Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Diciembre kata 2016

«Lakapastakaw wa ntu lakaskin spiritu, latamat nkitaxtuniy, chu ntatanksni»

«Lakapastakaw wa ntu lakaskin spiritu, latamat nkitaxtuniy, chu ntatanksni»

«Wampi wa nti xtalakaskin spiritu santo lilamakgo, wa lakapastakkgoy wa ntu xtalakaskin spiritu» (ROM. 8:5).

TAKILHTLIN: 22, 52

1, 2. ¿Tuku xlakata xatalaksakni lu xlakaskinka kakitaxtuni capítulo 8 xla Romanos?

AKXNI talakapastaka akxni tinilh Cristo, max likgalhtawakganitaw Romanos 8:15-17. Umakgolh versículos lichuwinan la katsikgo tiku xatalaksakni pi kgalhikgo takgalhkgalhin nalatamakgo kʼakgapun. Romanos 8:1 wan pi xatalaksakni «wa nti ntapakgsinikgoy nCristo Jesús». ¿Pero kajwatiya katsokgnika capítulo 8 xla Romanos tiku xatalaksakni? ¿Na tlan nakamakgtaya tiku kgalhikgo takgalhkgalhin nalatamakgo kKatiyatni?

2 Capítulo 8 xla Romanos katsokgnika tiku xatalaksakni. Uma capítulo wan pi makgamakglhtinankgo espíritu chu kawani: «Kgalhkgalhimaw yama lantla lu[...] xachatuminika xlakgskgatan Dios nawanaw», uma chuna nala akxni nialh nakgalhikgo xmaknikan xalak kakilhtamaku (Rom. 8:23). Akxni lakastakwanankgo kʼakgapun, xkamanan Dios litaxtukgo. Xlakata talakgmaxtut, Jehová katapatinit  xtalakgalhinkan chu xaʼakgstitum kaliʼakxilha, wa xlakata tlan xkamanan litaxtukgo (Rom. 3:23-26; 4:25; 8:30).

3. ¿Tuku xlakata na xlikgalhtawakgatkan capítulo 8 xla Romanos tiku kgalhikgo takgalhkgalhin kKatiyani?

3 Kcapítulo 4 xla Romanos, Pablo tsokgli xlakata Abrahán. Uma chixku latamalh akxni Jesús nina xmasta xlatamat xlakata nakinkalakgmaxtuyan. Maski Abrahán ni xatalaksakni xwanit, Jehová xa’akgstitum li’akxilhli (kalikgalhtawakga Romanos 4:20-22). Nachuna, Jehová xa’akgstitum kali’akxilha tiku kstalaninanin Cristo tiku ni makgxtakgnankgo chu nalatamakgo kKatiyatni putum kilhtamaku. Umakgolh kstalaninanin Cristo na xlikgalhtawakgatkan capítulo 8 xla Romanos xlakata xtastakyaw tlan nakamakgtayakgo.

4. ¿Tuku akstu nakinkakgalhskinkanan akxni nalikgalhtawakgayaw Romanos 8:21?

4 Anta kRomanos 8:21, Jehová wan pi «xlipaks ntamalakatsukun nalakgtaxtunikgoy» talakgalhin chu linin. Uma wamputun pi tiku nalatamakgo kParaíso «na[...]lipaxuwakgoy xlakgskgatan Dios wa yuma lilakgatit ntalakgtaxtun ntu namin». Akxni likgalhtawakgayaw versículo kakinkakgalhskinkan: «¿Kiʼakxilhkan kxasasti kakilhtamaku?». Kaʼakxilhwi tuku natlawayaw xlakata anta nalatamayaw.

«LAKAPASTAKAW WA NTU XTATLAWAPUTU NKILIWAKAN»

5. ¿Tuku lichuwinalh Pablo kRomanos 8:4-13?

5 (Kalikgalhtawakga Romanos 8:4-13). Anta kcapítulo 8 xla Romanos, Pablo lichuwinalh pulaktiy latamanin. Kalichuwinalh  tiku xtlawamakgolh «xtatlawaputu nkintiyatliwakan» chu tiku xtlawamakgolh «xtalakaskin spiritu». Max nalakpuwanaw pi Pablo xkalichuwinama tiku ni kstalaninanin Cristo chu tiku kstalaninanin xlitaxtukgo. Pero Pablo katsokgnanilh uma carta kstalaninanin Cristo, tiku «talilaksaknitantit xasantujlanin nawan[kgo]» (Rom. 1:7). Wa xlakata tiku xtlawamakgolh «xtatlawaputu nkintiyatliwakan» chu na chuna tiku xtlawamakgolh «xtalakaskin spiritu» kstalaninanin Cristo xlitaxtukgo. ¿Pero tuku litalakgpalikgo?

6, 7. 1) ¿Tuku wamputunkgo tachuwin «tiyatliwa» kBiblia? 2) ¿Tuku kilhchanilh Pablo akxni lichuwinalh «tiyatliwa» kRomanos 8:4-13?

6 Anta kBiblia, tachuwin «liwa» pulaklhuwa tuku kilhchani. Lakgachunin kilhchani xmakni chatum lataman (Rom. 2:28; 1 Cor. 15:39, 50). Na kilhchani akgtum familia. Akgtum liʼakxilhtit, Biblia wan pi Jesús «wa nti xkilhtsukut David tiwa wa lantlata kxliwa». Chu Pablo wa pi Judíos xfamilia xwankgonit xlakata kxliwa (Rom. 1:3; 9:3).

7 Wa xlakata, ¿Tuku kilhchanilh Pablo akxni wa «tiyatliwa» kRomanos 8:4-13? Xlakata na’akgatekgsaw, ka’akxilhwi tuku wan Romanos 7:5. Pablo wa pi xla chu amakgapitsi kstalaninani Cristo xlilatamakgonit «xtatlawaputu nkintiyatliwakan» akxni nina xlakgapaskgo xaxlikana, xlakata xmastakgo talakaskin «ni tlan kintatlawaputukan». Wa xlakata tiku lilatamakgo «xtatlawaputu nkintiyatliwakan» wa tiku mastakgo talakaskin nakamatlawikan tuku nitlan chu tlawakgo tuku lakaskinkgo.

8. ¿Tuku xlakata Pablo kawanilh xatalaksakni pi ni xlilatamakgolh «xtatlawaputu nkintiyatliwakan»?

 8 ¿Tuku xlakata Pablo kawanilh xatalaksakni pi ni xlilatamakgolh «xtatlawaputu nkintiyatliwakan»? Max xlakata kskujni Dios xmastalh talakaskin pi tlakg xlakaskinka xlitaxtulh kxlatamat tuku tlawaputun xmakni. Akgtum liʼakxilhtit, Pablo lichuwinalh pi makgapitsi natalan xalak Roma xmalanakan xlitaxtunit tuku xtlawaputun xmaknikan. Max xwamputun pi tlawakan talakgxtumit, liwat o atanu nema tlan limakgkatsikan wa tuku tlakg xlakaskinka xʼakxilhkgo kxlatamatkan (Rom. 16:17, 18; Filip. 3:18, 19; Jud. 4, 8, 12). Chu kkachikin Corinto, chatum kstalanina Cristo xtatlawa talakgxtumit xalimaxana «xtutsi» (1 Cor. 5:1). Xlikana pi kstalaninanin Cristo tiku xlamakgolh kxapulana siglo xlakaskinkgo xtastakyaw Pablo xlakata ni xlilatamakgolh «xtatlawaputu nkintiyatliwakan» (Rom. 8:5, 6). Chu la uku, na maklakaskinaw.

9. ¿Tuku kilhchanima Romanos 8:6?

9 Uma tastakyaw na kinkamakgtayayan la uku. Asta tiku makgasata skujnanima Jehová max natsuku lilatama «xtatlawaputu nkintiyatliwakan». Pero Romanos 8:6 ni wamputun pi nitlan nalakpuwankan la liwat, taskujut, lilakgastan chu tapaxkit. Wa uma tuku tlawayaw kkilatamatkan. Jesús na lipaxuwalh taway chu kamawilh lhuwa latamanin. Chu milh kilhtamaku na jaxli. Nachuna, Pablo wa pi talakgxtumit ktamakgaxtokgat, xlakaskinka.

¿Tuku tlakg lakgatiyaw lichuwinanaw? (Ka’akxilhti párrafo 10 chu 11).

10. ¿Tuku wamputun wi tuku «lakapastakaw»?

10 ¿Tuku wamputun wi tuku «lakapastakaw»? Pablo xkilhchanima kajwatiya pulaktum nalakpuwankan tuku natlawaputunkan. Chatum tiku katsi xlakata uma lichuwinalh pi tatalakxtumi tiku kaj xakstukan kapaxkikan chu putum kilhtamaku xakstukan kalichuwinankan. Mastakgo talakaskin pi talakgalhin nakamatlawi tuku nitlan kxlatamatkan.

¿Tuku tlakg xlakaskinka kkilatamatkan?

11. ¿Tuku max tlakg xlakaskinka naʼakxilhaw?

11 Kstalaninanin Cristo xalak Roma xtalakaskin pi xakstukan xkalakputsananika chu tuku tlakg xlakaskinka xʼakxilhkgo. ¿Wa tuku xtlawaputun xmaknikan? Akinin na kiliʼakxilhatkan tuku tlakg xlakaskinka kkilatamatkan. ¿Tuku max tlakg xlakaskinka naʼakxilhaw kkilatamatkan? Xlakata nakatsiyaw, akstu kakinkakgalhskinkan: «¿Tuku tlakg klakgati klichuwinan? ¿Tuku tlakg klakgati ktlawa?». Makgapitsi max kajwatiya lakpuwankgo nakgalhwanankgo tipalhuwa vino, nakaxtlawa xchik, natamawa lhakgat, namalhuwi xtumin o lakkaxwili xvacaciones. Uma nila nawanaw pi nitlan. Max min kilhtamaku wa tuku tlawayaw. Xlakata vino, kalakapastakwi akgtiy liʼakxilhtit. Jesús tlawalh pi chuchut vino xlitaxtulh kʼakgtum tamakgaxtokgat, chu Pablo stakyawalh Timoteo pi xwalh «tsinu vino» xlakata tlakg tlan xmakgkatsilh (1 Tim. 5:23; Juan 2:3-11). Pero vino ni wa tuku tlakg xlakaskinka xʼakxilhkgo. ¿Chu akinin? ¿Tuku tlakg xlakaskinka kkilatamatkan?

12, 13. ¿Tuku xlakata kuenta kilitlawatkan nema tlakg xlakaskinka akxilhaw kkilatamatkan?

12 ¿Tuku xlakata kuenta kilitlawatkan tuku  tlakg xlakaskinka kkilatamatkan? Pablo kawanilh: «Lakapastakaw wa ntu xtatlawaputu nkiliwakan, linin nkitaxtuniy» (Rom. 8:6). Komo natlawayaw «xtatlawaputu nkintiyatliwakan», nialh katitalaliw Jehová, chu namakgatsankgayaw kilatamatkan kkilhtamaku nema aku mima. Pero kimputumkan tlan natalakgpaliyaw xlakata nichuna nakinkaʼakgspulayan. ¿Lakapastakaw ama chixku xalak Corinto tiku xtlawama talakgxtumit xalimaxana chu talakaskilh natamakxtukan? Nialh tlawalh talakgxtumit xalimaxana chu xaʼakgstitum skujnanipa Jehová (2 Cor. 2:6-8).

13 Maski ama chixku lu lixkajni la xlima xlatamat xlakata xtlawa «xtatlawaputu nkintiyatliwakan», talakgpalilh. Komo chatum kstalanina Cristo tsukunit tlawa tuku matlawiputun xmakni chu ni wa tlawama xtalakaskin Jehová, na tlan natalakgpali. Lakapastakkan xtastakyaw Pablo tlan makgtayanan xlakata nalakgpalikan tayat.

«LAKAPASTAKAW WA NTU LAKASKIN SPIRITU»

14, 15. 1) ¿Niku nawiliyaw kintalakapastaknikan? 2) ¿Tuku kilhchanima «lakapastak[kan] wa ntu lakaskin spiritu»?

14 Akxni xlichuwinanita pi nitlan kitaxtu «lakapastakaw wa ntu xtatlawaputu nkiliwakan», Pablo wa: «Lapi wa lakapastakaw wa ntu lakaskin spiritu, latamat nkitaxtuniy, chu ntatanksni». Xlikana pi akgtum talakgalhaman nema nitu xtachuna.

15 Pero «lakapastak[kan] wa ntu lakaskin spiritu» ni wamputun pi putum kilhtamaku kililakapastakatkan Jehová, Biblia, chu kajwatiya uma nalichuwinanaw. Kstalaninanin Cristo nachuna kgalhiyaw kilatamatkan la amakgapitsin. Akgtum liʼakxilhtit, xapulana kstalaninanin Cristo xwayankgo, xkgotnankgo, xtamakgaxtokgkgo, xkgalhikgo xfamiliajkan chu kskujkgo (Mar. 6:3; 1 Tes. 2:9).

Pablo tlakg xlakaskinka xakxilha naskujnani Dios

16. ¿Tuku tlakg xlakaskinka xakxilha Pablo?

16 Nipara Pablo chu amakgapitsin xapulana kstalaninanin Cristo mastakgolh talakaskin pi xlakaskinka xlitaxtulh uma kxlatamatkan. Akgtum li’akxilhtit, katsiyaw pi Pablo xliskuja natlawa laktsu chiki xla xuwa o carpas. Pero ni wa tlakg xlakaskinka xakxilha xtaskujut. Tlakg xlakaskinka xakxilha naskujnani Dios. Kaj watiya xlakpuwan nalichuwinan Dios chu namasiya (kalikgalhtawakga Hechos 18: 2-4; 20:20, 21, 34, 35). Natalan xalak Roma nachuna xtlawakgolh la Pablo, nachuna akinin (Rom. 15:15, 16).

17. ¿Tuku nalipaxuwayaw komo «lakapastakaw wa ntu lakaskin spiritu»?

17 ¿La nakinkakitaxtuniyan komo «lakapastakaw wa ntu lakaskin spiritu»? Romanos 8:6 wan: «Lapi wa lakapastakaw wa ntu lakaskin spiritu, latamat nkitaxtuniy, chu ntatanksni». Uma tachuwin wamputun pi mastayaw talakaskin pi Jehová nalimaklakaskin x’espíritu xlakata nalipulalin kintalakapastaknikan chu chuna nalakapastakaw la Dios. Dios kinkawaniyan pi nalipaxuwayaw latamat la uku, chu kkilhtamaku nema aku mima, nakgalhiyaw latamat nema ni kgalhi xlisputni.

Paxtikatsiniyaw Jehová xlakata tlan kgalhiyaw takaksni kkintalakapastaknikan

18. ¿La tlan nakgalhiyaw takaksni komo «lakapastakaw wa ntu lakaskin spiritu»?

 18 Pablo nawa pi komo «lakapastakaw wa ntu lakaskin spiritu» kinkamaxkiyan takaksni. Putum kgalhiputunaw takaksni, pero tlakg kgalhiputunaw takaksni kkintalakapastaknikan. Pero ni putum tlan kgalhikgo. ¿La nakgalhiyaw takaksni komo «lakapastakaw wa ntu lakaskin spiritu»? Paxtikatsiniyaw Jehová xlakata kgalhiyaw xaxlikana takaksni kkintalakapastaknikan. Na tlan lipaxuwayaw takaksni kkifamiliajkan chu nakatakgalhiyaw takaksni amakgapitsin. Xlakata putum makglakgalhinanin akinin, min kilhtamaku katakgalhiyaw taʼakglhuwit kinatalankan. Akxni chuna la, tlawayaw xtastakyaw Jesús nema wan: «Pulanaj kamakgapaxuwa mintala» (Mat. 5:24). Kalakapastakwi pi kinatalankan na skujnanikgo Jehová, «Dios nti nkinkamaxkiyan ntatanksni» (Rom. 15:33; 16:20).

19. ¿Tuku takaksni nema xlakaskinka tlan nalipaxuwayaw?

19 Komo «lakapastakaw wa ntu lakaskin spiritu», na natakgalhiyaw takaksni Dios, uma tlakg xlakaskinka. Palakachuwina Isaías wa pi Jehová nakakuentajtlawa tiku xliputum lipawankgo chu nakamaxki takaksni nema nikxni sputa (Is. 26:3; kalikgalhtawakga Romanos 5:1).

20. ¿Tuku talakgalhaman nakgalhiyaw komo natlawayaw tastakyaw nema wi kcapítulo 8 xla Romanos?

20 Komo kgalhkgalhimaw nalatamayaw k’akgapun o kKatiyatni, kimputumkan tlan nalitamakgtayayaw tastakyaw nema wi kcapítulo 8 xla Romanos. Paxtikatsiniyaw pi Biblia kinkamakgpuwantiniyan kaj wa nalilakapastakaw naskujnaniyaw Jehová chu ni wa natlawayaw tuku tlawaputun kimaknikan. Komo «lakapastakaw wa ntu lakaskin spiritu», tlan nakgalhiyaw talakgalhaman nema nitu xtachuna: «Latamat wantu xaliankgalhin, xpalakata nCristo Jesús nkimPuchinakan» (Rom. 6:23).