Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Mapakgsinamaja xTamapakgsin Dios

 CAPÍTULO 3

Jehová masiya tuku lakapastaknit natlawa

Jehová masiya tuku lakapastaknit natlawa

TUKU NALICHUWINAN UMA CAPÍTULO

Jehová masta talakaskin nakatsitilhakan tuku lakapastaknit natlawa, pero kajwatiya tiku pekuanikgo

1, 2. ¿La masiyatilhanit Jehová tuku lakapastaknit natlawa xpalakata latamanin?

XAPAXKINANIN natlatni kawanikgo xkamanan tuku titaxtuma familia. Pero nila putum kawanikgo. Kaj kawanikgo tuku lakpuwankgo pi naʼakgatekgskgo.

2 Jehová na tsinu tsinu kinkawanitilhanitan tuku lakapastaknit natlawa. Chuna tlawa akxni akxilha pi xkilhtamaku. Kaʼakxilhwi la Jehová masiyanit tuku xaxlikana xlakata Tamapakgsin chuna la titaxtunit kilhtamaku.

¿Tuku xlakata maklakaskinaw Tamapakgsin?

3, 4. ¿Xlakkaxwilinita Jehová tuku xʼama kaʼakgspula latamanin? Kawanti tuku xlakata chuna wana.

3 Xapulana, xTamapakgsin Mesías ni wa tuku xlakpuwanit natlawa Jehová. ¿Tuku xlakata? Xlakata Jehová ni lakkaxwililh tuku xʼama kaʼakgspula latamanin, katlawalh xlakata tlan xakstukan xlaksakkgolh tuku natlawakgo. Wa xlakata kawanilh Adán chu Eva tuku xlakaskin xlakata latamanin: «Kakgalhitit kamanan chu kalhuwantit chu kamalakgatsamatit katiyatni chu kakuentajtlawatit» (Gén. 1:28). Jehová xlakaskin pi xkgalhakgaxmatkgolh xlimapakgsin xlakata tuku tlan chu tuku nitlan (Gén. 2:16, 17). Adán chu Eva tlan xtilaksakkgolh ni namakgxtakgkgo Dios. Komo xlakan chu xkamanan chuna xtitlawakgolh ni xmaklakaskiw xTamapakgsin Cristo xlakata xkgantaxtulh tuku Dios lakapastaknit natlawa. La uku, kKatiyatni xlatamakgolh tiku ni kgalhikgo talakgalhin chu xkakninanikgolh Jehová.

4 Maski Satanás, Adán chu Eva ni kgalhakgaxmatkgolh, Jehová ni lakgmakgalh tuku xlakapastaknit, pi nalimatsama Katiyatni latamanin tiku ni kgalhikgo talakgalhin. Wata atanu tuku lakkaxwililh xlakata chuntiya xmakgantaxtilh tuku xlakpuwanit. Tuku lakapastaknit natlawa Jehová ni xtachuna la akgtum tren nema talakaskin kaj kgantum tiji natiya xlakata nachan niku amputun pero wi tiku tlan nalakxtlawa xtiji chu nialhla nachan. Akxni Jehová wan tuku lakapastaknit natlawa, ni anan litliwakga kkakilhtamaku nema natlawa pi nila namakgantaxti (kalikgalhtawakga Isaías 55:11). Komo wi tuku nitlan machokgoputun, Jehová atanu tuku maklakaskin  (Éx. 3:14, 15). * Akxni tlan akxilha, kawani kskujnin tiku ni makgxtakgkgo tuku xasasti nalimaklakaskin xlakata namakgantaxti tuku lakapastaknit natlawa.

5. ¿Tuku tlawalh Jehová akxni ni kgalhakgaxmatka kʼEdén?

5 Xlakata ni kgalhakgaxmatnika kjardín xaʼEdén, Jehová lakkaxwililh pi xʼama wili akgtum Tamapakgsin (Mat. 25:34). Akxni xtasiya pi nialhla tuku xkalakgmaxtulh latamanin, Jehová makatsininalh tuku xʼama maklakaskin xlakata xkalakgmaxtulh chu xlakxtlawalh tuku nitlan makilhtsukilh Satanás akxni xmakglhtiputun xtamapakgsin (Gén. 3:14-19). Pero Jehová ni kaj makgtum putum lichuwinalh la xʼama wan uma Tamapakgsin.

Jehová tsukulh lichuwinan xlakata Tamapakgsin

6. ¿Tuku wa Jehová pi natlawa, pero tuku ni wa?

6 Xapulana tuku Jehová lichuwinalh pi xʼama la, wa pi “kam” xʼama akxkiti luwa (kalikgalhtawakga Génesis 3:15). Pero ni wanka tiku xwanit uma kam chu xkam luwa. Chu liwaka akgtiy mil kata titaxtulh Jehová nitu lichuwinalh xlakata uma. *

7. ¿Tuku xlakata laksakka Abrahán chu tuku kinkamasiyaniyan?

7 Titaxtulh kilhtamaku, Jehová laksakli Abrahán xlakata kxfamilia xchilh uma kam nema xwankanit pi namin. Laksakka Abrahán xlakata kgalhakgaxmatli xtachuwin Jehová (Gén. 22:18). Wi tuku lu xlakaskinka kinkamasiyaniyan uma: Jehová kajwatiya kamasiyani tuku lakapastaknit natlawa tiku pekuanikgo (kalikgalhtawakga Salmo 25:14).

8, 9. ¿Tuku wanilh Jehová Abrahán chu Jacob xlakata kam nema xwankanit pi namin?

8 Jehová xlimakgtumku wa tuku lu xlakaskinka xlakata kam nema xwanit pi xʼama min, akxni limaklakaskilh chatum ángel xlakata xtachuwinalh xʼamigo, Abrahán: kam chatum chixku xʼama wan (Gén. 22:15-17; Sant. 2:23). ¿La xʼama akxkiti uma chixku luwa? ¿Tiku xlitaxtu luwa? Uma takgalhskinin xʼama takgalhti alistalh, xlakata atanu tuku xʼamaka masiyakan.

9 Jehová wa pi uma kam nema xwankanit pi xʼama lakachin kxtanat Abrahán, Jacob, tiku limasiyalh pi lu xkanajlani Dios (Gén. 28:13-22). Xpalakata Jacob, Jehová limasiyalh pi uma xkgawasa, Judá, xʼama wan. Jacob wa pi uma xkam Judá xʼama makgamakglhtinan «lixtokgo» nema xlimasiyalh pi kgalhi limapakgsin, chu pi xla lakgchan nakgalhakgaxmatnikgo kachikinin (Gén. 49:1, 10). Uma tuku wa, Jehová limasiyalh pi uma kam mapakgsina xʼama wan.

10, 11. ¿Tuku xlakata Jehová kawanilh David chu Daniel tuku xlakapastaknit natlawa?

10 Titaxtukgolh akgchaxan ciento tipuxamakaw kata akxni nialh xlama Judá, Jehová tlakg wanilh tuku xʼama tlawa mapakgsina David tiku xfamilia Judá xwanit. Jehová wa pi David la chatum «nchixku nti lu[...] matlaniy [x]naku» (1 Sam. 13:14; 17:12; Hech. 13:22). Xlakata David xkgalhini tlan tapekua Dios, tatlawalh akgtum talakkaxlan, wanilh pi chatum xkgawasa xʼama mapakgsinan xliputum kilhtamaku (2 Sam. 7:8, 12-16).

 11 Max akgkitsis ciento kata alistalh, Jehová limaklakaskilh palakachuwina Daniel xlakata xwa tukuya kata uma tiku xLaksakkanit, o Mesías, xʼama chin (Dan. 9:25, nota). Jehová xliʼakxilha Daniel la chatum «tiku lu lipaxkiputu». ¿Tuku xlakata? Xlakata lu xmaxki kakni Jehová chu putum kilhtamaku skujnilh (Dan. 6:16; 9:22, 23).

12. ¿Tuku wanika Daniel pi xtlawalh, chu tuku xlakata?

12 Maski Jehová limaklakaskilh palakachuwinanin la Daniel xlakata pulaklhuwa tuku xlichuwinankgolh kam nema xwankanit pi namin, o Mesías, nina xchan kilhtamaku xlakskujnin liwana xʼakgatekgskgolh tuku xmatsokgninanit Dios. Akgtum liʼakxilhtit, akxni Daniel xmaʼakxilhkanit la xʼama tawila xTamapakgsin Dios, wanika pi xmalakchuwalh uma tatsokgni asta akxni Jehová xlakkaxwilinit. Uma kilhtamaku nema aku xʼama min, “xaxlikana takatsin tlakg xʼama talhuwi” (Dan. 12:4).

Jehová limaklakaskilh xpalakachuwinanin tiku ni xmakgxtakgkgo la Daniel xlakata xtsokgwilikgolh xlakata xTamapakgsin Mesías

Jesús masiya tuku Dios lakapastaknit natlawa

13. 1) ¿Tiku xwanit Kam nema xwankanit pi namin? 2) ¿Tuku wa Jesús xlakata tuku wanka kʼGénesis 3:15?

13 Jehová liwana limasiyalh pi Jesús wa kam nema xwankanit pi namin, xkam David nema Mapakgsina xʼama litaxtu (Luc. 1:30-33; 3:21, 22). Akxni Jesús tsukulh lichuwinan Dios, kitaxtulh la kxkgakganat Chichini xkamaʼakxilhnilh latamanin xlakata tuku xlakapastaknit Dios natlawa (Mat. 4:13-17). Akgtum liʼakxilhtit, liwana masiyalh tiku xlitaxtu «luwa» nema talichuwinan kʼGénesis 3:14, 15, chu limapakuwilh pi Akgskgawini «makgnina» chu «xmakilhtsukina taʼakgsanin» (Juan 8:44TNM). Tuku maʼakxilhnika Juan, anta Jesús wa pi «xamakgan luwa» «nti wanikan Akgskgawini, xawa Satanás» (kalikgalhtawakga Apocalipsis 1:1 chu 12:9). * Kʼuma tuku maʼakxilhnika Juan, Jesús, kam tiku xwankanit pi namin, masiyalh la xʼama makgantaxti tuku xwankanit kʼEdén chu xmasputulh Satanás (Apoc. 20:7-10).

14-16. ¿Liwana xʼakgatekgskgo putum tuku xaxlikana nema xkawani Jesús kstalaninanin kxapulana siglo? Kawanti tuku xlakata chuna wana.

14 Chuna la akxilhwi kcapítulo 1 xla uma libro, Jesús lhuwa lichuwinalh xlakata Tamapakgsin. Pero ni lichuwinalh putum tuku kstalaninanin xkatsiputunkgo. Asta akxni tlakg lhuwa tuku kawanilh, kstalaninanin ni akgatekgskgolh tuku kawanilh asta akxni xtitaxtunita lhuwa kilhtamaku o akglhuwa siglo. Kaʼakxilhwi makgapitsi liʼakxilhtit.

15 Kkata 33 xla kinkilhtamakujkan, Jesús wa pi tiku xʼamakgolh tamapakgsinankgo kxTamapakgsin Dios xʼamaka katiyakan kKatiyatni chu xʼamakgolh lakastakwanankgo la espíritus kʼakgapun. Pero kstalaninanin ni tunkun akgatekgskgolh tuku kawanilh (Dan. 7:18; Juan 14:2-5). Watiya uma kata, Jesús limaklakaskilh makgapitsi liʼakxilhtit xlakata xkatsikgolh pi Tamapakgsin xʼama tawila akxni xtaspitpa kʼakgapun chu xʼama titaxtu lhuwa kilhtamaku (Mat. 25:14, 19; Luc. 19:11, 12). Kstalaninanin ni akgatekgskgolh uma tuku  lu xlakaskinka chu alistalh akxni Jesús lakastakwanalh kgalhskinkgolh: «¿[...]Wa yuma nkilhtamaku nakaxtlawapalaya xtapakgsin Israel?». Pero nialh tlakg kawanilh xlakata tamapakgsin (Hech. 1:6, 7). Na masiyalh pi xʼamakgolh tawilakgolh «makgapitsin tanu [...]borrego», tiku ni xmakgtapakgsikgolh «ni xalhuwa borregos» nema natamapakgsinankgo Jesús (Juan 10:16, Hua Xasasti Talaccaxlan, 1999; Luc. 12:32TNM). Kstalaninanin Cristo ni liwana akgatekgskgolh tiku xkilhchanima uma pulaktiy grupo asta akxni xtitaxtunit kilhtamaku akxni Tamapakgsin tawilalh kkata 1914.

16 Jesús tlan lhuwa tuku xtikawanilh kstalaninanin akxni xkatawi kKatiyatni, pero xkatsi pi nila xʼakgatekgskgolh (Juan 16:12). Xlikana, lhuwa talichuwinalh xlakata xTamapakgsin Dios kxapulana siglo. Pero nina xchanit xkilhtamaku akxni xtalhuwilh takatsin.

Xaxlikana takatsin talhuwi «[k]xaʼawatiya kilhtamaku»

17. ¿Tuku kilitlawatkan xlakata naʼakgatekgsaw xaxlikana xlakata Tamapakgsin, pero tuku atanu na talakaskin?

17 Jehová wanilh Daniel pi «[k]xaʼawatiya kilhtamaku» lhuwa xʼamakgolh lakputsananankgo chu «xaxlikana takatsin» xlakata tuku lakapastaknit natlawa Dios xʼama talhuwi (Dan. 12:4). Komo katsiputunaw uma, kiliskujatkan. Maktum likgalhtawakga wan pi tachuwin xahebreo “putsanankan” kilhchanima la tiku lu liwana lakputsanani maktum libro. Pero maski lhuwa chu liwana nalakputsaniyaw Biblia, komo Jehová ni nakinkamaxkiyan talakaskin nila liwana katiʼakgatekgswi tuku xaxlikana xlakata Tamapakgsin (kalikgalhtawakga Mateo 13:11).

18. ¿La limasiyakgonit takanajla chu tataktujut tiku pekuanikgo Jehová?

18 Chuna la Jehová tsinu tsinu masiyatilhalh tuku xaxlikana xlakata Tamapakgsin asta akxni chalh kata 1914, chuntiyaku tlawama kʼuma xaʼawatiya kilhtamaku. Chuna la naʼakxilhaw  kcapítulo 4 chu 5 xla uma libro, xkachikin Dios makglhuwa lakgpalikgonit tuku xʼakgatekgskgo umakgolh 100 kata nema titaxtulh. ¿Wamputun uma pi Jehová ni kamakgtaya? ¡Nichuna! Jehová kamakgtaya. ¿Tuku xlakata chuna wanaw? Xlakata tiku pekuanikgo Jehová limasiyakgolh pulaktiy xatlan tayat nema xlakaskinka akxilha: takanajla chu tataktujut (Heb. 11:6; Sant. 4:6). Xlakskujnin Jehová kanajlakgo pi putum tuku wan xTachuwin Dios nakgantaxtu. Na limasiyakgo pi taktujukgo akxni wankgo pi ni liwana xʼakgatekgskgonit la xʼama kgantaxtu tuku Dios xwanit. Uma xataktujun talakapastakni litasiya tuku wa revista Watch Tower 1 xla marzo kata 1925: «Katsiyaw pi Malana wa tiku makgatekgsninan, chu wa nakawani xkachikin tuku wamputun xTachuwin chuna la xla nalakaskin chu akxni lakgchan kilhtamaku».

«Malana [...] makgatekgsninan, chu wa nakawani xkachikin tuku wamputun xTachuwin chuna la xla nalakaskin chu akxni lakgchan kilhtamaku»

19. ¿Tuku kinkamaxkinitan talakaskin Jehová naʼakgatekgsaw, chu tuku xlakata?

19 Kkata 1914, akxni wilika Tamapakgsin, xkachikin Dios kaj tsinu xkatsikgo la xʼama kgantaxtu tuku xwankanit xlakata Tamapakgsin (1 Cor. 13:9, 10, 12). Xlakata lu akxilhputunaw pi kakgantaxtulha tuku wan Dios pi natlawa, min kilhtamaku lakpuwanaw pi wi tuku nala nema nichuna kgantaxtu. Chuna la titaxtunit kilhtamaku, akxilhnitaw pi xlikana atanu tuku wa revista Watch Tower nema akxilhwi kpárrafo 18. Uma artículo na xwan: «Wa uma tuku tlan natlawayaw, pi nila akgatekgsaw tuku wankanit pi nala asta akxni kgantaxtu o tsukumaja kgantaxtu». La uku, xlakata tlakg talakatsuwinit xlisputni kakilhtamaku, lhuwa tuku xlichuwinankanit xlakata Tamapakgsin kgantaxtunita chu chuntiya kgantaxtuma. Xlakata xkachikin Dios taktuju chu masta talakaskin liwana namasiyanikan, Jehová mastanit talakaskin pi tuku akgatekgsaw xlakata tuku lakapastaknit natlawa tlakg xatakgatsin nawan. ¡Xaxlikana takatsin lu talhuwinit!

 Tuku talakgpali xlakata tuku xʼakgatekgsaw taliʼakxilha xkachikin Dios

20, 21. ¿Tuku kaʼakgspulalh kstalaninanin Cristo kxapulana siglo xlakata tuku liwana kamakgatekgsnika?

20 Akxni Jehová tlakg liwana kinkamakgatekgsniyan tuku xaxlikana, liʼakxilhkan la wi kinakujkan. ¿Nakinkamakgtayayan kintakanajlakan chu xlakata taktujuyaw namakglhtinanaw xasasti tuku natalakgpali? Kstalaninanin Cristo tiku latamakgolh kxapulana siglo chuna kaliʼakxilhka. Akgtum liʼakxilhtit, kalakpuwaw pi wix chatum kstalanina Cristo judío chu lapat ama kilhtamaku. Wix kgalhakgaxmata xlimapakgsin Moisés chu lu xlakaskinka akxilha tuku xalak minkachikin. Pero la uku makglhtinana makgapitsin cartas nema Dios matsokgnilh apóstol Pablo niku wan pi xLimapakgsin Moisés nialh talakaskin namakgantaxtikan chu pi Jehová kalakgmakganita Israel. La uku lakapastaknit namamakxtumi akgtum Israel xaʼespiritual niku xtapakgsikgolh judíos chu tiku ni judíos (Rom. 10:12; 11:17-24; Gál. 6:15, 16; Col. 2:13, 14). ¿Tuku xtitlawa?

21 Kstalaninanin Cristo tiku xtaktujukgo makglhtinankgolh uma tuku Pablo kawanilh chu Jehová kasikulunatlawalh (Hech. 13:48). Amakgapitsin ni makglhtinamputunkgolh uma tuku talakgpalilh chu tlawaputunkgolh tuku xlakan xtlawaputunkgo (Gál. 5:7-12). Komo ni xlakgpalikgolh la xlakapastakkgo, nila xtamapakgsinankgolh Cristo (2 Ped. 2:1).

22. ¿La makgkatsiya akxni tlakg liwana kinkamakgatekgsnikanan tuku xasasti?

22 Nina akglhuwa kata, Jehová tlakg liwana kinkamakgatekgsniman xlakata Tamapakgsin. Akgtum liʼakxilhtit, kinkamakgtayanitan tlakg liwana naʼakgatekgsaw tukuya kilhtamaku tanu nakawilikan tiku natapakgsinikgo xTamapakgsin Dios chu tiku ni kgaxmatputunkgo, chuna la kamapitsikan borregos chu cabras. Na kinkamasiyanikan tukuya kilhtamaku natakgatsi 144,000, tuku kilhchanima xliʼakxilhtit Jesús xlakata Tamapakgsin, chu tuku kilhtamaku nakamalakastakwanikan kʼakgapun xaʼawatiya tiku kalaksakkanit. * ¿Tuku lakpuwana wix xlakata xasasti tuku taʼakgatekgsma? ¿Matliwakglha mintakanajla? ¿Makgtayayan xlakata naʼakxilha pi Jehová chuntiya kamasiyanima xkachikin? Tuku lichuwinan uma libro namakgtayayan liwana nakatsiya pi Jehová tsinu tsinu kamasiyanima tiku pekuanikgo tuku lakapastaknit natlawa.

^ párr. 4 Xtukuwani Dios kxahebreo wamputun «akit naklitaxtu». Xtukuwani Jehová kilhchani pi Xla makgantaxti tuku wan. Kaʼakxilhti recuadro «Tuku wamputun xtukuwani Dios».

^ párr. 6 Maski la uku takgaxmata pi lhuwa kata, kililakapastakatkan pi tiku latamakgolh ama kilhtamaku tlakg lhuwa kata xlatamakgo. Kaj pulaktati generaciones latamakgolh lata akxni latamalh Adán asta Abrahán. Lamec (xtlat Noé) na latamalh akxni Adán xlamajku. Sem (xkgawasa Noé) latamalh akxni xlamajku Lamec chu Abrahán latamalh akxni xlamajku Sem (Gén. 5:5, 31; 9:29; 11:10, 11; 25:7).

^ párr. 13 Tukuwani Satanás, 18 wilikanit kTatsokgni xaHebreo, pero kTatsokgni xaGriego wilikanit liwaka 30. Anta kTatsokgni xaHebreo ni lu lichuwinanka Satanás, tlakg lichuwinanka tuku xlakaskinka, nakatsikan tiku Mesías. Akxni Mesías chilh, liwana masiyalh tiku xwanit Satanás, wa tuku tatsokgtawilanit kTatsokgni xaGriego.

^ párr. 22 Komo tlakg katsiputuna xlakata uma tuku tlakg liwana taʼakgatekgsli kaʼakxilhti revistas La Atalaya: 15 xla octubre kata 1995, páginas 23-28; 15 xla enero kata 2008, páginas 20-24; 15 xla julio kata 2008, páginas 17-21; 15 xla julio kata 2013, páginas 9-14.