Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Febrero kata 2016

Nachuna ni kamakgxtakgwi Dios chuna la tlawakgolh xapulana kskujnin

Nachuna ni kamakgxtakgwi Dios chuna la tlawakgolh xapulana kskujnin

«¿Chu tuku skiniman Jehová natlawaya? ¡Kajwatiya katlawa tuku xaʼakgstitum, xlakaskinka kaʼakxilhti ni namakgatsankgananiya, chu nataktujuniya la napulalinan miDios!» (MIQ. 6:8)

TAKILHTLIN: 18, 43

1, 2. ¿La limasiyalh David pi ni xmakgxtakga Jehová? (Kaʼakxilhti xapulana dibujo).

DAVID chu ksoldados xwilakgolh kxdesierto Judá. Xtatsekgkgonit xlakata xkatsikgo pi Saúl chu 3,000 soldados xputsamakgolh David xlakata namakgnikgo. Akgtum tsisni, David chu ksoldados tekgskgolh niku Saúl chu ksoldados klhtatamakgolh. David chu chatum ksoldado xwanikan Abisai tsekg chankgolh niku klhtatama Saúl. Abisai wanilh David pi xmaxkilh talakaskin namakgni Saúl. Pero David ni maxkilh talakaskin chu wanilh: «¿Tiku tlawaninit tuku nitlan xtalaksakni Jehová chu ni malakgaxokgekanit?». Chu alistalh na wanilh: «¡Xlakata kmaxki kakni Jehová, nipara tsinu kililakpuwanat naktlawani tuku nitlan tiku laksaknit Jehová!» (1 Sam. 26:8-12).

2 David xkatsi pi Saúl xmapakgsina Israel xwanit chu wa Jehová  tiku xlaksaknit. Liwana xkatsi pi komo xlimasiyaniputun Jehová pi ni xmakgxtakga, xlimaxkit xwanit kakni Saúl. Wa xlakata nipara tsinu lakpuwan natlawani tuku nitlan. La uku, Jehová lakaskin namaxkiyaw kakni chu tiku kamaxkinit limapakgsin (kalikgalhtawakga Miqueas 6:8).

3. ¿La limasiyalh Abisai pi ni xmakgxtakga David?

3 Abisai xmaxki kakni David, xkatsi pi Jehová xlaksaknit xlakata mapakgsina xlitaxtulh. Pero akxni mapakgsina litaxtulh, tlawalh makgapitsi talakgalhin nema lu nitlan. Tatlawalh talakgxtumit xalimaxana xpuskat atanu chixku. Chu alistalh limapakgsilh chatum xgeneral tiku xwanikan Joab pi xlakkaxwililh pi xmakgnika xchixku ama puskat kʼguerra (2 Sam. 11:2-4, 14, 15; 1 Crón. 2:16). Joab xtala xwanit Abisai. Max Abisai katsilh tuku xtlawanit David. Nachuna, xlakata Abisai lhuwa soldados xkapulalin, tlan xlimaklakaskilh limapakgsin nema xkgalhi xlakata mapakgsina xlitaxtuputulh. Pero nikxni chuna tlawalh. Wata, putum kilhtamaku maxkilh kakni David, skujnanilh chu kuentajtlawalh xlakata nitu xtlawanikgolh xtalamakgasitsin (2 Sam. 10:10; 20:6; 21:15-17).

4. 1) ¿Tuku xlakata tlan wanaw pi David nikxni makgxtakgli Jehová kxlatamat? 2) ¿Tuku naʼakxilhaw kʼuma artículo?

4 David nikxni makgxtakgli Jehová kxlatamat. Akxni kgawasaku xwanit, makgnilh Goliat xlakata xlikgalhkgamanama Jehová chu xkachikin (1 Sam. 17:23, 26, 48-51). Akxni mapakgsina xwanit Jehová malakgachalh palakachuwina Natán xlakata xwanilh pi nitlan tuku nitlan xtlawanit. David makgamakglhtinalh tastakyaw chu skilh pi xtapatika (2 Sam. 12:1-5, 13). Chu akxni kgolota xwanit, lhuwa tuku mastalh nema xkgalhi xtapalh xlakata xtlawaka xtemplo Jehová (1 Crón. 29:1-5). Chuna la akxilhaw, David tlawalh talakgalhin kxlatamat, pero nikxni makgxtakgli Dios (Sal. 51:4, 10; 86:2). Kʼuma artículo naʼakxilhaw xliʼakxilhtit David chu amakgapitsin latamanin xala kxkilhtamaku. Naʼakxilhaw la nalimasiyayaw pi ni makgxtakgaw Jehová ni xawa atanu lataman. Chu na naʼakxilhaw tuku tayat nakinkamakgtayayan xlakata ni namakgxtakgaw Dios.

¿TIKU NI NAMAKGXTAKGAW?

5. ¿Tuku kinkamasiyaniyan tuku nitlan xʼama tlawa Abisai?

5 Akxni Abisai xmakgniputun Saúl, xlimasiyama pi ni xmakgxtakga David. Pero ni xʼakgatekgsa pi komo xtlawanilh tuku nitlan «xtalaksakni Jehová», ni xlimasiyalh pi xtataya Jehová. David xʼakgatekgsa uma, wa xlakata ni mastalh talakaskin pi Abisai xmakgnilh Saúl (1 Sam. 26:8-11). ¿Tuku kinkamasiyaniyan tuku nitlan xʼama tlawa Abisai? Akxni ni liwana katsiyaw tiku ni namakgxtakgaw, kililakapastakatkan tuku tastakyaw masta Biblia nema nakinkamakgtayayan.

Tlakg xlakaskinka ni namakgxtakgaw Dios ni xawa atanu lataman

6. Maski ni kamakgxtakgaw kifamiliajkan chu kiʼamigoskan, ¿tuku xlakata kuenta kilitlawatkan?

6 Xlikana pi ni kamakgxtakgaw tiku kapaxkiyaw, la kifamiliajkan chu kiʼamigoskan. Pero kuenta kilitlawatkan, xlakata makglakgalhinanin akinin chu tuku makgkatsiyaw max nakinkamatlawiyan tuku nitlan chu uma natlawa pi namakgxtakgaw Dios (Jer. 17:9). Wa xlakata  komo chatum xalak kifamiliajkan o kiʼamigojkan wi tuku nitlan natlawa chu namakgxtakga Jehová, kalakapastakwi pi tlakg xlakaskinka ni namakgxtakgaw Dios ni xawa atanu lataman (kalikgalhtawakga Mateo 22:37).

7. ¿La limasiyalh chatum tala pi ni xmakgxtakga Jehová maski tuwa tuku titaxtulh?

7 Akxni tamakxtukan kcongregación chatum xalak kifamilajkan, kililakpuwanatkan komo ni katimakgxtakgwi Jehová. Kaʼakxilhwi tuku lanilh chatum tala wanikan Anne [1] (kaʼakxilhti nota niku kgalhsputa artículo). Akgtum kilhtamaku, xtse tachuwinalh kteléfono, tiku xtamakxtukanit kcongregación. Tachuwinalh xlakata xkgalhskilh komo tlan xlakgapaxialhnalh kxchik. Wanilh pi lu nitlan xmakgkatsi xlakata niti xlakgapaxialhnan tiku xalak xfamilia. Anne nitlan limakgkatsilh chu wanilh pi xʼama malakgachani maktum carta niku xmaxkilh xtakgalhtin. Pero akxni nina xtsokga carta, Anne liwana lakpuwa makgapitsi textos xalak Biblia (1 Cor. 5:11; 2 Juan 9-11). Anne, ni xatasitsin wanilh xtse pi wa xmakgxtakgnit xfamilia akxni tlawalh talakgalhin chu ni makgxtakgli tuku nitlan. Alistalh wanilh pi komo xlakaskin xatapaxuwan natawilapara xtalakaskin xlakgtaspitpa Jehová (Sant. 4:8).

8. ¿Tuku tayat tlan nakinkamakgtayayan xlakata ni namakgxtakgaw Jehová?

8 Makgapitsi kskujnin Dios kxkilhtamaku David limasiyakgolh pi ni xmakgxtakgnankgo xlakata xtataktujukgo, tlan xlikatsikgo chu ni xpekuankgo. Kaʼakxilhwi la nakinkamakgtayayan umakgolh pulaktutu tayat xlakata ni namakgxtakgaw Jehová.

KOMO NI MAKGXTAKGNAMPUTUNAW, KALIMASIYAW TATAKTUJUN

9. ¿Tuku xlakata Abner xmakgniputun David?

9 Jonatán xkgawasa xwanit mapakgsina Saúl. Chu Abner wa xpulalin ksoldados Saúl. Jonatán chu Abner akxilhkgolh akxni David linilh Saúl xʼakgxakga Goliat. Jonatán xʼamigo litaxtulh David chu nikxni makgxtakgli (1 Sam. 17:57–18:3). Pero Abner ni chuna limasiyalh. Asta makgtayalh Saúl akxni xputsastalanima David xlakata xmakgnilh (1 Sam. 26:1-5; Sal. 54:3). Jonatán chu Abner xkatsikgo pi Dios xlaksaknit David xlakata mapakgsina xwa kʼIsrael. Pero akxni xninita Saúl, Abner ni tatayalh David xlakata mapakgsina xlitaxtulh, wata makgtayalh atanu xkgawasa Saúl.  Asta max Abner mapakgsina xlitaxtuputun. Max wa xlakata tatlawalh talakgxtumit xalimaxana chatum xpuskat mapakgsina Saúl (2 Sam. 3:6-11). ¿Tuku xlakata Jonatán xʼamigo litaxtulh David, pero Abner xmakgniputun? Xlakata Jonatán ni lanka xmakgkatsikan chu ni xmakgxtakga Jehová, pero Abner ni xʼamigo xwanit.

10. ¿Tuku xlakata Absalón ni tatayalh Jehová?

10 Absalón xkgawasa xwanit mapakgsina David. Lanka xmakgkatsikan, wa xlakata makgxtakgli Jehová. Maski Absalón xkatsi pi wa Jehová mapakgsina xtlawanit xtlat, mapakgsina xlitaxtuputun. Wa xlakata «Akxni chuna xlanit, Absalón kgalhilh carro chu lhuwa kawayu chu tipuxamakaw lakchixkuwin tiku xkgosnankgo kxlakatin» (2 Sam. 15:1). Nachuna, tlawalh pi lhuwa Israelitas xtatayakgolh. Asta makgniputulh xtlat (2 Sam. 15:13, 14; 17:1-4).

11. ¿Tuku kinkamasiyaniyan xliʼakxilhtitkan Abner, Absalón chu Baruc?

11 Xliʼakxilhtitkan Abner chu Absalón kinkamasiyanikgoyan pi komo ni tataktujuyaw chu lanka litaxtuputunaw chu kgalhiputunaw limapakgsin, lu tuwa namakgkatsiyaw ni namakgxtakgaw Dios. Pero komo paxkiyaw Jehová, ni akstu kakintikapaxkikan la Abner chu Absalón. Na kuentajkilitlawatkan ni lhuwa nakgalhiputunaw tumin, talhman nakgalhtawakgayaw chu akgtum taskujut nema nakinkamamakgkatsiniyan pi xlakaskinka litaxtuyaw. Uma natlawa pi nialh tlan natalalinaw Jehová. Kalakpuwaw tuku akgspulalh Baruc, ksecretario palakachuwina Jeremías. Milh kilhtamaku tsukulh lilakpuwan nakgalhiputun tuku ni xkgalhi, wa xlakata nialh xlipaxuwa maski kskujnanima Dios. Wa xlakata Jehová wanilh: «Tuku ktlawanit klaktilhma, chu tuku kchanit kpulhukxtuma, putum kpaís chuna ktlawama. Pero wix, lhuwa tuku putsapat kaj mimpalakata. Nialh kaputsa uma» (Jer. 45:4, 5). Baruc taktujulh chu kgaxmatli xtastakyaw Jehová. Akinin na kilikgaxmatatkan xtastakyaw, xlakata lu nialh makgas tsankga xlakata namasputu uma xalixkajni kakilhtamaku.

Komo nawaniyaw chatum tala pi kaskilh tamakgtay, limasiyaniyaw tapaxkit chu pi ni makgxtakgaw Jehová

12. Kawanti tuku xlakata akxni akstu kinkapaxkikanan makgxtakgaw Dios, kawili akgtum liʼakxilhtit.

12 Anta kMéxico, chatum tala tiku wanikan Daniel laksakli tiku ni xʼama makgxtakga. Lu xlakgati chatum tsumat tiku ni xtatayana Jehová chu xtatamakgaxtokgputun.  Xla wan: «Putum kilhtamaku xaktsokgni maski precursor xaklitaxtu». Pero liwana katsilh pi xmakgxtakgma Jehová. Akxilhli pi xakstu xpaxkikan chu xtalakaskin natataktuju. Wa xlakata skinilh tamakgtay chatum kgolotsin tiku lhuwa tuku xtitaxtunit kxlatamat. Daniel wan: «Tala kimakgtayalh nakʼakgatekgsa pi xlakata ni nakmakgxtakga Dios nialh xaktsokgnanilh uma tsumat. Akxni lhuwata xaktasanit chu xaktlawanit oración, kmatlanilh. Ni makgas kilhtamaku titaxtulh ktsukulh tlakg klipaxuwa naklichuwinan Dios». La uku, Daniel superintendente xla circuito chu tamakgaxtokga chatum tala tiku paxki Jehová.

KOMO NI MAKGXTAKGNAMPUTUNAW, KALIMASIYAW PI TLAN LIKATSIYAW

Komo nakatsiyaw pi chatum amigo tlawanit tuku nitlan, kilitachuwinatkan chu liwana nakatsiyaw pi namaxkikgo tamakgtay lakgkgolotsin. (Kaʼakxilhti párrafo 14).

13. ¿La tlawalh Natán ni namakgxtakga Jehová chu David?

13 Komo ni makgxtakgaw Jehová, na ni katikamakgxtakgwi amakgapitsin chu nakamakgtayayaw. Kaʼakxilhwi xliʼakxilhtit Natán. Akxni mapakgsina David tatalakgxtumilh xpuskat atanu chixku chu alistalh tlawalh pi xmakgnika, Jehová malakgachalh Natán xlakata namaxki palha tastakyaw David. Palakachuwina Natán ni makgxtakgli Jehová chu David. ¿La tlawalh? Ni makgxtakgli Jehová xlakata ni pekualh chu kgalhakgaxmatli. Na ni makgxtakgli David xlakata tlan likatsinilh akxni stakyawalh. Xlakata tlan xmakgtayalh xʼakgatekgsli tuku lu nitlan xtlawanit, litachuwinalh akgtum liʼakxilhtit. Wanilh pi chatum xkgalhina tumin makgkgalhalh xborrega chatum limaxkgen nema manwa tantum xkgalhi. Akxni David kgaxmatli tuku xlanit, lu sitsilh xlakata tuku xtlawanit uma chixku tiku xkgalhi tumin. Pero, Natán wanilh: «¡Wix ama chixku!». Chuna David katsilh pi xmakglakgalhinaninit Jehová (2 Sam. 12:1-7, 13).

14. ¿La ni namakgxtakgaw Jehová chu kifamiliajkan chu kiʼamigoskan?

14 Komo nalimasiyayaw pi tlan likatsiyaw na nakinkamakgtayayan ni namakgxtakgaw Jehová chu amakgapitsin. Akgtum liʼakxilhtit, kalilakpuwanti pi kgalhiya tuku nalimasiyaya pi chatum tala tlawanit tuku lu nitlan. Max ni makgxtakgputuna, xlakata max xalak mi familia o miʼamigo. Pero wix katsiya pi tlakg xlakaskinka ni namakgxtakgkan Jehová. ¿Tuku tlan natlawaya? Nachuna katlawa la Natán. Kakgalhakgaxpatti Jehová chu kalimasiyani tapaxkit mintala. Kawani pi tunkun kakaskinilh tamakgtay lakgkgolotsin xalak congregación. Komo ni nakatachuwinan, wix nakatachuwinana. Nalimasiyaya pi ni makgxtakga Jehová. Komo chuna natlawaya nalimasiyaniya pi tlan likatsiniya mintala, xlakata lakgkgolotsin nalimasiyanikgo tapaxkit akxni namakgtayakgo chu tlan natalalimpara Jehová (kalikgalhtawakga Levítico 5:1 chu Gálatas 6:1).

KOMO NI MAKGXTAKGNAMPUTUNAW, KALIMASIYAW PI NI PEKUANAW

15, 16. ¿Tuku xlakata talakaskilh pi ni xpekualh Husai xlakata xlimasiyalh pi ni xmakgxtakga Jehová?

15 Chatum amigo nema xkgalhi David chu ni xmakgxtakga xwanikan Husai. Xlakata ni xmakgxtakgli Jehová chu David talakaskilh ni xpekualh. ¿Tuku xlakata? Xlakata israelitas mapakgsina xtlawaputunkgo xkgawasa  David tiku xwanikan Absalón. Husai xkatsi pi Absalón xliminkgonit ksoldados kJerusalén chu David xtsalanit (2 Sam. 15:13; 16:15). ¿Tuku tlawalh Husai? ¿Makgxtakgli David chu wa tatayalh Absalón? Ni. Maski kgolota xwanit David chu lhuwa tiku xmakgniputunkgo, Husai ni xmakgxtakgputun David xlakata xkatsi pi wa Jehová tiku xlaksaknit. Wa xlakata alh putsa David ksipi xla Olivos (2 Sam. 15:30, 32).

16 David wanilh Husai pi xtaspitli kJerusalén chu wanilh pi xmalakpuwanilh Absalón pi xʼamigo xlitaxtunit. Xtalakaskin pi Absalon wa xkgaxmatnilh xtastakyaw Husai chu ni wa xtastakyaw Ahitofel. Talakaskilh ni napekuan Husai xlakata nakgalhakgaxmata David chu ni namakgxtakga Jehová. ¿Tuku xlakata? Xlakata komo xtlawalh tuku kskinima David kalipekua xwililh xlatamat. David tasaskinilh Jehová pi xmakgtayalh Husai. Jehová makgtayalh. Absalón kgaxmatnilh xtastakyaw Husai chu ni wa xtastakyaw Ahitofel (2 Sam. 15:31; 17:14).

17. ¿Tuku xlakata lakaskinaw litliwakga xlakata ni namakgxtakgaw Jehová?

17 Akinin na lakaskinaw ni napekuanaw xlakata ni namakgxtakgaw Jehová. ¿Tuku xlakata? Max namin kilhtamaku kifamiliajkan, tiku kataskujaw o kskujnin mapakgsinanin nakinkawanikgoyan pi natlawayaw tuku Jehová ni lakgati. Kalichuwinaw xliʼakxilhtit Taro, chatum xtatayana Jehová xalak Japón. Akxni aktsujku xwanit, putum kilhtamaku liskujli xlakata nakamakgapaxuwa xnatlatni. Xkakgalhakgaxmata xlakata xkapaxki, ni xafuerza chuna xtlawa. Pero akxni xtatayananin Jehová tsukukgolh limakgalhtawakgekgo Biblia, xnatlatni wanikgolh pi nilha xkgalhtawakgalh. Xla lu lilipuwa. Maski tuwa makgkatsilh, kawanilh pi xla xlakpuwanit naʼan ktamakxtumit. Taro wan: «Lu sitsikgolh, lhuwa kata titaxtulh xlakata xkimaxkikgolh talakaskin naklakgapaxialhnankgo. Kskinilh Jehová litliwakga xlakata ni xaklakgpalilh kintapuwan. La uku tlakg tlan kilikatsinikgo, chu makglhuwa kkalakgapaxialhnan» (kalikgalhtawakga Proverbios 29:25).

18. ¿Tuku katsini kʼuma artículo?

18 Komo natlawayaw la tlawakgolh David, Jonatán, Natán chu Husai, nakatsiyaw la tamakgkatsi xlakata ni makgxtakgkan Jehová. Nikxni kamakgxtakgnaw, la Abner chu Absalón. Xlikana pi makglakgalhinanin akinin chu tlawayaw tuku nitlan. Pero tlan nalimasiyayaw pi lu xlakaskinka akxilhaw ni namakgxtakgaw Jehová.

^ [1] (párrafo 7): Kʼuma artículo kalakgpalikanit makgapitsi tukuwani.