Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 CAPÍTULO 17

Kamasiyanikan tiku skujnanikgo Tamapakgsin

Kamasiyanikan tiku skujnanikgo Tamapakgsin

TUKU NALICHUWINAN UMA CAPÍTULO

Escuelas kamakgtaya tiku skujnanikgo Tamapakgsin la natlawakgo xtaskujutkan

1-3. ¿La tlawalh Jesús xlakata tlakg xtalichuwinalh Dios chu tuku takgalhskinin tawilalh?

AKGTIY kata, Jesús lichuwinalh Dios xlikalanka Galilea (kalikgalhtawakga Mateo 9:35-38, TNM). Kalakgapaxialhnalh lhuwa kachikinin, laktsu kachikinin, xmasiya ksinagogas chu xlichuwinan xalakwan xalaksasti tamakatsin xla Tamapakgsin. Xlakgankgo lhuwa latamanin niku xʼan xlichuwinan Dios. Jesús akxilhli «lhuwa tachananat, pero lakskujnin ni lu chalhuwa» xwanit chu xtalakaskin lhuwa skujnin.

2 Jesús lakkaxwililh xlakata tlakg xtalichuwinalh Dios. ¿La tlawalh? Kamalakgachalh 12 xʼapóstoles «naʼankgoy liʼakgchuwinankgoy xtapakgsin Dios» (Luc. 9:1, 2). Apóstoles max xkgalhikgo takgalhskinin xlakata la xtlawakgolh uma taskujut. Akxni nina ni xkamalakgacha, Jesús xatapaxuwan kamasiyanilh chuna la xTlat xalak akgapun xmasiyaninit.

3 Pero, min lhuwa takgalhskinin: ¿Tuku masiyanilh xTlat Jesús? ¿Tuku kamasiyanilh Jesús xʼapóstoles? Chu la uku, ¿chuntiyaku Mapakgsina Mesías kamasiyani kstalaninanin xlakata tlan nalichuwinankgo Dios? ¿La tlawa?

«Lantla kimasiyunilh xaTlat, wa yuma klichuwinan»

4. ¿Tukuya kilhtamaku chu niku masiyanilh xTlat Jesús?

4 Jesús lakatanks wa pi wa xTlat xmasiyaninit. Akxni xlama kkatiyatni Jesús wa: «Lantla kimasiyunilh xaTlat, wa yuma klichuwinan» (Juan 8:28). ¿Tukuya kilhtamaku chu niku masiyanika Jesús? Tsukuka masiyanikan xapuxku xKgawasa Dios akxni malakatsukika (Col. 1:15). Jesús akglhuwa miles kata kgaxmatnilh chu akxilhli «xaTlan [...]Makgalhtawakgana» (Is. 30:20). Wa xlakata lhuwa tuku masiyanika, laktlan tayat, la naskuja chu tuku xlakpuwanit natlawa xTlat.

5. ¿Tuku masiyanilh Jehová xKgawasa xlakata la xlichuwinalh kKatiyatni?

5 Nachuna akxni chalh kilhtamaku Jehová masiyanilh xKgawasa la xʼama tlawa xtaskujut kKatiyatni. Kaʼakxilhwi tuku xlichuwinankanit xlakata la latalalin xaTlan Makgalhtawakgana chu xapuxku xKgawasa (kalikgalhtawakga Isaías 50:4, 5). Biblia xwan pi Jehová xmalakastakwani xKgawasa «chali chali». Uma malakapastaknan la akxni chatum makgalhtawakgana tsisa malakastakwani tiku makgalhtawakgama  xlakata namasiyani tuku xasasti. Maktum libro nema lichuwinan Biblia wan: «Jehová [...] lilh xtachuna la kʼescuela chuna la tiku makgalhtawakgekan chu masiyanilh tuku xʼama lichuwinan chu la xʼama tlawa». Kʼuma «escuela» xalak akgapun Jehová masiyanilh xKgawasa “ntu nawan, chu lantla nachuwinan” (Juan 12:49). Na wanilh xKgawasa la namasiyaninan. * Akxni xlama kKatiyatni, Jesús ni kaj liwana maklakaskilh tuku xmasiyanikanit xlakata namakgantaxti xtaskujut, na limaklakaskilh xlakata nakamasiyani kstalaninanin liwana nalichuwinankgo Dios.

6, 7. 1) ¿Tuku kamasiyanilh Jesús kstalaninanin chu tuku xlakata kamasiyanilh? 2) ¿Tuku tlawama Jesús xlakata nakinkamasiyanikanan la uku?

6 Pulana lichuwinaw pi Jesús kamasiyanilh xʼapóstoles la xlichuwinankgolh Dios. ¿La tlawalh? Chuna la wan Mateo capítulo 10, liwana kawanilh la xʼamakgolh lichuwinankgo Dios, chu kawanilh: niku nalichuwinankgo Dios (versículos 5 chu 6), tuku xʼamakgolh lichuwinankgo (versículo 7), pi xtalakaskin nalipawankgo Jehová (versículos 9 chu 10), la xʼamakgolh katachuwinankgo latamanin (versículos 11 asta 13), tuku xtlawakgolh akxni ni xkakgaxmatnika (versículos 14 chu 15), chu tuku xtlawakgolh akxni xkaputsastalanika (versículos 16 asta 23). * Xlakata Jesús liwana kamasiyanilh xʼapóstoles kamakgtayalh xlakata xmalakgatumikgolh xalakwan xalaksasti kxapulana siglo akxni xminita Jesús.

7 ¿Tuku tlan nawanaw la uku? Jesús xMapakgsina xTamapakgsin Dios, kinkamaxkinitan tlakg xlakaskinka taskujut, natalichuwinan «xalakwan xalaksasti tamakatsin xla xtamapakgsin Dios [...] kputum katiyatni xlakata natamakatsininan kputum laklanka kachikinin» (Mat. 24:14, TNM). ¿Kinkamasiyaninitan Mapakgsina xlakata tlan natlawayaw uma lu xlakaskinka taskujut? Chuna. Anta kʼakgapun, Mapakgsina tlawa pi kstalaninanin nakamasiyanikan la nalichuwinankgo Dios chu la namakgantaxtikgo makgapitsi lu xlakaskinka taskujut kcongregación.

Kamasiyanikan lakskujnin xlakata nalichuwinankgo Dios

8, 9. 1) ¿Tuku xlakata xlakkaxwilikanit Niku Masiyakan xlakata la Lichuwinankan Dios? 2) ¿La makgtayanitan tamakxtumit kxitat semana tlakg liwana nalichuwinana Dios?

8 Xkachikin Jehová akglhuwata kata limaklakaskinit laklanka tamakxtumit chu tamakxtumit kcongregación la, Tamakxtumit xlakata xTaskujut Dios, xlakata nakamasiyani xkachikin nalichuwinankgo Dios. Pero kdécada xla 1940, natalan tiku xpulalinkgo xtaskujut xla xtatayananin Jehová tsukukgolh lakkaxwilikgo lhuwa escuelas xlakata nakamasiyanikgo.

9 Niku Masiyakan xlakata la Lichuwinankan Dios. Chuna la akxilhwi kcapítulo 16, uma escuela tsukuka tlawakan kkata 1943. ¿Lilakkaxtlawaka uma escuela xlakata kaj nakamasiyanikan la namastakgo lu tlan taʼakgchuwin ktamakxtumit kcongregación? Ni. Uma tamakxtumit xlakkaxwilikanit xlakata nakamasiyanikan xkachikin Dios nalimalankikgo Jehová akxni nalichuwinankgo (Sal. 150:6).  Uma escuela kamakgtayalh putum natalan tiku xtatsokgtawilakgonit xlakata tlakg tlan nalichuwinankgo Tamapakgsin. La uku kinkamasiyanikanan ktamakxtumit kxitat semana.

10, 11. ¿Tiku tlan tatsokgtawilakgo kʼEscuela de Galaad chu tuku xlakata lilakkaxwilika?

10 Escuela Bíblica de Galaad xla Watchtower. Uma escuela tsukulh lunes 1 xla febrero kata 1943. Lilakkaxwilika xlakata nakamasiyanikan precursores chu atanu tiku xliputum kilhtamaku skujnanimakgolh Dios xlakata misioneros nawankgo lakgamakgat. Pero octubre kkata 2011, kaj tlan ankgo kʼuma escuela tiku putum kilhtamaku skujnanimakgolha Dios: precursores especiales, superintendentes viajantes chu xlakpuskatin, betelitas chu misioneros tiku nina ankgo kʼuma escuela.

11 ¿Tuku xlakata lakkaxwilika uma escuela? Chatum makgalhtawakgana tiku akglhuwata liskujma wan: «Kalimatliwakglhnikan xtakanajlakan xTachuwin Dios chu na kamakgtayakan nakgalhikgo lakwan tayat nema talakaskin xlakata natayanikgo taʼakglhuwit nema nakgalhikgo niku nakamalakgachakan. Nachuna, pulaktum tuku lu xlakaskinka tlawakan kʼuma escuela wa nakamasiyanikan lu nalichuwinamputunkgo xtachuwin Dios» (Efes. 4:11).

12, 13. ¿La makgtayananit xlakata natalichuwinan Dios xlikalanka katiyatni Escuela de Galaad? Kamasta akgtum liʼakxilhtit.

12 ¿La makgtayananit Escuela de Galaad xlakata la talichuwinan Dios xlikalanka katiyatni? Lata kata 1943, liwaka 8,500 tiku ankgonit kʼuma escuela, * chu kamalakgachakanit kliwaka 170 países. Misioneros limaklakaskinkgo tuku kamasiyanikanit, wilikgo lu tlan liʼakxilhtit xlakata natalichuwinan Dios chu kamasiyanikgo amakgapitsin nachuna natlawakgo. Klakalhuwa, misioneros pulalinkgo xtaskujut Dios niku ni lhuwa anan tiku lichuwinankgo Tamapakgsin.

13 Kalichuwinaw tuku lalh kJapón, niku nialh lu talichuwinalh Dios chuna la xtalakkaxwilinit akxni xtitaxtuma xliʼAkgtiy Guerra xLikalanka Katiyatni. Agosto kata 1949, kJapón nipara 10 tiku xlichuwinankgo Dios. Pero akxni sputli uma kata, xwilakgolh 13 misioneros tiku lu xlichuwinamakgolh Dios kJapón. Alistalh tlakg lhuwa chankgolh. Pulana xlichuwinankgo Dios klaklanka kachikinin; alistalh ankgolh kʼalakatanu. Misioneros lu kamatliwakglhkgolh tiku xkamakgalhtawakgakgo chu amakgapitsin xlakata precursores xwankgolh. Uma lhuwa taskujut nema tlawakgolh misioneros lu tlan kitaxtulh. La uku, wilakgolh liwaka 216,000 tiku lichuwinankgo Tamapakgsin kJapón, chu atsinu ni 40% liskujmakgolh la precursores. *

14. ¿Tuku liwana limasiya escuelas niku masiyakan xlakata Dios? (Na kaʼakxilhti recuadro « Escuelas niku kamasiyanikan kskujnin Tamapakgsin».)

14 Atanu escuelas niku masiyakan xlakata Dios. Escuela xla Precursores, Escuela niku kamasiyanikan xalak Biblia tiku Tamakgaxtokgkgonit chu Escuela niku kamasiyanikan xalak Biblia Lakchixkuwin tiku Ni tamakgaxtokgkgonit, tiku ankgo kʼumakgolh escuelas kamakgtayanit natatliwakglha xtakanajlakan chu xatapaxuwan napulalinkgo la natalichuwinan  Dios. * Putum umakgolh escuelas limasiya pi kiMapakgsinakan liwana kamasiyani kstalaninanin xlakata tlan namakgantaxtikgo xtaskujutkan (2 Tim. 4:5).

Kamasiyanikan natalan namakgantaxtikgo tuku kalakgayawakanit

15. Natalan tiku wi tuku kalakgayawakanit, ¿la nachuna tlawaputunkgo la Jesús?

15 Kalakapastakwi tuku Isaías xlichuwinanit pi Dios xmasiyani Jesús. «Kʼescuela» xalak akgapun, xaKgawasa katsinilh la tlan nakatachuwinan tiku kxlajwanankgonit (Is. 50:4). Jesús limaklakaskilh tuku masiyanika, akxni xlama kKatiyatni tlan kamamakgkatsinilh tiku “kskujtamakgankgotit, chu nkukanankgonit” (Mat. 11:28-30). Chuna la Jesús, natalan tiku wi tuku kalakgayawakanit tlan kamamakgkatsiniputunkgo xnatalan. Wa xlakata lakkaxwilikanit lhuwa escuelas xlakata nakalimakgtayakan natalan xlakata tlakg liwana nakamakgtayakgo natalan.

16, 17. ¿Tuku xlakata lakkaxwilika kʼEscuela niku ankgo putum Lakgkgolotsin chu Siervos Ministeriales? (Na kaʼakxilhti nota.)

16 Escuela niku ankgo putum Lakgkgolotsin chu Siervos Ministeriales. Uma escuela tsukulh 9 xla marzo kata 1959, South Lansing (Nueva York); superintendentes viajantes chu  siervos xla congregación kawanika pi xʼankgolh kʼuma escuela nema xmakgapala akgtum papaʼ. Alistalh, uma curso nema xaʼinglés xwi matitaxtika kʼatanu tachuwin chu tsinu tsinu kʼuma escuela tsukuka kamasiyanikan natalan xlikalanka katiyatni. *

Tala Lloyd Barry masiyama kʼEscuela niku ankgo putum Lakgkgolotsin chu Siervos Ministeriales kJapón (1970)

17 Anuario xla kata 1962 kxaʼinglés lichuwinalh tuku xlakata lilakkaxwilika Escuela niku ankgo putum Lakgkgolotsin chu Siervos Ministeriales, xwan: «Kʼuma kakilhtamaku niku lhuwa taskujut anan chu superintendente xla congregación xla xtatayananin Jehová, talakaskin pi tlan liwana nalakkaxwili la nalin xlatamat chu liwana nakuentajtlawa congregación chu akgtum tasikulunalin nalitaxtu. Nachuna, ni nakalakgmakgan xfamilia kaj xlakata congregación, wata liwana xlilakapastakat tuku natlawa. Lu lanka talakgalhaman kgalhikgolh siervos xla congregación pi xlikalanka kakilhtamaku tlan xʼankgolh Escuela niku ankgo putum Lakgkgolotsin chu Siervos Ministeriales xlakata xkamasiyanika la namakgantaxtikgo tuku Biblia wan pi xlitlawatkan superintendentes» (1 Tim. 3:1-7; Tito 1:5-9).

18. ¿La litamakgtayayaw kimputumkan Escuela niku ankgo putum Lakgkgolotsin chu Siervos Ministeriales?

 18 Putum xkachikin Dios litamakgtayakgonit Escuela niku ankgo putum Lakgkgolotsin chu Siervos Ministeriales. ¿La kamakgtayanit? Akxni lakgkgolotsin chu siervos ministeriales makgantaxtikgo tuku katsinikgonit kʼescuela, tlawakgo la Jesús akxni kamatliwakglhkgo xnatalan. ¿Kapaxtikatsiniya xlakata wanikgoyan lakwan tachuwin, pi kgaxmatnikgoyan, chu akxni siervos ministeriales o lakgkgolotsin lakgapaxialhnankgoyan xlakata namatliwakglhkgoyan? (1 Tes. 5:11.) Umakgolh lakchixkuwin xlikana akgtum tasikulunalin kcongregaciones.

19. ¿Tuku atanu escuelas pulalinkgo Comité de Enseñanza chu tuku xlakata lakkaxwilikanit umakgolh escuelas?

19 Atanu Escuelas niku masiyakan xlakata Dios. Comité de Enseñanza xla Lakgkgolotsin tiku Pulalinkgo xTatayananin Jehová pulalinkgo atanu escuelas niku kamasiyanikan natalan tiku wi tuku kalakgayawakanit kxkachikin Dios. Umakgolh escuelas lakkaxwilikan xlakata nakamakgtayakan natalan, lakgkgolotsin xalak congregación, superintendentes viajantes chu Comité de Sucursal xlakata liwana namakgantaxtikgo lhuwa tuku kalakgayawakanit. Uma curso nema takilhtinit kBiblia kamasiyani natalan la tliwakga natawila xtakanajlakan chu nalimaklakaskinkgo tastakyaw xalak Biblia xlakata la nakalikatsini xborregos Jehová nema kalakgayawakanit (1 Ped. 5:1-3).

Xapulana clase xla Escuela de Entrenamiento Ministerial nema tatlawalh kMalaui (2007)

20. ¿Tuku xlakata Jesús wa pi putum akinin “wa Dios, wanti kinkamasiyaniyan” chu tuku lakkaxwilinita natlawaya?

20 Liwana tasiya pi Mapakgsina Mesías tlawama pi kstalaninanin liwana nakamasiyanikan. Putum tamasiy minacha kʼakgapun: Jehová masiyanilh xKgawasa, chu xla kamasiyanima kstalaninanin. Wa xlakata, Jesús tlan wa pi kimputumkan “wa Dios, wanti kinkamasiyaniyan” (Juan 6:45; Is. 54:13). Liwana kalakkaxwiliw pi nalitamakgtayayaw tuku lakkaxwilinit Mapakgsina. Kalakapastakwi pi putum uma tuku kinkamasiyanikanan kinkamakgtayayan xlakata tliwakga natawila kintakanajlakan chu tlan liwana nalichuwinanaw Dios.

^ párr. 5 ¿La katsiyaw pi xaTlat masiyanilh xKgawasa la namasiyaninan? Kalilakpuwanti uma: Jesús limaklakaskilh lhuwa liʼakxilhtit akxni xmasiya, chuna makgantaxtilh tuku xlichuwinankanit akglhuwa siglo akxni nina xlakachin (Sal. 78:2; Mat. 13:34, 35). Xlikana, Tiku matsokgninalh uma tuku xʼama la wa Jehová, lakkaxwililh pi xKgawasa xʼama limaklakaskin liʼakxilhtit chu parábolas akxni xmasiyalh (2 Tim. 3:16, 17).

^ párr. 6 Titaxtulh makgapitsi papaʼ Jesús «atutumpuxamakaw xlimakgalhtawakgat, wa nti xlichatiyun ntimalakgachakgolh» xlakata nalichuwinankgo Dios, pero na kamasiyanilh tuku nawankgo (Luc. 10:1-16).

^ párr. 12 Makgapitsi liwaka makgtum ankgonit kʼEscuela de Galaad.

^ párr. 13 Xlakata tlakg nakatsiya la makgtayananit xlakata misioneros kilakgonit kʼGalaad kaʼakxilhti capítulo 23 xla libro Los testigos de Jehová, proclamadores del Reino de Dios.

^ párr. 14 Alistalh uma akgtiy escuelas kaj akgtum escuela litaxtulh nema wanikan Escuela xla Tiku lichuwinankgo xTamapakgsin Dios.

^ párr. 16 La uku, putum lakgkgolotsin tlan ankgo kʼEscuela niku ankgo putum Lakgkgolotsin chu Siervos Ministeriales nema ni makgasni tatlawa klakalhuwa kachikinin. Lata kata 1984, siervos ministeriales na tlan ankgo kʼuma escuela.