Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Diciembre kata 2016

Kamakamaxkiw Jehová putum tuku lilakgaputsayaw

Kamakamaxkiw Jehová putum tuku lilakgaputsayaw

«Nachuna kamakamaxkitit putum tuku lilakgaputsayatit, xlakata xla kalilakgaputsayan» (1 PED. 5:7, Traducción del Nuevo Mundo).

TAKILHTLIN: 38, 23

1, 2. 1) ¿Tuku xlakata lakgaputsakgo makgapitsi kskujnin Dios? (Kaʼakxilhti xapulana dibujo). 2) ¿Tuku nalichuwinanaw kʼuma artículo?

LA UKU Satanás «lapula xtachuna tantum león nema tasa xlakata namakgapekuanan, putsama tiku tlan nawa» (1 Ped. 5:8; Apocalipsis [Revelación] 12:17). Xkuenta xlakata kimputumkan lakgaputsayaw. Maski akinin kskujnin Dios na lakgaputsayaw. Kskujnin Dios xala makgasa na wi tuku xlilakgaputsakgo. Akgtum liʼakxilhtit, Biblia wan pi mapakgsina David xmin kilhtamaku lu xlakgaputsa (Sal. 55:2). Chu asta apóstol Pablo wa: «Klitakgatsankgay xpalakata xlikgampulhuwa ntamakgstokgnin» (2 Cor. 11:28). Pero ¿tuku tlan natlawayaw komo makgkatsiyaw pi kinkamakgatlajaman talakgaputsit?

2 KinTlatkan tiku xapaxkina kamakgtayalh kskujnin xala makgasa akxni wi tuku xlilakgaputsamakgolh xlakata tlan xmakgkatsikgolh. Jehová nachuna tlawaputun kimpalakatakan. Biblia kinkawaniyan pi wa kamaxkiw putum tuku lilakgaputsayaw, xlakata xla kinkamakgtayaputunan (1 Ped. 5:7). Kʼuma  artículo naʼakxilhaw pulaktati tuku nakinkamakgtayayan xlakata ni lu nalakgaputsayaw. Pulana, natlawayaw oración. Pulaktiy, nalikgalhtawakgayaw xtachuwin Dios chu nalilakpuwanaw. Pulaktutu, namastayaw talakaskin nakinkamakgtayayan xʼespíritu santo Jehová. Chu xlipulaktati, nawaniyaw tiku lu lipawanaw xlakata tuku makgkatsiyaw. Akxni naʼakxilhaw uma pulaktati, kalakapastakwi tuku talakaskin nalakgpaliyaw kkilatamatkan.

«KAMAKAMAXKI JEHOVÁ MINTAKUKA»

3. ¿La namakamaxkiyaw Jehová kitakukakan?

3 Pulana, xlakata ni lu nalakgaputsayaw talakaskin namakamaxkiyaw kintakukakan Jehová akxni natlawaniyaw oración xliputum kinakujkan. Akxni wi tuku lilakgaputsayaw, kinTlatkan xalakʼakgapun lakaskin pi putum kawaniw tuku makgkatsiyaw. David tasaskinilh Jehová: «Kakgaxpati kiʼoracion Dios». Chu alistalh wa: «Kamakamaxki Jehová mintakuka, chu xla namakgtayayan» (Sal. 55:1, 22). Komo lhuwata tuku tlawaw xlakata nalakkaxtlawayaw kintaʼakglhuwitkan, nialh lu kalilakgaputsaw. Komo natlawaniyaw oración Jehová xliputum kinakujkan wa tuku tlakg nakinkamakgtayayan. Pero ¿la nakinkamakgtayayan oración? (Sal. 94:18, 19).

4. ¿Tuku xlakata lu xlakaskinka natlawayaw oración akxni wi tuku lilakgaputsayaw?

4 (Kalikgalhtawakga Filipenses 4:6, 7). ¿La kinkakgalhtiyan Jehová akxni makglhuwa natlawaniyaw oración xliputum kinakujkan? Nakinkamakgtayayan ni nalakgaputsayaw chu ni nakgalhiyaw ni tlan talakapastakni chu tuku nitlan limakgkatsiyaw. Akxni tlawayaw oración xlakata wi tuku lilakgaputsamaw, Dios kinkamaxkiyan lhuwa takaksni xlakata tlan namakgkatsiyaw. Lhuwa kinatalankan makgkatsikgonit uma takakskin, chu akinin na tlan namakgkatsiyaw. «Xtakaksni Dios» tlan nakinkamakgtayayan natayaniyaw putum ta’akglhuwit. Jehová kinkawaniyan pi ni kilipekuanatkan, xla kinkawaninitan pi anta nakinkatatawilayan, nakinkamaxkiyan litliwakga chu nakinkamakgtayayan (Is. 41:10). Tlan putum nakanajlayaw tuku wanit.

XTACHUWIN DIOS KINKAMAXKIYAN TAKAKSNI

5. ¿La nakinkamakgtayayan xTachuwin Dios xlakata nakgalhiyaw takaksni?

5 Xlipulaktiy, xlakata nakgalhiyaw takaksni talakaskin nalikgalhtawakgayaw Biblia chu nalilakpuwanaw. ¿Tuku xlakata tlan nakinkamakgtayayan Biblia? Xlakata wa xtachuwin Dios, kgalhi lakwan tastakyaw chu tlan nakinkamakgtayayan. Wa xlakata akxni lu lakgaputsamaw, kalilakpuwaw xtapuwan Dios chu la tlan nakinkamakgtayayan xtastakyaw. Komo chuna natlawayaw, tlan natayaniyaw, nialh lu chuna namakgkatsiyaw o max asta nialh katilakgaputsaw. Jehová wan: «Ni nataxlajwaniya chu tliwakga kawanti»,  xlakata ni napekuanaw talakaskin nalikgalhtawakgayaw xTachuwin (Jos. 1:7-9).

Komo lu kgalhiniyaw takanajla Jehová, nalipawanaw pi nakinkamaxkiyan tuku maklakaskinaw

6. ¿La kinkamakgtayayan la uku xtachuwin Jesús?

6 Anta kxTachuwin Dios, na tlan nalikgalhtawakgayaw xlakata la Jesús xkatachuwinan amakgapitsin. Latamanin lu xlakgatikgo kgaxmatnikgo, xlakata xkamatliwakglhkgo chu tlan xkalimamakgkatsini xtachuwin, tlakg xlakgatikgo xkgaxmatnikgo tiku xtaxlajwanikgonit chu tiku xlipuwamakgolh (kalikgalhtawkga Mateo 11:28-30). Jesús lu xkalilakgaputsa la xmakgkatsikgo amakgapitsin (Mar. 6:30-32). Jesús kamakgtayalh x’apóstoles, chu akinin na nakinkamakgtayayan. Xlikana pi xlakata akxtum xtalamakgolh. Pero ni talakaskin akxtum natalatamayaw Jesús xlakata nakinkamaxkiyan tamakgtay nema malaknulh. Xla kiMapakgsinakan chu chuntiya kinkalimasiyaniman tapaxkit maski kʼakgapun wilacha. Wa xlakata akxni wi tuku lilakgaputsamaw, liwana katsiyaw pi Jesús akxtum nakinkatatawilayan chu nakinkamakgtayayan akxni natalakaskin. Jesús kinkamaxkiyan takgalhkgalhin chu litliwakga, uma nakinkamakgtayakgoyan akxni wi tuku nalilakgaputsayaw (Heb. 2:17, 18; 4:16).

XTAWAKAT ESPÍRITU KINKAMAKGTAYAYAN

7. ¿La kinkamakgtayayan x’espíritu santo Dios?

7 Kalichuwinanaw xlipulaktutu xlakata ni lu nalakgaputsayaw. Jesús wa pi kinTlatkan nakinkamaxkiyan espíritu santo komo naskiniyaw (Luc. 11:10-13). Uma espíritu santo wa xlitliwakga Dios tiku kgalhi putum litliwakga, chu kinkamakgtayayan na nakgalhiyaw lakwan tayat nema kgalhi (Col. 3:10). Biblia kawani uma tayat «xtawakat espíritu» (kalikgalhtawakga Gálatas 5:22, 23). Akxni limasiyayaw umakgolh tayat, tlakg tlan katalalinaw amakgapitsin chu ni tlawayaw tuku max natlawa pi nalakgaputsayaw. Kalichuwinaw makgapitsi la kinkamakgtayayan tayat nema masta espíritu.

8-12. ¿La nakinkamakgtayayan xtawakat espíritu santo?

8 «Tapaxkit, tapaxuwan, takaksni». Akxni kamaxkiyaw kakni amakgapitsin, kalimasiyaniyaw tapaxkit xla linatalan, uma tlawa pi ni lu nalakgaputsayaw. ¿Tuku xlakata? Akxni limasiyayaw uma tayat, ni kgalhiyaw tasitsi, tlan makgkatsiyaw, chu ni lilakgaputsayaw. Chuna tlan nakatakgalhiyaw takaksni amakgapitsin (Rom. 12:10).

Akxni limasiyayaw umakgolh tayat, tlakg tlan katalalinaw amakgapitsin

9 «Lu kgalhkgalhinankan, tlawakan tuku tlan, tlan likatsikan». Biblia wan: «Tlan nkalakatsinitit nchatunu amakgapitsin, nalalakgalhamanatit, chu nalamatsankgananiyatit nchatunu amakgapitsin» (Efes. 4:32). Akxni kgalhakgaxmataw uma tastakyaw, katakgalhiyaw takaksni amakgapitsin chu ni tlawayaw tuku max natlawa pi lu nalilakgaputsayaw. Nachuna, ni tuwa katilakkaxtlawaw ta’akglhuwit nema kgalhiyaw xlakata kintalakgalhinkan.

10 «Takanajla». La uku, lilakgaputsayaw tumin o tanu tuku xalak kakilhtamaku (Prov. 18:11). ¿La natlawayaw xlakata ni nalilakgaputsayaw la umakgolh?  Nakgalhakgaxmataw xtastakyaw Pablo akxni wa: «Kalipaxuwatit tuku kgalhiyatit». Komo lu kgalhiniyaw takanajla Jehová, nalipawanaw pi nakinkamaxkiyan tuku maklakaskinaw. Xla kinkawaniyan akit nikxni ktimakgxtakgni. Wa xlakata tlan wanaw la Pablo: «Ni anan ntamakpuwan: “Wa nkimPuchinakan nkimakgtayana; ni kaktimakpuwa wa ntu nakintlawani nchixku”» (Heb. 13:5, 6).

11 «Tlan likatsikan, machokgoya tuku nitlan tlawaputuna». ¿La kinkamakgtayayan tlan likatsikan chu machokgokan tuku nitlan tlawaputunkan? Komo nakgalhiyaw umakgolh tayat, ni katitlawaw o nalichuwinanaw tuku nalilakgaputsayaw. Nachuna, ni xasitsin katilitaxtuw chu na ni katikakilhniw o nakawaniyaw nitlan tachuwin amakgapitsin (Efes. 4:31).

12 Xlakata nalipawanaw «kxalitliwakga xmakan Dios» chu wa namaxkiyaw putum tuku lilakgaputsayaw, talakaskin nataktujuyaw (1 Ped. 5:6, 7). Nachuna, komo akinin taktujuyaw, Jehová nakinkakuentajtlawayan. Akxni katsiyaw pi wi tuku matlaniyaw chu wi tuku ni, limasiyayaw pi ni ki’akstukan kinkalipawankanan. Uma tlawa pi ni lu nalakgaputsayaw, xlakata wa lipawamaw Dios (Miq. 6:8).

«NIKXNI KALILAKGAPUTSATIT»

13. ¿Tuku xwamputun Jesús akxni wa: «Nikxni kalilakgaputsatit»?

13 Jesús mastalh uma lu tlan tastakyaw: «Nikxni kalilakgaputsatit» (kalikgalhtawakga Mateo 6:34). Max tuwa namakgkatsiyaw namakgantaxtiyaw uma tastakyaw. Pero ¿tuku xwamputun Jesús? Ni xwamputun pi kskujnin Dios nitu xlilakgaputsakgolh. Katsininitawa pi mapakgsina David chu apóstol Pablo milh kilhtamaku nachuna makgkatsikgolh. Jesús chuna kawanilh kstalaninanin, xlakata xakgatekgskgolh pi akxni wi tuku lu lilakgaputsakan ni talakkaxla. Putum kilhtamaku nakgalhiyaw taʼakglhuwit, wa xlakata ni kalimalhuwiw kintaʼakglhuwitkan tuku lanita o nema aku nakgalhiyaw. ¿La nakinkamakgtayayan xtastakyaw Jesús xlakata ni lu nalakgaputsayaw?

14. ¿Tuku natlawayaw xlakata ni lu nalakgaputsayaw chuna la David?

14 Min kilhtamaku tuku lilakgaputsayaw wa tuku titaxtunita. Max chuntiya nitlan limakgkatsiyaw tuku tlawaw, maski lhuwata kata titaxtunit. Xmin kilhtamaku, mapakgsina  David nachuna makgkatsilh akxni xlakapastaka talakgalhin nema xtlawanit. Akxni xlichuwinan xtalakgalhin, xwan pi lu nitlan xlimakgkatsi (Sal. 38:3, 4, 8, 18). Wa xlakata wi tuku tlawalh, chu akinin na tlan chuna natlawayaw. Lipawa pi Jehová xalakgalhamana chu xʼama tapati. David lu paxuwalh akxni katsilh pi Jehová xtapatinit (kalikgalhtawakga Salmo 32:1-3, 5).

15. 1) ¿Tuku atanu katsiniyaw xlakata mapakgsina David? 2) ¿Tuku tlan natlawayaw xlakata ni lu nalakgaputsayaw? (Kaʼakxilhti recuadro « Tastakyaw xlakata ni lu nalakgaputsayaw»).

15 Max namin kilhtamaku nalilakgaputsayaw tuku titaxtumaw la uku. Akgtum liʼakxilhtit, akxni David tsokgli Salmo 55, xpekuama xlakata kalipekua xwi xlatamat (Sal. 55:2-5). Pero ni mastalh talakaskin pi tuku xlilakgaputsama xtlawalh pi nialh xlipawa Jehová. Tasaskinilh Jehová pi xmakgtayalh. Pero na xkatsi pi xtalakaskin pi xwililh xlitay xlakata nalakkaxtlawa xtaʼakglhuwit (2 Sam. 15:30-34). Kakatsiniw atanu xliʼakxilhtit David. Ni kamastaw talakaskin pi nakinkamakgatlajayan tuku lilakgaputsamaw, wata katlawaw tuku matlaniyaw xlakata nalakkaxtlawayaw taʼakglhuwit chu kalipawaw pi Jehová nakinkamakgtayayan.

16. ¿La matliwakglha kintakanajlakan tuku wamputun xtukuwani Dios?

16 Max namin kilhtamaku nalilakgaputsayaw tuku aku namin. Pero ni kililakgaputsatkan tuku nina la. Alistalh akxilhaw pi nichuna kitaxtu la xlakpuwanitaw. Nachuna, kalakapastakwi pi Jehová tlan lakkaxtlawa tuku natalakaskin. Tuku wamputun xtukuwani tlawa pi natatliwakglha kintakanajlakan. Akgatekgsaw pi xtukuwani Dios wamputun «Xla Tlawa pi chuna Kakitaxtulh» (Éx. 3:14). Tuku wamputun xtukuwani Dios kinkamasiyaniyan pi putum namakgantaxti tuku lakpuwanit kimpalakatakan. Wa xlakata ni kalilakgaputsaw tuku aku namin. Liwana katsiyaw pi Dios nasikulunatlawa kskujnin tiku ni makgxtakgkgo chu nakamakgtaya xlakata ni lu nalilakgaputsakgo xtaʼakglhuwitkan xala makgasa chu xala uku, o max tuku aku nala.

KATACHUWINAW TIKU LIPAWANAW

17, 18. ¿La nakinkamakgtayayan komo natachuwinanaw tiku lipawanaw akxni lakgaputsamaw?

17 Xlipulaktati tamakgtay nema kgalhiyaw xlakata ni lu nalakgaputsayaw, wa pi tlan nawaniyaw tiku lipawanaw tuku lilakgaputsayaw chu la makgkatsiyaw. Max  kinchixkukan o kimpuskatkan, chatum tlan amigo o kgolotsin xalak congregación nakinkamakgtayakgoyan naʼakgatekgsaw tuku titaxtumaw. Biblia kinkawaniyan pi «akxni xnaku chatum chixku wi tuku lilakgaputsa wa tuku makgalipuwan, pero akgtum tlan tachuwin makgapaxuwa» (Prov. 12:25). Chu na wan pi nitlan kitaxtu tuku tlawaputunaw akxni ni kawaniyaw amakgapitsin (Prov. 15:22).

18 Ankan ktamakxtumit na tlan nakinkamakgtayayan xlakata ni lu nalakgaputsayaw. Anta makxtum katatawilayaw kinatalankan, tiku kinkalilakgaputsakgoyan chu kinkamatliwakglhputunkgoyan (Heb. 10:24, 25). «Nalamatliwakglhniyaw kintakanajlakan» kinkamakgtayayan natayaniyaw putum taʼakglhuwit (Rom. 1:12).

TALALINKAN DIOS TLAKG KINKAMATLIWAKGLHAN

19. ¿Komo lu tlan talalipina Dios la likatsiya pi namatliwakglhan akxni natitaxtuya tuku nitlan?

19 Chatum kgolotsin xalak Canadá katsinilh tuku xlakata lu xlakaskinka namakamaxkiyaw Jehová tuku lilakgaputsamaw. Uma tala kgalhi akgtum taskujut nema tlawa pi lu natlakgwan xtalakapastakni. Makgalhtawakgenan kʼakgtum escuela chu na kastakyawa kamanan. Nachuna, kgalhi akgtum tajatat nema tlawa pi lu nalakgaputsa. ¿Niku tiya litliwakga xlakata ni nataxlajwani? Maski katuwa tuku titaxtu, lu liskuja xlakata namatliwakglha la talalin Jehová. Na makgtaya akxni wani xpuskat la makgkatsi chu xlakata makgtayakgo xʼamigos. Amakgapitsi lakgkgolotsin xalak congregación chu superintendente de circuito makgtayakgonit xlakata naʼakxilha tuku titaxtuma chuna la akxilha Jehová. Chu chatum makuchina makgtayalh xlakata naʼakgatekgsa xtajatat. Tala akgatekgsli pi xtalakaskin xlakkaxwililh xkilhtamaku akxni xjaxli chu xtlawalh ejercicio. Tsinu tsinu katsinilh nialh lu nalakgaputsa. La uku wa makamaxki Jehová tuku nila tlawa.

20. 1) ¿La namakamaxkiyaw Jehová tuku lilakgaputsamaw? 2) ¿Tuku naʼakxilhaw kʼatanu artículo?

20 Kʼuma artículo lichuwinanitaw pi lu xlakaskinka wa namakamaxkiyaw Jehová tuku lilakgaputsamaw akxni natlawaniyaw oración, nalikgalhtawakgayaw xtachuwin chu nalilakpuwanaw. Na lu xlakaskinka namastayaw talakaskin nakinkamakgtayayan xʼespíritu santo Dios, natachuwinanaw tiku lipawanaw chu naʼanaw kkintamakxtumitkan. Kʼartículo nema aku mima naʼakxilhaw la kinkamakgtayayan xtamalaknun Jehová xlakata wi tuku nakinkamaxkiyan (Heb. 11:6).