Ankan kxpulakni

Ankan kliputsan

Xtatayananin Jehová

Laksakkan tachuwin totonaco

¿La nalitamakgtayaya komo nalakgapasa Dios?

¿La nalitamakgtayaya komo nalakgapasa Dios?

Asta la uku lichuwinanitaw makgapitsi tuku nakinkamakgtayayan nakatsiyaw tiku Dios. Akxilhnitaw pi Biblia masiya pi wanikan Jehová chu pi tayat nema tlakg limasiya wa tapaxkit. Na lichuwinanitaw tuku tlawanit chu tuku natlawa xpalakata latamanin. Pero ni kajwatiya uma talakaskin xlakata nalakgapaskan Dios, pero max miʼakstu nakgalhskinkana komo nalitamakgtayaya nalakgapasa Dios.

Jehová waniyan pi komo naputsaya «xla namaxkiyan talakaskin natekgsa» (1 Crónicas 28:9). Komo naliskuja nalakgapasa Dios, namakglhtinana akgtum tlan tamaskiwin: tlan xʼamigo nawana (Salmo 25:14). ¿La nalitamakgtayaya komo xʼamigo nawana?

Napaxuwaya. Biblia wan pi Jehová, «Dios tiku xapaxuwana» (1 Timoteo 1:11TNM). Komo natalakatsuwiniya Dios chu naliskuja xlakata nalimasiyaya xtayat, xlikana napaxuwaya chu uma namakgtayayan tlan natawila mintalakapastakni, tuku wix makgkatsiya chu mimakni (Salmo 33:12). Na nalakgmakgana tuku laktlawa milatamat, nakgalhiya tlan talismanin chu tlan nakatalalipina amakgapitsin. Xlikana, nachuna nalakpuwana la salmista: «Tlan kinkitaxtuni klakgtalakatsuwini Dios» (Salmo 73:28).

Dios nakuentajtlawayan. Jehová kawani xʼamigos: «Naklistakyawayan kilakgastapu» (Salmo 32:8). Uma wamputun pi Jehová kakuentajtlawa chatunu kskujnin chu kamaxki tuku maklakaskinkgo (Salmo 139:1, 2). Akxni tlakg natalalipina Jehová, naʼakxilha pi putum kilhtamaku namakgtayayan.

Nakgalhiya lu stlan takgalhkgalhin. Ni kajwatiya makgtayayan xatapaxuwan nalatapaya uku, Jehová na malaknuniyan xatlan latamat kkilhtamaku nema aku mima (Isaías 48:17, 18). Biblia wan: «Wa uma wamputun latamat nema ni kgalhi xlisputni, pi nalakgapaskgoyan wix, xachastum Dios xaxlikana chu wantiku malakgacha, Jesucristo» (Juan 17:3TNM). Takgalhkgalhin nema kinkamaxkiyan Dios xtachuna xkgalhxtokget barco nema tlan lipawankan chu tliwakglh tatijunit chu kinkamakgtayayan ni nakinkaxwatalinkanan kʼuma xatuwa kilhtamaku (Hebreos 6:19).

Uma kaj makgapitsi la litamakgtayakan akxni tlakg lakgapaskan Dios chu xʼamigo wankan. Komo tlakg katsiputuna, kakatachuwinanti xtatayananin Jehová o katanu kkisitiojkan xla Internet jw.org.