«Minchatunukan milipaxkitkan mimpuskatkan chuna la mi’akstukan kapaxkikanatit; nachuna, xapuskat lu xlimaxkit kakni xchixku» (EFES. 5:33TNM).

TAKILHTLIN: 18, 3

1. Maski xapulana lu lipaxuwakan tamakgaxtokgat, ¿tuku nakgalhikgo tiku natamakgaxtokgkgo? (Kaʼakxilhti xapulana dibujo).

AKXNI kgawasa akxilha xastlan xtaskin akxni natamakgaxtokgkgo, xchatiykan lu paxuwakgo. Akxni xlalakgapasmakgo, tlakg stakli tapaxkit nema xlakgalhinikgo wa xlakata lakapastakkgolh natamakgaxtokgkgo chu nalawani pi nikxni nalamakgatsankganani. Akxni tamakgaxtokgkgonita, xlilakgpalitkan xlatamatkan xlakata chuntiya akxtum natawilakgo. Jehová malakatsukilh tamakgaxtokgat, chu lakaskin pi putum tiku tamakgaxtokgkgonit kapaxuwakgolh chu tlan kakakitaxtunilh. Wa xlakata kamaxkinit lu tlan tastakyaw kBiblia (Prov. 18:22). Maski chuna, putum akinin makglakgalhinanin. Wa xlakata Biblia wan pi tiku natamakgaxtokgkgo nakgalhikgo «ntapatin», uma wamputun, taʼakglhuwit (1 Cor. 7:28). ¿Tuku tlan natlawakgo tiku tamakgaxtokgkgonit xlakata ni lhuwa taʼakglhuwit nakgalhikgo? ¿Chu tuku tlan natlawakgo kstalaninanin Cristo tiku tamakgaxtokgkgonit xlakata tlan nakakitaxtuni?

2. ¿Tuku tapaxkit xlikgalhitkan tiku tamakgaxtokgkgonit?

 2 Biblia limasiya pi tapaxkit lu xlakaskinka tayat. Pero anan tipalhuwa tapaxkit nema xlimasiyatkan tiku tamakgaxtokgkgonit. Akgtum liʼakxilhtit, xlalimasiyanit tapaxkit nema lakgalhinikgo amigos chu tapaxkit nema lakgalhinikgo tiku lalakgatikgo. Chu komo kgalhikgo kamanan, tlakg xlakaskinka nalalimasiyanikgo tapaxkit nema lakgalhinikgo familia. Pero xlakata tamakgaxtokgat tlan nakitaxtuni tlakg xlakaskinka nalalimasiyani tapaxkit nema takilhtinit kBiblia. Apóstol Pablo chuna lichuwinalh uma tapaxkit: «Minchatunukan milipaxkitkan mimpuskatkan chuna la mi’akstukan kapaxkikanatit; nachuna, xapuskat lu xlimaxkit kakni xchixku» (Efes. 5:33TNM).

TUKU LAKGAYAKGOLH TIKU TAMAKGAXTOKGKGONIT

3. ¿La xlilhuwa nalapaxkikgo kstalaninanin Cristo tiku tamakgaxtokgkgonit?

3 Pablo tsokgli: «Wixin mpuchuwa chixkuwin, kapaxkitit mimpuskatkan, xtachuna lantla mpaxkilh nCristo nkgamputum nkanajlanin, chu na tiakstumastalh xpalakatakan» (Efes. 5:25). La uku, kstalaninanin Cristo tlawakgo la Jesús chu lapaxkikgo xchatunukan chuna la Jesús kapaxkilh kstalaninanin (kalikgalhtawakga Juan 13:34, 35; 15:12, 13). ¿La xlilhuwa nalapaxkikgo kstalaninanin Cristo tiku tamakgaxtokgkgonit? Lu nalapaxkikgo asta namastapunkgo xlatamatkan xpalakata achatum. Pero akxni anan laklanka taʼakglhuwit ktamakgaxtokgat, makgapitsi max ni makgkatsikgo pi xtapaxkitkan lu tliwakga. ¿Tuku nakamakgtaya? Tapaxkit nema takilhtinit kBiblia. ¿Tuku xlakata? Xlakata uma tapaxkit «putum tapatinan, putum kanajla, putum kgalhkgalhi, putum tayani» chu «nikxni katisputli» (1 Cor. 13:7, 8TNM). Tiku tamakgaxtokgkgonit xlilakapastakatkan pi wi tuku malaknukgolh natlawakgo. Malaknukgolh nalapaxkikgo chu ni nalamakgatsankgananikgo. Uma nakamakgtaya naputsakgo xtamakgtay Jehová chu akxtum naliskujkgo xlakata nalakkaxtlawakgo putum taʼakglhuwit.

4, 5. 1) ¿Tuku lakgaya chixku kfamilia? 2) ¿La xliʼakxilhat puskat taskujut nema lakgaya? 3) ¿Tuku lakgpalikgolh akgtum tamakgaxtokgat?

4 Pablo lichuwinalh tuku lakgchan natlawa xachixku chu xapuskat: «Wanti mpuchuwa lakchajan, kalakgachixkuwikgolh [...] xchixkukan, xtachuna lantla lakgachixkuwikgoy nkimPuchinakan. Sampi wa xchixku mpuskat, wa xpuxku mpuskat, xtachuna lantla nCristo, xpuxkukan nkgamputum [congregación]» (Efes. 5:22, 23). Uma ni wamputun pi chixku tlakg tlan nixawa xpuskat. Jehová lichuwinalh lu tlan taskujut nema tlawa xapuskat akxni wa: «Nitlan xakstu nalatama chixku. Naktlawani xmakgtayana, xlakata nalitakgatsi» (Gén. 2:18). Puskat xlimakgtayat xchixku xlakata lu tlan napulalin familia. Chu lakchixkuwin xlilat nalimasiyakgo tapaxkit la tlawalh Jesús, tiku litaxtu xʼAkgxakga congregación. Akxni chixku chuna tlawa, xpuskat lipaxuwa chu ni tuwa makgkatsi namaxki kakni chu namakgtaya.

Akxni tlawakan la Jehová lakgati tlakg tlan latalalinkan ktamakgaxtokgat

5 Chatum tala wanikan Cathy wan: «Akxni tsumatku xakwanit, kiʼakstu xaklaksaka tuku xaktlawaputun chu kiʼakstu xkinkuentajtlawakan. Pero akxni ktamakgaxtokgli, kkatsinilh nakputsa xtamakgtay kinchixku». Xla wan pi tuwa kitaxtuninit, pero tlakg tlan latalalin xlakata tlawakgonit chuna la Jehová lakgati [1] (kaʼakxilhti nota niku kgalhsputa artículo). Xchixku tiku wanikan Fred wan: «Ankgalhin  tuwa kmakgkatsinit wi tuku naklaksaka. Chu tlakg tuwa kinkitaxtuninit ktamakgaxtokgat xlakata kuentakilitlawat chatiy latamanin. Pero chuna la titaxtu kilhtamaku tlakg ni tuwa kmakgkatsi, xlakata kskini Jehová kakimakgtayalh chu liwana kkgaxmata tuku lakpuwan kimpuskat. Kmakgkatsi pi xlikana akxtum skujmaw».

6. ¿Tuku xlakata tapaxkit «makxtum tlawanan» akxni anan taʼakglhuwit ktamakgaxtokgat?

6 ¿Tuku talakaskin xlakata akgtum tamakgaxtokgat tliwakga natawila? Biblia wan: «Kalapaxuwanalipinitit, chu na nalamatsankgananiyatit nchatunu amakgapitsin». Xlakata makglakgalhinanin, xchatiykan natlawakgo tuku ni tlan. Akxni chuna nala, tlan nakatsinikgo xlakata tuku nitlan tlawakgo, nakatsinikgo tapatinankgo chu nalimasiyakgo tapaxkit nema takilhtinit kBiblia. Uma tapaxkit «makxtum tlawanan» (Col. 3:13, 14). Tiku tamakgaxtokgkgonit tlan nalimasiyakgo uma tapaxkit akxni ni lakapala nasitsikgo, tlan nalikatsikgo chu ni nalakapastakkgo tuku nitlan latlawanikgolh (1 Cor. 13:4, 5). Tiku tamakgaxtokgkgonit xliskujatkan xlakata tunkun nalakkaxtlawakgo taʼakglhuwit nema naʼanan, akxni nina sputa kilhtamaku (Efes. 4:26, 27). Talakaskin ni napekuankan chu nataktujukan xlakata nawankan: «Kintapati xlakata nitlan kmamakgkatsinin». Pero akxni wi tiku skin katapatika makgtayanan nalakkaxla taʼakglhuwit chu tlawa tlakg tlan nalatalalinkgo tiku tamakgaxtokgkgonit.

LU XLAKASKINKA NALALAKGALHAMANKGO

7, 8. 1) ¿Tuku tastakyaw masta Biblia xlakata talakgxtumit ktamakgaxtokgat? 2) ¿Tuku xlakata xlilat pi tiku tamakgaxtokgkgonit nalalakgalhamankgo?

7 Biblia masta lu tlan tastakyaw xlakata tiku tamakgaxtokgkgonit naʼakxilhkgo talakgxtumit chuna la xlilat (kalikgalhtawakga 1 Corintios 7:3-5). Lu xlakaskinka pi tiku tamakgaxtokgkgonit kuenta natlawakgo tuku makgkatsi chu tuku maklakaskin achatum. Komo xachixku ni limasiyani xpuskat pi lakgalhaman, xla max ni nalipaxuwa akxni natatalakgxtumi. Biblia wani xachixku pi kalikatsinilh xpuskat «lantla xlilat» (1 Ped. 3:7). Xachixku nikxni lu naskini o namafuerzajni xpuskat xlakata natatalakgxtumi. Xakstu xlimakgkatsit pi chuna tlawaputun. Makglhuwa, wa chixku tiku tlakg makgkatsi pi talakgxtumiputun nixawa puskat. Pero natalakgxtumikgo akxni xchatiykan chuna nalakkaxwilikgo.

8 Biblia ni limin limapakgsin xlakata la nalimasiyakan tapaxkit ktamakgaxtokgat. Pero masiya pi xlakaskinka nalalakgalhamankan (Cant. de Cant. 1:2; 2:6). Chuna la akxilhaw, kstalaninanin Cristo tiku tamakgaxtokgkgonit xlilat nalalakgalhamankgo.

9. ¿Tuku xlakata lu nitlan nalimasiyaniyaw pi lakgatimaw tiku ni tatamakgaxtokgnitaw?

9 Makgapitsi lakxtlawakgonit xtamakgaxtokgatkan xlakata lismanikgolh naʼakxilhkgo tiku ni lhakganankgonit o xlakata limasiyakgonit pi atanu tiku lakgatikgo. Lu nitlan chuna natlawakan chu kililakgmakganatkan. Komo lu paxkiyaw Jehová chu kintalatamankan, nakuentajtlawayaw pi nitu chu niti nalakxtlawa kintamakgaxtokgatkan. Nitu  kilitlawatkan nema nalimasiya pi lakgatimaw tiku ni tatamakgaxtokgnitaw xlakata chuna xlimasiyaw pi ni paxkinanaw. Kalakapastakwi pi Dios katsi putum tuku lakpuwanaw chu tlawayaw. Uma natlawa pi namakgapaxuwaputunaw chu ni namakgatsankgananiputunaw tiku tatamakgaxtokgnitaw (kalikgalhtawakga Mateo 5:27, 28 chu Hebreos 4:13).

AKXNI ANAN TAʼAKGLHUWIT

10, 11. 1) ¿La xlilhuwa tamakgaxtokgat lamakgxtakgkgo kxlakatin mapakgsinanin? 2) ¿Tuku wan Biblia xlakata nialh akxtum natawilakgo tiku tamakgaxtokgkgonit? 3) ¿Tuku nakamakgtaya tiku tamakgaxtokgkgonit ni akglakgwa nalaksakkgo nialh akxtum natawilakgo?

10 Makgapitsi latamanin nialh akxtum tawilakgo o lamakgxtakgkgo kxlakatin mapakgsinanin akxni nila lakkaxtlawakgo laklanka xtaʼakglhuwitkan. Kmakgapitsi países, liwaka itat tamakgaxtokgat lamakgxtakgkgo. Xlikana, uma ni lu chuna tlawakgo xtatayananin Jehová. Pero la uku tlakg anan tamakgaxtokgat xla xtatayananin Jehová nema kgalhikgo laklanka taʼakglhuwit.

11 Biblia wan: «Ni natapanuniy mpuskat xchixku. Chi lapi xtaxtunilh, pus chunata katamakgaxtakgli, nialh [natamakgaxtokgpara], su kalakgampa xchixku; chu wa nchixku, ni kamakgalh xpuskat» (1 Cor. 7:10, 11). Makgapitsi tiku tamakgaxtokgkgonit max lakpuwankgo pi lu laklanka xtaʼakglhuwitkan chu xlilat nialh akxtum natawilakgo. Pero Jesús limasiyalh pi lu xlakaskinka ni akglakgwa nalamakgxtakgkan. Wampa tuku Dios xwanit xlakata tamakgaxtokgat chu alistalh wa: «Wa ntu Dios makxtum tlawalh, ni kamapapitsilh nchixku» (Mat. 19:3-6; Gén. 2:24). Liwana tasiya pi Jehová lakaskin akxtum natawilakgo tiku tamakgaxtokgkgonit (1 Cor. 7:39). Putum kililakapastakatkan pi Jehová nakinkatalakkaxlayan xlakata tuku tlawayaw. Uma nakinkamakgtayayan lakapala nalakkaxtlawayaw kintaʼakglhuwitkan, akxni nina lu laklanka.

Tiku tamakgaxtokgkgonit lakkaxtlawakgo xtaʼakglhuwitkan xlakata mastakgo talakaskin pi Dios kakapulalilh

12. ¿Tuku xlakata max nalakpuwankgo tiku tamakgaxtokgkgonit nialh akxtum natawilakgo?

12 ¿Tuku xlakata lu laklanka taʼakglhuwit kgalhikgo makgapitsi tamakgaxtokgat? Makgapitsi lilipuwankgo o sitsikgo xlakata xtamakgaxtokgatkan ni kitaxtulh la xlakaskinkgo. Makglhuwa, anan taʼakglhuwit xlakata tanu la kamakgastakka o tanu la limasiyakgo tuku makgkatsikgo. Min kilhtamaku kgalhikgo taʼakglhuwit xlakata la talalinkgo xfamiliajkan, xlakata la laktlawakgo tumin o la makgastakkgo kamanan. Pero lu tlan pi atsinu ni putum kstalaninanin Cristo tiku tamakgaxtokgkgonit lakkaxtlawakgo xtaʼakglhuwitkan xlakata mastakgo talakaskin pi Jehová kakapulalilh.

13. ¿Tuku xlakata max xlilat nialh akxtum natawilakgo tamakgaxtokgat?

13 Min kilhtamaku, max tamakgaxtokgat nialh akxtum natawilakgo. Makgapitsi lakpuwankgo pi tlan nalamakgxtakgkgo akgtum tamakgaxtokgat akxni lu tuwa tuku titaxtumakgo, la akxni xachixku ni maxki tuku maklakaskin xfamilia, akxni lu nikkan o wilinikan achatum chu akxni lu kalipekua wilinikan xtakanajla achatum. Akxni anan lu laklanka  taʼakglhuwit, tiku tamakgaxtokgkgonit xliskinitkan tamakgtay lakgkgolotsin xalak congregación. Xlakan lu katsinikgo chu tlan nakamakgtayakgo xlakata namakgantaxtikgo xtastakyaw Dios. Komo tiku tamakgaxtokgkgonit skinikgo Jehová xʼespíritu santo, tlan namakgantaxtikgo tastakyaw xalak Biblia chu nalimasiyakgo xtayat Cristo (Gál. 5:22, 23) [2] (kaʼakxilhti nota niku kgalhsputa artículo).

14. ¿Tuku kawani Biblia natalan tiku tatamakgaxtokgkgonit tiku ni xtatayana Jehová?

14 Biblia limasiya pi anan tuku xlakata ni nalamakgxtakgkgo tiku tamakgaxtokgkgonit maski chatum ni kakninani Jehová (kalikgalhtawakga 1 Corintios 7:12-14). Tiku ni xtatayana Jehová «litasikulunatlawanit xpuskat» xlakata tatamakgaxtokgnit tiku skujnanima Jehová. Chu laktsu xkamanankan «tasikululanatlawakgonit», wa xlakata Dios kakuentajtlawa. Pablo kawanilh kstalaninanin Cristo: «¿Lantla likatsiya wix puskat lapi namalakgtaxtiya minchixku? Su ¿lantla likatsiya wix chixku wa lapi namalakgtaxtiya mimpuskat?» (1 Cor. 7:16). Wilakgolh lhuwa liʼakxilhtit xlakata kstalaninanin Cristo tiku makgtayakgolh xchixkukan o xpuskatkan xtatayananin Jehová nalitaxtukgo.

15, 16. 1) ¿Tuku tastakyaw kamaxki Biblia lakpuskatin tiku xchixkukan ni skujnani Jehová? 2) ¿Tuku ni xlitlawat xtatayana Jehová komo tiku ni skujnani Dios makgxtakga?

15 Apóstol Pedro kamaxkilh uma tastakyaw lakpuskatin tiku kstalaninanin Cristo: «Kalakgachixkuwitit minchixkukan; lakimpi na chuna wa minchixkukan nti ni kanajlakgoy xtachuwin Dios, nalitlajakgoyatit nakanajlakgoy ni wa xpalakata mintachuwinkan, wampi xpalakata ntu ntlan milatamatkan wixin xlakchajankan, akxni naʼukxilhkgoy akgstitum milatamatkan, chu mpi maxkiyatit nkakni». Puskat ni putum kilhtamaku nalitachuwinan xchixku xlakata xtakanajla, wata tlakg namakgtaya nakatsiputun xaxlikana xalak Biblia komo nalimasiya «mpi xapaxuwa, chu wa  ntu xlixasmalhwa nawan nchatum; wa yuma wa ntu lhuwa xtapalh kxlakatin Dios» (1 Ped. 3:1-4).

16 ¿Chu komo wa xachixku tiku ni xtatayana Jehová laksaka nalamakgxtakgkgo? Biblia wan: «Wampi lapi wa nti ni xakanajlani ntapanuy, pus katapanutamacha. Pus akxni nchuna akgspulanan, nialh xlakaskinka nchixku, su wa mpuskat mpala tu fuerzaj natlawaniy, sampi wa Dios, kinkalitasaninitan nakgalhiyaw ntapaxuwanaliyan» (1 Cor. 7:15). Chuna la akxilhaw, tiku xtatayana Jehová ni fuerza xliwanit tiku ni skujnani Dios pi katamakgxtakgli. Chu maski akxni lamakgxtakgkgo tlakg xatapaxuwan tawilakgo kchiki, Biblia wan pi xtatayana Jehová nila natamakgaxtokgpara. Chuna la natitaxtu kilhtamaku, tiku ni xtatayana Jehová max nataspitpara xlakata nalakkaxtlawa xtamakgaxtokgat chu alistalh max na xtatayana Jehová nalitaxtu.

¿TUKU TLAKG XLAKASKINKA KTAMAKGAXTOKGAT?

Akxni kuentajtlawayaw takaknin nema maxkiyaw Jehová, tlakg paxuwayaw kkintamakgaxtokgatkan. (Kaʼakxilhti párrafo 17).

17. ¿Tuku tlakg xlakaskinka xliʼakxilhatkan kstalaninanin Cristo tiku tamakgaxtokgkgonit?

17 Xlakata wilaw kxaʼawatiya kilhtamaku, lu tuwa tuku titaxtuyaw (2 Tim. 3:1-5). Wa xlakata talakaskin lu tlan natalalinaw Jehová xlakata tlan nakinkakitaxtuniyan. Pablo wa pi «nkilhtamaku nkaj atsinu wi». Chu alistalh wa: «Wa nchiyu ntu naʼanan kilhtamaku, wa nti nkgalhikgoy xlakchajankan, xtachuna nkalatamakgolh wa lantla nti ni kgalhiy. [...] Chu wa nti mpala tu maklakaskinkgoy wa ntu xala katuxawat, xtachuna kawankgolh wa nti ni lu[...] maklakaskimputunkgoy» (1 Cor. 7:29-31). Pablo ni xwamputun pi kstalanina Cristo ni nakuentajtlawa xtamakgaxtokgat. Pero xlakata wilaw kxaʼawatiya kilhtamaku, tlakg xlakaskinka kiliʼakxilhatkan naskujnaniyaw Jehová (Mat. 6:33).

18. ¿Tuku tlan natlawakgo kstalaninanin Cristo xlakata napaxuwakgo kxtamakgaxtokgatkan?

18 Kʼuma lu tuwa kakilhtamaku, lhuwa tamakgaxtokgat nitlan kakitaxtuni. ¿Tuku tlan tlawakgo tiku tamakgaxtokgkgonit xlakata napaxuwakgo chu tlan nakakitaxtuni? Komo lakatsu tawilanikgo Jehová chu xkachikin, kgalhakgaxmatkgo tastakyaw xalak Biblia chu mastakgo talakaskin kakapulalilh espíritu santo. Komo chuna natlawakgo, namaxkikgo kakni «wa ntu Dios makxtum tlawalh» (Mar. 10:9).

^ [1] (párrafo 5): Kʼuma artículo, kalakgpalikanit tukuwani.

^ [2] (párrafo 13): Kaʼakxilhti libro «Katamakgxtakgtit kxtapaxkit Dios», apéndice «¿Tuku wan Biblia xlakata lakxtlawakan tamakgaxtokgat xlakatin mapakgsinanin chu lamakgxtakgkan?».