Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Febrero kata 2016

Ni kamakgxtakgwi Jehová

Ni kamakgxtakgwi Jehová

«Akxtum kakinkatatawilan Jehová la wix chu akit chu kilakkamanan chu milakkamanan putum kilhtamaku» (1 SAM. 20:42).

TAKILHTLIN: 139, 31

1, 2. ¿Tuku xlakata kaks malakawaninan pi Jonatán lu tlan xʼamigo David litaxtulh chu ni makgxtakgli?

JONATÁN max lu kaks lilakawa xlakata ni xpekuan David. Aku xmakgninit lanka chixku Goliat chu xlininit xʼakgxakga kxlakatin Saúl, tiku mapakgsina xwanit kʼIsrael chu xtlat Jonatán (1 Sam. 17:57). Jonatán liwana xkatsi pi Dios xmakgtaya David. Ama kilhtamaku Jonatán chu David lu tlan amigos litaxtukgolh. Lawanikgolh pi putum kilhtamaku nikxni xʼamakgolh lamakgxtakgkgo (1 Sam. 18:1-3). Chu chuna lalh.

2 Kaks malakawaninan pi Jonatán lu tlan xʼamigo tlawalh David chu nikxni makgxtakgli. ¿Tuku xlakata? Xlakata Jonatán xkgawasa xwanit mapakgsina Saúl. Wamputun pi Jonatán wa xʼama tawila la mapakgsina. Pero Jehová xlaksaknita David xlakata wa mapakgsina nawan chu ni wa Jonatán. Maski chuna, Jonatán ni makgxtakgli David. Akxni Saúl xputsama David xlakata namakgni, Jonatán lu xlilakgaputsama xʼamigo. Xlakata xkatsi pi David xwi kdesierto kʼHores, Jonatán lakgalh chu matliwakglhi chuntiya nalipawan Jehová. Wanilh: «Ni kapekuanti;  xlakata Saúl kintlat ni katitekgsni, wix mapakgsina nawana kʼIsrael, chu akit xlichatiy nakwan kmilakatin» (1 Sam. 23:16, 17).

3. 1) ¿Tuku tlakg xlakaskinka xʼakxilha Jonatán? 2) ¿La likatsiyaw pi Jonatán tlakg xlakaskinka xʼakxilha ni namakgxtakga Dios? (Kaʼakxilhti xapulana dibujo).

3 Kimputumkan tlan kaʼakxilhaw latamanin tiku ni makgxtakgnankgo. Pero ¿lakgatiyaw xliʼakxilhtit Jonatán kaj xlakata ni xmakgxtakga David? Ni. Tlan akxilhaw xlakata tlakg xlakaskinka xʼakxilha ni namakgxtakga Dios. Wa xlakata nikxni makgxtakgli David chu ni lisitsinilh. Asta Jonatán makgtayalh xlakata xlipawa Jehová. Xchatiykan ni lamakgxtakgkgolh chu na ni makgxtakgkgolh Jehová. Makgantaxtikgolh tuku xlawanikgonit: «Akxtum kakinkatatawilan Jehová la wix chu akit chu kilakkamanan chu milakkamanan putum kilhtamaku» (1 Sam. 20:42).

4. 1) ¿Tuku kinkamakgapaxuwayan? 2) ¿Tuku nalichuwinanaw kʼuma artículo?

4 Akinin na ni nakamakgxtakgaw kifamiliajkan, kiʼamigoskan chu kinatalankan xalak congregación (1 Tes. 2:10, 11). Pero tlakg xlakaskinka ni namakgxtakgaw Jehová, xlakata wa kinkamalakatsukin (Apocalipsis [Revelación] 4:11). Akxni ni makgxtakgaw Dios kinkamakgapaxuwayan chu tlakg tlan nalimakgkatsiyaw kilatamatkan. Pero katsiyaw pi ni kilimakgxtakgatkan Jehová, maski akxni titaxtuyaw tuku tuwa kkilatamatkan. Kʼuma artículo pulaktati naʼakxilhaw la kinkamakgtayayan xliʼakxilhtit Jonatán xlakata nikxni namakgxtakgaw Dios. Pulana, akxni wi tiku tlakg kgalhi limapakgsin nalakpuwanaw pi ni lakgchan namaxkiyaw kakni. Xlipulaktiy, akxni nalaksakaw tiku ni namakgxtakgaw. Xlipulaktutu, akxni chatum tala tiku tlakg kgalhi limapakgsin nitlan nakinkalikatsiniyan. Chu xlipulaktati, akxni tuwa makgkatsiyaw namakgantaxtiyaw tuku wanaw.

AKXNI WI TIKU TLAKG KGALHI LIMAPAKGSIN NALAKPUWANAW PI NI LAKGCHAN NAMAXKIYAW KAKNI

5. ¿Tuku xlakata israelitas tuwa xmakgkatsikgo ni namakgxtakgkgo Jehová akxni xmapakgsinama Saúl?

5 Jonatán chu amakgapitsi israelitas lu tuwa tuku xtitaxtumakgolh. Xtlat Jonatán nialh xkgalhakgaxmatnanan, wa xlakata Jehová wa pi nialh mapakgsina xlitaxtulh kʼIsrael (1 Sam. 15:17-23). Pero Jehová mastalh talakaskin pi Saúl chuntiya xmapakgsinalh kʼIsrael akglhuwa kata. Pero Saúl xwi «kxpumapakgsin Jehová» chu lu nitlan tuku xtlawama chu israelitas tuwa xmakgkatsikgo ni namakgxtakgkgo Jehová (1 Crón. 29:23).

6. ¿La likatsiyaw pi Jonatán ni makgxtakgli Jehová?

6 Jonatán nikxni makgxtakgli Jehová. ¿La likatsiyaw? Xlakata tuku tlawalh akxni Saúl nina makgas xtsukunit kgalhakgaxmatmakgan Dios (1 Sam. 13:13, 14). Ama kilhtamaku, lhuwa soldados tiku xkgalhikgo 30,000 carros xla guerra xʼamakgolh talachipakgo Israel. Soldados israelitas kaj 600 soldados xkgalhikgo. Chu kaj watiya mapakgsina Saúl chu Jonatán xkgalhikgo tuku xlitlawakan guerra. Pero Jonatán ni xpekuan. Xlakapastaka tuku xwanit palakachuwina Samuel: «Kaj xlakata xalanka xtukuwani, Jehová ni katimakgxtakgli xkachikin» (1 Sam. 12:22). Jonatán wanilh chatum soldado: «Max Jehová nakinkamakgtayayan, xlakata nitu tuku litalakgachokgo nakalakgmaxtu  lhuwa o ni lhuwa». Chu xchatiykan ankgolh chu kamakgnikgolh max kgalhapuxam soldados tiku xtalamakgasitsinkan. Liwana tasiya pi Jonatán xkgalhini takanajla Jehová. Chu Dios sikulunatlawalh xlakata xkgalhi takanajla. Xla tlawalh pi xtachikilh tiyat, chu xtalamakgasitsin lu pekuankgolh, uma tlawalh pi xakstukan xlamakgnikgolh. Chuna Israelitas tlajanankgolh (1 Sam. 13:5, 15, 22; 14:1, 2, 6, 14, 15, 20).

7. ¿La likatsinilh Jonatán xtlat?

7 Maski mapakgsina Saúl chuntiya ni xkgalhakgaxmata Jehová, Jonatán chuntiya kgalhakgaxmatli xtlat akxni xmatlani. Akgtum liʼakxilhtit, taʼalh kʼguerra xtlat xlakata xmakgtayakgolh xkachikin Jehová (1 Sam. 31:1, 2).

8, 9. ¿Tuku xlakata nakamaxkiyaw kakni tiku tlakg kgalhikgo limapakgsin kimpalakatakan?

8 ¿La tlan nachuna natlawayaw la Jonatán chu ni namakgxtakgaw Dios? Nakgalhakgaxmataw mapakgsina komo ni lakatsala tuku kinkawaniyan Jehová. Jehová masta talakaskin pi «mapakgsinanin» kakinkamapakgsikgon chu lakaskin pi kakamaxkiw kakni (kalikgalhtawakga Romanos 13:1, 2). Wa xlakata kamaxkiyaw kakni putum kskujnin mapakgsinanin, asta maski ni akgstitum skuja chu nalakpuwanaw pi ni xlilat namaxkiyaw kakni. Nachuna, Jehová na lakaskin pi nakamaxkiyaw kakni putum latamanin tiku kamaxkikanit limapakgsin anta kfamilia chu kcongregación (1 Cor. 11:3; Heb. 13:17).

Pulaktu la tlan ni namakgxtakgaw Jehová wa namaxkiyaw kakni tiku tamakgaxtokgaw, maski ni xtatayana Jehová. (Kaʼakxilhti párrafo 9).

 9 Kaʼakxilhwi la chatum tala xalak Sudamérica wanikan Olga limasiyalh pi ni xmakgxtakga Jehová [1] (kaʼakxilhti nota niku kgalhsputa artículo). Xchixku lu nitlan xlikatsini. Xmin kilhtamaku ni xtachuwinan o xwani laklixkajni tachuwin xlakata xtatayana Jehová xwanit. Milh kilhtamaku wanilh pi xʼama makgxtakga chu xkalilh xkamanan. Pero xla chuntiya maxkilh kakni chu na ni tlawanilh «tuku nitlan». Wata liskujli xlakata tlan puskat nalitaxtu. Xtlawani xliwat, xchakgeni klhakgat chu xkakuentajtlawa putum xfamilia (Rom. 12:17). Chu akxni xmatlani, xtaʼan akxni xkalakgapaxialhnan xfamilia chu xʼamigos. Akgtum liʼakxilhtit, akxni xputiatlat o xpuwiti Olga nilh kʼatanu kachikin, putum lakkaxwililh tuku xtamaklakaskilh, xlakata naʼankgo. Xlakata linka kʼakgtum pusikulan, kgalhkgalhilh kkilhtin asta akxni taxtulh xchixku. Lhuwa kata titaxtulh xchixku tlakg tlan tsukulh likatsini. Tlakg tlan likatsinilh xlakata putum kilhtamaku ni lakapala sitsilh chu maxkilh kakni. La uku wani pi putum kilhtamaku naʼan kxtamakxtumit chu lin kpukgalhtawakga xla xtatayananin Jehová. Asta min kilhtamaku tatamakgxtakga Olga ktamakxtumit (1 Ped. 3:1).

AKXNI NALAKSAKAW TIKU NATATAYAYAW

10. ¿Tuku makgtayalh Jonatán xlakata xkatsilh tiku natataya?

10 Akxni Saúl wa pi xlakpuwama namakgni David, Jonatán laksakli tiku natataya, xtlat o David. Lu tuwa xwanit, xlakata xchatiykan ni xkamakgxtakgputun. ¿Tuku makgtayalh xlakata nakatsi tiku natataya? Xkatsi pi Dios xmakgtayama David, chu ni xmakgtayama Saúl. Wa xlakata lakpuwa natataya David. Pulana makatsinilh David xlakata xtatsekgli chu alistalh wanilh Saúl pi ni xmakgnilh David (kalikgalhtawakga 1 Samuel 19:1-6).

11, 12. Komo paxkiyaw Dios, ¿tuku natlawayaw?

11 Komo paxkiyaw Dios, wa tlakg natatayayaw nixawa atanu lataman, maski kifamiliajkan. Kaʼakxilhwi xliʼakxilhtit chatum tala puskat xalak Australia tiku wanikan Alice. Xla laksakli tiku xtatayalh. Akxni xkatsinima xlakata Biblia, xkalitachuwinan xfamilia tuku xkatsinima. Akgtum kilhtamaku kawanilh pi nialh xʼama tlawa Navidad chu kawanilh tuku xlakata. Xapulana nitlan limakgkatsikgolh tuku kawanilh. Pero alistalh lu sitsinikgolh. Xmakgkatsikgo pi nialh xkapaxki. Asta xtse wanilh pi nialh xakxilhputun. Alice wa: «Lu nitlan klimakgkatsilh, xlakata kkapaxki kifamilia. Pero xaklakpuwanit pi wa Jehová chu Jesús tiku pulana xakwililh kkilatamat, wa xlakata ktamunulh klanka tamakxtumit nema xtalakatsuwima» (Mat. 10:37).

12 Komo paxkiyaw Dios, wa natatayayaw chu ni atanu, la akgtum equipo xla takgaman, kiʼescuelajkan o kimpaískan. Kalilakpuwaw xlakata chatum tala tiku wanikan Henry. Akgtum equipo xalak xʼescuela xkatakgamanan ajedrez chu liwana xlakpuwanit natlajanan kʼakgtum campeonato. Pero xlakata sábado chu domingo xʼan kgamanan, ni xkgalhi kilhtamaku naʼan lichuwinan Dios chu naʼan ktamakxtumit. Milh kilhtamaku katsilh pi tlakg xkgalhini tapaxkit xʼescuela nixawa Jehová. Wa xlakata kamakgxtakgli tiku xkatakgamanan ajedrez (Mat. 6:33).

13. Komo ni makgxtakgputunaw Dios, ¿tuku natlawayaw akxni kifamiliajkan ni latalalinkgo?

13 Min kilhtamaku tuwa makgkatsiyaw  putum akxtum nakapaxkiyaw kifamiliajkan. Kalichuwinaw xlakata chatum tala wanikan Ken. Wan pi xtse lu lina kata, wa xlakata ni lakgmakgasna xʼamputun lakgapaxialhnan chu lakgachunin xwani pi tlan xtamakgxtakgli kxchik. Pero xtse ni nitlan talalin xpuskat. Ken wan pi ni xkatsi tuku natlawa xlakata xchatiykan xlatalalinkgolh. Xla ni xmakgxtakgputun Jehová. Wa xlakata tsukulh lilakpuwan tuku wan Biblia. Pero katsilh pi Dios xlakaskin tlan xmamakgkatsinilh xpuskat chu wa xmakgapaxuwalh. Wa xlakata putsalh la natlawa xlakata namakgapaxuwa. Tachuwinalh xpuskat chu wanilh tuku xlakata xlimasiyanilh tapaxkit xtse Ken. Chu na wanilh xtse tuku xlakata xlimaxkit kakni xpuskat (kalikgalhtawakga Génesis 2:24 chu 1 Corintios 13:4, 5).

AKXNI CHATUM TALA TIKU TLAKG KGALHI LIMAPAKGSIN NITLAN NAKINKALIKATSINIYAN

14. ¿Tuku tlawanilh Saúl xkgawasa?

14 Atanu la tlan nalimasiyayaw pi ni makgxtakgaw Jehová wa akxni chatum tala tiku tlakg kgalhi limapakgsin nitlan nakinkalikatsiniyan. Mapakgsina Saúl laksakli Dios, pero nitlan likatsinilh xkgawasa. Ni xʼakgatekgsa tuku xlakata Jonatán lu xpaxki David. Wa xlakata, akxni Jonatán xmakgtayaputun David, Saúl lu sitsilh asta mamaxanilh kxlakatin lhuwa latamanin. Pero Jonatán chuntiya maxkilh kakni xtlat. Chu na ni makgxtakgli Jehová chu David, tiku Dios xlaksaknit xlakata mapakgsina xwa kʼIsrael (1 Sam. 20:30-41).

15. Komo chatum tala nitlan nakinkalikatsiniyan, ¿tuku kilitlawatkan?

 15 La uku, lakgkgolotsin lu liskujkgo xlakata tlan nakalikatsinikgo congregación. Pero xlakata na makglakgalhinanin, max namin kilhtamaku ni katiʼakgatekgskgolh tuku xlakata wi tuku tlawayaw (1 Sam. 1:13-17). Komo namin kilhtamaku nitlan nakinkalikatsinikgoyan, akinin ni kamakgxtakgwi Jehová.

AKXNI TUWA MAKGKATSIYAW NAMAKGANTAXTIYAW TUKU WANAW

16. ¿Niku nalimasiyayaw pi ni makgxtakgaw Dios chu ni kiakstukan kinkapaxkikanan?

16 Saúl xlakaskin pi Jonatán wa mapakgsina xlitaxtulh alistalh, ni wa David (1 Sam. 20:31). Jonatán max tlan xakstu xpaxkika chu mapakgsina xlitaxtuputulh. Pero xlakata xpaxki Jehová chu ni xmakgxtakga, makgantaxtilh tuku xwaninit xʼamigo David. Biblia wan pi tiku ni makgxtakgkgo Jehová chu paxkikgo makgantaxtikgo tuku wankgo maski xlakan nitlan kakitaxtuni (Sal. 15:4). Akgtum liʼakxilhtit, komo tlawayaw akgtum contrato xla negocios, namakgantaxtiyaw tuku anta wanitaw maski tuwa namakgkatsiyaw. Chu komo kgalhiyaw taʼakglhuwit kkintamakgaxtokgatkan, xlakata paxkiyaw Jehová ni katiʼakgskgawiw tiku tatamakgaxtokgnitaw (kalikgalhtawakga Malaquías 2:13-16).

Komo tlawayaw akgtum contrato xla negocios, namakgantaxtiyaw tuku anta wanitaw xlakata ni makgatsankgananiputunaw Dios. (Kaʼakxilhti párrafo 16).

17. ¿Tuku katsinita kʼuma artículo?

17 Chuna la Jonatán, ni makgxtakgputunaw Dios chu maski tuwa tuku titaxtuyaw. Wa xlakata, ni kamakgxtakgwi kinatalankan, maski tuwa tuku natitaxtuyaw. Chuna namakgapaxuwayaw Jehová, chu uma na nakinkamakgapaxuwayan (Prov. 27:11). Liwana nakatsiyaw pi xla putum kilhtamaku nakinkakuentajtlawayan. Kʼartículo nema aku mima nalichuwinanaw atanu latamanin tiku latamakgolh kxkilhtamaku David. Naʼakxilhaw pi makgapitsi ni makgxtakgkgolh Dios, pero amakgapitsi makgxtakgkgolh. Chu naʼakxilhaw tuku nakatsiniyaw xpalakatakan.

^ [1] (párrafo 9): Kʼuma artículo kalakgpalikanit makgapitsi tukuwani.