Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Agosto kata 2016

 BIOGRAFÍA

Kimaxki tapaxuwan kkaskujnani amakgapitsin

Kimaxki tapaxuwan kkaskujnani amakgapitsin

XAKKGALHI 12 kata akxni kkatsilh pi xakkgalhi tuku lu xtapalh nema xakkamaxkilh amakgapitsin. Kʼakgtum lanka tamakxtumit, chatum tala kinkgalhskilh komo xakkamputun talichuwinan Dios. Nikxni xaklichuwinanit Dios, pero kwanilh pi tlan. Akxni kchaw niku xkinkalakgchanan, tala kimaxkilh makgapitsi folletos nema xlichuwinankgo xTamapakgsin Dios. Chu kiwanilh pi akit xaklichuwinalh Dios lakgpatu tiji chu xla xʼama lichuwinan xalakgpatu tiji. Maski xakpekuama, ktsukulh klichuwinan Dios kʼakgatunu chiki. Kaks klilakawa akxni kakxilhli pi ni lhuwa kilhtamaku xtitaxtunit xakmastanit putum folletos. Liwana xtasiya pi xakkgalhi tuku xlakaskinkgo lhuwa latamanin.

Klakachilh kkata 1923 kʼaktsu kachikin wanikan Chatham, nema tapakgsini Kent (Inglaterra). Aku ksputnit xaPulana Guerra xLikalanka Katiyatni, chu latamanin xlakaskinkgo pi tlakg tlan xtawilalh kakilhtamaku. Pero komo ni chuna lalh, lhuwa lilipuwankgolh, nachuna makgkatsikgolh kinatlatni. Kinatlatni na lilipuwankgolh xlakata sacerdotes bautistas xlakaskinka xlitaxtuputunkgo ksikulan. Akxni xakkgalhi max akgnajatsa kata, kintse tsukulh an kxpukgalhtawakgakan xLikgalhtawakgananin Biblia. Anta xtatayananin Jehová xtlawakgo xtamakxtumitkan, nema xwanikgo «clases». Chatum tala puskat xkinkamasiyaniyan tiku laktsinajku xakwanitaw, xlimaklakaskin Biblia chu libro El Arpa de Dios. Lu xaklakgati tuku xakkatsinima.

KIMASIYANIKGO NATALAN TIKU LINKGOYA KATA

Akxni aku xakstakma, xaklakgati kalitachuwinan latamanin takgalhkgalhin nema min kBiblia. Makglhuwa kiakstu xaklichuwinan Dios kʼakgatunu chiki. Pero lu xakkatsini akxni xakkalitachuwinan Dios amakgapitsi natalan. Akgtum kilhtamaku xaktaʼama kbicicleta chatum tala tiku xlina kata niku xakamaw lichuwinanaw Dios. Akxni ktilakgatsalaw chatum sacerdote, kwa: «A anacha tantum cabra». Tala tachokgolh chu kiwanilh pi xaktawilaw kkgantum kiwi. Chu kinkgalhskilh: «¿Tiku maxkin limapakgsin xlakata nawana tiku tantum cabra chu tiku ni? Kalipaxuwaw nalichuwinanaw xalakwan tamakatsin chu kamastaw talakaskin pi Jehová kalakputsanalh». Ama kilhtamaku, lhuwa la kkatsinilh pi tlakg paxuwakan akxni mastakan nixawa makglhtinankan (Mat. 25:31-33; Hech. 20:35).

Achatum tala tiku xlina kata kimasiyanilh pi xlakata napaxuwayaw akxni namastayaw, namin kilhtamaku natalakaskin nakgalhkgalhinanaw chu natayaniyaw. Xpuskat ni xʼakxilhputunkgo xtatayananin Jehová. Akgtum kilhtamaku, tala kiwanilh xakalh kxchik xlakata xkintawayalh. Xpuskat lu xsitsinit xlakata xla xʼanit lichuwinan Dios chu tsukulh kinkamakaniyan paquetes xla té. Pero tala ni sitsinilh wata lakalitsilh chu  tsukulh kakaxwili paquetes. Titaxtulh kata, xlakata kgalhkgalhinalh lu tlan kitaxtulh akxni tamunulh xpuskat chu xtatayana Jehová wa.

Papaʼ septiembre kata 1939, Gran Bretaña tsukulh tatlawa guerra Alemania. Akit xakkgalhi 16 kata. Kintse chu akit ktamunuw kkachikin wanikan Dover marzo kata 1940. Junio xla ama kata, akxni xaklakaxtuya kkimalakcha kakxilhli lhuwa mil soldados tiku xtitaxtumakgo chu xwakakgo klaklanka putlaw. Wa tiku xlakgtaxtukgonit kguerra xalak Dunkerque. Xakakxilha kxlakankan pi lu nitlan xmakgkatsikgo chu ni xkgalhikgo takgalhkgalhin. Lu xakkalitachuwinamputun xTamapakgsin Dios chu xakkamaxkilh akgtum takgalhkgalhin. Ama kata, Alemania tsukulh makani bombas Gran Bretaña. Akgatunu katsisni, xʼavioneskan alemanes nema xmakankgo bombas xtitaxtukgo niku xaklamaw. Lu xakpekuanaw akxni xakkgaxmataw la xmakasanankgo bombas akxni xmokgosmakgo. Lichali, ankgalhin xakakxilhaw la xmakasputunankanit. Uma tuku ktitaxtulh tlakg kimakanajlilh pi kajwatiya xTamapakgsin Dios tlan xkimaxki takgalhkgalhin.

KMAKLAKASKIN KILATAMAT XLAKATA NAKMASTA

Kkata 1941 ktsukulh kskujnani Dios xaputum kilhtamaku. Ama kata tsukulh akgtum latamat nema lu klipaxuwanit. Akit xakskujnit kʼakgtum fábrica xla gobierno kChatham niku kimasiyanika la tlawakan barcos. Lhuwa xlakaskinkgo uma taskujut xlakata lhuwa tuku xmastakan. Pero kskujnanin Dios xakkatsiyaw pi ni kilimakgtanutkan kʼguerras. Chu max kkata 1941, na kʼakgatekgswi pi kstalaninanin Cristo ni kilimakgtlawatkan limakgnin (Juan 18:36). Kfábrica niku xakskuja xtlawakan submarinos, wa xlakata kmakgxtakgli kintaskujut chu ktsukulh kskujnani Dios xaputum kilhtamaku. Xapulana niku kimalakgachaka xwanikan Cirencester, uma kachikin lu stlan xwanit chu xmakgtapakgsi Cotswolds.

Akxni xakkgalhi 18 kata, kimanuka 9 papaʼ kpulachin xlakata ni soldado klitaxtulh. Lu nitlan kmakgkatsilh akxni lhkgan malakchuwaka kpulachin chu kiʼakstu ktamakgxtakgli. Pero ni xlimakgas, tiku xkuentajtlawanankgo chu tiku xkamanukanit kpulachin kinkgalhskinkgolh tuku xlakata anta xkimanukanit. Lu klipaxuwalh xlakata tlan kkalitachuwinalh kintakanajla.

Akxni ktaxtulh kpulachin, ktalichuwinalh Dios tala Leonard Smith * klhuwa kachikinin kxcondado Kent. Kinchatiykan xala anta xakwanitaw. Ama kilhtamaku, nazis tsukukgolh makankgo bombas kLondres. Xlakata tlan xchankgolh, xʼavioneskan xlititaxtutkan xwanit kKent. Lata kkata 1944, liwaka 1,000 bombas makanka kxcondado Kent. Umakgolh bombas, aviones xwankgonit nema ni xkgalhikgo pilotos chu xlitsamakgo explosivos. Akxni xakkgaxmataw pi xmixkgo xmotoreskan, xakkatsiyaw pi avión xʼama mokgosa chu xʼama  pankga. Putum lu xakpekuanaw. Uma kilhtamaku xakkalimakgalhtawakgeyaw Biblia akgtum tamakgaxtokgat chu kgalhtutu xkamanan. Xmin kilhtamaku xaktawilayaw kxtampin akgtum mesa xla likan nema xtlawakanit xlakata xaklitatsekgwi komo akgtum bomba xlakxtlawalh chiki. Titaxtulh kilhtamaku tamunulh putum familia.

KLICHUWINAN DIOS KʼATANU PAÍSES

Xaklichuwinamaw akgtum lanka tamakxtumit akxni precursor xaklitaxtu kʼIrlanda (tutsu).

Akxni xtitaxtunita guerra, akgtiy kata precursor klitaxtulh kxsur Irlanda. Xakanaw kʼakgatunu chiki, xakwanaw pi misioneros xaklitaxtuyaw chu xakskinaw niku xaktamakgxtakgwi. Xakmakgpitsiyaw revistas ktiji. Pero Irlanda ni xwanit la Inglaterra. Lhuwa xlakpuwankgo pi tontos xakwanitaw xlakata xaklakpuwanaw pi xʼamaka kinkakgaxmatnikanan kʼakgtum país católico. Akxni chatum chixku kinkawanin pi xʼama kinkatlawaniyan tuku nitlan, kwanilh chatum policía. Xla kinkgalhtilh: «¿Chu tuku xlakpuwana?». Ni xakkatsiyaw pi sacerdotes lu xkgalhikgo limapakgsin anta. Komo latamanin xmakglhtinankgo kilikgalhtawakgakan, xmakgatsankgakgo xtaskujutkan. Chu akinin kinkamafuerzajnikan naktaxtuyaw niku xaklamaw.

Ni xlimakgas, kkatsiw pi akxni xapulana xakchaw kʼakgtum kachikin, tlakg tlan xwanit xaklichuwinaw Dios niku ni xkinkalakgapasni sacerdote. Wa xlakata, pulana xakkalakganaw tiku makgat xwilakgolh. Alistalh, xakkalakganaw tiku lakatsu xwilakgolh. Anta kKilkenny, akgatunu semana makgtutu xaklimakgalhtawakgeyaw Biblia chatum kgawasa. Maski lhuwa latamanin xtamakxtumikgo chu xkinkawanikgoyan pi xʼamakgo kinkatlawanikgoyan tuku nitlan, chuntiya xakmakgalhtawakgeyaw. Xlakata lu xaklipaxuwa nakmasiya xlakata Biblia, klakaskilh nakimasiyanikan xlakata misionero xaklitaxtulh. Wa xlakata kmalakgatsamalh maktum solicitud xlakata xakalh kʼEscuela Bíblica de Galaad de la Watchtower.

Velero wanikan Sibia kinchikkan litaxtulh akxni misioneros xakwanitaw kkata 1948 asta 1953 (pakgastakat).

Kiwanika pi nakan kcurso nema makgapala akgkitsis papaʼ kNueva York. Akxni kmasputulh, akit chu kgalhtutu natalan kinkamalakgachakan tlakg laktsina xʼislas mar Caribe. Noviembre kata 1948, ktaxtuchaw kNueva York kʼakgtum aktsu barco 18 metros xlilanka chu xwanikan Sibia. Lu xakpaxuwama xlakata nikxni xakpaxialhnanit kʼakgtum velero. Tiku na xʼanit kcurso xwanikan Gust Maki chu lu xkatsini xlin barco. Kinkamasiyanin la naklinaw barco, la nakmawakayaw chu namaktiyaw velas, naklimaklakaskinaw brújula chu naklinaw barco maski lakgapaxtokgnan un. Max 30 kilhtamaku, Gust liwana lilh barco maski lu ksenama, asta akxni kchaw kBahamas.

«KALICHUWINANTIT KXLAKGSTIPAN ISLAS»

Akxni xaklichuwinanitawa Dios makgapitsi papaʼ kʼislas xalak Bahamas nema tlakg laktsu xwankgonit, kaw kʼislas xalak Sotavento chu Barlovento. Umakgolh laktsu islas maklakaskinkgo max 800 kilómetros chu wilakgolh kxlakgstipan islas Vírgenes chu Trinidad. Max akgkitsis kata, tlakg klichuwinaw Dios kʼislas nema makgat xwilakgolh chu ni xʼanankgo xtatayananin Jehová. Xmin kilhtamaku, nila xakmalakgachayaw chu nila xakmakglhtinanaw correo lhuwa semanas. Pero xakpaxuwayaw xlakata xaklichuwinanaw Jehová «kxlakgstipan islas» (Jer. 31:10).

Kgalhtati misioneros kSibia (pakgxwiki asta pakgastakat): Ron Parkin, Dick Ryde, Gust Maki chu Stanley Carter.

Akxni xakchanaw kxkilhtun pupunu, tiku xwilakgolh kʼislas lu xpaxuwakgo chu xtamakxtumikgo niku xchan barco xlakata xkatsiputunkgo tiku akinin. Makgapitsi ni xʼakxilhkgonit velero la nema xaklinaw chu lakglhmomokgon lakchixkuwin. Lu tlan xlikatsikgo chu liwana xlakgapaskgo Biblia. Makglhuwa xkinkamaxkikgoyan skiti nema aku xchipakanit, aguacates chu cacahuate. Maski ni lu tlanka xwanit kibarcojkan, anta xaktlawayaw kintawaykan, xaklhtatayaw chu xakchakgayaw kilhakgatakan.

 Xaktaktayaw kbarco chu tantaku xaklichuwinanaw Dios. Xakkawaniyaw pi xʼamaka mastakan akgtum taʼakgchuwin xalak Biblia. Akxni xtsiswan, xakmamakasaniyaw xcampana barco. Lu xaklipaxuwayaw akxni xchinkgo latamanin. Xmakgskgotkan xla aceite xtasiyakgo la staku nema xtaktamakgochi ksipi. Xmin kilhtamaku xchinkgo max akgtum ciento latamanin chu xtlawakgo takgalhskinin asta lu katsisnita. Xlakata lu xlakgatikgo kilhtlikgo, xakkatsokgnaniyaw kmáquina makgapitsi takilhtlin xla xTamapakgsin Dios. Kinkgalhtatikan xaklitsakgsayaw tlakg tlan nakkilhtliyaw. Alistalh, latamanin xtsukukgo kinkatakilhtlikgoyan chu stlan xkilhtlikgo. ¡Lu xakpaxuwayaw ama kilhtamaku!

Akxni xakkalimakgalhtawakgenitawa Biblia, makgapitsi xkinkastalanikgoyan kxchikkan atanu familia xlakata chuntiya xkatsiniputunkgo. Akxni anta xaktawilanitaw makgapitsi semanas, xakanaw alakatanu. Makglhuwa xakkaskiniyaw tiku tlakg xkatsiniputunkgo pi chuntiya xkatalikgalhtawakgakgolh Biblia amakgapitsin asta xaktaspitwi. Lu tlan xakmakgkatsiyaw xlakata makgapitsi lu xliskujkgo namakgantaxtikgo tuku xakkalakgayawanitaw.

La uku, lhuwa tiku kalakgapaxialhnankgo umakgolh islas. Pero ama kilhtamaku ni lhuwa tiku xʼankgo. Kajwatiya xwilakgolh xaspupuku lagunas, stlan xtasiya xkilhtun pupunu chu xakiwi mokgot. Ankgalhin, akxni xakanaw kʼatanu isla, katsisni chuna xaktlawayaw. Delfines xpaxtawakatnankgo chu xkgamanankgo kxpaxtun kibarcojkan. Chu nitu xtakgaxmata, kajwatiya xakkgaxmataw la kibarcojkan xtlawan kchuchut. Xmastilenkg papaʼ kxakgspun pupunu xtasiya la akgtum tiji xaplata nema makgat xchan.

Akxni xtitaxtunita akgkitsis kata lata xaklichuwinamaw Dios kʼislas, kaw kPuerto Rico xlakata xakputsaw barco nema kgalhi motores. Akxni kchaw anta, klakgapasli chatum stlan misionera xwanikan Maxine Boyd... ¡chu lu klakgatilh! Maxine xatapaxuwan xlichuwinan Dios lata aktsinajku xwanit. Misionera litaxtulh kRepública Dominicana asta kata 1950. Ama kata, gobierno católico maxtulh kpaís. Xlakata akit xakchanit kPuerto Rico kbarco, kajwatiya tlan xaktamakgxtakga akgtum papaʼ. Alistalh, kilitaspitat xwanit kʼislas chu xlititaxtut xwanit makgapitsi kata. Wa xlakata klakpuwa: «Ronald, komo lakgatiya uma tsumat, lakapala wi tuku militlawat». Titaxtulh akgtutu semanas kskinilh xkintatamakgaxtokgli, chu xliʼakgchaxan semanas ktamakgaxtokgwi. Kinkamalakgachakan kPuerto Rico la misioneros. Wa xlakata nialh ktawakalh kxasasti barco.

Kkata 1956 ktsukulh kliskuja la superintendente de circuito. Lu xaklakgatiyaw kalakgapaxialhnanaw natalan. Lhuwa lu ni xkgalhikgo tumin. Akgtum liʼakxilhtit, kʼakgtum aktsu kachikin nema wanikan Potala Pastillo xwilakgolh akgtiy familias xtatayananin Jehová nema xkgalhikgo lhuwa kamanan. Akit xaklismani xaklimaklakaskin liskgolin xlakata nakkatlakgnani. Chatum aktsu tsumat xwanikan Hilda, chu akgtum kilhtamaku kwanilh komo xʼamputun kinkalitachuwinanan Dios. Kgalhtinalh: «Kamputun, pero nila kan. Ni kkgalhi kintatunu». Ktamawaniw xtatunu chu kinkataʼan. Lhuwa kata alistalh, kkata 1972, Maxine chu akit kaw kBrooklyn. Anta, chatum tala tsumat tiku xmasputuma curso xla Escuela de Galaad milh kinkamakgachipayan. Nialh makgas xʼama kʼEcuador niku xmalakgachakanit. Kinkawanin: «Ni katsiyatit tiku akit, ¿ni xlikana? Akit aktsu tsumat xalak Pastillo tiku ni xkgalhi xtatunu». ¡Wa Hilda xwanit! Lu kpaxuwaw, asta ktasaw.

Kkata 1960, ktsukuw kskujaw ksucursal xalak Puerto Rico, uma xwi kʼaktsu chiki kSanturce (San Juan). Xapulana, chatum tala wanikan Lennart Johnson chu akit xaktlawayaw atsinu ni putum taskujut. Xla chu xpuskat xapulana xtatayananin Jehová xlitaxtukgonit kRepública Dominicana. Chu kkata 1957 xʼankgonit kPuerto Rico. Anta ksucursal, Maxine xkamalakgachani revistas tiku kskinkgonit. Akgatunu semana xmalakgacha liwaka 1,000 revistas. Lu xlipaxuwa uma taskujut xlakata xlakpuwan pi putum umakgolh latamanin xlakgapasmakgo Jehová.

Lu klipaxuwanit kintaskujut kBetel xlakata kimaxki talakaskin nakmaklakaskin kilitliwakga xlakata nakskujnani Jehová. Pero minit kilhtamaku tuwa kitaxtunit. Akgtum liʼakxilhtit, kkata 1967 tatlawalh xapulana tamakxtumit kPuerto Rico niku tamakxtumikgo xalak lhuwa países, chu talakaskilh lhuwa tuku xaklakkaxwililh. Xakmakgkatsi pi nila xakmakgantaxti. Ama kilhtamaku, Nathan Knorr alh kPuerto Rico. Xla xkapulalin xtatayananin Jehová ama kilhtamaku. Akit xaklakkaxwilinit nakalinkan kputlaw misioneros tiku xminkgonit, pero xla lakpuwa pi ni xaktlawanit. Liwana kistakyawalh chu kiwanilh pi nitlan limakgkatsilh  xlakata ni kmakgantaxtilh taskujut. Nitu kwaniputulh pero kmakgkatsilh pi ni xlilat tuku kiwanilh. Ksitsilh kaj tsinu kilhtamaku. Maski chuna, akxni klaʼakxilhwi alistalh, xla kinkawanin Maxine chu akit xakaw kxcuarto chu kinkatlawanin taway.

Makglhuwa klakgaw kifamilia kʼInglaterra. Kintlat ni makglhtinalh xaxlikana akxni kmakglhtinaw kintse chu akit, pero akxni natalan xalak Betel xʼankgo lakatsu kkinkachikinkan, kintse xkawani xtamakgxtakgkgolh kkinchikkan. Kintlat xakxilha pi superintendentes xalak Betel ni tlanka xkamakgkatsikan. Ni xlikatsikgo la sacerdotes tiku xmakgalipuwankgonit makgasa. Alistalh, tamunulh kkata 1962.

Akxtum ktaya Maxine kPuerto Rico, nina makgas xaktamakgaxtokgnitaw chu akxni kmakgatsiw 50 kata la xaktamakgaxtokgnitaw kkata 2003.

Kimpuskat Maxine tiku lu xakpaxki nilh kkata 2011. Klakaskin kalakastakwanalh xlakata nakakxilhpara. Lu klipaxuwa akxni klilakpuwan uma. Umakgolh 58 kata lata xaktamakgaxtokgnitaw, kakxilhwi la talhuwikgolh xtatayananin Jehová kPuerto Rico, xwankgonit max 650 chu la uku 26,000. Kkata 2013 sucursal xalak Puerto Rico akxtum talalh xalak Estados Unidos. Chu kiwanika nakskuja kWallkill (Nueva York). Xlakata 60 kata klatamalh kʼuma isla, lu puertorriqueño xakmakgkatsikan la coquí, tantum aktsu chichekg xalak uma isla chu akxni tsiswama kilhtli «¡coquí, coquí!». Lu xakpaxuwa kPuerto Rico, pero chalh kilhtamaku akxni xakalh niku xasasti xkimalakgachamaka.

«DIOS, PAXKIY WA NTI XLIPAKS XTAPAXUWAN LIMASTAY»

Chuntiya klipaxuwa nakskujnani Dios kBetel. Kkgalhiya liwaka 90 kata, chu kintaskujut wa nakkamakgpuwantinikgo betelitas. Lata kchilh kWallkill, kkamakgtayanit liwaka 600 natalan. Makgapitsi kilakgminkgo xlakata nakilitachuwinankgo xtaʼakglhuwitkan o nema anan kxfamiliajkan. Amakgapitsi kiskinikgo tastakyaw xlakata tlan nakakitaxtuni kBetel. Amakgapitsi putsakgo tastakyaw xlakata aku tamakgaxtokgkgonit o kamalakgachaka la precursores. Kkakgaxmatni putum tiku kintachuwinamputunkgo. Chu akxni xlilat, ankgalhin kkawani: «“Dios, paxkiy wa nti xlipaks xtapaxuwan limastay”. Wa xlakata kalipaxuwa mintaskujut, wa Jehová skujnanipat» (2 Cor. 9:7).

Komo paxuwaputunaw kBetel o alakatanu, kililakapastakatkan tuku xlakata xlakaskinka tuku tlawamaw. Putum tuku tlawayaw kBetel taskujut nema xasanto. Kintaskujutkan limakgtayananaw xlakata «xaxlikana skujni xalipaw chu xaskgalala» nakamaxki taway xaʼespiritual natalan kxlikalanka katiyatni (Mat. 24:45TNM). Maski tanu tanu niku skujnanimaw Jehová, tlan malankiyaw. Xatapaxuwan katlawaw tuku kinkaskiniyan, xlakata «Dios, paxkiy wa nti xlipaks xtapaxuwan limastay».

^ párr. 13 Xbiografía Leonard Smith taxtulh krevista La Atalaya 15 xla abril kata 2012.