Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Diciembre kata 2016

 BIOGRAFÍA

«Chuna klatamay lantla xlakan lismanikgonit»

«Chuna klatamay lantla xlakan lismanikgonit»

«¡Komo natamunuya, nakmakgxtakgan!». Kintlat chuna wanilh kintse, kkata 1941. Maski chuna xwanikanit xla tamunulh. Kintlat makgantaxtilh xtachuwin chu kinkamakgxtakgni. Akit kajku akgtsayan kata xakkgalhi.

AKXNI nina chuna xla uma, akit xakkatsiputun xlakata xaxlikana. Kintse xmaxkikanit makgapitsi likgalhtawakga nema xtakilhtinit kBiblia, chu akit lu xaklakgati, tlakg xaklakgati dibujos nema xlimin. Kintlat ni xlakaskin pi kintse xkilitachuwinalh tuku xkatsinima. Pero akit xakkatsiniputun chu xaktlawani takgalhskinin, wa xlakata xkimakgalhtawakge akxni kintlat ni xtawila kchiki. Xlakata uma, klakpuwa naktamakamastani Jehová. Kata 1943 ktamunulh akxni xakkgalhi akgkaw kata kBlackpool (Inglaterra).

KTSUKULH SKUJNANI JEHOVÁ

Lata ama kilhtamaku kintse chu akit akxtum xaklichuwinanaw Dios. Ama kilhtamaku xaklimaklakaskinaw fonógrafos xlakata naklichuwinanaw Dios. Max akgkitsis kilo xlitsinka chu laklanka xwanit. Lu tsinka xakmakgkatsi akxni xaklin fonógrafos.

Akxni xakkgalhi akgkutati kata, xaklitaxtuputuna  la precursor. Kintse kiwanilh pi pulana xaktachuwinalh «el siervo para los hermanos», tiku la uku kalilakgapasaw superintendente de circuito. Xla kiwanilh pi wi tuku xakkatsinilh xlakata wa xakliskujli akxni precursor xaklitaxtulh. Chuna ktlawalh. Akxni xakskujnita akgtiy kata, ktachuwinalh atanu superintendente xlakata precursor xaklitaxtuputun, xla kiwanilh: «¡Precursor kalitaxtu!».

Abril kata 1949, kintse chu akit kmakgxtakgwi putum tuku xakkgalhiyaw chu kaw latamayaw kMiddleton, lakatsu kMánchester. Anta ktsukuw liskujaw la precursores. Akxni xtitaxtunita akgtati papaʼ, kputsalh chatum compañero tiku na precursor xwanit. Alistalh Sucursal kinkawanin pi xakaw makgtayananaw kxasasti congregación nema aku xtatlawanit kʼIrlam. Kintse chu atanu precursora xmakgtayanamakgolh kʼatanu congregación.

Kxasasti congregación ni lhuwa natalan tiku tlan xpulalinkgolh tamakxtumit. Wa xlakata kinkawanikan pi xakmakgtayanaw, maski kajku akgkutujun kata xakkgalhi. Alistalh, kalh makgtayanan kcongregación anta kBuxton, niku ni lhuwa xʼanan tuku xlichuwinankgolh Dios, chu xlakaskinkgo tamakgtay. Putum uma kimakgtayalh xlakata tuku xʼama min.

Kmastama taʼakgchuwin kxlakatin latamanin kRochester (Nueva York, 1953).

Kata 1951 kmalakgachalh kisolicitud xlakata nakkan kEscuela Bíblica de Galaad de la Watchtower. Pero diciembre kata 1952 kintasanika xlakata naktlawa servicio militar. Kskilh pi ni xkimatlawika uma xlakata akit kskujni Dios putum kilhtamaku. Pero tribunal lakgmakgalh tuku kskinilh, chu akgchaxan papaʼ kintamaknuka kpulachin. Akxni xaktanuma kpulachin, kmakglhtinalh invintación xlakata nakkan kclase 22 xla Galaad. Ktaxtulh kpulachin, julio kata 1953. Ni lhuwa kilhtamaku alistalh, kalh kNueva York kʼakgtum barco wanikan Georgic.

Akxni kchalh kNueva York, kkilalh klanka tamakxtumit kata 1953, nema xlitapakuwi «Sociedad del Nuevo Mundo». Alistalh tren klichalh kEscuela de Galaad, uma xwi kSouth Lansing (Nueva York). Akxni ktaktalh ktren, kchipalh akgtum autobus xlakata xakchalh niku xakama. Komo nina makgas  xaktaxtunit kpulachin ni lu xakkgalhi tumin, wa xlakata kskinilh chatum lataman tiku na anta xʼan 25 centavos, chuna xtapalh xwanit pasaje.

MAKGAT KIMALAKGACHAKA

Escuela de Galaad kinkamakgtayan xlakata naklatamayaw «lantla xlakan lismanikgonit» (1 Cor. 9:22). Paul Bruun, Raymond Leach chu akit kinkamalakgachakan nakmakgtayananaw kFilipinas, pero kkgalhkgalhiw akglhuwa papaʼ xlakata xkinkamaxkikan visa. Alistalh kaw kbarco asta kRotterdam (Países Bajos). Alistalh kpatakutwi mar Mediterráneo, canal de Suez chu océano Índico asta kchaw kMalasia chu alistalh Hong Kong. ¡Klichaw 47 kilhtamaku! papaʼ 19 xla noviembre kata 1954 kchaw kManila, nema xmapakgsi Filipinas.

Raymond Leach chu akit akxni 47 kilhtamaku ktlawaw xlakata xakchaw niku xakamaw lichuwinanaw Dios kFilipinas.

Talakaskilh naklismaniyaw atanu talismanin, atanu país chu tachuwin. Xapulana kinkgalhtutukan xakwilaw kʼakgtum congregación xalak kachikin Quezón, akgtum kachikin niku lhuwa latamanin xchuwinankgo inglés. Akxni xtitaxtunita akgchaxan papaʼ kaj tsinu xakkatsiniyaw tachuwin tagalo. Pero uma ni makgas xʼama talakgpali.

Akxni xakkilichuwinanitawa Dios, akgtum kilhtamaku xla mayo kata 1955, Raymond chu akit ktekgswi makgapitsi cartas niku xwan pi superintendentes de circuito xaklitaxtuw. Kajku 22 kata xakkgalhi. Pero uma xasasti taskujut xki’ama masiyani xlakata xaklatamalh «lantla xlakan lismanikgonit».

Kmastama taʼakgchuwin kʼakgtum asamblea de circuito ktachuwin becol.

Akgtum liʼakxilhtit, xapulana taʼakgchuwin nema kmastalh la superintendente de circuito, kxlakatin akgtum pustan xla kachikin. Anta kFilipinas, akxni namastaya akgtum taʼakgchuwin, xlikana kxlakatin lhuwa latamanin, xlakata xtamasta niku xwilakgolh latamanin. Akxni xakkalakgapaxialhnan congregaciones, xakmasta taʼakgchuwin kxlakatin pumapakgsin, kplazas, mercados, kcanchas xla basquetbol, kparques chu maklhuwa kxtsastunin tlankati. Akgtum kilhtamaku kkachikin San Pablo, nila kmastalh taʼakgchuwin kmercado xlakata lu ksenama. Wa xlakata kkawanilh natalan tiku xpulalinkgo taskujut  kcongregación komo tlan xakmaklakaskiw kimpukgalhtawakgakan. Alistalh kinkgalhskinkgolh komo tlan xliʼakxilhkgolh la akgtum taʼakgchuwin, maski ni ktlankati kmastalh taʼakgchuwin.

Akxni xakkalakgapaxialhnan congregaciones xaktamakgxtakga kxchikkan natalan. Maski ni lhuwa tuku xkgalhikgo kxchikkan, putum kilhtamaku skulunku xwanit. Makglhuwa klhtatalh katutsu nema xla kiwi xwanit kʼakgtum xtikit o nema xwanikan esterilla. Akxni xakpaxa xtalakaskin naktaxtu kchiki. Putum latamanin tlan xkiʼakxilhkgo, wa xlakata kkatsinilh paxa maski chuntiya xakwilinit kilhgakgat. Atsinu ni putum kilhtamaku atobús xkilin. Akxni xakkan kʼatanu islas, kbarco xakkan. Nikxni kkgalhinit putlaw.

Maski ni kkgalhilh makgalhtawakgena xlakata xakkatsinilh tagalo, tlan kchuwinalh. Kkatsinilh akxni xakkakgaxmatni natalan akxni xlichuwinankgo Dios chu ktamakxtumit. Natalan xkimakgtayaputunkgo xlakata xakkatsinilh xtachuwinkan, kkapaxtikatsinilh xlakata ni lakapala ksitsikgo chu xatapaxuwan kimakgtayakgolh.

Chuna la titaxtutilhalh kata, talakaskilh naklakgpalitilha kintapuwan akxni xkilakgpalikan. Kata 1956, tala Nathan Knorr lakgapaxialhnalh Filipinas chu tlawaka asamblea nacional. Kiwanika pi akit xakkatachuwinalh reporteros. Ni xakkatsi tuku naktlawa, pero natalan kimasiyanikgolh. Akxni nina xtitaxtu akgtum kata kinkalakgapaxialhnan tala Frederick Franz, xminitancha niku pulalinkan xtaskujut Jehová. Wa xlakata tlawaparaka asamblea nacional, chu akit klitaxtulh la superintendente de asamblea. Akxni tala Franz mastalh xtaʼakgchuwin, xwilinit maktum camisa xalak filipina, nema wanikan barong tagalog. Uma lu lakgatikgolh natalan chu kimasiyanilh  pi xtalakaskin naktlawa makgapitsi la latamanin.

Akxni kiliyawaka la superintendente de distrito, talakaskilh wi tuku naklismani. Ama kilhtamaku xakmasiyayaw película, wanikan La felicidad de la Sociedad del Nuevo Mundo. Atsinu ni putum kilhtamaku kalakgwan xakmasiyayaw. Xmin kilhtamaku laktsu kuxta o atanu xkinkasakgalikgoyan. Xlakgminkgo xmakgskgot proyector chu anta xtamakgxtakgkgo. Chu niti xkatsini kxaka. Tuwa xwanit nalakkaxwilikan amakgolh tamakxtumit, pero lu tlan xkitaxtu xlakata akxni xakakxilhaw pi lhuwa latamanin xminkgo chu xkatsinikgo pi xkachikin Jehová xwi kxlikalanka katiyatni.

Sacerdotes xla takanajla católica xkawanikgo mapakgsinanin pi ni xkinkamaxkikgon talakaskin naktlawayaw laklanka tamakxtumit. Nachuna, akxni xakmastayaw taʼakgchuwin lakatsu ksikulan lu xmamakasanikgo campanas xlakata niti xkgaxmatli. Maski chuna, latamanin lakgapaskgolh xaxlikana chu la uku lhuwa skujnanikgo Jehová.

XASASTI TASKUJUT CHU LHUWA TUKU TALAKGPALI

Kata 1959 kiwanika pi xakalh skuja ksucursal xla xtatayananin Jehová kFilipinas. Anta lhuwa tuku kkatsinilh. Akxni xtitaxtunita kilhtamaku, kiwanika pi xakkalakgapaxialhnalh atanu países. Akxni xaklakgapaxialhnama akgtum país klakgapasli tala Janet Dumond, tiku kskujma la misionera kTailandia. Xaklatsokgnaniyaw cartas chu alistalh ktamakgaxtokgwi. Titaxtunita 51 kata chuntiya xatapaxuwan kskujnanimaw Jehová.

Akit chu Janet klakgapaxiʼalhnamaw akgtum isla nema tapakgsini Filipinas.

Kkalakgapaxialhnanit natalan k33 países. Xapulana taskujut nema xkilakgayawakanit, kimasiyanilh naklismani  xtalismaninkan tanu tanu latamanin chu lu kpaxtikatsini. Akxni kkila umakgolh kachikinin, liwana kkatsininit pi Jehová kapaxki putum latamanin (Hech. 10:34, 35).

Klipaxuwayaw akxni kakxilhaw pi talhuwima xtatayananin Jehová kFilipinas.

CHUNTIYA KLISMANIMAW TUKU TALAKGPALI

Janet chu akit chuntiya kskujmaw ksucursal, nema wi kkachikin Quezón. Lu klakgatiyaw kmakgtayananaw kFilipinas. Titaxtunita 60 kata akxni kchilh kʼuma país, xwilakgolh 20,000 xlichuwinanin Dios. ¡La uku wilakgolh 200.000! Maski akglhuwata kata titaxtunit, chuntiya klakpuwanit naktlawa tuku nakiskini Jehová. Akgtum liʼakxilhtit, lhuwa tuku talakaskinit naklismaniyaw xlakata tuku nina makgas talakgpalilh kxkachikin Dios.

Kkanaw lichuwinanaw Dios akxni kmatlaniyaw.

Lhuwa kliskujnitaw xlakata chuntiya naktlawayaw xtalakaskin Jehová, uma lu kinkamakgapaxuwanitan chu kmakgkatsiyaw pi tlan la kmaklakaskinitaw kilatamatkan. Na kliskujnitaw xlakata naklakkaxwiliyaw la tlakg tlan nakkaskujnaniyaw kinatalankan. Komo Jehová namasta talakaskin, klakpuwanitaw naklitaxtuyaw «lantla xlakan lismanikgonit».

Chuntiya kskujmaw ksucursal, nema wi kkachikin Quezón.