Ankan kxpulakni

Ankan kliputsan

Xtatayananin Jehová

Laksakkan tachuwin totonaco

¿Makgkatsi Dios tuku wix makgkatsiya?

¿Makgkatsi Dios tuku wix makgkatsiya?

TUKU KINKAMASIYANIYAN TAMALAKATSUKIN

Empatía wamputun namakgkatsiya tuku makgkatsima achatum, na’akxilha chu na’akgatekgsa tuku makgkatsima. Psicólogo Rick Hanson, wan pi chuna «lilakachinaw namakgkatsiyaw tuku makgkatsi achatum».

KALILAKPUWANTI UMA: ¿Tuku xlakata akinin tlan makgkatsiyaw tuku makgkatsi achatum chu animales nila chuna tlawakgo? Biblia wan pi Dios kinkamalakatsukin chuna la xla (Génesis 1:26). Uma wamputun pi tlan nalimasiyayaw maski kaj tsinu xtayat Dios. Wa xlakata, akxni wi tiku makgkatsi tuku makgkatsima achatum limasiyama xtayat xalakgalhamana kiMalakatsukinakan Jehová (Proverbios 14:31).

¿TUKU KINKAMASIYANIYAN BIBLIA XLAKATA LA DIOS MAKGKATSI TUKU MAKGKATSIYAW?

Dios makgkatsi tuku makgkatsiyaw chu nipara tsinu lakgati akxni patinamaw. Akxni Biblia lichuwinan la patinankgolh israelitas kʼEgipto xlakata skujni xwankgonit chu tipuxam kata akxni xlamakgo kdesierto, wan: «Akxni xlakan xpatinamakgo xla xpatinama» (Isaías 63:9). Kaʼakxilhti pi Dios ni kajwatiya xkatsi pi xkachikin xpatinama, wata na xmakgkatsi xtakatsanajwat. Xla wa: «Liwana klakgapasa xtakatsanajwatkan nema patimakgo» (Éxodo 3:7). Dios wan: «Tiku kaxamayan xamama kilakgastapu» (Zacarías 2:8). Wa xlakata, akxni kinkatlawanikanan tuku nitlan, xtachuna la wa tlawanimaka.

Biblia kinkawaniyan pi maski namakgkatsiyaw pi ni kinkalakgchanan xtalakgalhaman Dios o kinakujkan nitlan nakinkamamakgkatsiniyan, Dios tlakg lanka «nixawa nkintapuwankan, chu na lakgapasa xlipaks nkatuwaj» (1 Juan 3:19, 20). Dios tlakg liwana kinkalakgapasan nixawa la akinin. Liwana katsi putum tuku titaxtuyaw, tuku lakapastakaw chu tuku makgkatsiyaw. Chu makgkatsi tuku makgkatsiyaw.

Tlan nalipawanaw pi Dios nakinkamakgtayayan akxni titaxtumaw taʼakglhuwit chu naskiniyaw pi tlan kakinkamamakgkatsinin, kakinkamaxkin liskgalala, chu kakinkamakgtayan

Biblia liwana kinkawaniyan:

  • «Wix xchuwinanti chu Jehová xkgalhtin; kskinti tamakgtay chu xla xwanin: “¡Unu kwi!”» (ISAÍAS 58:9).

  • «Xlakata akit liwana klakgapasa talakapastakni nema klakpuwama mimpalakatakan, wa tuku wan Jehová, talakapastakni xla takaksni, chu ni xla talakgaputsit, xlakata wi tuku nakkamaxkiyan chu takgalhkgalhin. Chu wixin nakintachuwinanatit chu natanatit chu nakintlawaniyatit oración, chu akit nakkakgaxmatniyan» (JEREMÍAS 29:11, 12).

  • «Kawili kilakgpixtajat, anta kmiodre. ¿Ni anta tatsokgnit kmilibro?» (SALMO 56:8).

 DIOS KINKALAKGAPASAN, KINKAʼAKGATEKGSNIYAN CHU MAKGKATSI TUKU MAKGKATSIYAW

¿Tlan nakinkamakgtayayan natayaniyaw taʼakglhuwit komo katsiyaw pi Dios kinkaʼakgatekgsniyan? Kaʼakxilhwi tuku titaxtulh María.

«Lu kinkatsanilh akxni kakxilhli pi kinkgawasa tiku xkgalhi 18 kata, akgtiy kata mapatinilh cáncer chu makgnilh. ¿Tuku xlakata latamat lu nitlan chu patinankan? Xaksitsininit Jehová xlakata ni mapaksalh.

»Xakmakgkatsi pi Jehová ni xkimpaxki. Titaxtulh akgchaxan kata, klitachuwinalh tuku xakmakgkatsi chatum kiʼamiga xalak congregación nema lu xapaxkina chu lu xaʼakgatekgsnina. Akglhuwa hora kaks kinkgaxmatnilh, chu alistalh kimalakapastakalh akgtum texto xalak Biblia nema lakgchalh kinaku: 1 Juan 3:19, 20, niku wan pi “xaliwaka ntlanka Dios, nixawa nkintapuwankan, chu na lakgapasa xlipaks nkatuwaj”. Chu alistalh kiwanilh pi Jehová akgatekgsa kintapatinkan.

»Maski chuna, chuntiya xaksitsinit. Wa xlakata klikgalhtawakgalh Salmo 94:19SXP, niku wan: “Akxni snun xakakgatuyuma nak kintapuwan, y ni xakkatsi tu naktlawaj, wix kimakgtsijti y maxki tapaxawan kilistakni”. Wa uma tuku xakkgaxmatputun. Alistalh tlan klitachuwinalh Jehová kintakatsanajwat chu xakkatsi pi xla xkinkgaxmatnima chu xkiʼakgatekgsni. Uma lu tlan kimamakgkatsinilh».

¡Lu tlan limakgkatsiyaw akxni katsiyaw pi Dios kinkaʼakgatekgsniyan chu makgkatsi tuku makgkatsiyaw! Pero ¿tuku xlakata anan lhuwa tapatin? ¿Kinkamalakgaxokgeman Dios xpalakata akgtum talakgalhin? ¿Namin kilhtamaku namasputu tapatin? Umakgolh takgalhskinin natakgalhti kʼartículo nema stalakgo.