Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Diciembre kata 2016

Lakgtaxtunitaw xlakata xtalakgalhaman Dios nema ni kinkamininiyan

Lakgtaxtunitaw xlakata xtalakgalhaman Dios nema ni kinkamininiyan

«Talakgalhin ni mimalanakan xliwanat, [...] wata [...] xtalakgalhaman Dios nema ni kinkamininiyan» (ROM. 6:14).

TAKILHTLIN: 2, 29

1, 2. ¿La kinkamakgtayayan Romanos 5:12?

ROMANOS 5:12 wan: «Ntsukulh ntalakgalhin nkatuxawat nkaj xpalakata nchatum nchixku, pus wa linin nkitaxtunilh ntalakgalhin; cha nchu linin, chuna nkgalhikgolh xlipaks nchixkuwin sampi paks lakgalhinankgolh». Liwana lakgapasaw uma versículo xlakata putum kilhtamaku maklakaskinaw akxni kamasiyaniyaw latamanin tuku wan Biblia.

2 Uma versículo makglhuwa maklakaskinkan klibro ¿Tuku xlikana masiya Biblia? Akxni katalikgalhtawakgayaw capítulos 3, 5 chu 6 kinkamanankan o amakgapitsi latamanin, max likgalhtawakgayaw Romanos 5:12. Limaklakaskinaw nakamakgtayayaw naʼakgatekgskgo tuku xlakata kaTiyatni ni akgtum paraíso, tuku xlakata lakaskinaw talakgmaxtut chu tuku xlakata niyaw. Pero uma na tlan nakinkamakgtayayan kimputumkan xlakata lhuwa xtapalh naʼakxilhaw la talalinaw Jehová. Nachuna, tlan nakinkamakgtayayan tlakg nakgalhakgaxmataw chu chuntiya  nakgalhkgalhiyaw tuku kinkamalaknuninitan.

3. ¿Tuku kililakapastakatkan?

3 Kimputumkan kililakapastakatkan pi akinin makglakgalhinanin chu makglakgalhinanaw chali chali. Jehová katsi pi akinin makglakgalhinanin, pero xalakgalhamana chu kinkatapatiputunan (Sal. 103:13, 14). Jesús kinkamasiyanin pi naskiniyaw Dios kakinkatapatin (Luc. 11:2-4). Komo Jehová kinkatapatinitan kintalakgalhinkan, nialh kililakapastakatkan. ¿Tuku xlakata tlan kinkatapatiyan Jehová? Kaʼakxilhwi xatakgalhtin.

¿TUKU XLAKATA JEHOVÁ TLAN KINKATAPATIYAN?

4, 5. 1) ¿Tuku nakinkamakgtayayan xlakata naʼakgatekgsaw pi Jehová tlan kinkatapatiyan? 2) ¿Tuku «xtalakgalhaman Dios nema ni kinkamininiyan»?

4 Carta xla Romanos kinkamakgtayayan naʼakgatekgsaw tuku xlakata Jehová tlan kinkatapatiyan, pero tlakg kinkamakgtayayan capítulo 6. Anta kRomanos 3:23, 24, apóstol Pablo lichuwinalh «mpi paks lakgalhinankgolh», chu wampara: «Kaj litlan litamalulokgnikgoy xpalakata xlipaxkatsinit Dios, mpi lakgalhamankgokan wa xpalakata lantla lakgmaxtukgolh nCristo Jesús». Akxni Pablo lichuwinalh xtalakgalhaman Dios nema ni kinkamininiyan, xkilhchanima pi Dios wi tuku tlawalh kimpalakatakan chu nitu kinkaskinin, tuku ni akinin tlajaw chu ni kinkalakgchanan nakinkamaxkikanan.

5 Chatum tiku lakputsanan, wan pi talakgalhaman nema ni kinkamininiyan, atsinu ni putum kilhtamaku kilhchani tuku tlawanit Dios chu Cristo xlakata nalakgmaxtukgo latamanin ktalakgalhin chu klinin. Wa xlakata, Traducción del Nuevo Mundo wan «xtalakgalhaman Dios nema ni kinkamininiyan». Kaʼakxilhwi tuku tlawanit Dios kimpalakatakan chu la xtalakgalhaman kinkamakgtayayan la uku chu la kinkamaxkiyan takgalhkgalhin kkilhtamaku nema aku mima.

Jehová kinkalimasiyanin talakgalhaman nema ni kinkamininiyan xlakata mastalh Jesucristo

6. ¿Tiku tlan nakakitaxtunikgo xtalakgalhaman Dios nema ni kinkamininiyan chu la nakitaxtu?

6 Xlakata xtalakgalhin Adán, kimputumkan kgalhiyaw talakgalhin chu niyaw. Wa xlakata Biblia wan pi linin tanulh kkakilhtamaku xlakata ni kgalhakgaxmatnalh «nchatum nchixku», Adán. Pero Jehová limasiyalh talakgalhaman nema ni kinkamininiyan chu mastalh tuku nakalilakgmaxtu putum latamanin, «Jesucristo» (Rom. 5:12, 15, 17). Wa xlakata kimputumkan tlan nalitamakgtayayaw xtalakgalhaman Dios nema ni kinkamininiyan. Xlakata Jesucristo kgalhakgaxmatnalh, lhuwa xaʼakgstitum nakaliʼakxilhkan chu tlan nalatamakgo putum kilhtamaku (Rom. 5:19, 21).

7. ¿Tuku xlakata talakgmaxtut akgtum tamaskiwin nema ni kinkamininiyan chu kinkalimasiyaniyan xtalakgalhaman Dios?

7 Talakgmaxtut akgtum tamaskiwin nema ni kinkamininiyan chu nachuna xtalakgalhaman Dios. Kalilakpuwaw uma: Jehová kinkakgalhinin talakgalhaman, asta kinkamaxkin tuku tlan nalilakgtaxtuyaw ktalakgalhin chu klinin. Pero xla ni xlakgchan namasta xkgawasa  xlakata nakinkalakgmaxtuyan. Nachuna, niti lakgchan tuku tlawakgonit Jehová chu Jesús xlakata nakinkatapatikanan chu nalatamayaw putum kilhtamaku. Chuna la nalinaw kilatamatkan tlan nalimasiyaniyaw Dios pi lu paxtikatsiniyaw.

KAPAXTIKATSINIW XTALAKGALHAMAN DIOS NEMA NI KINKAMININIYAN

8. ¿Tuku tayat nalakgmakganaw?

8 Katsiyaw pi Dios kinkatapatiputunan kintalakgalhinkan, asta maski lanka talakgalhin. Pero wi akgtum tayat nema kililakgmakganatkan. Nikxni kalakpuwaw pi xlakata Jehová lu xalakgalhamana tlan natlawayaw tuku nitlan chu nitu katilalh. Makgapitsi kstalaninanin Cristo kxapulana siglo chuna xlakpuwankgo, maski xlamakgolhku makgapitsi apóstoles (kalikgalhtawakga Judas 4). La uku na kuenta kilitlawatkan chu ni namastayaw talakaskin pi amakgapitsin latamanin tsinu tsinu chuna nakinkamalakpuwanikgoyan.

9, 10. ¿Tuku xlakata Pablo wa pi xla chu amakgapitsin «nininitaw ntalakgalhin»?

9 Pablo kawanilh kstalaninanin Cristo pi nitlan komo xlakpuwankgolh pi Dios xʼama katapati komo xtlawakgolh tuku nitlan. Kawanilh pi xlakgmakgankgolh uma tapuwan xlakata «xninikgonit ntalakgalhin» (kalikgalhtawakga Romanos 6:1, 2). ¿Tuku xwamputun?

Namastayaw talakaskin nakinkamatlawiyan kintalakapastaknikan chu tuku kgalhiputunaw nema nitlan, o namakgatlajayaw

10 Xlakata talakgmaxtut, Dios tapatilh xtalakgalhin Pablo chu amakgapitsi kstalaninanin Cristo kxapulana siglo. Jehová kalilaksakli espíritu santo xlakata xkamanan xlitaxtukgolh. Komo ni xmakgxtakgkgolh, k’akgapun xlatamakgolh chu xtamapakgsinankgolh Cristo. Pero ama kilhtamaku, xlamakgolhku kkaTiyatni. ¿Tuku xlakata Pablo wa pi «nininitaw ntalakgalhin»? Xlakata putum xlakgpalinit xlatamat. Pablo limaklakaskilh xli’akxilhtit Jesús xlakata nalichuwinan uma. Wa pi linin nialh xmalana xlitaxtuni Jesús xlakata xlakastakwananit la chatum espíritu tiku nikxni xnilh. Nachuna, xkitaxtu la xnikgonit kstalaninanin Cristo, pero xkgalhikgo latamat xpalakata Dios chu xlakata Cristo Jesús (Rom. 6:9, 11). Putum xtalakgpalinit xlatamatkan, xlakata nialh xmastakgo talakaskin pi nakamatlawi tuku nitlan xtapuwankan. La uku lu xliskujkgo namakgapaxuwakgo Dios.

11. ¿La «nininitaw ntalakgalhin» kstalaninanin cristo la uku?

11 ¿La «nininitaw ntalakgalhin» kstalaninanin Cristo la uku? Max xapulana, tlawaw lhuwa talakgalhin xlakata ni xkatsiyaw tuku xlakpuwan Jehová. Pablo wa: «Xtamastaninitantit ktalakgalhin» (Rom. 6:19, 20). Pero akxni katsiniw kBiblia la lakaskin Dios pi nalatamayaw, lakpuwaw nalakgpaliyaw kilatamatkan, natamakamastaniyaw chu natamunuyaw. Xliputum kinakujkan xkgalhakgaxmatputunaw Jehová chu chuna xlatamaputunaw chuna la lakgati. Kinkalakgmaxtukan «ktalakgalhin», chu na wa: «Ntamakamastaninitantit natlawayatit wa ntu akgstitum» (Rom. 6:17, 18).

12. ¿Tuku kililakpuwanatkan natlawayaw?

12 Pablo wa: «Ni alh anu kamalanalh ntalakgalhin kmintiyatliwakan ntu nkaj xalinit, mpala fuerza nalakgachixkuwiyatit xtatlawaputu» (Rom. 6:12). Wa xlakata kililakpuwanatkan tuku natlawayaw. Namastayaw talakaskin nakinkamatlawiyan kintalakapastaknikan chu tuku kgalhiputunaw nema nitlan, o namakgatlajayaw. Kakinkakgalhskinkan:  «¿Kmasta talakaskin pi lu tliwakga nawan nitlan kintapuwan chu kimatlawi tuku nitlan? ¿O tunkun klakgmakgan?». Komo xlikana paxtikatsiniyaw xtalakgalhaman nema ni kinkamininiyan, naliskujaw xlakata namakgapaxuwayaw.

TLAN NAMAKGATLAJAYAW TALAKGALHIN

13. ¿Tuku liʼakxilhtit xalamakgasa kinkamasiyaniyan pi na tlan natlawayaw tuku xaʼakgstitum?

13 Kalichuwinaw makgapitsi liʼakxilhtit tuku lalh kxapulana siglo pi na tlan natlawayaw tuku xaʼakgstitum. Klanka kachikin Corinto, makgapitsin kgalhananin xwankgonit, xtatalakgxtumikgo xtachixkukan, xtlawakgo talakgxtumit xalimaxana, xkakninanikgo ídolos chu xkgachikgo. Pero akxni lakgapaskgolh Jehová, paxkikgolh chu lakgpalikgolh xtayatkan. Xlimaxanankgo tuku xtlawakgonit (Rom. 6:21; 1 Cor. 6:9-11). Kstalaninanin Cristo tiku xlamakgolh kRoma na talakaskilh nalakgpalikgo xtayatkan. Pablo kawanilh: «Na ni mpala timakamastayatit ntu makgapitzin xla mintiyatliwakan ktalakgalhin mpala natlaway wa ntu ni tlan, chi wampi wata wa Dios nkatamakamastanitit, xtachuna nti lakgtaxtukgonit klinin, wata klatamat nchu wilakgo. Na wa Dios nkamakamastanitit mintiyatliwakan lakimpi wa ntu akgstitum natlaway mintiyatliwakan» (Rom. 6:13). Pablo liwana xkatsi pi tlan xtlawalh tuku xaʼakgstitum chu xlipaxuwalh xtalakgalhaman Dios nema ni kinkamininiyan.

14, 15. ¿Tuku takgalhskinin max nakinkatlawanikanan?

14 La uku nachuna la. Makgapitsi kinatalankan nachuna xlinkgo xlatamatkan la xalak Corinto. Pero akxni lakgapaskgolh Jehová talakgpalikgolh. Xtachuna la komo kachakgeka. Kimputumkan talakgpaliw xlakata namakgapaxuwayaw Jehová. Pero chuntiya kalimasiyaniw paxtikatsinit xlakata xtalakgalhaman Dios nema ni kinkamininiyan. ¿La natlawayaw? Nalimaklakaskinaw kilatamatkan xlakata naskujnaniyaw Jehová chu natalatlawayaw nitlan tapuwan.

15 Xlikana, ni kilitlawatkan talakgalhin nema xtlawakgo xalak Corinto. Ni kilitlawatkan laklanka talakgalhin chu nalakpuwanaw pi Jehová chuntiya nakinkalimasiyaniyan xtalakgalhaman chu nakinkatapatiyan. Pero max nakinkatlawanikanan takgalhskinin: «¿Chu nema makgapitsi lakpuwankgo pi ni laklanka talakgalhin? ¿Liwana lakpuwanitaw naliskujaw nakgalhakgaxmataw Jehová putum kilhtamaku?» (Rom. 6:14, 17).

16. ¿La kinkalimasiyaniyan xliʼakxilhtit Pablo pi ni kilitlawatkan talakgalhin maski ni lichuwinan 1 Corintios 6: 9-11?

16 Kalilakpuwaw apóstol Pablo. Xla tsokgli: «Wampi wa nkit kaj chixku [...] ktastaninit [...] ntalakgalhin». Chu alistalh wa: «Na ni ktlaway wantu klakaskin; wampi wata wa ntu kxkajniy, wa yuma ntu ktlaway» (Rom. 7:14, 15). Maski ni wa xtlawama tuku wan 1 Corintios 6:9-11, Pablo wa pi xtlawa talakgalhin. Xmakgapaxuwaputun Dios, wa xlakata liskujli natlawa tuku xaʼakgstitum (kalikgalhtawakga  Romanos 7:21-23). Kilitlawatkan xliʼakxilhtit chu lu naliskujaw xlakata nakgalhakgaxmataw Jehová.

17. ¿Tuku xlakata ni akgsaninanaw kstalaninanin Cristo?

17 Akgtum liʼakxilhtit, katsiyaw pi xlakata tlan naskujnaniyaw Jehová talakaskin xaʼakgstitum nalikatsiyaw chu nawanaw tuku xaxlikana (kalikgalhtawakga Proverbios 14:5 chu Efesios 4:25). Nichuna litaxtuputunaw la Satanás, tiku «xmakilhtsukina taʼakgsanin». Na kalakapastakwi pi Ananías chu xpuskat nikgolh xlakata akgsaninankgolh. Wa xlakata akinin ni akgsaninanaw (Juan 8:44; Hech. 5:1-11). Pero xaʼakgstitum likatsikan ni kajwatiya kilhchanima ni akgsaninankan. Komo xlikana paxtikatsiniyaw xtalakgalhaman Dios nema ni kinkamininiyan, kalichuwinaw atanu la tlan nalimasiyayaw pi akinin xaʼakgstitum.

18, 19. ¿Tuku tayat ni kilikgalhitkan xlakata nalimasiyayaw pi akinin tlawayaw tuku xa’akgstitum?

18 Komo xaʼakgstitum wamputunaw, wi atanu tuku natlawayaw ni kaj watiya ni naʼakgsaninanaw. Akgtum liʼakxilhtit, Jehová kawanilh israelitas: «Ni milikgalhanat, ni miliʼakgskgawinat, chu ni miliʼakgskgawimakglhtit». ¿Tuku xlakata nichuna xlitlawatkan xwanit?  Xlakata Jehová xkawaninit: «Xasantujlani nawanatit xlakata akit Jehová miDioskan xasanto». (Lev. 19:2, 11). Maski ni nawanaw taʼakgsanin, pero ni katilimasiyaw pi akinin xaʼakgstitum komo nakamakanajliyaw tuku ni xaxlikana amakgapitsin.

¿Liwana lakpuwanitaw ni naʼakgsaninanaw chu ni naʼakgskgawinanaw? (Kaʼakxilhti párrafo 19).

19 Akgtum liʼakxilhtit, kalilakpuwaw pi chatum chixku wani xmalana o tiku kataskuja pi sokg nataxtu kxtaskujut xlakata naʼan kmakuchina. Pero uma ni xlikana. Tuku lakaskin uma chixku kaj sokg taxtuputun xlakata natsuku xvacaciones. Chu amputun kfarmacia o naʼan xokgonani makuchina. ¿Tlan nawanaw pi xaʼakgstitum likatsi? ¿O kaj akgskgawinalh? Uma chixku kamalakpuwanilh amakgapitsin pi xlikana tuku kawanilh. Min kilhtamaku, latamanin akgsaninankgo xlakata wi tuku kgalhiputunkgo o nitu nakatlawanikan. Pero akinin kgalhakgaxmataw Jehová, tiku wan: «Ni miliʼakgskgawinatkan». Tlawaputunaw tuku Dios wan pi xa’akgstitum chu xasanto (Rom. 6:19).

20, 21. ¿Tuku ni katitlawaw komo paxtikatsiniyaw xtalakgalhaman Dios nema ni kinkamininiyan?

20 Xlikana pi ni tlawayaw talakgxtumit xalimaxana, ni kgachiyaw chu atanu laklanka talakgalhin. Pero komo paxtikatsiniyaw xtalakgalhaman Dios nema ni kinkamininiyan, na ni katlawaw tuku Dios xkajni. Akgtum li’akxilhtit, ni kajwatiya ni katitlawaw talakgxtumit xalimaxana, na ni katililakgastanaw tuku xalixkajni. Ni kajwatiya ni kgachiyaw, na ni malakatsaliyaw akxni wayaw kuchu. Max tuwa namakgkatsiyaw akxni nakinkali’akxilhkanan la uma, pero tlan natayaniyaw.

21 Kaliskujwi xlakata namakgantaxtiyaw uma xtastakyaw Pablo: «Ni alh anu kamalanalh ntalakgalhin kmintiyatliwakan ntu nkaj xalinit, mpala fuersa nalakgachixkuwiyatit xtatlawaputu» (Rom. 6:12; 7:18-20). Xlikana pi min kilhtamaku tlawayaw talakgalhin. Pero akxni liskujaw xlakata ni natlawayaw talakgalhin, limasiyayaw pi paxtikatsiniyaw xtalakgalhaman Dios chu Jesús nema ni kinkamininiyan.

22. ¿La nakinkakitaxtuniyan komo napaxtikatsiniyaw xtalakgalhaman Dios nema ni kinkamininiyan?

22 Jehová kinkatapatinitan chu chuntiya tlan chuna natlawa. Lu paxtikatsiniyaw xlakata xtalakgalhaman. Kaliskujwi xlakata ni natlawayaw tuku ni lakgati Dios, maski makgapitsi latamanin nitlan na’akxilhkgo. ¿La nakinkakitaxtuniyan komo natlawayaw tuku lakgati Jehová? Pablo wan: «Wampi wa nchu, lakgtaxtuninitantit ktalakgalhin, kskujnanin Dios wanitantit wa ntu nchu nkakitaxtuniyan wa yama lantla santujlanitantit, chu wa ntu xalan nakgalhiyatit latamat wa ntu xali’ankgalhin» (Rom. 6:22).