Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Makatsinina  |  2016, núm. 1

 TASTAKYAW XALA MAKGASA KINKAMAKGTAYAYAN ASTA LA UKU

Ni kalilakgaputsa

Ni kalilakgaputsa

TASTAKYAW XALAK BIBLIA: «Ni tiIilakgaputsayatit» (Mateo 6:25).

¿Tuku wamputun? Jesús wa uma tachuwin akxni mastalh Taʼakgchuwin xalak Sipi. Maktum diccionario xalak Biblia, tachuwin griego nema matitaxtikan “ni kalilakgaputsa” kilhchanima la «makgkatsi lataman akxni ni anan tumin, tatsinksni chu atanu tuku lilakgaputsakgo kxlatamatkan chali chali». Lakgachunin lilakgaputsakgo pi kilhtamaku nema aku mima. Putum chuna makgkatsiyaw xlakata tuku maklakaskinaw chu xlakata tlan natawilakgo tiku kapaxkiyaw (Filipenses 2:20). Akxni Jesús wa: «Ni tiIilakgaputsayatit», xwamputun xlakata ni lu nalilakgaputsayaw asta natlawa pi lu napekuanaw pi tuku nala lichali chu nialh xatapaxuwan nalatamayaw (Mateo 6:31, 34).

¿Makgtayanan uma tastakyaw? Tuku wa Jesús lu xaskgalala tastakyaw. Makgapitsi libros nema lakputsanankgo wan pi akxni chatum lataman nila machokgo tuku lu lilakgaputsa, sistema nervioso simpático putum kilhtamaku skgalalh tawila. Nachuna wankan pi sistema nervioso simpático «malakatsuki tajatat nema wankgo makuchinanin la úlceras, tajatat xla naku chu asma».

Jesús wa tuku xlakata nitlan lu lakgaputsakan xlakata: nitu limakwan. Xla wa: «Komo wi tiku nalakgaputsa, ¿tlan tlakg namalhmani xlatamat?» (Mateo 6:27TNM). Komo kaj watiya nalilakgaputsayaw ni la katimalhmaniw kilatamatkan ni para akgtum segundo. Nachuna, la xlakpuwanaw pi lu nitlan xʼama kitaxtu ni chuna wan. Chuna la wa chatum tiku liwana katsi: «Lu lilakgaputsakan xlakata tuku nala kilhtamaku nema aku mima kaj makgatsankgakan kilhtamaku, chu kilhtamaku nema aku mima [...] tlakg tlan nawan ni xawa la akinin xlakpuwanaw».

¿La tlan machokgoyaw kintalakgaputsitkan? Pulana, kalipawanti Dios. Komo Dios kamawi tsiktsi chu lu stlan kamalhakgani xanat, ¿ni lakpuwana pi nakakuentajtlawa tiku kakninanikgo? (Mateo 6:25, 26, 28-30.) Pulaktiy, ni kalakpuwanti tuku aku nala: kaj kalilatapa tuku xala akgatunu kilhtamaku. Jesús wa: «Nikxni kalilakgaputsatit xlakata tuku nala lichali, xlakata lichali na nakgalhi xta’akglhuwit. Akgatunu kilhtamaku kgalhi xta’akglhuwit» (Mateo 6:34TNM).

Komo natlawayaw xtastakyaw Jesús, ni lu katikgalhiw tajatat chu nakgalhiyaw takaksni, «xtakaksni Dios» (Filipenses 4:6, 7TNM).