«Xlakata nakkamaxkiyan tlan tastakyaw» (PROV. 4:2).

TAKILHTLIN: 50, 1

1, 2. ¿Tuku xlakata nakamasiyaniyaw amakgapitsin xlakata wi tuku nalakgatayakgo kxkachikin Dios?

JESÚS lu lichuwinalh xTamapakgsin Dios. Pero na limaxtulh kilhtamaku nakamasiyani kstalaninanin. Kamasiyanilh la nalichuwinankgo Dios chu la nalitaxtukgo la xkuentajtlawananin borregos tiku kuentajtlawakgo xkachikin Dios (Mat. 10:5-7). Felipe lu xlichuwinan Dios, pero na kamasiyanilh xlaktsuman natlawakgo uma taskujut (Hech. 21:8, 9). La uku na talakaskin nakamasiyaniyaw amakgapitsin. ¿Tuku xlakata?

2 Kcongregaciones kxlikalanka katiyatni wilakgolh lhuwa tiku nina tamunukgonit. Talakaskin pi umakgolh nakamasiyaniyaw. Xlilat nakamakgtayayaw naʼakgatekgskgo tuku xlakata lu tlan nakakitaxtuni komo nakatsinikgo xakstukan nalikgalhtawakgakgo Biblia. Na talakaskin nakamasiyaniyaw la nalichuwinankgo chu namasiyakgo xalakwan xalaksasti. Natalan tiku nina makgas tamunukgolh na maklakaskinkgo kakamasiyanika xlakata siervos ministeriales chu lakgkgolotsin nalitaxtukgo kcongregación. Putum tiku wilakgolh kcongregación lhuwa tuku  tlan natlawakgo xlakata namakgtayanankgo (Prov. 4:2).

KAKAMASIYANIW XALAKSASTI LA NALIKGALHTAWAKGAKGO BIBLIA

3, 4. 1) ¿Tuku wa Pablo pi kitaxtu komo nalikgalhtawakgakan xTachuwin Dios? 2) Xlakata nakamakgpuwantiniyaw amakgapitsin xakstukan nalikgalhtawakgakgo Biblia, ¿tuku kilitlawatkan?

3 Talakaskin pi putum tiku skujnaniyaw Jehová nalikgalhtawakgayaw chu nalakputsananiyaw Biblia xlakata nakatsiyaw tuku lakaskin Dios. Apóstol Pablo kawanilh uma natalan xalak Colosas: «Ni kmakgaxtakgaw ankgalhin kkapalakaskinan kkioracionkan, chu na kskinaw mpi nalitaxajatit lantla nalakgapasatit wa ntu xtalakaskin Dios». ¿Tuku xlakata lu xlakaskinka xwanit nalikgalhtawakgakgo chu nalakputsananikgo xTachuwin Dios? Xlakata uma xʼama kamaxki liskgalala chu xʼama kamakgtaya naʼakgatekgskgo la xlinkgolh xlatamatkan «lantlata mininiy nkimPuchinakan». Na xkamakgtayalh natlawakgo laktlan tatlaw nema Jehová xlakaskin, la nalichuwinankgo Dios (Col. 1:9, 10). Wa xlakata, komo wi tiku limakgalhtawakgemaw Biblia, kamakgtayaw naʼakgatekgsa pi komo nalismani nalikgalhtawakga chu nalakputsanani Biblia namakgtaya naskujnani Jehová.

4 Komo akinin ni likgalhtawakgayaw Biblia, nila nakamakgtayayaw tiku kamakgalhtawakgemaw naʼakgatekgskgo pi lu tlan kitaxtu xakstukan nalikgalhtawakgakgo. Chuna, komo lismaniyaw likgalhtawakgayaw Biblia chu lilakapastakaw, nakinkamakgtayayan kkilatamatkan chu akxni nalichuwinanaw Dios. Akgtum liʼakxilhtit, akxni lichuwinamaw Dios chu kinkatlawanikanan tuwa takgalhskinin, tlan nalimaklakaskinaw Biblia xlakata nakgalhtinanaw. O akxni nalikgalhtawakgayaw xlakata Jesús, Pablo chu amakgapitsi tiku ni xlajwanankgolh akxni xlichuwinankgo Dios, natatliwakglhaw chu chuntiya nalichuwinanaw Dios maski tuwa namakgkatsiyaw. Chu akxni nakalitachuwinanaw amakgapitsin tuku katsininitaw kBiblia chu la kinkamakgtayanitan, nakamakgpuwantiniyaw tlakg nalakputsananikgo Biblia xlakata na nalitamakgtayakgo.

5. Kawanti pulaktum la tlan nakamakgtayayaw tiku kamakgalhtawakgeyaw xlakata nalismanikgo xakstukan nalakputsananikgo Biblia.

5 Tlan nakgalhskinkana: «¿La nakmasiyani kilimakgalhtawakget nalismani nalakputsanani Biblia?». Max tlan namasiyaniya la lakkaxwiliya tuku natalikgalhtawakgaya. Tlan nawaniya kalikgalhtawakgalh tuku min kʼapéndice xla libro ¿Tuku xlikana masiyay Biblia? chu kaputsalh textos xalak Biblia nema anta min. Alistalh, tlan namasiyaniya la nalakkaxwili  tuku naʼakxilhkan ktamakxtumit xlakata namasta comentarios. Kamakgpuwantini nalikgalhtawakga putum revistas Makatsinina chu ¡Despertad! Chu tlan namasiyaniya la natekgsa xtakgalhtin takgalhskinin xalak Biblia, max nalimaklakaskina programa xla computadora Watchtower Library o Watchtower BIBLIOTECA KʼINTERNET. Akxni tiku likgalhtawakgama Biblia nalitsakgsa tanu tanu la nalakputsanani Biblia, max tlakg nalakgati chu tlakg nakatsiniputun.

6. 1) ¿La namakgtayaya tiku makgalhtawakgeya tlakg nakatsiniputun xlakata Biblia? 2) ¿Tuku max natlawa tiku makgalhtawakgamaw komo tlakg nakatsini xlakata Biblia?

6 Akxni wi tiku talikgalhtawakgayaw Biblia, lakaskinaw kakatsilh pi Biblia lu xtapalh xlakata namakgtaya tlakg tlan nalakgapasa Jehová. Pero ni kamafuerzajniw nalakputsanani, wata kamasiyaniw la nalipaxuwa komo chuna natlawa. Komo tlakg nakatsini xlakata Biblia, tlakg namakgkatsi la salmista tiku wa: «Tlan kinkitaxtuni klakgtalakatsuwini Dios. Kimputatsekgni ktlawanit Malana Jehová tiku lakgchan namapakgsinan» (Sal. 73:28). Xlikana pi xʼespíritu santo Jehová namakgtaya tiku talakatsuwiniputun.

KAKAMASIYANIW XALAKSASTI NALICHUWINANKGO CHU NAMASIYAKGO XALAKWAN TAMAKATSIN

7. ¿La kamasiyanilh Jesús kstalaninanin xlakata xlichuwinankgolh Dios? (Kaʼakxilhti xapulana dibujo).

7 Lhuwa tuku katsiniyaw xlakata la Jesús kamasiyanilh xʼapóstoles. Jesús akxtum kalitachuwinalh Dios chu xlakan akxilhkgolh la xkamasiyani latamanin. Na liwana kawanilh la xlichuwinankgolh Dios (Mateo, capítulo 10) [1] (kaʼakxilhti nota niku kgalhsputa artículo). Ni xlimakgas, apóstoles katsinikgolh la nakamasiyanikgo latamanin xaxlikana (Mat. 11:1). Kaʼakxilhwi pulaktiy tuku tlan nakamasiyaniyaw xalaksasti akxni nakalitachuwinanaw Dios.

8, 9. 1) ¿La xkatachuwinan Jesús latamanin? 2) ¿La nakamakgtayayaw tiku aku tsukumakgolh lichuwinankgo Dios na natlawakgo la Jesús?

8 Katachuwinankan latamanin. Jesús ni putum kilhtamaku lhuwa latamanin katachuwinalh. Makglhuwa, chatunu chatunu katachuwinalh latamanin chu putum kilhtamaku tlan kalikatsinilh. Akgtum liʼakxilhtit, makgtum tachuwinalh chatum puskat tiku alh tiya chuchut kpozo lakatsu kSicar (Juan 4:5-30). Atanu kilhtamaku tachuwinalh chatum xpukina tumin tiku xwanikan Mateo Leví. Jesús wanilh pi kstalanina xlitaxtulh, chu Mateo stalanilh. Alistalh uma chixku wanilh Jesús chu amakgapitsi latamanin pi xʼankgolh wayankgo kxchik. Anta, Jesús katachuwinalh lhuwa latamanin (Mat. 9:9; Luc. 5:27-39).

Komo tlan nakalikatsiniyaw latamanin, max tlakg nakinkakgaxmatniputunkgoyan

9 Jesús na tlan likatsinilh Natanael akxni tachuwinalh, maski nitlan xkalichuwinanit tiku xalak Nazaret, xkachikin Jesús. Xlakata Jesús tlan likatsinilh, Natanael lakgpalilh tuku xlakpuwani Jesús chu tlakg lakgapasputulh (Juan 1:46-51). ¿Tuku kinkamasiyaniyan xliʼakxilhtit  Jesús? Pi komo tlan nakalikatsiniyaw latamanin, max tlakg nakinkakgaxmatniputunkgoyan [2] (kaʼakxilhti nota niku kgalhsputa artículo). Kakamasiyaniw tiku aku tsukumakgolh lichuwinankgo Dios tlan nakalikatsinikgo chu xatapaxuwan nakatachuwinankgo latamanin. Komo chuna natlawakgo tlakg nalipaxuwakgo uma taskujut.

10-12. 1) ¿Tuku tlawalh Jesús xlakata tlakg xkatsiniputunkgolh tiku xlakgatikgonit tuku xkamasiyaninit? 2) ¿La nakamakgtayayaw tiku aku tsukumakgolh lichuwinankgo Dios tlakg tlan makgalhtawakgenanin nawankgo?

10 Nakamasiyanikan tiku kgaxmatputunkgo. Jesús xkgalhi lhuwa taskujut. Pero akxni latamanin xkgaxmatniputunkgo, limaxtulh kilhtamaku xlakata nakatachuwinan chu lhuwa tuku kamasiyanilh. Akgtum liʼakxilhtit, akgtum kilhtamaku lhuwa latamanin tamakxtumikgolh kxkilhtun pupunu xlakata nakgaxmatnikgo. Wa xlakata Jesús tatawakalh Pedro kʼakgtum aktsu barco chu kamasiyanilh latamanin. Alistalh na wi tuku masiyaniputulh Pedro. Tlawalh akgtum milagro akxni makgtayalh nachipa lhuwa skiti. Alistalh wanilh: «Chiyuj asta naʼan kilhtamaku, xchipana chixkuwin nawana». Biblia wan pi Pedro chu tiku xtawilakgo lakapala «tilichankgolh nkatiyatna mputakutnu, xlipaks timakgaxtakgkolh» chu stalanikgolh Jesús (Luc. 5:1-11).

11 Nicodemo na xlakaskin pi Jesús tlakg xmasiyanilh. Pero xlakata xmakgtapakgsi Sanedrín xpekuan xlakata tuku tlan xwankgolh amakgapitsin komo xʼakxilhkgolh pi xtachuwinama Jesús. Wa xlakata lakgalh Jesús katsisni. Jesús xatapaxuwan makgamakglhtinalh, limaxtunilh kilhtamaku chu litachuwinalh tuku xaxlikana (Juan 3:1, 2). Jesús ankgalhin xatapaxuwan xmaklakaskin xkilhtamaku xlakata nakamasiyani latamanin xaxlikana chu namatliwakglha xtakanajlakan. Nachuna, akinin na xatapaxuwan kilimaxtutkan kilhtamaku nakalakganaw latamanin akxni tlan kinkamakgamakglhtinankgoyan, xlakata nakamakgtayayaw naʼakgatekgskgo tuku wan Biblia.

12 Akxni akxtum kalitachuwinanaw Dios tiku kamakgalhtawakgemaw, tlan nakamasiyaniyaw la nakalakgtaspitkgo tiku limasiyakgolh pi katsiniputunkgo tuku masiyayaw. Na tlan nakawaniyaw kakinkataʼankgon akxni wi tiku nalakgtaspitparayaw o akxni wi tiku nalimakgalhtawakgeyaw Biblia. Chuna nakatsinikgo la nakamasiyanikgo amakgapitsin chu napaxuwakgo xlakata kamakgtayamakgo amakgapitsin nalakgapaskgo Jehová. Alistalh, umakgolh tiku aku tsukumakgolh lichuwinankgo Dios, nalipaxuwakgo akxni nakalakgtaspitkgo latamanin chu nakamakgalhtawakgekgo. Na nakatsinikgo nakgalhkgalhinankgo chu ni tunkun naxlajwanankgo akxni ni nakatekgskgo latamanin kxchikkan (Gál. 5:22) (kaʼakxilhti recuadro « Ni taxlajwanilh»).

KAKAMASIYANIW XALAKSASTI NAKAMAKGTAYAKGO NATALAN

13, 14. 1) ¿Tuku kinkamasiyaniyan xlakskujnin Jehová tiku kamakgtayakgolh amakgapitsin? 2) ¿La nakamasiyaniyaw tiku lakgkgawasan chu xalaksasti nalimasiyakgo pi kapaxkikgo xnatalan?

13 Jehová lakaskin pi kskujnanin nalapaxkiyaw chu nalamakgtayayaw (kalikgalhtawakga Lucas 22:24-27 chu 1 Pedro 1:22). Biblia lichuwinan pi Jesús tlawalh putum tuku xmatlani xlakata xkamakgtayalh latamanin. Asta mastalh xlatamat (Mat. 20:28). Chatum kstalanina Cristo xwanikan Dorcas xlismaninit nakamakgtaya amakgapitsin (Hech. 9:36,  39). Chu achatum kstalanina Cristo xwanikan María lhuwa tuku tlawalh xpalakata natalan xalak Roma (Rom. 16:6). ¿La nakamakgtayayaw xalaksasti naʼakgatekgskgo pi lu xlakaskinka natlawakgo tuku tlan xpalakata natalan?

Kakamasiyaniw tiku xalaksasti nakapaxkikgo chu nakamakgtayakgo natalan. (Kaʼakxilhti párrafos 13 chu 14).

14 Tlan nakawaniyaw xalaksasti kakinkataʼankgon akxni nakalakganaw natalan tiku lakgkgolona o tiku tatatlakgo. Chu akxni natlatni nalakgapaxialhnankgo umakgolh natalan tlan nakalinkgo xkamanan akxni chuna xlilat. Lakgkgolotsin tlan nakaskinikgo lakgkgawasan o xalaksasti, kakamakgtayakgolh nakalinikgo taway tiku lakgkgolona o nakaxtlawakgo tuku nitlan wi kxchikkan. Komo tiku lakgkgawasan o xalaksasti akxilhkgo pi natalan lamakgtayakgo, nachuna natlawakgo. Kaʼakxilhwi tuku xtlawa chatum kgolotsin xalak congregación. Akxni xlichuwinan Dios kʼakgtum aktsu kachikin, xkalakgapaxialhnan natalan tiku anta xwilakgolh xlakata nakatsi komo tlan xwilakgolh. Xlakata uma tuku xtlawa, chatum kgawasa tiku makglhuwa xtaʼan katsinilh nalilakpuwan la nakamakgtaya natalan (Rom. 12:10).

15. ¿Tuku xlakata xlakaskinka pi lakgkgolotsin nakamasiyanikgo lakgkgawasan xalak congregación?

15 Jehová kalakgayawanit lakchixkuwin namasiyakgo xTachuwin kcongregación. Wa xlakata xlakaskinka pi natalan liwana nakatsinikgo la namasiyakgo kxtaʼakgchuwinkan. Komo wix kgolotsin kcongregación, max tlan nakgaxpatniya chatum siervo ministerial akxni litsakgsama la namasta xtaʼakgchuwin chu tlan namakgtayaya tlakg tlan natlawa (Neh. 8:8) [3] (kaʼakxilhti nota niku kgalhsputa artículo).

16, 17. 1) ¿Tuku tlawalh Pablo xlakata Timoteo liwana xkatsinilh? 2) ¿Tuku tlan natlawakgo lakgkgolotsin xlakata nakamasiyanikgo tiku nakuentajtlawakgo congregación alistalh?

16 Lu talakaskin nakamasiyanikan tlakg lhuwa natalan xlakata lakgkgolotsin xalak congregación nawankgo (kaʼakxilhti recuadro «¿Tuku kilhchanima?»). Pablo masiyanilh Timoteo chu wanilh pi xkamasiyanilh amakgapitsin. Maxkilh uma tastakyaw: «Kamatliwakglhka klipaxkatsinit wa ntu likgalhiyaw nCristo Jesús. Chu wa ntu nkinkgaxpatninita kxlakatinkan amakgapitsin ti na malulokgkgoy, wa yuma namakuintajlikgoya wa nchixkuwin nti akgstitum takgokgananin, wa nti na chuna ntlan namasiyunikgoy amakgapitsin» (2 Tim. 2:1, 2). Timoteo lhuwa tuku katsinilh xlakata Pablo, tiku kgolotsin chu apóstol xlitaxtu. Makgapitsi tuku katsinilh wa la tlakg tlan nalichuwinan Dios chu la nakamakgtaya amakgapitsin kcongregación (2 Tim. 3:10-12).

 17 Pablo lhuwa kilhtamaku masiyanilh Timoteo xlakata xlakaskin pi liwana xkatsinilh (Hech. 16:1-5). ¿La tlan natlawakgo la Pablo lakgkgolotsin kcongregación? Nakawanikgo siervos ministeriales tiku katsinikgo, kakataʼankgolh akxni wi tiku nalakgankgo xlakata namatliwakglhkgo xtakanajlakan. Komo chuna natlawakgo, siervos ministeriales nakatsinikgo la nakamasiyanikgo amakgapitsin, nakgalhkgalhinankgo chu nalimasiyakgo tapaxkit. Na nakatsinikgo nalipawankgo Jehová akxni nakuentajtlawakgo kskujnanin (1 Ped. 5:2).

LU XLAKASKINKA NAKAMASIYANIKAN AMAKGAPITSIN

18. ¿Tuku xlakata xlakaskinka nakamasiyaniyaw amakgapitsin naskujnanikgo Jehová?

18 Kʼuma xaʼawatiya kilhtamaku, lhuwa tiku xalaksasti maklakaskinkgo nakamasiyanikan xlakata tlakg tlan nalichuwinankgo Dios. Nachuna, talakaskin natalan tiku nakatsinikgo la nakuentajtlawakgo congregación. Jehová lakaskin pi putum kskujnanin liwana nakatsinikgo chu kinkamaxkinitan talakgalhaman nakamakgtayayaw tiku xalaksasti. Wa xlakata, lu xlakaskinka pi naliskujaw nakamasiyaniyaw amakgapitsin, la tlawakgolh Jesús chu Pablo. Talakaskin nakamasiyaniyaw putum tiku matlaniyaw, xlakata ananku lhuwa taskujut nema xlitatlawat akxni nina min lisputni.

19. ¿Tuku makanajliyan pi lu tlan nakitaxtu komo lu naliskuja xlakata nakamasiyaniya amakgapitsin?

19 Talakaskin naliskujkan chu nalimaxtukan kilhtamaku xlakata nakamasiyanikan xalaksasti. Pero liwana katsiyaw pi Jehová chu Jesús nakinkamakgtayayan nakatsiyaw la tlakg tlan nakamasiyaniyaw. Nalipaxuwayaw akxni naʼakxilhaw pi umakgolh xalaksasti lu skujmakgo kcongregación chu akxni lichuwinankgo Dios (1 Tim. 4:10). Nachuna, chuntiya kamastakaw kintakanajlakan, tlakg kaliskujwi nalimasiyayaw xtayat Cristo chu tlakg tlan xʼamigos Jehová kalitaxtuw.

^ [1] (párrafo 7): Akgtum liʼakxilhtit, Jesús kawanilh kstalaninanin pi xlitlawatkan xwanit uma: 1) nalichuwinankgo xTamapakgsin Dios; 2) nalipawankgo pi Jehová xʼama kamaxki taway chu lhakgat nema xmaklakaskinkgolh; 3) ni xtalakilhnikgolh latamanin; 4) xlipawankgolh Jehová akxni xkaputsastalanika, chu 5) ni xpekuankgolh xlakata tuku latamanin xkatlawanikgolh.

^ [2] (párrafo 9): Kaʼakxilhti libro Benefíciese de la Escuela del Ministerio Teocrático, páginas 62 asta 64. Anta natekgsa laktlan tastakyaw xlakata la nakatachuwinana latamanin akxni nalichuwinana Dios.

^ [3] (párrafo 15): Kaʼakxilhti libro Benefíciese de la Escuela del Ministerio Teocrático, páginas 52 asta 61. Anta natekgsa tastakyaw nema nakamakgtaya natalan tlakg tlan namasiyakgo kcongregación.