Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Enero kata 2016

¿Paxtikatsiniyaw Dios tuku tlawalh kimpalakatakan?

¿Paxtikatsiniyaw Dios tuku tlawalh kimpalakatakan?

«[Kapaxtikatsiniw] Dios xpalakata ntlanka xtalakgalhaman wa ntu asta ni la ntalichuwinan» (2 COR. 9:15).

TAKILHTLIN: 53, 18

1, 2. 1) ¿Tuku na namakgantaxti xtamaskiwin Dios nema kinkamaxkinitan? 2) ¿Tuku takgalhskinin nakgalhtiyaw kʼuma artículo?

JEHOVÁ lhuwa kinkapaxkiyan, asta kinkamalakgachanin xKgawasa Jesucristo tiku lu xpaxki xlakata xmastalh xlatamat kimpalakatakan (Juan 3:16; 1 Juan 4:9, 10). Uma tamaskiwin nitu tuku xtachuna nema kinkamaxkikanitan. Wa xlakata Pablo wa pi «ntlanka xtalakgalhaman wa ntu asta ni la ntalichuwinan» (2 Cor. 9:15). ¿Tuku xkilhchanima Pablo akxni chuna wa?

2 Pablo xkatsi pi xlakata Jesús nilh xʼama kgantaxtu putum tuku Dios xmalaknunit (kalikgalhtawakga 2 Corintios 1:20). Uma wamputun pi «ntlanka xtalakgalhaman wa ntu asta ni la ntalichuwinan» nema xla Dios na kilhchanima xtamakamastan Jesús, tapaxkit chu putum tuku kinkamaxkiyan. Uma tamaskiwin lu nitu tuku xtachuna asta nila liwana akgatekgsaw. ¿La kilimakgkatsitkan xlakata uma tamaskiwin nema nitu xtachuna? ¿Tuku kilitlawatkan la uku xlakata talakatsuwima akxni lakapastakkan akxni tinilh Cristo? Uma kata natatlawa miércoles 23 xla marzo.

 XTAMASKIWIN DIOS NEMA NITU XTACHUNA

3, 4. 1) ¿La makgkatsiyaw akxni wi tuku kinkamaskiwikanan? 2) ¿La tlan nalakgpali kilatamatkan akgtum tamaskiwin?

3 Putum tamaskiwin kinkamakgapaxuwayan. Pero makgapitsi lu xlakaskinka litaxtukgo asta lakgpali kilatamatkan. Kawiliw akgtum liʼakxilhtit, kalakpuwanti pi wix tlawa tuku lu nitlan chu lakgchanan namakgnikana. Pero kaj xalan chatum lataman tiku ni lakgapasa wan pi napalakaniyan. ¿La xmakgkatsi?

4 Max wi tuku nalakgpaliya kmilatamat. Chu max tlakg napaxkinana chu tlakg wi tuku namaskiwinana chu nakatapatiya tiku nitlan xlikatsinikgonitan. Putum milatamat xlimasiya pi mastaya paxtikatsinit xlakata tuku tlawaka mimpalakata.

5. ¿Tuku xlakata tlan wanaw pi Dios kinkamaxkinitan tamaskiwin nema nitu xtachuna?

5 Tamaskiwin nema Dios kinkamaxkinitan ni tatalakxtumi liʼakxilhtit nema aku lichuwinaw (1 Ped. 3:18). Kaj kalakpuwanti, putum makglakgalhinanin akinin, wa xlakata niyaw (Rom. 5:12). Pero Dios lu kinkapaxkiyan asta makamilh xKgawasa xlakata xnilh kimpalakatakan (Heb. 2:9). Pero xtamakamastan Cristo wi atanu tuku tlawa. Namasputu linin putum kilhtamaku (Is. 25:7, 8; 1 Cor. 15:22, 26). Putum tiku kanajlanikgo Jesús xatapaxuwan nalatamakgo chu nakgalhikgo takaksni xliputum kilhtamaku, makgapitsi kʼakgapun chu makgapitsi unu kKatiyatni (Rom. 6:23; Apocalipsis [Revelación] 5:9, 10). Pero tamaskiwin nema kimaxkinitan Dios wi atanu tuku tlan limin.

6. 1) ¿Tuku atanu nalipaxuwaya kkakilhtamaku nema aku mima? 2) ¿La nalimasiyayaw pi paxtikatsiniyaw xtapaxkit Dios?

6 ¿Tuku atanu xalakwan tamaskiwin limin nema kinkamaxkinitan Dios? Katiyatni akgtum paraíso nawan, tiku tatatlakgo napakskgo chu tiku nikgonit nalakastakwanamparakgo (Is. 33:24; 35:5, 6; Juan 5:28, 29). Lu kapaxkiyaw Jehová chu Jesús xlakata kinkamaxkikgon uma tamaskiwin nema nitu xtachuna. ¿La tlan nalimasiyayaw pi paxtikatsiniyaw? Pulana, nachuna natlawayaw la Cristo. Xlipulaktiy, nakapaxkiyaw kinatalankan. Chu xlipulaktutu, nakatapatiyaw amakgapitsin xliputum kinakujkan.

KATLAWAW LA TLAWALH CRISTO

7, 8. Komo paxtikatsiniyaw xtapaxkit Jesús, ¿tuku kilimakgkatsitkan chu tuku natlawaputunaw?

7 Xapulana, tapaxkit nema kinkakgalhiniyan Dios xlitlawat pi nalimaklakaskinaw kilatamatkan xlakata namaxkiyaw kakni Jesús. Apóstol Pablo wa: «Sampi wa xtapaxkit nCristo, fuersaj kinkamatlawiyan» (kalikgalhtawakga 2 Corintios 5:14, 15). Pablo xkatsi pi komo paxtikatsiniyaw xtapaxkit Jesús, namakgkatsiyaw pi lu napaxkiputunaw chu namaxkiputunaw kakni. Akxni liwana akgatekgsaw tuku Jehová tlawanit kimpalakatakan, latamayaw la lakaskin Jesús. ¿La tlawayaw?

8 Kilitlawatkan xliʼakxilhtit Cristo, nastalaniyaw la tlawalh (1 Ped. 2:21; 1 Juan 2:6). Akxni kakgalhakgaxmataw Dios chu Cristo, kalimasiyaniyaw pi kapaxkiyaw. Jesús wa: «Wa nti nkgalhiy nkilimapakgsin, na tlaway ntu wan, wa yuma wa nti lu[...] kimpaxkiy, chu wa nti nkimpaxkiy, na napaxkiy nkinTlat, chuj chi nkit nakpaxkiy, na naktasiyuniy» (Juan 14:21; 1 Juan 5:3).

9. ¿Tuku kinkamatlawiputunkanan?

9 Xlakata la uku, titaxtuma kilhtamaku akxni lakapastakkan akxni tinilh Cristo, kililakpuwanatkan la maklakaskimaw kilatamatkan  (kaʼakxilhti recuadro «¿Tuku kilhchanima?»). Akstu kakinkakgalhskinkan: «¿Tuku ktlawama chuna la xtlawa Jesús? ¿Wi atanu nema tlakg tlan xaktlawalh kkilatamat?». Lu xlakaskinka nakinkatlawanikanan umakgolh takgalhskinin, xlakata kakilhtamaku kinkamatlawiputunan tuku tlawakgo putum latamanin (Rom. 12:2). Komo ni kuenta natlawayaw, max na natsukuyaw tlawayaw tuku tlawakgo tiku wankan pi lakgskgalalan, tiku lhuwa kalakgapaskan chu tiku lhuwa kalakgapaskan ktakgaman (Col. 2:8; 1 Juan 2:15-17). ¿La natayaniyaw putum uma?

10. 1) ¿Tuku takgalhskinin akstu nakinkatlawanikanan xlakata talakatsuwima akxni natalakapastaka akxni tinilh Cristo? 2) ¿Tuku max nalakgpaliyaw kkilatamatkan? (Kaʼakxilhti xapulana dibujo).

10 Uma kilhtamaku nema talakatsuwima akxni nalakapastakaw akxni tinilh Cristo, lu xlakaskinka naʼakxilhaw la lhakgananaw, kintatlakgnikan, películas, teléfono celular, computadora o tableta. Akstu kakinkakgalhskinkan: «¿Xakmaxanalh komo xkiʼakxilhli Jesús la klhakgananit?» (kalikgalhtawakga 1 Timoteo 2:9, 10). «¿Klimasiya la klhakganan pi kstalani xliʼakxilhtit Cristo? ¿Nalakgati Jesús películas nema kakxilha chu tatlakgni nema kkgaxmata? ¿Xakmasakwanilh Jesús kicelular o kintableta? ¿Tlan xakmasiyanilh Jesús kivideojuegos chu tlan xakwanilh tuku xlakata klakgati?». Komo paxkiyaw Jehová, ni kilikgalhitkan tuku ni xlikgalhit kstalanina Cristo, maski lu tuwa namakgkatsiyaw (Hech. 19:19, 20). Akxni tamakamastaniw Jehová, waniw pi xʼamaw limaklakaskinaw kilatamatkan xlakata nalimalankiyaw Cristo. Wa xlakata ni kilikgalhitkan nema natlawa pi tuwa namakgkatsiyaw nastalaniyaw xliʼakxilhtit Jesús (Mat. 5:29, 30; Filip. 4:8).

11. 1) ¿Tuku atanu natlawayaw komo paxkiyaw Jehová chu Jesús? 2) ¿La tlan nakamakgtayayaw amakgapitsin xalak congregación?

11 Atanu tuku tlan natlawayaw komo paxkiyaw Jehová chu Jesús, wa xatapaxuwan nalichuwinanaw Dios chu nakamasiyaniyaw latamanin (Mat. 28:19, 20; Luc. 4:43). Xlakata talakatsuwima akxni natalakapastaka akxni tinilh Cristo, ¿tlan nalakkaxwiliyaw precursores auxiliares nalitaxtuyaw chu nalichuwinanaw Dios 30 o 50 horas? Kalilakpuwanti xlakata chatum tala tiku kgalhi 84 kata tiku ninita xpuskat. Xla xlakpuwan pi nila precursor auxiliar xlitaxtulh xlakata xkata chu xtatatla. Pero precursores tiku lakatsu xwilakgolh limakgtayakgolh putlaw chu laksakkgolh niku tlan xlichuwinalh Dios. Xlakata chuna makgtayaka tlan lichuwinalh Dios 30 horas akgtum papaʼ. ¿Wi tiku tlan xmakgtayaw xalak kincongregacionkan na xliskujli la precursor marzo o abril? Xlikana pi ni kimputumkan tlan precursor litaxtuyaw. Pero tlan nalimaklakaskinaw kinkilhtamakujkan chu kilitliwakgakan xlakata tlakg naskujnaniyaw Jehová. Komo chuna natlawayaw, nalimasiyayaw pi paxtikatsiniyaw xtapaxkit Cristo, chuna la tlawalh apóstol Pablo. ¿Tuku atanu tlan natlawayaw komo paxtikatsiniyaw xtapaxkit Dios?

KAKAPAXKIW KINATALANKAN

12. Komo lakaskinaw pi kakinkapaxkin Dios, ¿tuku kilitlawatkan?

12 Xlipulaktiy, tapaxkit nema kinkakgalhiniyan Dios xlitlawat pi na nakapaxkiyaw kinatalankan. Apóstol Pablo tsokgli: «Chuna Dios nkinkapaxkinitan, [...] na chuna nkilalipaxkitatkan nchatunu amakgapitsin» (1 Juan 4:7-11). Komo lakaskinaw pi kakinkapaxkin Dios, kilipaxkitkan kinatalankan (1 Juan 3:16). ¿La nakalimasiyaniyaw tapaxkit?

13. ¿Tuku tlan liʼakxilhtit kinkamakgxtakgnin Jesús?

 13 Jesús kinkawilinin liʼakxilhtit xlakata la nakapaxkiyaw amakgapitsin. Akxni xlama kKatiyatni, tlakg kamakgtayalh latamanin tiku xtaktujukgo. Kamapaksalh tiku xtatatlakgo, tiku nila xtlawankgo, lakgaxokgo, kgokgo chu akgatapanin (Mat. 11:4, 5). Jesús ni chuna xwanit la xpulalinanin takanajla, xla xlakgati kamasiyani latamanin tiku xkatsiniputunkgo xlakata Dios (Juan 7:49). Xkapaxki tiku ni lanka xkamakgkatsikan chu xliskuja nakamakgtaya (Mat. 20:28).

¿Tlan namakgtayayaw chatum tala tiku lina kata na nalichuwinan Dios? (Kaʼakxilhti párrafo 14).

14. ¿Tuku tlan natlawayaw xlakata nakalimasiyaniyaw tapaxkit natalan?

14 Akxni natalakapastaka akxni tinilh Cristo tlan nalakpuwanaw ama kilhtamaku xlakata la nakamakgtayayaw natalanin xalak kincongregacionkan, tlakg nakamakgtayayaw tiku linkgoya kata. ¿Tlan xkalakgapaxialhnaw, xkaliniw tsinu liwat, xkamakgtayaw tuku talakaskin kxchikkan, xkaliw ktamakxtumit o nakawaniyaw pi akxtum nakatalichuwinanaw Dios? (Kalikgalhtawakga Lucas 14:12-14). Tapaxkit nema kinkakgalhiniyan Dios nakalimasiyaniputunaw tapaxkit kinatalankan.

KATAPATINAW XLIPUTUM KINAKUJKAN

15. ¿Tuku kilikatsitkan kimputumkan?

15 Xlipulaktutu, tapaxkit nema kinkakgalhiniyan Dios xlitlawat pi nakatapatiyaw kinatalankan. Kimputumkan Adán kinkamatitaxtininitan talakgalhin chu linin, wa xlakata niti la wan pi ni maklakaskin xtamakamastan Jesús. Asta kskujni Dios tiku nikxni makgxtakga lakaskin talakgmaxtut. Kimputumkan liwana kilikatsitkan pi Dios lhuwa tuku kinkatapatinitan. ¿Tuku xlakata lu xlakaskinka nakatsiyaw uma? Naʼakxilhaw xtakgalhtin kʼakgtum liʼakxilhtit nema Jesús mastalh.

16, 17. ¿Tuku xkinkalimasiyaniputunan Jesús liʼakxilhtit xlakata mapakgsina tiku tapatinalh maski lhuwa tuku xlaklinikan?

16 Jesús lichuwinalh akgtum liʼakxilhtit xlakata chatum skujni tiku xlaklini mapakgsina 60 millones tumin xla plata. Pero mapakgsina nialh maxokgelh ama lhuwa tumin. Alistalh, watiya ama skujni ni tapatilh achatum xtaskujni tiku kaj 100 tumin xla plata xlaklini. Komo ama skujni xpaxtikatsinilh tuku xtapatinit mapakgsina, xtapatilh xtaskujni. Akxni mapakgsina katsilh tuku xtlawanit ama nitlan skujni, lu sitsilh. Wa xlakata mapakgsina tasanilh chu wanilh: «Xlipaks yama ntu xkilipiniya, paks [ktapatin] xpalakata mpi kiskini litlan. ¿Tu na xmininiyan nakgalhiniya ntalakgalhaman mintaskujni, xtachuna lantla nkit kkgalhinin ntalakgalhaman?» (Mat. 18:23-35). ¿Tuku xmasiyaputun Jesús akxni wililh uma liʼakxilhtit? Pi akxni Jehová kinkatapatiyan kintalakgalhinkan, kinkatapatiyan tuku lu lhuwa xlakliniyaw. Komo lu paxtikatsiniyaw, ¿tuku kilitlawatkan?

17 Xlakata kgalhkgalhimaw nachan kilhtamaku  akxni natalakapastaka akxni tinilh Cristo, kalakpuwaw: ¿Nitlan kilikatsininit chatum tala? ¿Tuwa kmakgkatsi naktapati? Chuna katlawaw la Jehová, tiku lu tapatinamputun (Sal. 86:5; Neh. 9:17). Komo paxtikatsiniyaw pi Jehová kinkatapatiyan, na nakatapatiyaw amakgapitsin xliputum kinakujkan. Komo lakaskinaw pi Jehová kakinkapaxkin chu kakinkatapatin, kilipaxkitkan chu kilitapatitkan kinatalankan (Mat. 6:14, 15). Xlikana pi tapatinankan ni lakgpali tuku lanit, pero kinkamakgtayayan tlakg napaxuwayaw.

18. ¿Tuku makgtayalh chatum tala puskat natapati tuku nitlan xtlawa achatum tala?

18 Min kilhtamaku tuwa makgkatsiyaw natapatiyaw tuku nitlan tlawakgo kinatalankan (kalikgalhtawakga Efesios 4:32 chu Colosenses 3:13, 14). Kalichuwinaw akgtum liʼakxilhtit xla chatum tala puskat wanikan Lily. [1] Xla makgtayalh chatum tala xwanikan Carol, tiku xninita xchixku. Lily xlin niku xʼamputun Carol, xʼan tatamawanan chu atanu tuku xlimakgtaya. Maski Lily lu xmakgtaya, Carol putum kilhtamaku wi tuku ni xlakgati. Xmin kilhtamaku lu tuwa xtamakgkatsi natalalinkan. Pero Lily lu xliskuja xlakata kaj wa nalakapastaka lakwan xtayat nema xkgalhi Carol. Xlakata uma, Lily akglhuwa kata makgtayalh, asta akxni Carol tatatlalh chu nilh. Lily wan pi lu kgalhkgalhima kalakastakwanalh Carol xlakata nalakgapasa akxni nialh nakgalhi talakgalhin. Komo paxtikatsiniyaw xtapaxkit Dios, na natayaniyaw tuku nitlan tlawakgo kinatalankan. Nachuna, uma tapaxkit kinkamakgtayayan nakgalhkgalhiyaw kilhtamaku akxni kimputumkan nialh nakgalhiyaw talakgalhin chu nialh katitlawaw tuku nitlan.

19. ¿Tuku natlawayaw komo paxtikatsiniyaw tuku Dios tlawanit kimpalakatakan?

19 Xlikana, Jehová kinkamaxkinitan akgtum tamaskiwin nema nitu xtachuna. Kalimaklakaskiw kilhtamaku akxni lakapastakkan akxni tinilh Cristo xlakata nalilakpuwanaw putum tuku Jehová chu Jesús tlawakgonit kimpalakatakan. Chali chali kalimasiyaw pi lu paxtikatsininanaw. Katlawaw la tlawalh Cristo, kakapaxkiw kinatalankan chu xliputum kinakujkan katapatinaw.

^ [1] (párrafo 18): Kʼuma artículo, kalakgpalikanit makgapitsi tukuwani.