Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Tapatin: ¿Wa tuku Dios limalakgaxokgenan?

Tapatin: ¿Wa tuku Dios limalakgaxokgenan?

LUCÍA NILA LIWANA LITLAWAN KGANTUM XTANTUN. Akxni aktsujku xwanit chipalh poliomielitis, akgtum tajatat nema lamapasikan chu laktlawa sistema nervioso. Akxni xkgalhi 16 kata, puskat tiku kskujni wanilh: «Dios limalakgaxokgen parálisis xlakata ni kgalhakgaxpatti mintse chu ni maxki kakni». Maski titaxtulh kata, Lucía lakapastakaku la nitlan limakgkatsilh tuku wanika.

AKXNI DÁMARIS KATSILH PI XKGALHI AKGTUM TUMOR KXʼAKSKITIT, xtlat wanilh: «Max tlawanita tuku lu nitlan. Wa xlakata Dios malakgaxokgeman». Dámaris lu nitlan limakgkatsilh.

Lata makgasa, kanajlakan pi Dios maklakaskin tajatat xlakata nalimalakgaxokgenan. Libro Usos y costumbres de las tierras bíblicas wan pi xkilhtamaku Jesús xlakpuwankan pi «tiku xtatatla, xlitatatla xtalakgalhin o xtalakgalhin xfamilia chu xlakgaxokgoma xtalakgalhin». Chu libro Medieval Medicine and the Plague (Likuchun chu tajatat xalak Edad Media) wan pi akxni xtitaxtunita lhuwa ciento kata lata akxni xminit Cristo «makgapitsi xlakpuwankgo, pi Dios xlimaklakaskin tajatat xlakata nakalimalakgaxokge xtalakgalhinkan». Pero tajatat nema masputulh Europa ksiglo akgkutati, ¿wa tuku Dios limalakgaxokgenalh? ¿O akgtum bacteria makilhtsukilh uma tajatat nema alistalh katsikgolh científicos? Max miʼakstu nakgalhskinkana komo Dios maklakaskin tajatat xlakata nakamalakgaxokge latamanin xtalakgalhinkan. *

KALILAKPUWANTI UMA: Komo tajatat chu tapatin wa tuku Dios xkalimalakgaxokge tiku chuna xkalakgchan, ¿tuku xlakata Jesús kamapaksalh latamanin? ¿Ni xtalalakatawakama tuku xaʼakgstitum tlawa Dios? (Mateo 4:23, 24). Jesús nikxni xtalalakatawakalh xTlat. Xla wa: «Xaliankgalhin ktlaway wa ntu xla lakgatiy» chu «lantla nkimaxkilh xaTlat limapakgsin, chuna ktlaway» (Juan 8:29; 14:31).

Biblia liwana wan pi Jehová putum kilhtamaku «xaʼakgstitum chu ni tlawa tuku ni xalakatitum» (Deuteronomio 32:4). Akgtum liʼakxilhtit, Dios nikxni xtlawalh pi xtamokgosli akgtum avión chu lhuwa latamanin xnikgolh kaj xlakata namalakgaxokge chatum lataman. Abrahán, tiku skujnilh chu nikxni makgxtakgli Dios, xkatsi pi Dios nikxni chuna xtlawalh. Wa xlakata wa pi Dios nikxni lakpuwanit akxtum nakamakgni «tiku nitlan likatsi chu tiku tlan likatsi» (Génesis 18:25). Biblia na wan pi «Dios ni tlawa tuku ni xalakatitum» (Job 34:10-12).

¿TUKU KINKAMASIYANIYAN BIBLIA XLAKATA TAPATIN?

Akxni patinanaw, ni wa pi Dios kinkamalakgaxokgeman kintalakgalhinkan. Jesús liwana masiyalh akxni xla chu xtamakgalhtawakgen tatanokglhkgolh chatum chixku tiku lakgatsin xlakachinit. Xtamakgalhtawakgen kgalhskinkgolh: «Rabí, ¿ti nkgalhinit ntalakgalhin, pa wa yuma nchixku, su wa xnatlatna, lakimpi chuna lakgatsin xlakachilh?». Jesús kakgalhtilh: «Ni mpala wa yuma nchixku nkgalhinit ntalakgalhin, na ni mpala wa xnatlatna, wampi wa yuma nchuna lilanit lakimpi nalitasiyuniy xtatlaw Dios» (Juan 9:1-3).

Xlakata ni xlikana tuku xlakpuwankgo, xtamakgalhtawakgen Jesús max lu kaks lakawankgolh akxni kawanilh pi nipara uma chixku, nipara xnatlatni xtlawakgonit akgtum talakgalhin nema xlakgchan chuna xlimalakgaxokgeka. Akxni Jesús tlawalh pi tlan xlakawanalh uma chixku, ni kajwatiya  mapaksalh, wata limasiyalh pi umakgolh talakapastakni ni xlikana xwanit (Juan 9:6, 7). Akxni katsikan pi Dios ni wa xkuenta kintapatinkan lu tlan kamamakgkatsini tiku kgalhikgo xasnun tajatat.

¿Tuku xlakata Jesús kamapaksalh latamanin komo wa Dios xkamalakgaxokgema?

Biblia liwana kinkawaniyan:

  • «Wa Dios, nila litatokglha wa ntu nitlan, na ti ni mpala tokglha xla» (SANTIAGO 1:13). Chu ni kajwatiya uma, nialh makgas Dios namasputu tuku «nitlan» nema lhuwata ciento kata kamakgapatinama latamanin, chuna la tajatat, takatsanajwat chu linin.

  • Jesucristo «timapaksakgolh lhuwa ntatatlanin» (MATEO 8:16). Tuku Jesús tlawalh akxni kamapaksalh latamanin kaj xlimasiyakan tuku natlawa xTamapakgsin Dios xlikalanka katiyatni.

  • «Na paks naxakanikgo Dios xlakgpixtajatkan; na nialh katiʼanalh linin; chu na nialh katiʼanalh ntalipuwan, ni mpala wa ntatasa, chu na ni mpala wa ntakatsanajwat; sampi wa xlipaks nkatuwaj, wa ntu xʼanan xakgasiyaj, paks lakgsputli» (APOCALIPSIS [REVELACIÓN] 21:3-5).

¿TIKU LIN KUENTA?

¿Tuku xlakata anan takatsanajwat chu tapatin kkakilhtamaku? Komo ni wa xkuenta Dios, ¿tiku lin kuenta? Lata makgasa latamanin katsiputunkgonit xtakgalhtin umakgolh takgalhskinin. Kʼartículo nema stala natekgsa xtakgalhtin.

^ párr. 4 Makgasa Dios kamalakgaxokgelh makgapitsi latamanin xtalakgalhinkan akxni kamalakgachanilh tajatat, tuku masputunan o atanu, pero Biblia ni wan pi la uku Jehová chuntiya tlawama.