Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Agosto kata 2016

¿Akxilhaw pi talakaskin tlakg namatliwakglhaw kintakanajlakan?

¿Akxilhaw pi talakaskin tlakg namatliwakglhaw kintakanajlakan?

«Kalikgalhtawakganikgo xTachuwin Dios nchixkuwin, chu nastakyawakgoya, chu namasiyunikgoya» (1 TIM. 4:13).

TAKILHTLIN: 45, 42

1, 2. 1) ¿La kgantaxtunit Isaías 60:22 kxaʼawatiya kilhtamaku? 2) ¿Tuku taskujut xlitatlawat kxkachikin Dios?

«TIKU ni lhuwa, akgtum mil nawan, chu tiku xaʼaktsina akgtum tliwakga kachikin nawan» (Is. 60:22). Umakgolh tachuwin kgantaxtuma kʼuma xaʼawatiya kilhtamaku. Akgtum liʼakxilhtit, kkata 2015 xwilakgo 8,220,105 xtatayananin Jehová tiku xlichuwinamakgo Tamapakgsin kxlikalanka katiyatni. Xlakata la xʼama staka xkachikin Dios wa: «Akit, Jehová, nakmalakapali kxkilhtamaku». Wa xlakata, chuna la natitaxtutilha kilhtamaku, tlakg nakgalhiyaw taskujut. ¿Putum tlawamaw xlakata nalichuwinanaw chu namasiyayaw xTamapakgsin Dios? Lhuwa natalan liskujmakgolh la precursores regulares chu auxiliares. Makgapitsi ankgonit niku tlakg talakaskin tiku nalichuwinankgo Dios chu amakgapitsi makgtlawamakgo Pukgalhtawakga xla xTatayananin Jehová.

2 Akgatunu kata lakatsukukgo max 2,000 congregaciones. Umakgolh congregaciones maklakaskinkgo lakgkgolotsin chu siervos ministeriales. Akgatunu kata, talakaskin pi akglhuwa mil siervos ministeriales lakgkgolotsin xalak congregación  nalitaxtukgo chu akglhuwa mil amakgapitsi natalan siervos ministeriales nawankgo. Xlikana, maski lakgkgawasan o lakpuskatin akinin, anan lhuwa tuku kilitlawatkan xlakata naskujnaniyaw kiMalanakan (1 Cor. 15:58).

¿TUKU TALAKASKIN XLAKATA NAMATLIWAKGLHAW KINTAKANAJLAKAN?

3, 4. ¿Tuku taskujut max nalakgatayaputunaw?

3 (Kalikgalhtawakga 1 Timoteo 3:1). Apóstol Pablo kawanilh lu tlan tachuwin natalan tiku xlakgatayaputunkgo taskujut kcongregación. Tuku wa Pablo kinkamalakapastakayan tiku lu liskuja o tiku tamakxpastonkga xlakata namakachani tuku makgat wi. Kalilakapastakwi pi chatum tala makgatsiputun tuku talakaskin xlakata siervo ministerial nalitaxtu. Akxilha pi talakaskin tlakg naliskuja xlakata nalimasiya xtayat Cristo. Alistalh, akxni liskujmaja la siervo ministerial, chuntiya lu liskuja xlakata namakgatsi tuku talakaskin xlakata kgolotsin xalak congregación nalitaxtu.

4 Makgapitsi natalan lakgpalimakgo xlatamatkan xlakata tlakg skujnaniputunkgo Jehová. Akgtum liʼakxilhtit, max precursores litaxtuputunkgo, amputunkgo kBetel o makgtlawaputunkgo Pukgalhtawakga xla xTatayananin Jehová. Kaʼakxilhwi la tlan nakinkamakgtayayan Biblia xlakata tlakg namastakayaw kintakanajlakan.

CHUNTIYA KAMASTAKAW KINTAKANAJLAKAN

5. ¿Tuku tlan natlawakgo tiku kajku kamanan xlakata tlakg naskujnanikgo Dios?

5 Tiku kajku kamanan tlan lu naskujnanikgo Jehová xlakata ni tatatlakgo chu kgalhikgo litliwakga (kalikgalhtawakga Proverbios 20:29). Makgapitsi lakgkgawasan tiku skujmakgolh kBetel imprimirlikgo chu tlawakgo libros. Lhuwa makgtlawakgo chu kaxtlawakgo kimPukgalhtawakgakan. Makgapitsi makgtayanankgo anta niku titaxtunit tuku masputunan. Chu lhuwa kamanan tiku precursores litaxtukgo katsinikgo atanu tachuwin o ankgo alakatanu xlakata nalichuwinankgo Dios.

6-8. 1) ¿Tuku tlawalh chatum kgawasa xlakata xtalakgpalilh chuna la xʼakxilha naskujnani Dios, chu la kitaxtunilh? 2) ¿Tuku tlan natlawayaw xlakata naʼakxilhaw pi Jehová tlan likatsi?

6 Paxkiyaw Jehová chu maxkiputunaw tuku tlakg tlan kgalhiyaw. Pero max na makgkatsiyaw la chatum tala wanikan Aarón. Xlipaxuwaputun naskujnani Dios, pero ni xlipaxuwa. Maski Aarón xʼan ktamakxtumit chu xʼan lichuwinan Dios lata aktsinajku xwanit, xla wan: «Ni lu xaklakgati kan ktamakxtumit chu klichuwinan Dios». Wa xlakata ¿tuku tlawalh?

7 Aarón liskujli chali chali nalikgalhtawakga Biblia, nalakkaxwili tuku nataʼakxilha ktamakxtumit chu namasta xtakgalhtin. Na tlakg tsukulh tlawa oración. Putum uma makgtayalh namastaka xtakanajla. Tlakg lakgapasli Jehová chu tlakg tsukulh paxki. Uma tlawalh tlakg napaxuwa. Precursor litaxtulh, kamakgtayalh amakgapitsin akxni analh tuku masputunan chu alh lichuwinan Dios kʼatanu país. La uku kgolotsin xalak congregación litaxtu chu skujnanima Dios kBetel. ¿La makgkatsi la uku? Aarón wan: «Kkatsinit “la ixlitlan katsi [Jehová]”. Xlakata tasikulunalin nema kmakglhtinanit, kmakgkatsi pi klaklini chu tlawa tlakg nakskujnaniputun, chu uma tlakg kimaxki tasikulunalin».

8 Salmista wa: «Kalikxilhtit xlakata nakatsiyatit la ixlitlan katsi [Jehová]». Chu  wampa: «Ti taputsa la natamakgapaxuwa Dios, ni ama katsankgani tu natalilatama, y tu namaklakaskin» (kalikgalhtawakga Salmo 34:8-10, Ixtatlincan ti Talipawan Dios, SXP). Chuna, akxni maxkiyaw Jehová tuku tlakg tlan kgalhiyaw, xlikana paxuwayaw xlakata katsiyaw pi makgapaxuwamaw. Chu xla chuntiya nakinkakuentajtlawayan chuna la malaknunit.

NI KATAXLAJWANIW

9, 10. ¿Tuku xlakata lu xlakaskinka nakgalhkgalhinanaw?

9 Max tlakg skujnaniputunaw Jehová. Pero ¿tuku natlawayaw komo lhuwa kilhtamaku kgalhkgalhinitawa wi tuku nakinkalakgayawakanan kcongregación o kgalhkgalhimaw wi tuku katalakgpalilh kkilatamatkan? Talakaskin tlakg nakgalhkgalhinanaw (Miq. 7:7). Chu maski Jehová chuntiya nitu natlawa xlakata nalakgpali uma, liwana kilikatsitkan pi xla putum kilhtamaku nakinkamakgtayayan. Xliʼakxilhtit Abrahán wi tuku kinkamasiyaniyan. Jehová malaknunilh pi xʼama maxki chatum kgawasa, pero kgalhkgalhilh lhuwa kata asta akxni Isaac lakachilh. Putum uma kilhtamaku, Abrahán kgalhkgalhinalh chu chuntiya lipawa Jehová (Gén. 15:3, 4; 21:5; Heb. 6:12-15).

10 Xlikana, tuwa tamakgkatsi nakgalhkgalhinanaw (Prov. 13:12). Pero komo nitlan nalimakgkatsiyaw chu chuntiya nalilakpuwanaw tuku titaxtumaw, nataxlajwaniyaw. Tlakg tlan nawan namaklakaskinaw uma kilhtamaku xlakata nakgalhiyaw tayat nema talakaskin xlakata wi tuku nalakgatayayaw kcongregación.

Komo nalikgalhtawakgaya Biblia chu nalilakpuwana, skgalala nawana, liwana nalakapastaknana chu nalaksaka tuku tlan

11. ¿Tuku tayat naliskujaw nakgalhiyaw chu tuku xlakata lu xlakaskinka?

11 Kaliskujti nakgalhiya tayat nema talakaskin. Komo nalikgalhtawakgaya Biblia chu nalilakpuwana tuku likgalhtawakgaya, skgalala nawana, liwana nalakapastaknana chu nalaksaka tuku tlan. Xlakaskinka pi natalan nakgalhikgo tayat la uma xlakata nakuentajtlawakgo congregación (Prov. 1:1-4; Tito 1:7-9). Akxni likgalhtawakgayaw Biblia katsiniyaw tuku lakpuwan Jehová xlakata pulaklhuwa temas. Chu chali chali tlan nalimaklakaskinaw tuku katsininitaw xlakata nalaksakaw tuku namakgapaxuwa. Akgtum liʼakxilhtit, nakatsiniyaw la nakatachuwinanaw amakgapitsin, la namaklakaskinaw tumin chu la nalaksakaw talakgastan chu tuku nalhakgayaw.

12. ¿Tuku tlan natlawakgo tiku makgtapakgsikgo kcongregación xlakata nalimasiyakgo pi tlan kalipawankan?

12 Liwana kamakgantaxtiw taskujut nema kinkamaxkikanan. Akxni xkachikin Dios xkaxtlawamakgolh templo, Nehemías maklakaskinkgolh lakchixkuwin xlakata xlakgatayakgolh lhuwa taskujut. Xla kalaksakli lakchixkuwin tiku tlan xkalipawankan. Xkatsi pi amakgolh lakchixkuwin xpaxkikgo Dios chu liwana xʼama makgantaxtikgo putum taskujut nema xkalakgayawaka (Neh. 7:2; 13:12, 13). La uku nachuna la, tiku  ni makgatsankgananikgo Dios chu lu lakskulujwa nakalilakgapaskan pi tlan kalipawankan chu tlakg lhuwa taskujut nakalakgayawakan (1 Cor. 4:2). Wa xlakata, komo lakchixkuwin o lakpuskatin akinin, liwana kamakgantaxtiw putum taskujut nema nakinkamaxkikanan (kalikgalhtawakga 1 Timoteo 5:25).

13. ¿La namakgtayayan xliʼakxilhtit José akxni amakgapitsi nitlan nalikatsinikgoyan?

13 Kalipawanti Jehová. ¿Tuku tlan natlawaya komo amakgapitsin nitlan likatsinikgoyan? Tlan nakawaniya la makgkatsiya. Pero komo chuntiya kawaniya pi ni xlilat tuku tlawanimakgon, max tlakg naʼanan taʼakglhuwit. Xliʼakxilhtit José lhuwa tuku kinkamasiyaniyan. Xnatalan nitlan likatsinikgolh. Amakgapitsi wankgolh taʼakgsanin xpalakata, chu manuka kpulachin. Pero José lipawa Jehová, lakapastakli tuku xmalaknunit chu ni makgatsankgananilh (Sal. 105:19). Akxni xtitaxtuma tuku tuwa, liskujli nakgalhi lhuwa laktlan tayat nema alistalh makgtayakgolh akxni maxkika xlakaskinka taskujut (Gén. 41:37-44; 45:4-8). Komo nitlan likatsinikgonitan amakgapitsin, kaskini Jehová liskgalala. Xla namakgtayayan ni tunkun nakasitsiniya chu tlan nakalikatsiniya akxni nakatachuwinana (kalikgalhtawakga 1 Pedro 5:10).

TLAKG TLAN KALICHUWINAW DIOS

14, 15. 1) ¿Tuku xlakata kuenta kilitlawatkan chuna la lichuwinanaw Dios? 2) ¿Tuku tlan natlawaya xlakata nalakgpaliya chuna la lichuwinana Dios? (Kaʼakxilhti xapulana dibujo chu recuadro « ¿Litsakgsaputuna tuku xasasti?»).

14 Pablo wanilh Timoteo pi xliskujli tlakg  tlan nalichuwinan xTachuwin Dios. Pablo wa: «Kuintaj natlawakana, chu na kuintaj natlawaya mintamasiyun» (1 Tim. 4:13, 16). Timoteo akglhuwata kata la xlichuwinanit Dios. ¿Tuku xlakata tlakg tlan xlitlawat xwanit? Timoteo xkatsi pi latamanin chu tuku titaxtumakgo talakgpalikgo. Xlakaskin pi latamanin chuntiya xkgaxmatnikgolh, wa xlakata xtalakaskin xliskujli tlakg tlan xtlawalh chu xlakgpalitilhalh la xkamasiyani. Nachuna kilitlawatkan la uku akxni nalichuwinanaw Dios.

15 Kmakgapitsi niku anaw lichuwinanaw Dios kʼakgatunu chiki max ni lhuwa tiku katekgsaw kxchikkan. Alakatanu, max wilakgolh kxchikkan pero nila tanuyaw kʼedificio niku wilakgo. Komo chuna akgspulayan niku lichuwinana Dios, ¿tlan atanu la nakaputsaya latamanin?

16. ¿La natlawayaw xlakata tlan nakinkakitaxtuniyan akxni nalichuwinanaw Dios?

16 Lhuwa natalan lakgatikgo lichuwinankgo Dios niku lhuwa latamanin titaxtukgo. Akgtum liʼakxilhtit, xlakata nakatekgskgo latamanin ankgo niku kgalhkgalhikan tren, autobús, kpustan chu kparques. Chatum xtatayana Jehová tlan natsuku lichuwinan tuku nina makgas lichuwinanka knoticias. Makgapitsi wanikgo lakwan tachuwin xlakata xkamanankan o tlawanikgo takgalhskinin xlakata xtaskujut. Komo akxilhkgo pi tiku kgaxmatnimakgolh lakgati tuku litachuwinama, masiyani tuku wan Biblia chu alistalh kgalhskin tuku lakpuwan. Uma tlawa pi xchatiykan xatapaxuwan nalichuwinankgo xlakata Biblia.

17, 18. 1) ¿Tuku nakinkamakgtayayan ni napekuanaw akxni nalichuwinanaw Dios niku lhuwa lamakgolh latamanin? 2) ¿Tuku xlakata lakpuwana pi nakinkamakgtayayan nalakapastakaw la David akxni nalichuwinanaw Dios?

17 Max tuwa namakgkatsiyaw nakalitachuwinanaw Dios ktiji latamanin tiku ni kalakgapasaw. Chuna akgspula Eddie, chatum precursor xalak Nueva York. ¿Tuku makgtayalh xlakata ni lu napekuan? Wan pi akxni xkakninanikgo Dios kfamilia, xla chu xpuskat xputsakgo tuku xkamakgtayalh akxni latamanin ni lu xkgaxmatniputunkgolh chu tuku xlakpuwankgo latamanin. Nachuna, kakgalhskin amakgapitsi xtatayananin Jehová. La uku Eddie lu lakgati lichuwinan Dios niku lamakgolh lhuwa latamanin.

18 Komo lipaxuwayaw la lichuwinanaw Dios chu tlakg katsiniyaw la nakatachuwinanaw latamanin, amakgapitsin na akxilhkgo pi tlakg stakma kintakanajlakan (kalikgalhtawakga 1 Timoteo 4:15). Max asta namakgtayayaw chatum lataman xtatayana Jehová nalitaxtu. David wa: «Nakpaxkatlikatsini Kimapakgsina Dios nak wakg kilhtamakuj; kinkilhni ni ama jaxa lata naktlinij. Nakpaxkatlikatsini lata lhuwa litlan kintlawaninit; katakgaxmatli kintachiwin ti laktlan takatsi y snun katapaxawalh» (Sal. 34:1, 2SXP).

CHUNTIYA KAKATSINIW NALICHUWINANAW DIOS XLAKATA NAMALANKIYAW

19. ¿Tuku xlakata tlan napaxuwa tiku skujnani Jehová maski tuwa tuku titaxtuma?

19 David na wa: «Kintikukan Dios, ¡katamalankin wakg tu katlawanita! ¡Wakg kilhtamaku katapaxkatlikatsinin minkamanan ti tatapakgsiniyan! ¡Katalikgalhchiwinalh minkamanan ti kamapakgsiya la lipaxaw talamana ti tatapakgsiniyan! ¡Katamakatsininalh la lilaya militliwekge, xlakata na natakatsi wakg lakchixkuwin la laklikuanit tu katlawanita, y la snun likaknit mapakgsinana!»  (Sal. 145:10-12SXP). Putum tiku paxkikgo Jehová chu ni makgatsankgananikgo lu kalitachuwinamputunkgo amakgapitsin xpalakata. Pero komo tatatlayaw o linawa kata max nila lu nalichuwinanaw Dios kʼakgatunu chiki chuna la lakaskinaw. ¿Tuku natlawayaw? Putum kilhtamaku kalakapastakti pi malankipat Jehová akxni kalitachuwinana tiku lakatsu wilakgolh, la enfermeras chu makuchinanin. Komo manukanita kpulachin xlakata mintakanajla, tlan chuntiya nakalitachuwinana amakgapitsin, uma namakgapaxuwa xnaku Jehová (Prov. 27:11). Xla na lu paxuwa akxni skujnaniya maski tiku xalak mifamilia ni chuna tlawakgo (1 Ped. 3:1-4). Asta akxni lu tuwa tuku titaxtupat, tlan namalankiya Jehová, tlan tlakg natalakatsuwiniya chu namastakaya mintakanajla.

20, 21. Komo wix tlakg lhuwa taskujut lakgayawakanita kxkachikin Jehová, ¿la nakamakgtayaya amakgapitsin?

20 Xlikana pi Jehová nasikulunatlawayan komo chuntiya talakatsuwiniya chu tlawaya putum tuku matlaniya xlakata naskujnaniya. Komo wi tuku nalakgpaliya kmilatamat tlan tlakg nakamakgtayaya latamanin nakatsinikgo xlakata tuku Jehová malaknunit. Na tlan tlakg nakamakgtayaya natalan. Chu akxni natalan naʼakxilhkgo pi lu skujpat kcongregación tlakg napaxkikgoyan.

21 Maski lhuwa o nina lhuwa kata la skujnanimaw Jehová, kimputumkan tlan chuntiya natalakatsuwiniyaw chu namastakayaw kintakanajlakan. Kʼartículo nema aku namin, nalichuwinanaw la tlan nakamakgtayayaw amakgapitsin namastakakgo xtakanajlakan.