Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Tlan liʼakxilhtit xtakanajlakan

 CAPÍTULO 4

«Niku wix napina na anta nakan»

«Niku wix napina na anta nakan»

1, 2. 1) ¿La wi tiji niku amakgolh Rut chu Noemí chu tukuya talipuwan kgalhikgo? 2) ¿Tuku xlakata tanu tanu lakapastaktilhakgo Rut chu Noemí?

RUT chu Noemí tlawamakgolh kxakaxtum xtiyat Moab. Xakstukan tamakgxtakgkgonit. Nipara liwana talakgapaskgo la tlawamakgolh xlakata lu unama. Rut akxilha pi tsankgamaja chichini. Lakakxilha xputiatse xpuwitichat chu lakpuwan, «horaja max nakputsa niku naklhtatayaw». Lu paxki xputiatse chu natlawa tuku natalakaskin xlakata nakuentajtlawa.

2 Xchatunukan linkgo xtalipuwankan, o xtalakgaputsitkan. Akglhuwata kata Noemí nialhtu kgalhi xchixku chu la uku kalakgtasa xkamanan tiku nikgolh, Mahlón chu Kilión. Rut na nitlan makgkatsi xlakata nilh Mahlón tiku xchixku xwanit. Xchatiykan amakgolh kBelén nema tapakgsi kʼIsrael. Pero, tanuj tanuj la lakapastaktilhakgo. Noemí taspitma kxkachikin, Rut ama niku ni lakgapasnan, kamakgxtakgma xparientes, xkachikin, la makgastakka chu makgxtakgma putum xdioses (kalikgalhtawakga Rut 1:3-6).

3. ¿Tukuya takgalhskinin pulana nakgalhtiyaw komo kgalhiputunaw takanajla chuna la Rut?

3 ¿Tuku xlakata chatum tsumat la Rut kaj lakapala lakgpalilh xlatamat? ¿Niku tiyalh litliwakga xlakata tanu latamat nalin chu nakuentajtlawa xputiatse? Rut tiku moabita xwanit lu tlan liʼakxilhtit xlakata xtakanajla, chu akxni nakatsiyaw xtakgalhtin umakgolh takgalhskinin nakinkamakgtayayan nachuna natlawayaw. (Na kaʼakxilhti recuadro « Lu tlan tuku tatsokgnit maski aktsu».) Pero, pulana kaʼakxilhwi tuku xlakata uma chatiy lakpuskatin amakgolh kBelén niku lu makgat.

Tawilalh talipuwan kʼakgtum familia

4, 5. 1) ¿Tuku xlakata Noemí chu xfamilia ankgolh kMoab? 2) ¿Tukuya taʼakglhuwit kgalhilh Noemí kMoab?

4 Moab aktsu kachikin, niku stakli Rut, xwi kʼeste niku wi mar Muerto. Xwi klaklanka sipi chu ni lu xʼanan kiwi. «Xkapukuxtun  Moab» lhuwa tuku xmakgalanan, maski kʼIsrael xʼanan tatsinkstat. Wa xlakata Mahlón chu xfamilia lakgapaskgolh Rut (Rut 1:1).

5 Xlakata xʼanan tatsinkstat kʼIsrael, Elimélec, xchixku Noemí, taxtulh niku kstaknit chu taʼalh xpuskat chu chatiy xlakgkgawasan kMoab. Akxni ankgolh kʼMoab litasiyalh la xwi xtakanajlakan xlakata israelitas xkawanikanit pi makglhuwa naʼankgo kakninanikgo Jehová niku xlaksaknit (Deut. 16:16, 17). Maski Noemí nikxni taxlajwanilh xtakanajla lu lilipuwa akxni nilh xchixku (Rut 1:2, 3).

6, 7. 1) ¿Tuku xlakata Noemí max lu lilakgaputsalh xlakata xkamanan tatamakgaxtokgkgolh moabitas? 2) ¿Tuku kinkamasiyaniyan la Noemí kalikatsinilh Rut chu Orpá?

6 Max nitlan makgkatsipa akxni xkamanan tatamakgaxtokgkgolh lakpuskatin xalak Moab (Rut 1:4). Noemí xkatsi pi Abrahán fuerza tlawalh naputsani xpuskat xkgawasa Isaac anta kxfamilia, xlakata na xkakninanikgo Jehová (Gén. 24:3, 4). Nachuna, Limapakgsin nema maxkika Moisés xwan pi israelitas nitlan xkakitaxtunilh komo xkamanankan xtatamakgaxtokgkgolh tiku ni xalak Israel, xlakata uma max xtlawalh na xkakninanikgolh ni xaxlikana dioses (Deut. 7:3, 4).

7 Maski chuna xkawanikanit, Mahlón chu Kilión tatamakgaxtokgkgolh moabitas. Max Noemí nitlan xlimakgkatsi o xlilakgaputsa, pero fuerza tlawalh xlakata tlan xkalikatsinilh chu xkapaxkilh Rut chu Orpá. Max xlakpuwan pi xmilh kilhtamaku na xkakninanikgolh Jehová. Pero katsiyaw pi xlakan xpaxkikgo xputiatsekan. Tayanikgolh xkgalhtutukan akxni kalakgchimpa talipuwan xlakata lu tlan xlatalalinkgo. Rut chu Orpá ni xkgalhikgo kamanan akxni nikgolh xchixkukan chu nina xlinkgo kata (Rut 1:5).

8. ¿Tuku lakwan xtayat Jehová max lu lakgatilh Rut?

8 ¿Makgtayalh xtakanajla Rut akxni nilh xchixku? Max ni makgtayalh. Anta kMoab lhuwa dioses xkakninanikan, nema tlakg xlakgapaskan wa Kemós (Núm. 21:29). Wankan pi moabitas xmakgnikgo xkamanankan akxni xkakninanikgo xdioseskan, litasiya la lixkajni xlikatsikgo chu lu nitlan tuku xtlawakgo kxtakanajlakan. Pero ¡lu tanu la xlikatsi xDioskan Israel! Putum tuku max xmasiyanikgonit Rut Mahlón chu Noemí xlakata xDios Israel tiku lu xapaxkina chu lakgalhamana max lu lakgatilh. Jehová ni xlakaskin nakgalhakgaxmatkan kaj xlakata xpekuanikan wata xlakaskin nakgalhakgaxmatkan xlakata xpaxkikan (kalikgalhtawakga Deuteronomio 6:5). Xlakata nilh xchixku max tlakg tlan tsukulh  talalin xputiatse. Tlan nalakpuwanaw la xkgaxmatni xputiatse tiku lina kata, akxni xlitachuwinan putum tuku tlawanit Dios tiku kgalhi putum litliwakga chu la xkapaxki, xkalakgalhaman akxni xkuenta tlawa xkachikin.

Rut putsalh xtamakgtay Noemí akxni xtitaxtuma talipuwan

9-11. 1) ¿Tuku lakkaxwilikgolh natlawakgo Rut, Noemí chu Orpá? 2) ¿Tuku kinkamasiyaniyan xlakata tuku nitlan titaxtukgolh?

9 Noemí max xkgalhskininan la xwi xkachikin. Akgtum kilhtamaku, max kgaxmatnilh chatum stana pi kʼIsrael nialh xʼanan tatsinkstat xlakata Jehová xkamakgtayama. Anampa liwat kBelén chuna la xwamputun xtukuwani «Xchik Kaxtalanchu». Wa xlakata Noemí lakpuwa nataspitpara kxkachikin (Rut 1:6).

10 ¿Tuku xtlawakgolh Rut chu Orpá? (Rut 1:7.) Tuku nitlan titaxtukgolh xchatiykan tlawalh pi lu tlan natalalinkgo xputiatsekan. Max Rut lu xlakgati la xlikatsi Noemí chu pi lu xkanajlani Jehová. Chu chuna xkgalhtutukan ankgolh kJudá.

11 ¡Lhuwa tuku kinkamasiyaniyan uma tuku talichuwinan xlakata Rut! Akgtum liʼakxilhtit, pi putum titaxtukgo tuku nitlan maski tiku tlan o nitlan likatsikgo (Ecl. 9:2, 11). Na kinkamasiyaniyan lu tlan liʼakxilhtit: akxni wi tiku niy kkifamiliajkan naputsayaw tiku nakinkamakgtayayan pero tlakg tlan wa nakalakganaw tiku na litakgenukgo Jehová, xDios Noemí (Prov. 17:17).

Xtapaxkit Rut nema ni makgxtakgnan

12, 13. ¿Tuku xlakata Noemí tasaskini Rut chu Orpá kataspitkgolh kxchikkan chu la kgalhtinankgo?

12 Chuna la tlawamakgolh ktiji uma kgalhtutu lakpuskatin, Noemí wi atanu tuku lakpuwantilha. Lakpuwama xlakata laktsumajan tiku taʼamakgolh, tiku lu paxkikgo chu xkapaxkikgo xkamanan. Ni lakaskin tlakg napatinankgo. Liwana katsi pi nila tuku nakamaxki komo nataʼankgo kBelén.

13 Noemí nialh tayani chu katasaskini: «Kapitit, kataspittit, kxchik mintsekan. Jehová kakalimasiyanin tapaxkit nema  ni makgxtakgnan, chuna la wixin kalimasiyanitit lakchixkuwin tiku nikgonita chu chuna la kilalimasiyaniw». Noemí lakaskin pi Jehová kakasikulunatlawalh chu kakamaxkilh atanu xchixkukan chu tlakg tlan latamat. Biblia wampara: «Chu katsukli [o kasputli] chu xlakan tsukukgolh tasakgo». Ni tuwa akgatekgsaw tuku xlakata lu xpaxkikgo xputiatsekan, Noemí lu tlan xlikatsi chu lu xkapaxki. Laktsuman ni makgxtakgputunkgo chu wanikgo: «Nakkatataspitan kminkachikin» (Rut 1:8-10).

14, 15. 1) ¿Tuku lakgtaspitpa Orpá? 2) ¿Tuku wani Noemí Rut xlakata xtaspitli?

14 Pero Noemí ni lakaskin. Kawani pi komo nataʼankgo nila tuku nakamaxki kʼIsrael, xlakata nialh kgalhi xchixku tiku nakuentajtlawa chu kamanan tiku natatamakgaxtokgkgo. Na lakpuwan pi ni katitalakgpalilh xlatamatkan. Asta wan pi nitlan limakgkatsi xlakata nila katikakuentajtlawalh. Orpá akxilha pi chuna: tlakg tlan nakitaxtuni komo natamakgxtakga kMoab, niku kgalhkgalhima xtse chu putum xfamilia. Komo nataspita, tasiya pi tlakg tlan nakitaxtuni. Wa xlakata maski lu nitlan makgkatsi tsuka xputiatse chu taspita (Rut 1:11-14).

15 ¿Chu Rut? ¿Lakgpalinilh xtapuwan xputiatse? Ni lakgpalilh. Tatsokgni wan pi Rut ni makgxtakgli. Max Noemí tlawamaja pero akxni akxilha pi Rut stalanima, wani pi Orpá «taspitparanit kxkachikin chu xdioses», chu tasaskini pi na kataspitli (Rut 1:15). Xtachuwin Noemí wi tuku lu xlakaskinka kinkamasiyaniyan: Orpá ni kajwatiya xtaspitma kxkachikin, na xlakgtaspitma «xdioses». Nitu xlimakgkatsi maski nakakninanipara Kemós chu atanu ni xaxlikana dioses. ¿Nachuna xlakpuwan Rut?

16-18. 1) ¿Tukuya tachuwin limasiya Rut pi kgalhi tapaxkit nema ni makgxtakgnan? 2) ¿Tuku tlawalh Rut xlakata xkgalhi tapaxkit nema ni makgxtakgnan? (Na kaʼakxilhti dibujo xla Rut chu Noemí.)

 16 Rut lu xpaxki Noemí chu Jehová. Wa xlakata ni liwana xkatsi tuku xʼama tlawa. Akxni xakstukan tamakgxtakgkgolh kxakapokgxniwa tiji, lakaʼakxilha Noemí chu wani: «Ni kintasaskini xlakata nakmakgxtakgan, chu ni kiskini alakatanu nakan; xlakata niku wix napina na anta nakan, chu niku wix nalhtataya na anta naklhtata. Minkachikin kinkachikin nawan, chu mi Dios na kiDios nawan. Niku wix naniya na anta nakni, chu anta nakimaknukan [o nakimujukan]. Chuna kakintlawalh Jehová chu kakintlawanilh atanu tuku nitlan komo ni wa linin tuku natlawa pi nakmakgxtakgan» (Rut 1:16, 17).

«Minkachikin kinkachikin nawan, chu mi Dios na kiDios nawan»

17 ¡Uma lu laktlan tachuwin putum kilhtamaku talakapastaka! Chu maski titaxtunita max akgtutu mil kata akxni chuna tiwa Rut, chuntiya lakapastakkan. Rut limasiyalh lu stlan tayat: tapaxkit nema nikxni makgxtakgnan. Uma tapaxkit nema Rut kgalhini xputiatse lu lanka chu nikxni makgxtakgnan, asta ni pekuan nataʼan xanikuta naʼan Noemí. Kaj linin nakamapitsi. Litasiya pi Rut tlan namakgtapakgsi kxkachikin Noemí xlakata makgxtakgli putum tuku xalak Moab, asta xdioses. Xla ni chuna la Orpá, xla xlikana skujniputun xDios Noemí, Jehová. *

18 Chu xchatiykan tsukuparakgolh ankgo kBelén. Wankan pi max tlawankgolh akgtum semana. Pero xlakata xchatiykan xtlawamakgolh, uma tlawalh pi ni lu tuwa xmakgkatsikgolh.

19. ¿La tlan nalimasiyaya tapaxkit nema ni makgxtakgnan chuna la Rut, kfamilia, tiku katalalipina chu kcongregación?

19 La uku anan lhuwa tapatin. Chuna la wan Biblia, «lhuwa skalajwa [o tuwa] namin kilhtamaku», niku la uku kgalhiyaw lhuwa tapatin (2 Tim. 3:1). Wa xlakata la uku lu xlakaskinka namasiyayaw tapaxkit nema ni makgxtakgnan, la tlawalh Rut. ¿Tuku kilhchanima uma lu tlan tayat? Litliwakga nema kinkamatlawiyan tuku tlan kʼuma xalixkajni kakilhtamaku. Tiku paxkinan chu nikxni makgxtakgnan putum kilhtamaku tayani, xlakata tiku makgtayaputun. Uma tayat lu xlakaskinka ktamakgaxtokgat, kfamilia, tiku katalalinaw chu kcongregación (kalikgalhtawakga 1 Juan 4:7, 8, 20). Komo nakgalhiyaw uma tapaxkit, nachuna natlawayaw la Rut.

 Rut chu Noemí kBelén

20-22. 1) ¿La kitaxtunilh Noemí xliputum kata nema latamalh kMoab? 2) ¿Tiku lakpuwan Noemí pi xmapatinima? (Na kaʼakxilhti Santiago 1:13.)

20 Xlikana, nixtachuna kaj wankan pi wi tiku paxkikan chu nikxni katimakgxtakgka chu atanu xlikana nalimasiyakan. Pero, Rut xlikana paxkilh Noemí chu Jehová tiku xDios tlawalh chu nikxni kamakgxtakgli. Kaʼakxilhwi la tlawalh.

21 Chalh kilhtamaku chankgolh kBelén, nema wi max 10 kilómetros kxsur Jerusalén. Xlakata lu tsukulh talichuwinan pi taspitli Noemí uma litasiya pi max lu xkalakgapaskan kʼuma aktsu kachikin. Lakpuskatin liwana akxilhkgo chu wankgo: «¿Wa uma Noemí?». Max tasiya la xlilhuwa patinalh kMoab (Rut 1:19).

22 Noemí kawani xtalakgaputsit nema titaxtunit xparientes chu amakgapitsi tiku xtalakatsu xwankgonit. Asta kawani pi kalakgpalinikgolh xtukuwani, nema wamputun «Lu stlan kimamakgkatsini», chu xwanika Mará wamputun «Xun» ¡Lu nitlan makgkatsi! Chuna la Job, lakpuwan pi wa Jehová tiku mapatinima (Rut 1:20, 21; Job 2:10; 13:24-26).

23. ¿Tuku xlakpuwama Rut, chu tukuya Limapakgsin xʼanan xpalakata tiku nitu xkgalhikgo? (Na kaʼakxilhti nota.)

23 Noemí chu Rut tsinu tsinu lismanikgo latamat kBelén, chu Rut lakpuwan la nakuentajtlawakan chu la nakuentajtlawa xputiatse. Katsilh pi Limapakgsin nema kamaxkilh Jehová israelitas xkawani pi xlimakgxtakgatkan xwanit kxpukuxtukan tuku tlan xmakikgolh tiku nitu xkgalhikgo. Akxni lananankgo kkapukuxtun tlan nastalanikgo skujnin tiku makikgo tamakgalan chu nasakikgo tuku makgaxtakgtilhakgo. Na tlan namakikgo tuku staknit kxkilhpanin pukuxtun chu kxtsastunin (Lev. 19:9, 10; Deut. 24:19-21). *

24, 25. ¿Tuku tlawa Rut akxni chan kxpukuxtu Boaz chu la xtlawakan akxni ksakkan tuku xmakgxtakgkgo skujnin?

 24 Xkilhtamakuta namakikan cebada (max akxni xtsuku abril, chuna la maklakaskinaw kincalendariojkan). Rut an kkapukuxtun xlakata naputsa tiku namaxki talakaskin nasaki tuku makgxtakgkgo skujnin. Xalan chalh kxpukuxtu chatum chixku xwanikan Boaz, tiku lhuwa tumin xkgalhi, chu xpariente xwanit xchixku Noemí. Maski Rut katsi pi nitu katiwanika komo naʼan saki tuku makgxtakgkgo skujnin kʼakgtum pukuxtu, skini talakaskin tiku kapulalin skujnin. Xla maxki talakaskin, chu Rut tunkun tsuku skuja (Rut 1:22–2:3, 7).

25 Chuna la skujnin katilhamakgolh cebada, Rut kastalanitilha. Saktilha tuku makgxtakgtilhakgo o nema ni akxilhkgo, pachitilha chu lin niku tlan nalakpajmi. Lu tuwa tlawakan uma taskujut chu tlakg tuwa tamakgkatsi chuna la tastunutilha. Pero, Rut nipara tsinu jaxa kaj taya akxni lakaxakakan chu akxni wi tuku nawa «kchiki», max niku katlawanikanit skujnin xlakata tlan najaxkgo chu naskgekgnankgo.

Rut tantaku skujli maski kaj xsaktilhalh tuku xmakgxtakgkan xlakata xkgalhilh tuku xmaklakaskin chu Noemí

26, 27. ¿La likatsi Boaz chu la likatsini Rut?

26 Max Rut ni lakaskin nakatsikan pi anta lama. Pero akxni Boaz akxilha, kgalhskin tiku kapulalin skujnin tiku uma tsumat. Boaz chatum chixku tiku lanka takanajla kgalhi chu lu paxki Dios. Xla kawani kskujnin akxni chan kxpukuxtu: «Jehová kakatatawilan», chu tiku kaj kilhtamaku skujkgo o tiku max ni israelitas xwankgonit, nachuna kgalhtikgo. Akxni akxilha Rut, lu tlan likatsini chuna la chatum tlat likatsini xtsumat (Rut 2:4-7).

 27 Wa xlakata wani «kintsumat» chu wani pi chuntiya kakasakkilh kxpukuxtu chu katalatamakgolh laktsumajan tiku skujnanikgo xlakata ni nalikgalhkgamanankgo skujnin. Nachuna, akxilha pi ni nakitsankgani liwat akxni nawayankgokan (kalikgalhtawakga Rut 2:8, 9, 14). Pero, wani lakwan tachuwin chu matliwakglha. ¿Tuku xlakata?

28, 29. 1) ¿La xlichuwinankan Rut? 2) ¿Tuku kilitlawatkan xlakata tlan nalitamakgtayayaw Jehová?

28 Rut kgalhskin Boaz tuku xlakata lu tlan likatsini maski ni israelita. Boaz wani pi katsinit la lu tlan likatsininit xputiatse. Noemí max lu tlan kalitachuwinalh lakpuskatin xalak Belén xlakata Rut tiku lu xpaxki. Boaz na katsinit pi Rut na skujnaniputun Jehová wa xlakata wani: «Jehová kasikulunatlawalh tuku tlawapat, chu Jehová xDios Israel kamaxkin mintaskgaw nema tlakg xatlan, tiku kxpakgan tanita litatsekga» (Rut 2:12).

29 Xlikana pi kxpakgan Jehová milh tamakgtaya chuna la tantum aktsu xtilan litatsekga xtse. Lu matliwakglhli Rut tuku wanilh Boaz chu xlikana paxtikatsinilh. Akxni wayankgolh ampa skuja asta akxni kgotanulh (Rut 2:13, 17).

30, 31. ¿Tuku kinkamasiyaniyan Rut xlakata xaskujnin nawanaw, napaxtikatsininanaw chu nalimasiyayaw tapaxkit nema ni makgxtakgnan?

30 Lu tlan liʼakxilhtit kinkawilinin Rut la uku, xlakata ni anan tumin. Maski Rut xkatsi pi xlakgchan namakgtayakan lu xpaxtikatsininan tuku xlimakgtayakan. Ni xlimaxanan maski tantaku xsaktilha tuku xmakgxtakgkan xlakata xmakgtakgalhli tiku lu xpaxki. Nachuna, lu xlakaskinka akxilhli chu kgaxmatli tastakyaw xlakata nitu xʼakgspulalh akxni kskujli chu xlakata tiku tlan xkatalalilh. Pero putum kilhtamaku xkatsi pi wa xkuentajtlawama: xTlat Jehová.

31 Komo nakapaxkiyaw amakgapitsi chu ni nakamakgxtakgaw chuna la tlawalh Rut, chu ni tlankajwa nawanaw, xaskujnin chu napaxtikatsininanaw, kintakanajlakan nakamatliwakglha amakgapitsin. Chu Jehová, ¿la kakuentajtlawalh Rut chu Noemí? Nalichuwinanaw kʼatanu capítulo.

^ párr. 17 Lu xlakaskinka nalichuwinanaw pi Rut ni kaj mapakuwilh «Dios», chuna la xwankgolh makgapitsi tiku ni israelitas, wata na maklakaskilh xtukuwani: Jehová. Anta La Biblia, xla Salvatore Garofalo, wan: «Akxni Rut limaklakaskilh xtukuwani Yavé [o Jehová] xlakata wanilh Noemí pi ni xmakgxtakgli, limasiyalh pi xmakgtapakgsiya kʼIsrael».

^ párr. 23 Uma xtlawa pi Rut lu tlan xtawilalh kkachikin, nipara tsinu xtatalakxtumi xkachikin, Moab. Kxamakgan Oriente nitlan xkalikatsinikan tiku xninit xchixkukan. Maktum likgalhtawakga wan: «Akxni xniy xchixku chatum puskat, wa xkamanan tiku xmakgtakgalhkgo. Pero komo ni xkgalhi kamanan akstu xtastay la chatum skujni, ksta xmakni o xniy».