Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 CAPÍTULO 10

Tatayalh xaxlikana takaknin

Tatayalh xaxlikana takaknin

1, 2. 1) ¿La xlituwa wi xlatamatkan israelitas? 2) ¿Tiku na chankgolh kxsipi Carmelo?

ELÍAS, xpalakachuwina Dios, kaʼakxilha pi israelitas takgalana tawakamakgo ksipi Carmelo. Maski kapukswaku, liwana tasiya pi israelitas nitu kgalhikgo. Akgtutu kata a itat nema ni milh sen, tasiya pi lu nitlan tuku liminit.

2 Xsacerdotes Baal tiku 450 kalakgstipataxtukgo israelitas xlakata kaʼakgapulaputunkgo. Liwana tasiya pi lu ni akxilhputunkgo palakachuwina Elías. Maski mapakgsina Jezabel kamakgninita lhuwa xlakskujnin Dios, Elías chuntiya ni tataya nakakninanikan Baal. Pero ¿la xlimakgas natayanijku Elías? Umakgolh nixaxlikana palakachuwinanin max lakpuwankgo pi kaj namakgxtakga xaxlikana takanajla (1 Rey. 18:4, 19, 20). Na chin kxputlaw mapakgsina Acab, tiku na ni akxilhputun Elías.

3, 4. 1) ¿Tuku xlakata max pekuan Elías? 2) ¿Tukuya takgalhskinin nakgalhtinanaw?

3 Uma kilhtamaku wi tuku nala nema nikxni a xla kxlatamat uma xakstu palakachuwina. Natasiya tiku tlakg tliwakga, wa Dios o tuku nixatlan. ¿La max makgkatsi chuna la talakatsuwitilha tuku nala? Biblia wan pi Elías “nachuna xwanit, la akinin”, wa xlakata na xpekuan (kalikgalhtawakga Santiago 5:17). Liwana katsiyaw pi Elías max lu xakstu xmakgkatsikan xlakata xya kxlakatin kachikin tiku ni xkgalhakgaxmatkgo Dios, chatum mapakgsina tiku xmakgxtakgnit Jehová chu sacerdotes tiku xmakgniputunkgo (1 Rey. 18:22).

4 ¿Tuku xlakata lu nitlan tawi uma kachikin? ¿Tuku kinkamasiyaniyan uma tuku lichuwinan Biblia? Kaʼakxilhwi la limasiyalh xtakanajla Elías chu la nakinkamakgtayayan la uku.

Talakkaxtlawa akgtum taʼakglhuwit

5, 6. 1) ¿Tuku lu nitlan xlama kʼIsrael? 2) ¿Tuku lu nitlan tlawalh mapakgsina Acab kxlakatin Jehová?

5 Atsinu ni putum xlatamat, Elías xʼakxilhnit la xlakatsalakan tuku tlakg xlakaskinka xliʼakxilhatkan kachikin chu nila tuku xtlawa:  nakakninanikgo xaxlikana Dios. Akglhuwata kata lhuwa israelitas xtamakgtlinikgonit Jehová chu xkakninanikgo nixaxlikana xdioseskan atanu kachikinin. Pero akxni xlama Elías, milh kilhtamaku akxni tlakg tsukuka kakninanikan nixaxlikana dioses.

6 Mapakgsina Acab xtlawama tuku lu nitlan kxlakatin Jehová. Xtatamakgaxtokgnit Jezabel, xtsumat xmapakgsina Sidón. Xtlawaputun pi nialh xkakninanika Jehová chu xlakaskin xliputum Israel xkakninanika Baal. Acab na tlawalh xtalakaskin xpuskat chu matlawinalh akgtum templo chu niku xmakamastanika tamakamastan Baal. Asta wililh lu nitlan liʼakxilhtit xlakata lakgtakilhputalh uma nixaxlikana dios (1 Rey. 16:30-33).

7. 1) ¿Tuku xlakata lu lixkajni xwanit akxni xkakninanikan Baal? 2) ¿Tuku xlakata liwana katsiyaw pi Biblia akxtum tuku lichuwinan xlakata la xlimakgas ni senalh? (Kaʼakxilhti  recuadro.)

7 ¿Tuku xlakata lu lixkajni xwanit akxni xkakninanikan Baal? Pulana, xtlawanit pi nialh xkakninanika xaxlikana Dios. Nachuna, kʼuma takanajla xtlawakgokan tuku xalixkajni, lilhuwa xtalakgxtumikgokan, lakpuskatin chu lakchixkuwin xtlawakgo talakgxtumit kxlakatin xʼidoloskan chu asta xmakamastakgo kamanan. Wa xlakata, Jehová malakgachanilh Elías mapakgsina Acab xlakata xmakatsinilh pi ni xʼama senan asta akxni Elías xwa pi nasenampara (1 Rey. 17:1). Titaxtulh makgapitsi kata asta akxni Elías lakgampa Acab xlakata xwanilh pi xkamamakxtumilh kachikin chu xsacerdotes Baal kxsipi Carmelo. *

Tlan nawanaw pi tuku xtatlawa akxni xkakninanikan Baal chuntiyaku tatlawama uku

8. ¿La nakinkamakgtayayan nakatsiyaw akxni xkakninanikan Baal?

8 Pero ¿tuku xlakata xlakaskinka naʼakxilhaw uma taʼakglhuwit? ¿Tuku xlakata xlakaskinka nakatsiyaw xlakata takaknin nema xmaxkikan Baal? La uku, nialh anan templos chu nipara niku maxkikan tamakamastan uma dios. Pero uma ni kaj akgtum cuento xala makgasa (Rom. 15:4). Tachuwin baal wamputun «malana» chu Jehová xkaskini xkachikin pi «xbaalkan» xtlawakgolh, chu «xmalanakan xwa» (Is. 54:5). ¿Na akxilha pi la uku lhuwa «xmalanakan» kgalhikgo latamanin chu ni wa Dios tiku kgalhi xliputum litliwakga? Latamanin xmalanakan tlawakgo akxni kaj wa putsakgo tumin, xatlan taskujut, talakgastan, talakgxtumit, o atanu «dioses» nema anankgo chu ni wa Jehová (Mat. 6:24; kalikgalhtawakga Romanos 6:16). Uma wamputun pi la uku chuntiya lhuwa kakninanikan Baal. Chuna la akxilhaw, akxni takatsilh tiku xaxlikana Dios, komo wa Jehová o Baal, nakinkamakgtayayan nalaksakaw tiku naskujnaniyaw la uku.

 ¿Tukuya «pulaktiy talakapastakni» xkgalhikgo?

9. 1) ¿Tuku xlakata lu tlan xwanit kxsipi Carmelo xlakata xlimasiyaka pi takaknin nema xmaxkikan Baal kaj taʼakgsanin? (Na kaʼakxilhti nota.) 2) ¿Tuku kawanilh Elías kachikin?

9 Kxʼakgspun sipi wanikan Carmelo, liwana xtasiya mar Grande (Mediterráneo) chu kxakaxtum Cisón chu lhuwa sipi xalak Líbano nema xwi knorte. * Pero chuna la taxtutilha Chichini kʼuma lu xlakaskinka kilhtamaku, tasiya pi lu nitlan la wi tiyat. Xatlan tiyat niku lhuwa xmakgalanan nema xkamaxkikanit xkamanan Abrahán nialhtu xmakgala chu xmakaskakanit chichini, wa xkuenta xkachikin Dios xlakata ni xkgalhakgaxmatnikgo. Elías kalakgan israelitas tiku tamakxtumikgonit chu kawani: «¿Asta tukuya kilhtamaku  chuntiya nakanajlayatit pulaktiy talakapastakni? Komo Jehová wa Dios xaxlikana, wa kastalanitit; pero komo Baal xaxlikana, wa kastalanitit» (1 Rey. 18:21).

10. ¿Tukuya “pulaktiy talakapastakni” kstalanimakgo israelitas chu tuku lu xlakaskinka nialh xlakapastakkgo?

10 ¿Tuku xwamputun Elías akxni wa “stalaniyatit pulaktiy talakapastakni”? Israelitas ni xaʼakxilhkgo pi xlilaksakatkan tiku nakakninanikgo, komo wa Baal o wa Jehová. Xlakpuwankgo pi tlan pulaktiy tuku xtlawakgolh: pi tlan xlimakaksakgolh Baal xalixkajni takaknin chu xlipulaktiy pi tlan kskinikgolh Jehová pi xkakuentajtlawalh. Max xlakpuwankgo pi Baal xʼama sikulunatlawa xtachanankan chu xʼanimaleskan, chu «Jehová tiku pulalin lhuwa soldados» xʼama kamakgtaya akxni xtlawakgolh guerra (1 Sam. 17:45). Pero xwi tuku lu xlakaskinka nema xpatsankgakgonit, tuku la uku lhuwa na patsankgakgo: Jehová lakaskin pi kaj xakstu nakakninanikan. Malakatsukina lakgchan chu kinkaskiniyan pi kaj xakstu nakakninanikan. Wa xlakata, putum takaknin nema maxkikan pero komo tamalakgxtumikanit atanu takaknin Jehová nipara tsinu makgamakglhtinan chu ni akxilhputun (kalikgalhtawakga Éxodo 20:5).

11. ¿Tuku kinkamatlawiyan tuku kawanilh Elías israelitas anta kxsipi Carmelo?

11 Israelitas «kstalanimakgo pulaktiy talakapastakni», la tiku tlawamputun kkgantiy tiji. La uku, lhuwa tiku nachuna tlawakgo akxni mastakgo talakaskin pi amakgapitsi «baales» napulalinkgo xlatamatkan chu natlawakgo pi nialh naskujnanikgo Jehová. Tuku Elías kawanilh israelitas kinkamakgtayayan naʼakxilhaw la kakninanimaw Jehová chu tuku tlakg xlakaskinka akxilhaw kkilatamatkan.

Takatsi tiku xaxlikana Dios

12, 13. 1) ¿Tuku wa Elías pi xtlawakgolh xsacerdotes Baal? 2) ¿La limasiyayaw pi lipawanaw Jehová chuna la tlawalh Elías?

12 Alistalh, Elías kawanilh xsacerdotes Baal natlawakgo tuku ni tuwa xlakata nalitakatsi tiku xaxlikana Dios. Xlikaxtlawatkan pumakamastan chu anta nawilikgo tamakamastan, natlawanikgo oración xdioskan chu naskinikgo pi kamalakgpasilh. Chu Elías nachuna natlawa. ¿Tuku xlakata chuna natlawakgo? Palakachuwina kawanilh pi «Dios tiku nalikgalhtinan lhkuyat wa xaxlikana». Xlikana, Elías liwana katsi tiku xaxlikana Dios. Lu tliwakga wi xtakanajla wa xlakata asta kawanilh pi xlakan pulana chuna xtlawakgolh. Akxni laksakkgolh wakax nema namakamastakgo, tsukukgolh tlawanikgo oración Baal (1 Rey. 18:24, 25). *

 13 Maski la uku nialh tlawakan milagros chuna la ama kilhtamaku, Jehová nitu talakgpalima chu tlan nalipawanaw la lipawa Elías. Akgtum liʼakxilhtit, akxni katatanokglhaw tiku ni kanajlakgo tuku wan Biblia, kakamaxkiw talakaskin nakinkawanikgoyan tuku lakpuwankgo. Chuna la Elías kamastaw talakaskin pi wa xaxlikana Dios tiku nalakkaxtlawa uma. ¿La natlawayaw? Ni kiʼakstukan nakinkalipawankanan, wata wa kamaklakaskiw xTachuwin, nema tlawaka xlakata «tlan nakatsiy lantla natlaway xlipaks ntu ntlan» (2 Tim. 3:16).

Elías kaj taʼakgsanin xʼakxilha xkakninanikan Baal, chu xlakaskin pi xkatsika tuku xaxlikana kxlakatin putum kachikin

14. ¿La kalikgalhkgamanalh Elías xpalakachuwinanin Baal chu tuku xlakata chuna tlawalh?

14 Xpalakachuwinanin Baal kaxwilikgonita xtamakamastankan chu tasaskinimakgo xdioskan. Makglhuwa wankgo: «¡Baal, kakilakgalhtiw!». Titaxtulh lhuwa horas. Biblia wan: «Nitu takgaxmatli, chu niti kgalhtinalh». Tastunut Elías tsukulh kamamaxani umakgolh akgsaninanin lakchixkuwin, kawanilh pi Baal lu lhuwa taskujut kgalhi chu nila kakgalhti, pi xʼanit kkakiwin o max klhtatama chu lakaskin pi namastakwanikan. Elías kawani: «Lu palha katasaskinitit». Xla xkatsi pi takaknin nema xmaxkikan Baal ni xatlan xwanit chu wa xlakata xlimasiyaputun kxlakatin putum kachikin pi nixaxlikana dios (1 Rey. 18:26, 27).

15. ¿La limasiya tuku kaʼakgspulalh xsacerdotes Baal pi lu nitlan akxni atanu tiku malana tlawakan chu ni wa Jehová?

15 Akxni kgaxmatkgolh tuku kawanilh Elías, xsacerdotes Baal tlakg sitsikgolh chu «tlakg palha tsukukgolh tasaskinkgo chu chuna la xlismanikgonit tsukuka kalichukukan dagas chu lancetas, asta taxtulh xkgalhnikan». ¡Chu nitu litaxtulh tuku tlawakgolh! «Nitu takgaxmatli, chu niti kgalhtinalh, chu niti kuenta katlawanilh.» (1 Rey. 18:28, 29.) Chuna xla, Baal ni xaxlikana xwanit; wa tuku xmaklakaskima Satanás xlakata israelitas xtamakgatlinikgolh Jehová. Liwana kinkamasiyaniyan pi kaj wa Jehová tiku xatlan malana chu putum tiku nakakninanikgo atanu dios natamaxani chu nakatsikgo pi nitu xlilaka (kalikgalhtawakga Salmo 25:3 chu 115:4-8).

Kgalhtinan xaxlikana Dios

16. 1) ¿Tuku max kamalakapastakalh israelitas akxni akxilhkgolh pumakamastan nema xkaxtlawama Elías? 2) ¿La limasiyalh Elías pi lu xlipawan Jehová?

16 Akxni xkgotanumaja, lakgchalh Elías namasta tamakamastan. Pulana kaxtlawapara niku xmaxkikan tamakamastan Jehová nema  xlakxtlawakanit, chu wa tiku xmasputuputunkgo xaxlikana takaknin tiku chuna xtlawakgonit. Wililh 12 chiwix, xlakata max 10 laklanka familias nema xlitakgatsi Israel xlakapastakkgolh pi chuntiya xlikgalhakgaxmatatkan xLimapakgsin Jehová nema kamaxkilh 12 laklanka familia akxni xlama Moisés. Makaxli tuku namakamasta chu lakgmunuwililh, max anta tiyalh chuchut lakatsuku kpupunu lilakgapaskan Mediterráneo. Asta puwaxnalh kxmakni pumakamastan chu limatsamalh chuchut. Chuna la akxilhaw, xpalakachuwinanin Baal ni wilinikgolh chuchut xtamakamastankan pero Elías tlakg lhuwa tuku wilinilh xlakata tlakg tuwa xlakgpasalh. Chuna limasiyalh pi lu xlipawan xlitliwakga xDios (1 Rey. 18:30-35).

Xʼoración Elías limasiyalh pi chuntiya xlilakgaputsa israelitas, xlakata xlakaskin pi Jehová «kakalakgpalinilh xnakujkan»

17. ¿La limasiyalh xʼoración Elías tuku tlakg xlakaskinka xʼakxilha, chu la na tlan chuna natlawayaw kiʼoracionkan?

17 Alistalh, Elías tlawalh aktsu oración niku limasiya tuku tlakg xlakaskinka akxilha. Xapulana chu tuku tlakg xlakaskinka xlimasiyaputun wa pi kaj Jehová «Dios kʼIsrael» chu ni Baal. Xlipulaktiy xkamakatsiniputun pi xla kaj chatum skujni chu wa Jehová minini namalankikan. Xaʼawatiya, lakaskin pi israelitas kakakninaniparakgolh Jehová, chu pi Jehová «kakalakgpalinilh xnakujkan» chu kamakgxtakgkgolh tuku tlawamakgo (1 Rey. 18:36, 37). Elías chuntiya kapaxki maski kaʼakgspulama lhuwa tuku nitlan xlakata ni kanajlakgo. ¿La tlawayaw kiʼoracionkan? ¿Limasiya pi na paxkiyaw Dios, tataktujuyaw chu na kalakgalhamanaw tiku maklakaskinkgo tamakgtay?

18, 19. 1) ¿La kgalhtilh Jehová xʼoración Elías? 2) ¿Tuku kalimapakgsilh Elías pi xtlawakgolh israelitas chu tuku xlakata ni xkalakgchan xkalakgalhamanka xsacerdotes Baal?

18 Akxni Elías tsukulh tlawa xʼoración, max lhuwa xlakpuwankgo komo Jehová na ni xaxlikana xʼama litaxtu chuna la Baal. Pero akxni tlawakgolh xʼoración tasiyalh tiku xaxlikana Dios, Biblia wan pi «tsukulh takta klhkuyat Jehová chu tsukulh lhkuyu tamakamastan chu xalaktsu kiwi chu chiwix chu pokgxni chu maskakalh chuchut nema xwi niku xpuwaxkanit» (1 Rey. 18:38). ¡Lu tlan la kgalhtinalh Jehová! ¿Tuku tlawakgolh kachikin?

«Tsukulh takta klhkuyat Jehová»

19 Xputumkan tsukukgolh wankgo: «¡Jehová, wa xaxlikana Dios! ¡Jehová, wa xaxlikana Dios!» (1 Rey. 18:39). Asta aku wankgolh pi Jehová wa xaxlikana Dios. Pero ¿kaj wa uma talakaskin? Akxni wankgolh pi Jehová xaxlikana Dios xlakata akxilhkgolh pi taktalh lhkuyat kʼakgapun ni wamputun pi xlikana xkanajlakgo. Wa xlakata  Elías kawanilh tuku xlimasiyakgolh xtakanajlakan. Kaskinilh pi xtlawakgolh tuku makgasa xlitlawatkan xwanit: xkgalhakgaxmatkgolh xLimapakgsin Jehová. Chu Limapakgsin xwan pi xkamakgnika nixaxlikana palakachuwinanin chu tiku xkakninanikgo ídolos (Deut. 13:5-9). Xsacerdotes Baal xtalamakgasitsinkan Jehová xwankgonit chu xlaktlawaputunkgo xtalakaskin Jehová. ¿Xkalakgchan xkalakgalhamanka? ¿Kalakgalhamankgolh laktsu kamanan nema xastakna kalhkuyukgolh akxni xmakamaxkikgo Baal? (Kalikgalhtawakga Proverbios 21:13; Jer. 19:5.) Umakgolh lakchixkuwin xkalakgchan xkamakgnika. Wa xlakata Elías limapakgsinalh pi xkamakgnika chu kachikin chuna tlawakgo (1 Rey. 18:40).

20. ¿Tuku xlakata ni xlilat tuku wankgo makgapitsi kgalhtawakgananin xlakata akxni kamakgnika xpalakachuwinanin Baal?

20 La uku, makgapitsi kgalhtawakgananin wankgo pi nitlan tuku tatlawalh kxsipi Carmelo. Wilakgolh tiku lakpuwankgo pi tiku malakatsalikgo la stalanikgo akgtum takanajla nalimaklakaskinkgo uma xlakata nakalitlawanikgo amakgapitsi tuku nitlan. Chu wilakgolh tiku asta limakgninankgo xtakanajlakan. Pero Elías ni xmalakatsali la kstalani xtakanajla. Kajwatiya kgalhakgaxmatli Jehová akxni limapakgsinalh pi xkamakgnika tiku xtlawamakgo tuku nitlan. Nachuna, kstalaninanin Cristo katsikgo pi nila tlawakgo la Elías, nila kamakgnikgo tiku lixkajni likatsikgo. Wata stalanikgo xlimapakgsin Jesús nema xlitlawatkan putum kstalaninanin akxni wanilh Pedro: «Kamanu minkuchilu [o espada] kxputanun, xampi xlipaks wa nti nkuchilu xlimakapawankgolh, na wa nkuchilu nalinikgoy» (Mat. 26:52). Nialh makgas, wa Jehová natlawa pi Jesucristo nakamalakgaxokge.

21. ¿Tuku xlakata Elías kinkawilinin lu tlan liʼakxilhtit xlakata takanajla?

21 Akinin xaxlikana kstalaninanin Cristo nalimasiyayaw kintakanajlakan chuna la linaw kilatamatkan (Juan 3:16). Elías kinkawilinin lu tlan liʼakxilhtit. Xla kaj Jehová kakninanilh chu kawanilh amakgapitsin pi nachuna xtlawakgolh. Ni pekualh chu wa pi takaknin nema xmaxkikan Baal kaj taʼakgsanin xwanit, wa takanajla nema xmaklakaskima Satanás xlakata latamanin xtamakgatlinikgolh Jehová. Pero xlakata tlan xlakkaxlalh uma taʼakglhuwit, Elías ni xakstu lipawanka wa lipawa Dios. Liwana tasiya pi putum kilhtamaku tatayalh xaxlikana takaknin, wililh akgtum lu tlan liʼakxilhtit xlakata takanajla nema tlan nachuna natlawayaw.

^ párr. 7 Kaʼakxilhti recuadro « ¿La xlimakgas ni senalh?».

^ párr. 9 Xsipi Carmelo kaxtakni xwanit chu lu stlan xtasiya xlakata un nema xtakutacha kpupunu xlimin sen chu monkganat nema xtlawa pi kastakga xwa. Xlakata xwankgo pi Baal xmakamin sen, max anta unu niku lu xkakninanikan. Xlakata la uku lu kaskakni chu nitu makgala katiyatni, tlan nalimasiyakan pi takaknin nema maxkikan Baal kaj taʼakgsanin.

^ párr. 12 Kilikatsitkan tuku Elías kawanilh xlakata tamakamastan: «Ni namapasiyatit». Makgapitsi kgalhtawakgananin wankgo pi tiku xkakninanikgo ídolos xmin kilhtamaku xtampiwaxkgo pumakamastan, xlakata akxni xlakgpasalh xlakpuwanka pi akgtum litliwakga malakgpasima.