Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Nialh makgas Dios namasputu tapatin

Nialh makgas Dios namasputu tapatin

«¿Asta tuku kilhtamaku Jehová naktasaskiniyan tamakgtay chu wix ni kgaxpata? ¿Asta tuku kilhtamaku naktasaskiniyan tamakgtay xlakata lhuwa lachipakan, chu ni kilakgmaxtuya?» (Habacuc 1:2, 3). Chuna wa Habacuc, chatum chixku tiku tlan xlikatsi chu Dios tlan xakxilha. ¿Chuna wa xlakata ni xlipawan Dios? Ni, ni chuna. Dios wanilh pi xlakkaxwilinita akgtum kilhtamaku xlakata namasputu tapatin (Habacuc 2:2, 3).

Akxni patinanaw o chatum kintalilakgapasnikan patinan, max lakapala lakpuwanaw pi Dios makgapalama, pi wi tuku xtlawalha. Pero Biblia kinkawaniyan uma: «[Jehová] ni mamakgasliy xtamalaknun lantla makgapitsin puwankgo mpi mamakgaslima, wampi wa xpalakata mpi lu[...] xasmalhwa [o xakgalhkgalhina] xla kimpalakatakan, mpi ti ni chatum lakaskin natsankgay, chi wampi paks kalakgchankgolh nalakgaspittayanikgoy xtalakgalhinkan» (2 Pedro 3:9).

¿TUKU KILHTAMAKU NAMASPUTU DIOS TAPATIN?

Dios wi tuku natlawa nialh makgas. Jesús lichuwinalh makgapitsi tuku x’ama litasiya xlisputni kakilhtamaku chu pi latamanin xala watiya kilhtamaku x’amakgo akxilhkgo akxni chuna xlalh (Mateo 24:3-42). La uku kgantaxtuma tuku xlichuwinankanit, chu uma limasiya pi Dios nialh makgas nalakkaxtlawa tuku anan kkakilhtamaku. *

Pero ¿tlan namasputu Dios tapatin? Akxni Jesús xlama kkatiyatni, masiyalh pi Dios tlan xkamapanuni xtapatinkan latamanin. Kalichuwinaw makgapitsi liʼakxilhtit.

Tuku masputunan. Akgtum kilhtamaku, akxni Jesús chu xʼapóstoles xpatakutmakgo pupunu xalak Galilea, lu palha tsukulh unan chu xmaʼakgtsiputun barca. Jesús limasiyalh uma kilhtamaku pi xla chu xTlat, tlan malakgachokgokgo tuku masputunan (Colosenses 1:15, 16). Kajwatiya wa: «“Kaks, kakgatxtakgti”. Pus chi talakachokgolh un, na lu[...] takakaksli» (Marcos 4:35-39).

Tajatat. Lhuwa latamanin xkatsikgo pi Jesús tlan xkamapaksa tiku ni xlakawanankgo, nachuna tiku nila xtlawankgo, tiku xkgalhikgo epilepsia, tiku xkgalhikgo lepra chu amakgapitsi tajatat. Biblia wan pi Jesús «timapaksakgolh lhuwa ntatatlanin» (Mateo 4:23, 24; 8:16; 11:2-5).

Tatsinkstat. Akxni Jesús xlichuwinama Dios, makgtiy maklakaskilh litliwakga nema xmaxkinit xTlat xlakata namalhuwi tsinu liwat nema xkgalhi chu nakamawi lhuwa mil latamanin (Mateo 14:14-21; 15:32-38).

Linin. Akxni Jesús xlama kKatiyatni, kamalakastakwanilh kgalhtutu latamanin, chatum akgtatita kilhtamaku la xninit. Uma liwana masiya pi Jehová tlan kamalakastakwani tiku nikgonita (Marcos 5:35-42; Lucas 7:11-16; Juan 11:3-44).

^ párr. 5 Komo tlakg katsiputuna xlakata xaʼawatiya kilhtamaku, kaʼakxilhti capítulo 9 xla libro ¿Tuku xlikana masiya Biblia?, nema tlawakgonit xtatayananin Jehová. Tlan namaktiya chu ni taxokgo kjw.org.