Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Mapakgsinamaja xTamapakgsin Dios

 CAPÍTULO 4

Jehová malanki xtukuwani

Jehová malanki xtukuwani

TUKU NALICHUWINAN UMA CAPÍTULO

Xkachikin Dios lu xlakaskinka akxilha xtukuwani Jehová

1, 2. ¿La malanki xtukuwani Dios Biblia Traducción del Nuevo Mundo?

MARTES 2 xla diciembre kata 1947, akgtum tsisa nema kakgawiwi xwanit pero na xchichinama, makgapitsi natalan tiku kalaksakkanit naʼankgo kʼakgapun xalak Betel kBrooklyn (Nueva York), tsukukgolh tlawakgo akgtum lanka taskujut chu akgkutiy kata limasputukgolh. Chalh kilhtamaku, domingo 13 xla marzo kata 1960, makgalhsputukgolh xasasti Biblia. Titaxtulh akgtutu papaʼ, chu 18 xla junio kata 1960, tala Nathan Knorr masiyalh xlakatin tiku xkgalhakgaxmatkgo kManchester (Inglaterra), xaʼawatiya volumen xla Traducción del Nuevo Mundo de las Santas Escrituras xaʼinglés. Tiku xʼakgchuwinama masiyalh tuku xmakgkatsikgo tiku anta xwilakgo akxni wa: «¡La uku akgtum kilhtamaku nema lu paxuwakgo putum xtatayananin Jehová xlikalanka kakilhtamaku!». Wi tuku lu xlakaskinka xkgalhi uma xasasti Biblia nema lu xkamakgapaxuwa, makglhuwa xmaklakaskin xtukuwani Dios, Jehová.

Biblia Traducción del Nuevo Mundo de las Escrituras Griegas Cristianas kxaʼinglés mastaka klanka tamakxtumit kkata 1950 nema xwanikan «Talhuwina tuku xla Dios» Estadio xla Yankees (Nueva York); Ghana

2 Lhuwa Biblias ni wilikgo xtukuwani Dios. Pero xlakskujnin Jehová tiku kalaksakkanit naʼankgo kʼakgapun ni mastakgolh talakaskin pi Satanás naxapa xtukuwani Dios chu latamanin nialh xlakgapaskgolh. Tuku litsuku Traducción del Nuevo Mundo nema taxtulh ama kilhtamaku xwan: «Tuku tlakg xlakaskinka kgalhi uma Biblia wa pi wilikanit xtukuwani Dios niku xliʼanat». Chuna, Traducción del Nuevo Mundo limaklakaskin xtukuwani Dios, Jehová liwaka 7,000. ¡Chuna malanki xtukuwani kinTlatkan xalak akgapun, Jehová!

3. 1) ¿Tuku akgatekgskgolh kinatalankan xlakata tuku xwamputun xtukuwani Dios? 2) ¿La kiliʼakgatekgsatkan Éxodo 3:13, 14? (Kaʼakxilhti recuadro « Tuku wamputun xtukuwani Dios».)

3 Pulana, xLikgalhtawakgananin Biblia xlakpuwankgo pi xtukuwani Dios xwamputun: «Akit wa tiku akit» (Éx. 3:14, Reina-Valera). Wa xlakata, revista La Torre del Vigía kkata 1926 lichuwinalh: «Xtukuwani Jehová kilhchanima pi niti makilhtsukilh, [...] tiku ni kgalhilh xlakatsukut chu ni kgalhi xlisputni» (número xla marzo-abril). Pero akxni natalan tsukukgolh matitaxtikgo Biblia, Jehová ni kaj xkamakgtayanit xkachikin xkatsikgolh pi xtukuwani ni kaj wamputun pi niti malakatsukilh: tuku tlakg xlakaskinka xʼakgatekgskgonit wa  pi chatum Dios tiku makgantaxti tuku lakapastaknit natlawa. Katsikgolh pi xtukuwani Jehová wamputun «Xla tlawa pi chuna nakitaxtu». Chu, xla tlawalh kakilhtamaku, putum tiku kgalhikgo liskgalala, chu chuntiya tlawama xtalakaskin chu tuku lakapastaknit natlawa. Pero ¿tuku xlakata lu xlakaskinka pi xtukuwani Dios natamalanki chu la tlan namakgtayananaw?

Tasantujtlawa xtukuwani Dios

4, 5. 1) ¿Tuku skinaw akxni wanaw «katasantujlilh mintukuwani»? 2) ¿La chu tukuya kilhtamaku natasantujtlawa xtukuwani Dios?

4 Jehová lakaskin kamalankika xtukuwani. Tuku tlakg tlawaputun wa namasantujli xtukuwani, chuna la masiya oración xla padrenuestro: «Katasantujlilh mintukuwani» (Mat. 6:9TNM). ¿Tuku skinaw akxni chuna wanaw?

5 Chuna la katsiw kcapítulo 1, akxni wanaw «katasantujlilh mintukuwani» wa pulaktum tuku skinaw kʼoración nema masiyalh Jesús nema makgtanu tuku xtalakaskin Jehová. Apulaktiy wa «kamilh mintamapakgsin» chu «katatlawalh mintalakaskin» (Mat. 6:10TNM). Wa xlakata, chuna la skiniyaw Jehová kalimilha xTamapakgsin chu katatlawalh xtalakaskin, na skiniyaw kamasantujlilh xtukuwani. Tlan nawanaw pi skiniyaw Jehová kamaskulunkilh xtukuwani xlakata tamaxkajwanilh lata akxni ni kgalhakgaxmatka kʼEdén. ¿La nakgalhti Jehová uma oración? Xla wan: «Chu xlikana naksantujtlawa xalanka kintukuwani, nema kachikinin xmaxkajwanimakgolh» (Ezeq. 36:23; 38:23). Anta kʼArmagedón, akxni namasputu tuku nitlan, Jehová nasantujtlawa xtukuwani xlakatin putum tuku tlawanit.

6. ¿La tlan namakgtayananaw xlakata natasantujtlawa xtukuwani Dios?

6 Chuna la titaxtunit kata, Jehová mastanit talakaskin pi xlakskujnin kamasantujlikgolh xtukuwani. Xlikana, pi nila tlakg xasanto natlawayaw xtukuwani Jehová. Lu xasantuta. Wa xlakata, ¿la tlan nasantujtlawayaw? Isaías wan: «Jehová tiku pulalin lhuwa soldados... wa Tiku wixin xasanto miliʼakxilhatkan». Chu Jehová uma tuku wa xlakata xkachikin: «Nasantujtlawakgo kintukuwani, [...] chu lu namaxkikgo kakni xDios Israel» (Is. 8:13; 29:23). Wa xlakata, santujtlawayaw xtukuwani Dios akxni tlakg xlakaskinka akxilhaw xtukuwani nixawa atanu tukuwani; akxni maxkiyaw kakni tuku kilhchanima; chu akxni kamakgtayayaw amakgapitsin xasanto naʼakxilhkgo. Limasiyayaw pi lu maxkiyaw kakni xtukuwani Dios akxni makgamakglhtinanaw Jehová la tiku lakgchan namapakgsinan chu xliputum kinakujkan kgalhakgaxmataw (Prov. 3:1; Apoc. 4:11).

Linkgo chu malankikgo xtukuwani Dios

7, 8. 1) ¿Tuku xlakata xtalakaskin kilhtamaku xlakata xkachikin Dios tlan xlilh xtukuwani? 2) ¿Tuku naʼakxilhaw la uku?

7 Xlakskujnin Dios xala uku limaklakaskinkgonit kxlikgalhtawakgakan xtukuwani Dios lata kdécada 1870. Akgtum  liʼakxilhtit, revista Watch Tower xla agosto kata 1879 wilika xtukuwani Dios, chu nachuna klibro Songs of the Bride (Takilhtlin xla Litatawilat), nema na taxtulh uma kata. Maski chuna, Jehová nina xmasta talakaskin pi xkachikin xlinkgolh xtukuwani, wi tuku tlawalh xlakata xmakgatsikgolh tuku xtalakaskin xlakata xkgalhikgolh uma lanka talakgalhaman. ¿La kamakgtayalh Jehová umakgolh xapulana xLikgalhtawakgananin Biblia xlakata xlinkgolh xtukuwani?

8 Akxni naʼakxilhaw tuku lalh akxni ksputma siglo XIX chu xtsukuma siglo XX, naʼakxilhaw pi Jehová tlakg kamakgatekgsnilh tuku xaxlikana xlakata xtukuwani. Kaʼakxilhwi pulaktutu.

9, 10. 1) ¿Tuku xlakata xapulana artículos xla revista Watch Tower tlakg xlichuwinan Jesús? 2) ¿Tuku talakgpalilh lata kata 1919, chu tuku kitaxtulh? (Na kaʼakxilhti recuadro « La malankinit xtukuwani Dios Makatsinina».)

9 Pulana, xlakskujnin Jehová tiku ni xmakgxtakgkgo katsikgolh la xlilakaskinka xwanit xtukuwani Dios. Wa xLikgalhtawakgananin Biblia xlakpuwankgo pi talakgmaxtut wa tuku tlakg xlakaskinka xlichuwinan Biblia. Uma likatsiyaw tuku xlakata revista Watch Tower tlakg xlichuwinan Jesús. Akgtum liʼakxilhtit, xapulana kata akxni taxtulh, revista makgkaw tlakg lichuwinalh Jesús nixawa xtukuwani Jehová. La Atalaya 15 xla agosto kata 1976 wa pi «malakatsalikgolh la xlilakaskinka xʼakxilhkgo» Jesús. Pero, chuna la titaxtutilhalh kilhtamaku Jehová kamakgtayalh xlakata naʼakgatekgstilhakgo pi Biblia lu xlakaskinka akxilha xtukuwani Dios. ¿Tuku tlawakgolh xLikgalhtawakgananin Biblia? Watiya ama artículo xla La Atalaya wa pi lata kkata 1919 «tsukukgolh tlakg xlakaskinka akxilhkgo xTlat Mesías, Jehová Dios tiku wi kʼakgapun». Chu lata kata 1919 asta 1929, revista Watch Tower limaklakaskilh xtukuwani Dios liwaka 6,500.

10 Akxni akxilhkgolh xtukuwani Jehová chuna la xlilat, kinatalankan limasiyakgolh pi xpaxkikgo xtukuwani Dios. Chuna la Moisés, lakkaxwilikgolh “nalichuwinankgo kxtukuwani Jehová” (Deut. 32:3; Sal. 34:3). Wa xlakata, chuna la xtalichuwinanit kBiblia, Jehová akxilhli pi lu xpaxkikgo xtukuwani chu kasikulunatlawalh (Sal. 119:132; Heb. 6:10).

11, 12. 1) ¿La talakgpalikgolh kilikgalhtawakgakan akxni xtitaxtunita kata 1919? 2) ¿Tuku tlawalh Jehová pi tlakg xlakaskinka xʼakxilhkgolh xlakskujni chu tuku xlakata?

11 Xlipulaktiy, xaxlikana kstalaninanin Cristo liwana katsikgolh tukuya taskujut xkalakgayawanit Dios. Akxni aku xtitaxtunit kata 1919, natalan tiku kalaksakkanit xlakata naʼankgo kʼakgapun chu xpulalinkgo xkachikin Dios, espíritu santo kamakgtayalh nalakputsananikgo tuku xwanit Isaías. Akxni xʼakxilhkgonita, kilikgalhtawakgakan talakgpalilh tuku xmasiya. ¿Tuku xlakata uma tuku talakgpalilh litaxtulh “taway kxkilhtamaku”? (Mat. 24:45.)

12 Akxni nina xchan kata 1919, revista Watch Tower nikxni liwana xlichuwinanit tuku wan Isaías: «Wixin kintatayananin, wa tuku wan Jehová, kilakskujni nema klaksaknit» (kalikgalhtawakga Isaías 43:10-12). Pero akxni xtitaxtunita  kata 1919, kilikgalhtawakgakan tlakg tsukukgolh lichuwinankgo uma texto, chu kawanilh putum tiku xkalaksakkanit pi xmakgtayanankgolh ktaskujut nema Jehová xkamaxkinit: xtatayananin xwankgolh chu xlichuwinankgolh. Lata kata 1925 asta 1931, talichuwinalh k57 tanu tanu revistas xla Watch Tower capítulo 43 xla Isaías, chu akgatunu número xwan pi tuku wan Isaías xkakilhchanima xaxlikana kstalaninanin Cristo. Liwana litasiya pi ama kata Jehová xkapulalima xlakskujnin natlawakgo taskujut nema xlitlawatkan. ¿Tuku xlakata? Tlan nawanaw pi xlakata pulana «naliukxilhkgokan» tlan natlawakgo xtaskujutkan (1 Tim. 3:10). Akxni nina xlinkgo xtukuwani Dios, xLikgalhtawakgananin Biblia xlimasiyanitkan Jehová pi xlikana xtatayananin xwankgonit (Luc. 24:47, 48).

13. ¿La limasiya xTachuwin Dios tuku tlakg xlakaskinka xlitalakkaxtlawat?

13 Xlipulaktutu, xkachikin Jehová akgatekgsli la xlilakaskinka nasantujtlawakgo xtukuwani Dios. Akxni xtitaxtuma década xla 1920 akgatekgskgolh pi natasantujtlawa xtukuwani Dios wa tuku tlakg xlakaskinka nema xlitalakkaxtlawat. ¿La xmasiya xTachuwin Dios uma tuku xaxlikana? Kalichuwinaw akgtiy liʼakxilhtit. Pulana, ¿tuku xlakata Dios kalakgmaxtulh israelitas kʼEgipto? Jehová wa: «Xlakata kintukuwani natalichuwinan xlikalanka katiyatni» (Éx. 9:16). Xlipulaktiy, ¿tuku xlakata kalakgalhamalh Jehová israelitas akxni ni kgalhakgaxmatkgolh? Jehová wampa: «Wi tuku ktlawalh xlakata kintukuwani ni lixkajni xlichuwinanka kxlakatin kachikinin» (Ezeq. 20:8-10). ¿Tuku katsinikgolh xLikgalhtawakgananin Biblia xlakata uma texto chu atanu?

14. 1) Akxni xtitaxtumaja década xla 1920, ¿tuku akgatekgskgolh xkachikin Dios? 2) ¿La kamakgtayalh xLikgalhtawakgananin Biblia tuku akgatekgskgolh xlakata xlichuwinankgolh Dios? (Na kaʼakxilhti recuadro « Pulaktum tuku xlakata lu xlakaskinka natalichuwinan Dios».)

14 Akxni xtitaxtuma década xla 1920, xkachikin akgatekgsli tuku xkilhchani tuku xwanit Isaías liwakaya 2,700 kata. Wa uma tuku wa xlakata Jehová: «Chuna kapulalipi minkachikin xlakata wix xkgalhi akgtum stlan tukuwani» (Is. 63:14). Xlikgalhtawakgananin Biblia akgatekgskgolh pi tuku tlakg xlakaskinka wa natasantujtlawa xtukuwani Dios, chu ni xlakgtaxtutkan (Is. 37:20; Ezeq. 38:23). Libro Profecía (taxtulh xaʼinglés kkata 1929, chu xaʼespañol kata 1932) chuna lichuwinalh uma tuku xaxlikana: «Xtukuwani Jehová wa [...] tuku tlakg xlakaskinka xliputum tuku tatlawanit». Uma tuku talakgpalilh xlakata tuku xtaʼakgatekgsa kamakgtayalh xlakskujnin Dios xlakata xlichuwinankgolh Jehová chu xmaskulunkikgolh xtukuwani xlakata nitlan xlichuwinankan.

15. 1) ¿Tuku tlakg liwana akgatekgskgolh kinatalankan akxni xtsukuma década 1930? 2) ¿Chu tuku kilhtamaku xchaʼanita?

15 Akxni xtsukuma década 1930, kinatalankan tlakg liwana xkatsikgo la xlilakaskinka xtukuwani Dios, tuku taskujut xkalakgayawanit chu tuku taʼakglhuwit xlitalakkaxtlawat. Xchanita kilhtamaku xlakata Jehová xkamaxkilh xlakskujnin lanka talakgalhaman, pi xlinkgolh xtukuwani. Xlakata nakatsiyaw la chuna lalh kaʼakxilhwi tuku lalh makgasa.

 Jehová laksaka kachikin tiku «naliyankgoy xtukuwini»

16. 1) ¿La malankinit Jehová xtukuwani? 2) ¿Tiku xapulana kachikin linkgolh xtukuwani Jehová?

16 Pulaktum tuku Jehová limalankinit xtukuwani wa pi kgalhi akgtum kachikin kKatiyatni nema lin xtukuwani. Lata kata 1513 akxni nina xmin Jesús, kachikin Israel tsukulh litaxtu xkachikin Jehová (Is. 43:12). Pero ni makgantaxtikgolh tuku talakkaxlakgolh Dios, chu kata 33 akxni xminita Jesús, nialh tlan talalinkgolh. Ni lhuwa kilhtamaku titaxtulh, Jehová «ukxilhlakachanikgolh xakgmakgat chixkuwin lakimpi wa yama ntachixkuwitat, na wa naliyankgoy xtukuwini» (Hech. 15:14). Uma kachikin tiku aku xlaksakkanit litaxtulh «xIsrael Dios» nema anta makgtanukgo kstalaninanin Cristo tiku kalaksakkanit naʼankgo kʼakgapun chu xalak tanu tanu kachikinin (Gál. 6:16).

17. ¿Tuku lakkaxwililh Satanás nema tlan kitaxtunilh?

 17 Akxni xchama kata 44 akxni xminita Jesús, kstalaninanin «xlakata xtalakgalhaman Dios kalimapakuwika kstalaninanin Cristo» (Hech. 11:26). Xapulana, wa tukuwani nema xkalilakgapaskan, xlakata kaj xkilhchani xaxlikana kstalaninanin Cristo (1 Ped. 4:16). Pero, chuna la lichuwinan xparábola Jesús xlakata trigo chu nixatlan tuwan, Satanás tlawalh pi tachuwin kstalaninanin Cristo na xkakilhchanilh nixaxlikana kstalaninanin. Wa xlakata akglhuwa siglo ni takatsilh tiku xaxlikana chu nixaxlikana kstalaninanin Cristo. Pero uma tsukulh talakgpali kkata 1914 akxni tsukuka “makikan lananat”. ¿Tuku xlakata? Xlakata ángeles tsukukgolh kamapitsikgo tiku xaxlikana chu tiku nixaxlikana kstalaninanin Cristo (Mat. 13:30, 39-41).

18. ¿Tuku kamakgtayalh kinatalankan nakatsikgo pi xmaklakaskinkgo atanu tukuwani?

18 Akxni skujni xalipaw chu xaskgalala laksakka kkata 1919, Jehová kamakgtayalh xkachikin naʼakgatekgskgo taskujut nema xkalakgayawakanit. Lakapala akxilhkgolh pi xlakata xʼankgo lichuwinankgo Dios akgatunu chiki xlimasiya pi ni xtachuna xwankgonit nixaxlikana kstalaninanin Cristo. Akxni katsikgolh uma, akgatekgskgolh pi tukuwani xLikgalhtawakgananin Biblia ni lu tlan tukuwani xwanit. Tuku tlakg xlakaskinka kxlatamat ni kaj wa xlikgalhtawakgakgolh Biblia, wata xlichuwinankgolh Dios chu xmaxkikgolh kakni xtukuwani. Wa xlakata, ¿tuku tukuwani xkamininilh xlakata taskujut nema xtlawamakgolh? Uma takgalhskinin takgalhtilh kkata 1931.

Programa xla lanka tamakxtumit kkata 1931

19, 20. 1) ¿Tuku lu tlan lakkaxwilika kʼakgtum lanka tamakxtumit kkata 1931? 2) ¿Tuku tlawakgolh kinatalankan akxni kawanika xasasti xtukuwanikan?

19 Julio kata 1931, max akgkukitsis mil xLikgalhtawakgananin Biblia chankgolh kColumbus (Ohio, Estados Unidos), kʼakgtum lanka tamakxtumit. Akxni akxilhkgolh pi programa xlimin laklanka letras J chu W chu xkakgalhskinkan, tuku wamputun uma akgtiy letras. Alistalh, domingo 26 xla julio tala Joseph Rutherford lakkaxwilikgolh tuku xʼamakgolh tlawakgo, wa uma: «Lakaskinaw pi kakinkalilakgapaskan chu kakinkawanikan [...] xtatayananin Jehová». Akxni chuna wanka putum tiku xʼankgonit akgatekgskgolh pi uma letras xaʼinglés xkilhchanima “xtatayananin Jehová” (Jehovahʼs Witnesses). Tukuwani nema takilhtinit kʼIsaías 43:10.

20 Tiku anta xwilakgolh pixlanka makgapakgxnankgolh chu takgaxmatli kradio xlikalanka katiyatni. Ernest chu Naomi Barber, tiku xwilakgolh kʼAustralia wankgolh: «Akxni tsukuka makgapakgxnankan kʼEstados Unidos, natalan xalak Melbourne, lakapala ktayaw chu na ktsukuw makgapakgxnanaw. ¡Putum kilhtamaku naklakapastakaw!». *

Tamalanki xtukuwani Dios xlikalanka katiyatni

21. ¿La makgtayanalh natalichuwinan Dios uma xasasti tukuwani?

21 Xlakata xkgalhikgo tukuwani xtatayananin Jehová nema takilhtinit kBiblia tlawalh pi xlakskujnin Dios tlakg  xlichuwinankgolh. Edward chu Jessie Grimes, akgtum tamakgaxtokgat xalak Estados Unidos tiku precursores xwankgonit chu ankgolh ktamakxtumit kkata 1931 kColumbus, wankgolh: «Akxni ktaxtuw kkinchikkan xkinkawanikanan xLikgalhtawakgananin Biblia, pero akxni kkitaspitwi xkinkawanikanan xtatayananin Jehová. Lu xaklipaxuwayaw pi xakkgalhiyaw uma tukuwani nema xʼama kinkamakgtayayan nakmalankiyaw kiDioskan». Akxni xtitaxtunita uma tamakxtumit makgapitsi xTatayananin Jehová tanu tuku limaklakaskinkgolh xlakata nalichuwinankgo Dios. Akxni xʼankgo akgatunu chiki xkamaxkikgo maktum tarjeta niku xwan: «Akit xtatayana JEHOVÁ chu klichuwinan xTamapakgsin JEHOVÁ, kiDioskan». Xlikana, xkachikin Jehová lu xlipaxuwa xlakata xlin xtukuwani, chu lu xlichuwinamputunkgo xlikalanka katiyatni la xlilakaskinka xtukuwani (Is. 12:4).

«Akxni ktaxtuw kkinchikkan xkinkawanikanan xLikgalhtawakgananin Biblia, pero akxni kkitaspitwi xkinkawanikanan xtatayananin Jehová»

22. ¿Tuku xlakata wanaw pi xkachikin Jehová niti matsekgnit?

22 Titaxtukgonita lhuwa kata lata akxni Jehová tlawalh pi kinatalankan tiku kalaksakkanit naʼankgo kʼakgapun nakalilakgapaskan uma tukuwani. Pero ¿tlawalh Satanás pi ni xlakgapaska xkachikin Dios? ¡Nila chuna tlawanit! Wata tlakg talakgapasmaw la xtatayananin Dios (kalikgalhtawakga Miqueas 4:5 chu Malaquías 3:18). Lu limaklakaskinaw xtukuwani Dios wa xlakata tiku limaklakaskin la uku wankan pi xtatayana Jehová. Xaxlikana takanajla «liwana [...]ya kxakgspun kasipijni», chu nitu matsekgkgonit laklanka sipi xla nixaxlikana takanajla (Is. 2:2). La uku Jehová malankinit xtukuwani chu xasanto xlikalanka kakilhtamaku.

23. Chuna la wan Salmo 121:5, ¿tuku xaxlikana xlakata Jehová kinkamatliwakglhan?

23 ¡Lu tlan limakgkatsiyaw xlakata katsiyaw pi Jehová nakinkamakgtayayan akxni Satanás nakinkatlawaniputunan tuku nitlan la uku chu kilhtamaku nema aku mima! (Sal. 121:5.) Wa xlakata wanaw la salmista: «Lipaxaw lamaka nak pulataman, latani tachixkuwit ixDioskan [...] wanikan Jehová. [...] tachixkuwit nima Dios kalaksaknit xlakata ixla natawan» (Sal. 33:12).

^ párr. 20 Xlakata tlakg nakatsiya la xlimaklakaskinkan radio, kaʼakxilhti capítulo 7, páginas 72 asta 74.