Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Enero kata 2018

Akxni lakapastakkan akxni tinilh Cristo makgtayanan akxtum natawilayaw

Akxni lakapastakkan akxni tinilh Cristo makgtayanan akxtum natawilayaw

«¡Snun tlan [...] tamakglhkatsi akxni ti tatapakgsini Dios akxtum tarapaxki la litakam, akxni chatum talaj!» (SAL. 133:1, Salmos Ixtatlincan ti Talipawan Dios, SXP).

TAKILHTLIN: 5, 30

1, 2. ¿Tuku lu tlan nakamamakxtumi latamanin kkata 2018 chu tuku xlakata lu xlakaskinka uma tamakxtumit? (Kaʼakxilhti xapulana dibujo).

KILHTAMAKU 31 xla Marzo kata 2018, akxni tsankgama nawan chichini lhuwa kskujnin Dios chu amakgapitsin latamanin tiku katsiputunkgo tuku xalak Biblia natamakxtumikgo xlakata natlawakgo Taway xla kiMalanakan. Lakapastakkan akxni tinilh Cristo kaj makgtum akgtum kata tlawakan, chu uma tlawa pi lu tlan nakamamakxtumi latamanin nixawa tuku atanu nema tlawakan kkakilhtamaku.

2 Jehová chu Jesús lu lipaxuwakgo akxni kaʼakxilhkgo pi lhuwa latamanin ankgo kʼuma lu xlakaskinka tamakxtumit nema tlawakan xlikalanka katiyatni. Biblia lichuwinalh pi «lhuwa tachixkuwitat», tini la xʼama putlakga, «makgapitsin lantla xala xlipaks ntiyat ntu anan, chu lantla ni ntipalit kilhtsukut anan, chu nti xalanin xlikatlanka nkatuxawat, chu ni ntipalit xtachuwinkan nkgalhikgoy» xlichuwinankgolh: «Wa  miniy nkiDioskan akgaputaxtut wa nti wi klaktawilh kpumapakgsin, chu nKgalhniluj» (Rev. 7:9, 10). Lu tlan pi lhuwa latamanin maxkikgo kakni Jehová chu Jesús akxni lakapastakkan akxni tinilh Cristo.

3. ¿Tuku takgalhskinin nakgalhtiyaw kʼuma artículo?

3 Kʼuma artículo nakgalhtiyaw akgtati takgalhskinin. Pulana, ¿tuku tlan natlawayaw xlakata tlan nalitamakgtayayaw akxni nalakapastakkan akxni tinilh Cristo? Xlipulaktiy, ¿tuku xlakata akxni lakapastakkan akxni tinilh Cristo tlawa pi akxtum natawilayaw? Xlipulaktutu, ¿la tlan nakmakgtayananaw xlakata akxtum natawilayaw? Chu xlipulaktati, ¿nachan kilhtamaku akxni xaʼawatiya nalakapastakkan akxni tinilh Cristo? Komo chuna, ¿tuku kilhtamaku chuna nala?

TUKU NATLAWAYAW XLAKATA TLAN NALITAMAKGTAYAYAW AKXNI LAKAPASTAKKAN AKXNI TINILH CRISTO

4. ¿Tuku xlakata lu xlakaskinka naʼanaw akxni lakapastakkan akxni tinilh Cristo?

4 ¿Tuku xlakata lu xlakaskinka naʼanaw kʼuma lu xlakaskinka tamakxtumit? Kalakapastakwi pi tamakxtumit makgtanuma kkintakakninkan nema maxkiyaw Dios. Max Jehová chu Jesús lhkawilikgo akxni akxilhkgo pi wi tiku fuerza tlawa naʼan kʼuma lu xlakaskinka tamakxtumit. Lakaskinaw pi nakinkaʼakxilhkgoyan pi anta natawilayaw, pero xlakan naʼakgatekgskgo komo lu nitlan makgkatsiyaw o tatatlayaw chu nila naʼanaw. Akxni limasiyayaw xlakata tuku tlawayaw pi tamakxtumit lu xlakaskinka kimpalakatakan, limasiyaniyaw Jehová pi lakaskinaw chuntiyaku nawili kintukuwanikan «klibro xla talakapastakni». Uma libro na litalakgapasa «libro xla latamat» niku limin xtukuwanikan tiku Jehová kamaxkiputun latamat nema ni kgalhi xlisputni (Mal. 3:16; Rev. 20:15).

5. Xlakata nina chin akxni lakapastakkan akxni tinilh Cristo, ¿la natlawayaw xlakata nakinkaliʼakxilhkanan kkintakanajlakan?

5 Xlakata nina chin uma tamakxtumit lu xlakaskinka nalimaxtuyaw kilhtamaku xlakata natlawayaw oración chu liwana naʼakxilhaw la talalinaw (kalikgalhtawakga 2 Corintios 13:5). ¿La natlawayaw? Pablo lichuwinalh pi talakaskin nakinkaliʼakxilhkanan kkintakanajlakan. Wa xlakata, talakaskin nakinkakgalhskinkanan: «¿Xlikana kkanajla pi kmakgtapakgsi kxkachikin Jehová nema maklakaskin xlakata natlawa xtalakaskin? ¿Ktlawa chuna la kmatlani naklichuwinan chu nakmasiya xalakwan tamakatsinin xla Tamapakgsin? ¿Klimasiya tuku ktlawa pi xlikana kkanajla pi lamaw kxaʼawatiya kilhtamaku chu pi xlisputni xkakilhtamaku Satanás lakatsu wi? ¿Chuntiyaku klipawan Jehová chu Jesús chuna la akxni ktamakamastanilh?» (Mat. 24:14; 2 Tim. 3:1; Heb. 3:14). Akxni lilakpuwanaw xatakgalhtin umakgolh takgalhskinin nakinkamakgtayayan chuntiya nalimasiyayaw tiku akinin.

6. 1) ¿Tuku kilitlawatkan xlakata namakglhtinanaw latamat nema ni kgalhi xlisputni? 2) ¿Tuku tlawa chatum kgolotsin akxni nina chin akxni lakapastakkan akxni tinilh Cristo? 3) ¿La tlan nachuna natlawayaw?

6 Pulaktum tuku natlawayaw xlakata nina chin uma kilhtamaku wa nalikgalhtawakgayaw makgapitsi likgalhtawakga nema lichuwinan pi lu xlakaskinka uma tamakxtumit chu nalilakpuwanaw (kalikgalhtawakga Juan 3:16; 17:3). Nalakgapasaw Jehová chu nakgalhiniyaw takanajla Jesús kaj watiya uma nakinkamakgtayayan nakgalhiyaw latamat nema ni kgalhi xlisputni. Xlakata tlan nalitamakgtayayaw uma tamakxtumit, talakaskin nalikgalhtawakgayaw tuku nakinkamakgtayayan xlakata tlakg nakatalakatsuwiniyaw Jehová chu Jesús. Kaʼakxilhwi tuku tlawa chatum kgolotsin. Lata makgasa, xla makitilha revista Makatsinina nema lichuwinan xlakata akxni lakapastakkan akxni tinilh Cristo chu xlakata tapaxkit nema kinkalimasiyanikgon Jehová chu Jesús. Akgatunu kata likgalhtawakga akxni nina chin uma kilhtamaku chu lilakpuwan pi lu xlakaskinka uma tamakxtumit. Min kilhtamaku xla maki maktum o maktiy revistas akgatunu kata nema wa lichuwinan. Akxilhnit pi akxni likgalhtawakga umakgolh revistas, likgalhtawakga Biblia chu  lilakpuwan tuku likgalhtawakga maxki talakaskin nakatsini tuku xalaksasti. Pero tuku tlakg xlakaskinka wa pi makgkatsi pi tlakg paxki Jehová chu Jesús. Komo nachuna natlawayaw natlawa pi akinin na tlakg nakapaxkiyaw chu tlakg nalitamakgtayayaw uma lu xlakaskinka tamakxtumit.

AKXNI LAKAPASTAKKAN AKXNI TINILH CRISTO TLAWA PI AKXTUM NATAWILAYAW

7. 1) ¿Tuku skilh Jesús kxʼoración katsisni akxni tlawalh xapulana xTaway xla kiMalanakan? 2) ¿Tuku likatsiyaw pi Jehová kgalhtinit xʼoración Jesús?

7 Katsisni akxni xapulana tlawalh Taway xla kiMalanakan, Jesús skilh kxʼoración pi kstalaninanin na xlipaxuwakgolh la akxtum xtawilakgolh chuna la xla chu xTlat akxtum tawilakgo (kalikgalhtawakga Juan 17:20, 21). Xlikana pi Jehová kgalhtinit uma oración nema tlawalh xKgawasa. Ni anan atanu tamakxtumit la akxni talakapastaka akxni tinilh Cristo nema limasiya pi akinin xtatayananin Jehová akxtum wilaw. Ama kilhtamaku lhuwa latamanin tiku xalak lhuwa países chu tanu tanu tasiyakgo tamakxtumikgo xlikalanka Katiyatni chu limasiyakgo pi kanajlakgo pi Jehová makamilh xKgawasa. Klhuwa kachikinin, umakgolh tamakxtumit niku ankgo tiku tanu tanu xkachikinkan chu tanu tanu xcolorkan ni ankgalhin tasiya chu wi tiku nitlan akxilhkgo. Pero Jehová chu Jesús lu stlan akxilhkgo uma tamakxtumit.

8. ¿Tuku tamakatsinin maxkilh Jehová Ezequiel?

8 Xtatayananin Jehová ni kaks lilakawanaw pi lipaxuwayaw xlakata akxtum tawilayaw. Jehová xlichuwinanita uma kʼakgtum tamakatsinin nema maxkilh palakachuwina Ezequiel. Tamakatsinin xwan pi kgantiy kiwi, xkiwi Judá chu xkiwi José akxtum xlakgolh chu kaj kgantum xʼama wan (kalikgalhtawakga Ezequiel 37:15-17). Ksección «Tuku katsiputunkgo tiku likgalhtawakgakgo», krevista Makatsinina xla julio kata 2016 lichuwinalh: «Jehová maxkilh Ezequiel akgtum tamakatsinin xla takgalhkgalhin: malaknulh pi kskujnanin xʼamakgo taspitkgo kTiyat nema xKawanikanit pi Nakamaxkikan chu amakgtum makxtum xʼama tawila kachikin. Na wa pi kxaʼawatiya kilhtamaku kskujnanin Dios kaj akgtum kachikin xʼama litaxtukgo».

9. ¿La kgantaxtu akgatunu kata tuku tsokglhi Ezequiel akxni lakapastakkan akxni tinilh Cristo?

9 Lata kata 1919, Jehová tsinu tsinu lakkaxwililh chu akxtum katlawalh tiku xatalaksakni, xlitaxtukgo la kiwi xla Judá. Alistalh, lhuwa latamanin akxtum katalakgolh tiku kgalhkgalhimakgolh nalatamakgo unu kKatiyatni xtachuna litaxtukgo la xkiwi José. Jehová malaknulh pi akxtum xʼama tlawa chu kaj kgantum kiwi xʼama wan kxmakan (Ezeq. 37:19). Xla tlawanit pi tiku xatalaksakni chu «amakapitsi xborregos» kaj «nkgamputum nawankgoy» (Juan 10:16; Zac. 8:23). La uku, akxtum skujnanimakgolh xMapakgsinakan Jesucristo, Ezequiel tsokgwililh pi Jehová limapakuwilh, kiskujni David (Ezeq. 37:24, 25). Akgatunu kata, tuku tsokgli Ezequiel liwana tasiya akxni xatalaksakni chu amakgapitsi borregos tamakxtumikgo, xlakata nalakapastakkgo akxni tinilh Cristo. Wa xlakata, ¿tuku tlan natlawayaw chatunu chatunu xlakata namakgtayananaw akxtum natawilayaw?

LA NATLAWAYAW XLAKATA AKXTUM NATAWILAYAW

10. ¿La natlawayaw xlakata akxtum natawilayaw kxkachikin Dios?

10 Pulaktum la natlawayaw xlakata akxtum natawilayaw kxkachikin Dios wa nataktujuyaw. Akxni Jesús xlama kKatiyatni, kawanilh kstalaninanin pi xtalakaskin ni tlankajwa xkamakgkatsika (Mat. 23:12). Latamanin lakpuwankgo pi xlakan lu xlakaskinka litaxtukgo nixawa amakgapitsin. Pero komo akinin taktujuyaw, nakamaxkiyaw kakni natalan tiku pulalinankgo kcongregación. Komo lakaskinaw pi ankgalhin akxtum natawila congregación, talakaskin nakgalhakgaxmatnanaw. Pero tuku tlakg xlakaskinka wa pi komo nataktujuyaw namakgapaxuwa Jehová, xlakata xla «nipala tsinu kaʼakxilhputun wanti tlanka makgkatsikan wampi  xla lhuwa lakgalhamankgo wanti yama xalaksmalhwan [o taktujukgo]» (1 Ped. 5:5).

11. ¿La kinkamakgtayayan nalilakpuwanaw tuku kilhchanima kaxtalanchu chu vino nema maklakaskinkan akxni lakapastakkan akxni tinilh Cristo?

11 Xlipulaktiy la namakgtayananaw wa nalilakpuwanaw tuku kilhchanima kaxtalanchu chu vino nema maklakaskinkan akxni lakapastakkan akxni tinilh Cristo. Chuna natlawayaw akxni nina chan uma kilhtamaku chu nachuna akxni antiya wilaw (1 Cor. 11:23-25). Kaxtalanchu nema ni kgalhi levadura kilhchanima tiyatliwa nema ni kgalhi talakgalhin tuku Jesús makamastalh chu vino kilhchanima xkgalhni nema stajtamakgalh. Pero ni kajwatiya talakaskin nakatsiniyaw tuku kilhchanimakgolh uma. Kalilakpuwaw pi xtamakamastan Jesús limasiyalh pulaktiy tlakg xlakaskinka tapaxkit: tapaxkit nema Jehová limasiyalh akxni makamastalh xKgawasa xlakata nakinkalakgmaxtuyan chu tapaxkit nema Jesús limasiyalh akxni xatapaxuwan mastalh xlatamat kimpalakatakan. Akxni nalilakpuwanaw tapaxkit nema kinkalimasiyanikgoyan uma kinkamakgpuwantiniyan pi akinin nachuna nakalimasiyaniyaw tapaxkit. Chu tapaxkit nema kgalhiniyaw Jehová chu kinatalankan tlawa pi akxtum nakinkatlawayan chu nakinkamatliwakglhan.

Akxni tapatinanaw makgtayananaw akxtum natawilayaw (Kaʼakxilhti párrafos 12 chu 13).

12. Kliʼakxilhtit xla mapakgsina chu xlakskujni, ¿la limasiyalh Jesús pi Jehová lakaskin nakatapatiyaw kinatalankan?

12 Xlipulaktutu, nakatapatiyaw amakgapitsin. Akxni katapatiyaw tiku nitlan tuku kinkawanikgoyan, limasiyayaw pi paxtikatsiniyaw Jehová xlakata kinkatapatiyan kintalakgalhinkan xlakata xtamakamastan Jesús. Kalilakpuwaw liʼakxilhtit nema Jesús lichuwinalh kMateo 18:23-34. Kakinkakgalhskinkan: «¿Kimakgpuwantini uma liʼakxilhtit naktlawa tuku Jesús masiyalh? ¿Xakgalhkgalhina akit chu kkaʼakgatekgsni natalan? ¿Kkatapati natalan tiku nitlan tuku kiwanikgo?». Xlikana pi makgapitsi talakgalhin tlakg laklanka nixawa amakgapitsi. Nachuna, xlakata akinin makglakgalhinanin tuwa makgkatsiyaw nakatapatiyaw tiku nitlan kinkalikatsinin. Pero tuku lichuwinalh Jesús limasiya tuku Jehová lakaskin natlawayaw (kalikgalhtawakga Mateo 18:35). Jesús  liwana limasiyalh pi Jehová ni kintikatapatin komo akinin ni katapatiyaw natalan akxni tlan chuna natlawayaw. Wa xlakata talakaskin pi liwana nalilakpuwanaw uma. Akxni kgalhakgaxmataw Jesús chu katapatiyaw amakgapitsin, makgtayananaw akxtum natawilayaw.

13. ¿La makgtayananaw akxtum natawilayaw akxni katakgalhiyaw takaksni kinatalankan?

13 Akxni katapatiyaw kinatalankan tlan katalalinaw. Kalakapastakwi tuku lichuwinalh apóstol Pablo chu xliputum kinakujkan kaliskujwi tastakyaw nema mastalh akxni wa pi nitu «nakalaktlawaniyan wan ntu makxtum kalitlawanitan spiritu, xaliankgalhin katapinitit ni namakgaxtakgatit ntatanksni wa ntu makxtum kinkatlawanitan» (Efes. 4:3). Akxni talakatsuwima uma kilhtamaku chu akxni antiya wilaw, kalilakpuwaw la kalikatsiniyaw amakgapitsin. Kakinkakgalhskinkan: «¿Limasiya tuku ktlawa pi kkatapati amakgapitsin? ¿Akxilhkgo amakgapitsin pi kliskuja xlakata naʼanan takaksni chu akxtum natawilayaw?». Uma kilhtamaku, kalilakpuwaw umakgolh lu xlakaskinka takgalhskinin.

14. ¿La nalimasiyayaw pi xatapaxuwan latapatiyaw chatunu chatunu?

14 Xlipulaktati, wa nalimasiyayaw tapaxkit chuna la Jehová tlawa, tiku Dios xla tapaxkit (1 Juan 4:8). Nikxni nawanaw umakgolh tachuwin: «Kkatsi pi nakkapaxki natalan pero ni talakaskin tlan nakkatalalin». Komo chuna nalakpuwanaw nalimasiyayaw pi ni kgalhakgaxmataw xtastakyaw Pablo tiku wan pi kstalaninanin Cristo nalatapatikgoy chatunu chatunu ktapaxkit (Efes. 4:2). Kaʼakxilhwi pi ni kajwatiya lichuwinalh pi nalatapatiyaw chatunu chatunu wata lichuwinalh pi xatapaxuwan chuna natlawayaw. ¿Ni xlikana pi tanu tanu kilhchanimakgolh? Jehová kaliminit kcongregación latamanin xalak tanu tanu kachikin (Juan 6:44). Xla wi tuku tlan akxilha xlakata nakapaxki. Wa xlakata, ¿tlan nawanaw pi chatum tala ni lakgchan napaxkiyaw? Talakaskin pi putum nakalimasiyaniyaw tapaxkit nema Jehová kinkawaniyan pi kalimasiyaw (1 Juan 4:20, 21).

¿TUKUYA KILHTAMAKU XAʼAWATIYA NALAKAPASTAKKAN AKXNI TINILH CRISTO?

15. ¿Tuku xlakata katsiyaw pi natlawakan xaʼawatiya talakapastakni akxni tinilh Cristo?

15 Namin kilhtamaku akxni xaʼawatiya natlawayaw uma lu xlakaskinka tamakxtumit. ¿Tuku xlakata chuna wanaw? Pablo kawanilh tiku xatalaksakni pi akgatunu kata la nalakapastakkgo akxni tinilh Cristo: «[Chuntiya] namasiyuyatit lantla nilh nkimPuchinakan, asta akxni namimpalay» (1 Cor. 11:26). Akxni lichuwinalh tuku xʼama la kxaʼawatiya kilhtamaku, Jesús na lichuwinalh akxni namimparay. Lichuwinalh xlakata lanka takatsanajwat: «Natasiyuy nchu xaliukxilhtit xla xKam nchixku anta nkakgapun; akxni nchu natsukukgoy tasakgoy xlipaks nchixkuwin xala katiyatna, na naʼakxilhkgo xKam nchixku, [namin kpuklhni] anta nkakgapun, chu xa wa xlitlanka xlitliwakga, chu xlikakni. Na namalakgachay xʼángeles, pixtlanka nasunukan lisunun; na namamakgstokgkgokan xtalaksaknin, lantla xlikatlanka nkatuxawat, asta kxtankgana, lakatum, chu kxlakgaputu ntani nkikgatsputa akgapun» (Mat. 24:29-31). Jesús nakamamakxtumi «xtalaksaknin» akxni nakalin kʼakgapun tiku xatalaksakni nema wilakgolhku nawan katiyatni. Uma natsuku akxni lama nawan lanka takatsanajwat pero akxni nina tsuku nawan Armagedón. Kʼuma guerra, Jesús chu 144,000 nakatlajakgo mapakgsinanin xalak Katiyatni (Rev. 17:12-14). Akxni xaʼawatiya nalakapastakkan akxni tinilh Cristo wa nema tlawakanita nawan akxni Jesús nakalin tiku xatalaksakni kʼakgapun.

16. ¿Tuku xlakata wix liwana lakkaxwilinita pi napina akxni nalakapastakkan akxni tinilh Cristo xla uma kata?

16 Kaliskujwi xlakata naʼanaw akxni nalakapastakkan akxni tinilh Cristo uma 31 xla marzo kkata 2018. Chu kaskiniw Jehová pi kakinkamakgtayan xlakata chuntiya akxtum natawilayaw kxkachikin (kalikgalhtawakga Salmo 133:1). Kalakapastakwi pi nachin kilhtamaku akxni nialh katitlawaw uma lu xlakaskinka tamakxtumit. Xlakata nina chin uma kilhtamaku, chuntiya kalimasiyaw pi lanka xtapalh akxilhaw akxni akxtum tawilayaw chu lipaxuwayaw uma tamakxtumit nema tatlawa akgatunu kata.