Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Mapakgsinamaja xTamapakgsin Dios

 CAPÍTULO 18

Tumin nema litatlawa xtaskujut Dios

Tumin nema litatlawa xtaskujut Dios

TUKU NALICHUWINAN UMA CAPÍTULO

Tuku xlakata chu la xtatayananin Jehová mastakgo tumin xlakata xtaskujut Dios

1, 2. 1) ¿Tuku kgalhtilh tala Russell chatum tiku xpulalin takanajla akxni xkatsiputun niku xtatiya tumin nema xlitatlawa xtaskujutkan xLikgalhtawakgananin Biblia? 2) ¿Tuku naʼakxilhaw kʼuma capítulo?

MAKGTUM talakatsuwinilh tala Charles Taze Russell chatum tiku xpulalin Iglesia Reformada tiku xkatsiputun niku xtiyakgo tumin xLikgalhtawakgananin Biblia.

Tala Russell wanilh: «Akinin nikxni kpukinanaw».

Tiku xpulalin takanajla kgalhskininalh: «¿Niku tiyayatit tumin?».

Russell kgalhtilh: «Komo nakwaniyan tuku xaxlikana ni kintikanajlani». Akxni latamanin minkgo ktamakxtumit, ni kamatitaxtinikan niku nawilikgo xtuminkan, pero akxilhkgo pi talaktlawa tumin. Chu xakstukan tsukukgo lakpuwankgo: «Putum uma taxokgo [...]. ¿La tlan nakmasta tsinu tumin xlakata nakmakgtayanan?».

Tiku xpulalin takanajla lakakxilhli tala Russell chu ni kanajlanilh.

Tala Russell wa: Xaxlikana tuku kwaniman. Xlakan kinkgalhskinkgo: «¿La tlan nakmasta tsinu tumin xlakata uma taskujut?». Akxni wi tiku sikulunatlawakan chu kgalhi, limaklakaskimputun xlakata namaxki Malana. Chu komo ni kgalhi, ¿tuku xlakata fuerza naskiniyaw? *

2 Tala Russell xlichuwinama tuku xaxlikana. Xkachikin Dios makgasata xatapaxuwan mastakgo tumin xlakata nalimakgtayanankgo kxaxlikana takanajla. Kʼuma capítulo naʼakxilhaw makgapitsin liʼakxilhtit xalak Biblia chu xala uku. Chuna la naʼakxilhaw uma, kinchatunukan kilitlawatkan uma takgalhskinin: «¿La tlan naklimasiya pi ktataya Tamapakgsin?».

«Putum tiku tlan naku kgalhi kalimilh tuku namaxki Jehová»

3, 4. 1) ¿La kalipawan Jehová tiku kskujnin 2) ¿La makgtayanankgolh israelitas akxni tlawaka tabernáculo?

3 Jehová kalipawan kskujnin. Katsi pi komo nakamaxki talakaskin xatapaxuwan nalimasiyakgo pi kakninanikgo akxni xatapaxuwan wi tuku namastakgo. Kalichuwinaw akgtiy liʼakxilhtit xlakata Israel.

 4 Akxni xkamaxtunita israelitas kʼEgipto, Jehová kawanilh pi xtlawakgolh akgtum tabernáculo nema tlan xmalakgxtukgolh xlakata anta xkakninanikgolh. Pero lhuwa tuku xtalakaskin xlakata xtlawakgolh tabernáculo. Jehová wanilh Moisés pi xkawanilh kachikin wi tuku tlan xlimakgtayanankgolh, wanilh: «Putum tiku tlan naku kgalhi kalimilh tuku namaxki Jehová» (Éx. 35:5). ¿Tuku tlawakgolh? Kalakapastakwi pi nina makgas «palha xkamaskujukan» (Éx. 1:14). Limasiyakgolh pi xmakgtayanamputunkgo, xatapaxuwan mastakgolh oro, plata chu atanu tuku lhuwa xtapalh, atsinu putum tuku mastakgolh wa tuku max kamaxkikgolh xmalanakan kʼEgipto (Éx. 12:35, 36). Israelitas tlakg lhuwa mastakgolh nixawa tuku xtamaklakaskin asta nialh kamaxkika talakaskin naliminkgo (Éx. 36:4-7).

5. ¿Tuku tlawakgolh israelitas akxni David kawanilh pi wi tuku xlimakgtayanankgolh akxni tlawaka templo?

5 Titaxtulh max akgtati ciento tutumpuxamakukitsis kata, David mastalh «tuku lanka xtapalh» xkgalhi xlakata xlitatlawalh templo, xapulana niku xʼamaka kakninanikan Dios kKatiyatni. Alistalh kamaxkilh talakaskin israelitas na wi tuku namastakgo chu kakgalhskilh: «¿Tiku xatapaxuwan nalimin kxmakan la uku akgtum tamakamastan xpalakata Jehová?». Wa xlakata «xliputum xnakujkan tlawanikgolh Jehová tamakamastan xatapaxuwan» (1 Crón. 29:3-9). Xlakata xkatsi niku xminitancha tuku xmakamastama, David wanilh Jehová kxʼoración: «Putum wix kilamaxkiyaw chu kaj kkamaxkiyan tuku kilamaxkinitaw» (1 Crón. 29:14).

6. ¿Tuku xlakata la uku talakaskin tumin xlakata nalitatlawa xtaskujut Dios chu tukuya takgalhskinin tawila?

6 Nipara Moisés chu David fuerza tlawakgolh pi xkachikin Dios wi tuku xmastakgolh. Wata kachikin xatapaxuwan mastakgolh. ¿Tuku tlan nawanaw la uku? Liwana katsiyaw pi xlakata natatlawa taskujut xla xTamapakgsin Dios talakaskin tumin. Talakaskin lhuwa tumin xlakata natatlawa chu natamaʼakgpitsi Biblias chu likgalhtawakga nema takilhtinit kBiblia, nakatlawakan chu nakakuentajtlawakan niku tamakxtumiyaw chu sucursales o nakamakgtayakan natalan akxni wi tuku masputunan. Pero tawila uma lu xlakaskinka takgalhskinin: ¿Niku tatiya tumin nema tamaklakaskin? ¿Talakaskin nakawanikan kskujnin Mapakgsina namastakgo tumin?

«Nikxni ktipukinaw chu ni ktikaskiniw latamanin kakinkamakgtayakgon»

7, 8. ¿Tuku xlakata xkachikin Jehová nikxni katipukinankgolh chu na ni katiskinkgolh tumin?

7 Tala Russell chu tiku xmakgtayakgo ni pukikgolh tumin chuna la xtlawakgo amakgapitsi takanajla tiku kaj wankgo pi kstalaninanin Cristo. Xliʼakgtiy artículo xla revista Watch Tower, ksubtítulo nema xwanikan «Lakaskina Zion’s Watch Tower?», Russell wa: «Xlakata uma revista, kkanajlayaw  pi wa JEHOVÁ tiku kinkamakgtayaman, chu xlakata chuna nikxni ktipukinaw chu ni ktikaskiniw latamanin kakinkamakgtayakgon. Akxni Tiku wan: “Putum oro chu plata xla kasipijni kila” nialh nakinkamaxkiyan tuku talakaskin, nakatsiyaw pi chanita kilhtamaku nialh natlawayaw uma likgalhtawakga» (Ageo 2:7-9). Liwaka akgtum ciento puxamakaw kata titaxtunit chu revista Makatsinina wa tlakg tamakgpitsi chu xkachikin Jehová tlawamajku xtaskujut.

8 Xkachikin Jehová ni skinkgo tumin, ni matitaxtikgo pulatu xlakata napukinankgo kxtamakxtumitkan chu ni malakgachakgo cartas niku skinkgo tumin. Ni tlawakgo rifas, na ni skinkgo tumin akgatunu chiki xlakata namastokgkgo. Wata tlawakgo chuna la wa revista Watch Tower: «Nikxni klakpuwaw pi nakskinaw tumin xlakata kiMalanakan, chuna la atanu takanajla [...]. Klakpuwanaw pi tumin nema tamastokga xlakata pukinankan kxtukuwani Malana limaxana, chu nitlan akxilha chu ni nakasikulunatlawa tiku mastakgo o taskujut nema nalitatlawa». *

«Lantla nchatunu mpuwa namastay kxnaku»

9, 10. ¿Tuku xlakata xatapaxuwan mastayaw kintuminkan?

9 Tiku tapakgsiniyaw Tamapakgsin la uku, ni talakaskin wi tiku xafuerza nakinkawaniyan wi tuku namastayaw. Wata xatapaxuwan limaklakaskinaw kintuminkan o atanu tuku kgalhiyaw xlakata namakgtayananaw kxtaskujut Tamapakgsin. ¿Tuku xlakata xatapaxuwan mastayaw? Kalichuwinaw pulaktutu.

10 Pulana, xatapaxuwan wi tuku mastayaw xlakata paxkiyaw Jehová chu tlawaputunaw «wantu xla lakgatiy» (1 Juan 3:22). Jehová lipaxuwa akxni kskujnin xatapaxuwan mastakgo. Apóstol Pablo lichuwinalh la xlimastatkan kstalaninanin Cristo (kalikgalhtawakga 2 Corintios 9:7). Xaxlikana kstalanina Cristo ni xafuerza masta xtumin. Wata masta la «mpuwa namastay kxnaku». * Uma wamputun pi akxilha tuku tamaklakaskin, la namakgtayanan chu masta. Tiku chuna masta, Jehová paxki xlakata «Dios, paxkiy wa nti xlipaks xtapaxuwan limastay» o la wan atanu Biblia, «Dios paxtikatsini tiku xatapaxuwan masta».

Kamanan xalak Mozambique na xatapaxuwan mastakgo

11. ¿Tuku tlawa pi namaxkiyaw Jehová tuku tlakg tlan kgalhiyaw?

11 Xlipulaktiy, wi tuku mastayaw xlakata nalimasiyaniyaw Jehová pi paxtikatsiniyaw xlakata lhuwa kinkasikulunatlawayan. Wi akgtum tastakyaw xla Limapakgsin nema maxkika Moisés nema kinkamakgtayayan naʼakxilhaw tuku wi kkinakujkan (kalikgalhtawakga Deuteronomio 16:16, 17). Akxni xʼankgo akgtutu paskua nema xtatlawa akgatunu kata chatunu xachixku israelita xlimastat xwanit akgtum tamaskiwin “chuna la xlilhuwa ksikulunatlawanit Jehová”. Wa xlakata akxni nina xʼankgo kpascua, chatunu israelita xliʼakxilhat  la xlilhuwa xsikulunatlawakanit chu xlakpuwa tuku tlakg tlan tamaskiwin tlan xlilh. Nachuna, akxni akxilhaw la xlilhuwa kinkasikulunatlawanitan Jehová tlawa pi namaxkiyaw tuku tlakg tlan kgalhiyaw. Akxni xliputum kinakujkan wi tuku mastayaw, uma kilhchanima tumin, limasiyayaw pi paxtikatsiniyaw putum tasikulunalin nema Jehová kinkamaxkinitan (2 Cor. 8:12-15).

12, 13. ¿La limasiyayaw pi paxkiyaw Mapakgsina akxni xatapaxuwan mastayaw kintuminkan chu la xlilhuwa namastayaw kinchatunukan?

12 Xlipulaktutu, akxni wi tuku xatapaxuwan mastayaw, limasiyayaw pi paxkiyaw Mapakgsina, Jesucristo. ¿Tuku xlakata? Kaʼakxilhwi tuku Jesús kawanilh kstalaninanin xaʼawatiya katsisni akxni latamalh kKatiyatni xlakata nakatsiyaw (kalikgalhtawakga Juan 14:23). Kawanilh: «Lapi wi nti nkimpaxkiy, wa nkintachuwin nakgalhakgaxmata». “Xtachuwin” Jesús na kilhchanima nalichuwinanaw xalakwan xalaksasti xla Tamapakgsin xlikalanka katiyatni (Mat. 24:14; 28:19, 20). Kgalhakgaxmataw uma “tachuwin” akxni limaklakaskinaw putum kilitliwakgakan, kinkilhtamakujkan chu  kintuminkan xlakata natalichuwinan Tamapakgsin. Chuna limasiyayaw pi paxkiyaw Mapakgsina Mesías.

13 Chuna, xlakata ni makgxtakgaw Tamapakgsin, xliputum kinakujkan limasiyaputunaw pi tatayayaw akxni xatapaxuwan mastayaw tumin. Kinchatunukan laksakaw la namastayaw chu la matlaniyaw. Xlikana pi lhuwa kinatalankan ni lhuwa tuku kgalhikgo (Mat. 19:23, 24; Sant. 2:5). Pero tlan limakgkatsikgo akxni katsikgo pi Jehová chu xKgawasa lanka xtapalh akxilhkgo maski ni lhuwa mastakgo pero xliputum xnakujkan tlawakgo (Mar. 12:41-44).

¿La tamastokga tumin?

14. ¿La mastakgonit likgalhtawakga xtatayananin Jehová lhuwata kata?

14 Akglhuwa kata, xTatayananin Jehová xwankgo xtapalh akxni xmastakgo likgalhtawakga, ni lhuwa kskinkan xlakata latamanin tiku ni kgalhikgo tumin tlan xmakglhtinankgolh. Pero akxni chatum xlakgati likgalhtawakga pero nila kxokgo, tlan xmakgxtakgnikan, xlakata xtalakaskin pi xkamakgtayalh tiku xlikana xkatsiputunkgo.

15, 16. 1) ¿Tuku lakgpalikgolh Lakgkgolotsin tiku Pulalinkgo xTatayananin Jehová kkata 1990 xlakata la mastayaw likgalhtawakga? 2) ¿La xatapaxuwan mastakan tumin? (Na kaʼakxilhti recuadro « ¿Tuku litlawakan tumin nema xatapaxuwan tamasta?».)

15 Kata 1990, Lakgkgolotsin tiku Pulalinkgo xTatayananin Jehová, lakgpalikgolh la xtamasta likgalhtawakga. Litsukulh kʼEstados Unidos, putum likgalhtawakga nema xmastakan kaj kskinkan tuku latamanin xatapaxuwan xmastaputunkgolh. Maktum carta nema kamalakgachanika putum congregaciones xwan: «Revistas chu likgalhtawakga nakamaxkikan tiku lichuwinankgo Dios chu atanu tiku nalakaskinkgo pero ni nakawanikan la xtapalh xlakata tlan namakglhtinankgo. [...] Katiwa tiku xatapaxuwan mastaputun xlakata taskujut nema tlawayaw tlan namasta, pero tlan namakglhtinan likgalhtawakga maski nitu namasta». Uma tuku lakkaxwilika makgtayanalh xlakata liwana nataʼakgatekgsa pi taskujut nema tlawayaw ni “nkaj liʼakgskgawintlajayaw xtachuwin Dios” (2 Cor. 2:17). Alistalh, sucursales nema wilakgolh xlikalanka katiyatni na lakkaxwilikgolh xatapaxuwan natamasta tumin.

16 ¿La xatapaxuwan tamasta tumin? Kpukgalhtawakga xla xTatayananin Jehová, wilakgolh laktsu cajas niku tlan mujukan tumin. Nachuna, latamanin tlan namalakgachakgo anta kxtukuwani nema maklakaskinkgo xtatayananin Jehová kxlakatin mapakgsinanin. Akgatunu kata akgtum artículo xla Makatsinina wan la tlan pulaklhuwa namastakgo tumin tiku nalakaskin.

¿La maklakaskinkan tumin?

17-19. Kawanti la tamaklakaskin tumin 1) ktaskujut nema tatlawa xlikalanka katiyatni. 2) akxni tatlawa Pukgalhtawakga xlikalanka katiyatni. 3) xlakata nataxokgo tuku talaktlawa kcongregación.

17 Taskujut nema tatlawa xlikalanka Katiyatni. Tumin talimaklakaskin xlakata nalitaxokgo tuku talaktlawa akxni talichuwinan Dios, la akxni tlawakan likgalhtawakga nema natamaʼakgpitsi xlikalanka katiyatni, natatlawa chu nalikaxtlawakan  sucursales chu nalitlawakan escuelas niku masiyakan xlakata Dios. Na kalimakgtayakan misioneros, superintendentes viajantes chu precursores especiales. Na limaklakaskinkan xlakata nakamakgtayakan kinatalankan akxni wi tuku masputunan. *

18 Tatlawa Pukgalhtawakga xlikalanka katiyatni. Na talimaklakaskin xlakata congregaciones tiku talakaskin natlawakgo xpukgalhtawakgakan o nakaxtlawakgo. Tumin nema xtapaxuwan tamasta, na kalimakgtayakan atanu congregaciones. *

19 Litaxokgo tuku talaktlawa kcongregación. Tumin talimaklakaskin xlakata nataxokgo tuku talaktlawa kcongregación chu xlakata nakaxtlawakan Pukgalhtawakga. Min kilhtamaku lakgkgolotsin nalakkaxwilikgo pi pulaktum tumin namalakgachakgo ksucursal xlakata natatlawa taskujut xlikalanka katiyatni. Akxni chuna tlawakgo, lakgkgolotsin kawanikgo natalan nalakkaxwilikgo la xlilhuwa namalakgachakgo chu komo wankgo pi tlan, tamalakgacha uma tumin. Akgatunu papaʼ, natalan tiku kalakgayawakanit cuentas tlawakgo akgtum tamakatsin la tamaklakaskin tumin chu kalikgalhtawakganikgo congregación.

20. ¿La tlan nalimalankiyaw Jehová tuku lanka xtapalh kgalhiyaw?

20 Akxni akxilhaw putum tuku tatlawa xlakata natalichuwinan Dios chu namakgalhtawakganankan xlikalanka Katiyatni, tlawa pi “nalikakninaniyaw Jehová wantuku laklanka xtapalh kgalhiyaw” (Prov. 3:9, 10). Chu uma na kilhchanima kilitliwakgakan, kintalakapastaknikan chu kintakanajlakan nema limaklakaskimputunaw xlakata naskujnaniyaw Tamapakgsin. Pero na kililakapastakatkan pi tuku lanka xtapalh kgalhiyaw na kilhchanima tumin. Wa xlakata, kamastaw putum tuku matlaniyaw chu akxni matlaniyaw. Tumin nema xatapaxuwan mastayaw malanki Jehová chu limasiyayaw pi tatayayaw Mapakgsina Mesías.

^ párr. 1 Revista Watch Tower, 15 xla julio kata 1915, páginas 218 chu 219.

^ párr. 8 Revista Watch Tower, 1 xla agosto kata 1899, página 201.

^ párr. 10 Chatum biblista wan pi tachuwin xagriego nema wankan «mpuwa namastay kxnaku» kilhchanima «pulana lakkaxwilikan». Chu na wan pi «maski xlikana limin tapaxuwan akxni mastakan, talakaskin nalakkaxwiliyaw» (1 Cor. 16:2).

^ párr. 17 Tlakg nakatsiya la makgtayanankan akxni wi tuku masputunan kcapítulo 20.

^ párr. 18 Tlakg nakatsiya xlakata la Tlawakan Pukgalhtawakga xla xTatayananin Jehová kcapítulo 19.