Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Akxni niy tiku lu xpaxkiya

Akxni niy tiku lu xpaxkiya

«Xapuxku kintala kaj xalan nilh chu nila tuku ktlawalh xlakata ni chuna xlalh. Chu maski xtitaxtunita makgapitsi papaʼ, akxni xaklakapastaka, xtachuna la komo akgtum cuchillo xlilhtukuka kinaku. Xmin kilhtamaku lu xaksitsi. ¿Tuku xlakata nilh? Na xakmakgkatsi pi xaklin kuenta xlakata ni lhuwa kilhtamaku akxtum ktatawi» (Vanessa, Australia).

KOMO na ninita tiku lu xpaxkiya, max na makgkatsinita pi miʼakstu wila, lipuwana o nila tuku tlawaya, chu asta max sitsiya, lakpuwana pi lipina kuenta chu pekuana. Asta max miʼakstu kgalhskinkana komo kgalhini kuenta nalatapaya.

Komo nalakgtasaya tiku ninita, ni wamputun pi ni tliwakga wix. Wata limasiya pi uma lataman lu xlakaskinka mimpalakata. Pero ¿wi tuku tlan namakgtayayan?

TUKU MAKGAPITSI LATAMANIN TLAWAKGONIT

Maski tasiya pi ni anan tuku namapanu mintakatsanajwat, tuku natalichuwinan max namakgtayayan.

KALIMAXTU KILHTAMAKU NATASAYA

Ni putum latamanin lakxtum lipuwankgo chu la xlilhuwa kilhtamaku. Pero komo natasaya, namakgtayayan. Vanessa, tiku lichuwinawa, wan: «Kajwatiya xaktasa. Xakmaxtuputun tuku xakmakgkatsi». Sofía, tiku kaj xalan nilh xtala tsumat, wan: «Tuku klakpuwan chu tuku kmakgkatsi lu kimakgapatinan. Xtachuna la xmakilhkinika xlakata nachakgenikana niku wi tuku laninita chu puchanit. Nila tayanikan takatsanajwat, pero lu xlakaskinka xlakata napaksa niku wi tuku laninita».

KAWANTI TUKU LAKPUWANA CHU MAKGKATSIYA

Xlikana pi min kilhtamaku ni lakaskina wi tiku akxtum natatawilayan, pero mintalipuwan lu tsinka,  nila miʼakstu katitayani. Jared, chatum kgawasa tiku kgalhi 17 kata chu nilh xtlat, lakapastaka: «Max ni xtaʼakgatekgsa tuku xakwan, pero lu xkimakgtaya akxni xakkawani amakgapitsin tuku xakmakgkatsi». Janice, tiku talichuwinalh kxapulana artículo, wan atanu tuku tlan kitaxtu: «Lu tlan klimakgkatsilh akxni kkatachuwinalh amakgapitsin. Kmakgkatsilh pi ni kiʼakstu kwi chu pi kiʼakgatekgsnikan».

KAMAKGAMAKGLHTINANTI TAMAKGTAY

Chatum makuchina wan: «Tiku mastakgo talakaskin pi kamakgtayakgolh xfamilia chu xʼamigos akxni nina makgas ninit tiku xpaxki, tlakg ni tuwa tayani talipuwan nema alistalh makgkatsi». Kakawani miʼamigos tuku tlan natlawakgo xlakata namakgtayakgoyan. Max xlakan makgtayaputunkgoyan, pero ni katsikgo la natlawakgo (Proverbios 17:17).

TLAKG KATALAKATSUWINI DIOS

Tina wan: «Akxni cáncer lakapala makgnilh kinchixku, kmakgatsankgalh tiku tlakg xaklipawan chu ktsukulh litachuwinan Dios putum tuku xakmakgkatsi. Akxni xaklakgawan, xakskini xkimaxkilh litliwakga xlakata xaktayanilh uma kilhtamaku. Pulaklhuwa la Dios kimakgtayalh...». Tarsha, tiku 22 kata xkgalhi akxni nilh xtse, wan: «Tlan xkimamakgkatsini akxni chali chali xaklikgalhtawakga Biblia. Xtlawa pi tlan tuku xaklakpuwa».

KALILAKPUWANTI TALAKASTAKWANAT

Tina wan: «Xapulana, takgalhkgalhin xla talakastakwanat ni lu xkimakgtaya. Tuku xaklakaskin uma kilhtamaku, wa pi kinchixku akxtum xkintatawi chu kinkamanan xlakaskinkgo pi xkatatawi xtlatkan. Pero la uku, akgtati kata alistalh, lu klipawan uma takgalhkgalhin. Wa tuku kimakgtaya chuntiya naktayani. Akxni klilakpuwan pi tlan nakakxilhpara kinchixku, kimakgapaxuwa chu kilimini takaksni».

Max ni lakapala tlan namakgkatsiya, pero tuku wan Vanessa max tlan namamakgkatsiniyan. Xla wan: «Lakpuwankan pi ni katitayani, pero ankgalhin min tlakg xatlan kilhtamaku».

Kalakapastakti: maski ni anan tuku namasputu mintalipuwan, kgalhini kuenta nalatapaya. Dios namakgtayayan xlakata chuntiya tlan nalipaxuwaya akxni akxtum nakatatawilaya miʼamigos chu nalipaxuwaya milatamat. Nialh makgas, Dios nakamalakastakwani tiku nikgonita. Xla lakaskin pi nakaʼakgpixtiyaparaya tiku lu xkapaxkiya chu pi takatsanajwat nema makgkatsiya kalakgsputli putum kilhtamaku.