Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina (nema natalikgalhtawakga)  |  Abril kata 2017

«Juez xlikalanka katiyatni» putum kilhtamaku tlawa tuku xaʼakgstitum

«Juez xlikalanka katiyatni» putum kilhtamaku tlawa tuku xaʼakgstitum

«Xla la akgtum lanka Chiwix, lu tlan putum tuku tlawanit, xlakata putum tuku tlawa xaʼakgstitum» (DEUT. 32:4).

TAKILHTLIN: 2, 11

1. ¿La lichuwinalh Abrahán pi xla xlipawan Jehová pi xa’akgstitum? (Kaʼakxilhti xapulana dibujo).

AKGTUM kilhtamaku, Abrahán kgalhskininalh: «¿Juez xlikalanka katiyatni ni katitlawalh tuku xaʼakgstitum?» (Gén. 18:25). Abrahán ni tlawalh uma takgalhskinin kaj xlakata ni xkanajlani Jehová. Wata chuna tlawalh xlakata xlipawan pi Jehová x’ama kalakputsanani kachikinin Sodoma chu Gomorra chuna la xlilat. Liwana xkatsi pi Jehová ni x’ama tamalakgsputu «tiku nitlan likatsi chu tiku tlan likatsi». Abrahán xlakpuwan pi ni chuna x’ama la. Akglhuwata kata titaxtunit, akxni Jehová tiwa umakgolh tachuwin xpalakata: «Xla la akgtum lanka Chiwix, lu tlan putum tuku tlawanit, xlakata putum tuku tlawa xaʼakgstitum. Dios tiku ni makgxtakgnan, wantiku ni tlawa tuku ni xaʼakgstitum; xla xaʼakgstitum chu ni tlawa tuku ni xalakatitum» (Deut. 31:19; 32:4).

2. ¿Tuku xlakata nila wanaw pi Jehová ni xa’akgstitum?

2 ¿Tuku xlakata Abrahán liwana xkatsi pi Jehová ankgalhin  tlawa tuku xa akgstitum? Xlakata Jehová wili xatlan li’akxilhtit tuku xa’akgstitum. Komo xlimapakgsin ankgalhin xa’akgstitum, ankgalhin xa’akgstitum lakputsanan. Biblia wan pi «xla lakgati tatanksni chu tlan talakapastakni» (Sal. 33:5SXP).

3. Kalichuwinanti akgtum li’akxilhtit xlakata tuku ni xa’akgstitum tlawakgo latamanin la uku.

3 Lu tlan limakgkatsiyaw xlakata katsiyaw pi Jehová ankgalhin xa’akgstitum (kaʼakxilhti recuadro «¿Tuku kilhchanima?»). Pero la uku kakilhtamaku lu litsama tuku ni xa’akgstitum. Akgtum li’akxilhtit, wilakgolh latamanin tiku katamaknukanit kpulachin maski nitu tlawakgonit tuku nitlan. Titaxtu kilhtamaku, makgapitsi katamakxtukan akxni kalakputsananika k’ADN chu anta litasiya pi nitu tlawakgonit. Tuku ni xa’akgstitum la uma, tlawa pi lhuwa latamanin lu sitsikgo chu nitlan limakgkatsikgo xlakata ni chuna kitaxtu tuku lakpuwankgo. Pero xpalakata kstalaninanin Cristo wi atanu tuku lu kamakgapatinan. ¿Tuku ama?

TUKU NI XA’AKGSTITUM TATLAWA KCONGREGACIÓN

4. ¿Tuku max katuwa nawili xtakanajla chatum xlakskujni Dios?

4 Xlakskujnin Dios katsiyaw pi na nalipatinanaw tuku ni xa’akgstitum anta kkakilhtamaku. Pero max nalitasiya la wi kintakanajlakan komo nalakpuwanaw pi wi tuku nitlan kinkatlawanikan o tiku xalak congregación. Komo chuna xkinka’akgspulan, ¿tuku natlawayaw? ¿Namaxkiyaw talakaskin pi nalitaxlajwaniyaw la skujnanimaw Jehová?

5. ¿Tuku xlakata ni kaks nalilakawanaw komo nakinkatlawanikanan tuku nitlan kcongregación?

5 Kimputumkan makglakgalhinanin chu lhuwa niku kimakgapatsankgayaw. Wa xlakata max wi tiku xalak congregación nitlan kintikalikatsinin o max akinin nitlan katilikatsiniw (1 Juan 1:8). Uma ni ankgalhin chuna la. Pero akxni chuna la, akinin kstalaninanin Cristo ni kaks lilakawanaw chu ni kinkamakgchakgxniyan. Jehová kinkamaxkiyan tastakyaw anta kBiblia xlakata nakinkamakgtayayan komo chatum tala nakinkatlawaniyan tuku nitlan (Sal. 55:12-14).

6, 7. 1) ¿Tuku nitlan titaxtulh chatum tala xalak congregación? 2) ¿Tuku tayat makgtayalh uma tala?

6 Ka’akxilhwi xli’akxilhtit tala Willi Diehl. Kata 1931, xla tsukulh skuja anta kBetel xla Berna (Suiza). Kata 1946, kilalh xli’akgtsayan clase xla Escuela de Galaad, anta kNueva York (Estados Unidos). Akxni xtitaxtunita kilhtamaku la timasputulh xclases tsukulh skuja la superintendente de circuito anta kSuiza. Anta kxbiografía, tala Diehl lichuwinalh pi mayo kata 1949 kamakatsinilh natalan tiku kskujmakgo kSuiza pi x’ama tamakgaxtokga. Natalan wanikgolh pi putum x’amaka makglhtikan taskujut nema xlakgaya kcongregación. Kaj xman precursor xlitaxtulh. «Ni xkimaxkikan talakaskin nakmasta ta’akgchuwin», lichuwinalh tala Diehl. Chu wampa: «Lhuwa tiku nialh xkinkaxakgatlikgoyan, la komo tiku katamakxtukan kcongregación xkinkali’akxilhkgoyan».

7 ¿La makgkatsilh tala Diehl? Xla chu xpuskat xkatsikgo pi tamakgaxtokgkan ni lakatsala tuku wan Biblia, tsukukgolh tlawakgo oración chu lipawankgolh Jehová. Maski makgapitsi natalan ni liwana x’akgatekgsnikgo la x’akxilha Jehová  tamakgaxtokgat, titaxtulh kilhtamaku akgatekgsnikgolh, chu tala Diehl maxkiparaka taskujut nema xlakgaya. Jehová sikulunatlawalh xlakata ni makgxtakgli * (kaʼakxilhti nota). ¿Chu akinin tuku xtlawaw komo chuna xkinka’akgspulan? ¿Xakgalhkgalhinanin xlitaxtuw chu xmaxkiw talakaskin pi Jehová xlakkaxtlawalh uma ta’akglhuwit? O ¿xkinkalipawankan chu ki’akstukan xlakkaxtlawaw uma ta’akglhuwit? (Prov. 11:2; kalikgalhtawakga Miqueas 7:7).

Lu xlakaskinka nalakapastakaw pi xlakata kintalakgalhinkan, max nichuna akgatekgswi tuku xlanit

8. ¿Tuku xlakata max nalakpuwanaw pi kinkatlawanikan tuku ni xa’akgstitum o xpalakata achatum lataman?

8 Komo nalakpuwanaw pi wi tuku ni xa’akgstitum lama kcongregación, kalakapastakwi pi max kaj ta’akgskgawimaw. Komo makglakgalhinanin akinin, max ni chuna lama tuku akinin lakpuwanaw. Nachuna max ni liwana katsiyaw tuku lanit. Komo xlikana tuku lakpuwanaw o ni, kilitlawanitkan oración Jehová xlakata uma. Nachuna, chuntiya nalipawanaw chu ni namakgxtakgaw. Chuna ni katisitsiniw Jehová (kalikgalhtawakga Proverbios 19:3).

9. ¿Tuku nalichuwinanaw k’uma artículo chu nema aku mima?

9 Kalichuwinaw pulaktutu li’akxilhtit xlakata tuku ni xa’akgstitum nema lalh makgasa kxkachikin Jehová. K’uma artículo, na’akxilhaw xli’akxilhtit José, tiku kxuyatanat Abrahán. Na’akxilhaw la patinalh kaj xkuentajkan xnatalan. Chu k’atanu artículo na’akxilhaw tuku tlawalh Jehová xpalakata mapakgsina Acab, chu tuku tlawalh apóstol Pedro akxni xwi k’Antioquía kSiria. Akxni nalichuwinanaw uma li’akxilhtit, kalilakpuwaw la akxilha Jehová chu la chuntiya natalalinaw. Uma nakinkamakgtayayan komo makgkatsiyaw pi nitlan kinkalikatsinikanitan.

JOSÉ NI XA’AKGSTITUM LIKATSINIKA

10, 11. 1) ¿Tuku nitlan akgspulalh José? 2) ¿Tuku tlan tlawalh José akxni xtanuma kpulachin?

10 José chatum xlakskujni Jehová tiku ni makgxtakgli, chu lhuwa tayanilh tuku ni xa’akgstitum. Pero tuku tlakg nitlan titaxtulh wa tuku tlawanikgolh xnatalan. Akxni xkgalhi akgkutujun kata, xnatalan chipakgolh chu kastamaxkikgolh la chatum skujni latamanin tiku linkgolh k’Egipto (Gén. 37:23-28; 42:21). Ama kkachikin José limawakaka ta’akgsanin, pi xlikgamanamputun chatum puskat. Ni lakputsananka xlakata tuku lalh, chu tamaknuka kpulachin (Gén. 39:17-20). Akgkututu kata José chuna xlama la chatum skujni chu xtanuma kpulachin. ¿La nakinkamakgtayayan xli’akxilhtit José komo kinatalankan nakinkatlawanikgoyan tuku nitlan?

 11 Akxni José xtanuma kpulachin, xpuxkukan tiku xmuju vino na tamaknuka kpulachin. Akgtum katsisni tiku xmuju vino manixnalh, chu Jehová makgtayalh José xlakata xwanilh tuku xkilhchanima. José wanilh pi x’ama taxtu chu x’amapa lakskujnani Faraón. Pero na litachuwinalh tiku xmuju vino xlakata tuku x’akgspulama. Lhuwa tuku katsiniyaw xlakata tuku wa José, chu na lhuwa katsiniyaw xlakata tuku ni wa (Gén. 40:5-13).

12, 13. 1) ¿Tuku likatsiyaw pi José ni mastalh talakaskin chuntiya nalimapatinikan tuku nitu xtlawanit? 2) ¿Tuku ni wanilh José tiku xmuju vino?

12 (Kalikgalhtawakga Génesis 40:14, 15). Ka’akxilhwi pi José wa pi «xchipakanit». Tachuwin nema maklakaskin Biblia xlakata «xchipakanit» na kilhchanima «xkgalhankanit». Xlikana pi José nitlan tuku xtlawanikanit. Xla na liwana limasiyalh pi nitu xtlawanit tuku xlimawakamaka. Wa xlakata wanilh tiku xmuju vino pi xlixakgatlilh Faraón, xlakata tlan xtamakxtuka.

13 ¿Tlan nawanaw pi José lakaskilh anta natawila, chu nitu tlawalh xlakata xlakgpalilh? Ni. Xla xkatsi pi lhuwa tuku nitlan x’akgspulanit. Wa xlakata wanilh tuku x’akgspulama tiku xmuju vino xlakata xlakpuwan pi xla tlan xmakgtayalh. Pero Biblia ni lichuwinan pi José xkalitachuwinalh  amakgapitsi latamanin pi wa xnatalan tiku xchipakgonit. Nani wanilh Faraón. Wa xlakata akxni xnatalan chinkgolh k’Egipto tlan talalimparakgolh José, Faraón xatapaxuwan kamakgamakglhtinalh. Asta xla kawanilh pi tlan xtamakgxtakgkgolh ama kkachikin chu xlipaxuwakgolh tuku «putum lakwan anan anta k’Egipto» (Gén. 45:16-20).

Nitlan nakalichuwinanaw amakgapitsin tlakg malanki ta’akglhuwit (Kaʼakxilhti párrafo 14).

14. Komo nakinkatlawanikanan tuku nitlan kcongregación, ¿tuku nakinkamakgtayayan ni lixkajnit nakalichuwinanaw amakgapitsin?

14 Komo lakpuwanaw pi kinkatlawanikanitan tuku nitlan anta kcongregación, kuenta kilitlawatkan xlakata ni nakalitachuwinanaw amakgapitsin. Pero komo chatum tala natlawa akgtum lanka talakgalhin, talakaskin nakatachuwinanaw lakgkgolotsin chu nakaskiniyaw tamakgtay (Lev. 5:1). Pero wilakgolh niku nitu tatlawanit lanka talakgalhin. Akxni chuna la, tlan nakatalakaxtlayaw kinatalankan chu ni nakalitachuwinanaw ta’akglhuwit amakgapitsin. Asta max ni katitalakaskilh nakawaniyaw lakgkgolotsin (kalikgalhtawakga Mateo 5:23, 24 chu 18:15). Ni kamakgxtakgwi Jehová chu kalilatamaw umakgolh tastakyaw xalak Biblia, akxni chuna titaxtuyaw. Max na’akxilhaw pi ni chuna x’akgatekgsnitaw chu ni kinkatlawanikan tuku nitlan. Komo chuna xtitaxtuw, xlipaxtikatsiniw xlakata ni xmalhuwiw ta’akglhuwit akxni max nitlan xlichuwinaw chatum tala. Komo xlikana tuku lakpuwanaw o ni, wankan tuku nitlan xpalakata achatum ni lakkaxtlawa ta’akglhuwit. Xlakata ni namakgxtakgaw Jehová chu natalan uma natlawa pi ni katiʼanalh tuku nitlan. Chatum tiku tsokgli salmo wa pi chatum chixku «ti tankswa ixlatamat» ni limaklakaskin ksimakgat xlakata nawan ta’akgsanin xpalakata amakgapitsin chu ni katlawani tuku ni tlan (Sal. 15:2, 3SXP; Sant. 3:5).

CHUNA LA TALALINAW JEHOVÁ WA TUKU TLAKG XLAKASKINKA

15. ¿La makgtayalh José xlakata xtalalin Jehová?

15 Wi atanu tuku tlan nakatsiniyaw xlakata xli’akxilhtit José. Lata akgkututu kata patinalh, xla limasiyalh pi x’akxilha tuku xlama chuna la Jehová (Gén. 45:5-8). Xla ni limawakalh Jehová tuku x’akgspulama. Maski xlilakpuwan tuku titaxtulh, ni mastalh talakaskin pi uma xmakgalipuwa. Chu nachuna tuku lu xlakaskinka, ni mastalh talakaskin pi tuku nitlan xtlawakgo amakgapitsin xlitamakgatlinilh Jehová. Xlakata nikxni makgxtakgnalh, José akxilhli la Jehová lakkaxtlawalh tuku nitlan tlawanika chu la sikulunatlawaka xla chu xfamilia.

José ni mastalh talakaskin pi tuku nitlan xtlawakgo amakgapitsin xlitamakgatlinilh Jehová

16. ¿Tuku xlakata tlakg natalakatsuwiniyaw Jehová akxni nakgalhiyaw ta’akglhuwit kcongregación?

16 Chuna la José, akinin na lu lhuwa xtapalh ka’akxilhwi la talalinaw Jehová chu kakuentajtlawaw. Nikxni kamastaw talakaskin pi xtalakgalhinkan kinatalankan  natlawa pi natamakgatliniyaw Jehová tiku lu paxkiyaw chu kakninaniyaw (Rom. 8:38, 39). Komo nakinkatlawanikanan tuku nitlan anta kcongregación, kastalaniw xli’akxilhtit José chu tlakg katalakatsuwiniw Jehová. Ka’akxilhwi tuku lama chuna la akxilha Dios. Katlawaw tuku matlaniyaw xlakata nalakkaxtlawayaw ta’akglhuwit chu kalitsakgsaw tuku wan xtastakyaw Biblia. Chu alistalh, kamakamaxkiw Jehová kinta’akglhuwitkan. Lipawanaw pi xla nalakkaxtlawa ta’akglhuwit kilhtamaku akxni chuna xlilat.

KALIPAWAW «JUEZ XLIKALANKA KATIYATNI»

17. ¿La nalimasiyayaw pi lipawanaw «Juez xlikalanka katiyatni»?

17 Xlakata lamaw k’uma kakilhtamaku, niku anan tuku ni xatlan max na nalipatinanaw. Namin kilhtamaku max nalakpuwanaw pi wi tuku nitlan kinkatlawanikan o xpalakata achatum xalak congregación. Ni namastayaw talakaskin pi uma nakinkamaxlajwaniyan (Sal. 119:165). Wata, nikxni kamakgxtakgwi Jehová, chu kaskiniw xtamakgtay chu kalipawaw. Kalilakapastakwi xlakata kintalakgalhinkan, max nichuna akgatekgswi tuku xlanit chu ni liwana katsiyaw tuku lalh. Kastalaniw xli’akxilhtit José chu tlan kachuwinaw, xlakata uma tlawa pi ni natalhuwi ta’akglhuwit. Kalaksakwi pi chuntiya ni namakgxtakgaw Jehová chu nakgalhkgalhiyaw pi xla nalakkaxtlawa ta’akglhuwit chu ni ki’akstukan nakinkalipawankanan. Komo chuna natlawayaw namakglhtinanaw tasikulunalin, chuna la José. Liwana katsiyaw pi «Juez xlikalanka katiyatni» ankgalhin natlawa tuku xa’akgstitum xlakata «putum tuku tlawa xaʼakgstitum» (Gén. 18:25; Deut. 32:4).

18. ¿Tuku na’akxilhaw k’atanu artículo?

18 K’artículo nema aku mima, na’akxilhaw pulaktiy li’akxilhtit xlakata tuku nitlan lalh kxkachikin Jehová xala makgasa. Xlakata uma li’akxilhtit na’akxilhaw la taktujukan chu tapatinankan tlan nakinkamakgtayayan na’akxilhaw tuku xa’akgstitum chuna la akxilha Jehová.

^ párr. 7 Ka’akxilhti xbiografía Willi Diehl, nema wanikan «Jehová es mi Dios, en quien de veras confiaré». Uma taxtulh krevista La Atalaya del 1 de noviembre de 1991.