Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  2016, núm. 1

Tuku nakinkamakgtayayan tlakg tlan namakgkatsiyaw

Tuku nakinkamakgtayayan tlakg tlan namakgkatsiyaw

SKGATA nema aku lakachilh tlan katuwa tuku tlawanikan. Akxni skgataku xwanitaw kinatlatnikan putum xkinkamaxkikgoyan. Akxni tsukuw tlawanaw, lu laklanka xkaʼakxilhaw latamanin, xkinkamakgapekuankgoyan chu xputsayaw kinatlatnikan. ¡Lu tlan xmakgkatsiyaw akxni kintlatkan o kintsekan xkinkamakgachipayan!

Akxni laktsujku xwanitaw tlan xmakgkatsiyaw xlakata kinatlatnikan xkinkapaxkikgoyan chu xkinkakuentajtlawakgoyan. Xlakata xkatsiyaw pi xkinkapaxkikgoyan tlan xmakgkatsiyaw, chu akxni xkinkawanikanan pi tlan tuku tlawamaw, tlakg tlan xtlawayaw.

Akxni kstaktilhamaw, na tlan xkinkamamakgkatsinikgoyan. Xpaxuwayaw akxtum xkatatawilayaw, chu ni xpekuanaw akxni xʼanaw kʼescuela.

Xlikana, lu tlan xwa pi putum laktsu kamanan chuna kstakkgolh. Lu ni tlan, pero makgapitsi tuwa makgkatsikgo nakgalhikgo amigos, chu lhuwa kamanan tiku xnatlatni ni kamaxkikgo tuku maklakaskinkgo. Melisa * wan: «Akxni kakxilha fotos xla familia makxtum wi tuku tlawamakgolh, klakpuwan: “Nachuna xaktikgalhilh kifamilia”». Max wix nachuna makgkatsiya.

TUKU NITLAN KITAXTU KOMO AKXNI KSTAKPATKU NI XPAXKIKANA

Max akxni kstaktilhapat chuna xmakgkatsiya. ¿Tuku xlakata chuna makgkatsiya? Max ni xpaxkikana chu ni xkuentajtlawakana akxni aktsujku xwanita. Max minatlatni putum kilhtamaku xlakilhni akxni nina xlamakgxtakga chu wix xlakpuwana pi minkuenta xwanit. Asta max, nitlan tuku xtlawanikgoyan mintlat o mintse.

¿Tuku nitlan kitaxtuni aktsu kgawasa? Akxni stakmakgolh, makgapitsi wakgo drogas o kuchu. Amakgapitsin akxtum katalakgo tiku xalak tiji xlakata namakgkatsikgo pi wi niku makgtapakgsikgo. Xlakata lakaskinkgo kakapaxkika, makgapitsi sokgku putsakgo xlitatawilatkan; pero uma ni makgas makgapala, chu akxni lakxtlawakgo tlakg nitlan makgkatsikgo.

Nachuna, tiku kajku stakmakgolh chu ni chuna titaxtukgo na makgkatsikgo pi nitu litaxtukgo. Akgtum liʼakxilhtit, Ana wan: «Liwana xakkanajla pi  putum tuku xaktlawa nitlan xwanit, xlakata makglhuwa chuna xkiwani kintse. Ni klakapastaka komo kiwanilh pi tlan tuku xaktlawama o xkilimasiyanilh pi xkimpaxki».

Xlakata la makgastaknankan, ni kajwa uma tlawa pi nitlan makgkatsikan. Max xlakata lakxlalh tamakgaxtokgat, kgolonkan o ni lakgatiya la tasiyaya tlawa pi nitlan makgkatsiya. Maski atanu, pero makgalipuwanan chu katakgalhiya taʼakglhuwit amakgapitsin. ¿Tuku tlan natlawaya xlakata nialh chuna nitlan namakgkatsiya?

DIOS KINKAPAXKIYAN

Liwana kilikatsitkan pi ni kiakstukan wilaw. Wi tiku kinkamakgtayaputunan chu chuna tlawaputun: wa Dios.

Dios maklakaskilh palakachuwina Isaías chu kinkawaniyan: «Ni kapekuanti, xlakata akit miDios; akit nakmatliwakglhan chu nakmakgtayayan, akit kkmakgachipanitan» (Isaías 41:10, 13, El libro del Pueblo de Dios). Lu tlan limakgkatsikan akxni katsiyaw pi Dios kinkamakgachipanitan. ¡Ni anan tuku nalilakgaputsayaw!

Biblia lichuwinan xlakskujnin Dios tiku na xlipuwankgo, pero katsinikgolh lu nalipawankgo pi xʼama kamakgtaya. Akxni nina xlakachin Samuel, Ana xlakpuwan pi nikxni tse xʼama wan xlakata nila xkgalhi kamanan. Tayanilh maski xlikgalhkgamanankan xlakata nila xkgalhi kamanan. Wa xlakata ni xwayan chu xtasa (1 Samuel 1:6, 8). Pero alistalh, akxni xwaninita Dios la xmakgkatsi, nialh lipuwa (1 Samuel 1:18).

Salmista David na makglhuwa nitlan makgkatsilh. Mapakgsina Saúl, stalanilh xlakata xmakgniputun. Maski David lakgtaxtulh, pero lakgachunin makgkatsilh pi xtaʼakglhuwit xʼama makgni (Salmo 55:3-5; 69:1). Pero tsokglhi: «Akit katsisni, lipaxaw piriks ktama nak kintama, y tunkan klhtataj, porque kkatsi xlakata wix kiDios, ti talipaw kimakgtakgalha» (Salmo 4:8SXP).

Chuna la David chu Ana skinikgolh xtamakgtay Dios xlakata natayanikgo xtapatinkan chu xtakatsanajwakan, chu makgamakglhtinankgolh xtamakgtay (Salmo 55:22). ¿Nachuna tlan natlawayaw?

 PULAKTUTU TUKU MAKGTAYAYAN TLAKG TLAN NAMAKGKATSIYA

1. Kakatsini naʼakxilha Jehová la minTlat

Jesús kinkawanin pi xlakgapaswi xTlat, «xachastum Dios xaxlikana» (Juan 17:3). Apóstol Pablo kinkawaniyan pi «ni makgat kinkawilanin kinchatunukan» (Hechos 17:27). Wa xlakata, Santiago wan: «Katalakatsuwinitit Dios chu xla nakatalakatsuwiniyan» (Santiago 4:8).

Akxni katsiyaw pi kgalhiyaw chatum Tlat kʼakgapun tiku kinkapaxkiyan chu kinkalilakgaputsayan tlan limakgkatsiyaw. Xlikana lin kilhtamaku chuna nalipawanaw pero lhuwa akxilhkgonit pi uma lu kamakgtaya. Carolina wan: «Akxni ktsukulh lipawan Jehová, kkgalhilh chatum tlat tiku tlan xakwani tuku kmakgkatsi. Uma lu tlan kimamakgkatsinilh».

Raquel lakapastaka: «Jehová wa tiku tlan kimamakgkatsinilh akxni ankgolh kinatlatni. Xaktachuwinan chu xakskini pi xkimakgtayalh naktayani kintaʼakglhuwit. Chu putum kilhtamaku kimakgtayalh». *

2. Kaputsa xtamakgtay tiku paxkikgo Dios

Jesús kawanilh kstalaninanin: «Wixin, paks natalanin» (Mateo 23:8). Xlakaskin pi xlapaxkikgolh chu akgtum familia xaʼespiritual xwankgolh (Mateo 12:48-50; Juan 13:35).

Congregaciones xla xtatayananin Jehová liskujkgo xlakata nalamakgtayakgo, nalapaxkikgo chu tlan nalamamakgkgatsinikgo tiku maklakaskinkgo chuna la akgtum familia (Hebreos 10:24, 25). Lhuwa tiku kilakgonit ktamakxtumit makgkatsikgonit pi xtachuna la akgtum pomada nema mapaksa tuku ni tlan makgkatsikgo.

Eva wan: «Xakkgalhi chatum amiga kcongregación tiku xʼakgatekgsa tapatin nema xakmakgkatsi. Kinkgaxmatnilh, kilikgalhtawakganilh Biblia chu kintatlawalh oración. Liskujli xlakata nikxni kiʼakstu xaktawi. Kimakgtayalh tlan naklichuwinan tuku nitlan xakmakgkatsi. Xlakata kimakgtayalh uma tlawalh pi xakpaxuwalh». Raquel wan: «Congregación litaxtulh la “kintse chu kintlat”. Natalan tlawakgo kakmakgkatsilh pi kimpaxkikan».

3. Kakapaxki chu tlan kakalikatsini

Akxni paxkinanaw tatliwakglha la katalalinaw kiʼamigoskan. Jesús wa: «Tlakg anan tapaxuwan  akxni mastakan nixawa akxni makglhtinankan» (Hechos 20:35TNM). Xlikana, akxni tlakg paxkinanaw, na tlakg nakinkapaxkikanan. Jesús kawanilh kstalaninanin: «Kamastatit, lakimpi na nakamaxkikanatit» (Lucas 6:38).

Mastakan chu makgamakglhtinankan tapaxkit lu tlan kinkamamakgkatsiniyan. Chuna la wan Biblia: «Tapaxkit nikxni katisputli» (1 Corintios 13:8, TNM). María wan: «Kkatsi pi makgapitsi tuku nitlan klakpuwan kimpalakata ni xlikana. Xlakata nialh chuna naklakpuwan, wata kkamakgtaya amakgapitsin chu nialh kpekuan. Putum kilhtamaku lu tlan kmakgkatsi akxni wi tuku ktlawa xpalakata amakgapitsin».

KAKILHTAMAKU AKXNI TLAKG TLAN NAWAN

Pulaktutu tuku lichuwinawa ni kaj lakapala namasputu tuku makgkatsiya, pero namakgtayayan. Carolina wan: «Minkilhtamaku chuna kmakgkatsi, pero la uku tlakg kpaxuwa. Kkatsi pi Jehová kimpaxki chu kkgalhi amigos tiku kimakgtayakgo tlakg nakpaxuwa». Raquel nachuna makgkatsi: «Lakgachunin lu klipuwan. Pero anan lhuwa natalan tiku tlan kkaskini tastaktayaw. Kimakgtayakgo tlan nakmakgkatsi. Tuku tlakg xlakaskinka kkgalhi chatum Tlat nema tlan chali chali ktachuwinan. Uma tlawa pi tlakg tlan nawan».

Biblia wan pi Katiyatni akgtum paraíso nawan niku nitu kintikamakgapekuan

Pero tlan nalakkaxtlawakan. Biblia wan pi Katiyatni akgtum paraíso nawan niku nitu kintikamakgapekuan. Biblia wan: «Chatunu chatunu natawila xtampin xakiwi xʼuvas chu xtampin xhiguera, chu ni katianalh tiku nakamakgapekuan» (Miqueas 4:4). Ama kilhtamaku niti kintikatlawanin tuku nitlan o nakinkamakgapekuanan. Asta nialh nalakapastakaw tuku nitlan kintikatlawanikan makgasa (Isaías 65:17, 25). Dios chu xKgawasa, natlawakgo pi katatlawalh tuku xaʼakgstitum. Wa xlakata na anan «takaksni chu putum kilhtamaku nialhtu katimakgapekuanalh» (Isaías 32:17, Reina-Valera Actualizada).

^ párr. 5 Kalakgpalinikanit xtukuwanikan.

^ párr. 21 Xtatayananin Jehová kalimakgalhtawakgekgo Biblia nema ni taxokgo tiku talakatsuwiniputunkgo Dios.