Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 CAPÍTULO 14

Natatayayaw xtamapakgsin Dios chu ni namakgxtakgaw

Natatayayaw xtamapakgsin Dios chu ni namakgxtakgaw

TUKU NALICHUWINAN UMA CAPÍTULO

Xkachikin Dios ni makgtanu tuku xalak kakilhtamaku xlakata tatayakgo Tamapakgsin

1, 2. 1) ¿Tuku tastakyaw kamakgtayanit kstalaninanin Cristo la uku? 2) ¿La kinkamasputuputunkgoyan tiku ni kinkaʼakxilhputunkgoyan chu tuku kitaxtunit?

JESÚS ya kxlakatin Pilato, tiku tlakg kgalhi limapakgsin kJudá chu lichuwinan tuku asta la uku stalanikgo xaxlikana kstalaninanin. Xla wa: «Nkilimapakgsin [o Tamapakgsin], ni anta xala yunu nkatuxawat. Lapi anta kawa xala yuna nkatuxawat nkilimapakgsin, wa nkinchixkuwin xtalatlawanankgolh lakimpi ni xaktamakamastanikgolh judíos. Wa nchu ni anta xala yunu nkilimapakgsin» (Juan 18:36). Pilato mamakgnininalh Jesús pero tunkun malakastakwanika. Mapakgsinanin xalak Roma tiku xkgalhikgo lhuwa litliwakga nila kamasputukgolh kstalaninanin Cristo, xlakata malakgatumikgolh tamakatsin xla Tamapakgsin xlikalanka kakilhtamaku xala makgasa (Col. 1:23).

2 Lata wilika xTamapakgsin Dios kkata 1914, tamapakgsin nema tlakg lakgtliwakga kamasputuputunkgonit xkachikin Dios. Niti makgantaxtinit. Lhuwa tamapakgsin chu tiku katatapakgsikgo xafuerza tlawaputunkgo pi kamakgtanukgolh kxtaʼakglhuwitkan. Niti kinkamapitsinitan. Maski la uku, tiku tatayakgo xTamapakgsin Dios wilakgo kxlikalanka katiyatni, lu tlan katalalinaw kinatalankan xlikalanka katiyatni chu nipara tsinu makgtanuyaw kpolítica. Xlakata makxtum wilaw litasiya pi xTamapakgsin Dios mapakgsinama chu pi Mapakgsina Jesucristo chuntiya kapulalima, kamaskulunkima chu kakuentajtlawama tiku tapakgsinikgo. ¿La tlawanit? Akxni katsiyaw matliwakglha kintakanajlakan. Kaʼakxilhwi makgapitsi taʼakglhuwit niku Mapakgsina kinkamakgtayanitan natlajananaw xlakata ni tapakgsiyaw kkakilhtamaku (Juan 17:14).

Tuku tlakg xlakaskinka litaxtu

3, 4. 1) ¿Tuku lalh akxni aku xtawilanit Tamapakgsin? 2) ¿Xkachikin Dios putum kilhtamaku akgatekgsnit tuku kilhchanima ni makgtanukan kkakilhtamaku? Kawanti tuku xlakata chuna wana.

3 Akxni wilika Tamapakgsin, analh guerra kʼakgapun chu makaminka kKatiyatni Satanás (kalikgalhtawakga Apocalipsis 12:7-10, 12). Nachuna kKatiyatni analh guerra nema liʼakxilhli xkachikin Dios. Kstalaninanin liwana lakpuwankgonit nastalanikgo xliʼakxilhtit Jesús chu ni namakgtanukgo kkakilhtamaku.  Pero, xapulana ni lu xʼakgatekgskgo tuku xkilhchanima ni namakgtanukgo kpolítica.

4 Akgtum liʼakxilhtit, tomo VI xla libro Millennial Dawn (Xkilhtsukut akgtum Mil kata), * nema tlawaka 1904, kawanilh kstalaninanin Cristo pi ni xmakgtanukgolh kʼguerra. Pero xwan pi komo wi tiku xtasanika, xputsalh tuku xlakgayawaka niku ni xtalachipanalh. Komo ni xmaxkika talakaskin chu kkalakatin xmalakgachaka, kuenta xtlawalh xlakata niti xmakgnilh. Hebert Senior, tiku xlama kʼGran Bretaña chu tamunulh kata 1905, lichuwinalh tuku xlama uma kilhtamaku: «Natalan ni xkatsikgo tuku xtlawakgo chu ni niku xwan komo tlan natakaxkgo maski ni naʼankgo makgtlawakgo guerra».

5. ¿La lakgpalilh la xlakpuwanaw revista Watch Tower 1 xla septiembre kata 1915?

5 Pero, revista Watch Tower 1 xla septiembre kata 1915 tsukulh lakgpali tuku xaklakpuwanaw chu lichuwinalh xlakata tuku xwan libro Studies in the Scriptures (Takgalhtawakga xalak Biblia): «Max komo chuna natlawayaw xtachuna makgtlawamaw guerra». Pero ¿komo kstalanina Cristo xwanikan pi namakgnikan komo ni xwiliputulh uniforme chu ni xʼalh makgtlawa guerra? Artículo xwan: «¿Tuku tlakg nitlan: namakgnikana xlakata tatayaya xaPuxku tiku masputu Taʼakglhuwit chu nakgalhakgaxpata xlimapakgsin Dios, o naniya xlakata nakatatayaya mapakgsinanin xalak kakilhtamaku chu nalakatsalaya tuku masiyalh kiMapakgsinakan xalak akgapun? Wa xapulana tuku tlakg tlan xkinkalimakgnikan: tlakg tlan naniyaw xlakata ni makgatsankgananiyaw kiMapakgsinakan xalak akgapun». Maski lu lakatanks wa, artículo chuna limasputulh: «Ni wanaw chuna katlawatit, kaj akgtum tastakyaw».

6. ¿Tuku kinkamasiyaniyan xliʼakxilhtit tala Herbert Senior?

6 Makgapitsi natalan liwana xkatsikgo tuku natlawakgo maski nitlan tuku xkatlawanika. Herbert Senior, tiku lichuwinaw pulana, wa: «Xapulana akit xakakxilha pi watiya xwamputun namaktiya kbarco balas [ni makgtlawakan guerra] chu nakatamaknuniya likan xlakata nalimakgninana» (Luc. 16:10). Herbert tamaknuka kpulachin xlakata ni makgtanulh kʼguerra. Uma tala chu kgalhatati na anta xmakgtanumakgo «16 xalak Richmond», tiku xtalakapastaknikan ni xkamaxki talakaskin xmakgtanukgolh kʼguerra, na anta xmakgtanumakgo xla amakgapitsi takanajla, chu kRichmond (Gran Bretaña) lakgaxokgolh tuku xkalimalakgaxokgemaka. Milh kilhtamaku, Herbert chu amakgapitsi tsekg kamalakgachaka kxlakatin guerra anta kFrancia. Anta kawanika pi xʼamaka kamakgnikan. Herbert chu amakgapitsi xyakgo kxlakatin tiku xʼamakgo kamakgni pero ni kamakgnika wata katamaknuka akgkaw kata kpulachin.

«Kʼakgatekgsli pi xlakskujnin Dios ni nakatakgalhikgo taʼakglhuwit putum latamanin, maski naʼanan guerra.» Simon Kraker (Kaʼakxilhti párrafo 7)

7. ¿Tuku xʼakgatekgskgonit xkachikin Dios akxni tsukulh xliʼAkgtiy Guerra xLikalanka Katiyatni?

7 Akxni tsukulh xliʼAkgtiy Guerra xLikalanka Katiyatni, putum xkachikin Jehová liwana xʼakgatekgskgonit tuku  xwamputun ni makgtanukan kpolítica chu tuku xlitlawatkan xlakata xtlawakgolh la Jesús (Mat. 26:51-53; Juan 17:14-16; 1 Ped. 2:21). Akgtum liʼakxilhtit, La Atalaya xla marzo kata 1940 xlimin akgtum artículo nema xwanikan «Ni makgtanukan tuku xalak kakilhtamaku» xwan: «Limapakgsin nema nastalani kachikin nema [talakkaxlanit] Jehová, wa nipara tsinu namakgtanu kʼguerra nema tlawakgo kachikinin». Simon Kraker, tiku alistalh skujli niku pulalinkan xtaskujut Dios xlikalanka katiyatni, kBrooklyn (Nueva York, Estados Unidos), lichuwinalh xlakata artículo: «Kʼakgatekgsli pi xlakskujnin Dios ni nakatakgalhikgo taʼakglhuwit putum latamanin, maski naʼanan guerra». Uma likgalhtawakga lu xkilhtamaku chilh chu makgtayanalh xlakata xkachikin Dios xkatsikgolh tuku xtlawakgolh akxni xkaputsastalanika xlakata xtatayakgo Tamapakgsin.

La «nkgalhtuchokgoj» akxni kaputsastalanika

8, 9. ¿La kgantaxtulh tuku xlichuwinanit apóstol Juan?

8 Tuku lichuwinalh apóstol Juan, wa pi akxni xwilika xTamapakgsin Dios kata 1914, Satanás xkamasputuputulh tiku tatayakgo Tamapakgsin xtachuna xkilhtaxtulh kgalhtuchokgo (kalikgalhtawakga Apocalipsis 12:9, 15). * ¿La kgantaxtulh  tuku lichuwinalh? Akxni tsukulh década 1920 tsukuka kaputsastalanikan xkachikin Dios. Tala Kraker, chu lhuwa xtatayananin Jehová xalak Norteamérica akxni xlama xliʼAkgtiy Guerra xLikalanka Katiyatni, litamaknuka kpulachin xlakata ni makgxtakgli xTamapakgsin Dios. Akxni xlama guerra, tiku xkatamaknukanit kpulachin kʼEstados Unidos xlakata ni makgtanukgolh kʼguerra xlakata xtakanajlakan, tlakg lhuwa xtatayananin Jehová xwankgonit.

9 Akgskgawini chu xtatayananin xkamamakgxtakgaputunkgo tiku tatayakgo Tamapakgsin maski kaniwa niku xwilakgolh. Kalinka kpumapakgsin chu niku xlakkaxwilikan komo tlan tsinu nakamakgxtakgkan xalak África, Estados Unidos chu Europa. Xlakata nipara tsinu xmakgtanuputunkgo kkakilhtamaku, katamaknuka kpulachin, kasnokgka chu katlawanikan tuku nitlan. Anta kʼAlemania, xkachikin Dios kaliputsastalanika xlakata ni wamputunkgolh «Heil Hitler» chu ni makgtanukgolh kʼguerra. Max analh akgchaxan mil xtatayananin Jehová niku xkalakgachinukanit anta kʼAlemania, chu liwaka akgtum mil akgchaxan ciento alemanes chu xala amakgapitsi kachikinin kamakgnika. Maski chuna, Akgskgawini, ni putum kilhtamaku katlawanilh tuku nitlan xkachikin Dios (Mar. 8:34, 35).

«Ntiyat» kgotwa «nkgalhtuchokgoj»

10. ¿Tuku kilhchanima «ntiyat», chu la kamakgtayanit xkachikin Dios?

10 Tuku xwankanit pi nala nema tsokgwililh apóstol Juan wan pi «ntiyat», tiku tlakg liwana lakapastaknankgo kʼuma kakilhtamaku, xʼamakgo kgotwakgo «nkgalhtuchokgoj» nema kilhchanima taputsastalanit, chu chuna xkamakgtayakgolh xkachikin Dios. ¿La kgantaxtunit tuku xwankanit? Kata nema stalanikgolh akxni ksputnita xliʼAkgtiy Guerra xLikalanka Katiyatni, «ntiyat» makglhuwa kamakgtayakgonit tiku tatayakgo xTamapakgsin Jesús (kalikgalhtawakga Apocalipsis 12:16). Akgtum liʼakxilhtit, akglhuwa tribunales nema tlakg kgalhikgo limapakgsin kamakgtayakgonit xtatayananin Jehová akxni ni makgtanuputunkgo kʼguerra chu akxni ni makgtanukgo tuku limalankikan kachikin. Pulana kaʼakxilhwi tuku tlakg xlakaskinka nema Jehová kamakgtayalh xkachikin natlajanankgo xlakata ni xmakgtanuputunkgo kʼguerra (Sal. 68:20).

11, 12. ¿Tuku taʼakglhuwit titaxtukgolh natalan Sicurella chu Thlimmenos, chu la kitaxtulh?

11 Estados Unidos. Xnatlatni Anthony Sicurella xtatayananin Jehová xwankgonit. Tamunulh akxni xkgalhi 15 kata, chu akxni makgatsilh 21 kata tatsokgtawilalh xlakatin mapakgsinanin pi putum kilhtamaku skujnani Dios. Akxni titaxtulh akgtiy kata, 1950 amakgtum skimpa pi xmaxkika talakaskin ni namakgtanu kʼguerra xlakata xtalakapastakni. Maski FBI wa pi ni xtekgsnit tuku nitlan, Departamento de Justicia ni lakaskilh tuku kskima. Akxni makglhuwata xtalakkaxlakanit,  Tribunal Supremo xalak Estados Unidos akxilhli xtaʼakglhuwit chu lakxtlawalh tuku xlakkaxwilinit tlakg xatutsu tribunal, chu tatayalh tala Sicurella. Tuku lakkaxlalh kamakgtayalh amakgapitsi xalak Estados Unidos tiku xlakata xtakanajlakan ni xmakgtlawakgo guerra.

12 Grecia. Kata 1983, Iakovos Thlimmenos limawakaka pi ni xkgalhakgaxmatnan akxni ni wiliputulh xʼuniformejkan soldados chu tamaknuka kpulachin. Akxni taxtulh, skilh taskujut niku contador xwa; pero ni maxkika xlakata xtamaknukanit kpulachin. Alh ktribunales, pero xlakata ni makgtayaka kxpaís, lilh xtaʼakglhuwit kTribunal Europeo de Derechos Humanos. Kata 2000, Gran Sala xla Tribunal, nema 17 jueces litakgatsi, tatayakgolh chu uma makgtayanalh xlakata nialh xkalakgmakganka. Akxni nina xtatayakan, xwilakgo liwaka akgtutu mil akgkitsis ciento natalan xalak Grecia tiku na xkatamaknukanit kpulachin xlakata ni soldados xwamputunkgo. Alistalh, Grecia na mastalh akgtum limapakgsin nema xwan pi xlakxtlawaka tuku xkalimawakakanit natalan. Nachuna, akxni akxilhparaka Constitución xalak Grecia, wiliparaka limapakgsin nina makgas xlakkaxwilikanit, nema xwan pi griegos tlan natlawakgo atanu taskujut komo ni soldados xwamputunkgolh.

«Akxni nina xaktanu ksala, lhuwa ktlawanilh oración Jehová, chu kmakgkatsilh la tlan kimamakgkatsinilh.» Ivailo Stefanov (Kaʼakxilhti párrafo 13)

13, 14. Chuna la lakpuwana, ¿tuku kinkamasiyaniyan tuku titaxtulh tala Ivailo Stefanov chu Vahan Bayatyan?

13 Bulgaria. Ivailo Stefanov wanika pi soldado xwa kata 1994, akxni xkgalhi 19 kata pero ni soldado wamputulh chu na ni tlawaputulh taskujut nema xpulalinkgo soldados. Akgkutsayan papaʼ tamaknuka kpulachin, pero limaklakaskilh limapakgsin niku xwan pi tlan ni soldado xwa xlakata xtalakapastakni. Xaʼawatiya, uma taʼakglhuwit linka kTribunal Europeo de Derechos Humanos. Kata 2001, akxni nina xlakkaxtlawakan, mapakgsina xalak Bulgaria talakkaxlakgolh tala Stefanov. Ni kaj xakstu nialh malakgaxokgeka, wata na putum búlgaros tiku xtlawakgolh atanu taskujut xlakata ni soldados xwamputunkgo. *

14 Armenia. Vahan Bayatyan kkata 2001 makgatsilh xkata xlakata xafuerza soldado xwa. * Maski wa pi xtalakapastakni ni xmaxki talakaskin soldado nawan, nipara akgtum tribunal xalak xpaís makgtayalh. Septiembre kata 2002 wanika pi akgtiy kata aitat xaʼamaka tamaknukan kpulachin, pero tamakxtuka akxni xlin akgkaw papaʼ a itat. Akxni taxtulh lilh xtaʼakglhuwit kTribunal Europeo de Derechos Humanos, chu wanika pi nakgaxmatnikan xtaʼakglhuwit. Kilhtamaku 27 xla octubre kata 2009, uma Tribunal ni tatayalh. Xtasiya pi tuku xwankanit ni xʼama kamakgtaya natalan xalak Armenia tiku nachuna xtitaxtumakgo. Pero, Gran Sala xla Tribunal wa pi naʼakxilha uma taʼakglhuwit chu 7 xla julio kata 2011 tatayalh Vahan Bayatyan. Xlimakgtumku, Tribunal wa pi tlan xakxilha  tiku ni soldado xwamputunkgo xlakata xtalakapastaknikan chuna la xkatsinikgonit kxtakanajlakan, na anta xmakgtanu niku xwan pi tlan nawan tuku lakapastaka, talakapastakni chu takanajla. Uma limapakgsin ni kajwatiya katataya xtatayananin Jehová, wata na kamakgtaya lhuwa ciento millón latamanin xalak países nema tapakgsikgo kConsejo de Europa. *

Natalan xalak Armenia paxtikatsinikgo Tribunal Europeo de Derechos Humanos xlakata katatayalh tiku ni soldado xwamputunkgo xlakata xtalakapastaknikan chuna la katsinikgonit kxtakanajlakan

Tuku limalankikan akgtum kachikin

15. ¿Tuku xlakata xkachikin Jehová ni makgtlawa tuku limalankikan kachikinin?

15 Xkachikin Jehová ni makgxtakgkgo xTamapakgsin Mesías ni kaj akxni kawanikan pi soldados nawankgo, wata na ni makgtanukgo akxni wi tuku limalankikan akgtum kachikin. Akxni lalh xliʼAkgtiy Guerra xLikalanka Katiyatni, latamanin tlakg tsukukgolh malankikgo xkachikinkan. Latamanin xalak lhuwa países kaskinikan ni namakgxtakgkgo xkachikinkan akxni wankgo akgtum juramento, kilhtlikgo akgtum takilhtlin o saludarlikgo bandera. Pero akinin kajwatiya kakninaniyaw Jehová (Éx. 20:4, 5). Wa xlakata, lu  kinkaputsastalanikanitan. Amakgtum, Jehová maklakaskinit «ntiyat» xlakata namasputu makgapitsi taputsastalanit. Kaʼakxilhwi makgapitsi tuku tlajanitaw nema Jehová kinkalimakgtayanitan Cristo (Sal. 3:8).

16, 17. ¿Tuku titaxtukgolh Lillian chu William Gobitas, chu tuku masiyaniyan uma?

16 Estados Unidos. Kata 1940 xtatayananin Jehová ni katatayalh Tribunal Supremo xalak Estados Unidos, kgalhtsayan wankgolh pi ni chu kaj chatum wa pi tlan, xlakata Distrito escolar de Minersville contra Gobitis. Lillian Gobitas * chu xtala William, nema xkgalhikgo 12 chu 10 kata, ni xmakgxtakgputunkgo Jehová, wa xlakata ni saludarliputunkgolh bandera chu ni wankgolh juramento nema wan pi ni katimakgxtakgkgolh. Wa xlakata, kalitamakxtuka kʼescuela. Xtaʼakglhuwitkan chalh kTribunal Supremo, chu wa pi escuela tlawalh chuna la wan constitución, nema xmakgtayanan xlakata «kachikin ni xtapitsilh». Tuku wa uma tribunal tlawalh pi tlakg xkaputsastalanika: tlakg katamakxtuka kamanan tiku xtatayananin Jehová, tiku laklankata makgatsankgakgolh xtaskujutkan chu lhuwa tiku lixkajnit xlikatsikgo katlawanikgolh tuku nitlan natalan. Libro The Lustre of Our Country wan: «Kata 1941 asta 1943 tlakg kaputsastalanika xtatayananin Jehová kʼEstados Unidos xlakata xtakanajlakan xliputum siglo XX».

17 Pero kaj tsinu kilhtamaku tlajanankgolh xtalatlawananin Dios. Kata 1943, Tribunal Supremo akxilhpa atanu taʼakglhuwit xtachuna Gobitis, La Junta de Educación de West Virginia contra Barnette. Uma kilhtamaku, katatayalh xtatayananin Jehová. Tribunal Supremo xlimakgtumku kaj lakapala xlakgpali tuku xwanit xliputum kilhtamaku nema xwi Estados Unidos. Xlakata katatayaka xtatayananin Jehová, nialh lu kaputsastalanika. Nachuna, liwana lakkaxwilika tuku kalakgchan tiku xalak Estados Unidos.

18, 19. Chuna la wan Pablo Barros, ¿tuku makgtayalh xlakata ni xmakgxtakgli Dios? ¿La tlan amakgapitsi xlakskujni Jehová nachuna natlawakgo?

18 Argentina. Pablo chu Hugo Barros, akgtsayan chu akgtujun kata, katamakxtuka kʼescuela kata 1976 xlakata ni makgtlawakgolh akxni bandera mawakaka talhman. Akgtum kilhtamaku, directora lhkgen makalh Pablo chu akgkgaxilh; na xafuerza xtlawaputun pi kamanan xmakgtlawakgolh akxni malankikan tuku litalakgapasa kachikin, wa xlakata xkakastigarli akgtum hora akxni ksputa clases. Pablo lakapastaka uma lu tuwa kilhtamaku: «Komo ni xkinkamakgtayan Jehová, nila xaktayanilh tuku xkintlawanika xlakata xakmakgatsankgananilh Jehová».

19 Akxni uma taʼakglhuwit chalh ktribunales, juez wa pi tlan xlakata katamakxtuka Pablo chu Hugo kʼescuela. Pero linka taʼakglhuwit kCorte Suprema de Justicia xalak país, chu kkata 1979 lakxtlawalh tuku xwanit tribunal nema tlakg xatutsu. Tribunal wa: «Tuku limalakgaxokgenankan [katamakxtukan kʼescuela] [...] ni kamaxki [...] talakaskin nakatsinikgo  tuku kalakgchan (art. 14) chu lakgchan Estado kuenta natlawa pi kamanan kaʼankgolh kprimaria (art. 5)». Xlakata tlajanaw uma kilhtamaku kamakgtayalh max akgtum mil kamanan tiku xtatayananin Jehová: makgapitsi nialh katamakxtuka chu tiku xkatamakxtukanit, la Pablo chu Hugo kamakgamakglhtinamparaka kʼescuela.

Lhuwa laktsu kamanan xtatayananin Jehová limasiyakgo pi ni xmakgxtakgnankgo maski titaxtukgo taʼakglhuwit

20, 21. ¿La matliwakglha mintakanajla tuku titaxtukgolh Roel chu Emily Embralinag?

20 Filipinas. Kata 1990, Roel Embralinag, * tiku kgalhi 9 kata chu xtala Emily tiku kgalhi 10 kata, chu liwaka tutupuxumakitsis xtatayananin Jehová, katamakxtuka kʼescuela xlakata ni saludarlikgolh bandera. Xtlat Roel chu Emily, wanikan Leonardo, kamakgatekgsniputulh tiku xpulalinkgo escuela pero nitu litaxtulh. Xlakata tlakg stakli taʼakglhuwit, Leonardo lilh xtaʼakglhuwit kTribunal Supremo. Ni xkgalhi tumin chu nipara abogado tiku xpalakachuwinalh, wa xlakata familia tasaskinikgolh Jehová pi xkamasiyanilh tuku xtlawakgolh. Xlakata nina xlakkaxla, kamanan xkalikgalhkgamanankan chu katuwa xkatlawanikgo xcompañeroskan. Xlakata Leonardo nipara  tsinu xkatsi tuku xwan limapakgsin, lakpuwa pi ni xʼama tlajanan kʼuma taʼakglhuwit.

21 Pero, talakgpalilh akxni Felino Ganal, chatum abogado tiku xkataskujnit abogados tiku tlakg xkalakgapaskan kpaís, kapalakachuwinalh uma familia. Uma kilhtamaku nialh xkataskuja uma abogados chu xtatayana Jehová xwanit. Akxni Tribunal Supremo akxilhli uma taʼakglhuwit, putum katatayakgolh xtatayananin Jehová chu lakxtlawalh limapakgsin niku xwan pi xkatamakxtuka kʼescuela. Amakgtum xmakgatsankganamparakgonit tiku xtlawaputunkgo pi xkachikin xmakgxtakgkgolh Dios.

Akxtum wilaw xlakata ni makgtanuyaw kkakilhtamaku

22, 23. 1) ¿Tuku xlakata tlajanitaw lhuwa taʼakglhuwit nema lu xlakaskinka? 2) ¿Tuku litasiya xlakata tlan katalalinaw kinatalankan tiku wilakgolh xlikalanka katiyatni?

22 ¿Tuku xlakata akinin xtatayananin Jehová lhuwa tlajanitaw? Ni kinkamakgtayakgoyan políticos pero kʼakglhuwa países chu akglhuwa tribunales, wilakgo jueces tiku ni laksakpaxkinankgo chu kinkamakgtayakgonitan xlakata tuku kinkatlawanikgoyan tiku ni kinkaʼakxilhputunkgoyan. Nachuna, tuku lakkaxlanit makgtayananit xlakata natlawakan chuna la wan constitución. Xlikana: Cristo kinkamakgtayanitan putum tuku liskujnitaw xlakata tlan natlajananaw (kalikgalhtawakga Apocalipsis 6:2). ¿Tuku xlakata linaw kintaʼakglhuwitkan ktribunales? Akinin ni kaj lakkaxwiliputunaw limapakgsin, wata lakaskinaw pi kakinkamaxkikan talakaskin naskujniyaw kiMapakgsinakan Jesucristo, chu nitu kakinkamalaktlawin (Hech. 4:29).

23 Kkakilhtamaku niku mapitsinit política chu niku ni laʼakxilhputunkan, Mapakgsina Jesucristo kasikulunatlawanit tuku tlawakgonit tiku tatayakgo xlakata ni makgtanukgo kkakilhtamaku. Satanás nila kinkamapitsiyan chu nila kinkatlajayan. Tamapakgsin makxtum katlawanit lhuwa millón latamanin, tiku ni makgtanuputunaw kʼguerra. Lu nila takanajla xlakata makxtum wilaw chu ni kgalhiyaw taʼakglhuwit: uma liwana masiya pi xTamapakgsin Dios mapakgsinamaja (Is. 2:4).

^ párr. 4 Uma libro na lilakgapaskan The New Creation (Xasasti Tamalakatsukin). Alistalh Millennial Dawn (Xkilhtsukut akgtum Mil kata) nema na xlilakgapaskan Studies in the Scriptures (Takgalhtawakga xalak Biblia).

^ párr. 8 Xlakata naʼakxilhaw uma tuku xlichuwinankanit, kaʼakxilhti libro Apocalipsis... ¡se acerca su magnífica culminación!, capítulo 27, páginas 184 asta 186.

^ párr. 13 Na talakkaxwililh pi mapakgsina xalak Bulgaria xkamaxkilh talakaskin pi tiku xtalakapastaknikan ni xkamaxkilh talakaskin soldados nalitaxtukgo tlan xtlawakgolh atanu taskujut.

^ párr. 14 Natekgsa niku xatakgatsin talichuwinan uma krevista La Atalaya 1 xla noviembre kata 2012, páginas 29 asta 31.

^ párr. 14 Max akgpuxam kata xmapakgsina Armenia katamaknulh kpulachin liwaka 450 lakgkgawasan tiku xtatayananin Jehová. Xaʼawatiya maxtuka kpulachin knoviembre kata 2013.

^ párr. 16 Xʼapellido familia nitlan tatsokgwililh ktribunal.

^ párr. 20 Xʼapellido familia nitlan tatsokgwililh (Ebralinag) ktribunal.