Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Febrero kata 2017

Talakgmaxtut: akgtum tlan tamaskiwin xpalakata kinTlatkan

Talakgmaxtut: akgtum tlan tamaskiwin xpalakata kinTlatkan

«Xlipaks wa ntlan tatakin, chu ntu aktanks, anta ntalhman minacha» (SANT. 1:17).

TAKILHTLIN: 148, 5

1. ¿Tuku tlan namakglhtinanaw xlakata talakgmaxtut?

XTALAKGMAXTUT Jesucristo tlawa pi namakglhtinanaw lhuwa tasikulunalin. Akgtum li’akxilhtit, uma tlawa pi xa’amakgapitsi borrego namakgtapakgsikgo kxfamilia Dios (kaʼakxilhti recuadro «¿Tuku kilhchanima?». Pero uma tlawa pi latamanin tlan nalatamakgo putum kkilhtamaku. Pero talakgmaxtut wi tuku tlakg kilhchanima. Wa tuku tlakg xlakaskinka anta k’akgapun chu kKatiyatni (Heb. 1:8, 9).

2. 1) ¿Tuku lu xlakaskinka lichuwinan k’oración xla padrenuestro xlakata akgapun chu kKatiyatni? (Kaʼakxilhti xapulana dibujo). 2) ¿Tuku nalichuwinanaw k’uma artículo?

2 Max akgtiy kata akxni nina xniy, Jesús kamasiyanilh xtamakgalhtawakgen la natlawakgo oración: «Tlati nti wilapi nkakgapun, katamasantujlilh mintukuwini. Kamilh milimapakgsin. Wa nkatatlawalh ntu mintalakaskin, xtachuna lantla nkakgapun, na chuna kawa nkatiyatna» (Mat. 6:9, 10). K’uma artículo na’akxilhaw pulaktutu la tatalakxtumi talakgmaxtut: 1) natamasantujli  xtukuwani Jehová, 2) xTamapakgsin Dios chu 3) la nakgantaxtu xtalakaskin Dios.

«KATAMASANTUJLILH MINTUKUWANI»

3. 1) ¿Tuku kilhchani xtukuwani Dios? 2) ¿La maxkajwanilh Satanás xtukuwani Jehová?

3 Tuku pulana skilh Jesús kpadrenuestro wa pi xtamasantujlilh xtukuwani Dios. Uma wamputun pi xtukuwani Dios xmaxkika kakni xlakata xasanto. Uma tukuwani kilhchanima Jehová chu lichuwinan la likatsi. Xla wa Tiku tlakg tliwakga chu xa’akgstitum xliputum tamalakatsukin. Jesús limapakuwilh Jehová «Tataj xasantujlani» (Juan 17:11). Xlakata Jehová xasanto, putum tuku tlawa xasanto, asta xlimapakgsin. Anta k’Edén, Satanás nitlan lichuwinalh talakaskin nema kgalhi Dios xlakata xlimapakgsin nema kawilininit latamanin. Wa takgsanin xlakata Jehová chu maxkajwanilh xtukuwani, uma wamputun, nitlan lichuwinanka xtayat (Gén. 3:1-5).

4. ¿La masantujlilh Jesús xtukuwani Dios?

4 Jesús xpaxki xtukuwani Jehová, ni xtachuna la Satanás. Wa xlakata putum tlawalh tuku matlanilh xlakata xmasantujlilh (Juan 17:25, 26). ¿La masantujlilh? Xlakata tuku tlawalh chu tuku masiyalh. Jesús kamasiyanilh amakgapitsin pi xlimapakgsin Jehová xa’akgstitum chu paks tuku Dios kinkaskiniyan tlan nakinkakitaxtuniyan (kalikgalhtawakga Salmo 40:8-10). Jesús ni makgxtakgli Jehová maski Satanás lu makgapatinalh akxni nilh. Limasiyalh pi chatum chixku tiku ni kgalhi talakgalhin tlan nakgalhakgaxmata Jehová.

5. ¿La namasantujliyaw xtukuwani Jehová?

5 Chu akinin, ¿la limasiyayaw pi paxkiyaw xtukuwani Jehová? Xlakata tuku tlawayaw. Jehová lakaskin pi xaskulunku nalitaxtuyaw (kalikgalhtawakga 1 Pedro 1:15, 16). Wa xlakata kaj watiya kakninaniyaw chu kgalhakgaxmataw xliputum kinakujkan. Maski kinkaputsastalanikanan, liskujaw xlakata nalilatamayaw chuna la kinkamasiyaniyan Jehová. Akxni kgalhakgaxmataw xlimapakgsin, maxkiyaw kakni xtukuwani (Mat. 5:14-16). Na limasiyayaw pi xlimapakgsin xatlan chu Satanás kaj xa’akgsanina. Xlikana, kimakgapatsankgayaw xlakata makglakgalhinanin akinin. Pero, nitlan limakgkatsiyaw chu liskujaw xlakata nialh chuna natlawayaw xlakata ni namaxkajwiyaw xtukuwani Jehová (Sal. 79:9).

6. ¿Tuku xlakata Jehová xa’akgstitum kinkali’akxilhan maski makglakgalhinanin akinin?

6 Komo xatalaksakni akinin o ni, Jehová kinkatapatiyan kintalakgalhinkan komo kanajlaniyaw talakgmaxtut. Xla kamakgamakglhtinan tiku kakninanikgo chu makamaxkikgo xliputum xlatamatkan. Xa’akgstitum kali’akxilha tiku xatalaksakni chu kamakgamakglhtinan la xkamanan. Nachuna xa’akgstitum kali’akxilha «amakgapitsi xborregos» chu la x’amigos kali’akxilha (Juan 10:16; Rom. 5:1, 2; Sant. 2:21-25). Xlakata talakgmaxtut, la uku tlan talalinaw kinTlatkan chu masantujliyaw xtukuwani.

«KAMILH MILIMAPAKGSIN»

7. ¿Tuku tasikulunalin kinkamaxkiyan xTamapakgsin Dios xlakata talakgmaxtut?

7 Kpadrenuestro Jesús wa: «Kamilh milimapakgsin». ¿La tatalakxtumi talakgmaxtut chu Tamapakgsin? Anta kxTamapakgsin Dios makgtapakgsikgo Jesús chu 144,000 tiku kalaksakkanit kKatiyatni. Talakgmaxtut tlawa pi uma latamanin tlan nalakastakwanankgo chu nalatamakgo k’akgapun (Rev. 5:9, 10; 14:1). Anta mapakgsinanin chu sacerdotes nalitaxtukgo, chu natamapakgsinankgo Jesús kKatiyatni 1,000 kata. Ama kilhtamaku, Dios nalimaklakaskin  xtamapakgsin xlakata kKatiyatni akgtum paraíso nawan chu nakamakgtaya putum latamanin xlakata akgstitum nawankgo chu nialh nakgalhikgo talakgalhin. Xlakskujnin Jehová tiku wilakgolh k’akgapun chu kKatiyatni nalitaxtukgo akgtum familia (Rev. 5:13; 20:6). Jesús namasputu Satanás chu ta’akglhuwit nema tlawanit (Gén. 3:15).

8. 1) ¿La kamakgtayalh Jesús xtamakgalhtawakgen na’akgatekgskgo pi xTamapakgsin Dios xlakaskinka? 2) ¿La limasiyayaw pi tatayayaw Tamapakgsin?

8 Jesús kamakgtayalh xtamakgalhtawakgen na’akgatekgskgo pi xTamapakgsin Dios lu xlakaskinka. ¿La tlawalh? Akxni tamunulh tsukulh lichuwinan «xalakwan xalaksasti tamakatsin xla xtamapakgsin Dios» kaniwa (Luc. 4:43). Nachuna, kawanilh xtamakgalhtawakgen pi «asta nalichipinatit awatiya kxtankgana katuxawat» xlakata nalichuwinanatit Dios (Hech. 1:6-8). Xlakata talichuwinama Dios lhuwa latamanin kamaxki talakaskin nakatsikgo xlakata talakgmaxtut chu nalatamakgo kxTamapakgsin Dios. Limasiyayaw pi ni makgxtakgaw xTamapakgsin Dios akxni kamakgtayayaw tiku xatalaksakni xlakata nalichuwinanaw xalakwan xalaksasti xlikalanka katiyatni (Mat. 24:14; 25:40).

«KATATLAWALH NTU MINTALAKASKIN»

9. ¿Tuku xlakata nalipawanaw pi xtalakaskin Jehová xlakata latamanin nakgantaxtu?

9 Jesús nawa kpadrenuestro: «Katatlawalh ntu mintalakaskin». ¿Tuku xwamputun? Akxni Jehová wan tuku nala, chuna kgantaxtu (Is. 55:11). Xlakata lakatakinalh Satanás, ni tlawalh pi xtalakaskin Jehová natalakgpali. ¿Tuku xtalakaskin xwanit Jehová xlakata Katiyatni? Pi xkamanan Adán chu Eva ni xkgalhikgolh talakgalhin chu xmalakgatsamakgolh Katiyatni (Gén. 1:28). Komo Adán chu Eva xnikgolh chu ni xkgalhikgolh kamanan, nila xkgantaxtulh xtalakaskin Dios xlakata kKatiyatni xlimalakgatsamakgolh xkamanan. Wa xlakata Jehová kamaxkilh talakaskin nakgalhikgo kamanan. Talakgmaxtut kamaxki tiku kanajlanikgo pi nialh nakgalhikgo talakgalhin chu nalatamakgo putum kilhtamaku. Jehová kinkapaxkiyan chu lakaskin pi nalipaxuwayaw latamat chuna la xapulana xlakpuwanit.

10. ¿La nakamakgtaya talakgmaxtut latamanin tiku nikgonita?

10 Millones latamanin nikgonit chu ni lakgapaskgolh Jehová. ¿Tuku naka’akgspula? Dios lakaskin pi latamanin nalatamakgo, xla nakamalakastakwani tiku nikgonita. Na’anan talakastakwanat xlakata talakgmaxtut. Akxni nalakastakwanankgo latamanin, nakgalhikgo talakaskin pi nakatsinikgo xlakata Jehová chu tlan nalatamakgo putum kilhtamaku (Hech. 24:15). Xlakata Jehová xmakilhtsukina latamat, xtlatkan nalitaxtu putum tiku nalakastakwanankgo (Sal. 36:9). Wa xlakata Jesús wa kpadrenuestro pi Jehová kinTlatkan tiku wi «nkakgapun» (Mat. 6:9). Jehová lakgayawanit Jesús xlakaskinka taskujut nakamalakastakwani tiku nikgonita. Wa xlakata Jesús wa: «Kit talakastakwan, chu latamat» (Juan 6:40, 44; 11:25).

11. ¿Tuku xtalakaskin Dios xpalakata «lhuwa tachixkuwitat»?

11 Jesús na wa: «Kaxati kawa nti xtlawalh xtalakaskin Dios, wa yuma nkintala chu na wa nkintse» (Mar. 3:35). Xtalakaskin Jehová wa pi putum latamanin «nti xalanin xlikatlanka nkatuxawat, chu ni ntipalit xtachuwinkan nkgalhikgoy» kakakninanikgolh. Biblia wan pi putum latamanin wa «lu lhuwa tachixkuwitat, wa ntu ntini la xputlakgay». Xlakan kgalhinikgo takanajla talakgmaxtut chu kgalhakgaxmatputunkgo Dios. Nachuna malankikgo chu wankgo: «Wa mininiy  nkiDioskan akgaputaxtut wa nti wi klaktawilh kpumapakgsin, chu nKgalhnilu» (Rev. 7:9, 10).

12. ¿Tuku kinkamasiyaniyan padrenuestro xlakata xtalakaskin Jehová?

12 Kpadrenuestro lhuwa tuku kinkamasiyaniyan xlakata Jehová chu tuku natlawa xpalakata latamanin. Pulana, katsiniyaw pi lhuwa tuku kilitlawatkan xlakata na maxkiyaw kakni chu namasantujliyaw xtukuwani Dios (Is. 8:13). Talakgmaxtut tlawa pi tlan nalakgtaxtuyaw chu malanki xtukuwani Dios. Wa xlakata xtukuwani Jesús kilhchanima «Jehová Lakgmaxtuna». Xlipulaktiy, katsiyaw pi Jehová namaklakaskin xTamapakgsin xlakata latamanin tiku kgalhakgaxmatnankgoy tlan namakglhtinankgo tasikulunalin xpalakata talakgmaxtut. Xlipulaktutu, katsiniyaw pi niti la malakgachokgo pi kalalh xtalakaskin Jehová (Sal. 135:6; Is. 46:9, 10).

KAPAXTIKATSINIW TALAKGMAXTUT

13. ¿Tuku xlakata tamunuyaw?

13 Pulaktum nema lu xlakaskinka la nalimasiyayaw pi paxtikatsiniyaw talakgmaxtut, wa natamakamastaniyaw Jehová chu natamunuyaw. Chuna nalimasiyayaw pi kanajlaniyaw talakgmaxtut chu «tapakgsiniyaw Jehová» (Rom. 14:8). Na chuna akxni tamunuyaw waniyaw pi tlan «nakinkamapuwaniyan» (1 Ped. 3:21). Dios kinkakgalhtiyan akxni kinkamaxkiyan tasikulunalin xpalakata talakgmaxtut. Wa xlakata liwana katsiyaw pi nakinkamaxkiyan tuku malaknunit (Rom. 8:32).

¿La limasiyayaw pi paxtikatsiniyaw talakgmaxtut? (Kaʼakxilhti párrafo 13 chu 14).

14. ¿Tuku xlakata Dios kinkalimapakgsiyan pi kakapaxkiw amakgapitsin?

14 Jehová chuna tlawa xlakata xapaxkina. Xla lakaskin pi tiku kakninanikgo kalikatsikolh la xla, chu kalapaxkikgolh (1 Juan 4:8-11). Akxni kapaxkiyaw latamanin, limasiyayaw pi litaxtuputunaw xkamanan «[k]inTlatkan nti wi k’akgapun» (Mat. 5:43-48). Biblia, wan pi limapakgsin nema tlakg xlakaskinka wa napaxkiya Jehová. Pero xlipulaktiy tuku tlakg xlakaskinka, wa nakapaxkiyaw amakgapitsin (Mat. 22:37-40). Pulaktum la tlan nakalimasiyaniyaw pi kapaxkiyaw latamanin, wa akxni kalitachuwinanaw xalakwan tamakatsinin xla Tamapakgsin. Komo kgalhakgaxmataw Dios xlakata nakapaxkiyaw amakgapitsin pero akxni tlakg kapaxkiyaw kinatalankan, kintapaxkitkan nema kgalhiniyaw «na luwa [...]lakatanks[wa]» (1 Juan 4:12, 20).

 XLAKATA TALAKGMAXTUT MAKGLHTINANAW TASIKULUNALIN

15. 1) ¿Tuku xtasikulunalin Jehová makglhtinanaw la uku? 2) ¿Tuku tasikulunalin namakglhtinanaw kilhtamaku nema aku mima?

15 Jehová liwana kinkawaniyan pi xla tlan naxapa kintalakgalhinkan komo kanajlaniyaw talakgmaxtut. Uma wamputun pi xla putum kilhtamaku nakinkatapatiyan kintalakgalhinkan (kalikgalhtawakga Hechos 3:19-21). Talakgmaxtut tlawa pi Jehová nakamakgamakglhtinan la xkaman tiku kalaksakkanit (Rom. 8:15-17). Jehová na kawani kstalaninanin Cristo tiku litaxtukgo xa’amakgapitsi borregos nanamakgtapakgsikgo kxfamilia kKatiyatni. Akxni nialh katikgalhikgolh talakgalhin, natitaxtukgo xa’awatiya taputsan. Komo ni namakgxtakgkgo Jehová, xla na nakamakgamakglhtinan la xkamanan (Rom. 8:20, 21; Rev. 20:7-9). Jehová putum kilhtamaku kapaxki xkamanan. Xlakata talakgmaxtut, chuntiyaku namakglhtinanaw tasikulunalin putum kilhtamaku (Heb. 9:12). Jehová kinkamaxkinitan lu tlan tamaskiwin, chu ni la tiku nakinkamakglhtiyan.

16. ¿La kinkalakgmaxtuyan talakgmaxtut?

16 Komo ni’alh natlawayaw talakgalhin, Akgskgawini nila tuku katitlawalh xlakata ni namakgtapakgsiyaw kxfamilia Jehová. Jesús mastalh xlatamat «man makgtum». Uma wamputun pi ni’alh katitalakaskilh nataxokgopara uma talakgmaxtut (Heb. 9:24-26). Adán kinkamatitaxtinin linin, pero xtamakamastan Jesús nakinkamaxkiyan latamat nema ni kgalhi xlisputni. Talakgmaxtut tlan nakinkalakgmaxtuyan kxkakilhtamaku Satanás chu nialh napekuaniyaw linin (Heb. 2:14, 15).

17. ¿Tuku makgkatsiyaw akxni lilakpuwanaw la kinkapaxkiyan Jehová?

17 Liwana nalipawanaw pi xlikana tuku malaknunit Jehová. Limapakgsin xlakata tuku anan kakilhtamaku nikxni talakgpali, nachuna Jehová nikxni talakgpali. Nikxni kaj chuna nakinkamakgxtakgan (Mal. 3:6). Na chuna kinkamaxkiyan latamat, na kinkapaxkiyan. «Cha nchu nkin lakgapasnitaw, chu nkanajlanitaw xtapaxkit Dios wa ntu nkinkakgalhiniyan. Tapaxkit, wa Dios» (1 Juan 4:16). Xlakata Jehová makgantaxti tuku malaknu, Katiyatni lu stlan paraíso nawan. Putum latamanin nalikatsikgo la Jehová chu nalapaxki. Wa xlakata, putum xlakskujnin Dios k’akgapun chu kKatiyatni namalankikgo chu nawankgo: «Wa ntasikulunatlawan, chu litlanka, chu ntastakat, chu xlitamastat mpaxkatsinit, chu litliwakga wa mininiy nakgalhiy nkiDioskan nkaxani liwayaj xtiwaj. Amén» (Rev. 7:12).