Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Febrero kata 2017

Tuku katsiputunkgo tiku likgalhtawakgakgo

Tuku katsiputunkgo tiku likgalhtawakgakgo

Apóstol Pablo tsokgli pi Jehová ni katimastalh talakaskin nakalitsakgsakanatit tuku nila natayaniyatit (1 Cor. 10:13). ¿Wamputun uma pi Jehová pulana akxilha tuku tlan natayaniyaw, chu alistalh laksaka tuku nakinkalitsakgsakanan?

Komo chuna xwa la wan takgalhskinin, ¿la xkinkakitaxtunin? Ka’akxilhwi akgtum li’akxilhtit. Xkgawasa chatum tala akstu makgnika. Uma tala lu nitlan makgkatsilh. Tsukuka kgalhskinkan komo Jehová xkatsi tuku x’ama la chu komo xla xkatsi pi x’amakgolh tayanikgo xla chu xpuskat uma talakgaputsit. Lu nitlan, uma kakilhtamaku natitaxtuyaw lhuwa talakgaputsit. Pero ¿kililakpuwanatkan pi wa xkuenta Jehová tuku titaxtuyaw?

Komo nalakputsananiyaw tuku wan 1 Corintios 10:13, nakatsiniyaw pi anta kBiblia ni masiya pi Jehová pulana akxilha komo tlan natayaniyaw chu alistalh nalaksaka tuku nakinkalitsakgsayan. Ka’akxilhwi pulaktati tuku xlakata chuna wanaw.

Xapulana wa pi Jehová kamaxkilh latamanin xakstukan nalaksakkgo tuku natlawakgo. Xla lakaskin pi ki’akstukan nalaksakaw tuku lakaskinaw (Deut. 30:19, 20; Jos. 24:15). Komo nalaksakaw tuku lakgati Jehová, tlan nalipawanaw pi xla nakinkapulalinan (Prov. 16:9). Komo nitlan tuku nalaksakaw, alistalh nalipatinanaw (Gál. 6:7). Komo Jehová xlaksakli tuku nakinkalitsakgsakanan nema natayaniyaw, ¿xlikana kawa tlan xlaksakwi tuku xtlawaputuw?

Xlipulaktiy tuku xlakata wa pi Jehová ni kinkakuentajliyan «xlakata kilhtamaku chu tuku xalan lay» (Ecl. 9:11). Xalan tuku lakapala na’akgspulayan xlakata wila niku ni militawilat chu kilhtamaku nema ni xlilat. Makgtum Jesús lichuwinalh pi nikgolh kgalhakutsayan latamanin akxni kalaktamalh lanka chiki. Xla limasiyalh pi Dios ni wa chuna tlawalh xlakata nanikgo latamanin (Luc. 13:1-5). Ni xlilat nalakapastakaw pi Dios laksaka komo nalatamayaw o naniyaw akxni la tuku nitlan.

Xlipulaktutu chatunu akinin nalimasiyayaw pi ni namakgxtakgaw Jehová. Satanás wa pi skujnaniyaw Jehová kaj xlakata tuku kinkamaxkiyan. Wa pi ni lakatitum katitawilaw kxlakatin Jehová komo natitaxtuyaw ta’akglhuwit (Job 1:9-11; 2:4; Rev. 12:10). Komo Jehová nakinkakuentajtlawayan akxni titaxtuyaw ta’akglhuwit, nalitasiya pi xlikana tuku wan Satanás.

Xlipulaktati wa pi Jehová laksaka ni nakatsi tuku nakinka’akgspulayan kilhtamaku nema aku mima. Komo xla lakaskin, tlan nakatsi tuku nakinka’akgspulayan (Is. 46:10). Biblia wan pi Jehová ni katsiputun tuku nala tu mimacha kilhtamaku (Gén. 18:20, 21; 22:12). ¿Tuku xlakata? Xlakata xapaxkina, xa’akgstitum chu maxki kakni pi kiakstukan nalaksakaw tuku natlawaputunaw (Deut. 32:4; 2 Cor. 3:17).

Wa xlakata ¿tuku xwamputun Pablo akxni wa pi Jehová ni katimastalh talakaskin nakalitsakgsakanatit tuku nila natayaniyatit? Tuku wa Pablo wamputun la Jehová kinkamakgtayayan akxni titaxtumaw ta’akglhuwit, ni wa la akxni nina kinkalakgchinan * (ka’akxilhti nota). Komo nalipawanaw Jehová, nakinkamakgtayayan kaxatukawa ta’akglhuwit tuku natitaxtuyaw (Sal. 55:22). Ka’akxilhwi a pulaktiy tuku xlakata Pablo wa pi Dios ni katimastalh talakaskin nakinkalitsakgsakanan tuku nila natayaniyaw.

Wa tuku xlakata Pablo chuna wa pi tukuya ta’akglhuwit natitaxtuyaw «tuku na titaxtukgonit latamanin». Wamputun pi ta’akglhuwit xtatakgatsin latamat unu kxkakilhtamaku Satanás. Kimputumkan max tuwa tuku natitaxtuyaw o asta max wi tuku namakgatsankgayaw. Pero komo nalipawanaw Jehová tlan natayaniyaw taputsan chu nikxni katimakgxtakgwi (1 Ped. 5:8, 9). Versículos nema  pulana lichuwinan 1 Corintios 10:13, lichuwinan taputsastalanika nema titaxtukgolh israelitas kxakaskakni tiyat (1 Cor. 10:6-11). Israelitas lipawankgolh Jehová, tlan tayanikgolh taputsan. Pero wa tiku ni lipawankgolh kgalhakgaxmatmakgankgolh chu makgxtakgkgolh Jehová.

Xlipulaktiy tuku xlakata wa Pablo uma tachuwin wa pi «Dios nikxni makgxtakgnan». ¿Tuku wamputun uma? Komo nalilakpuwanaw la Jehová kakuentajtlawa xlakskujnin na akxilhaw pi xla ni kamakgxtakga «tiku paxkikgoy» chu «tlawakgoy xlimapakgsin» (Deut. 7:9). Nachuna Jehová ankgalhin makgantaxti tuku malaknu (Jos. 23:14). Wa xlakata tlan nalipawanaw uma tuku Jehová kinkawaniyan. Pulana, Jehová ni masta talakaskin pi akgtum taputsan tuwa namakgkatsiyaw. Chu xlipulaktiy xla «nakinkamakgtayayan».

Jehová «wa nti nkinkamakgtsiyajan lantla xlipaks kkintalakgaputsitkan».

¿La «nakinkamakgtayayan» Jehová komo nalipawanaw? Xlikana, xla tlan nakinkamapanuniyan taputsan. Pero Pablo wa pi Jehová tlan «nakinkamakgtayayan» xlakata tlan natayaniyaw. Uma kinkamasiyaniyan pi Jehová nakinkamakgtayayan akxni kinkamaxkiyan litliwakga xlakata ni namakgxtakgaw. Xla pulaklhuwa la nakinkamakgtayayan. Ka’akxilhwi makgapitsi.

  • Jehová «wa nti nkinkamakgtsiyajan lantla xlipaks kkintalakgaputsitkan», uma wamputun, akxni kgalhiyaw ta’akglhuwit (2 Cor. 1:3, 4). Tlan nakamamakgkatsini xtalakapastaknikan chu xnakujkan, xpalakata Biblia espíritu santo chu skujni xatalipaw (Mat. 24:45; Juan 14:16, nota; Rom. 15:4).

  • Jehová kinkalipulalinan chu limaklakaskin x’espíritu santo (Juan 14:26). X’espíritu santo Jehová nakinkamakgtayayan nalakapastakaw tuku lanit makgasata chu limapakgsin nema wi kBiblia tlan nakinkamakgtayayan akxni wi tuku nalaksakaw.

  • Jehová tlan nakalimaklakaskin x’ángeles xlakata nakinkamakgtayayan (Heb. 1:14).

  • Jehová kamaklakaskin natalan xlakata nakinkamakgtayakgoyan. Tlan nakinkamatliwakglhan akxni wi tuku natlawakgo kimpalakatakan chu nakinkalimakgpuwantinikgoyan xtachuwinkan (Col. 4:11).

¿Tuku katsiniyaw xlakata xtachuwin Pablo nema wi 1 Corintios 10:13? Pi Jehová ni wa laksaka taputsan nema natitaxtuyaw. Na katsiniyaw pi komo nalipawanaw tlan natayaniyaw katuwa ta’akglhuwit nema natitaxtuyaw. Jehová ankgalhin nakinkamakgtayayan xlakata ni namakgxtakgaw.

^ párr. 7 Ktachuwin xagriego, tamatitaxti atanu tachuwin la «taputsan» nachuna wamputun «naputsananikana» o «akxni tuwa tuku titaxtukan».