Ankan kxpulakni

Ankan kliputsan

Xtatayananin Jehová

Laksakkan tachuwin totonaco

¿Tukuya tapaxkit nakinkaliminiyan xaxlikana tapaxuwan?

¿Tukuya tapaxkit nakinkaliminiyan xaxlikana tapaxuwan?

«Snun lipaxaw talamana tachixkuwit ti talipawan xastakna Dios wanikan Jehová» (SAL. 144:15, Salmos Ixtatlincan ti Talipawan Dios, SXP).

TAKILHTLIN: 28, 25

1. ¿Tuku xlakata wanaw pi lamaw kkilhtamaku niku lu talakgpalinit?

LA UKU lamaw kkilhtamaku niku lu talakgpalinit. Chuna la lichuwinalh Biblia, Jehová kamamakxtumima lhuwa latamanin «xlipaks ntiyat ntu anan, chu lantla ni ntipalit kilhtsukut anan, chu nti xalanin xlikatlanka nkatuxawat, chu ni ntipalit xtachuwinkan nkgalhikgoy». Uma lhuwa latamanin litaxtu «akgtum tliwakga kachikin» nema liwaka akgtsayan millones latamanin tiku lu paxuwakgo chu «tantaku tantaskaka lakgatakilhputakgoy kxputawilh Dios» (Rev. 7:9, 15; Is. 60:22). Nikxni ananit lhuwa latamanin tiku xpaxkikgolh Dios chu xtalatamankan.

2. ¿Tuku tapaxkit kgalhikgo tiku tamakgatlinikgonit Dios? (Kaʼakxilhti xapulana dibujo).

2 Pero nachuna Biblia lichuwinalh pi la uku kilhtamaku tiku tamakgatlinikgonit Dios tanu tapaxkit x’amakgo kgalhikgo, xakstukan xkapaxkika. Apóstol Pablo tsokgli «kxaʼawatiya kilhtamaku», lhuwa tiku «xakstukan nakapaxkikan», «napaxkikgo tumin» chu «napaxkikgo wa tuku  nalipaxuwakgo nixawa Dios» (2 Tim. 3:1-4). Mi’akstu napaxkikana ni xtachuna la nakgalhiniya tapaxkit Dios. Latamanin tiku kaj xakstukan kapaxkikan nila kgalhikgo tapaxuwan nema lakaskinkgo. Wata ni chuna kitaxtu, tlakg tuwa kakitaxtuni kxlatamatkan putum latamanin.

3. ¿Tuku nalichuwinanaw k’uma artículo chu tuku xlakata?

3 Pablo xkatsi pi k’uma kakilhtamaku lhuwa latamanin x’akstukan x’amaka kapaxkikan chu kstalaninanin Cristo x’ama kalaktlawa tapaxkit nema xkgalhikgo. Wa xlakata kinkamaxkiyan tastakyaw pi katapanuniw tiku kgalhikgo uma tapaxkit nixatlan (2 Tim. 3:5). Xlikana, nila putum katamakgatlinikgoyaw tiku kgalhikgo tapaxkit nema nixatlan. Wa xlakata, ¿la nalakgmakganaw xtayatkan latamanin chu naliskujaw xlakata namakgapaxuwayaw Jehová, Dios xla tapaxkit? Ka’akxilhwi la talakgpali xtapaxkit Dios nema lakaskin nakgalhiyaw chu tapaxkit nema lichuwinankan ktexto xla 2 Timoteo 3:2-4. Uma nakinkamakgtayayan na’akxilhaw la natlawayaw xlakata nakgalhiyaw tapaxkit nema lu nakinkamakgapaxuwayan.

¿NAPAXKIYAW DIOS O KI’AKSTUKAN NAKINKAPAXKIKANAN?

4. ¿Tuku xlakata katsiyaw pi ni talakgalhin ki’akstukan nakinkapaxkikanan?

4 Chuna la akxilhnitaw, Pablo tsokgli: «Lakchixkuwin xakstukan nakapaxkikan». ¿Wamputun uma pi nitlan ki’akstukan nakinkapaxkikanan? Ni. Xlakaskinka pi akinin nakinkapaxkikanan xlakata nitu nalaniyaw. Chuna kinkatlawan Jehová. Jesús lichuwinalh: «Kalakgalhamanti amakgapitsin mintatamalakatsukun lantla wix akstu lakgalhamankana» (Mar. 12:31). Komo ni nakinkapaxkikanan kiʼakstukan nila katikapaxkiw amakgapitsin. Nachuna Biblia lichuwinan: «Nachuna lakchixkuwin xlipaxkitkan xlakpuskatinkan chuna la paxkikgo xmaknikan. Tiku paxki xpuskat, xakstu paxkikan, xlakata niti sitsini xmakni, wata mawi chu kuentajtlawa» (Efes. 5:28, 29). Wa xlakata xlakaskinka pi nakinkapaxkikanan.

5. ¿La likatsikgo tiku malakatsalikgo la xakstukan kapaxkikan?

5 Pero komo nakgalhiyaw tapaxkit nema lichuwinankan anta ktexto xla 2 Timoteo 3:2 nitlan kintikakitaxtunin. Uma tapaxkit nixatlan chu tlawa pi akstu napaxkikana. Tiku malakatsali la xakstu paxkikan lhuwa tuku kgalhiputun nema ni xlakaskinka (kalikgalhtawakga Romanos 12:3). Tuku tlakg lilakgaputsakgo kxlatamatkan wa tuku kaj xakstu xpalakatakan. Chu ni kuenta tlawakgo xpalakatakan amakgapitsin. Akxni nitlan tuku kakitaxtuni wa kalimawakakgo amakgapitsin, wata ni lakpuwankgo pi na linkgo kuenta. Umakgolh latamanin tiku xakstukan kapaxkikan ni tapaxuwan wilakgo.

6. ¿Tuku tlan kitaxtu xlakata latamanin napaxkikgo Dios?

6 Makgapitsi tiku lakputsananikgo Biblia kanajlakgo pi akxni Pablo lichuwinalh la x’amakgo likatsikgo latamanin kxa’awatiya kilhtamaku, pulana lichuwinalh tapaxkit nema ki’akstukan kinkakgalhinikanan xlakata uma tlawa nakgalhiyaw nixatlan tayat nema alistalh lichuwinalh. Pero latamanin tiku paxkikgo Dios tanu tayat kgalhikgo. Biblia tamalakxtumi tapaxkit nema kgalhinikan Dios la komo tapaxuwan, takaksni, lu kgalhkgalhinan, tlawakan tuku tlan, tlan talikatsit, takanajla, ni lakapala sitsikan, machokgo tuku nitlan tlawaputunkan (Gál. 5:22, 23). Chatum tiku tsokgli salmo kilhtlilh: «¡Snun lipaxaw talamana tachixkuwit ti talipawan xastakna Dios wanikan Jehová!» (Sal. 144:15SXP). Jehová chatum Dios xapaxuwana chu xlakskujnin nachuna limasiyakgo uma tayat. Nachuna, tiku kaj xakstukan kapaxkikan kaj watiya wi tuku makglhtinamputunkgo, pero xlakskujnin Jehová paxuwakgo xlakata kamaxkikgo amakgapitsin tuku kgalhikgo (Hech. 20:35).

¿Tuku natlawayaw xlakata ni akstu nakinkapaxkikanan? (Kaʼakxilhti párrafo 7).

7. Komo katsiputunaw la wi tapaxkit nema kgalhiniyaw Dios, ¿tuku tlan natakgalhskinaw?

7 ¿La nalikatsiyaw pi tapaxkit nema akstu kinkakgalhinikanan tlakg xlakaskinka limaxtuyaw  nixawa tapaxkit nema kgalhiniyaw Dios? Kalilakpuwaw tastakyaw xla Filipenses 2:3, 4 niku lichuwinan: «Ni tu titlawayatit wa ntu nkaj taskgawit, su ntu na lipakxatit, chi wampi wata kaj tasmalhwan kalalipaxkitit, kalataktujunitit nchatunu amakgapitsin. Tini kalakapastakli wa ntu man xakstu lakgtaxtut, wampi na kalakapastakli wa ntu xlakgtaxtut amakgapitsin». Tlan natakgalhskinaw: «¿Ktlawa uma tastakyaw? ¿Xlikana kliskuja naktlawa xtalakaskin Dios? ¿Kputsa la nakkamakgtaya natalan anta kcongregación chu akxni klichuwinan Dios?». Tuwa tamakgkatsi nakamakgtayayaw amakgapitsin. Max natalakaskin wi tuku namakgxtakgaw nema lakgatiyaw. Pero nituku atanu tuku tlakg nakinkamakgapaxuwayan akxni katsiyaw pi Mapakgsina xlikalanka katiyatni tlan kinkaliʼakxilhan.

8. ¿Tuku tlawakgonit lhuwa kstalaninanin Cristo xlakata tapaxkit nema kgalhinikgo Dios?

8 Tapaxkit nema kgalhiniyaw Dios chu xlakata tlakg naskujnaniputunaw tlawanit pi lhuwa kstalaninanin Cristo namakgxtakgkgo xtakgalhtawakgakan niku max lhuwa tumin xkamaxkilh. Chatum tala makuchina wanikan Ericka, xla ni kaj watiya lilakgaputsalh xtaskujut. Wata precursora regular litaxtulh chu akxtum taskujli xchixku klhuwa países. Lichuwinan: «Lhuwa tuku ktitaxtunitaw anta niku tanu tachuwin chuwinankan chu lhuwa ktekgsnitaw xalaksasti ki’amigoskan. Uma lu klipaxuwanitaw kkilatamatkan. Chuntiyaku kkatsini kliskuja la makuchina, pero tuku xlikana kimakgapaxuwa wa pi tlakg klimaxtu kilhtamaku chu kilitliwakga xlakata nakkamakgtaya latamanin kxtakanajlakan chu nakmakgtayanan kcongregación».

¿NAMASTOKGWILIYA TUKU LHUWA XTAPALH K’AKGAPUN O KKATIYATNI?

9. ¿Tuku xlakata nila tapaxuwan tawilakgo tiku paxkikgo tumin?

9 Pablo na lichuwinalh lakchixkuwin tiku «napaxkikgo tumin». Titaxtunita makgapitsi kata akxni chatum precursor xalak Irlanda litachuwinalh xla Dios chatum chixku. Uma chixku maxtulh niku xmaki xtumin, chu maxtulh xtumin chu wa: «¡Wa uma kidios!». Lhuwa latamanin nachuna lakpuwankgo maski nichuna lichuwinankgo. Paxkikgo tumin chu nachuna tuku litamawakgo. Pero Biblia lichuwinan: «Chatum tiku paxki plata ni katilipaxuwalh plata, ni para chatum tiku paxki lhuwa tumin nalipaxuwa tuku natlaja» (Ecl. 5:10). Tiku paxkikgo tumin ankgalhin lhuwa kgalhiputunkgo chu putum kilhtamaku kaj watiya lilakgaputsakgo. Pero uma kaj watiya kalimini «lhuwa takatsanajwat» (1 Tim. 6:9, 10).

10. ¿Tuku wa Agur xlakata tumin chu talimaxkget?

10 Xlikana, putum akinin lakaskinaw tumin, xlakata uma kinkamakgtayayan (Ecl. 7:12). Pero, ¿tlan napaxuwa tiku maski kaj ni lhuwa tuku nakgalhi? Xlikana pi tlan (kalikgalhtawakga Eclesiastés 5:12). Agur, xkgawasa Jaqué, wanilh Dios: «Ni katlawa pi lhuwa tumin nakkgalhi o nitu nakkgalhi. Kaj kakimaxki talakaskin nakwa liwat nema kilakgchan». Nituwa na’akgatekgsaw pi xla ni limaxkgen xwamputun. Lichuwinalh pi xla ni xkgalhanamputun, xlakata chuna xmakgalipuwa Dios. Pero, ¿tuku xlakata wanilh pi ni xmaxkika lhuwa tumin? Xla wan: «Xlakata komo lhuwa tuku nakkgalhi max naklakpuwan chu nakwan: “¿Tiku Jehová?”» (Prov. 30:8, 9). Max kalakgapasaw latamanin tiku lipawankgo tumin wata ni wa lipawankgo Dios.

11. ¿Tuku lichuwinalh Jesús xlakata tumin?

11 Tiku paxkikgo tumin nila makgapaxuwakgo Dios. Jesús lichuwinalh: «Nila skujnikan chatiy malana; xlakata nasitsiniya chatum chu napaxkiya achatum, nakgalhakgaxpata chatum chu achatum nalakgmakgana. Nila xlakskujnin Dios nalitaxtuyatit chu nachuna lu naputsastalaniyatit tumin». Jesús aku xlichuwinankgonit: «Ni katuwa kamastokgwilitit tuku laklanka xtapalh kkatiyatni, niku luwa naway chu niku kgalhananin xafuerza tanukgo chu kgalhankgo. Wata, kamastokgwilitit tuku laklanka xtapalh anta kʼakgapun, niku luwa ni naway chu niku kgalhananin ni xafuerza tanukgo chu kgalhankgo» (Mat. 6:19, 20, 24).

12. ¿Tuku xlakata tlakg tlan naskujnaniyaw Dios komo xataktujun nalinaw kilatamatkan? Kalichuwinanti akgtum li’akxilhtit.

 12 Lhuwa natalan katsikgonit pi komo xataktujun linkan latamat ni kaj watiya tapaxuwan natawilaya, wata nachuna tlakg nakgalhiya kilhtamaku xlakata naskujnaniya Jehová. Anta k’Estados Unidos, chatum tala wanikan Jack xkgalhi lanka chiki chu akgtum negocio, pero putum stalh xlakata precursor xlitaxtulh chuna la xpuskat. Xla lichuwinan: «Lu tuwa kmakgkatsiw xlakata kstaw lu stlan kinchikkan chu pukuxtu nema xakkgalhiyaw. Pero xlikana pi akglhuwa kata lu nitlan xakmakgkatsi xlakata taʼakglhuwit ktaskujut. Pero kimpuskat tiku precursora, ankgalhin xpaxuwa. Xla xlichuwinan: “Kkgalhi tlakg xatlan malana”. Chu la uku xlakata komo nachuna precursor klitaxtu, kinchatiykan watiya chatum tiku kskujnanimaw, Jehová».

¿Tuku natlawayaw xlakata ni napaxkiyaw tumin? (Kaʼakxilhti párrafo 13).

13. ¿Tuku nakinkamakgtayayan nakatsiyaw tuku lakpuwanaw xlakata tumin?

13 ¿Tuku nakinkamakgtayayan nakatsiyaw la xlikana lakpuwanaw xlakata tumin? Talakaskin liwana natakgalhskinaw: «¿Klimasiya kkilatamat pi xlikana kkanajla tuku wan Biblia xlakata tumin? ¿Wa tlakg xlakaskinka kakxilha naktlaja tumin? ¿Tlakg klilakgaputsa tuku lhuwa nakkgalhiputun nixawa la naktalalin Jehová chu amakgapitsin? ¿Xlikana klipawan Jehová pi xla nakimaxki tuku klakaskin?». Liwana katsiyaw pi Dios nikxni katikamakgxtakgli tiku lipawankgo (Mat. 6:33).

¿WA PAXKIYAW JEHOVÁ O WA TUKU KAJ NALIPAXUWAYAW?

14. ¿La kili’akxilhatkan tuku kaj lipaxuwaputunaw?

14 Chuna la lichuwinanka, la uku lhuwa tiku «napaxkikgo wa tuku nalipaxuwakgo». Xlikana, ni talakgalhin ki’akstukan nakinkapaxkikanan chu nakgalhiyaw tumin komo ni namalakatsaliyaw, nachuna ni talakgalhin nalipaxuwayaw kilatamatkan komo ni namalakatsaliyaw. Makgapitsi latamanin lakpuwankgo pi talakaskin namakgxtakgaw putum tuku nalipaxuwayaw kkilatamatkan. Pero uma ni wa tuku masiya Jehová. Biblia kawani xlakskujnin Dios tiku ni makgxtakgkgo: «Kapit, lipaxuw kawat mi liwat chu kalipaxuwalh minaku akxni nalikgotnana mi vino» (Ecl. 9:7).

15. ¿Tuku kilhchanima «napaxkikgo wa tuku nalipaxuwakgo»?

15 Akxni texto xla 2 Timoteo 3:4 lichuwinan xlakata tiku kaj watiya paxkikgo tuku lipaxuwakgo, wa kilhchanima tiku makgxtakgkgo Dios  kxlatamatkan. Ka’akxilhwi pi uma texto ni wan pi tlakg xpaxkikgolh tuku nalipaxuwakgo nixtachuna la xpaxkikgolh Dios, uma xkilhchanilh pi xkgalhinikgolh tsinu tapaxkit Dios. Wata lichuwinan pi «napaxkikgo wa tuku nalipaxuwakgo nixawa Dios». Chatum tiku lakputsanani Biblia lichuwinan pi uma versículo «ni kilhchanima pi xlakan xpaxkikgolh tsinu Dios. Wata kilhchanima pi nipara tsinu xpaxkikgolh». Uma akgtum lu xlakaskinka tastakyaw xpalakatakan tiku lu paxkikgo tuku kaj lipaxuwaputunkgo kxlatamatkan. Tachuwin «napaxkikgo wa tuku nalipaxuwakgo» liwana lichuwinan la likatsikgo tiku «xman wa litakgatsankgakoy» tuku nalipaxuwakgo kxlatamatkan (Luc. 8:14).

16, 17. ¿La xli’akxilha Jesús tuku xlipaxuwa?

16 Jesús ni xmalakatsali akxni wi tuku xlipaxuwa. Xla kilalh k’akgtum pascua niku xtamakgaxtokgmaka chu nachuna k’akgtum lanka pascua (Juan 2:1-10; Luc. 5:29). Akxni sputli vino anta niku xtamakgaxtokgmaka, tlawalh akgtum milagro chu chuchut nema xwi vino tlawalh. Chu akgtum kilhtamaku latamanin xliwanimakgo xlakata xwayama chu xkgotnama, pero liwana lichuwinalh pi ni xlilat tuku xlakpuwamakgolh (Luc. 7:33-36).

17 Maski chuna, Jesús ni kaj wa xlilakgaputsa tuku kaj nalipaxuwa. Wa pulana wililh Jehová kxlatamat, chu tlawalh putum tuku matlanilh xlakata nakamakgtaya amakgapitsin. Nachuna liwana xlakpuwanit pi x’ama makamasta xlatamat maski lhuwa xpatinalh xlakata nakalakgmaxtu amakgapitsin. Putum kstalaninanin kawanilh: «Chapaxuwana nalatapayatit wixin akxni mpala nakaxkajnikanatit, chu lakawan xkatalatlawakantit, chu xkasokgalikantit, chu nti ni tlan xkawanikantit nkimpalakata, xakgsaninankgolh. Kalipaxuwatit, na chapaxuwana nkalilatapatit, sampi wa mintatlajakan anta nkgakgapun, luwa lhuwa; sampi na chuna ntisokgalikgoka xpalakachuwinanin Dios nti xlamakgo xalipulana akxni wixin ninaj x’ananatit» (Mat. 5:11, 12).

¿Tuku natlawayaw xlakata ni napaxkiyaw tuku kaj nalipaxuwayaw? (Kaʼakxilhti párrafo 18).

18. ¿Tuku takgalhskinin nakinkamakgtayayan nakatsiyaw la xlilhuwa paxkiyaw tuku lipaxuwakan klatamat?

18 ¿Tuku nakinkamakgtayayan nakatsiyaw la xlilhuwa paxkiyaw tuku lipaxuwayaw? Kakinkakgalhskinkan: «¿Tlakg xlakaskinka kli’akxilha lilakgastan nixawa tamakxtumit chu la lichuwinankan Dios? ¿Liwana klakpuwanit nakmakgxtakga tuku kkgalhi xlakata kskujnaniputun Dios? Akxni wi tuku klipaxuwa, ¿kinkgalhskinkan komo nalakgati Jehová?». Komo xlikana paxkiyaw Jehová, nalakgmakganaw tuku xla ni lakgati, nachuna tuku lakpuwanaw pi max nitlan (kalikgalhtawakga Mateo 22:37, 38).

LA TLAN NAPAXUWAYAW

19. ¿Tiku amakgolh latamanin tiku nikxni katikgalhikgolh xaxlikana tapaxuwan?

19 Satanás liwakaya akgchaxan mil kata la xlilhuwa kamakgapatinanit latamanin. Chu la uku xlakata wilaw kxa’awatiya kakilhtamaku, kKatiyatni wilakgolh lhuwa latamanin tiku kaj watiya xakstukan kapaxkikan, paxkikgo tumin chu tuku lipaxuwakgo. Kaj watiya lilakgaputsakgo tuku lakaskinkgo chu la natlawakgo xlakata nakgalhikgo. Umakgolh latamanin nikxni katikgalhikgolh xaxlikana tapaxuwan. Pero Biblia lichuwinan: «Snun paxawa lama ama ti ixmakgtayana tlawanit ixDios [...] Jacob, ama ti lipawan Kintikukan Dios» (Sal. 146:5SXP).

20. ¿La makgapaxuwayan tapaxkit nema kgalhiniya Dios?

20 Xlakskujnin Jehová chali chali tlakg paxkiyaw. Chu akgatunu kata lhuwa latamanin lakgapaskgo chu nachuna tsukukgo paxkikgo. Uma limasiya pi xTamapakgsin Dios mapakgsinamaja chu kaj nialh makgas nalimin tasikulunalin nema ni lilakpuwanaw. Tlawakan xtalakaskin Jehová chu nakatsiyaw pi makgapaxuwayaw uma na nakinkamakgapaxuwayan la uku chu putum kilhtamaku. Kʼatanu artículo natamalakxtumiyaw nixatlan tayat nema kgalhikan akxni akstu napaxkikana chu xatlan tayat nema limasiyakgo xlakskujnin Jehová.