Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Kamanan, Malakatsukina lakaskin pi kapaxuwatit

Kamanan, Malakatsukina lakaskin pi kapaxuwatit

«Limatsama kilatamat tu tlan» (SAL. 103:5, Salmos Ixtatlincan ti Talipawan Dios, SXP).

TAKILHTLIN: sjj 135, sjj 39

1, 2. Akxni nalaksaka tuku tlakg xlakaskinka mimpalakata, ¿tuku xlakata talakaskin kuenta natlawayaniya mi Malakatsukina? (Kaʼakxilhti xapulana dibujo).

KOMO wix kajku stakpat, max lhuwata tastakyaw makglhtinanita xlakata tuku natlawaya kmilatamat. Max makgalhtawakgenanin chu amakgapitsin makgpuwantinikgoyan tlakg nakgalhtawakgaya xlakata natlajaya lhuwa tumin. Pero Jehová tanu tastakyaw masta xlakata tuku natlawaya kmilatamat. Xlikana, xla lakaskin pi kuenta natlawaya mintakgalhtawakga xlakata tlan nalitamakgtayaya akxni nataxtuya kʼescuela (Col. 3:23). Pero akxni nalaksaka tuku tlakg xlakaskinka mimpalakata, waniyan pi kamasta talakaskin napulalinan xtastakyaw. Uma namakgtayayan kuenta natlawaya tuku xla lakaskin natlawayaw kʼuma xlisputni kakilhtamaku.

2 Kalakapastakti pi Jehová katsi tuku nala kkakilhtamaku chu xlakata pi kaj nialh makgas tsankga namasputukan (Is. 46:10; Mat. 24:3, 36). Nachuna, liwana kinkalakgapasan. Katsi tuku kinkamakgapaxuwayan kkilatamatkan chu tuku kinkamakgalipuwanan. Wa xlakata, maski makgapitsi tastakyaw tlan takgaxmata, pero komo ni kBiblia takilhtinit uma nitlan (Prov. 19:21).

 «NI ANAN LISKGALALA [...] KOMO NI WA MASTA JEHOVÁ»

3, 4. ¿Tuku lanikgolh Adán, Eva chu xlakkamanan xlakata stalanikgolh nixatlan tastakyaw?

3 Nixatlan tastakyaw makgasa anan. Satanás wa tiku kamaxkilh xapulana nixatlan tastakyaw latamanin. Wanilh Eva pi xla chu xchixku x’akstukan nalaksakkgo tuku natlawakgo kxlatamatkan xlakata chuna tlakg tapaxuwan xtawilakgolh (Gén. 3:1-6). Pero Satanás kaj x’akstu xlilakgaputsamaka. Xla xlakaskin pi wa xkgalhakgaxmatkgolh chu nachuna putum tiku x’amakgolh latamakgo chu wa xkakninanika wata ni wa Jehová. Pero, ¿tuku xtlawanit xpalakatakan? Kaj nitu. Wa Jehová tiku xkamaxkinit putum tuku xkgalhikgo: xtamakgaxtokgat, xastlan jardín niku xlamakgo chu akgtum makni nema ni xkgalhi talakgalhin chu tlan putum kilhtamaku xlatamakgolh.

4 Lu nitlan, pero Adán chu Eva ni kgalhakgaxmatkgolh Dios chu nialh talalinkgolh. Chuna la katsiya, lu nitlan tuku kitaxtulh. Tsukukgolh kgolonkgo chu nikgolh, chuna la akgtum xanat xnekga chu skaka akxni kikan o chukukan. Nachuna xlakkamanan patinankgolh xlakata talakgalhin (Rom. 5:12). Maski chuna, lhuwa latamanin la uku ni kgalhakgaxmatkgo Dios. Chuna latamaputunkgo chuna la xlakan lakaskinkgo (Efes. 2:1-3). Pero xlikana liwana tasiya pi «ni anan liskgalala [...] komo ni wa masta Jehová», kilhchanima, komo tastakyaw lakataki tuku wan Jehová uma nixatlan tastakyaw (Prov. 21:30).

5. 1) ¿Tuku liwana xkatsi Jehová? 2) ¿Tuku xlakata katsiyaw pi xlikana tuku wa?

5 Pero Jehová liwana xkatsi pi makgapitsi latamanin, nachuna kamanan, xlakgapasputunkgolh chu kskujnaniputunkgolh (Sal. 103:17, 18; 110:3). Xla putum kapaxki kamanan. ¿Nachuna wix anta makgtanupat? Wa xlakata lu tlan limakgkatsiya tuku laktlan maxkiyan Jehová chu lu lipaxuwaya (kalikgalhtawakga Salmo 103:5; Prov. 10:22). Chuna la na’akxilhaw, na anta makgtanuma taway xaʼespiritual, tiku laktlan amigos, tuku natlawaputuna kmilatamat chu lakgtaxtut xaxlikana.

JEHOVÁ MAXKIYAN TUKU MAKLAKASKINA XLAKATA MINTAKANAJLA

6. ¿Tuku xlakata talakaskin kuenta natlawaya mintakanajla chu la maxkiyan Jehová?

6 Animales nitu katsinikgo, pero akinin latamanin lakaskinaw namatliwakglhaw kintakanajlakan chu katsiyaw pi wa kiMalakatsukinakan tiku nakinkamaxkiyan (Mat. 4:4). Akxni kgaxmataw tuku kinkawaniyan, tekgsaw takgatekgsni, liskgalala chu tapaxuwan. Jesús lichuwinalh: «Xatapaxuwan latamakgo tiku katsikgo pi lakaskinkgo tuku xla Dios» (Mat. 5:3). Jehová maxkiyan tuku maklakaskina xlakata mintakanajla anta kxTachuwin chu klhuwa likgalhtawakga nema kinkamaxkiyan «kskujni xalipaw chu xaskgalala» (Mat. 24:45; Is. 65:13, 14).

7. ¿La nalitamakgtayaya taway xaʼespiritual nema Jehová masta?

7 Taway xaʼespiritual nema Jehová masta namaxkiyan liskgalala chu liwana nalakpuwana, nema lhuwa kuenta natlawayan (kalikgalhtawakga Proverbios 2:10-14). Akgtum liʼakxilhtit, tlan liwana nalakgapasa taʼakgsanin, la komo pi Dios nitu lama o xlakata nakgalhiyaw tapaxuwan talakaskin nakgalhiyaw lhuwa tumin chu atanu tuku lhuwa xtapalh. Nachuna namakgtayayan natayaniya nixatlan taputsan chu ni natsukuya lismaniya natlawaya tuku nitlan nakitaxtuniyan. Wa xlakata, katlawa tuku matlaniya xlakata nakgalhiya xliskgalala Dios chu tlan talakapastakni nakgalhiya. Chuna wix liwana naʼakxilha pi Jehová paxkiyan chu lakaskin tlan nakitaxtuniyan (Sal. 34:8; Is. 48:17, 18).

8. Komo la uku nalakgtalakatsuwiya Jehová, ¿la namakgtayayan kkilhtamaku nema aku mima?

 8 Kaj nialh makgas, namasputukan xkakilhtamaku Satanás chu kajwatiya Jehová tiku nakinkakuentajtlawayan. Nachuna, max namin kilhtamaku talakaskin nalipawanaw pi wa nakinkamaxkiyan tuku nawayaw (Hab. 3:2, 12-19). Wa xlakata, la uku talakaskin nalakgtalakatsuwiya minTlat xalak akgapun chu tlakg liwana natalalipina (2 Ped. 2:9). Chuna ni kuenta katitlawa tuku nitlan nala, chuna namakgkatsiya la David, tiku tsokgli: «Kanikxniwa klakapastakan y kmakglhkatsi la kintalapat; komo wix wila nak kimpaxtun, nikxni ti ama kimakgatlaja» (Sal. 16:8SXP).

JEHOVÁ NAMAXKIYAN TLAKG XATLAN AMIGOS

9. 1) Chuna la wan Juan 6:44, ¿tuku tlawa Jehová? 2) ¿Tuku xlakata lu tlan nalakgapasa atanu xtatayana Jehová?

9 Akxni lakgapasa tiku ni xtatayana Jehová, ¿la xlilhuwa lakgapasa? Ni lhuwa. Max katsiya tuku wanikan la tasiya chu atanu. Pero lu tanu akxni wix lakgapasa chatum xtatayana Jehová. Katsiya pi paxki Jehová nachuna katsiya pi wi tuku tlan akxilhli kxpalakata chu wanilh pi tlan namakgtapakgsi kxkachikin (kalikgalhtawakga Juan 6:44). Maski xalak atanu país, talismanin o la tasiya, lhuwa tuku katsiya xpalakata chu nachuna xla mimpalakata.

Jehová lakaskin pi kakgalhiw xalaktlan amigos chu naliskujaw xlakata tlakg tliwakga nakgalhiyaw kintakanajlakan (Kaʼakxilhti párrafos 9 asta 12).

10, 11. ¿Tuku watiya kgalhiyaw akinin xtatayananin Jehová chu la kinkamakgtayayan uma?

10 Akgtum liʼakxilhtit, lakapala katsiya pi watiya «tachuwin» chuwinanatit: «akgtum xatlan tachuwin» (Sof. 3:9). Kilhchanima pi minchatiykan watiya takanajla kgalhiyatit xpalakata Dios, xtastakyaw chu takgalhkgalhitin xpalakata kilhtamaku nema aku mima, chu amakgapitsi. Chu wa uma tuku tlakg xlakaskinka kilikatsitkan xpalakata chatum lataman, xlakata wa uma tlawa pi tlan nalipawanaw chu xlakata tlan lhuwa kilhtamaku natalalinaw.

11 Ni malakatsaliyaw akxni wanaw pi xlakata xtatayananin Jehová akinin kgalhiyaw tlakg xalak tlan amigos. Kgalhiya amigos xlikalanka kakilhtamaku, maski nina kalakgapasa. ¿Wi tiku tlan nachuna nawan tiku ni xtatayana Jehová?

 JEHOVÁ MAXKIYAN TUKU TLAN NATLAWAYA NEMA TLAN NAKITAXTUNIYAN

12. ¿Tuku tlan natlawaya xlakata tlakg natatliwakglha mintakanajla?

12 (Kalikgalhtawakga Eclesiastés 11:9-12:1). ¿Wi tuku makgantaxtiputuna xlakata tlakg namatliwakglha mintakanajla? Max liskujpat xlakata nalikgalhtawakgaya Biblia chali chali o tlakg namakgtayanana ktamakxtumit chu tlakg nalichuwinana Dios. Komo chuna, ¿la makgkatsiya akxni akxilha pi tlan kitaxtuniyan o akxni amakgapitsi akxilhkgo chu wanikgoyan laktlan tachuwin? Xlikana pi max lu lipaxuwaya. Chuna, xlakata wix wa pulana wiliya kmilatamat tuku xtalakaskin Dios, chuna la tlawalh Jesús (Sal. 40:8; Prov. 27:11).

13. ¿Tuku xlakata tlakg tlan skujnikan Dios nixawa nalakgchamputunaw tuku xalak kakilhtamaku?

13 Komo nalilakgaputsaya xlakata namakgantaxtiputuna tuku xla mintakanajla, namakgkasiya pi napaxuwaya chu pi wi tuku xlakaskinka tlawapat kmilatamat. Apóstol Pablo tsokgli: «Tliwekglh katawilatit kmintakanajlakan, chu na ni titalakgpaliyatit xaliʼankgalhin, nalistakatit kxtaskujut nkimPuchinakan kakatsitit mpi wa mintaskujutkan ntu ntlawapatit xpalakata nkimPuchinakan, ni kaj kgoxaj tlawayatit» (1 Cor. 15:58). Latamanin tiku liskujkgo xlakata natlawakgo tuku lakgchamputunkgo kʼuma kakilhtamaku, la komo natlajakgo tumin o lu nakalakgapaskan, ni kgalhikgo xaxlikana tapaxuwan (Luc. 9:25). Chuna la naʼakxilhaw, mapakgsina Salomón chuna titaxtulh (Rom. 15:4).

14. ¿Tuku katsiniya xlakata tuku tlawalh Salomón?

14 Salomón, tiku xkgalhi lhuwa litliwakga chu lhuwa tumin, laksakli nalipaxuwa tuku xalak kakilhtamaku xlakata xʼakxilhputun la nakitaxtuni (Ecl. 2:1-10). Tlawalh chiki, lakkaxwililh jardines chu parques, tlawalh putum tuku xlakaskin. ¿Tlan limakgkatsilh chu lipaxuwalh uma? Xla lichuwinalh pi akxni lilakpuwa putum tuku xtlawanit, akxilhli pi kaj nitu xlitaxtu chu nitu xʼanan tuku xlikana lhuwa xtapalh (Ecl. 2:11). ¿Wi tuku tlan nakatsiniya uma lu tlan liʼakxilhtit?

15. ¿Tuku xlakata xlakaskinka nakgalhiya takanajla chu la nalitamakgtayaya, chuna la wan Salmo 32:8?

15 Makgapitsi latamanin wi tuku katsinikgo kxlatamatkan akxni titaxtukgo tuku nitlan chu lipatinankgo. Jehová ni lakaskin pi chuna naʼakgspulayan. Lakaskin pi nakgaxpatniya chu nakgalhakgaxpata. Wa xlakata talakaskin nakgalhiya takanajla, pero nikxni katilakpuwanti pi nitlan tuku laksakti natlawaya. Chu Jehová ankgalhin nalakapastaka tapaxkit nema limasiyani xlakata xtukuwani (Heb. 6:10). Wa xlakata kaliskujti namatliwakglha mintakanajla. Chuna nakatsiya pi putum tuku waniyan minTlat xalak akgapun wix tlan nakitaxtuniyan (kalikgalhtawakga Salmo 32:8).

JEHOVÁ NAMAXKIYAN TALAKASKIN NALAKSAKA TUKU NATLAWAYA

16. ¿Tuku xlakata lanka xtapalh naliʼakxilhaw nalaksakaw tuku natlawayaw chu liwana namaklakaskinaw?

16 Pablo lichuwinalh: «Ntani anan kspiritu nkimPuchinakan, kiʼakstu nkuintajkan ntu natlawaputunaw» (2 Cor. 3:17). Jehová lakgati laksaka tuku natlawa chu akinin kinkatlawan xlakata nachuna natlawayaw. Pero nachuna lakaskin liwana nalimaklakaskina, xlakata uma namakgtayayan. Xlikana pi max lakgapasa kamanan tiku akxilhkgo tiku nitu lhakganankgonit, tlawakgo talakgxtumit xalimaxana, takgaman nema kalipekua wili xlatamatkan, maklakaskinkgo  drogas o wakgo lhuwa kuchu. Max lipaxuwakgo tuku tlawakgo. Pero max ankgalhin nitlan kakitaxtuni: max lu lismanikgo, tatatlakgo o asta nikgo (Gál. 6:7, 8). Lakpuwankgo pi kgalhikgo lakgtaxtut, pero ni xlikana (Tito 3:3).

17, 18. 1) ¿Tuku xlakata wanaw pi kgalhakgaxmatkan Jehová xlikana kinkalakgmaxtuyan? 2) ¿Tuku litalakgpali xlakata Adán chu Eva tlan xlaksakkgo tuku xtlawakgo xapulana chu la kakitaxtuni latamanin akxni laksakkgo tuku natlawakgo la uku?

17 Kgalhakgaxmatkan Jehová kinkamakgtayayan ni natatatlayaw chu kinkamaxkiyan talakaskin liwana nalaksakaw tuku natlawayaw (Sal. 19:7-11). Nachuna, akxni liwana namaklakaskina uma, kilhchanima pi ni namalakatsaliya xlimapakgsin chu xtastakyaw Dios, chuna nakalimasiyaniya minatlatni chu Jehová pi tlan nalaksaka tuku natlawaya. Chu tuku lakaskin Dios wa pi nakamaxki talakaskin xlakskujnin pi «natalipaxuwakgoy xlakgskgatankan Dios wa yuma lilakgatit ntalakgtaxtun ntu namin» (Rom. 8:21).

18 Wa uma tuku Adán chu Eva xkgalhikgo xapulana. ¿Lhuwa tuku kawanilh Dios pi ni xtlawakgolh? Kaj pulaktum: pi ni xwakgolh xatawakat kgantum kiwi (Gén. 2:9, 17). ¿Lakpuwana pi nitlan o lu tuwa tuku kawanika? Xlikana pi ni. Lu tanu la uku kilhtamaku xlakata latamanin lhuwa limapakgsin wilikgo chu fuerza tlawakgo pi nakgalhakgaxmatkan.

19. ¿La kinkamasiyanikgoyan Jehová chu Jesús nakgalhiyaw xaxlikana lakgtaxtut?

19 Xliskgalala Jehová litasiya la kinkalikatsiniyan. Ni lhuwa limapakgsin kinkamaxkiyan, wata lakatsuku kinkamasiyaniyan xlimapakgsin. Xla lakaskin pi xtastakyaw nakinkapulalinan chu nalakgmakganaw tuku nixatlan (Rom. 12:9). Tekgsaw akgtum tlan liʼakxilhtit xlakata la masiyalh Taʼakgchuwin xalak Sipi, niku Jesús lichuwinalh tuku nakinkamatlawiyan talakgalhin (Mat. 5:27, 28). Xlakata wa naMapakgsinan kxTamapakgsin Dios, chuntiya nakinkastakyawayan kxasasti kakilhtamaku xlakata naʼakxilhaw tuku tlan chu tuku nitlan (Heb. 1:9). Nachuna nakinkamakgtayayan nakgalhiyaw xatlan kimaknikan chu kintalakapastaknikan. Kalilakpuwanti: nialh katimakgkatsi pi tlawaputuna talakgalhin chu nialh katilipatinanti talakgalhin. Chuna nakgalhiya «lilakgatit ntalakgtaxtun» nema Jehová malaknuninitan.

20. 1) ¿La maklakaskin Jehová xlakata natlawa tuku lakaskin? 2) ¿La kinkamakgtayayan xliʼakxilhtit Dios?

20 Xlikana nikxni katitlawaw putum tuku lakaskinaw, xlakata ankgalhin wa nakinkapulalinan xtapaxkit Dios chu amakgapitsin. Xlikana, Jehová kajwatiya lakaskin pi kamakglhkatiw xliʼakxilhtit. Maski xla tlan tlawa putum tuku lakaskin, nichuna tlawa xlakata kapaxki amakgapitsin (1 Juan 4:7, 8). Wa xlakata akinin tlan nalaksakaw tuku natlawaputunaw komo namakglhkatiyaw Dios.

21. 1) ¿Tuku wanilh David Jehová? 2) ¿Tuku nalichuwinanaw kʼatanu artículo?

21 ¿Lanka xtapalh liʼakxilha tuku Dios maxkinitan? Kʼuma artículo lichuwinaw la xlilhuwa kgalhiyaw liwat xla kintakanajlakan, xalaktlan amigos, tuku natlawayaw kkilatamatkan chu xlakata tlan natlawayaw tuku lakaskinaw (Sal. 103:5). Max paxuwaya la David akxni wanilh Jehová: «Wix kimasininita xatlan tiji nima chan nak lipaxaw latamat. Akxni latamakan nak milakatin, tlantiya lipaxaw tamakglhkatsi; kanikxniwa lan nakmakglhkatsi nak mimpaxtun» (Sal. 16:11SXP). Kʼatanu artículo nalichuwinanaw atanu tuku lhuwa xtapalh nema tekgsaw kSalmo 16. Uma tlan namakgtayayan liwana nakatsiya la tapaxuwan natawilaya kmilatamat.