Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Mapakgsinamaja xTamapakgsin Dios

 CAPÍTULO 6

Kachikin nema lichuwinan Dios: Xatapaxuwan tamakamastakgo tiku lichuwinankgo Dios

Kachikin nema lichuwinan Dios: Xatapaxuwan tamakamastakgo tiku lichuwinankgo Dios

TUKU NALICHUWINAN UMA CAPÍTULO

Mapakgsina kgalhi lhuwa tiku nalichuwinankgo Dios

1, 2. ¿Tuku lanka taskujut lichuwinalh Jesús, chu tuku xlakaskinka takgalhskinin taxtu?

MAPAKGSINANIN wi tuku malaknukgo pero ni makgantaxtikgo. Maski tiku xlikana makgantaxtiputunkgo nila tlawakgo tuku malaknukgo. Pero Mapakgsina Mesías, Jesucristo nichuna likatsi, putum kilhtamaku makgantaxti tuku wan.

2 Akxni mapakgsina wa kkata 1914, Jesús xʼama makgantaxti putum tuku xwanit max akgtum mil akgnajatsa ciento kata. Akxni atsinu xtsankga namakgnikan wa: «Umakgolh xalakwan xalaksasti tamakatsin xla xtamapakgsin Dios natalichuwinan kputum katiyatni» (Mat. 24:14TNM). Akxni xkgantaxtulh uma tuku wa na xʼama litasiya kinkatawilan chu xmapakgsinamaja kʼakgapun. Pero anan akgtum lu xlakaskinka takgalhskinin: ¿La xʼama kamamakxtumi uma Mapakgsina lhuwa tiku xatapaxuwan xlichuwinankgolh Dios kxaʼawatiya kilhtamaku, akxni lhuwa latamanin kaj xakstu kapaxkikan, ni paxkinankgo chu ni katsiputunkgo xlakata Dios? (Mat. 24:12; 2 Tim. 3:1-5.) Talakaskin nakatsiyaw xtakgalhtin uma takgalhskinin xlakata putum xaxlikana kstalaninanin Cristo makgtaxtuyaw.

3. ¿Tuku lu liwana xkatsi Jesús, chu tuku xlakata?

3 Kaʼakxilhparaw tuku lichuwinalh Jesús pi xʼama la. Tachuwin «natalichuwinan», ¿xlimasiya pi xkanajla nakgantaxtu? ¡Chuna xla! Jesús liwana xkatsi pi xʼamakgolh tawilakgo tiku xatapaxuwan xʼamakgolh tatayakgo kxaʼawatiya kilhtamaku. ¿Tuku xlakata chuna xkanajla? Xlakata chuna xmasiyaninit xTlat (Juan 12:45; 14:9). Akxni xlama kʼakgapun, akxilhli la Jehová kalipawanit pi xkachikin xatapaxuwan nakakninanikgo. Kaʼakxilhwi la Jehová limasiyalh pi xkalipawan.

«Minkachikin xatapaxuwan natamakamastaniyan»

4. ¿Tuku kawanilh israelitas Jehová pi xmakgtayanankgolh chu la kgalhtinankgolh?

4 Kalilakapastakwi akxni Jehová wanilh Moisés katlawalh tabernáculo, nema tlan xlinkgolh niku israelitas xʼamakgolh kakninanikgo Dios. Jehová limaklakaskilh Moisés xlakata xkawanilh putum kachikin xmakgtayanankgolh. Moisés kawanilh israelitas: «Putum tiku tlan naku kgalhi kalimilh tuku namaxki Jehová». ¿Tuku tlawakgolh? Kachikin «chuntiya tsisa tsisa  xatapaxuwan xliminikgo akgtum tamakamastan». Lhuwa liminkgolh asta «nialh kamaxkika talakaskin latamanin naliminkgo» (Éx. 35:5; 36:3, 6). Israelitas limasiyakgolh pi Jehová tlan xkalipawan.

5, 6. Chuna la wan Salmo 110:1-3, ¿la xlakaskin Jehová chu Jesús xlikatsikgolh tiku xkakninanikgolh kxaʼawatiya kilhtamaku?

5 ¿Xlakpuwan Jehová pi xʼama katekgsa tiku nachuna xkakninanikgolh kxaʼawatiya kilhtamaku? Chuna. Akxni xtsankga liwaka akgtum mil kata xlakachilh Jesús, Jehová malakpuwanilh David xtsokgli akxni Mesías xtsukulh mapakgsinan (kalikgalhtawakga Salmo 110:1-3TNM). Xwankanit pi akxni aku xtawilalh Mapakgsina, Jesús, xkgalhilh xtalamakgasitsin. Pero xla na xʼama kgalhi lhuwa tiku xatapaxuwan xtatayakgolh. Asta tiku kamananku xtatayakgolh, chu lhuwa xʼamakgolh wankgo xtachuna la monkganat nema takta kkatiyatni akxni xkgakga. *

Lu lhuwa tiku ni makgxtakgkgo Tamapakgsin la monkganat (Kaʼakxilhti párrafo 5)

6 Jesús xkatsi pi tuku xlichuwinankanit kSalmo 110 wa xlichuwinamaka (Mat. 22:42-45). Wa xlakata Jesús tlan xkanajla pi xʼama kgalhi tiku ni xmakgxtakgkgolh chu xatapaxuwan xtatayakgolh xlakata xlichuwinankgolh xalakwan xalaksasti tamakatsin xlikalanka Katiyatni. ¿Tuku kinkamasiyaniyan tuku lanit? Uma Mapakgsina, ¿kgalhi lhuwa tiku xatapaxuwan lichuwinankgo Dios uma xaʼawatiya kilhtamaku?

«Lanka talakgalhaman chu kintaskujut naklichuwinan uma tamakatsin»

7. Akxni mapakgsina tlawaka, ¿tuku tlawalh Jesús xlakata kstalaninanin tlan xtlawakgolh taskujut nema xʼamakgolh kgalhikgo?

7 Akxni aku xwilikanit la mapakgsina, Jesús wi tuku tlawalh xlakata kstalaninanin xtlawakgolh uma lanka taskujut. Chuna la akxilhwi kcapítulo 2, Cristo kalakputsananilh chu kamaskulunkilh lata 1914 asta akxni xtsukuma 1919 (Mal. 3:1-4). Pero kkata 1919, xla laksakli skujni xalipaw xlakata xkapulalilh kstalaninanin (Mat. 24:45). Lata ama kilhtamaku skujni tsukulh  masta taway xla takanajla. Limaklakaskilh taʼakgchuwin klaklanka tamakxtumit chu likgalhtawakga, niku makglhuwa xlichuwinan taskujut nema lakgayakgolh putum kstalaninanin Cristo, pi xtalakaskin chatunu chatunu nalichuwinankgo Dios.

8-10. ¿La makgtayanankgolh laklanka tamakxtumit xlakata tlakg xtalichuwinalh Dios? Kawanti akgtum liʼakxilhtit. (Kaʼakxilhti recuadro « Laklanka tamakxtumit nema makgtayanankgolh tlakg xtalichuwinalh Dios».)

8 Taʼakgchuwin klaklanka tamakxtumit. Xlakata lu xkatsiputunkgo tuku natlawakgo, xLikgalhtawakgananin Biblia tamakxtumikgolh kCedar Point (Ohio, Estados Unidos), 1 asta 8 xla septiembre kata 1919, xlakata xkgalhikgolh xapulana lanka tamakxtumit akxni xtitaxtunita xaPulana Guerra xLikalanka Katiyatni. Chu kxliʼakgtiy kilhtamaku, tala Rutherford mastalh akgtum taʼakgchuwin niku liwana wa: «Tuku kalakgayawakanit kstalaninanin Cristo unu kKatiyatni [...] wa nalichuwinankgo xTamapakgsin Malana».

9 Tuku tlakg tlan lalh ktamakxtumit wa akxni xtitaxtunita akgtutu kilhtamaku, akxni tala Rutherford mastalh taʼakgchuwin nema xwanikan «Taʼakgchuwin xla tiku makgtayanankgo», nema alistalh taxtulh krevista Watch Tower chu xlimin tema «Talichuwinama Tamapakgsin». Tala Rutherford wa pi kstalanina Cristo akxni lilakapastaka tlawa uma takgalhskinin: «¿Tuku xlakata klama kKatiyatni?». Chu xtakgalhtin chuna xliwanat: «Xlakata xtalakgalhaman Malana tlawalh na nakmasta uma xtamakatsin Dios kKatiyatni xlakata tlan natalalimparakgo, lanka talakgalhaman chu kintaskujut naklichuwinan uma tamakatsin».

10 Tala Rutherford na wa pi xʼama taxtu xasasti revista The Golden Age, nema la uku wanikan ¡Despertad! Tlawaka xlakata latamanin nakatsikgo pi kajwatiya Tamapakgsin tlan nakamakgtaya. Alistalh, kakgalhskilh tiku anta xwilakgolh komo xmakgtayanamputunkgo xlakata natamakgpitsi uma revista. Tuku tsokgwilika xlakata uma tamakxtumit wan: «Lu kaks limalakawaninalh la xlilhuwa kgalhtinankgolh: akgchaxan mil latamanin akxtum tayakgolh». * Liwana litasiyalh pi Mapakgsina xkgalhi tiku xtatayakgo chu lu xatapaxuwan xlichuwinamputunkgo Tamapakgsin.

11, 12. Xlakata tukuya kilhtamaku xʼama tatlawa taskujut nema xlichuwinanit Jesús, ¿tuku maxtuka kkata 1920?

11 Likgalhtawakga. Kxpáginas revista Watch Tower, limasiyalh pi lu xlakaskinka xwanit taskujut nema Jesús lichuwinalh: natalichuwinan xalakwan xalaksasti. Kalichuwinaw makgapitsi liʼakxilhtit nema lalh akxni xtsukuma kdécada 1920.

12 ¿Tuku tamakatsin xʼama talichuwinan xlakata xkgantaxtulh Mateo 24:14? ¿Tukuya kilhtamaku xʼama tatlawa uma taskujut? Revista 1 xla julio kata 1920 xlimin artículo nema xwanikan «Evangelio del Reino» (Evangelio xla Tamapakgsin), lichuwinalh pi uma tamakatsin «kilhchanima xlisputni uma xamakgan kakilhtamaku chu akxni xtawilalh xtamapakgsin Mesías». Na liwana limasiyalh tukuya kilhtamaku xʼama tamasta  uma tamakatsin, xwan: «Uma tamakatsin xlitamalakgatumit lata [xapulana] guerra xlikalanka katiyatni asta “klanka takatsanajwat”». Wa xlakata artículo wa: «La uku xkilhtamaku [natalichuwinan] uma xalakwan xalaksasti putum tiku wankgo pi kanajlanikgo Cristo».

13. Kʼartículo nema taxtulh kkata 1921, ¿la kamakgtayalh kstalaninanin Cristo xatalaksakni xlimasiyakgolh tuku xtlawa pi xlichuwinankgolh Dios?

13 Xkachikin Dios, ¿xafuerza xʼamakgolh tlawakgo uma taskujut? Ni. Artículo «Tliwakga kawantit» xla revista Watch Tower 15 xla marzo kata 1921, kawanilh kstalaninanin Cristo tiku xkalaksakkanit pi xlimasiyakgolh tuku xtlawa pi xlichuwinankgolh Dios. Kawanika pi xkatlawanika uma takgalhskinin: «¿Ni xlikana pi lanka talakgalhaman chu wa tuku kilakgayawakanit, nakmakgtayanan kʼuma taskujut?». Artículo na wa: «Liwana katsiyaw pi akxni naʼakxilhatit [la akgtum talakgalhaman nalichuwinanatit Dios], nalitaxtuyatit chuna la Jeremías, nema xtachuwin Malana kxnaku “litaxtulh la lhkuyat”, nema xtalakgachinunit kxlukut chu xtlawa pi chuntiya xlichuwinalh Dios» (Jer. 20:9). Tuku lu tlan kalimatliwakglhka limasiyalh pi Jehová chu Jesús kalipawan tiku tatayakgo xTamapakgsin.

14, 15. Chuna la taxtulh revista Watch Tower kkata 1922, ¿la xlichuwinatkan xlakata Tamapakgsin kstalaninanin tiku kalaksakkanit?

14 Pero ¿la kstalaninanin Cristo xʼamakgolh kamakatsinikgo amakgapitsin xlakata Tamapakgsin? Krevista Watch Tower 15 xla agosto kata 1922 taxtulh xaʼaktsu artículo pero lu xamatliwakglhna nema xwanikan «Xlakaskinka lichuwinankan Dios». Kawanilh kstalaninanin Cristo tiku kalaksakkanit xlakata «xtapaxuwan xkalinikgolh latamanin likgalhtawakga xla tamakatsin chu xkalitachuwinankgolh akgatunu chiki, chu xkawanikgolh pi Tamapakgsin xalak akgapun xtalakatsuwinit».

15 Lata kata 1919, Cristo limaklakaskin skujni xalipaw chu xaskgalala xlakata makglhuwa xkamalakapastaknikgolh pi kstalaninanin kgalhikgo talakgalhaman chu pi xlichuwinatkan Tamapakgsin. ¿La makgamakglhtinankgolh xapulana xLikgalhtawakgananin Biblia akxni kawanika pi xlichuwinatkan Tamapakgsin?

«Tiku ni makgxtakgnankgo namakgtayanankgo»

16. ¿Tuku wankgolh makgapitsi lakgkgolotsin akxni wanka pi xtalakaskin putum xlichuwinankgolh Dios?

16 Década 1920 chu 1930, makgapitsi ni xlakgatikgo pi putum kstalaninanin Cristo tiku naʼankgo kʼakgapun xlichuwinatkan Dios. Kkata 1928, revista La Torre del Vigía wa tuku xlama: «La uku [congregación] wi tiku kalakgayawakanit la lakgkgolotsin [...]; tiku ni kamatliwakglhkgo natalan xlakata nalichuwinankgo Dios chu na ni makgtlawakgo uma taskujut [...]. Nitu liʼakxilhkgo nataʼan akgatunu chiki chu nakalinikan latamanin xtamakatsin Mapakgsina chu tamapakgsin» (revista xla marzo-abril). Artículo na lakatanks xwan pi xchanit kilhtamaku nakawanikan pi nitlan tuku tlawakgo chu pi «nialhla lakgkgolotsin nalitaxtukgo». *

17, 18. ¿La kgalhtinankgolh natalan xlakata tuku wa skujni xalipaw chu xaskgalala chu tuku tlawakgonit lhuwa millón natalan liwakaya akgtum ciento kata?

 17 Lu tlan pi tlakg lhuwa xalak congregación xatapaxuwan tlawakgolh tuku kawanikgolh skujni xalipaw chu akgtum talakgalhaman liʼakxilhkgolh nalichuwinankgo Dios. Revista Watch Tower 15 xla marzo kata 1926 wa: «Tiku ni makgxtakgnankgo namakgtayanankgo [...] xlakata nakawanikgo latamanin uma tamakatsin». Chu chuna lalh: makgantaxtikgolh tuku xtalichuwinanit kSalmo 110:3 chu limasiyakgolh pi xatapaxuwan tatayakgo Mapakgsina Mesías.

18 Liwaka akgtum ciento kata nema titaxtunita, lhuwa millón makgtayanankgonit xlakata natalichuwinan Tamapakgsin. Kʼatanu capítulos, naʼakxilhaw la talichuwinanit Dios, tuku limaklakaskinkgonit chu tuku tlan kitaxtunit. Pulana, kaʼakxilhwi tuku xlakata lhuwa millón makgtayanankgolh natalichuwinan Dios, maski lamakgolh niku latamanin kaj xakstukan kapaxkikan. Chuna la naʼakxilhtilhayaw uma, tlan akstu nakinkakgalhskinkanan: «¿Tuku tlawa pi naklichuwinan xalakwan xalaksasti?».

«Pulana kaputsatit xtamapakgsin Dios»

19. ¿Tuku xlakata kgalhakgaxmataw xtastakyaw Jesús «pulana kaputsatit xtamapakgsin Dios»?

19 Jesús kawanilh kstalaninanin pi “pulana xputsakgolh xtamapakgsin Dios” (Mat. 6:33TNM). ¿Tuku xlakata tlawayaw uma tastakyaw? Xlakata katsiyaw pi lu xlakaskinka Tamapakgsin, chu namakgantaxti tuku lakapastaknit Dios natlawa. Chuna la akxilhwi kcapítulo 5, espíritu santo tsinu tsinu masiyalh tuku xaxlikana xlakata tamapakgsin xalak akgapun. Akxni tuku xaxlikana xlakata Tamapakgsin lakgchalh kinakujkan, tlawalh pi pulana xputsaw uma Tamapakgsin.

Chuna la chatum chixku lipaxuwa akxni tekgsa tuku lhuwa xtapalh nema xtatsekgnit, kstalaninanin Cristo lipaxuwakgo xlakata tekgskgonit tuku xaxlikana xlakata Tamapakgsin (Kaʼakxilhti párrafo 20)

20. Chuna la limasiya parábola xlakata tuku lhuwa xtapalh nema xtatsekgnit, ¿la xʼamakgolh kgalhakgaxmatkgo kstalaninanin Jesús tastakyaw pi pulana xwilikgolh Tamapakgsin?

20 Jesús xkatsi tuku xʼamakgolh tlawakgo kstalaninanin akxni kawanilh pi pulana xputsakgolh Tamapakgsin, chuna la limasiya liʼakxilhtit xla tuku lu lhuwa xtapalh nema tsekg xwi (kalikgalhtawakga Mateo 13:44). Akgtum kilhtamaku, akxni kskujma chixku xla parábola, tekgsli tuku tsekg xwi chu lakapala katsilh pi lu lhuwa xtapalh xwanit. ¿Tuku tlawalh? «Kaj xtapaxuwan nchu an, na paks stay wa ntu nkgalhiy, wa nchu ntamaway yama mpukuxtu.» ¿Tuku kinkamasiyaniyan uma? Akxni tekgsaw tuku xaxlikana xlakata Tamapakgsin chu katsiyaw la xlilhuwa xtapalh, xatapaxuwan tlawayaw tuku talakaskin xlakata chuntiya pulana nawiliyaw kkilatamatkan Tamapakgsin. *

21, 22. ¿La limasiyakgo tiku tatayakgo Dios pi pulana wilikgo Tamapakgsin? Kalichuwinanti akgtum liʼakxilhtit.

21 Tiku tatayakgo xtamapakgsin Dios limasiyakgo chu ni kaj wankgo, pi pulana wilikgo. Limaklakaskinkgo xlatamatkan, tuku tlan tlawakgo chu tuku kgalhikgo xlakata nalichuwinankgo Dios. Chalhuwa lhuwa tuku limakgxtakgkgo xlakata xliputum kilhtamaku naskujnanikgo Dios. Putum tiku xatapaxuwan lichuwinankgo Dios, akxilhkgonit pi Jehová kasikulunatlawa tiku pulana wilikgo xTamapakgsin, chuna la limasiya liʼakxilhtit.

 22 Avery chu xpuskat wanikan Lovenia Bristow akxtum skujkgolh la precursores anta kxsur Estados Unidos akxni ksputma década 1920. Titaxtulh makgapitsi kata, Lovenia wa: «Lata precursores klitaxtuw Avery chu akit lhuwa kata akxtum kpaxuwanitaw. Makglhuwa ni xakkatsiyaw niku xakamaw tiyayaw tumin xlakata gasolina o xaklitamawaw tuku xakwaw. Pero putum kilhtamaku Jehová kinkamakgtayan. Nikxni kxlajwanaw chu putum kilhtamaku kkgalhiw tuku xakmaklakaskinaw». Lovenia lakapastaka pi makgtum akxni xmakgtayanamakgo kPensacola (Florida) chu nialh lu xkgalhikgo tumin chu tuku nawakgo. Akxni taspitkgolh kxchikkan nema xkgalhi xallantas, tekgskgolh akgtiy bolsas nema xkgalhi tuku xwakgolh chu akgtum tatsokgni nema xwan: «Compañia xalak Pensacola kapaxkikgoyan». * Akxni lilakapastaka akglhuwa kata nema putum kilhtamaku skujnanilh Jehová, Lovenia wa: «Jehová nikxni kinkamakgxtakgan. Komo lipawanaw nikxni kintikaʼakgskgawin».

23. ¿La limakgkatsiya xlakata tuku katsinita xlakata Tamapakgsin chu tuku liwana lakapastaknita natlawaya?

23 Makgapitsi tlakg lhuwa horas tlan lichuwinanaw Dios, xlakata max tanu tanu tuku titaxtumaw kkilatamatkan. Pero kimputumkan kgalhiyaw talakgalhaman xatapaxuwan nalichuwinanaw xalakwan xalaksasti (Col. 3:23). Xlakata lu xlakaskinka akxilhaw xaxlikana xlakata Tamapakgsin nema tekgsnitaw, xatapaxuwan wi tuku makgxtakgaw xlakata tlakg lhuwa nalichuwinanaw.

24. ¿Tuku tlakg lanka tlawanit Tamapakgsin uma xaʼawatiya kilhtamaku?

24 Akgtum ciento kata nema titaxtunit, Mapakgsina makgantaxtima tuku wan Mateo 24:14. Chu ni xafuerza kamatlawi uma. Kstalaninanin makgxtakgkgonit uma kakilhtamaku niku xakstukan kapaxkikan chu xatapaxuwan lichuwinankgo Dios. Natalichuwinan Dios xlikalanka kakilhtamaku, na wa tuku xʼama litasiya pi Cristo kinkatawilan la chatum mapakgsina, chu wa uma tuku tlakg tlan tlawanit Tamapakgsin uma xaʼawatiya kilhtamaku.

^ párr. 5 Anta kBiblia tamalakxtumikan monkganat akxni lhuwa tuku anan (Gén. 27:28; Miq. 5:7).

^ párr. 10 Folleto To Whom the Work Is Entrusted (Tiku kalakgayawakan taskujut) wa pi The Golden Age natamaklakaskin xlakata natalichuwinan Tamapakgsin kʼakgatunu chiki. Kawanika natalan pi xmakgxtakgkgolh maktum kʼakgatunu chiki, «maski kskinkgolh suscripción o ni». Alistalh kawanika pi xmalaknukgolh suscripciones xla uma revista chu xla revista Watch Tower. Lata 1 xla febrero kata 1940 kawanika pi xmaʼakgpitsikgolh revistas chu xwankgolh la xlilhuwa xmastakgo.

^ párr. 16 Ama kilhtamaku xtlawakan votación akxni xkalaksakkan lakgkgolotsin xalak congregación. Wa xlakata congregación tlan ni xkalaksakli tiku ni xlichuwinamputunkgo Dios akgatunu chiki. Kcapítulo 12 nalichuwinanaw akxni talakgpalilh la kalaksakkan tiku lakgkgolotsin xʼamakgolh litaxtukgo.

^ párr. 20 Jesús lichuwinalh akgtum parábola xtachuna uma, akxni wa pi chatum stanantapulina tiku putsa akgtum perla nema kgalhi lhuwa xtapalh. Akxni tekgsli, stalh putum tuku xkgalhi chu tamawalh (Mat. 13:45, 46). Uma akgtiy parábolas kinkamasiyaniyan pi tlan pulaklhuwa la nakatsiniyaw xlakata Tamapakgsin. Tlan nawanaw pi makgapitsi kaj tekgskgo chu amakgapitsi putsakgo. Pero maski tanu tanu la nakatsiniyaw, xatapaxuwan wi tuku nalimakgxtakgaw xlakata pulana nawiliyaw kkilatamatkan Tamapakgsin.

^ párr. 22 Ama kilhtamaku congregaciones xkalilakgapaskan compañías.