Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Tuku katsiputunkgo tiku likgalhtawakgakgo

Tuku katsiputunkgo tiku likgalhtawakgakgo

¿Tuku kilhchanima pi apóstol Pablo «linka» anta «kxlikilhaktutu akgapun» chu «kparaíso»? (2 Cor. 12:2-4).

Anta klibro xla 2 Corintios 12:2, 3, Pablo lichuwinalh chatum chixku tiku «ntiliyanka kxlikilhaktutu akgapun». ¿Tiku uma? Kʼuma tatsokgni nema kamalakgachanika congregación xalak Corinto, apóstol Pablo liwana lichuwinalh pi Dios xlimaklakaskin la apóstol (2 Cor. 11:5, 23). Chu xla lichuwinalh «wantu ntimakxilhnilh nkimPuchinakan». Kʼuma tatsokgni ni kalichuwinalh atanu natalan. Wa xlakata, tlan nawanaw pi chixku tiku xlichuwinama nema wi tuku makxilhnika wa apóstol Pablo (2 Cor. 12:1, 5).

Wa xlakata, chixku tiku «linka» anta «kxlikilhaktutu akgapun» chu «kparaíso» wa Pablo (2 Cor. 12:2-4). Akxni lichuwinan pi Dios wi tuku «ntimakxilhnilh» kilhchanima pi wi tuku masiyanika nema nakgantaxtu kkilhtamaku nema aku namin.

¿Tuku «xlikilhaktutu akgapun» nema maʼakxilhnika Pablo?

Anta kBiblia, tachuwin akgapun pulaklhuwa tuku kilhchanima. Akgtum liʼakxilhtit, max na kilhchani akgapun nema akxilhaw (Gén. 11:4; 27:28; Mat. 6:26). Lakgachunin, kakilhchanima mapakgsinanin xalak kakilhtamaku (Dan. 4:20-22). Chu nachuna kilhchani tamapakgsin xalak akgapun, la komo xTamapakgsin Dios (Rev. 21:1).

Pero, ¿tuku xkilhchanima Pablo akxni lichuwinalh «xlikilhaktutu akgapun»? Lakgachunin, akxni Biblia makgtutu wi tuku lichuwinan wamputun pi lu xlakaskinka (Is. 6:3; Ezeq. 21:27; Rev. 4:8). Chuna la akxilhaw, akxni Pablo lichuwinalh «xlikilhaktutu akgapun», xlichuwinama akgtum tamapakgsin nema tlakg xlakaskinka: xTamapakgsin Cristo chu 144,000 tiku natamapakgsinankgo (kaʼakxilhti Perspicacia para comprender las Escrituras, volumen 1, páginas 473, 476). Uma tamapakgsin xla Mesías xkilhchanima apóstol Pedro, akxni tsokgli pi kgalhkgalhimaw «xasasti akgapun» nema Dios malaknunit (2 Ped. 3:13).

¿Chu tuku tlan nawanaw xlakata «paraíso» nema lichuwinalh Pablo?

Tachuwin paraíso nachuna lhuwa tuku kilhchanima. Xlipulaktum, xlakata niku pulana xlama chixku, tlan nawanaw pi wa kilhchanima Paraíso nema natawilapara kKatiyatni. Xlipulaktiy, max na kilhchanima takaksni nema xlakskujnin Dios nalipaxuwakgo anta kxasasti kakilhtamaku. Chu, xlipulaktutu, max na kilhchanima tuku lu xastlan anan anta kʼakgapun, «xparaíso Dios» nema talichuwinan kRevelación 2:7 (kaʼakxilhti Makatsinina 15 xla julio kata 2015, página 5, párrafo 8).

Max wa uma tuku pulaktutu xlilakpuwama Pablo akxni tsokgwililh tuku maʼakxilhnika nema talichuwinan klibro xla 2 Corintios 12:4.

Xlakata tuku lichuwinaw:

«Xlikilhaktutu akgapun» nema lichuwinan 2 Corintios 12:2 max wa kilhchanima xTamapakgsin Cristo chu 144,000, nema wamputun «xasasti akgapun» (2 Ped. 3:13).

Limapakuwikan «xlikilhaktutu akgapun» xlakata xTamapakgsin Dios wa tlakg xlakaskinka tamapakgsin nema anan.

Max «paraíso» niku «linka» Pablo nema maʼakxilhnika kilhchanima: 1) Paraíso nema natawila unu kKatiyatni, 2) paraíso xaʼespiritual nema naʼanan chu tlakg lanka nawan nixawa la uku chu 3) «xparaíso Dios» nema wi kʼakgapun, putum uma akxtum natawilakgo kxasasti kakilhtamaku.

Wa xlakata, xasasti kakilhtamaku nalitakgatsi «xasasti akgapun» chu «xasasti tiyat». Xasasti tuku nalakkaxwilikan namakgtanu Tamapakgsin xalak akgapun chu latamanin tiku naskujnanikgo Jehová kParaíso unu kkatiyatni.