Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Enero kata 2016

«Nakkataʼanan»

«Nakkataʼanan»

«Nakkataʼanan, xlakata kkgaxmatnitaw pi Dios katalaman» (ZAC. 8:23).

TAKILHTLIN: 32, 31

1, 2. 1) ¿Tuku wa Jehová pi xʼama la kkinkilhtamakujkan? 2) ¿Tuku takgalhskinin nakgalhtiyaw kʼuma artículo? (Kaʼakxilhti xapulana dibujo).

JEHOVÁ lichuwinalh pi kkinkilhtamakujkan, «kgalhakaw lakchixkuwin» tiku tipalhuwa xtachuwinkan xchipakgolh klhakgat «judío» chu xwankgolh: «Nakkataʼanan, xlakata kkgaxmatnitaw pi Dios katalaman» (Zac. 8:23). «Judío» kilhchanima kstalaninanin Cristo tiku kalilaksaknit xespíritu santo Dios. Biblia na kalimapakuwi «xIsrael Dios» (Gál. 6:16). Chu «kgalhakaw lakchixkuwin» kilhchanima tiku nalatamakgo kKatiyatni. ¿Tuku xlakata kataʼamputunkgo tiku xatalaksakni? Xlakata katsikgo pi Jehová kamakgamakglhtinan chu makgkatsikgo pi lanka talakgalhaman akxtum nakatakakninanikgo Dios.

2 Chuna la Zacarías, Jesús masiyanilh pi xlakskujnin Dios tlan xlatalalinkgolh. Xla kawanilh ni xalhuwa borregos tiku kgalhkgalhimakgolh nalatamakgo kʼakgapun. Chu kawanilh amakgapitsi borregos tiku lakpuwankgonit nalatamakgo kKatiyatni. Jesús wa pi xputumkan «nkgamputum nawankgoy» chu kaj xakstu xʼamakgolh stalanikgo la «xmapuchwanina» (Luc. 12:32; Juan 10:16). Pero max  akstu nakinkakgalhskinkanan: ¿Talakaskin nakatsiyaw putum xtukuwanikan tiku kalaksakkanit? ¿Tuku tayat xlikgalhitkan tiku kalaksakkanit? Komo wi tiku xalakkincongregacionkan natsuku wa kaxtalanchu chu vino akxni natalakapastaka akxni tinilh Cristo, ¿la nalikatsiniyaw? Chu komo tiku wankgo pi xatalaksakni tlakg natalhuwitilha, ¿kililakgaputsatkan? Kʼuma artículo nakgalhtiyaw umakgolh akgtati takgalhskinin.

¿TALAKASKIN NAKATSIYAW PUTUM XTUKUWANIKAN TIKU KALAKSAKKANIT?

3. ¿Tuku xlakata nila liwana katsiyaw tiku naʼankgo kʼakgapun chu na namakgtapakgsikgo k144,000?

3 ¿Kilikatsitkan xtukuwanikan xatalaksakni tiku lamakgolhku kKatiyatni? Ni. ¿Tuku xlakata? Xlakata nila liwana katsiyaw komo xlikana naʼankgo kʼakgapun [1] (kaʼakxilhti nota niku kgalhsputa artículo). Xlikana pi Dios kawaninit pi naʼankgo kʼakgapun, pero tlan naʼankgo komo ni namakgxtakgkgo Jehová asta akxni nanikgo. Satanás katsi uma chu kalimaklakaskin ni xaxlikana «[...]palakachuwinanin» xlakata namakgatsankgananikgo Dios (Mat. 24:24). Tiku kalaksakkanit tlan liwana nakatsikgo pi naʼankgo kʼakgapun akxni Jehová nakamakgamakglhtinan. Nakamakgamakglhtinan akxni nialh lhuwa kilhtamaku tsankga nanikgo o akxni nina tsuku «ntlanka takatsanajwat» (Apocalipsis [Revelación] 2:10; 7:3, 14).

Kskujnin Dios kajwatiya stalaniyaw Jesús

4. Komo amakgapitsi borregos ni katsikgo xtukuwanikan tiku kalakksakkanit chu lamakgolhku kKatiyatni, ¿tuku xlakata tlan kawanikgo: «Nakkataʼanan»?

4 Xlakata amakgapitsi borregos ni katsikgo xtukuwanikan tiku kalakksakkanit chu lamakgolhku kKatiyatni, ¿tuku xlakata tlan kawanikgo: «Nakkataʼanan»? Biblia lichuwinan pi «kgalhakaw lakchixkuwin» xchipakgolh klhakgat «judío» chu xwanikgolh «Nakkataʼanan, xlakata kkgaxmatnitaw pi Dios katalaman» chuna la akxilhaw, versículo lichuwinan chatum «judío», pero alistalh wan «nakkataʼanan». Uma wamputun pi «judío», ni kaj chatum kilhchanima, wata kilhchanima putum tiku kalaksakkanit. Atanu borregos katsikgo uma, wa xlakata tlan wankgo pi kataʼankgo tiku xatalaksakni, uma wamputun pi akxtum skujnanimakgolh Jehová. Ni talakaskin nakatsikgo xtukuwanikan tiku kalaksakkanit xlakata nakastalanikgo. ¿Tuku xlakata? Xlakata Biblia wan pi kajwatiya Jesús nastalaniyaw (Mat. 23:10).

¿TUKU TAYAT XLIKGALHITKAN TIKU KALAKSAKKANIT?

5. 1) ¿Tuku ni kaj takgalhkgaman xliʼakxilhatkan tiku kalaksakkanit? 2) ¿Tuku xlakata ni kaj takgalhkgaman uma tachuwin?

5 Tiku kalaksakkanit ni kaj takgalhkgaman xliʼakxilhatkan tuku wan 1 Corintios 11:27-29 (kalikgalhtawakga). Komo chatum xatalaksakni nialh tlan natalalin Jehová chu chuntiya xwalh kaxtalanchu chu vino akxni natalakapastaka akxni tinilh Cristo, xtachuna la kaj «nalikgamanan». Uma kilhchanima, pi ni masta kakni (Heb. 6:4-6; 10:26-29). Uma  ni kaj takgalhkgaman, komo tiku laksakkanit namakgatsankganani Jehová, ni katimaxkika «[...]tatakin ntu xala talhman [...] xpalakata nCristo Jesús» (Filip. 3:13-16).

6. ¿La xlikgalhitkan xtayatkan tiku kalaksakkanit?

6 Pablo kawanilh tiku xkalaksakkanit: «Kkaskiniyan litlan mpi xtachuna nalatapayatit wa lantlata xlilat wa ntu nkalitasanikanitantit». ¿La chuna xtlawakgolh? Pablo kawanilh: «Lu[...] anan ntataktujun, chu ntasmalhwan, chu ntapaxuwanaliyan ntu nalakgalhiniyatit nchatunu amakgapitsin lantla lapaxkiyatit». Na kamalakapastakalh pi xliskujkgolh xlakata tlan nalatalalinkgo chu nakgalhikgo takaksni (Efes. 4:1-3). Espíritu santo kamakgtaya kskujnin Dios xlakata nataktujukgo, ni lanka nakamakgkatsikan (Col. 3:12). Wa xlakata tiku kalaksakkanit ni lakpuwankgo pi tlakg xlakaskinka ni xawa amakgapitsin. Ni lakpuwankgo pi xlakata kalaksakkanit tlakg kgalhikgo espíritu santo chu ni xtachuna la amakgapitsin kstalaninanin Cristo. Na ni lakpuwankgo pi tlakg akgatekgskgo Biblia. Chu na ni wanikgo amakgapitsin pi lakpuwankgo pi na xatalaksakni chu na xliwatkan kaxtalanchu chu vino. Wata liwana lakpuwankgo pi wa Jehová tiku laksaka xlakata tiku naʼan kʼakgapun.

7, 8. 1) ¿Tuku ni tlawakgo xatalaksakni? 2) ¿Tuku xlakata xatalaksakni ni chuna tlawakgo?

7 Maski tiku kalaksakkanit liwana katsikgo pi akgtum lanka talakgalhaman xlakata kamalakpuwanikanit naʼankgo kʼakgapun, ni lakpuwankgo pi tlakg tlan nakamakgamakglhtinankan ni xawa amakgapitsin (Efes. 1:18, 19; kalikgalhtawakga Filipenses 2:2, 3). Katsikgo pi akxni Jehová kalaksakli, ni kawanilh putum natalan. Na katsikgo pi makgapitsi tuwa nakanajlakgo pi xlakan xatalaksakni. Xla liwana katsi pi Biblia kinkawaniyan pi ni tunkun nakanajlaniyaw tiku nawan pi Jehová maxkinit akgtum taskujut nema lu xlakaskinka (Apoc. 2:2). Nachuna, akxni kalakgapasa amakgapitsi natalan, ni kawani pi xla xatalaksakni. ¿Tuku xlakata? Ni lakaskin pi xlakaskinka naʼakxilhkan. Asta max niti katiwanilh pi xla xatalaksakni. Na ni litlankan tuku lu lilakgatit natlawa akxni natawilayacha kʼakgapun (1 Cor. 1:28, 29; kalikgalhtawakga 1 Corintios 4:6-8).

8 Tiku kalaksakkanit ni lakpuwankgo pi kajwatiya akxtum nakatalakgo tiku na xatalaksakni, la komo xtapakgsikgolh kʼakgtum club nema xlakaskinka. Ni kaputsakgo amakgapitsin xlakata nalatachuwinankgo o akxtum nalikgalhtawakgakgo Biblia (Gál. 1:15-17). Komo tiku kalaksakkanit chuna xtlawakgolh, xwilikgolh tapapitsit kcongregación. Xlimasiyakgolh pi lakatayamakgolh espíritu santo, nema kamakgtaya xkachikin Dios xlakata nakgalhikgo takaksni chu akxtum nalakgo (kalikgalhtawakga Romanos 16:17, 18).

¿LA NAKALIKATSINIYAW TIKU WAKGO KAXTALANCHU CHU VINO?

9. ¿Tuku xlakata kuenta kilitlawatkan la kalikatsiniyaw tiku kalaksakkanit? (Kaʼakxilhti recuadro « Tapaxkit “ni tlawa tuku xalimaxana”»).

9 Jesús kawanilh kstalaninanin: «Wixin, paks natalanin». Chu alistalh kawanilh: «Wa nti ntlanka xwamputulh, namaktujukan; na wa nti xtaktujulh, namatalhmanikan» (Mat. 23:8-12). Wa xlakata, nitlan komo wi tiku tlakg xlakaskinka  naʼakxilhkan, maski xatalaksakni. Biblia kinkawaniyan pi kaʼakxilhwi xtakanajlakan lakgkgolotsin chu nachuna katlawaw, pero ni kinkawaniyan pi nastalaniyaw chatum lataman (Heb. 13:7). Xlikana pi Biblia lichuwinan pi makgapitsi nakamaxkikan «akgtuy [...] nkakni», pero ni kaj xlakata xatalaksakni, wata wa xlakata lhuwa liskujkgo akxni masiyakgo chu lichuwinankgo Dios (1 Tim. 5:17). Komo lu xlakaskinka nakaliʼakxilhaw tiku kalaksakkanit o tlakg tlan nakalikatsiniyaw ni xawa amakgapitsin, max nakamamaxaniyaw. O max natlawayaw pi laktlankajwa nawankgo (Rom. 12:3). ¡Ni tlawaputunaw nema nakamatlawi talakgalhin tiku kalaksakkanit! (Luc. 17:2).

¿La nalikatsiniya tiku wa kaxtalanchu chu vino akxni talakapastaka akxni tinilh Cristo? (Kaʼakxilhti párrafos 9 asta 11).

10. ¿La limasiyayaw pi kamaxkiyaw kakni tiku kalaksakkanit?

10 ¿La limasiyayaw pi kamaxkiyaw kakni tiku Dios kalaksaknit naʼankgo kʼakgapun? Pulaklhuwa la tlan nalimasiyayaw. Pulana, ni kakgalhskinaw la xatalaksakni litaxtukgolh, xlakata ni talakaskin akinin nakatsiyaw (1 Tes. 4:11; 2 Tes. 3:11). Na ni lakpuwanaw pi putum xfamilia na xatalaksakni. Xatalaksakni litaxtukan ni lamatitaxtinikan kfamilia (1 Tes. 2:12). Chu na ni tlawayaw takgalhskinin nema natlawa pi nitlan nalimakgkatsi achatum. Akgtum liʼakxilhtit, ni kgalhskinaw xpuskat tiku laksakkanit la makgkatsi akxni lakpuwan pi xchixku ni katitatawilalh kParaíso. Liwana katsiyaw pi kParaíso Jehová nakinkamaxkiyan putum tuku nalakaskinaw (Sal. 145:16).

11. ¿Tuku xlakata ni nakamalankiyaw tiku lu kalakgapaskan?

11 Komo nachuna nakalikatsiniyaw tiku kalaksakkanit la amakgapitsin natalan, akinin tlan nakinkakitaxtuniyan. ¿Tuku xlakata? Xlakata Biblia lichuwinan pi kcongregación natawilakgo tiku «natalanin litasiyukgo» chu asta nawankgo pi xatalaksakni (Gál. 2:4, 5; 1 Juan 2:19). Nachuna, makgapitsi tiku xatalaksakni namakgxtakgkgo Dios (Mat. 25:10-12; 2 Ped. 2:20, 21). Judas lichuwinalh pi ni “nakamalankiyaw tiku lu kalakgapaskan. Uma wamputun pi ni nakastalaniyaw amakgapitsin xalak congregación, max xlakata xatalaksakni, max lu kalakgapaskan o max akglhuwata kata skujnanimakgolh Jehová. Lu xlakaskinka natlawayaw uma tastakyaw. Komo uma natalan namakgxtakgkgo Jehová, ni katitaxlajwanilh kintakanajlakan chu akinin chuntiya naskujnaniyaw Jehová (Jud. 16).

¿KILILAKGAPUTSATKAN LA XLILHUWA XATALAKSAKNI?

12, 13. ¿Tuku xlakata ni kililakgaputsatkan niku kgalhlit wakgo kaxtalanchu chu vino?

12 Akglhuwa kata, tiku xwakgo kaxtalanchu chu vino akxni talakapastaka akxni tinilh Cristo, nialhtu xtalhuwima wata xtaktsuwima. Pero nina makgas, tsukupa lhuwan. ¿Kililakgaputsatkan xlakata uma? Ni. Kalichuwinaw pulaktati tuku xlakata.

13 «Lakgapaskgoy [«Jehová», TNM] wa nti ntapakgsinikgoy» (2 Tim. 2:19). Dios katsi tiku xatalaksakni chu tiku ni. Pero natalan tiku kaputlakgakgo niku kgalhlit wakgo kaxtalanchu chu vino akxni talakapastaka akxni tinilh Cristo ni katsikgo. Wa xlakata na anta makgtanumakgolh tiku lakpuwankgo pi  xatalaksakni. Akgtum liʼakxilhtit, makgapitsin na xwakgo kaxtalanchu chu vino pero alistalh nialh wakgolh. Chu makgapitsin max tatatlakgo kxtalakapastaknikan o max wi tuku tuwa titaxtumakgolh kxlatamatkan, uma tlawa pi nalakpuwankgo pi naʼankgo kʼakgapun. Xlakata tuku lichuwinaw, nila liwana katsiyaw niku xkgalhlitkan wilakgolhku kKatiyatni.

14. ¿Wan Biblia niku kgalhlit wilakgolh nawan kKatiyatni xatalaksakni akxni natsuku lanka takatsanajwat?

14 Akxni Jesús namin xlakata nakalin kʼakgapun tiku xatalaksakni, wilakgolh nawan kxlikalanka Katiyatni. Biblia lichuwinan pi Jesús «na namalakgachay xángeles, pixtlanka nasunukan lisunun; na namamakgstokgkgokan xtalaksaknin, lantla xlikatlanka nkatuxawat, asta kxtankgana, lakatum, chu kxalakgaputu ntani nkikgatsputa akgapun» (Mat. 24:31). Biblia masiya pi kxaʼawatiya kilhtamaku nialh lhuwa katitawilakgolh kKatiyatni tiku xatalaksakni (Apoc. 12:17). Pero ni wan niku kgalhlit wilakgolh nawan akxni natsuku lanka takatsanajwat.

15, 16. ¿Tuku pulaktiy kiliʼakgatekgsatkan o namakgachakgxiyaw xlakata tiku kalaksakkanit?

15 Kaj Jehová katsi tuku kilhtamaku kalaksaka tiku naʼankgo kʼakgapun (Rom. 8:28-30). Dios tsukulh kalilaksaka xʼespíritu makgapitsi latamanin akxni Jesús xlakastakwananita. Max ama kilhtamaku putum tiku kstalaninanin Cristo xlitaxtukgo, xatalaksakni xwankgonit. Chu alistalh, akglhuwa ciento tiku xwankgo pi kstalaninanin Cristo xlitaxtukgo, ni xaxlikana xwankgonit. Maski chuna,  ama kilhtamaku Jehová kalilaksakli espíritu santo ni lhuwa xaxlikana kstalaninanin Cristo tiku xlamakgolh. Umakgolh xlitaxtukgo la trigo nema lichuwinalh Jesús chu kstakkgolh kxlakgstipan ni xatlan tuwan (Mat. 13:24-30). Kxaʼawatiya kilhtamaku, Jehová chuntiya kalaksakma latamanin xlakata na namakgtapakgsikgo k144,000 [2] (kaʼakxilhti nota niku kgalhsputa artículo). Komo Jehová nakalaksaka makgapitsin xlakata naʼankgo kʼakgapun akxni atsinu tsankga namin lisputni, liwana katsiyaw pi tlan tuku tlawama (Is. 45:9; Dan. 4:35; kalikgalhtawakga Romanos 9:11, 16) [3] (kaʼakxilhti nota niku kgalhsputa artículo). Ni litaxtuputunaw la skujnin nema lichuwinalh Jesús kʼakgtum liʼakxilhtit. Nitlan lichuwinankgolh xmalanakan xlakata la kalikatsinilh tiku awatiya skujkgolh (kalikgalhtawakga Mateo 20:8-15).

16 Ni putum tiku xatalaksakni litaxtukgo «skujni xalipaw chu xaskgalala» (Mat. 24:45-47TNM). Chuna la kxkilhtamakujkan xapulana kstalaninanin Cristo, la uku Jehová chu Jesús ni lhuwa tiku kalimaklakaskin xlakata nakamasiyani xaxlikana lhuwa latamanin. Akxni xlamakgolh xapulana kstalaninanin Cristo, ni lhuwa tiku tlawakgolh Tatsokgni xaGriego. Chu la uku, ni lhuwa tiku kamaxkikgo xkachikin Dios «taway kilhtamaku akxni xlilat».

17. ¿Tuku katsininitaw kʼuma artículo?

17 ¿Tuku katsininitaw kʼuma artículo? Jehová wan pi atsinu ni putum kskujnin nalatamakgo kKatiyatni chu tiku natamapakgsinankgo Jesús kʼakgapun nalatamakgo. Jehová kamaxki xtatlajakan putum kskujnin, tiku «kgalhakaw lakchixkuwin» chu tiku «judío». Chu lakaskin pi xkgamputiykan kamakgantaxtikgolh watiya limapakgsin chu ni namakgatsankgananikgo Dios. Xkgamputiykan natataktujukgo. Xkgamputiykan akxtum naskujnanikgo Jehová chu akxtum nalakgo. Chu xkgamputiykan naliskujkgo xlakata nawilikgo takaksni kcongregación. Xlakata kgalhkgalhimaw nachin lisputni, chuntiya kaskujnaniw Jehová chu kastalaniw Jesús la «nkgamputum» borregos.

^ [1] (párrafo 3): Salmo 87:5, 6, wan pi max kilhtamaku nema aku mima Dios nawan xtukuwanikan tiku natamapakgsinankgo Jesús kʼakgapun (Rom. 8:19).

^ [2] (párrafo 15): Hechos 2:33 masiya pi Jesús akxtum taskuja Dios akxni chatum lataman lilaksaka espíritu. Pero tiku malakpuwani pi naʼan kʼakgapun wa Jehová.

^ [3] (párrafo 15): Tlakg natekgsa ksección: «Tuku katsiputunkgo tiku likgalhtawakgakgo» krevista La Atalaya 1 xla mayo kata 2007, páginas 30 chu 31.