Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  2016, núm. 1

 BIBLIA KALAKGPALINILH XLATAMATKAN

Kaj akgtum kata kskiniyan tapaxuwan chu takaksni

Kaj akgtum kata kskiniyan tapaxuwan chu takaksni
  • KATA AKXNI LAKACHILH: 1971

  • PAÍS: FRANCIA

  • ATANU: XTLAWA TALAKGXTUMIT XALIMAXANA, XKGALHANAN, XALUKU CHU XWA DROGA

LA XAKLAMA:

Xaklamaw kTellancourt, akgtum kachikin kxnordeste xla Francia. Kintlat francés chu kintse italiana. Akxni xakkgalhi akgtsayan kata, kkaw kʼItalia, kʼakgtum barrio niku latamanin ni lhuwa tumin xkgalhikgo chu lhuwa kkskujkgo lakatsu kRoma. Lu tuwa tuku xaktitaxtumaw; kinatlatni xkgalhikgo taʼakglhuwit xlakata tumin.

Kajku 15 kata xakkgalhi, kintse kiwanilh pi tlakg xaklatapulilh xlakata xakkgalhilh amigos. Tlakg lhuwa kilhtamaku ktsukulh klatapuli chu ni makgas tsukulh katalalin tiku nitlan likatsikgo. Akgtum kilhtamaku kilakgtalakatsuwilh chatum chixku tiku xtasiya pi tlan xlikatsi. Kmakgamakglhtilh droga, xlakata xaktasiyaputun pi lankata akit. Lakapala ktsukulh kmaklakaskin droga chu ktsukulh tlawa talakgxtumit xalimaxana. Makglhuwa kilikgamananka. Latamat nialh xlakaskinka kakxilhi; komo xaklatamalh o xaknilh. Lu kiʼakstu xkimakgkatsikan. Akxni xakkgalhi 16 kata, kiʼakstu xkimakgniputunkan: kwalh patum whisky chu ktamokgostaktalh kʼakgtum kgalhtuchokgo. Akgtutu kilhtamaku la xanin xakwi.

Ktsukulh lu xlakaskinka kakxilha latamat pero lu xaluku xakwanit chu xakaʼakgskgawi latamanin. Xakkawani latamanin komo xkintatalakgxtumiputunkgo, chu akxni xakchan xchikkan, xakkamaxki droga chu xakkamakgkgalhan putum tuku lu xtapalh xkgalhikgo. Tiku stakgo droga anta kʼItalia lu xkinputsakgo xlakata xakmakgpitsilh droga. Atsinu ni putum kilhtamaku xakkatakgalhi taʼakglhuwit policías. Maski kilatamat nitlan xwi, liwana xakkatsi pi wi tuku xlakata klama. Wa xlakata, ktlawanilh oración Dios: «Kaj akgtum kata kskiniyan tapaxuwan chu takaksni».

BIBLIA LAKGPALILH KILATAMAT:

Akxni xakkgalhi 24 kata kilatamat katuwa xwi xlakata tiku stakgo droga xkimakgniputunkgo wa xlakata klakpuwa pi nakan klatama kʼInglaterra. Akxni nina xakan, klakgapaxialhnalh kintse chu kaks klilakawa xlakata  anta xwi Annunziato Lugarà chu xlitachuwinama Biblia. * Xakkatsi la lixkajnit xlikatsi, wa xlakata kpekualh chu kgalhskinilh tuku xtlawama anta. Kiwanilh tuku lu lhuwa lakgpalinit xlatamat xlakata xtatayana Jehová wa, chu kiskinilh pi nakputsa xtatayananin Jehová akxni xakkchalh kʼInglaterra. Maski kwanilh pi tlan, pero chuntiya klilh kilatamat.

Akgtum kilhtamaku kakxilhli chatum xtatayana Jehová xmastama revistas Makatsinina chu ¡Despertad! xtiji Londres niku lu lhuwa titaxtukan. Klakapastakli tuku xakwanit pi xakkamatlawa chu kkgalhskilh komo tlan xkilimakgalhtawakgeka Biblia.

Tuku kkatsinilh kaks kimalakawanilh. Akgtum liʼakxilhtit, lu tlan klimakgkatsilh tuku wan 1 Juan 1:9 xlakata Dios: «Wa lapi nakgalhapalaniyaw nkintalakgalhinkan, makgantaxtina xla, chu na tlan nalipawanaw sampi nakinkamatsankgananiyan nkintalakgalhinkan, chu na nakinkachakganiyan». Uma tachuwin kilakgpalinilh kilatamat, xlakata nitlan xakmakgkatsi xlakata putum tuku xaktlawanit. Tunkun ktsukulh kan ktamakxtumit kpukgalhtawakga xla xTatayananin Jehová, niku lu tlan kamakgamakglhtinanka. Akxni kakxilhli pi lu tlan xlatalalinkgo chu xlapaxkikgo, wa tuku lu xaklakaskin, na kmakgtapakgsiputulh kʼuma congregación xla uma familia.

Ni lu tuwa kmakgkatsilh nakmakgxtakga droga chu la xaklin kilatamat; tuku lu tuwa kmakgkatsilh naklakgpali kintayat. Kakxilhli pi kilimaxkit kakni chu tlan nakalikatsini amakgapitsin. Chuntiyaku talakaskin naklakgpali tuku nitlan xlakata kintayat. Xlakata Jehová kimakgtayanit tlakg tlan kwi. Kata 1997 xtitaxtunit akgchaxan papaʼ lata xaktsukunit klikgalhtawakga Biblia, ktamunulh chu xtatayana Jehová klitaxtulh.

TUKU TLAN KINKITAXTUNINIT:

Alistalh lata ktamunulh, ktatamakgaxtokgli chatum tsumat wanikan Barbara, tiku nina makgas xtatayana Jehová xlitaxtunit. Chatum tiku kiʼamigo xwanit makgasa akxni akxilhli pi lu xaktalakgpalinit na tsukulh likgalhtawakga Biblia. La uku xla chu xtala tsumat xtatayananin Jehová. Nachuna tlawalh xtala kinana; xkgalhi 80 kata akxni tsukulh likgalhtawakga Biblia chu alistalh tamunulh.

La uku kgolotsin klitaxtu kʼakgtum congregación, kimpuskat chu akit lhuwa kilhtamaku klimaxtuyaw xlakata nakalitachuwinanaw Dios tiku chuwinankgo italiano anta kʼLondres. Lakgachunin nitlan klimakgkatsi xlakata la xaklama xapulana, pero Barbara putum kilhtamaku kimakgpuwantini. Asta la uku kgalhi tuku lu xaklakaskin: akgtum familia chu chatum Tlat tiku kimpaxki. Kaj akgtum kata kskinilh tapaxuwan chu takaksni, pero tlakg lhuwa tuku kimaxkinit.

La uku kgalhi tuku lu xaklakaskin: akgtum familia chu chatum Tlat tiku kimpaxki

^ párr. 10 Kalikgalhtawakga artículo «Biblia kalakgpalinilh xlatamatkan: Putum kilhtamaku xaktalatama pistola», kinkalitachuwinanan Annunziato Lugarà, krevista Makatsinina 1 xla julio kata 2014, páginas 8 chu 9.