Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Agosto kata 2017

Tapaxkit: akgtum lu xatlan tayat

Tapaxkit: akgtum lu xatlan tayat

APÓSTOL Pablo lichuwinalh akgnajatsa laktlan tayat nema masta espíritu santo (Gál. 5:22, 23). Putum uma tayat wa «xtawakat espíritu» * chu tatalakxtumi «xasasti tayat» xla kstalanina Cristo (Col. 3:10). Xtachuna la kgantum kiwi masta xtawakat akxni kuenta tlawakan, chatum lataman na nalimasiya xtawakat espíritu akxni nalilatama kxlatamat xlitliwakga espíritu santo (Sal. 1:1-3).

Xapulana tayat nema lichuwinalh Pablo wa tapaxkit. ¿La xlilakaskinka uma tayat? Pablo wa pi komo ni xkgalhi tapaxkit «nitu xlitaxtu» (1 Cor. 13:2). Pero ¿tuku tapaxkit chu la nakgalhiyaw, chu la tlan nalimasiyayaw chali chali?

¿TUKU TAPAXKIT?

Maski tsinu tuwa nalichuwinana tuku tapaxkit, Biblia lichuwinan la nakgalhiyaw uma tayat. Akgtum li’akxilhtit, wan pi «pati chu tlan likatsi», chu «lipaxuwa wantu xaxlikana» nachuna «putum tapatinan, putum kanajla, putum kgalhkgalhi, putum tayani». Nachuna tiku limasiya tapaxkit limasiya pi xlikana kapaxki amakgapitsi latamanin chu chatum amigo tiku ni makgxtakgnan. Tiku ni paxkinan lakgsitsinan, tlankajwanan, nitlan likatsi, xakstu paxkikan chu ni tapatinan. Ni nakgalhiyaw uma nixatlan tayat wata kgalhiputunaw tapaxkit nema «ni putsa tuku kaj xla minini» (1 Cor. 13:4-8).

JEHOVÁ CHU JESÚS KINKAWILINIKGOYAN LI’AKXILHTIT

«Dios, tapaxkit». Xlikana, Jehová wa tiku limasiya tapaxkit (1 Juan 4:8). Putum tuku tlawanit chu tuku tlawama anta limasiyama. Niku tlakg limasiyalh tapaxkit wa akxni makamilh xkgawasa unu kKatiyatni xlakata napatinan chu nani kimpalakatakan. Apóstol Juan tsokgli: «Wa yuma liwi ntapaxkit: ni cha mpala ki nti xpakiw Dios, wampi wata wa ti kintikapaxkin, na malakgachalh xKam, nakinkapalakgaxokgoyan xpalakata kintalakgalhinkan» (1 Juan 4:9, 10). Paxtikatsiniyaw xtapaxkit Dios, tlan kinkatapatikanan kintalakgalhinkan, kgalhiyaw takgalhkgalhin xlakata nalatamayaw putum kilhtamaku.

Jesús kalimasiyanilh tapaxkit latamanin, akxni xatapaxuwan makgantaxtilh xtalakaskin Dios. Pablo lichuwinalh: «Wa yuma lantla tlawalh xtalakaskin, lisantujlanitaw xpalakata mpi timakamastalh Jesucristo xtiyatliwa, ntu mana watiya makgtum tlawalh» (Heb. 10:9, 10). Wa uma tlakg lanka tapaxkit nema tlan nalimasiya chatum lataman. Jesús lichuwinalh: «Ni anan tiku tlakg lanka xtapaxkit la uma, pi wi tiku namakamasta xlatamat xpalakata xʼamigos» (Juan 15:13). ¿Tlan akinin namakglhkatiyaw xtapaxkit Jehová chu xla Jesús maski makglakgalhinanin akinin? Xlikana pi tlan. Ka’akxilhwi la natlawayaw.

«KAKGALHITIT TAPAXKIT»

Pablo kinkamakgpuwantiniyan: «Wa kalhkgamatit  Dios xtachuna mpi luwa xatalakpaxkin xlakgskgatan wixin. Na kakgalhitit tapaxkit nalatapayatit xtachuna lantla kinkapaxkin Cristo, chu na titamakamastalh kimpalakatakan» (Efes. 5:1, 2). Xlakata chuntiya nalilatamayaw tapaxkit, talakaskin pi putum kilhtamaku nalimasiyayaw uma tayat kkilatamatkan. Tapaxkit limasiyanankan chu ni kaj watiya nalichuwinana. Juan tsokgli: «Kilakgskgatan ni xman wa ntachuwin kalipaxkiw chu kaj kintawankan wampi wa kamakgantaxtiw natlawayaw, chu wa ntu ntalulokgtat» (1 Juan 3:18). Akgtum li’akxilhtit, tapaxkit nema kgalhiniyaw Jehová chu latamanin, nakinkamakgpuwantiniyan na’anaw lichuwinanaw «xalakwan xalaksasti tamakatsin xla xTamapakgsin Dios» (Mat. 24:14; Luc. 10:27). Nachuna limasiyayaw tapaxkit akxni kgalhkgalhinanaw, tlan likatsiyaw chu tapatinanaw. Wa xlakata Biblia kinkastakyawayan: «Xtachuna lantla kamatsankgananin Cristo, na chuna wixin nkatlawatit» (Col. 3:13).

Xlikana, tapaxkit ni kilhchanima pi putum kilhtamaku nakamaxkiyaw talakaskin tuku natlawakgo amakgapitsin. Akgtum li’akxilhtit, makgapitsi natlatni max natlawakgo tuku nakawani xkamanan kaj xlakata ni’alh natasakgo. Pero natlatni tiku xlikana paxkikgo xkamankan ni kati kgaxmatkgolh tuku nawankgo xkamankan akxni chuna xlilat. Xtachuna la uma, Jehová «wanti mpaxkiy, kastakyaway» (Heb. 12:6). Wa xlakata akxni xlilat mastakan tastakyaw limasiyakan tapaxkit (Prov. 3:11, 12). Pero kililakapastakatkan pi putum makglakgalhinanin akinin chu min kilhtamaku ni limasiyayaw tapaxkit. Pero wi niku tlan naliskujaw. Ka’akxilhwi pulaktutu la natlawayaw.

¿LA TLAN NALIMASIYAYAW TAPAXKIT?

Xapulana. Kawaniw Jehová pi kakinkamaxkin x’espíritu santo. Jesús lichuwinalh pi Jehová kamaxki «spiritu santo wa nti kskinikgo» (Luc. 11:13). Komo naskinaw k’oración espíritu santo chu naliskujaw xlakata chuntiya nalilatamayaw «xtalakaskin spiritu», tlakg nalimasiyayaw tapaxkit (Gál. 5:16). Akgtum li’akxilhtit, lakgkgolotsin xalak congregación tlan naskinikgo Jehová x’espíritu santo xlakata nakamakgtaya xatapaxuwan namastakgo tastakyaw. Nachuna xlakata natlatni, tlan naskinikgo Jehová x’espíritu santo xlakata nalimasiyakgo tapaxkit akxni stakyawakgo xkamanan.

Xlipulaktiy. Kalilakpuwaw la Jesús limasiyalh tapaxkit maski nitlan tuku xtlawanimaka (1 Ped. 2:21, 23). Xli’akxilhtit tlan nakinkamakgtayayan akxni wi tiku nitlan kinkamamakgkatsiniyan o akxni nitlan tuku titaxtuyaw. Akxni chuna titaxtumaw, tlan nakinkakgalhskinkanan: «¿Tuku xtlawalh Jesús?». Chatum tala puskat tiku wanikan Leigh, uma takgalhskinin lu makgtayalh nalilakpuwan akxni wi tuku x’ama tlawa. Xla lichuwinan: «Akgtum kilhtamaku, tiku ktaskuja kamalakgachanilh correos amakgapitsin anta niku nitlan xkilichuwinama chu xlakata kintaskujut. Lu nitlan klimakgkatsilh. Pero kinkgalhskinka: “¿Tuku xtlawalh Jesús?”. Akxni klilakpuwa tuku xla xtlawalh, nialh kuenta ktlawalh uma. Alistalh, kkatsilh pi uma tiku xaktaskuja xkgalhinit ta’akglhuwit xlakata tajatat chu lu nitlan xmakgkatsi. Klakpuwa pi max kaj ni xtapaxuwan chuna tlawalh. Lilakpuwankan tapaxkit nema limasiyalh Jesús akxni patinalh kimakgtayalh nachuna naktlawa la tlawalh xla chu naklimasiyani tapaxkit ama tiku xaktaskujma». Komo namakglhkatiyaw Jesús, ankgalhin nalimasiyayaw tapaxkit tuku natlawayaw.

Xlipulaktutu. Kakatsiniw nakamakgtayayaw amakgapitsin. Wa uma tapaxkit nema kinkalilakgapaskanan akinin kstalaninanin Cristo (Juan 13:34, 35). Biblia kinkamakgpuwantiniyan nakgalhiyaw «ntalakapastakni wa ntu na xkgalhi Cristo Jesús». Akxni makgaxtakgli xlatamat anta k’akgapun, putum makgaxtakgli tuku xkgalhi kaj kimpalakatakan chu asta x’ama masta xlatamat (Filip. 2:5-8). Komo namakglhkatiyaw la xkamakgtaya latamanin chu tapaxkit nema xkgalhi, kintalakapastaknikan chu tuku makgkatsiyaw xtachuna nawan  la xla chu pulana nakalilakgaputsayaw amakgapitsin chu ni wa tuku akinin lakaskinaw. ¿La kinkamakgtayayan nakgalhiyaw tapaxkit?

¿TUKU TLAN NAKITAXTU KOMO CHUNA NATLAWAYAW?

Akxni limasiyayaw tapaxkit lhuwa tuku tlan nakitaxtu. Ka’akxilhwi pulaktiy.

¿Tuku tlan kitaxtu xlakata nalimasiyaya tapaxkit?

  • AKGTUM FAMILIA XLIKALANKA KATIYATNI. Xlakata lapaxkiyaw chatunu akinin, katsiyaw pi kinatalankan xalak atanu congregación tlan nakinkamakgamakglhtinankgoyan akxni nakalakganaw. Xlikana, akgtum lanka tasikulunalin xlakata katsiyaw pi kinatalankan xlikalanka katiyatni kinkapaxkikgoyan (1 Ped. 5:9). Tapaxkit la uma kaj watiya natekgsa kxkachikin Jehová.

  • TAKAKSNI. Akxni xatapaxuwan nalatapatiyaw, tlan nalipaxuwayaw «wa ntu makxtum kinkatlawanitan» (Efes. 4:2, 3). Putum makgkatsiyaw uma takaksni akxni anaw ktamakxtumit chu klaklanka tamakxtumit, nema ni’anan tuku xtachuna k’uma kakilhtamaku niku lamaw (Sal. 119:165; Is. 54:13). Akxni liskujaw xlakata nakatalalinaw amakgapitsin, limasiyayaw pi lu kapaxkiyaw chu na makgapaxuwayaw kinTlatkan xalak akgapun (Sal. 133:1-3; Mat. 5:9).

«NTAPAXKIT NTU LALIMAKGTAYAYAW»

Pablo lichuwinalh: «Ntapaxkit ntu lalimakgtayayaw» (1 Cor. 8:1). ¿Tuku wamputun uma tachuwin? Kcapítulo 13 xapulana carta nema kamalakgachanilh Corintios, lhuwa lilakgapaskgo la komo «takilhtlin xla tapaxkit», Pablo lichuwinalh tuku xkilhchanima uma tachuwin. Pulana, tapaxkit putsa tuku tlan xpalakatakan amakgapitsin (1 Cor. 10:24; 13:5). Apulaktu, komo tapaxkit xakgalhkgalhina, liwana lakapastaka, wa uma tuku «tamaklakaskin» xlakata familias nalapaxkikgo chu congregaciones makxtum natawilakgo (Col. 3:14).

Nitu xtachuna tapaxkit nema kgalhiniyaw Jehová. Paxtikatsiniyaw uma tapaxkit, latamanin tiku tanu xtalismaninkan, la tasiyakgo chu xtachuwinkan makxtum kakninanikgo Jehová chu paxuwakgo xlakata «akxtum naskujnanikgo» (Sof. 3:9). Kaliskujwi xlakata chali chali nalimasiyayaw uma xtawakat espíritu santo.

^ párr. 2 Wa uma xapulana artículo lata pulaknajatsa nalichuwinankan xtawakat espíritu santo.