akgatekgskgo tuku kilhchanima xtamakamastan Cristo, liwana na’akgatekgskgo pi Jehová lu kinkapaxkiyan chu lu skgalala. ¿Tuku tlan nakalitachuwinanaw xlakata talakgmaxtut?

15. ¿Tuku xlakata Jesús ni tatalakxtumi Adán?

 15 Jehová mastalh chatum chixku tiku ni xkgalhi talakgalhin xlakata nakinkalakgmaxtuyan. Uma chixku tiku ni xkgalhi talakgalhin xtalakaskin pi ni xmakgxtakgli Jehová chu xmastalh xlatamat xpalakata latamanin (Rom. 5:17-19). Wa xlakata Jehová laksakli Jesús, wa tiku pulana malakatsukilh. Dios tlawalh pi xKgawasa tiku xwi k’akgapun xmilh kKatiyatni (Juan 1:14). Chuna Jesús litaxtulh chatum chixku tiku ni xkgalhi talakgalhin, chuna la xwanit Adán. ¿Tuku xlakata? Xlakata xla kgalhakgaxmatli limapakgsin nema Dios xlakaskin pi xkgalhakgaxmatli chatum chixku tiku ni kgalhi talakgalhin. Maski Jesús tuwa tuku titaxtulh, putum kilhtamaku kgalhakgaxmatli Dios.

16. ¿Tuku xlakata xtamakamastan Jesús akgtum tamaskiwin nema lhuwa xtapalh?

16 Xlakata mastalh xlatamat tlan kinkalakgmaxtun ktalakgalhin chu klinin. Xla nachuna max xwanit la Adán. Xlitaxtu chatum chixku tiku ni xkgalhi talakgalhin chu limasiyalh xlakata nikxni makgxtakgnalh chu kgalhakgaxmatli Dios (1 Tim. 2:6). Xtamakamastan tlawa pi putum latamanin tlan nalatamakgo putum kilhtamaku (Mat. 20:28). Chuna la akxilhaw, xtamakamastan Jesús lu xlakaskinka xlakata nakgantaxtu xtalakaskin Dios (2 Cor. 1:19, 20).

JEHOVÁ LAKASKIN PI KAMAKGTAPAKGSIPARAW KXFAMILIA

17. ¿Tuku tlawa xtamakamastan Jesús?

17 Jehová lanka xtapalh tuku mastalh xlakata nakinkalakgmaxtuyan (1 Ped. 1:19). Xlakaskinka kinkakxilhan asta mastalh xlatamat xkgawasa tiku tlakg paxki xlakata xkinkapalakanin (1 Juan 4:9, 10). Tlan nawanaw pi Jesús xlakgxokgo tamakgxtakglhi Adán chu  litaxtulh kintlatkan (1 Cor. 15:45). Xlakata xtamakamastan, Jesús kinkamaxkiyan talakaskin pi nalatamayaw putum kilhtamaku. Na kinkamaxkiyan talakaskin namakgtapakgsiyaw kxfamilia Dios. Xlakata xtamakamastan ni’alh katikgalhiw talakgalhin kkilhtamaku nema aku mima, chu Jehová tlan nakinkamakgamakglhtinanan kxfamilia. Lu tlan nawan akxni latamanin tiku ni makgxtakgkgo Dios ni’alh katikgalhikgolh talakgalhin. Chuna putum tiku wilakgolh k’akgapun chu kKatiyatni akgtuma familia nawan. Putum xkaman Dios nalitaxtuyaw (Rom. 8:21).

18. ¿Tuku kilhtamaku Jehová «nalikgantaxtuy xlipaks nkatuwaj»?

18 Maski xapulana kinatlatnikan lakgmakgankgolh Jehová, xla chuntiya kapaxkilh latamanin. Mastalh xlatamat xKgawasa xlakata nakinkalakgmaxtuyan. Maski makglakgalhinanin akinin, Satanás ni la kinkamakgxtakgniyan Jehová. Xlakata talakgmaxtut, Jehová nakinkamakgtayayan xlakata akgstitum nalikatsiyaw. Lu tlan nakitaxtu akxni putum namakgamakglhtinankgo Jesús chu nakgalhinikgo takanajla chu nakgalhikgo latamat nema ni kgalhi xlisputni (Juan 6:40). Xapaxkina chu xaskgalala kinTlatkan, Jehová, namakgantaxti xtalakaskin chu nakamakgtaya latamanin xlakata ni’alh nakgalhikgo talakgalhin. Wa xlakata, xla nalitaxtu «nti nalikgantaxtuy xlipaks nkatuwaj» (1 Cor. 15:28).

19. 1) ¿Tuku natlawayaw komo paxtikatsiniyaw xtalakgmaxtut Jesús? (Ka’akxilhti recuadro « Chuntiya kakaputsaw tiku kaminini»). 2) ¿Tuku na’akxilhaw k’atanu artículo?

19 Komo paxtikatsiniyaw xtalakgmaxtut Jesús, nakalitachuwinanaw amakgapitsin xlakata uma tamaskiwin nema lu lhuwa xtapalh. Latamanin xlikatsitkan pi xlakata talakgmaxtut, Jehová xatapaxuwan nakamaxki latamat nema ni kgalhi lisputni. Talakgmaxtut ni kajwatiya tlawa pi tlan nalatamayaw putum kilhtamaku. Nachuna tlawa pi tlan nalakkaxla ta’akglhuwit nema Satanás tlawalh kjardín xla Edén. Artículo nema aku mima na’akxilhaw la talakgmaxtut lakkaxtlawa uma ta’akglhuwit.