Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Mapakgsinamaja xTamapakgsin Dios

 CAPÍTULO 11

Kamaskulunkinika xlatamatkan: Limasiya pi Dios xasanto

Kamaskulunkinika xlatamatkan: Limasiya pi Dios xasanto

TUKU NALICHUWINAN UMA CAPÍTULO

La kinkamasiyaninitan Mapakgsina nalilatamayaw xlimapakgsin Dios

Kalilakpuwanti pi titaxtupat kxmalakcha xalanka xtemplo Jehová xaʼespiritual

1. ¿Tuku akxilhli Ezequiel nema kaks lilakawanaw?

KALAKPUWANTI pi na xʼakxilhti tuku akxilhli palakachuwina Ezequiel liwakaya akgtiy mil akgkitsis ciento kata: talakatsuwiya niku wi lanka chu lu stlan templo chu anta ya chatum lu tliwakga ángel xlakata namasiyaniyan uma niku lu kalilakgatit. Wix tawakaya kʼakgtujun escalón nema linan asta niku wi pulaktutu niku laktanukan, nema max 30 metros xlitalhman. Niku laktanukan akxilha pi yakgolh tiku kuentajtlawanamakgolh chu lakswan columnas xtachuna mokgot (Ezeq. 40:1-4, 10, 14, 16, 22; 41:20).

2. 1) ¿Tuku kilhchanima templo xaʼespiritual? (Na kaʼakxilhti nota.) 2) ¿Tuku kinkamasiyaniyan tuku wi niku laktanukan ktemplo?

2 Wa uma templo xaʼespiritual nema akxilhli Ezequiel. Palakachuwina liwana lichuwinan tuku akxilhli kcapítulos 40 asta 48 xla libro nema lin xtukuwani. Uma templo kilhchanima tuku Jehová lakkaxwilinit xlakata la nakakninanikan. Pulakatunu tuku talichuwinan wi tuku kilhchanima kkintakakninkan kʼuma xaʼawatiya kilhtamaku. * ¿Tuku kilhchanima uma laklanka malakcha? Kinkamalakapastakayan pi tiku tsukukgo kakninanikgo Dios talakaskin nalilatamakgo xatlan chu xaʼakgstitum xlimapakgsin. Na watiya kilhchanima mokgot, xlakata min kilhtamaku kBiblia akxni talichuwinan mokgot kilhchani xaʼakgstitum (Sal. 92:12). ¿Chu tuku kilhchanima niku kuentajtlawanamaka? Limasiya pi tiku ni kgalhakgaxmatkgo xlimapakgsin Dios ni kamaxkikan talakaskin natanukgo kʼuma kxakastlan niku tlan nakakninanikgo Dios (Ezeq. 44:9).

3. ¿Tuku xlakata kstalaninanin Cristo putum kilhtamaku maklakaskinkgonit nakamaskulunkikan?

3 ¿La kgantaxtunit tuku akxilhli Ezequiel? Chuna la akxilhwi kcapítulo 2, Jehová limaklakaskilh Cristo xlakata xkamaskulunkilh xkachikin lata kata 1914 asta akxni xtsukuma 1919. ¿Antiya tapakgtalh? ¡Nichuna! Uma akgtum ciento kata nema titaxtunita, Jesucristo chuntiyaku tlawama katamakgantaxtilh xlimapakgsin Jehová. Chuntiyaku talakaskin nakamaskulunkikan kstalaninanin. ¿Tuku xlakata? Xlakata Cristo katamakxtunit kstalaninanin kxakalixkajni kakilhtamaku chu Satanás chuntiyaku tlawaputun kaxkajwanankgolh (kalikgalhtawakga 2 Pedro 2:20-22). Kalichuwinaw  pulaktutu niku xaxlikana kstalaninanin Cristo kamaskulunkimaka. Pulana naʼakxilhaw xlakata la xlinkgo xlatamatkan, alistalh tuku talakaskin xlakata xaskulunku natawilakgo kcongregación chu xaʼawatiya xlakata familia.

Chuna la titaxtunit kata mastakan limapakgsin xlakata latamat

4, 5. ¿Tuku makgasa limaklakaskin Satanás, chu la kitaxtuninit?

4 Xkachikin Jehová putum kilhtamaku liskujkgonit xlakata tlan chu xaskulunku linkgo xlatamatkan. Wa xlakata tlawakgo tuku kawanikan xlakata uma. Kaʼakxilhwi makgapitsi.

5 Talakgxtumit xalimaxana. Jehová lakkaxwililh pi tiku tamakgaxtokgkgonit xlipaxuwakgolh talakgxtumit chu nitu xlixkajwanalh. Pero Satanás maxkajwani uma lu stlan tamaskiwin chu limaklakaskin xlakata xlakskujnin Jehová wi tuku natlawakgo xlakata nialhla natalalinkgo. Limaklakaskinit uma chu lu nitlan tuku kitaxtulh kxkilhtamaku Balaam, chu la uku xaʼawatiya kilhtamaku tlakg limaklakaskima (Núm. 25:1-3, 9; Apoc. 2:14).

6. ¿Tuku talakkaxlan taxtulh krevista Watch Tower, la xtamaklakaskin chu tuku xlakata nialh maklakaskinka? (Na kaʼakxilhti nota.)

6 Xlakata namalakgachokgokan tuku tlawama Satanás, revista Watch Tower 15 xla junio kata 1908 lichuwinalh tuku xtalakkaxwilinit chu xwan: «Putum kilhtamaku chu xanikuta akxni kiʼakstu kwi, chuna naklikatsini chatum puskat o chixku la xaklikatsinilh akxni xaktawi xlakatin amakgapitsin». * Maski uma talakkaxlan ni akgtum limapakgsin xwanit, lhuwa makgantaxtikgolh chu wilika xtukuwanikan krevista. Titaxtulh akglhuwa kata, xkachikin Jehová akxilhli pi maski uma tuku xtalakkaxwilinit lu makgtayananit, kaj akgtum talismanin xlitaxtuma wa xlakata nialh limaklakaskinka. Pero, putum kilhtamaku tamakgantaxtilh limapakgsin xlakata la linkan latamat.

7. Kkata 1935, ¿tukuya taʼakglhuwit lichuwinalh revista La Torre del Vigía chu tuku wa pi xlitatlawat?

7 Satanás tlakg kaputsastalanilh. Revista La Torre del Vigía xla agosto kata 1935, liwana lichuwinalh taʼakglhuwit nema tlakg kstakma kxkachikin Dios. Makgapitsi xlakpuwankgo pi komo xʼankgolh lichuwinankgo Dios nialh xtalakaskilh namakgantaxtikgo xlimapakgsin Jehová xlakata la linkan latamat akxni xakstukan xwilakgolh. Revista liwana wa pi «nalichuwinanaw Dios ni wa putum tuku talakaskin». Na wa pi xtatayananin Jehová linaw xtukuwani, chu lakgayaw pi «liwana napalakachuwinanaw Jehová chu xtamapakgsin». Uma artículo mastalh tastakyaw xlakata tamakgaxtokgat chu xlakata talakgxtumit, nema kamakgtayalh xkachikin Dios xtsalanikgolh talakgxtumit nema ni xlitatlawat (1 Cor. 6:18).

8. ¿La revista Makatsinina makglhuwa liwana lichuwinalh xlakata tuku kilhchanima tachuwin nema talimaklakaskin kTatsokgni xaGriego xlakata talakgxtumit xalimaxana?

8 Nina akglhuwa kata, revista Makatsinina makglhuwa lichuwinalh tuku kilhchanima tachuwin nema limaklakaskinkan kTatsokgni xaGriego xlakata talakgxtumit xalimaxana, pornéia. Ni kaj kilhchanima talakgxtumit wata na kilhchanima pulaklhuwa talakgxtumit la tuku nitlan tatlawa tiku stakgo  xmaknikan. Uma kalimakgtayakanit kstalaninanin Cristo xlakata ni namakgtanukgo uma tuku xalixkajni nema tlakg talhuwima kkakilhtamaku (kalikgalhtawakga Efesios 4:17-19).

9, 10. 1) ¿Tuku lichuwinalh revista La Torre del Vigía kkata 1935 xlakata la linkan latamat? 2) ¿Tuku wan Biblia xlakata kuchu?

9 Malakatsalikan la wakan kuchu. Revista La Torre del Vigía xla agosto kata 1935, lichuwinalh apulaktu xlakata la linkan latamat: «Na taʼakxilhnit pi makgapitsi wakgo kuchu akxni lichuwinankgo Dios o kʼatanu taskujut kxkachikin Dios. ¿La wan Biblia pi tlan nalimaklakaskinaw kuchu? ¿Pi tlan nawayaw kuchu nema natlawa pi nialh liwana naskujnaniyaw xkachikin Malana?».

10 Revista mastalh xtakgalhtin xlakata la namaklakaskinkan kuchu chuna la wan xTachuwin Dios. Biblia ni wan pi nitlan nawakan kuchu, pero lakatanks wan pi nitlan kgachikan (Sal. 104:14, 15; 1 Cor. 6:9, 10). Tiku wakgo kuchu akxni tlawakgo xtaskujut Dios, xlilakapastakatkan xkamanan Aarón, tiku Dios kamakgnilh xlakata makamastakgolh lhkuyat nema ni xlilat kxpumakamastan Dios. Ni lhuwa kilhtamaku titaxtulh, Biblia lichuwinan pi Dios kalimapakgsilh putum xalakpuxku sacerdotes pi nila xwakgo kuchu akxni wi tuku xasanto xtlawamakgolh. Uma limasiya tuku max kamatlawilh umakgolh lakchixkuwin tuku lu nitlan (Lev. 10:1, 2, 8-11). La uku kstalaninanin Cristo makgantaxtikgo uma tastakyaw, kuentajtlawakgo pi ni nawakgo kuchu akxni skujnanikgo Dios.

11. ¿Tuku xlakata akgtum tasikulunalin akxilhkgolh xkachikin Dios akxni tlakg kamaʼakgatekgsnika xlakata takgachin?

11 Nina makgas, kstalaninanin tlakg liwana akgatekgskgonit tuku wamputun takgachin, nema kilhchanima tiku lhuwa wa kuchu asta smanipasa. Xlakata taway xla takanajla nema chin kxkilhtamaku, lhuwa kalimakgtayakan namakgxtakgkgo kuchu chu tlan nalinkgo xlatamatkan. Chu chalhuwa kamakgtayakanit ni nasmanipasakgo kuchu. Niti xlimastat talakaskin pi kuchu xtlawalh pi nitlan xʼakxilhka, xtamakgatlinilh xfamilia chu tuku tlakg xlakaskinka, takaknin nema maxki Jehová.

«Nila lakpuwanaw pi kiMalanakan nalikankala lixkuli o nakilhtanu tuku xalixkajni.» Charles Taze Russell

12. ¿La xʼakxilhkgo axkut kstalaninanin Cristo akxni nina xtsuku xaʼawatiya kilhtamaku?

12 Maklakaskinkan axkut, o lixkuli. Kstalaninanin Cristo nitlan xʼakxilhkgo limaklakaskinkan lixkuli lata akxni nina xtsuku xaʼawatiya kilhtamaku. Akglhuwa kata, chatum tala tiku lina kata, Charles Capen, lakapastaka xapulana akxni tachuwinalh Charles Taze Russell akxni ksputmaja siglo XIX. Capen tiku xkgalhi 13 kata, chu kgalhtutu xnatalan xwilakgolh kʼescaleras xalak Casa Bíblica de Allegheny (Pensilvania, Estados Unidos). Akxni Russell titaxtulh kakgalhskilh: «¿Xkulipatit lakgkgawasan? Takgankgawanan pi xkulimaka». Xlakan wankgolh pi ni kxkulimakgolh. Liwana katsikgolh tuku xlakapastaka Russell xlakata xkulikan. Revista Watch Tower 1 xla agosto kata 1895, tala Russell lichuwinalh xlakata  2 Corintios 7:1 chu wa: «Klakpuwan pi nila talimalanki Dios o litamakgtaya chatum kstalanina Cristo tiku limaklakaskin lixkuli. [...] Nila lakpuwanaw pi kiMalanakan nalikankala lixkuli o nakilhtanu tuku namaxkajwani».

13. ¿La tamaskulunkilh la xlinkan latamat kkata 1973?

13 Kata 1935, La Torre del Vigía limapakuwilh lixkuli «xalixkajni tuwan» chu wan pi nipara chatum tiku xlakgtsakgalh o kxkulilh axkut tlan xtawilalh kBetel o xpalakachuwinalh xkachikin Dios la precursor o superintendente viajante. Pero kata 1973 tlakg kinkamaskulunkikan. Revista La Atalaya 15 xla octubre wa pi nipara chatum xtatayana Jehová tlan xʼakxilhka kcongregación komo chuntiyaku xlilh xalixkajni latamat chu nema ni limasiya tapaxkit. Akxni xkamaxkikanita kilhtamaku tiku xmakgxtakgputunkgolh axkut xʼamaka kamaxtukan kcongregación. * Cristo wi tuku lu xlakaskinka xtlawanit xlakata xkamaskulunkilh kstalaninanin.

14. ¿Tuku wan Dios xlakata kgalhni, chu la tsukuka kawilinikan lhuwa latamanin?

14 Nitlan limaklakaskinkan kgalhni. Kxkilhtamaku Noé, Dios lakkaxwililh pi nitlan wakan kgalhni. Dios kawanipa amakgtum uma Limapakgsin xkachikin Israel, chu nachuna kawanika congregación xla kstalaninanin Cristo «ni nawayatit [...] nkgalhni» (Hech. 15:20, 29; Gén. 9:4; Lev. 7:26). Ni kaks lilakawanaw la Satanás tekgsnit pi uku lhuwa ni nakgalhakgaxmatkgo uma xlimapakgsin Dios. Ksiglo XIX, makuchinanin tsukukgolh lakputsananikgo la nakawilinikgo kgalhni latamanin, akxni katsika la tipalit kgalhni anan, uma talismanin tsukulh talakgatumi. Kkata 1937, tsukuka kamastokgkan kgalhni, chu alistalh kxliʼAkgtiy Guerra xLikalanka Katiyatni tlakg tsukuka limaklakaskinkan.Tsukuka limaklakaskinkan kgalhni xlikalanka kakilhtamaku.

15, 16. 1) ¿La akxilhkgolh xTatayananin Jehová nakawilinikan kgalhni? 2) ¿Tuku tamakgtay kamaxkika kstalaninanin Cristo xlakata ni nakawilinikan kgalhni, chu tuku kitaxtulh?

15 Kkata 1944, revista The Watchtower lichuwinalh pi akxni wi tiku wilinikan kgalhni, kitaxtu la wakan (uma artículo taxtulh krevista La Atalaya 15 xla abril kata 1945). Titaxtulh makgapitsi papaʼ, tlakg liwana talichuwinalh xlakata tuku wan Biblia. Kkata 1951 taxtulh akgtum lista xla takgalhskinin chu takgalhtin nema kamakgtayalh kskujnin Dios tlan nakatachuwinankgo makuchinanin. Natalan xlikalanka kakilhtamaku makgantaxtikgolh uma limapakgsin, maski xmin kilhtamaku xkalikgalhkgamanankan, nitlan xkalikatsinikan o asta lu xkaputsastalanikan. Pero Cristo chuntiya tlawalh pi xkachikin xmastakgolh tamakgtay nema xtalakaskin chu xmaxtukgolh artículos chu folletos niku liwana xlichuwinan chu xlakputsanankanit xlakata kgalhni.

16 Kkata 1979, makgapitsi lakgkgolotsin tsukukgolh lakgapaxialhnankgo hospitales xlakata xkamakgtayakgolh makuchinanin xʼakgatekgskgolh tuku kanajlayaw, chu tuku wan Biblia xlakata kgalhni chu tuku atanu tuku tlan xlimaklakaskinka xlakgxokgo kgalhni. Kkata 1980, lakgkgolotsin xalak  39 kachikinin kʼEstados Unidos kamasiyanika xlakata xtlawakgolh uma taskujut. Nachuna Lakgkgolotsin tiku Pulalinankgo mastakgolh talakaskin pi xlikalanka kakilhtamaku xtawilakgolh Comités de Enlace con los Hospitales. Chuna la titaxtunit kata lhuwa tuku talakgpalinit. La uku, lhuwa makuchinanin, cirujanos chu anestesistas, kamakgtayakgo xtatayananin Jehová tiku tatatlakgo chu tlan akxilhkgo akxni skinaw pi ni kakinkawilinikan kgalhni. Tlakg lhuwa hospitales ni limaklakaskinkgo kgalhni akxni makuchinankgo, chu asta makgapitsi lakpuwankgo pi wa tuku tlakg tlan likuchunkan. ¿Ni xlikana pi lu lipaxuwayaw akxni lakpuwanaw la Jesús kakuentajtlawanit kstalaninanin xlakata Satanás ni nakamaxkajwani? (Kalikgalhtawakga Efesios 5:25-27.)

Tlakg lhuwa hospitales ni limaklakaskinkgo kgalhni akxni makuchinankgo, chu asta makgapitsi lakpuwankgo pi wa tuku tlakg tlan likuchunkan

17. ¿La tlan nalimasiyayaw pi lu xlakaskinka akxilhaw la Cristo kamaskulunki kstalaninanin?

17 Tlan kiakstukan kakinkakgalhskinkan: «¿Lu xlakaskinka kakxilha la Jesús kinkamaskulunkiman, kinkamasiyaniman nalinaw kilatamatkan chuna la lakgati Jehová?». Komo chuna, kililakapastakatkan pi Satanás putum kilhtamaku putsama namaxkajwaniyaw kilatamatkan, xlakata katsi pi chuna natamakgatliniyaw Jehová chu Jesús. Xlakata nichuna nakinkaʼakgspulayan, xkachikin Jehová putum kilhtamaku  kinkamaxkiyan tastakyaw xlakata talismanin nema lakatsala xlimapakgsin Dios. Skgalalh katawilaw, chu kakgalhakgaxmatwi uma tastakyaw nema lu kinkamakgtayayan (Prov. 19:20).

Kuentajtlawakan congregación tlan nalinkgo xlatamatkan

18. ¿Tuku kinkamalakapastakayan tuku maʼakxilhnika Ezequiel xlakata tiku ni kgalhakgaxmatkgolh xlimapakgsin Dios?

18 Xlipulaktiy niku kinkamaskulunkikanitan wa tuku tatlawa xlakata congregación nitu nalixkajwanan. Lu nitlan pero ni paks tiku makgamakglhtinankgo xlimapakgsin Jehová xlakata la linkan latamat chu tamakamastanikgo makgantaxtikgo. Makgapitsin nitlan tsukukgo likatsikgo chu nialh kgalhakgaxmatputunkgo umakgolh limapakgsin. ¿Tuku tlan katlawanikan? Tekgsaw tastakyaw xlakata tuku maʼakxilhnika Ezequiel xlakata templo xaʼespiritual nema lichuwinaw niku tsuku uma capítulo. ¿Lakapastaka uma laklanka malakcha? Pulakatunu yakgolh tiku kuentajtlawanamakgolh. Kuentajtlawamakgolh templo, kuentajtlawamakgolh ni natanu «tiku ni tacircuncidartlawanit xnaku» (Ezeq. 44:9). Uma liwana kinkamalakapastakayan pi nila putum natanukgo kxaxlikana takanajla, kaj tlan natanukgo tiku liskujmakgolh nalinkgo xlatamatkan chuna la Jehová lakaskin. Nachuna la uku, ni kaj katiwa tiku tlan nakatatamakxtumikgo natalan xlakata nakakninanikgo Jehová.

19, 20. 1) ¿La Cristo tsinu tsinu kamakgtayanit kstalaninanin nakatsikgo la natalakkaxlakgo tiku tlawa lanka talakgalhin? 2) ¿Tuku pulaktutu kalitamakxtukan tiku ni makgxtakgkgo xtalakgalhinkan?

19 Kkata 1892, revista Watch Tower wa: «Kinkalakgchanan nakamaxtuyaw kstalaninanin Cristo tiku ni makgamakglhtinankgo xtalakgmaxtut Cristo [...] kimpalakatakan» (kalikgalhtawakga 2 Juan 10). Kkata 1904, libro The New Creation (Xasasti tamalakatsukin) wa pi tiku ni xmakgxtakga tuku nitlan, max namaxkajwani congregación. Ama kilhtamaku lakkaxwilika «tiku xlakputsananinankgolh kpusikulan» xlakata putum congregación tlan xlakkaxtlawakgolh akxni xtatlawama laklanka talakgalhin. Kkata 1944, La Atalaya lichuwinalh pi kaj natalan tiku xkalakgayawakanit nakuentajtlawakgo congregación tlan xlakkaxtlawakgolh uma taʼakglhuwit. Pero revista La Atalaya kkata 1952, talichuwinalh la xlitatlawat akxni wi tiku talakkaxlakan chuna la wan Biblia, xwan pi na xmaxtukan tiku ni xmakgxtakga xtalakgalhin xlakata nitu xlixkajwanalh congregación.

20 Ama kata asta la uku, Cristo kamakgtayanit kstalaninanin xlakata tlakg liwana naʼakgatekgskgo chu nakatsikgo tuku natlawakgo akxni wi tiku tlawa lanka talakgalhin. Lakgkgolotsin liwana kamasiyanikan la nalakkaxtlawakgo akgtum taʼakglhuwit chuna la Jehová lakaskin, xlakata xla xaʼakgstitum chu xalakgalhamana. La uku liwana katsiyaw pulaktutu tuku xlakata maxtukan kcongregación tiku ni makgxtakga xtalakgalhin: 1) xlakata ni lixkajni nalichuwinankan xtukuwani  Jehová 2) xlakata congregación ni natalixkajwani talakgalhin chu 3) tiku lakgalhinan namakgxtakga xtalakgalhin.

21. ¿Tuku xlakata wanaw pi akxni wi tiku maxtukan akgtum tasikulunalin kitaxtu xkachikin Dios?

21 Lu kamakgtaya kstalaninanin Cristo xlakata lakkaxwilikanit natamakxtukan lakgalhina. Kxamakgan Israel, tiku xtlawakgo laklanka talakgalhin xtlawakgo pi na nitlan xlikatsikgolh kachikin, chu xmin kilhtamaku tlakg lhuwa xwankgonit nixawa tiku xpaxkikgo Jehová chu xtlawaputunkgo tuku xaʼakgstitum. Xlakata uma, kachikin makglhuwa tlawakgolh pi nitlan xlichuwinanka xtukuwani Jehová chu wa xlakata kalakgmakgalh (Jer. 7:23-28). Pero la uku xkachikin Jehová tapakgsikgo lhuwa lakchixkuwin chu lakpuskatin xaʼespirituales, ni xtachuna la Israel. Akxni katamakxtukan lakgalhinanin tiku ni makgxtakgkgo xtalakgalhinkan, ni kamaxkikan talakaskin nakalimaklakaskin Satanás xlakata nakatlawani tuku nitlan congregación chu nalakxtlawa la talalinkgo Dios. Xlakata nialh tawila tiku nakamatlawi tuku nitlan, congregación tlan talalin Jehová. Kalilakapastakwi pi Jehová kinkawaniyan: «Katuwa tuku nalitalachipaputunkana, nitu katilitlawanikgon» (Is. 54:17). ¿Katatayayaw lakgkgolotsin, tiku lakgayakgo tuku lu tuwa akxni wi tiku talakkaxlakgo?

Tamalanki Tiku malakatsukilh putum familia

22, 23. ¿Tuku xlakata lu kapaxtikatsiniyaw kinatalankan tiku latamakgolh akxni xtsukuma siglo XX, pero tuku xtalakaskin tlakg liwana xʼakgatekgskgolh xlakata familia?

22 Xlipulaktutu niku kstalaninanin Cristo kamaskulunkimaka wa ktamakgaxtokgat chu kfamilia. Akgtum liʼakxilhtit, akxni likgalhtawakgayaw tuku xtlawakgo xlakskujnin Dios akxni xtsukuma siglo XX, kaks lilakawanaw akxni akxilhaw pi lhuwa tuku xlimakgxtakgkgo. Maski lu kalipaxtikatsiniyaw pi pulana wilikgolh kxlatamatkan naskujnikgo Dios, pero xtalakaskin pi ni xmalakatsalikgolh. ¿Tuku xlakata?

23 Lhuwa natalan xʼankgo lichuwinankgo Dios o xlitaxtukgo la superintendentes akglhuwa papaʼ chu makgat xtawilakgolh kxchikkan. Xmin kilhtamaku xwankan pi nitlan tamakgaxtokgkan maski Biblia nichuna xwan chu na ni lu xlichuwinankan la tlan tliwakga xtawilalh tamakgaxtokgat. Pero la uku nichuna la.

Akxni naskujniyaw Dios uma ni tlawa pi ni namakgantaxtiyaw tuku lakgayaw kfamilia

24. ¿La kamakgtayanit Cristo kstalaninanin xlakata xʼakxilhkgolh tamakgaxtokgat chu familia chuna la xlilat?

24 La uku kinkawanikanan pi akxni naskujniyaw Dios uma ni tlawa pi ni namakgantaxtiyaw tuku lakgayaw kfamilia (kalikgalhtawakga 1 Timoteo 5:8). Nachuna, Cristo lakkaxwilinit pi kstalaninanin putum kilhtamaku nakalistakyawakan Biblia xlakata la tlan nalinkgo xtamakgaxtokgatkan chu latamat kfamilia (Efes. 3:14, 15). Kata 1978, taxtulh libro Cómo lograr felicidad en su vida familiar. Chu akxni xtitaxtunita max 18 kata taxtulh libro El secreto de la felicidad familiar. Chu krevista Makatsinina maxtukanit lhuwa artículo nema kamakgtayakgo tiku tamakgaxtokgkgonit xlakata namakgantaxtikgo tastakyaw xalak Biblia kxtamakgaxtokgatkan.

25-27. ¿La kamakgtayakanit kamanan tiku tanu tanu kata kgalhikgo chuna la titaxtunit kata?

 25 ¿Tuku tlan nawanaw xlakata laktsu kamanan chu tiku stakmakgolha? Chuna la titaxtutilhama kata tlakg kamaxkimaka tuku maklakaskinkgo. Makgasata xkachikin Jehová mastama tuku nakamakgtaya kamanan tiku tanu tanu kata kgalhikgo, maski xapulana ni lhuwa tuku xkgalhikgo la uku lhuwa anan. Akgtum liʼakxilhtit, lata kata 1919 asta 1921 taxtulh krevista The Golden Age (nema la uku lilakgapaskan ¡Despertad!) artículo nema xwanikan «Juvenile Bible Study» (Kalimakgalhtawakgakan Biblia Kamanan). Kkata 1920 maxtuka folleto nema xkgalhi dibujos The Golden Age ABC, chu kkata 1942 libro Hijos (Kamanan). Chu kdécada 1970, taxtukgolh libros Escuchando al Gran Maestro, Tu juventud... aprovechándola de la mejor manera, chu Mi libro de historias bíblicas. Kata 1982, revista ¡Despertad! taxtulh serie «Los jóvenes preguntan», chu kkata 1989 taxtulh libro Lo que los jóvenes preguntan. Respuestas prácticas.

Folleto Tuku kkatsinima xalak Biblia lu xatapaxuwan makgamakglhtinanka klanka tamakxtumit kʼAlemania

26 La uku, kgalhiyaw akgtiy volúmenes xla libro Lo que los jóvenes preguntan, chu chuntiya taxtuma series ksitio xla Internet  jw.org. Nachuna kgalhiyaw libro Aprendamos del Gran Maestro. Kkisitiojkan xla Internet anan lhuwa tuku kalimakgtayakan kamanan, na limin tarjetas xlakata tiku talichuwinan kBiblia, videos, dibujos xla tiku talichuwinan kBiblia, tuku katsinikan xalak Biblia xlakata tiku kgalhikgo akgtutu kata o nina makgatsikgo. Liwana tasiya pi Jesús chuntiya kaʼakxilha kamanan chuna la akxni kaʼakgpixtiyalh akxni xlama kKatiyatni (Mar. 10:13-16). Lakaskin pi kamanan kamakgkatsikgolh pi kapaxkikan chu tliwakga katawilalh xtakanajlakan.

27 Jesús na lakaskin pi nitu kakaʼakgspulalh kamanan. Kʼuma kakilhtamaku xalixkajni, tlakg kalikgamanamaka kamanan. Pero likgalhtawakga nema taxtuma lu kamakgtayama natlatni nakuentajtlawakgo xkamanan xlakata niti nakalikgamanan. *

28. 1) Chuna la maʼakxilhnika templo Ezequiel, ¿tuku talakaskin natlawayaw xlakata natanuyaw kxtemplo Jehová xaʼespiritual? 2) ¿Tuku liwana lakkaxwilinita natlawaya?

28 Lu lipaxuwayaw akxni akxilhaw la Jesús chuntiya kamaskulunkima kstalaninanin, kamasiyani la nalinkgo xlatamatkan chu chuna litamakgtayakgo lu xatlan xlimapakgsin Jehová. Kalilakapastakpara templo chu laklanka malakcha nema maʼakxilhnika Ezequiel. Xlikana uma templo ni wi kkatiyatni wata xaʼespiritual. Pero ¿tlan la xaxlikana naʼakxilhaw? Ni tanuyaw kʼuma templo akxni anaw kPukgalhtawakga, akxni likgalhtawakgayaw Biblia o akxni tlakgaw malakcha xlakata lichuwinamaw Dios. Uma tlan akxilhaw chu xamayaw. Asta tiku kaj nalimasiya tlan natlawa uma taskujut pero nikxni tanu kxtemplo Jehová. Wa xlakata, tanuyaw niku tlakg xasanto, chuna la lakkaxwilinit nakakninaniyaw, komo tlawayaw chu lilatamayaw xlimapakgsin Jehová chu kakninaniyaw chuna la xlilat. Putum kilhtamaku lu xlakaskinka kaʼakxilhwi uma talakgalhaman. Kaliskujwi xlakata xasanto nawanaw la Jehová chu katatayaw xaʼakgstitum xlimapakgsin.

^ párr. 2 Kkata 1932, tomo 2 xla libro Vindication (Malankinankan) wa pi tuku Biblia xlichuwinanit pi nala niku xwan pi nawiliparakan xkachikin Dios kkatiyatni, la uku kgantaxtulh, ni wa xkilhchanima Israel, wata wa Israel xaʼespiritual. Uma tuku xwankanit pi nala xkilhchanima nawiliparakan xaxlikana takanajla. Revista La Atalaya 1 xla marzo kata 1999, lichuwinalh pi tuku maʼakxilhnika Ezequiel xlakata templo xkilhchanima pulaktum tuku xwankanit xlakata nalakkaxwilikan xaxlikana takanajla chu wa xlakata kgantaxtuma la uku xaʼawatiya kilhtamaku.

^ párr. 6 Uma tuku xlakkaxwilikgonit na xwan pi nila chatum chixku chu chatum puskat xakstu xtawilakgolh kchiki komo ni xtalakkinit malakcha, komo ni tamakgaxtokgnit o familia xwankgolh. Akglhuwa kata, chali chali tsisa Adoración Matutina xkamalakapastakakan uma talakkaxlan tiku xwilakgolh kBetel.

^ párr. 13 Ni limaklakaskinkan axkut kilhchanima ni naxkulikan, ni nalakgtsakgakan chu ni nachankan.

^ párr. 27 Akgtum liʼakxilhtit, kaʼakxilhti capítulo 32 xla libro Aprendamos del Gran Maestro, na kaʼakxilhti páginas 3 asta 11 xla revista ¡Despertad! octubre xla kata 2007.